ཉོན་མོངས་ལས་གྲོལ་ཐབས་ནི་བདག་མེད་རྟོཊ་པའི་ཤེས་རབ་ཡིན།

འབྲུག་རྒྱལ་ཁབ་དེ་ཆོས་ལྡན་གྱི་རྒྱལ་ཁབ་ཅིག་རེད། སངས་རྒྱས་ཆོས་དར་ཁྱབ་ཆེན་པོ་ཞེ་དྲག་ཡོད། ཕྱི་དངོས་པོའི་འཛུགས་སྐྲུན་ཡར་རྒྱས་མྱུར་མོར་འགྲོ་བཞིན་ཡོད། དེ་བཞིན། སངས་རྒྱས་ཀྱི་ཆོས་ཚུལ་དང་། ལྷག་པར་དུ་འབྲུག་པ་བཀའ་བརྒྱུད་པའི་བསྟན་པ་སྲོག་ཤིང་ལྟ་བུར་གསུང་གིན་ཡོད། དེ་ལྟ་བུའི་ཆོས་ཚུལ་བཤད་སྒྲུབ་ཟུང་འབྲེལ་གྱི་ཐོག་ནས་དར་སྤེལ་གཏོང་རྒྱུར་འབད་བརྩོན་གནང་ཐུབ་ན་ཡག་པོ་ཡོང་གི་རེད། ཕྱི་དངོས་པོའི་ཡར་རྒྱས་དང་ལྷན་དུ་ནང་བསམ་བློའི་བདེ་སྐྱིད་ཀྱང་ཡོང་གི་རེད། ཅེས་༧གོང་ས་མཆོག་གིས་གསུངས།

སྤྱི་ནོར་༧གོང་ས་ལྷ་མིའི་རྣམ་འདྲེན་མཆོག་གིས་ཁ་སང་གི་རྟེན་འབྲེལ་སྟོད་པའི་གསུང་འཕྲོས། དེ་རིང་སྔ་དྲོའི་ཆུ་ཚོད་ ༡༠ བ་ནས་མུ་མཐུད་ཡོད་ལ། གསུང་ཆོས་དབུ་འཛུགས་མ་བྱས་གོང་ལ་ཨ་རུ་ན་ཅལ་མངའ་སྡེ་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་གསུང་ཆོས་ར་བར་ཕེབས་ཏེ། ༧གོང་ས་མཆོག་ལ་མཇལ་དར་སྒྲོན་ཞིང་ཕྱག་མཇལ་ཞུས་སོང་། སྐབས་དེར་༧གོང་ས་མཆོག་གིས་དགེ་སྡིག་གི་ངོ་བོ་དང་། ཉོན་མོང་དང་མ་རིག་པ་ལས་གྲོལ་ཐབས་སུ་བདག་མེད་རྟོགས་པའི་ཤེས་རབས་སྒོམ་དགོས་ཚུལ་གསུངས་དོན། དེ་ཡང་མདོ་ལས། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་སུ་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ཞེས་གསུངས་པ་རེད། སྡིག་པ་ཅི་ཡང་མི་བྱ་ཞིང་གསུངས་པ་དེ་སྡུག་བསྔལ་གྱི་རྒྱུ། གཞན་ལ་སྡུག་བསྔལ་སྐྱེད་བྱེད་དང་གཞན་ལ་གནོད་བྱེད་རེད། སྡུག་བསྔལ་ཟེར་བ་དེ་ང་ཚོས་མི་འདོད་པ་ཞིག་རེད། དེར་བརྟེན་སྡིག་པ་ཞེས་ལབ་པ་རེད། རང་ཉིད་ལ་གནོད་པར་བྱེད་པ་དང་སྡང་བར་བྱེད་པ་ཞིག་རེད། དགེ་བ་ཕུན་སུམ་ཚོགས་པར་སྤྱད་ཟེར་བ་དེ་ནི། བདེ་སྐྱིད་ང་རང་ཚོས་འདོད་པ་རེད། འདོད་པའི་བདེ་སྐྱིད་ཀྱི་རྒྱུ། གཞན་ལ་ཕན་བཏགས་པ་དང་་གཞན་ལ་བདེ་སྐྱིད་སྤྱིན་པ་ཡིན་ན། དེའི་འབྲས་བུ་རང་ལ་བདེ་སྐྱིད་ཡོང་བ་ཞིག་ཆགས་ཀྱིན་ཡོད། བདེ་སྐྱིད་ཟེར་བ་དེ་དགེ་ཤིང་ལེགས་པ་ཞིག་ཡིན་སྟབས། དེའི་རྒྱུ་ལ་དགེ་བ་ཞེས་བཏགས་པ་རེད། དེ་ལྟར་སྡིག་པ་སྤངས་ཤིང་དགེ་བ་སྒྲུབ་པ་དེ་མངོན་མཐོ་སྒྲུབ་པའི་ཐབས་ཤིག་ཆགས་ཡོད། དེ་འཛམ་གླིང་གི་ཆོས་ལུགས་གཙོ་ཆེ་བ་ཐུན་མོང་གི་འདོད་ཚུལ་ཞིག་རེད། ཅེས་དང་།

དེ་ནས་རང་གི་སེམས་ནི་ཡོངས་སུ་འདུལ་གསུངས་པ་དེ། སྡིག་པ་སྤོངས་དགེ་བ་སྒྲུབས་ཟེར་ནས་ཁྲིམས་བཅོས་པ་ལྟ་བུ་ཞིག་མ་རེད། སེམས་ནས་དང་དུ་བླངས་ཏེ་སྡིག་པ་སྤོང་བ་དང་དགེ་བ་སྒྲུབ་པ་ཞིག་དགོས་ཀྱིན་ཡོད། དེར་བརྟེན། སྡིག་པ་ལ་ཉེས་དམིགས་སུ་མཐོང་ཞིང་། དགེ་བ་ལ་ཡོན་ཏན་དུ་བལྟ་དགོས། སེམས་ང་རྒྱལ་དང་ཕྲག་དོག ཞེ་སྡང་། འཇིགས་སྣང་སོགས་ཀྱི་འོག་ནས་བསྡད་པ་ཡིན་ན། སྡིག་པ་རང་གི་ངང་གིས་ཡོང་གི་རེད། ཞེ་སྡང་ཆེན་པོ་དང་ཕྲག་དོག་ཆེན་པོ་སྐྱེ་པ་ཡིན་ན། རང་བཞིན་གྱིས་གཞན་ལ་གནོད་པ་བྱེད་གི་རེད། གཞན་ལ་བརྩེ་བའི་བསམ་པ་དང་ཕན་འདོགས་པའི་བློ་ཞིག་ཡོད་ན། རང་བཞིན་གྱིས་གཞན་ལ་ཕན་པའི་བྱ་བ་ཞིག་བསྒྲུབ་གི་རེད། དེ་འདྲ་ཡིན་དུས་སྡིག་པ་སྤོངས། དགེ་བ་སྒྲུབས་ཟེར་བ་དེའི་རྩ་བ་ཐུག་ས་རང་གི་སེམས་ལ་ཐུག་ཡོད། སེམས་མ་བཏུལ་བའི་དབང་གིས་སྡིག་པ་གསོག་གིན་ཡོད་ཅིང་། བཏུལ་བའི་དབང་གིས་དགེ་བ་གསོག་གིན་ཡོད། དེར་བརྟེན། སེམས་མ་བཏུལ་བ་འདུལ་པར་བྱེད་པ་དང་། བཏུལ་བ་གོང་ནས་གོང་དུ་སྤེལ་བ་དེ་སངས་རྒྱས་ཆོས་ཀྱི་ཁྱད་ཆོས་རེད།

སངས་རྒྱས་པའི་ཆོས་དེས་ཉོན་མོང་ལ་སྐྱོན་དུ་ལྟ་ཞིང་། ཉོན་མོང་དང་དུ་མི་ལེན་པར་ཉོན་མོང་ལ་གཉེན་པོ་བསྟེན། ཉོན་མོང་གི་རྩ་བ་གཏི་མུག་མ་རིག་པ་ཡིན། མ་རིག་པར་རྣམ་གྲངས་མང་ཡང་། འདིར་བཤད་པ་ནི་བདག་ཏུ་འཛིན་པའི་མ་རིག་པ་དེ་རེད། བདག་ཏུ་འཛིན་པའི་རྨོངས་པ་དེ་སེལ་རྒྱུར་བདག་མེད་པར་རྟོགས་པའི་ཤེས་རབ་དགོས། རྒྱུད་འདུལ་བར་ཉོན་མོང་གི་རྩ་བ་གཏི་མུག་བདག་འཛིན་ལ་ངོས་འཛིན་བྱས་ཏེ། གཏི་མུག་བདག་འཛིན་སྤང་ཆེད། བདག་མེད་པའི་ལྟ་བ་སྒོམ་པ་དེ་ནི། སེམས་འདུལ་བའི་ཐབས་དམ་པ་ཆགས་ཡོད། ཆོས་ལུགས་གཞན་ཕལ་མོ་ཆེ་ཡིས་སེམས་འདུལ་ཐབས་བྱེད་པའི་ཐབས་གཙོ་བོ་དད་པ་རེད། དཀོན་མཆོག་ལ་ཡིད་ཆེས་རྩེ་གཅིག་གིས་དད་པ་བསྒོམས་ཏེ་སེམས་འདུལ་གྱིན་ཡོད། སངས་རྒྱས་ཆོས་ལུགས་ཀྱིས་གཙོ་བོ་ཤེས་རབ་ལ་བརྟེན་ཏེ་རྒྱུད་འདུལ་ཐབས་བྱེད་ཀྱིན་ཡོད། ཅེས་གསུངས་བྱུང་།

བར་མཚམས་འདིར་༧གོང་ས་མཆོག་གིས་འབྲུག་ཡུལ་ནས་ཕེབས་པའི་ཆོས་ཞུ་བ་ག་ཚོད་ཡོད་མེད་ལག་པ་བརྐྱངས་སུ་བཅུག་པར་ཧ་ལམ་ཉིས་སྟོང་ནས་སུམ་སྟོང་ཙམ་མེད་དམ་སྙམ་པ་འདུག་ལ། དེ་ནས་ཁོང་གིས་འབྲུག་པ་ཆོས་ཞུ་བ་ཚོར་དམིགས་ཏེ་བཀའ་བསྩལ་དོན། འབྲུག་རྒྱལ་ཁབ་དེ་ཆོས་ལྡན་གྱི་རྒྱལ་ཁབ་ཅིག་རེད། སངས་རྒྱས་ཆོས་དར་ཁྱབ་ཆེན་པོ་ཞེ་དྲག་ཡོད་པ་ཞིག་རེད། ཕྱི་དངོས་པོའི་འཛུགས་སྐྲུན་ཡར་རྒྱས་མྱུར་མོར་འགྲོ་བཞིན་ཡོད། སངས་རྒྱས་ཀྱི་ཆོས་ཚུལ་དང་། ལྷག་པར་དུ་འབྲུག་པ་བཀའ་བརྒྱུད་པའི་བསྟན་པ་སྲོག་ཤིང་ལྟ་བུར་གསུང་གིན་ཡོད། དེ་ལྟ་བུའི་ཆོས་ཚུལ་བཤད་སྒྲུབ་ཟུང་འབྲེལ་གྱི་ཐོག་ནས་དར་སྤེལ་གཏོང་རྒྱུར་འབད་བརྩོན་གནང་ཐུབ་ན་ཡག་པོ་ཡོང་གི་རེད། ཕྱི་དངོས་པོའི་ཡར་རྒྱས་དང་ལྷན་དུ་ནང་བསམ་བློའི་བདེ་སྐྱིད་ཀྱང་ཡོང་གི་རེད། ཅེས་གསུངས་ཞིང་། ཉིན་གོང་ཆུ་ཚོད་ ༡ པོ་ནས་སྤྱན་རས་གཟིགས་ཀྱི་དཀའ་དབང་གནང་ཡོད།

གསུང་ཆོས་ཀྱི་བར་མཚམས་ནས་གསར་འགོད་པའི་བླ་མ་མཚོ་སྣ་རིན་པོ་ཆེ་མཆོག་ལ། ཐེངས་འདིར་༧གོང་ས་མཆོག་མོན་རྟ་དབང་ཁུལ་དུ་ཆིབས་སྒྱུར་ཐད། སྤྱི་ཡོངས་ནས་བཅར་འདྲི་ཞུས་པར་ཁོང་གིས་གསུངས་དོན། སྤྱི་ནོར་༧གོང་ས་མཆོག་མོན་རྟ་དབང་ཁུལ་དུ་ཆིབས་སྒྱུར་ཐེངས་ལྔ་བ་དེ་ཆགས་ཡོད། ཐེངས་སྔོན་མ་དག་ལ་ཕྱོགས་གཅིག་ནས་ས་མཚམས་ཡིན་པ་དང་། ཕྱོགས་གཉིས་ནས་ཁོར་ཡུག་གི་གནས་སྟངས་འགྲིག་མིན་སོགས་ཀྱི་དབང་གིས་ཆོས་ཞུ་བའི་འདུ་འཛོམས་དེ་ད་ཐེངས་མང་ཤོས་ཆགས་འདུག ཐོག་མར་ང་ཚོས་ཁྲི་གསུམ་ཙམ་ལ་ཚོད་དཔག་བྱས་ཡོད་ཀྱང་། ཆོས་ཞུ་བའི་དཔག་རྟགས་བཀྲམ་སྐབས་ཚེས་ ༨ ཉིན་ནས་བཟུང་དཔག་རྟགས་གསུམ་ཁྲི་ཡོངས་སུ་རྫོགས་ཚར་འདུག་ལ། ད་ལྟ་བཞི་ཁྲི་ལས་བརྒལ་ཡོད་པར་རྩིས་རྒྱག་གིན་ཡོད། ཕྱོགས་མཐའ་ཁག་ནས་ཕེབས་པའི་ཆོས་ཞུ་བ་རྣམས་དད་གུས་གཡོ་བ་མེད་པ་ཞིག་གི་ཐོག་ནས་ཡོང་གིན་ཡོད་པའི་མཐོང་སྣང་བྱུང་སོང་།

གལ་ཆེ་བ་ཞིག་ལ། སྔོན་མ་འབྲུག་ཡུལ་ནས་ཆོས་ཞུ་བ་ཕེབས་པ་དཀོན་པོ་ཆགས་ཀྱིན་ཡོད། གང་ཡིན་ཟེར་ན། སྲིད་ཕྱོགས་ཀྱི་གནས་སྟངས་འོག་ནས་སྟབས་བདེ་དང་མ་བདེ་ཡོང་གིན་ཡོད་པ་རེད། འོན་ཀྱང་ད་རེབ་ཕལ་ཆེར་འབྲུག་ཡུལ་གྱི་ཆོས་ཞུ་བ་ཉིས་སྟོང་ལྷག་ཕེབས་ཡོད་པར་ཚོད་དཔག་བྱེད་ཀྱིན་ཡོད། དེར་བརྟེན། འབྲུག་ཡུལ་ནས་ཕེབས་མཁན་ཚོ་སྔ་མ་དང་མི་འདྲ་བར་སྲིད་ཇུས་གུ་ཡངས་ཤིག་གི་འོག་ནས་༧རྒྱལ་བ་རིན་པོ་ཆེའི་ཞལ་མཇལ་བ་དང་གསུང་ཐོས་པའི་གོ་སྐབས་བྱུང་སྟེ་རེ་འདོད་འགྲུབ་ཡོད་པ་རེད། ང་ཚོའི་ངོས་ནས་ཀྱང་། འབྲུག་ཡུལ་སོགས་ས་ཐག་རིང་པོ་ནས་ཕེབས་མཁན་ཚོར་བཞུགས་ཡུལ་གུར་དང་ཐུན་རྐྱེན་སོགས་གྲ་སྒྲིག་ཞུས་ཡོད་ལ། དེ་བཞིན་ས་གནས་སྐོར་སྲུང་བ་དང་། མངའ་སྡེ་ཕེབས་སྒྲིག་ཚོགས་ཆུང་གི་ངོས་ནས་ཀྱང་གོ་སྒྲིག་གང་ལེགས་བྱས་འདུག དེར་བརྟེན། ད་རེབ་༧གོང་ས་མཆོག་གི་ཆིབས་སྒྱུར་དེ་སྔ་མ་དང་མི་འདྲ་བར་ཡག་པོ་ཞེ་དྲག་བྱུང་སོང་སྙམ་ཡོད། ཅེས་ལན་སྐྱོན་བྱུང་།

༼ འདི་གའི་གསར་འགོད་པ་དོན་འགྲུབ་བཀྲ་ཤིས་ཀྱིས་མོན་རྟ་དབང་ནས་སྤེལ ༽