བུ་མོ་གཅིག་གྲོངས་འདུག

མལ་གྲོ་གུང་དཀར་རྫོང་དུ་ H1N1 འགོས་ནད་ཀྱིས་རང་ལོ་ ༨ ལ་སོན་པའི་བུ་མོ་གཅིག་རྐྱེན་ལམ་དུ་བཏང་འདུག

བོད་རང་སྐྱོང་ལྗོངས་འཕྲོད་བསྟེན་ཁང་གིས། ཕྱི་ཟླ་ ༡༠ ཚེས་ ༤ ཉིན་བོད་ལྗོངས་མངའ་ཁུལ་གྱི་མི་གཅིག་ H1N1 འགོས་ནད་ཀྱི་རྐྱེན་པས་འདས་གྲོངས་སུ་ཕྱིན་ཡོད་པ་ཕྱིར་བསྒྲགས་བྱས་ཡོད་འདུག

འགོས་ནད་ཀྱི་རྐྱེན་པས་འདས་གྲོངས་སུ་ཕྱིན་པའི་ནད་པ་དེ་ནི། ལྷ་ས་གྲོང་ཁྱེར་གྱི་མལ་གྲོ་གུང་དཀར་རྫོང་ཁོངས་ཀྱི་རང་ལོ་ ༨ ཅན་གྱི་བུ་མོ་ཞིག་ཡིན་འདུག་པ་དང་། ཁོ་མོར་མགྲིན་པ་ན་བ་དང་གློ་ལུ་རྒྱག་པ། གཟིགས་པོ་ཧྲིལ་བོར་ན་ཟུག་ལངས་པ་བཅས་ཀྱི་ནད་རྟགས་བྱུང་བ་ལ་བརྟེན་ནས། ཕྱི་ཟླ་ ༡༠ པའི་ཚེས་ ༣ ཉིན་མལ་གྲོ་གུང་དཀར་རྫོང་མི་དམངས་སྨན་ཁང་ལ་བསྐྱལ་ནས་སྨན་བཅོས་བྱེད་བྱས་ཡོད་ནའང་། ནད་པའི་ལུས་ཀྱི་ཚ་དྲོད་འཕར་ཏེ་མིའི་རྒྱུན་ལྡན་ལུས་དྲོད་ཀྱི་ཚད་ལས་ཆེས་ཆེར་བརྒལ་བ་སོགས་ཀྱི་རྐྱེན་པས་ཕྱི་ཚེས་ ༤ ཉིན་གྱི་ཞོགས་པར་འདས་གྲོངས་སུ་གྱུར་ཡོད་པ་རེད།

བོད་རང་སྐྱོང་ལྗོངས་ནད་བཅོས་སྔོན་འགོག་ལྟེ་གནས་ཀྱིས་ནད་གཞི་དེ་རྒྱལ་ཁབ་ནད་བཅོས་སྔོན་འགོག་ལྟེ་གནས་ལ་སྤྲད་དེ་བརྟག་དཔྱད་བྱས་མཐར་ H1N1 འགོས་ནད་ཀྱི་རིགས་ཡིན་པ་ཤེས་རྟོགས་བྱུང་ཡོད་པ་དང་། ནད་གཞི་དེའི་སྐོར་གྱི་བརྟག་དཔྱད་སྙན་ཞུ་འཛམ་གླིང་འཕྲོད་བསྟེན་རྩ་འཛུགས་ལ་ཕུལ་རྗེས། ཨ་རིར་གནས་སྡོད་རྒྱའི་གསོ་བ་རིག་པའི་ཆེད་མཁས་པ་ཅིན་ཧྥུའུ་ཧྲིན་གྱིས་ཐེངས་འདིའི་བོད་ཁུལ་དུ་བྱུང་བའི་ H1N1 ནད་གཞིའི་ཐད་འགྲེལ་བརྗོད་གནང་དོན། ནད་གཞི་འདི་ནི་གཙོ་བོ་གློ་ཚད་རེད། གློ་ཚད་འཕར་བའི་ཐོག་ལ་དབྱང་དབུགས་ཀྱིས་མ་འདང་བ་བྱུང་ན་མི་གློ་བུར་དུ་འདས་གྲོངས་སུ་འགྲོ་རྒྱུ་ལས་སླ་བོ་རེད། དེར་བརྟེན། ནད་གཞི་འདིས་མཐོ་སྒང་དུ་སྨན་བཅོས་ལས་འགན་སྒྲུབ་བཞིན་པ་རྣམས་ལ་ཚབས་ཆེ་བའི་བརྡ་རྟགས་ཤིག་བསྟན་པ་རེད། ནད་གཞི་སྔོན་འགོག་ལ་ཐབས་ཤེས་ནུས་ཤུགས་ཡོད་དགུ་བཏོན་ཏེ། སྔོན་འགོག་སྨན་བཅོས་མཐུན་རྐྱེན་རིགས་མཐོ་སྒང་གི་ས་ཆར་མཁོ་སྤྲོད་བྱེད་དགོས་ལ། ལྷག་པར་དུ་གྲོང་རྡལ་ཆུང་གྲས་ཁག་ཏུ་དོ་སྣང་བྱ་རྒྱུ་གལ་ཆེ་ཞེས་བརྗོད་ཡོད་འདུག

ཉེ་སྐབས་རྒྱ་ནག་ནང་ཁུལ་དུ་ H1N1 འགོས་ནད་ཁྱབ་ཚད་ཚབས་ཆེན་གྱི་གནས་སུ་གྱར་ཡོད་པ་རེད། ༢༠༠༩ ཟླ་ ༡༠ ཚེས་ ༥ ཉིན་པེ་ཅིན་གྲོང་ཁྱེར་གཅིག་པུར་ H1N1 འགོས་ནད་ཕོག་པའི་མི་ ༢༡༨༡ ལ་བུད་ཡོད་པ་རེད།  རྒྱ་ནག་གི་མི་དམངས་དྲ་བའི་སྟེང་གནས་ཚུལ་སྤེལ་བ་ལྟར་ན། ད་ལོའི་ཟླ་ ༡ ནས་ཟླ་ ༨ པའི་བར་རྒྱ་ནག་ནང་ས་གཙོ་བོ་གྱུར་པའི་ཡུལ་ཕྱོགས་གཞན་ནས་ཕེབས་པའི་ཡུལ་སྐོར་བ་མི་གྲངས་ཁྲི་ ༤༠༩ ལྷག་བོད་ལྗོངས་ས་ཁུལ་ཁག་ཏུ་སླེབས་ཡོད་སྐོར་བཀོད་ཡོད་པ་རེད།