ཟླ་བ་སྔ་ཕྱིའི་ནང་ཨ་མདོ་རྔ་པ་རྫོང་ཐོག་དང་རྔ་པ་ཀིརྟིའི་དགོན་ནང་བཅས་སུ་བོད་དོན་སྐོར་གྱི་སྦྱར་ཡིག་ཐེངས་གསུམ་ལ་གཏོར་འགྲེམ་བྱས་ཡོད་པ་དང་། སྦྱར་ཡིག་དེ་དག་གི་ནང་དུ་རྒྱ་གཞུང་གིས་འཛིན་བཟུང་བྱས་པའི་བོད་མི་རྣམས་འཕྲལ་དུ་གློད་གྲོལ་མ་བཏང་ཚེ། ཆོལ་གསུམ་བོད་མི་ཡོངས་ཀྱིས་བསྐྱར་དུ་འོས་ལངས་བརྒྱག་རྒྱུ་ཡིན་སྐོར་དང་། རྒྱའི་བཙན་འོག་ནས་བོད་མི་ཚོར་བདེ་བ་མེད་སྐོར། དེ་བཞིན། ཆོལ་གསུམ་བོད་མི་ཡོངས་རྫོགས་ཁ་མཐུན་ཁོག་འགྲིག་རྡོག་རྩ་གཅིག་སྒྲིལ་ཡོང་དགོས་པའི་འབོད་སྐུལ་བཅས་ཞུས་ཡོད་འདུག
དེ་རིང་སྔ་དྲོ་བཞུགས་སྒར་ཀིརྟིའི་བྱེས་པ་གྲྭ་ཚང་གི་ཛ་དྲག་འབྲེལ་མཐུད་ཚོགས་ཆུང་གིས་གནས་ཚུལ་མཁོ་སྤྲོད་བྱས་པ་ལྟར་ན། ཉེ་ཆར་ཕྱི་ཟླ་ ༩ ཚེས་ ༢༤ མཚན་མོ་དང་། ཕྱི་ཟླ་ ༩ ཚེས་ ༣༠ མཚན་མོ། དེ་བཞིན་ཕྱི་ཟླ་ ༡༠ ཚེས་ ༡ ཉིན་གྱི་མཚན་མོ་བཅས་ཐེངས་གསུམ་ལ་རྔ་པ་རྫོང་གི་ཁྲོམ་གཞུང་དང་ཉེ་འཁོར་གྱི་དགོན་པ། དེ་བཞིན་གྲོང་སྡེ་ཁག རྔ་བ་ཀིརྟི་དགོན་མཐའི་མ་ཎྀ་འཁོར་ཁང་གི་རྩིག་ལྡེབས་བཅས་སུ་བོད་དོན་སྐོར་གྱི་བསྒྲགས་གཏམ་སྦྱར་འགྲེམ་བྱས་ཡོད་འདུག སྦྱར་ཡིག་དང་པོའི་ནང་དོན་ཁ་གསལ་རག་ཡོད་མི་འདུག་ལ། སྦྱར་ཡིག་གཉིས་པ་དང་གསུམ་པ་ཁ་པར་བརྒྱུད་ཀློག་འདོན་བྱས་ཏེ། ཇི་བཞིན་ཡིག་ཐོག་ལ་ཕབ་བཤུ་བྱས་ཡོད་འདུག ཕྱི་ཟླ་ ༩ ཚེས་ ༢༤ ཉིན་གྱི་སྦྱར་ཡིག་གི་ནང་དོན་འདོར་བསྡུས་ནི། ལོ་སྔོན་མའི་ཞི་རྒོལ་སྐབས་དང་། ལྷག་པར་ཉེ་ཆར་འཛིན་བཟུང་བྱས་པའི་བོད་མི་རྣམས་འཕྲལ་དུ་གློད་གྲོལ་མ་བཏང་ན། ཆོལ་གསུམ་བོད་མི་རྣམས་ཀྱིས་ཡང་བསྐྱར་འོས་ལངས་བྱ་རྒྱུུ་ཡིན། ཞེས་བསྒྲགས་གཏམ་སྤེལ་ཡོད་འདུག
ཕྱི་ཟླ་ ༩ ཚེས་ ༣༠ མཚན་གྱི་སྦྱར་ཡིག་ཏུ་བཀོད་དོན། ཡི་གེ་འདི་བོད་ཀྱི་བདེན་དོན་གྱི་ཆེད་དུ་བོད་མི་ཡོངས་ཀྱིས་ནུས་ཤུགས་ཡོད་ཚད་འདོན་དགོས། ང་ཚོའི་འཐབ་རྩོད་ནི་མི་རིགས་ཤིག་གི་འཐབ་རྩོད་ཙམ་མིན་པར་བདེན་པའི་གནས་ལུགས་ཤིག་ཡིན། དེ་ནི་ཆོས་དང་ཆོས་མེད་དམ་ལྷ་མེད་སྨྲ་བ་སུ་ཞིག་ཡིན་ཡང་། འགྲོ་བ་མིའི་རིགས་ཀྱིས་རྩོད་དགོས་པ་ཞིག་དང་རྩོད་འོས་པ་ཞིག་རེད། ྋརྒྱལ་བ་རིན་པོ་ཆེ་སོགས་བོད་ཀྱི་སྐྱེས་བུ་དམ་པ་མང་པོ་ཞིག་གིས་བོད་བསྟན་སྲིད་དང་འགྲོ་བ་སྤྱི་ལ་ཕན་པའི་འཚེ་མེད་ཞི་བདེའི་ལམ་ལ་སྣེ་ཁྲིད་དེ། བདེན་པ་བརྒྱ་ཕྲག་མང་པོས་བོད་ཀྱི་བདེན་དོན་ངོ་སྤྲད་ཀྱང༌། དེ་ལས་ལྡོག་ཏེ་ྋརྒྱལ་བ་རིན་པོ་ཆེ་ལ་རྒྱ་དམར་གྱིས་སྐྱོན་མེད་སྐྱོན་འཛུགས་དང་རྫུན་གྱིས་འཁོར་ལོ་སྐོར་བཞིན་ཡོད། ང་ཚོ་རྔ་མ་མེད་པའི་ཁྱི་སྤྱང་དེ་ཚོས་ནམ་ཉི་མ་ཞིག་ལ་ཁ་ཟས་བྱ་རྒྱུ་རེད། འོན་ཀྱང་། ཁོ་ཚོའི་རྒྱུགས་ཁྱི་བྱས་ནས་བསྡད་ན་ལས་རྒྱུ་འབྲས་ཁས་ལེན་མཁན་ཞིག་གིས་བྱ་བ་དྲང་བདེན་གྱིས་བསྒྲུབ་ན་འབྲས་བུ་ཡག་པོ་དང་། གཡོ་སྒྱུའི་བྱ་བ་བསྒྲུབ་ན་འབྲས་བུ་མི་ལེགས་པ་ཞིག་ཡོད་ཟེར་མོད། དེས་ན་ང་ཚོ་ཆོས་པ་ཚོ་བདེན་དོན་གྱི་ཆེད་དུ་གནས་དགོས་ལ། བདེན་དོན་ཞིག་གི་ཆེད་དུ་འགྲོའང་དགོས། ངས་ཀྱང་བོད་ལ་རྒྱ་དམར་གྱིས་མནར་གཅོད་ཚད་མེད་བྱེད་ཀྱིན་ཡོད་པའི་བདེན་དཔང་བྱེད་རྒྱུ་ཡིན། ཞེས་བཀོད་ཡོད་འདུག
དེ་རྗེས་ཕྱི་ཟླ་ ༡༠ ཚེས་ ༡ གི་མཚན་མོའི་སྦྱར་ཡིག་ཏུ་བཀོད་དོན། ཡི་གེ་འདི་འཛམ་གླིང་ཞི་བདེ་ལ་དགའ་བའི་རྒྱལ་ཁབ་ཡོངས་དང་། ཡང་སྒོས་ཆོལ་གསུམ་བོད་མི་ལ་ཞུ་རྒྱུར། ང་རང་ལ་མཚོན་ན་ལུས་ལ་ན་ཚ་སོགས་ཅི་ཡང་མེད་པའི་མི་དཀྱུས་མ་ཞིག་ཡིན། འོན་ཀྱང་། ངའི་སེམས་པའི་ནང་ལ་བཟོད་པར་དཀའ་བའི་སྡུག་བསྔལ་ཞིག་ཡོད་པ་ནི་ཇི་ལྟར་བཤད་ཀྱང་བཤད་ཚར་བ་ཞིག་མ་རེད། དེ་ནི་ངའི་ཕ་མེས་དང་རྒན་རབས་རྣམས་ཀྱིས་བཤད་པའི་སྔོན་གྱི་ལོ་རྒྱུས་ཀྱི་དབྱེ་བ་དག་དང༌། དེང་དུས་སུ་ཡ་ང་བའི་རྒྱ་དམར་གྱི་བྱ་སྤྱོད་འདིས་བོད་རིགས་སྤུན་ཟླ་ཡོངས་ལ་གཉའ་གནོན་དང་བརྙས་བཅོས་བར་མ་ཆད་དུ་བཏང་དང་གཏོང་བཞིན་ཡོད་པ་དང༌། ལྷག་ཏུ་རྒྱ་ནག་གཞུང་གིས་དམག་མི་འབོར་ཆེན་བོད་དུ་དྲངས་ནས་ཉམ་ཆུང་གི་བོད་མི་ཚོར་འགྲོ་འདུག་གི་རང་དབང་གི་སྤྲོད་ཀྱིན་མེད། ཡང་སྒོས་རང་དབང་གི་ཆེད་དུ་ཡར་ལངས་དང་དྲང་བདེན་གྱི་གནས་ཚུལ་ཅུང་ཙམ་རེ་བརྗོད་ཀྱང་། འཛིན་བཟུང་བྱས་ནས་རྡུང་རྡེག་ཚད་མེད་བཏང་མཐར་བརྒྱལ་བ་དང་། བརྒྱལ་བའི་སྐབས་སུ་ཤི་མེད་ཀྱང་མེར་བསྲེག་བཏང་སྟེ་མི་རོ་ཡང་མེད་བརླག་བྱེད་ཀྱིན་ཡོད།
ད་དུང་ལྟོགས་སྐོམ་གྱིས་མ་བཟོད་པར་གཅིན་འཐུང་དགོས་བྱུང་བ་དང༌། ཁ་ནང་ལ་གློག་གིས་བརྒྱབས་ནས་དབང་པོར་སྐྱོན་ཤོར་བ། ཁྲིམས་ཁང་ནས་ཕྱིར་བཏང་དུས་དངུལ་གྱི་ཆད་པ་མང་པོ་བཅད་པ། དེ་མིན་ལོ་མང་པོར་ཁྲིམས་ཐག་བཅད་པ་སོགས་དང༌། རྒྱ་ནག་གཞུང་གིས་མེ་མདའ་སོགས་ཆེད་དུ་བོད་མི་གསོད་བྱེད་དུ་བཟོས་པ་བཞིན། བོད་མི་ཁྲིམས་པ་ཚོའི་མགོ་ཐོག་ཏུ་མེ་མདའ་བཙུགས་ནས་ཁྱོད་ཚོ་བསད་ནས་གད་སྙིགས་ནང་དུ་འཕང་ན་སུས་ཤེས་ཟེར་ནས་བརྙས་བཅོས་དང༌། ཏཱ་ལའི་གྱིས་ངན་སྐུལ་ག་འདྲ་བྱས་སོང་ཟེར་ནས་མི་འདོད་བཞིན་དུ་བླ་མའི་མཛད་པར་རྒོལ་དུ་འཇུག་པ། དངོས་གནས་ྋརྒྱལ་བ་རིན་པོ་ཆེ་མཆོག་ནི་འཛམ་གླིང་ཞི་བདེ་འདྲེན་པའི་དེད་དཔོན་ཡིན་ཕྱིར། མི་རིགས་མཐུན་སྒྲིལ་ཡོང་བ་ལ་ནམ་ཀུན་འབད་པ་དང༌། ལྷག་པར་དུ་རྒྱ་བོད་གཉིས་སྨན་གྱི་ལམ་ལ་འགྲོ་བཞིན་ཡོད་ནའང༌། ཁྱེད་རྒྱ་དམར་གྱིས་ྋརྒྱལ་དབང་ལ་ཇག་ཚོགས་ཞེས་ཞྭ་འགེབས་པ་དེ་ནི་དྲང་བདེན་དང་གནས་ལུགས་རྟོགས་པའི་རྒྱལ་ཁབ་ཡོངས་དང་། བོད་མི་ས་དྲུག་གི་སེམས་ཁུངས་སུ་སྔ་ན་མེད་པའི་ན་ཟུག་ཆེན་པོ་ཞིག་བྱིན་ཡོད།
རྒྱ་ནག་གཞུང་གི་སྐྱག་རྫུན་ལ་སུས་ཡིད་ཆེས། གནས་ཚུལ་འདི་འདྲའི་འོག་ནས་བོད་ཀྱི་དཔའ་བོ་དཔའ་མོ་སྟོང་ཕྲག་མང་པོས་ཚེ་སྲོག་ཤོར་བ་དང༌། གོང་ནས་བཤད་པའི་སྐད་ཆ་རྣམས་ཀྱི་བདེན་དཔང་དུ་ད་ལན་གྲྭ་བཀྲ་བྷེ་ལགས་ཀྱིས་བདེན་དཔང་དང་བོད་ཀྱི་བདེ་སྡུག་གི་བྱུང་བ་འཛམ་གླིང་གི་རྒྱལ་ཁབ་ཡོངས་སུ་བསྒྲགས་པའི་ཆེད་དུ་ལུས་སྲོག་འཕངས་མེད་ཀྱིས་བདེན་དཔང་བྱས་ཡོད། བདག་གིས་ཀྱང་རྒྱ་ནག་གི་བྱ་སྤྱོད་ངན་པ་འདི་དག་འཛམ་གླིང་མཉམ་འབྲེལ་རྒྱལ་ཚོགས་ཀྱིས་གོ་ཐོས་འབྱུང་བའི་ཐབས་དང༌། མཐར་བོད་རིགས་ཀུན་ཁ་མཐུན་ཁོག་འགྲིག་རྡོག་རྩ་གཅིག་སྒྲིལ་ཡོང་བའི་ཆེད་དུ། བདག་གི་ལུས་སྲོག་གིས་མཆོག་པ་ཕུལ་བའི་འཛམ་གླིང་ཞི་བདེ་ཡོང་བ་དང་བོད་ཀྱི་བདེན་མཐའ་གསལ་ནས་གཞིས་བྱེས་མཉམ་འཛོམས་དང༌། ྋརྒྱལ་དབང་ཁྲི་ལོར་ཡོང་བའི་སྨོན་འདུན་བཅས། ཞེས་སྦྱར་ཡིག་བཀྲམས་མཁན་གྱི་མིང་དང་བཅས་བཀོད་ཡོད་འདུག
དྲ་གྲོགས་བཟང་པོ་ཤ་ཁྲག་ལགས་ལ། གསོལ་འདེབས་སོགས་འདོན་སྐབས་དག་སྡེབ་ལ་བསམ་བློ་མ་བཏང་ན་ནམ་རྒྱུན་ཡི་གེ་འབྲི་དུས་དང་འདྲ་གི་མ་རེད། ཞལ་འདོན་སོགས་ཀྱི་སྐབས་སུ་ཁ་ནས་བཏོན་པ་དང་ཡིད་ལ་གང་ཞིག་སྒོམ་དགོས་ན། ཡི་གེའི་དག་ནོར་ཤོར་ཚེ་གོ་དོན་དང་དམིགས་སྒོམ་གང་ཡིན་དེའི་དོན་ཡང་ནོར་འགྲོ་གི་རེད། དེ་བས།
བསྟན་དང་དེ་འཛིན་ཞེས་སངས་རྒྱས་ཀྱི་བསྟན་པ་དང་དེ་འཛིན་མཁན་ལ་ཟེར་བས་ན་བསྟན་དང་དེ་འཛིན་ཞེས་ཟེར་དགོས་པ་འདྲ།
ཡང་དཀའ་བ་བརྒྱ་ཕྲག་སྒྲུབ་པའི་སྐྱེ་བོ།
གྲུ་འཛིན་མགོན་དེས་ཐུགས་རྗེས་སྐྱོང་བར་ཐུགས་རྗེ་ཡི་རྗེ་ལ་ས་མཐའ་ངེས་པར་དུ་དགོས་ཡིན་འདྲ།
ཨ་དཔའ་རྒོད་ཚོ་དུས་འདི་མ་འགྱུར་བར་དུ་ཁྱེད་ཚོ་ལྷག་བསམ་ལ་རྗེས་སུ་ཡི་རངས་ཡོད།
ང་རང་གིས་རྟག་པར་འདི་འདྲ་ཞིག་འདོན་བཞིན་ཡོད།
བསྟན་དང་བསྟན་འཛིན་ཆབ་སྲིད་རང་རིགས་སླད།།
གཅེས་པའི་ལུས་སྲོག་ལོངས་སྤྱོང་ཡོངས་བཏང་དེ།།
བསྐལ་བ་བརྒྱ་ཕྲག་སྒྲུབ་པའི་སྐྱེ་བོ་རྣམས།།
གྲུ་འཛིན་མགོན་དེས་ཐུགས་རྗེ་སྐྱོང་བར་མཛོད།།
ངས་ཀྱང་རྒྱལ་བའི་ཞབས་བརྟན་གྱི་ཁྲོད་ནས་ཚིག་འདི་ཟུར་དུ་བཏོན་ཏེ་བཅོས་མིན་གྱིས་འདོན་བཞིན་ཡོད། འདི་ནི་བཅོས་མིན་གྱི་དད་པའི་སྤུ་ལོང་གཡོ་བཞིན་འདི་ལྟར་ཐལ་བ་ཞིག་མ་རེད་དམ།
ཕྱག་ན་པདྨོའི་བྱིན་རླབས་བདུད་རྩིའི་རྒྱུན།།
བདག་སོགས་སྙིང་གི་ཟུངས་སུ་རྟག་སྨིན་ཅིང་།།
བཀའ་བཞིན་བསྒྲུབས་པའི་མཆོད་པས་རབ་མྱོས་ཏེ།།
ཀུན་བཟང་སྤྱོད་མཆོག་རྒྱ་མཚོའི་མཐར་སོན་ཤོག།
ངས་ནམ་རྒྱུན་འདི་འདྲ་ཞིག་འདོན་བཞིན་ཡོད། གང་ཡིན་མ་ཤེས་ཐ།
བཀླག་ཟིན།
གཞིས་ལུས་བོད་མི་རྣམས་ལ་མཚོན་ན་ཧ་ལས་དགོས་པའི་སྙིང་སྟོབས་དང་། ༸ གོང་ས་རྒྱལ་བ་རིན་པོ་ཆེ་ལ་དད་པ་དང་དམ་ཚིག་ནམ་ཡང་འགྱུར་བ་མེད་པ་ཞིག་ཡོད་པ་འདི་དངོས་གནས་རྩ་བ་ཆེན་པོ་རེད།
རྒྱ་ནག་དབུས་གཞུང་གིས་ཀྱང་གནད་དོན་དེར་རྣོ་བསམ་ཞིབ་མོ་གཅིག་བཏང་ནས་ཕན་ཚུན་ཕྱོགས་གཉིས་ཀར་ཁེ་གྱོང་མེད་པ་ཞིག་ཏུ་ཐག་གཅོད་གཅིག་ངེས་པར་དུའང་བྱེད་དགོས་པའི་དུས་ཚོད་ཞིག་རེད།
ཕྱག་ན་པདྨོའི་བྱིན་རླབས་བདུད་རྩིའི་རྒྱུན། །བདག་སོགས་སྙིང་གི་ཟུངས་སུ་རྟག་སྨིན་ཅིང་། །བཀའ་བཞིན་སྒྲུབ་པའི་མཆོད་པས་རབ་བསྙེན་ནས། །ཀུན་བཟང་མཆོད་མཆོག་རྒྱ་མཚོར་མཐར་སོན་ཤོག །
ད་ཕྱི་སྡོད་བོད་མི་ཚོས་རྒྱལ་བ་བོད་ནང་ལ་གདན་འདྲེན་ཞུ་ཕྱོགས་ཐད་ཤུགས་རྒྱག་རྒྱུ་དང་། རྒྱལ་བས་ཀྱང་དེའི་སྐོར་ནས་དགོངས་པ་ཆེ་ཙམ་བཞེས་རན་རེད་འདུག དེ་མིན་གཞིས་ལུས་བོད་མིའི་མནར་གཅོད་མཚམས་འཇོག་ཐུབ་རྒྱུ་མ་རེད་ཡཱ།