གཞོན་སྐྱེས་ཚོས་རྒྱ་ནག་ཧ་གོ་བར་བྱ་རྒྱུ་གལ་ཆེན་པོ་རེད།

འདི་གའི་གསར་འགོད་པས་བོད་རང་བཙན་སློབ་ཕྲུག་ཚོགས་པའི་ཡུ་རོབ་ས་གནས་འབྲེལ་མཐུད་པ་བདེ་ཆེན་སྤེན་པ་ལགས་སུ་བཅར་འདྲི་བྱས་པའི་དྲི་བ་ཁག་གཤམ་གསལ། 
  དྲི་བ།  ཐོག་མར་ཁྱེད་རང་གི་འདས་པའི་སློབ་སྦྱོང་གི་བརྒྱུད་རིམ་དང་འབྲེལ་ངོ་སྤྲོད་ཅིག་གནང་རོགས།
  ལན། ང་རང་དབྱིན་ཇིའི་རྒྱལ་ས་ལོན་ཌོན་ནས་སྐྱེས་པ་ཡིན་ལ། སློབ་ཆུང་ནས་མཐོ་སློབ་བར་གྱི་སློབ་གྲྭ་ཆ་ཚང་ཡང་ལོོན་ཌོན་ནས་འགྲིམས་པ་ཡིན། ལོན་ཌོན་དུ་མཐོ་སློབ་འགྲིམས་སྐབས་ལོ་གསུམ་རིང་དབྱིན་ཇི་དང་འཇར་མན་གྱི་རིག་གནས་ཐོག་ལ་སློབ་སྦྱོང་བྱས་པ་ཡིན། རྗེས་སུ་འཇར་མན་གྱི་རྒྱལ་ས་བྷར་ལེན་ནང་ཕྱིན་ཏེ་འཇར་མན་གྱི་རིག་གནས་ཐོག་ཡང་བསྐྱར་ལོ་ ༡ རིང་སློབ་སྦྱོང་བྱས་ཤིང་།  སློབ་མཐར་ཕྱིན་རྗེས་འཇར་མན་ནང་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་དུ་ལོ་ ༤ རིང་བོད་དོན་ཐོག་ལས་ཀ་བྱས་པ་ཡིན།  ༢༠༠༦ ལོར་ང་རང་པེ་ཅིན་དུ་ཡོད་པའི་ཀྲུང་དབྱང་མི་རིགས་སློབ་གྲྭ་ཆེན་མོའི་ནང་ཕྱིན་ཏེ་ལོ་ ༢ གཉིས་རིང་རྒྱའི་སྐད་ཡིག་སློབ་སྦྱོང་གི་རྨང་གཞི་ཐོག་མ་བཙུགས་ཤིང་། ཕྱིར་ལོན་ཌོན་དུ་ལོག་རྗེས་རྒྱ་ནག་གི་རིག་གནས་སྐོར་ལ་ཞིབ་འཇུག་བྱ་མགོ་བརྩམས་པ་དང་། འདི་ལོ་ཕྱི་ཟླ་ ༩ པའི་ནང་ངའི་ཞིབ་འཇུག་སློབ་མའི་སློབ་སྦྱོང་གི་དུས་ཡུན་ཡོངས་སུ་མཇུག་རྫོགས་པ་ཡིན།  
  དྲི་བ། པེ་ཅིན་དུ་ཁྱེད་རང་བོད་ཀྱི་གནད་ཡོད་མི་སྣ་དང་སློབ་ཆེན་པ་སོགས་གང་མང་ཞིག་ལ་འབྲེལ་འདྲིས་བྱས་ཡོད་འདུག མི་སྣ་དེ་གིས་ཁྱེད་ལ་སྔར་མེད་ཀྱི་སེམས་ཤུགས་དང་སྤོབས་པ། ཡང་ན་བློ་སྐྱེད་གང་འདྲ་ཞིག་བསྩལ་བྱུང་ངམ།
  ལན། ལོ་ ༢ རིང་པེ་ཅིན་དུ་བསྡད་པའི་དུས་ཡུན་ནང་ངས་བོད་པའི་གནད་ཡོད་མི་སྣ་འབའ་བ་ཕུན་ཚོགས་དབང་རྒྱལ་དང་རྩོམ་པ་པོ་འོད་ཟེར་ལགས་གཙོས། སློབ་ཆེན་པ་དང་གཞུང་ཞབས་ལས་བྱེད་སོགས་བོད་མི་མང་པོ་ཞིག་ངོ་ཤེས་པར་གྱུར་བ་མ་ཟད། ནམ་རྒྱུན་བོད་པའི་སློབ་ཆེན་སློབ་མ་དེ་དག་ལ་འབྲེལ་འདྲིས་བྱས་པ་ཡིན། ང་ཚོ་མཉམ་གནས་ཀྱི་འཚོ་བའི་བརྒྱུད་རིམ་ནས་ངས་པེ་ཅིན་དུ་ཡོད་པའི་བོད་པ་དེ་དག་དམིགས་བསལ་བ་ཞིག་ཏུ་མཐོང་སོང། གང་ཡིན་ཅེ་ན།  ཁོང་ཚོའི་མང་ཆེ་བས་བོད་དོན་ཐད་དོ་སྣང་དང་སེམས་ཤུགས་མི་འདྲ་བ་ཞིག་སླེབས་ཀྱིན་འདུག་ལ།  བསམ་བློ་གཏོང་སྟངས་ཀྱི་ཐད་ནས་ཀྱང། ཆབ་སྲིད་ཁོ་ན་མ་ཡིན་པར་ཁོང་ཚོས་རང་གི་ལས་སྣེ་དེའི་སྟེང་ནས་མ་འོངས་པར་བོད་མི་རིགས་ལ་ཕན་པའི་ལས་དོན་བསྒྲུབ་རྒྱུའི་ཆོད་སེམས་ཀྱང་བརྟན་པོ་བཅངས་འདུག  ངའི་ངོ་ཤེས་པའི་རྒྱ་ནག་གི་གཞུང་ཞབས་ལས་བྱེད་བོད་མི་ཁག་ཅིག་གིས། རྒྱ་ནག་གི་ལས་ཀ་བྱས་པ་ཡིན་ན་བོད་དོན་ལ་ཕན་པའི་ལས་ཀ་བསྒྲུབ་མི་ཐུབ་པ་དང་ཁོང་ཚོར་དེ་འདྲའི་དཀའ་ངལ་ཡོད་པའི་བསམ་ཚུལ་བརྗོད་འོང་གི་འདུག  ཡིན་ཡང་། ངས་དེ་དག་ལས་མཐོང་བ་ནི་ཁོང་ཚོའི་སེམས་སུ་མ་འོངས་པའི་འདུན་པ་དང་བསམ་བློ་རྒྱ་ཆེན་པོ་ཞིག་འདུག་ལ། དེ་བཞིན།  མི་རིགས་འདིའི་ལས་དོན་ལ་ཕན་པའི་བྱ་བ་ཞིག་བསྒྲུབ་རྒྱུ་དེ་དུས་རྟག་ཏུ་ཁོང་ཚོའི་སེམས་ཁོང་དུ་བཅངས་ཡོད་སྟབས། ཁོང་ཚོས་བོད་དོན་ལ་ཕན་པའི་ལས་ཀ་ཞིག་སྒྲུབ་པར་ང་རང་ཡིད་ཆེས་ཆེན་པོ་འདུག  ཁོང་ཚོའི་ཕུགས་འདུན་དང་སྙིང་སྟོབས་ཀྱིས་ང་ལ་ཡང་སྔར་མེད་ཀྱི་སེམས་ཤུགས་དང་སྤོབས་པ་ཞིག་ངང་གིས་སྤྲད་བྱུང།
  དྲི་བ།  ཁྱེད་ཀྱིས་བོད་ནང་གི་གནས་སྟངས་གང་མང་ཞིག་རྒྱུས་ལོན་བྱས་ཡོད་པ་རེད། ད་ལྟའི་བོད་ནང་གི་གཞོན་སྐྱེས་ཚོས་རེ་འདུན་དང་སྙིང་སྟོབས་ལས་ཁྱེད་ཀྱིས་མ་འོངས་བོད་ཀྱི་བདེན་མཐའ་སེལ་བར་ཡིད་ཆེས་དང་རེ་བ་གང་འདྲ་ཞིག་མཐོང་བྱུང་ངམ།
  ལན། ང་རང་པེ་ཅིན་ཁོ་ན་མ་ཡིན་པར་དབུས་གཙང་དང་ཨ་མདོ་ཁུལ་གྱི་ས་ཆ་མང་པོ་ཞིག་ལ་དངོས་སུ་ཕྱིན་པ་ཡིན། ས་ཆ་དེ་དག་ཏུ་ངས་བོད་པ་མང་པོ་ཞིག་ངོས་ཤེས་བར་གྱུར།  ཁོང་ཚོ་དང་མཉམ་དུ་དུས་ཡུན་རིང་པོ་ཞིག་ཕྱིན་མེད་ཀྱང་ཁོང་ཚོའི་བསམ་བློ་གཏོང་སྟངས་དེ་ཧ་ཅང་གི་ཡག་པོ་འདུག་ལ།  ཁོང་ཚོས་ལས་ཀ་ཅི་ཞིག་སྒྲུབ་ཀྱང་བོད་པ་སྤྱི་ལ་ཕན་པའི་ལས་ཀ་སྒྲུབ་ཀྱིན་འདུག  བོད་པ་མང་ཆེ་བས་སོ་སོའི་ནང་མི་དང་གྲོང་པ་ཁྱིམ་འཚེས་སོགས་ལ་འགྲིག་མཐུན་གྱི་ལམ་ནས་བོད་པ་རང་ལ་ཡོད་པའི་ཆོས་དང་རིག་གཞུང་ལ་དོ་སྣང་ཆེན་པོ་བྱེད་ཀྱིན་པ་མ་ཟད། མ་འོངས་ཕུགས་རྒྱང་རིང་པོའི་མི་རིགས་འདིའི་རིག་གཞུང་རྒྱུད་འཛིན་ལ་ནུས་པ་གང་ཡོད་ཞིག་འདོན་གྱིན་འདུག  དེ་མིན་གཞོན་སྐྱེས་ཚོར་མཚོན་ནའང་བོད་སྐད་དང་བོད་ཡིག་གཙོ་བོར་བཟུང་སྟེ། རྒྱ་ཡིག་དང་ཕྱི་གླིང་གི་སྐད་ཡིག་འདྲ་མིན་སོགས་ལ་ཧུར་བརྩོན་གྱིས་སློབ་སྦྱོང་གནང་གིན་འདུག་ལ། ཁོང་ཚོར་མི་རིགས་འདིའི་རིག་གཞུང་དང་ཡུལ་གོམས་གཤིས་ལུགས་རྒྱུན་འཛིན་བྱ་བར་སེམས་ཤུགས་དང་སྤོབས་པ་ཆེན་པོ་ཡོད་སྟབས། བོད་ནང་གི་གཞོན་སྐྱེས་ཚོའི་ཕུགས་རྒྱང་རིང་བོའི་བསམ་བློ་དང་དམིགས་ཡུལ་ལས་མ་འོངས་པར་གཞིས་བྱེས་ལྷན་འཛོམས་དང་བོད་མིའི་བདེན་མཐའ་སེལ་བར་རེ་བ་ཆེན་པོ་ཞིག་མཐོང་འོང་གི་འདུག
  དྲི་བ།  ཁྱེད་ཀྱིས་བོད་ཕྱི་ནང་གཉིས་ཀྱི་གཞོན་སྐྱེས་ཚོས་བོད་ཀྱི་གནད་དོན་ལ་བཟུང་བའི་འདུ་ཤེས་ཀྱི་ཐད་ནས་མི་འདྲ་བ་གང་འདྲ་ཞིག་མཐོང་བྱུང་ངམ། 
  ལན། མི་འདྲ་བ་ཞེ་བོ་དེ་འདྲ་མཐོང་མ་སོང། ཡིན་ནའང་། བོད་ནང་གི་གཞོན་སྐྱེས་ཚོ་བོད་ཡིག་དང་རྒྱ་ཡིག་གཙོས་རྒྱ་ནག་གཞུང་གང་འདྲ་ཞིག་ཡིན་མིན་དང་གཞུང་གི་འགྲོ་སྟངས་དེ་དག་གསལ་བོར་མཁྱེན་གྱི་ཡོད་སྟབས་བཙན་བྱོལ་ནང་གི་གཞོན་སྐྱེས་དང་འདྲ་གི་མི་འདུག བཙན་བྱོལ་ནང་ལ་མཚོན་ན་གཞོན་སྐྱེས་མང་ཆེ་བས་བཙན་བྱོལ་བོད་གཞུང་དང་བོད་པའི་སྤྱི་ཚོགས་ལ་དོ་སྣང་བྱས་པ་ལས་རྒྱ་ནག་ལ་དོ་སྣང་བྱེད་མཁན་ཧ་ཅང་ཉུང་ཉུང་ཡིན་པ་ལྟ་བུ་ང་རང་གིས་མཐོང་གི་འདུག  ང་ཚོ་ཕྱི་ཕྱོགས་སུ་ཡོད་པའི་གཞོན་སྐྱེས་མང་ཆེ་བས་རྒྱ་ནག་ལ་རྒྱུས་ལོན་དང་རྒྱ་ནག་གི་ཤེས་ཡོན་ལ་དོ་སྣང་བྱས་ཏེ་ཞིབ་འཇུག་བྱ་རྒྱུ་དེ་གལ་ཆེན་དུ་འཛིན་གི་མི་འདུག   ངས་བསམ་ན་བོད་ནང་གི་གནས་སྟངས་གསལ་བོ་དང་ཡག་པོ་ཞིག་ཤེས་དགོས་ན་རྒྱ་ནག་མགོ་ཚོད་རྒྱུ་གལ་ཆེན་པོ་རེད་བསམ་གྱི་འདུག་ལ། དེ་གལ་ཆེན་ཡིན་པ་ང་ཚོ་ཚང་མས་ཧ་གོ་གི་རེད་བསམ་ཡོད།  བོད་ནང་གི་བོད་པ་ཚོར་མཚོན་ན་ད་ལྟའི་ཛ་དྲག་གནས་སྟངས་འདི་འདྲའི་འོག་ཏུའང་རྒྱ་མི་དང་མཉམ་གནས་དང་བསྟུན་མཁས་བྱེད་པའི་ཐད་གལ་ཆེན་དང་དོ་སྣང་བྱེད་ཀྱིན་འདུག་ལ། དེ་དང་ཆབས་ཅིག་ཕྱི་ཕྱོགས་སུ་ཡོད་པའི་བོད་མི་དང་འབྲེལ་འདྲིས་ཀྱིས་༧གོང་ས་མཆོག་དང་བཙན་བྱོལ་བོད་གཞུང་གི་གནས་ཚུལ་སོགས་དྲ་རྒྱ་དང་བརྒྱུད་ལམ་འདྲ་མིན་བརྒྱུད་དེ་གནས་ཚུལ་རྒྱུས་ལོན་དང་དོ་སྣང་ཤུགས་ཆེར་བྱེད་ཀྱིན་འདུག དེ་བས། ངའི་བསམ་པར་མ་འོངས་པར་ང་ཚོ་བོད་ཕྱི་ནང་གཉིས་ཀྱི་གཞོན་སྐྱེས་ཚོས་ང་ཚོ་མི་རིགས་གཅིག་པ་དང་དམིགས་ཡུལ་གཅིག་པ་ཡིན་པའི་ཆ་ནས་བརྒྱུད་ལམ་འདྲ་མིན་གྱི་ཐོག་ནས་ཕན་ཚུན་བསམ་བློ་བརྗེ་རེས་དང་ཐག་ཉེ་རུ་གཏོང་རྒྱུ་མ་ཟད། འབྲེལ་འདྲིས་བྱ་རྒྱུ་དེ་ཧ་ཅང་གལ་ཆེན་དུ་མཐོང་གི་འདུག  
  དྲི་བ།  ཁྱེད་རང་རྒྱ་ནག་ནང་བསྡད་པའི་དུས་ཡུན་རིང་ཁྱེད་ཀྱིས་རྒྱ་ནག་གིས་བོད་ཐོག་འཛིན་པའི་སྲིད་བྱུས་ཀྱི་ཁ་ཕྱོགས་དང་གནས་བབ་ཅི་འདྲ་ཞིག་མཐོང་བྱུང་ངམ།
  ལན། ༢༠༠༧ ལོར་ང་དབུས་གཙང་དང་ཨ་མདོའི་ས་ཁུལ་ཁག་ཅིག་ཏུ་ཕྱིན་པ་ཡིན་ལ། སྐབས་དེར་རྒྱ་ནག་གི་སྲིད་བྱུས་གུ་ཡངས་པོའི་རྣམ་པ་དེ་འདྲ་ཞིག་མཐོང་སོང་། ང་རང་དགོན་སྡེ་དང་ཁྱིམ་ཚང་གང་མང་ཞིག་ཏུ་ཕྱིན་པར་དེར་སྐུ་མདུན་གྱི་སྐུ་པར་སོགས་མང་པའི་མཐོང་རྒྱུ་འདུག ཡིན་ནའང་།  ༢༠༠༨ ལོ་ནས་བཟུང་རྒྱ་ནག་གིས་བོད་ཐོག་འཛིན་པའི་སྲིད་བྱུས་ལ་འགྱུར་བ་ཆེན་པོ་ཞིག་ཕྱིན་པའི་ཚོར་སྣང་བྱུང་སོང་། ལོ་སྔོན་མའི་སྤྱི་ཟླ་ ༣ པ་ནས་ང་རང་པེ་ཅིན་དུ་རྒྱུན་རིང་པོ་བསྡད་དུས་དེར་རྒྱ་ནག་སྲིད་གཞུང་གིས་སྐབས་དེའི་ཞི་རྒོལ་གྱི་དོན་རྐྱེན་དེ་༧གོང་ས་མཆོག་དང་བོད་ཀྱི་གཞོན་ནུ་ལྷན་ཚོགས་སོགས་ཀྱི་སྐུལ་སློང་འོག་བྱུང་བའི་སྐོར་དང་། དེ་བཞིན། རྒྱ་གཞུང་གིས་ཐབས་ལམ་འདྲ་མིན་གྱི་འོག་ནས་བོད་དེ་རྒྱ་ནག་གི་ཁ་འབྲལ་ཐབས་མེད་པའི་ཆ་ཤས་ཤིག་ཏུ་བསྒྱུར་བའི་ཐད་གསར་འགྱུར་བརྒྱུད་ལམ་སོགས་སུ་ཤུགས་ཆེན་པོའི་སྒོ་ནས་བཤད་ཀྱིན་འདུག་ལ།  ཁོང་ཚོ་རང་ཉིད་ལ་དགོས་མཁོ་ཆེ་བའི་གསར་འགྱུར་ཁོ་ན་ལས་གཞན་དངོས་ཡོད་གནས་ཚུལ་ཅི་ཡང་ཁྱབ་བསྒྲགས་དང་མི་མང་གི་གཟིགས་མོར་ཕུལ་གྱིན་མེད་པའི་གནས་སྟངས་སོགས་གསལ་བོར་འདུག  གནས་སྟངས་དེ་དག་ལས་ངས་རྒྱ་གཞུང་གིས་ཁོང་ཚོས་རང་ཉིད་ཀྱི་ནོར་འཁྲུལ་ལ་བལྟ་ཐུབ་ཀྱིན་མེད་པ་དང་། དྲང་པོ་དྲང་བཞག་གི་བྱ་བ་ཞིག་སྒྲུབ་ཀྱིན་མེད་པ་གསལ་བོར་མཐོང་སོང་ལ། བོད་རྒྱ་མི་རིགས་གཉིས་བར་འབྱུང་བཞིན་པའི་འགལ་བའི་གནད་དོན་མང་པོ་ཞིག་ཀྱང་ཁོང་ཚོ་རང་གིས་བསྒྲུབ་ཀྱིན་པ་དང་བོད་ཀྱི་ཐོག་ལ་གུ་ཡངས་ཀྱི་རྣམ་པ་མཐོང་བར་བྱེད་པ་ནི་ཁོང་ཚོའི་རྫུན་སྒྲིག་གི་བྱེད་ལས་ཤིག་ཡིན་པ་གསལ་བོར་མཐོང་སོང། གལ་སྲིད།  རྒྱ་གཞུང་གིས་མ་འོངས་པར་དངོས་ཡོད་ཀྱི་གནས་སྟངས་དེ་དག་ལ་འགྱུར་བ་གཏོང་མ་ཐུབ་པ་ཡིན་ན། ཁོང་ཚོའི་རྙོག་དྲ་དེ་ག་དུས་ཡིན་ཡང་སེལཐུབ་ཀྱི་མ་རེད་ལ། བོད་དང་རྒྱ་མི་རིགས་གཉིས་ཀྱི་འཁོན་འཛིན་གྱི་འདུ་ཤེས་དེ་ཡང་ཇེ་སྡུག་ལ་འགྲོ་སྲིད་པ་ཞིག་རེད། 
  དྲི་བ།  བོད་ནང་གི་གཞོན་སྐྱེས་ཚོས་ད་ལྟའི་ཛ་དྲག་གནས་བབ་འདི་འདྲའི་འོག་ཏུའང་དཔའ་མི་ཞུམ་པའི་སྙིང་སྟོབས་རྒྱས་ཐུབ་པའི་གཞི་རྩ་དེ་ཁྱེད་ཀྱིས་བསམ་ན་གང་ལ་ཐུག་ཡོད་པར་འདོད་དམ།
  ལན། བོད་ནང་ཁུལ་གྱི་བོད་པ་ཚོ་གང་འདྲ་ཡིན་མིན་ངས་གསལ་བོ་ཤེས་ཀྱི་མེད། ཡིན་ནའང་། ང་རང་པེ་ཅིན་ལ་བསྡད་པའི་སྐབས་ཀྱི་གནས་སྟངས་ལ་གཞིགས་ན། འདས་ལོའི་བོད་ཆོལ་གསུམ་གྱི་གཡོ་འགུལ་ལ་བརྟེན་ནས་པེ་ཅིན་དུ་ཡོད་པའི་བོད་པ་ཚོས་ཀྱང་རང་ངོས་ནས་ལས་འགུལ་སྤེལ་བ་དང་། ཁོང་ཚོ་གཉིད་ལས་སད་པ་ལྟ་བུའི་རྟོགས་སད་ཞིག་བྱུང་སོང་ལ། དེ་བཞིན་སྔོན་དང་མི་འདྲ་བར་རྒྱ་མིས་བོད་ལ་གང་འདྲ་བྱེད་ཀྱི་ཡོད་མེད་སོགས་ཀྱི་ཐད་ལའང་དོ་སྣང་ཤུགས་ཆེར་ཕྱིན་སོང། པེ་ཅིན་དུ་ཡོད་པའི་བོད་པའི་ལས་འགུལ་སྤེལ་མཁན་གྱི་སློབ་མ་མང་ཆེ་བ་ ༡༩༨༠ ལོའི་རྗེས་སུ་སྐྱེས་པའི་གཞོན་སྐྱེས་རྐྱང་རེད། ཁོང་ཚོས་ ༨༧ དང་ ༨༨ ལོའི་ནང་དུ་བྱུང་བའི་ཟིང་འཁྲུག་གི་དོན་རྐྱེན་དེ་དག་གསལ་བོར་ཤེས་ཀྱིན་ཡོད་པ་མ་རེད། ན་ནིང་གི་ཞི་བའི་ངོ་རྒོལ་བྱུང་བ་ནས་བཟུང་ཁོང་ཚོས་རྒྱ་མིའི་འོག་ཚུད་ཡོད་པ་དང་། སོ་སོའི་རིག་གཞུང་ལ་བདག་པོ་རྒྱག་དགོས་པ་སོགས་གཞི་ནས་བསམ་བློའི་ནང་འཆར་འོང་གིན་ཡོད་པ་རེད། ངས་བསམ་ན་དེ་ལྟ་བུའི་གཞི་རྒྱ་ཆེ་བའི་ཞི་རྒོལ་ནི་མི་རབས་རེ་རེའི་སྐབས་སུ་ཐེངས་རེར་མ་གཏོགས་ཡོང་སྲིད་པ་ཞིག་མ་རེད་བསམ་ལ། གནས་ཚུལ་དེ་དག་ལས་བོད་པའི་གཞོན་སྐྱེས་ཚོའི་སེམས་ཤུགས་ཆེ་རུ་འགྲོ་བཞིན་འདུག ངས་བསམ་ན་ཁོང་ཚོར་དེ་ལྟ་བུའི་སེམས་ཤུགས་དང་སྤོབས་པ། སྙིང་སྟོབས་ཤིག་ཡོད་པའི་རྒྱུ་གཙོ་བོ། ཚང་མ་ནང་པའི་ཆོས་ལ་དད་པ་བྱེད་མཁན་ཞིག་དང་༧གོང་ས་མཆོག་གི་དབུ་ཁྲིད་པའི་བོད་མི་ཞིག་ཡིན་པ། དེ་བཞིན་ཕ་མེས་ཡང་མེས་ཀྱི་ངག་རྒྱུན་ནས་མཆེད་པའི་འདས་པའི་བྱུང་རབས་དེ་དག་ལ་བྱུང་བ་རེད་བསམ།
  དྲི་བ།   བོད་ཕྱི་ནང་གི་གཞོན་སྐྱེས་ཚོ་བསྡུར་བ་ཡིན་ན། ཁྱེད་ཀྱིས་ཕྱོགས་གཉིས་ཀྱི་མི་འདང་བའི་སྐྱོན་ཆ་ཅི་ཞིག་མཐོང་བྱུང་བ་དང་།  གཞོན་སྐྱེས་ཚོར་བཤད་རྒྱུའི་སྙིང་གཏམ་དང་རེ་བ་ཅི་ཞིག་ཡོད་དམ།
  ལན། སྐྱོན་ཆ་དེ་འདྲ་ང་རང་གིས་དམིགས་བསལ་མཐོང་མ་བྱུང། ཡིན་ནའང། ངས་བསམ་ན་གཞོན་སྐྱེས་ཚོས་སློབ་སྦྱོང་བྱ་རྒྱུ་དེ་ཧ་ཅང་གལ་ཆེན་དུ་མཐོང་གི་འདུག  གང་ཡིན་ཟེར་ན། བོད་ནང་གི་གཞོན་སྐྱེས་ཚོ་ཡིན་ན་བོད་ཡིག་དང་རྒྱ་ཡིག་དེ་མིན་དབྱིན་ཇིའི་སྐད་སོགས་སྦྱོང་ཐུབ་པ་ཡིན་ན་མ་འོངས་བར་ཕན་ཐོགས་ཀྱི་རེད། དེ་བཞིན། བཙན་བྱོལ་དུ་ཡོད་པའི་བོད་པ་ཚོས་ཀྱང་སོ་སོའི་རིག་གཞུང་ལ་དོ་སྣང་བྱེད་རྒྱུ་གལ་ཆེན་དུ་འཛིན་རྒྱུ་ཙམ་མ་ཟད། རྒྱ་སྐད་དང་རྒྱ་ནག་གི་ལོ་རྒྱུས། དེ་བཞིན་རྒྱ་ནག་གི་སྲིད་བྱུས་ལ་འགྱུར་བ་གང་འདྲ་ཐེབས་ཀྱིན་ཡོད་མེད་སོགས་ཀྱི་ཐད་དོ་སྣང་ཆེ་རུ་གཏོང་རྒྱུ་གལ་ཆེན་པོ་རེད། ང་ཚོའི་འཐབ་རྩོད་དེ་རྒྱ་མི་དང་མཉམ་དུ་འབྲེལ་བ་ཤུགས་ཆེར་ཡོད་སྟབས། ང་ཚོའི་ཕྱོགས་ནས་ཀྱང་གཞོན་སྐྱེས་ཚོས་རྒྱ་ནག་མགོ་ཚོད་པར་བྱ་རྒྱུ་གལ་ཆེན་པོ་རེད།  གལ་ཏེ། དེ་འདྲ་བྱུང་བ་ཡིན་ན་ང་ཚོའི་བདེན་མཐའ་གསལ་རྒྱུར་ཕན་པ་ཆེན་པོ་འབྱུང་གི་རེད་བསམ།  ང་རང་ཉིད་ལ་མཚོན་ནའང་བོད་སྐད་ཏོག་ཙམ་ཤེས་པ་ལས་བོད་ཡིག་ཡག་པོ་ཤེས་ཀྱིན་མེད་སྟབས། རང་གི་ངོ་ཚ་ཤིག་ཏུ་བརྩི་གིན་ཡོད། ད་ལྟའི་ཆར་ངས་བོད་སྐད་དང་བོད་ཡིག་གཙོ་བྱས་ཏེ་རྒྱ་ཡིག་གི་ཐོག་ལའང་ཧུར་བརྩོན་བྱེད་ཀྱིན་ཡོད་ལ། མ་འོངས་པར་མུ་མཐུད་ནས་འབད་བརྩོན་བྱ་ངེས་ཡིན། ད་ལྟ་ང་རང་ཉིད་ནས་ www.highpeakspureearth.com ཞེས་པའི་དྲ་ཚིགས་གསར་པ་ཞིག་བཟོས་ཡོད་ལ། དེའི་སྟེང་བོད་དོན་དང་འབྲེལ་བའི་རྩོམ་ཡིག་མང་པོ་དབྱིན་ཇིའི་ནང་བསྒྱུར་ཏེ་བོད་དོན་གྱི་དངོས་ཡོད་གནས་ཚུལ་མང་པོ་རྒྱལ་སྤྱིའི་སྟེང་དྲིལ་བསྒྲགས་བྱེད་ཀྱིན་ཡོད་ལ། དོན་འགྲུབ་དབང་ཆེན་བཙོན་གྲོལ་ཐད་ལ་ཁོང་གི་ནང་མི་གཙོས་ང་ཚོས་ནུས་པ་གང་ཡོད་འདོན་གྱིན་ཡོད། ལོ་ ༥ དང་ ༡༠ ཅི་ཙམ་འགོར་ཡང་ཁོང་ཉིད་བཙོན་གྲོལ་ཐད་ང་རང་གིས་ནུས་པ་གང་ཡོད་འདོན་གྱི་ཡིན་ལ། གློད་གྲོལ་འཐོབ་རྒྱུར་ང་རང་ལ་ཡིད་ཆེས་ཡོད།