འདས་པའི་དུས་སུ་བལ་ཡུལ་དམག་མིས་སྣེ་ལེན་ཁང་ནས་བོད་མི་འཛིན་བཟུང་བྱས་པའི་གནས་ཚུལ་འདྲ་མིན་བྱུང་ཡང། ད་ལྟ་རྒྱལ་སྤྱིའི་སྐྱབས་བཅོལ་ལས་ཁུངས་སོགས་ཀྱི་རྒྱབ་སྐྱོར་འོག་བོད་མི་ཚོའི་བདེེ་འཇགས་ཀྱི་གནད་དོན་ལ་སེམས་ཁྲེལ་ཅི་ཡང་མེད་ཟེར།
ཉེ་ལམ་ནས་བཟུང་བོད་ཕྱི་ནང་གཉིས་ཀྱི་གནས་ཚང་ཐོག་མ་བལ་ཡུལ་སྣེ་ལེན་ཁང་དུ་བོད་མི་མང་པོ་འབྱོར་གྱིན་མེད་པ་དང་། བལ་ཡུལ་དུ་སླེབས་པའི་བོད་མི་དེ་དག་ཀྱང་ཆབ་སྲིད་ཀྱི་དཀའ་རྙོག་དབང་གིས་བལ་ཡུལ་ནང་དཀའ་ངལ་གང་མང་ཞིག་འཕྲད་བཞིན་པའི་གནས་ཚུལ་སོགས་ཁྱབ་བཞིན་ཡོད་སྟབས། ཕྱི་ཚེས་ ༥ ཉིན་འདི་གའི་གསར་འགོད་པ་དངོས་སུ་བོད་གཞུང་བལ་ཡུལ་སྣེ་ལེན་ཁང་དུ་ཕྱིན་ཏེ། བོད་གཞུང་བལ་ཡུལ་སྣེ་ལེན་ཁང་གི་འགན་འཛིན་རྡོ་རྗེ་དགྲ་འདུལ་ལགས་སུ་ལོ་སྔོན་མའི་ཞི་རྒོལ་ནས་བཟུང་བོད་ནས་གསར་ཏུ་འབྱོར་མཁན་གྱི་གནས་སྟངས་གང་འདྲ་ཡིན་མིན་ཐད་བཀའ་འདྲི་ཞུས་པར་ཁོང་གིས། ཉེ་ཆར་ནས་བཟུང་བོད་ནས་མི་གང་ལ་གང་འཚམ་ཞིག་འབྱོར་གྱིན་ཡོད་པ་དང་། ད་ཆར་སྣེ་ལེན་ཁང་དུ་མི་༣༠ ལྷག་འབྱོར་ཡོད། ལོ་སྔོན་མ་དང་བསྡུར་ན་འདི་ལོ་ཕྱི་ཟླ་ ༩ པ་དེ་མི་སླེབས་ཚད་མང་ཤོས་ཆགས་འདུག འདས་པའི་ལོ་ངོ་དེ་དག་ཏུ་ལོ་རེར་བོད་ནས་མི་ ༢༥༠༠ ལྷག་འབྱོར་གྱིན་ཡོད་པ་རེད། ཡིན་ནའང་། ལོ་སྔོན་མར་བོད་ནང་དོན་རྐྱེན་བྱུང་བ་ནས་བཟུང་རྒྱ་གཞུང་གིས་བོད་ནང་ཁུལ་གྱི་བོད་མི་ཚོར་ས་གཞན་དུ་འགྲོ་བར་བཀག་འགོག་དང་ས་མཚམས་བཀག་སྡོམ་བྱས་པ་སོགས་ལ་རྐྱེན་བྱས་ཏེ། ལོ་སྔོན་མར་མི་ ༥༠༠ ལས་འབྱོར་མེད། འདི་ལོ་ཡང་བོད་ནང་ཁུལ་གྱི་དམ་དྲག་དང་ས་མཚམས་བརྟན་སྲུང་བཅས་ལ་བརྟེན་ལོ་སྔོན་མ་དང་གཅིག་མཚུངས་ཀྱི་གནས་སྟངས་ཆགས་ཡོད་ཀྱང་། ང་ཚོའི་ངོས་ནས་མ་འོངས་ནམ་ཟླ་ཇེ་འཁྱགས་སུ་ཕྱིན་པ་དང་བསྟུན་བོད་ནས་འབྱོར་མཁན་སྔོན་མ་ལས་གང་མང་མང་ཞིག་ཕེབས་རྒྱུ་རེད་བསམ་ཡོད། ཅེས་བརྗོད་བྱུང་།
ཡང་ཁོང་ལ་མ་འོངས་པར་བོད་ནས་འབྱོར་མཁན་ཚོའི་བདེ་འཇགས་དང་འཕྲོད་བསྟེན་སོགས་ཀྱི་ཐད་ལ་གྲ་སྒྲིག་གང་འདྲ་ཡོད་མེད་དྲིས་པའི་ལན་དུ། ལོ་སྔོན་མར་ཨ་མདོ་ཁུལ་ནས་ཡིིན་ཞིང་མིང་ལ་ཚེ་རིང་དོན་འགྲུབ་འབོད་པའི་བོད་མི་ཞིག་བལ་ཡུལ་དམག་མིས་སྣེ་ལེན་ཁང་དུ་འཛུལ་ནས་འཇུས་ཏེ་རྒྱ་ནག་ལ་རྩིས་སྤྲོད་བྱས་པ་རེད། དེ་ནས་བཟུང་བལ་ཡུལ་སྣེ་ལེན་ཁང་དེ་རྒྱལ་སྤྱིའི་སྐྱབས་བཅོལ་ལས་ཁུངས་དང་བལ་ཡུལ་གྱི་ནང་སྲིད། ཡུལ་མི་གནས་སྤོར་ལས་ཁུངས་བཅས་ཀྱིས་བོད་ནས་འབྱོར་མཁན་གྱི་བདེ་འཇགས་ཐད་ཐུགས་ཁུར་གནང་དང་གནས་མུས་སུ་ཡོད་སྟབས། བོད་འབྱོར་བ་ཚོའི་བདེ་འཇགས་ཀྱི་ཐད་ལ་སེམས་ཁྲལ་བྱ་དགོས་པ་ཆགས་ཡོད་པ་མ་རེད། གལ་སྲིད་བོད་ནས་བྲོས་བྱོལ་དུ་འབྱོར་མཁན་ཚོ་བོད་ཀྱི་ས་མཚམས་བརྒལ་ཏེ་བལ་ཡུལ་ནང་སླེབས་པའི་རྗེས་ལ། བལ་ཡུལ་དམག་མི་དང་སྐོར་སྲུང་བ་སོགས་གང་གིས་འཛིན་བཟུང་བྱས་ཀྱང་ཡུལ་མི་གནས་སྤོར་ལས་ཁུངས་ཀྱིས་ཐད་ཀར་གློད་གྲོལ་ཐད་ལས་དོན་སྒྲུབ་བཞིན་པ་རེད་ལ། ཁོང་ཚོས་ལས་དོན་སྒྲུབ་རྗེས་རྒྱལ་སྤྱིའི་སྐྱབས་བཅོལ་ལས་ཁུངས་དང་ང་ཚོ་བལ་ཡུལ་སྣེ་ལེན་ཁང་གཉིས་ཀྱིས་མི་སྣ་དེ་དག་བོད་པ་ཡིན་མིན་བརྟག་དཔྱད་ཞིབ་འཇུག་བྱས་རྗེས་སྣེ་ལེན་ཁང་དུ་འཁྲིད་འོང་གི་ཡོད་པ་རེད། ད་ལྟའི་ཆར་བོད་མི་ཚོའི་བདེ་འཇགས་ཀྱི་ཐད་ལ་དཀའ་ངལ་ཅི་ཡང་མེད་ལ། བལ་ཡུལ་གཞུང་ངོས་ནས་ཀྱང་བོད་མི་ཚོ་ང་ཚོ་ལ་རྩིས་སྤྲད་དང་སྤྲོད་བཞིན་པ་རེད། གལ་སྲིད་མཐའ་མཚམས་ནས་འཛིན་བཟུང་བྱས་པ་ཡིན་ན་ང་ཚོ་ཐད་ཀར་ཕྱིན་ཏེ་བོད་མི་ཚོ་ལེན་ཅི་ཐུབ་བྱས་དང་བྱེད་མུས་སུ་ཡོད་སྟབས། གནས་ཚུལ་འདི་དག་གི་ཐད་ལ་དཀའ་ངལ་ཅི་ཡང་ཡོད་པ་མ་རེད་ལ། ང་ཚོས་ཀྱང་འདིའི་ཐད་ལ་དོ་སྣང་དང་ལས་ཀ་མུ་མཐུད་གནང་མུས་སུ་ཡོད། དེ་དང་ཆབས་ཅིག་ད་ལྟ་བོད་ནས་འབྱོར་མཁན་མང་ཆེ་བ་ཚ་བ་དང་དུག་སྦྲང་གིས་སོ་བརྒྱབས་ཏེ་རྨ་བཟོས་པ། འཐུང་ཆུ་མ་འཕྲོད་པར་གྲོད་ཁོག་ན་བ་སོགས་ནད་རིགས་མི་འདྲ་མང་པོ་ཞིག་འབྱུང་གི་ཡོད་པ་དེ་དག་ལ་དུས་ནསདུས་སུ་སྨན་བཅོས་བྱེད་ཀྱིན་ཡོད་ལ། དེ་བཞིན་ཉེ་བའི་དུས་ནས་བོད་ནང་ H1N1 ཆམ་ནད་དེ་བསླེབས་ཡོད་པའི་གནས་ཚུལ་ཐོས་འཕྲལ། ང་ཚོའི་ངོས་ནས་བོད་ནས་འབྱོར་མ་ཐག་པའི་བོད་མི་རྣམས་ལམ་སེང་ཕྱི་ལུགས་ཀྱི་སྨན་ཁང་དུ་ཁྲིད་དེ་བརྟག་དཔྱད་བྱེད་ཀྱིན་ཡོད། ད་ལྟའི་ཆར་ནད་ཡམས་དེ་འགོས་ཡོད་པའི་སྐོར་གྱི་གནས་ཚུལ་དེ་འདྲ་གང་ཡང་བྱུང་མ་སོང། ཅེས་བརྗོད་བྱུང་།
མཐའ་མར་ཁོང་གིས་བརྗོད་དོན། བོད་ནས་བྲོས་བྱོལ་ཏུ་འབྱོར་མཁན་མང་ཆེ་བ་རང་ལོ་ ༡༥ ཡན་དང་ ༣༠ མན་གྱི་གཞོན་སྐྱེས་རེད། དེ་དག་ཡོང་དོན་གཙོ་བོའང་བོད་ནང་བོད་མི་ཚོར་དཀའ་ངལ་འཕྲད་བཞིན་པའི་གནས་སྟངས་ཤིག་མཚོན་གྱི་ཡོད་པ་དང་། ད་ལྟའི་དུས་འདིར་བོད་མི་མང་པོ་ཞིག་སླེབས་ཐུབ་ཀྱིན་མེད་པ་དེའང་རྒྱ་གཞུང་གིས་བོད་ནང་སྔར་མེད་ཀྱི་དམ་དྲག་ཤུགས་ཆེར་བྱེད་ཀྱིན་པའི་དབང་གིས་ཡིན་སྟབས།རྒྱལ་སྤྱིའི་སྤྱི་ཚོགས་ཀྱིས་ཀྱང་གནས་ཚུལ་དེ་དག་མཁྱེན་གྱི་ཡོད་པ་རེད། བལ་ཡུལ་ཡིན་ནའང་། སྔོན་མ་དང་མི་འདྲ་བར་བོད་མི་འདུས་སྡོད་ཀྱི་གནས་སུ་དམག་མི་བསྐོ་འཇོག་བྱེད་ཀྱིན་པའི་གནས་སྟངས་ཆགས་ཡོང་གི་ཡོད་པ་སོགས་བོད་མི་འབྱོར་ཚད་ཉུང་རུ་འགྲོ་བཞིན་ཡོད་པ་རེད། ང་ཚོ་བལ་ཡུལ་སྣེ་ལེན་ཁང་གི་ལས་འགན་ལྟེ་བ་དེ་མ་འོངས་རྒྱལ་སྤྱི་དང་རྒྱ་གར་གཞུང་ལ་འབྲེལ་ལམ་བཟང་དུ་བཏང་སྟེ། བོད་ནས་འབྱོར་མཁན་ཚོ་བལ་ཡུལ་ནང་གི་བདེ་འཇགས་སྲུང་སྐྱོབ་དང་། བདེ་ལེགས་མགྱོགས་མྱུར་ངང་རྒྱ་གར་ཏུ་འབྱོར་བ་བྱ་རྒྱུའི་ཐད་ལ་སྔར་ལས་འབད་པ་བྱ་རྒྱུ་དེ་ཡིན་ལ། ལས་དོན་དེའི་ཐད་ང་ཚོའི་ངོས་ནས་ཀྱང་སྔར་ལས་དོ་སྣང་དང་འབད་བརྩོན་བྱེད་ཀྱིན་ཡོད། ཅེས་གསུངས་བྱུང།
ད་ལྟའི་ཆར་བོད་གཞུང་བལ་ཡུལ་སྣེ་ལེན་ཁང་བསྡོམས་ལས་བྱེད་ ༡༥ འདུག་ལ། ཚོགས་ཁང་དང་སྨན་ཁང་། ཐབ་ཚང་། བུ་དང་བུ་མོ་ཉལ་ཁང་ཁང་བརྩེགས་གསར་རྒྱག་བྱས་པ་སོགས་འཛུགས་སྐྲུན་དང་ཁོར་ཡུག་སོགས་ལ་སྔར་མེད་ཀྱི་འགྱུར་བ་དང་འཛུགས་སྐྲུན་རྒྱ་ཆེན་པོ་ཞིག་བྱས་འདུག་ལ། ཆ་རྐྱེན་དང་མཐུན་རྐྱེན་བཟང་དུ་ཕྱིན་པ་སོགས་ཀྱིས་གཞིས་བྱེས་གཉིས་སུ་གྱར་བའི་བོད་མི་ཚོ་ཕར་འགྲོ་ཚུར་འོང་གི་སྣེ་ལེན་བྱ་ཡུལ་གལ་ཆེན་ཞིག་ཏུ་གྱུར་འདུག
དུས་བབ་གསར་འགོད་པ་དོན་གོས་ཀ་ཐ་མན་གྲུ་ནས་སྤེལ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
སྐུ་འོས་སྣེ་ལེན་ཁང་གི་འགན་འཛིན་གཙོས་ལས་བྱེད་རྣམ་ལ་ཞུ་རྒྱུར། བལ་ཡུལ་སྣེ་ལེན་ཁང་ནི་ཆེས་གལ་འགངས་ཆེ་ཞིང་བོད་མི་བྲོས་བྱོལ་བ་རྣམས་ཀྱི་མཐོ་མར་རེ་བ་བཅོས་པའི་འབབ་ཚུགས་ཤིག་ཡིན་པ་མ་ཟད། མི་མང་པོ་ཞིག་ལ་མཚོན་ན། བལ་ཡུལ་སྣེ་ལེན་ཁང་ནི་ཁོང་ཚོར་ཆབ་སྲིད་ཀྱི་གོ་རྟོགས་འཕེལ་ས་དང། རང་ཉིད་ཀྱི་ཆོལ་གསུམ་སྤུན་ཟླ་དེ་ཚོ་དང་ཐུག་འཕྲད་ཀྱི་གོ་སྐབས་ཐོག་མ་རེག་པའི་གནད་ཆེན་ས་གནས་ཤིག་ཡིན་པས་ན། བལ་ཡུལ་སྣེ་ལེན་ཁང་གི་ལས་བྱེད་ཚང་མས་ཅེས་ཀྱང་གཟབ་བརྣནབྱེད་དགོས་པ་རེད་ལ། ལྷག་པར་ཏུ་སོ་སོ་སྒེར་གྱི་ལུང་ཚན་དང་ཆོས་ལུགས་ཀྱི་ཞེན་བརྩེ་ལ་བརྟེན་ནས། བོད་ནས་གསར་ཏུ་འབྱོར་བའི་སྤུན་ཟླ་རྣམས་ལ་ཆོལ་ཁ་དང་ཆོས་ལུགས་གཙོས་པའི་འཐེན་འཁྱེར་གྱི་ལྟ་བ་ངན་པ་དེའི་ས་བོན་གཏན་ནས་མི་འདེབས་པར་གཟབ་བརྣན་དང་དོ་ཁུར་གནང་རྒྱུ་ནི་ཧ་ཅང་གལ་གནད་ཆེ་བའི་གནས་དོན་ཞིག་ཡིན་པས། ཚང་མས་གཟབ་ཟབ་བྱེད་པར་རེ་སྐུལ་ཞུ་ན་འདོད་དོ།
སྣེ་ལེན་ཁང་གི་འགན་འཛིན་དང་ལས་བྱེད་རྣམས་ལ་བཀྲ་ཤིས་བདེ་ལེགས་ཞུ། གསར་འབྱོར་རྣམས་ལ་རྣམ་འགྱུར་ཡག་པོ་གནང་རྒྱུ་དང་། མི་རིགས་ཀྱི་ལ་རྒྱ་ལ་བསམ་སྟེ་ལམ་སྟོན་བཀའ་སློབ་སོགས་བསྩལ་གནང་ཡོང་བའི་རེ་བསྐུལ་དུ།
འཆི་མེད་ལྟ་རྟོག་ལས་ཁུངས་ཞེས་པ་དེ་ཡུལ་མི་གནས་སྤོར་གྱི་ལས་ཁུངས་ཏེ། Immigration Office ཞེས་པ་དེ་རེད་ཟེར། གོང་ནས་ངས་འདི་ལྟར་བཟོ་བཅོས་རྒྱག་གི་ཡིན།
འཆི་མེད་ལྟ་རྟོག་ལས་ཁུངས་དང་འཆི་མེད་ཞབས་ཞུ་ལས་ཁུངས་ཞེས་བ་དེ་ཕྱི་མི་ཞིབ་གཤེར་ལས་ཁུངས་རེད། དབྱིན་སྐད་ལ་Immigration་ཟེར་བ་དེ་རེད།
བོད་འབྱོར་བའི་བདེ་འཇགས་ལ་སེམས་ཁྲལ་མེད་པ་ལོས་ཡིན་ཁོང་ཚོ་ཉིན་ལྟར་སྣེ་ལེན་སྒོ་ར་ན་བཅུག་ནས་ཡོད་ལ་སྒོ་ཆེན་ཕྱི་ན་དམག་གིས་ཉིན་ལྟར་སྲུང་བསྡད་འདུག། གང་ལྟར་འགན་འཛིན་གསར་བ་རེད་རྟེན་འབྲེལ་ཞུ།
མཆིན་པའི་གཉན་ཚད་ཀྱི་ནད་གཞི་ཞེས་པར་གོ་གནང་ཞུ།
འཆི་མེད་ལྟ་རྟོག་ལས་ཁུངས་དང་འཆི་མེད་ཞབས་ཞུ་ལས་ཁུངས་ཞེས་པ་ཕལ་ཆེར་འཆི་མེད་ཚེ་རིལ་སྒྲུབ་སའི་ལས་ཁུངས་དེ་འདྲ་ཞིག་ནི་ཡིན་གྱི་མ་རེད།
ཕྱི་མི་ལྟ་རྟོག་ལས་ཁུངས་དང་ཕྱི་མི་ཞབས་ཞུ་ལས་ཁུངས་ཞེས་གོ་དགོས་པ་མིན་འགྲོ།
ལྷ་ས་གྲོང་ཁྱེར་དང་གཞིས་རྩེ་གྲོང་ཁྱེར་སོགས་བོད་ཀྱི་གྲོང་ཁྱེར་ཆེ་ཁག་གཙོ་བོར་གྱུར་པའི་གྲོང་ཁྱེར་ཁག་དང་ཐ་ན་གྲོང་གསེབ་རྒན་པོ་ཚོའི་ཚིལ་དྲེག་ཆགས་པའི་དངུལ་ཁུག་ཡན་ཆད་ལ་སྲེད་ཞེན་གྱིས་བལྟ་བའི་རྒྱ་མོ་ཤ་དཀར་ཚོའི་དཀའ་དྲིན་ལ་བརྟེན་ནས་དེང་སང་བོད་ནང་གི་གཞོན་སྐྱེས་མང་དག་ཅིག་ལ་རེག་དུག་དང་མཆིན་པའི་གཉན་ཚད་ཀྱི་ནང་གཞི་ཡོད་པའི་ཚོད་དཔག་བྱེད་ཀྱིན་ཡོད་། དེར་བརྟེན་བལ་ཡུལ་སྣེ་ལེན་ཁང་ནས་ཕག་པའི་ཆམས་ནད་ལ་བརྟག་དཔྱད་བྱེད་པ་ནང་བཞིན་དུས་རྒྱུན་ནས་ནད་གཞི་འདི་དག་ཐད་བརྟག་དཔྱད་བྱེད་པའི་ལས་གཞི་ཞིག་འགྲོ་ཐུབ་ན་ཕྱོགས་གཅིག་ནས་བོད་ནང་གི་གཞོན་སྐྱེས་ཚོའི་འཕྲོད་བསྟེན་གྱི་གནས་སྟངས་ལ་རྒྱུས་ལོན་ཅུང་ཟད་ཅིག་བྱེད་ཐུབ་པའི་རེ་བ་དང་། ཕྱོགས་གཞན་ནས་ང་ཚོས་ཚོད་དཔག་བྱས་པ་ནང་བཞིན་ནད་གཞི་འགོས་ཁྱབ་བྱུང་བའི་གསར་འབྱོར་གཞོན་སྐྱེས་འདྲ་བསླེབས་པ་ར་འཕྲོད་ཚེ་དུས་ཐོག་སྨན་བཅོས་བྱེད་ཐུབ་པའི་ཁེ་ཕན་དང་། དེ་བཞིན་སློབ་གྲྭར་བསླེབས་རྗེས་ཕོ་མོ་ཕན་ཚུན་འཁྲིག་སྤྱོད་སོགས་ཀྱི་ལམ་འགོས་ཁྱབ་འགྲོ་བའི་ཉེན་ཁའི་ཐད་ལ་ཡང་དགེ་མཚན་གྱི་གྲུབ་འབྲས་ཐོན་རྒྱུ་རེད་སྙམ།
ང་ཚོ་བོད་རིགས་ཚོར་གློ་བུར་བའི་ཟང་ཟིང་གི་ཉེན་ཚབས་འདྲ་མ་བྱུང་ན་གཏིང་རིང་དང་མངོན་པར་མི་གསལ་བའི་ཚབས་ཆེན་གྱི་ཉེན་ཁའི་ཕྱོགས་ལ་སྣང་མེད་འཐུས་ཤོར་གཏོང་བའི་གོམས་གཤིས་ཤིག་ཡོད། ང་ཚོའི་འཐུས་ཤོར་མང་པོའི་རྐྱེན་རྩ་གཅིག་འདི་ཡིན།
རྩོམ་སྒྲིག་པ་ལགས། ཞུ་དག་ཞིག་བཏང་ཐུབ་ན་ཡག་པོ་འདུག རང་གཞུང་བལ་ཡུལ་སྣེ་ལེན་ཁང་དང་འབྲེལ་བ་ཡོད་པའི་འཆི་མེད་ལྟ་རྟོག་ལསཁུངས་ཟེར་བའི་ལས་ཁུངས་དེ་འདྲ་ཞིག་ཡོད་པ་རེད་དམ། ཏན་ཏན་དག་ཆ་ནོར་ཡོད་བཟོ་འདུག བསྐྱར་དུ་བཀའ་འདྲི་ཞིག་ཞུས་ན་དག་ཆ་དེར་འགྱུར་བ་འགྲོ་སྲིད།
སྣེ་ལེན་ཁང་ནས་འཁྲིད་པའི་གནས་ཚུལ་ད་དུང་གསལ་བོ་ཞིག་ཆགས་མེད་པ་མ་རེད་དམ།
མ་འོངས་པའི་འཆར་གཞི་དེ་དག་ལམ་ལྷོང་ཡོང་བར་ཤོག ཁ་བཤད་དོན་ལ་ཡོད་པ་ཞིག་རྟག་དུ་རེ་བ་བྱེད་ཀྱི་ཡོད་ལགས།
དེ་འདྲ་ཡིན་ན་བཟང་གི ལོ་སྔོན་མར་བལ་ཡུལ་ཉེན་རྟོགས་པས་གནས་ལེན་ཁང་ནས་བོད་མི་རེ་འགའ་འཛིན་བཟུང་བྱས་སོང་བ་མ་ཡིན་ནམ། བོད་ནས་བྲོས་བྱོལ་དུ་ཡོང་བ་ཚོ་གནས་ལེན་ཁང་དུ་འབྱོར་འཕྲལ་བདེ་འཇག་གི་འཚོ་བ་ཞིག་སྤྲོད་གང་ཐུབ་བྱེད་རྒྱུ་གལ་ཆེན་རེད།