འབྱུང་འགྱུར་གྱི་མི་ལོ་ ༢༠ ནང་ཚུད་དུ་བཙན་བྱོལ་བོད་མིའི་མི་འབོར་ཕྱེད་ཀ་ལྷག་ནུབ་ཕྱོགས་རྒྱལ་ཁབ་ཁག་ཏུ་སྤོར་རྒྱུ་རེད། སྐྱབས་བཅོལ་གྱི་ཐོད་པའི་ཁ་ཡིག་གི་འོག་ནས་སྐྱེས་རུང་བཙན་བྱོལ་བོད་གཞུང་མི་ཤེས་པའི་བོད་པའི་མི་རབས་ཤིག་ཀྱང་ནུབ་ཕྱོགས་ནས་ཡོང་རྒྱུ་རེད། གནས་སྟངས་འདི་དག་ལ་བསམ་ན་ཕྱིས་ཀྱི་བོད་རིགས་འདི་དག་མགོ་བསྡུ་ཐབས་ལའང་ད་ལྟ་ནས་བསམ་བློ་གཏོང་དགོས་ཚོད་རེད།
བཙན་བྱོལ་དུ་མི་འབོར་འབུམ་ལྷག་ཅིག་ཡོད། དེ་དག་གི་ཁྲོད་ནས་ཁྲི་རེ་ཟུང་ད་ལྟ་ནས་ནུབ་ཕྱོགས་ཀྱི་རྒྱལ་ཁབ་འདྲ་མིན་ནང་ཁ་འཐོར་དུ་གནས་ཡོད་ལ། ཁོང་ཚོའི་བྱིས་པ་རྣམས་ནི་བོད་ཀྱི་སྐད་ཡིག་དང་རིག་གཞུང་། བོད་དོན་འཐབ་རྩོད་བཅས་ལ་ཆ་མེད་རྒྱུས་མེད་ཀྱི་ངང་ནས་འཚར་ཡོང་གིན་ཡོད། མ་འོངས་པར་བོད་མི་རྣམས་ནུབ་ཕྱོགས་ལ་སྤོར་བའི་གྲངས་ཚད་སྔར་ལས་མང་དུ་འགྲོ་ངེས་ལ། མི་མང་པོ་ཞིག་གིས་ད་ལྟ་ནས་༧སྐྱབས་མགོན་རིན་པོ་ཆེ་མི་བཞུགས་དུས་ཤིག་ལ་ངྷ་ས་ནས་འདུག་འདོད་མེད་སྐོར་གླེང་གིན་ཡོད། འདི་ལྟར་བཙན་བྱོལ་བོད་མི་རྣམས་ཀྱི་བསམ་བློའི་ཁ་ཕྱོགས་དེ་ཕྱི་གསལ་ནང་གསལ་དུ་གྱུར་ཡོད། བསམ་བློའི་ཁ་ཕྱོགས་འདིས་ཐད་ཀར་དུ་བོད་མི་རིགས་ཀྱི་ཆོས་རིག་འཛིན་སྐྱོང་སྤེལ་གསུམ་དང་བོད་དོན་འཐབ་རྩོད་ཀྱི་ཕྱོགས་ལ་ཤུགས་རྐྱེན་ཆེན་པོ་ཞིག་ཐེབས་ངེས་ཡིན། འོན་ཀྱང་། ང་ཚོར་ད་ལྟའི་ཆར་གནས་སྟངས་འདི་དག་ལ་དཔག་པའི་གྲ་སྒྲིག་གསལ་བོ་དང་བརྟན་པོ་ཞིག་མེད།
མ་འོངས་པར་བོད་པ་སྐྱབས་བཅོལ་བ་རྣམས་ཅི་ཙམ་ཁ་འཐོར་དུ་སོང་རུང་། འདི་དག་གཅིག་གྱུར་གྱིས་མགོ་བསྡུ་སྟངས་ཀྱི་བསམ་བློ་གཏོང་ས་ནི་དྲ་བའི་རིག་གནས་འདི་ཡིན་པར་སྙམ། དེ་བས་བཙན་བྱོལ་བོད་གཞུང་གིས་འདིའི་ཐད་ལས་གཞི་ཞིག་རྩོམ་རྒྱུ་ནི་གལ་ཆེན་པོ་རེད། དེང་སྐབས་འཛམ་གླིང་གི་དབུ་ཁྲིད་དག་གི་ཁྲོད་དྲ་ལམ་ནས་མང་ཚོགས་ལ་ཁ་བརྡ་བྱེད་མཁན་དང་། དུས་ནས་དུས་སུ་དྲ་ལམ་ནས་གཞུང་གི་ལས་དོན་སྐོར་གསལ་བཤད་བྱེད་མཁན་ཡོད། དྲ་བའི་རིག་གནས་དར་བ་དང་མཉམ་དུ་དྲ་ཐོག་འཛིན་སྐྱོང་གི་སྲིད་གཞུང་སྟེ། e-government ཞེས་པའི་ལྟ་ཚུལ་དེའང་ཤུགས་ཆེ་རུ་ཕྱིན་ཡོད། ལྷག་པར་དུ་བོད་མི་རྣམས་ཀྱི་གནས་སྟངས་ནི་འཛམ་གླིང་གང་སར་ཁ་འཐོར་དུ་ཡོད་སྟབས་དམིགས་བསལ་ཡིན་ལ། བཙན་བྱོལ་བོད་གཞུང་གིས་ད་ལྟ་ནས་ཁ་འཐོར་བོད་མི་ཚོར་དམིགས་ཏེ་དྲ་ཐོག་ཏུ་བཙན་བྱོལ་བོད་གཞུང་གི་མགྲིན་ཚབ་པ་བཞག་སྟེ། གཞུང་གི་ལས་དོན་གང་ཅིའི་ཐད་དུས་ཐོག་གསལ་བཤད་ཡོད་པ་ཞིག་བྱས་ན་ལེགས་པར་འདོད་ལ། ལར་ནས་བོད་མི་རྣམས་ཀྱི་གནས་སྟངས་དང་བོད་དོན་འཐབ་རྩོད་ཀྱི་སྟོབས་ཤུགས་ངོ་མ་ནི་འབྲེལ་གཏུགས་ Communication དང་གནས་ཚུལ་ Information གཉིས་ལ་ཐུག་ཡོད། དེར་བརྟེན་མ་འོངས་པའི་ལོ་ ༢༠ རིང་ནས་བཟུང་བཙན་བྱོལ་བོད་མི་ཕལ་ཆེ་བར་གློག་ཀླད་སོགས་ཀྱི་མཐུན་རྐྱེན་འཛོམས་ངེས་པས། བཙན་བྱོལ་བོད་གཞུང་གིས་ད་ལྟ་ནས་གྲ་སྒྲིག་བྱས་ན་གློག་ལམ་གྱི་འཛིན་སྐྱོང་འདི་སྔར་ལས་སྟབས་བདེ་དང་ཚགས་ཚུད་ཡོང་གི་རེད་སྙམ།
འདི་ཡག་པོ་འདུག་རྒྱབ་སྐྱོར་ཡོད།
རྩོམ་སྒྲིག་པའི་གཏམ་དེར་ངེས་པར་སྔ་ས་ནས་གྲ་སྒྲིག་ཅིག་བྱེད་དགོས་ངེས་རེད། ང་ཚོའི་ལོ་རྒྱུས་ཀྱི་རྨ་ཁ་གསོ་མཁན་དེ་༸གོང་མཆོག་དང་རྩ་ཆེའི་རིག་གཞུང་གཉིས་རེད།
༸གོང་ས་མཆོག་གི་འོད་ཟེར་འཛམ་གླིང་འདིར་འཕྲོ་་བཞིན་པ་དང་ཆབས་གཅིག་རིག་གཞུང་གི་རིན་ཐང་ཡང་འཕྲོ་བཞིན་ཡོད་པའི་གོ་སྐབས་འདི་ང་ཚོས་དམ་འཛིན་གནང་མ་ཐུབ་ཚེ། རྩོམ་སྒྲིག་པས་བཤད་པ་ལྟར་ལོ་༢༠་ཙམ་གྱི་རྗེས་དཀའ་ངལ་ཞིག་འཕྲད་ངེས་རེད། དེའི་ཕྱིར་བཀའ་བློན་ཁྲི་པ་དེ་ཛ་དྲག་གི་གནས་སྟངས་གང་འདྲ་ཞིག་ལ་སླེབས་ཀྱང་འཆར་གཞི་དང་དཔའ་ངར་ཡོད་པ་ཞིག་འདེམས་དགོས་པར་མཐོང།
e-government ཞེས་པའི་གནད་དོན་དེ་བོད་ཡིག་ཤེས་མ་ཤེས་ཙམ་མིན་པར། བོད་རིགས་ཐམས་ཅད་འཛམ་གླིང་ཡུལ་གྲུ་གང་དུ་ཁ་ཐོར་སོང་ཡང་གཅིག་སྡུད་ཡོང་རྒྱུར་ཕན་ཐོགས་ཆེ་བའི་སྐད་ཆ་ཞིག་ཡིན་པས། བསམ་བློ་གཏང་དགོས་ངེས་ཤིག་ཏུ་མཐོང་ལ། འདི་ནི་དུས་དང་མཐུན་པའི་གོམ་པ་སྤོ་ཚུལ་ཞིག་ཀྱང་རེད་སྙམ།
ད་དུང་གོང་གི་དེ་ལ་ཁ་སྣོན་ཞིག་བྱས་ན་བོད་ཡིག་ཤེས་མཁན་ལས་མི་ཤེས་མཁན་ཚོ་ལ་སེམས་ཤུགས་ཆེ་ཚོད་འདུག་གཱ
གནས་ཚང་ལགས། ཀ་རྐང་ཁ་ཤས་ངོ་ཟིན་པ་དང་འབྲི་ཤེས་པས་གང་ནས་ཆོག སྤྱི་ཚོགས་གཞན་དུ་ཡིག་ངོ་མི་ཆོད་པ་མེད་་པའི་ཚོད་རེད་དཱ།
དངོས་གནས་རེད། མི་ནག་ཚང་ལུང་རིགས་རྒྱལ་གྱིས་གསུང་པ་རེད། འོན་ཀྱང་རྒྱ་ནག་གིས་དྲྭ་བར་བཙན་འཛུལ་བྱེད་ན་ཐབས་ཤེས་གང་དྲག
རྣམ་པ་ཚོས་བསམ་ཚུལ་གླེང་བར་དགའ་བསུ་ཞུ། འདིའི་རིགས་ལ་རྩོད་པ་ཞིག་ཡོད་པ་ནི་མི་སྒེར་གྱི་གསང་བ་གཞུང་གིས་ལག་ཏུ་ཤོར་འགྲོ་གི་རེད་ཅེས་ནུབ་ཕྱོགས་པ་རྣམས་ཀྱིས་གླེང་གིན་འདུག ཡིན་ཡང་། བོད་པ་ཚོའི་གནས་སྟངས་ཐད་ནས་བཤད་ན། ད་སྐབས་འཛམ་བུ་གླིང་ན་ཁ་འཐོར་གྱི་མི་རིགས་ཤིག་ཡོད་པ་ནི་བོད་པ་ཚོ་ཡིན་ཡང་སྲིད། མུ་མཐུད་ནས་ཁ་འཐོར་དུ་འགྲོ་རྒྱུའི་རྒྱུ་རྐྱེན་ཇེ་མང་རེད་བསམ། དེ་བས་བོད་མི་རིགས་ཞེས་པ་འདི་གང་དུ་ཡོད་ནའང་ཕན་ཚུན་འབྲེལ་བ་བྱེད་ཐུབ་པ་དང་། བོད་དོན་དང་ཁ་མི་འབྲལ་བ། བོད་གཞུང་གི་ལས་དོན་ཁྲོད་འཛུལ་ཞུགས་བྱེད་ཐུབ་པ་བཅས་ཀྱི་ཆེད་དུ་དྲ་བའི་རིག་གནས་འདི་སྤྱད་དེ་ཐབས་ལམ་ཞིག་འཛིན་ཐུབ་ན་ཡག་པོ་ཡོད་པ་རེད་བསམ་ཡོད།
རྭ་ལོ་འདི་རྭ་ལོ་ཙཱ་བའི་མི་རྒྱུད་ཡིན་ཤག་རེད། དེ་ལྟ་མིན་ན་འདི་ལྟུའི་ལམ་སྟོན་གནང་སྲིད་དམ། ངོ་སོ་བསྟོད།
ཨ་ལ་ལ། ཨ་ཁུ་ལོ་ལོ། བོད་ཡིག་མ་ཤེས་ན་ལ་རྒྱ་མེད་པ་ཞིག་གླེང་མཁན་ཡོད་མི་སྲིད་མོད། ཡིག་ནོར་མ་བཅོས་ན་རིག་གཞུང་དམར་གསོད་གཏོང་བཞིན་པ་དངོས་ཡོད་གནས་ཚུལ་ཆགས་མེད་དམ། དེ་ལྟ་མིན་ན། སུམ་རྟགས་ཀྱིས་ག་རེ་བྱེད། དག་ཡིག་གིས་ཅི་ཞིག་མཚོན། མིང་བརྡ་ཡི་དགོས་པ་གང་། བཀའ་པོད་ཀྱི་རིན་ཐང་ཅི།
འདི་དག་གཏོར་མཁན་དགྱ་རེད། ཡིག་ནོར་འབྲི་མཁན་དགྱ་ཡི་དམག་རེད། དམག་དེ་མ་རེད་ཟེར་ན། ལན་དེར་ཡིག་ནོར་མ་འབྲི། གལ་སྲིད་ཡིག་ནོར་ཡོད་ན། དམག་གི་ཆོ་ལོ་ཕུལ་ངེས།
དྲ་ཐོག་གི་མགྲིན་ཚབ་པ་ཞིག་བཞག་ན་བོད་པ་ཚོས་དེ་ལ་དྲ་ཐོག་ནས་དོན་མེད་གཤེ་གཤེ་གཏོང་བ་དང་། འཇིགས་སྐུལ་བྱེད་པ་སོགས་ཡོང་གི་མ་རེད་དམ། འདི་གལ་ཆེན་པོ་ཞིག་ཡིན་པ་འདྲ། དུས་རབས་དང་བསྟུན་པའི་བྱེད་ཐབས་གང་ཡོད་ཀྱང་ལག་བསྟར་བྱེད་ཆོག་གི་རེད།
བོད་ཀྱི་ཡི་གེ་མ་ཤེས་ན་བོད་མིའི་ལ་རྒྱ་མེད་པ་དང་། བོད་ཡིག་གི་དག་ཆ་ཞན་ན་བོད་དོན་སྒྲུབ་མི་ཐུབ་པའི་ལྟ་ཚུལ་བཟུང་ན་དེ་ཡང་འགྲིག་བསྡད་པ་ཞིག་ཏུ་མ་མཐོང་།
མདོར་དྲིལ་ནས་བཤད་ན། ཡིག་ནོར་འབྲི་མཁན་འདི་དག་བོད་ཀྱི་རིག་གཞུང་གི་ཚེ་སྲོག་གཅོད་མཁན་ཤ་སྟག་ཏུ་གྱུར་ཡོད་པས། ཡིག་ནོར་འབྲི་མཁན་དང་དགྱ་གཉིས་ལ་ཁྱད་པར་ཅི་ཞིག་ཡོད་དམ། ཚང་མས་བསམ་ཚུལ་འཇོག་རོགས།
གློག་ལམ་འཛིན་སྐྱོང་གླེང་བ་ཡག་ཤག ཡིན་ནའི། ཡིག་ནོར་གྱི་མི་རབས་འདིར་བཅོ་ཐབས་མི་འདུག གོང་གསལ་གྱི་མཆན་འདི་དག་དཔེར་མཚོན་རེད། དེ་བས། དེང་ཐོག་ཡིག་ནོར་མི་རབས་འདི་མི་ནོར་བའི་ལམ་ཁར་འཇུག་རྒྱུ་དང་། ཉུང་མཐར་མི་རེར༼དག་ཡིག་གསར་བསྒྲིགས༽རེའམ། ཡང་ན། གློག་ལམ་ནས་ཤར་རྒྱག་ལྟ་ཀློག་བྱེད་ཐུབ་པ་ཞིག་བཟོ་དགོས་འདུག དེ་ནས་གོམ་རིམ་གཉིས་པ་སྟེ། གློག་ལམ་འཛིན་སྐྱོང་སྒང་ཤར་རྒྱག་འཇུག་ཐུབ་པ་ཡིན་ན། ཕན་ཐོགས་ཆེ་བ་མི་འདུག་གམ།
དུས་བབ་རྩོམ་སྒྲུག་པས་མ་འོང་བཙན་བྱོལ་བོད་མི་གཅིག་གྱུར་གྱིས་མགོ་བསྡུ་སྟངས་ཀྱི་བསམ་བློ་གཏོང་ས་ནི་དྲ་བའི་རིག་གནས་འདི་ཡིན་པའི་བཙན་བྱོལ་བོད་གཞུང་གི་འདིའི་ཐད་ལས་གཞི་རྩོལ་རྒྱུ་ག་ཆེན་པོ་རེད་གསུངས་པ་དེ་ལ་མཐའ་གཅིག་ཏུ་རྒྱབ་སྐྱོབ་ཡོད། ཅང་ཟད་བཤད་པ་ཐལ་གྲགས་པ་ནི་ནུབ་ཕྱོགས་སུ་འཚར་བཞིན་པའི་བྱིས་པ་རྣམས་ནི་བོད་ཀྱི་སྐད་ཡིག་དང་རིག་གཞུང་བོད་དོན་འཐབ་རྩོད་ལ་ཆ་མེད་རྒྱུས་མེད་རེད་ཟེར་བ་དེ་ནི་རྩོམ་སྒྲུག་པ་རང་ཉིད་ཀྱིས་ནུབ་ཕྱོགས་བོད་པའི་སྤྱི་ཚོགས་ལ་རྒྱུས་མེད་པའི་རེད།
བོད་ཀྱི་སྐད་ཡིག་ཤེས་མིན་ནི་གཙོ་བོ་མི་སོ་སོར་་ལ་རག་ལུས་འདུག་མ་གཏོགས་ཤར་ནུབ་གྱི་ཁྱད་པ་དེ་ཙམ་མ་མཐོང་།
སྤྱིར་མ་འོངས་ལུང་བསྟན་ཟེར་བ་ཞིག་འདས་ཟིན་པའི་ལྷ་སྒྲུང་ཙམ་ཡིན་མིན་མི་ཤེས་གང་ལྟར་དངོས་གནས་ཕྱོགས་ལྷུང་མེད་པར་བོད་མའི་བདེ་སྡུག་ཐོག་བསམ་ཞིབ་བྱེད་མཁན་གྱི་མི་སྣ་སུ་ཞིག་ཡོང་ན་དགས་བསུ་ཡོད་
རྩོམ་སྒྲིག་པའི་སྙན་ལམ་ལ།
འདི་གར་རྩོམ་སྒྲིག་པའི་གཏམ་བཤད་དུ་གློག་ལམ་གྱི་འཛིན་སྐྱོང་ཞེས་པའི་བརྗོད་གཞི་ཐོག་སྤེལ་བའི་རྩོམ་་འདི་ཉིད་སྤྱིར་ནས་འཕུར་རྒྱང་གི་ཆར་གཞི་དང་བསམ་དོན་ཡག་པོ་ཞིག་འདུག ཡིན་ནས་མ་འོངས་བོད་ཀྱི་གནད་དོན་དེ་ཉིད་བཙན་བྱོལ་བོད་མི་རྒྱ་གར་དུ་གནས་མ་གནས་དང་ནུབ་ཕྱོགས་རྒྱལ་ཁབ་ཏུ་སླེབས་ནས་བོད་སྐད་ཡིག་མ་ཤེས་པ་ཙམ་ལ་རག་མེད། གུས་རང་ཉིད་ད་ལྟ་ནུབ་ཕྱོགས་རྒྱལ་ཁབ་ཏུ་ཡོད་པར་ཕར་ཚུར་བོད་རིགས་སྐྱར་ནས་ནུབ་ཕྱོགས་སུ་སླེབས་པས་བཙན་འབྱོལ་བ་དང་འདི་གར་སྐྱེས་ནས་ཚར་ལོང་བྱུང་བས་བོད་པ་དང་བོད་རིགས་འདྲེས་མ་རྣམས་བར་སྡུར་དུས། རྗེས་མས་བོད་སྐད་ཡིག་དེ་ཙམ་མ་ཤེས་ཀྱང་བོད་པའི་རིག་གཞུང་དང་སྲིད་དོན་ལ་དོ་སྣང་དེ་ཙམ་མང་བ་དང་ཤེས་བྱ་ཆེ་བ་ངོས་རང་གི་མཐོང་བྱུང་། གཉིས་ནས་བོད་རིགས་ནུབ་ཕྱོགས་སུ་སྐྱར་ནས་བཙན་བྱོལ་ལ་ཡོངས་ནས་བཙན་བྱོལ་བོད་མིའི་དཔལ་འབྱོར་དང་སྤྱི་ཚོགས་གཡར་རྒྱས་ཕྱིན་པ་དང་མཐོང་རྒྱ་ཆེ་རུ་འགྲོ་ཡོད་པ་ལས་ད་ལྟ་བར་ཆེས་ལྷག་པའི་སྐྱོན་གང་ཡང་བྱུང་མེད། འདིར་བསམ་ཆར་ལ་རྒྱ་བལ་འབྲུག་གསུམ་གྱི་བཙན་བྱོལ་སྤྱི་ཚོགས་དང་དེ་བཞིན་བཙན་བྱོལ་བོད་གཞུང་བསྲ་བརྟན་གནས་ཐབས་ལ་སྤྱི་ཡོངས་ནས་བོད་མི་རྣམས་ཀྱི་སྤྱི་ཚོགས་དང་ཤེས་ཡོན་ཡར་རྒྱས་གཉིས་ཤིན་ཏུ་གལ་ཆེན་ཡིན་པས་སྒང་ལ་བོད་མི་སྤྱིའི་མི་འབོར་གང་མང་གཏོང་ཡག་གི་ཐབས་ལམ་སོགས་བྱུང་ན་མ་ལེགས་སམ།
རྒྱ་ནག་ལྟ་བུར་ཆ་བཞག་ན། དཔེ་མཛོད་ཁག་གི་དཔེ་དེབ་ཡོངས་རྫོགས་ལག་ཐོགས་ཁ་པར་ནང་ནས་བཀླག་ཐུཔ་ཞིག་བཟོ་རྒྱུར་གོམ་པ་སྤོ་བཞིན་འདུག དེས་མཚོན་ནས་ང་ཚོ་ཡང་ལད་ཟློས་ཀྱི་མི་རིགས་ཤིག་མ་བྱས་ཀ་མེད་ལགས།
རྩོམ་སྒྲིག་པས་འདིར་མ་འོངས་ལུང་བསྟན་བརྒྱབས་བྱུང་།
འོན་ཀྱང་། ང་ཚོའི་སྤྱི་ཚོགས་ནང་མཐུན་རྐྱེན་དང་གནས་བབ། གོ་རྟོགས། ཤུགས་རྐྱེན། ཁོར་ཡུག་སོགས་ཀྱི་ཁྲོད་ནས་ད་དུང་མགོ་བོ་འདེགས་མ་ཐུབ་པར་ལྷག་དང་ལྷག་མུས་རེད། ད་ཇི་ལྟར་བྱས་ཏེ་ང་ཚོ་མགོ་བོ་འདེགས་ཐབས་བྱེད་དགོས་སམ།།
དུས་བབ་རྩོམ་སྒྲིག་པའི་གཏམ་འདི་བཙན་བྱོལ་བོད་མིའི་མ་འོངས་ཕུགས་རྒྱང་གི་འཆར་གཞིར་དངོས་འབྲེལ་གལ་ཆེའི་རང་བཞིན་ཞིག་ཆགས་འདུག
ངའི་བསམ་ཚོད་ལ་གཞིགས་ན་༸ གོང་ས་མཆོག་དང་བཙན་བྱོལ་བོད་གཞུང་གིས་ད་ལྟ་ནས་འཛམ་གླིང་གང་སར་ཁ་ཐོར་དུ་སོང་བའི་བོད་མི་སྤྱི་དང་། ལྷག་དོན་བོད་སྐད་དང་བོད་ཡིག་མི་ཤེས་པའི་བོད་ཕྲུག་ཚོར་དམིགས་བསལ་གྱིས་ལམ་སྟོན་དང་ལས་འཆར་ངེས་ཞིག་འགྲིག་དགོས་ཀྱི་དུག་སྙམ།
ད་དུང་བོད་གཞུང་གིས་དྲ་བའི་རིག་གནས་ཕྱོགས་སུ་གོམ་གང་མདུན་སྤོས་ཀྱིས་བོད་དང་། བོད་མི། བོད་ཀྱི་སྐད་ཡིག རིག་གནས། བོད་ཀྱི་ལེགས་བྱང་སོགས་ཕྱོགས་གང་ས་ནས་འཛམ་གླིང་རྒྱལ་ཡོངས་སུ་འབྲེལ་གཏུགས་དང་གནས་ཚུལ་ཁྱབ་སྤེལ་སྔར་བས་སྤེལ་ཤུགས་ཆེ་རུ་གཏོང་པ་གལ་ཆེའི་རང་བཞིན་ཞིག་ཆགས་འདུག
བོད་དོན་འདི་མ་ཤི་བར་གསོན་པོར་གནས་དགོས་ན་བོད་རིགས་གཞོན་སྐྱེས་ཡོངས་ལ་དམིགས་བསལ་གྱིས་བོད་ཀྱི་སྐད་ཡིག་སློབ་འཁྲིད་དང་། བོད་མི་རིགས་གནས་ལུགས། བོད་ཀྱི་ཤེས་རིག་བཅས་ལ་གོམ་འདྲིས་ཡོད་པ་དང་ཤེས་རྟོགས་ཡོད་པ། བོད་མི་རིགས་ཀྱི་རྒྱ་ཡོད་པའི་བོད་མི་ཞིག་ཏུ་འགྱུར་རྒྱུར་དགིགས་འཆར་བཟུང་དགོས་ཀྱི་འདུག