དོ་མི་མཉམ་པའི་དོ་སྣང་། རྩོམ་སྒྲིག་པས།

ཕྱི་ཟླ་བཅུ་གཅིག་པའི་ནང་འདིར་ཉམས་མྱོང་གཞན་ཞིག་ཚོར་བྱུང་། ནམ་ཟླ་ཇེ་འཁྱགས་ལ་ཕྱིན་པ་དང་བསྟུན། བོད་ཕྱི་ནང་གཉིས་ཀར་བོད་མི་ཚོ་དལ་ཅག་གེར་འདུག བརྩིགས་ངོས་ཀྱི་སྦྱར་ཡིག་དང་སྲང་ལམ་གྱི་སྐད་འབོད། ཞི་བའི་གོམ་བགྲོད་སོགས་ཀྱང་གོ་རྒྱུ་མི་འདུག ཡིན་ཡང་། རྒྱལ་སྤྱི་རིམ་པ་ནས་བསམ་ན་བོད་དོན་འདི་སྔར་ལོའི་ཕྱི་ཟླ་ ༡༡ པའི་ནང་ལས་ཀྱང་གྲགས་སྐད་ཆེ་ཙམ་འདུག
 ཐེངས་འདིར་བོད་དོན་འདི་གྲགས་སྐད་ཆེ་དོན་ནི་རྒྱ་དཀར་ནག་གཉིས་དང་། ཨ་རི་དང་རྒྱ་ནག་གཉིས་བཅས་ཀྱི་འབྲེལ་བའི་གླེང་སློང་ལས་བྱུང་། ཐོག་མ་དེར་རྒྱ་དཀར་ནག་གཉིས་ཀྱི་ས་མཚམས་རྩོད་རྙོག་ལས་འཕྲོས་ཏེ་༧གོང་ས་མཆོག་མོན་རྟ་དབང་ཡུལ་དུ་ཕེབས་ཆོག་མིན་སྐོར་བརྩད་པ་རེད། འདི་ནི་ཕྱི་ཚུལ་ནས་བལྟས་ན་ས་མཚམས་རྩོད་པ་ལྟར་སྣང་ཡང་། དོན་དམ་གྱིས་བོད་དོན་ཐོག་བཟུང་བའི་ལངས་ཕྱོགས་ཤིག་ཀྱང་མངོན་ཡོད། མཐར་ཕྱོགས་གཉིས་ཀྱིས་༧གོང་ས་མཆོག་ལ་འཛིན་པའི་ལངས་ཕྱོགས་ཇེ་གསལ་དང་ཇེ་མཁྲེགས་སུ་བཏང་ཞིང་། ༧གོང་ས་མཆོག་དངོས་སུ་མོན་རྟ་དབང་ཡུལ་དུ་ཆིབས་བསྒྱུར་བསྐྱངས། རྒྱལ་སྤྱིའི་གསར་འགོད་བརྒྱུད་ལམ་པ་ ༡༥༠ ལྷག་ཀྱང་མོན་རྟ་དབང་ཡུལ་དུ་ཕེབས་ཏེ་༧གོང་ས་མཆོག་གི་མཛད་འཕྲིན་དང་མཉམ་དུ་རྒྱ་དཀར་ནག་གཉིས་ཀྱི་ཡུལ་བབ་སྲིད་བྱུས་ལས་འཕྲོས་པའི་དཔྱད་གཏམ་མང་པོ་བརྒྱུད་ལམ་གང་སར་སྤེལ་ཡོད།
 གཉིས་པ་དེ་ཨ་རིའི་སྲིད་འཛིན་ཨོ་བྷ་མ་པེ་ཅིན་དུ་ཕེབས་དུས་ཀྱི་བོད་དོན་སྐོར་ནས་རེད། སྲིད་འཛིན་ཨོ་བྷ་མའི་མཛད་འཕྲིན་ལོགས་ཀ་ཡིན་ཡང་། སྐབས་འདིར་གསར་འགོད་བརྒྱུད་ལམ་དག་གི་གླེང་གཞི་གཙོ་བོ་ནི་བོད་དོན་དང་རྒྱ་ནག་གི་འགྲོ་བ་མིའི་ཐོབ་ཐང་བཅས་ཀྱི་སྐོར་རེད། ༼ཐེངས་འདིར་ཨོ་བྷ་མས་ཞིན་ཅང་གི་སྐོར་ཚིག་ཟུར་ཙམ་དུ་ཡང་མ་གླེང་བ་དེར་ཡིད་སྐྱོ་སྐྱོ་འདྲ་བྱུང་། ཕལ་ཆེར་ཨོ་ས་མ་བྷིན་ལ་ཌིན་གྱི་འབྲེལ་བའི་དབང་གིས་ཡིན་ཀྱང་སྲིད།༽ གང་ལྟར་སྲིད་འཛིན་ཨོ་བྷ་མས་རྒྱ་གར་གྱི་ལུགས་ལྟར། བོད་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཤིག་ཡིན་པར་ངོས་འཛིན་བྱེད་ཀྱིན་ཡོད་ཅེས་རྒྱ་གར་གྱི་སྲིད་བློན་ཟུར་པ་ཝ་རྗི་བྷ་ཡེ་མཆོག་གི་ཚིག་འབྲུ་ཇི་བཞིན་དུ་དྲངས་ནས་བསྒྲགས་གཏམ་སྤེལ། ཡིན་ཡང་། ཁོང་གིས་༧གོང་ས་མཆོག་དང་བཙན་བྱོལ་བོད་གཞུང་གི་ཐུགས་རེ་ལྟར། མི་དམངས་ཚོགས་ཁང་ཆེན་མོའི་ནང་དུ་སྲིད་འཛིན་ཧུའུ་ཅིན་ཐའོ་ལ་༧གོང་ས་མཆོག་གི་སྐུ་ཚབ་ཚོའི་མཉམ་དུ་འབྲེལ་མོལ་མྱུར་ཏུ་བསྐྱར་གསོ་བྱ་དགོས་པའི་འབོད་སྐུལ་ཞུས་སོང་། ད་ལྟའི་ཆར་ང་ཚོའི་ངོས་ནས་འདི་ལས་ལྷག་པའི་རེ་བ་ཞིག་བརྒྱབས་ཀྱང་རེ་སྟོང་ཙམ་ཡིན་པའི་ངེས་པ་བརྙེད་སོང་བ་ལྟར་བོད་མི་ཚོའི་ངོས་ནས་ཐེངས་འདིར་དེ་ཙམ་གྱི་དོ་སྣང་སྤྲོད་ཐུབ་མེད་པ་ལྟར་སྣང་།
 གང་ལྟར་བོད་དོན་འདི་ད་སྐབས་འཛམ་གླིང་གི་སྟོབས་ཤུགས་ཆེན་པོ་འདི་གསུམ་གྱི་བར་དུ་ཡོད་ལ། རྒྱལ་ཁབ་འདི་གསུམ་གྱི་བར་འབྲེལ་བའི་གླེང་སློང་ཇེ་ཆེར་འགྲོ་བཞིན་པའི་སྐབས་སུ། བོད་མི་རྣམས་ཀྱིས་ཀྱང་སྔར་ལས་དོ་སྣང་དང་རྣམ་རིག་སྒྲིམ་སྟེ་ཁོང་ཚོ་དང་བོད་དོན་གྱི་འབྲེལ་བ་འདི་མི་བརླག་པ་ཞིག་བཟོ་རྒྱུ་ནི་གལ་ཆེ་བར་འདོད་ལ། འདིའི་ཐད་གཞུང་དམངས་གཉིས་ཀར་འཐབ་བྱུས་གསལ་བོ་ཞིག་ཡོད་ན་ལེགས་པར་འདོད་དོ།།