པན་ཆེན་ལགས། རིན་པོ་ཆེ། སྐུ་ཉིད་བོད་མི་རིགས་དང་ཁ་གྱེས་དེ་མི་ལོ་ཉི་ཤུ་ཏག་ཏག་འགོར་བའི་ཉིན་མོ་འདིར། ད་དུང་། ཉིད་ཀྱིས་ཞབས་རྗེས་གསེར་གྱི་རི་མོ་བོད་ཡུལ་ན་གསལ་ལེར་ཡོད་ལ། ཞབས་རྗེས་རེ་རེ་ལ་ཡིད་སྨོན་དང་གུས་བརྩི་བྱེད་མཁན་གྱི་མི་རིགས་འདིས་ཀྱང་། མི་ལོ་ཉི་ཤུའི་རྗེས་ཀྱི་དེ་རིང་སྐུ་ཉིད་སེམས་ཁོང་རུས་པའི་གཏིང་ནས་དྲན་བཞིན་ཡོད་ལགས། དྲན་པ་དེ་ཡང་མགོ་སྔ་དང་ཡོད་ལ། རྒྱུ་མཚན་དང་གནས་ལུགས་ལྡན་པ་ཡིན།
པན་ཆེན་ལགས། རིན་པོ་ཆེ། སྐུ་ཉིད་ཁོ་ན་ནི་བོད་མི་རིགས་ཀྱི་སྙིང་སྟོབས་དང་མངོན་འདོད་ངོ་མ་བློ་སྟོབས་ཆེན་པོའི་རྒྱའི་སྲིད་གཞུང་གི་མི་སྐད་མི་གོ་བའི་དཔོན་ངན་དེ་དག་ལ་གནས་ལུགས་ཞུ་མཁན་དང་། བདེན་པའི་འབོད་སྒྲ་སྒྲོག་མཁན་དུ་གྱུར་བའི་ཉིན་མོ་དེ་ནས་བཟུང་། སྐུ་ཉིད་ཁོ་ན་རལ་གྲི་རྣོན་པོ་ཞིག་གི་ཁ་རུ་དབའ་མངར་ཞུམ་མེད་ཀྱིས་རང་གི་མི་རིགས་ཀྱི་བདེན་པ་དབྱངས་སུ་གྱེར་འཕོད་མཁན་དུ་གྱུར་བ་ཡིན་ལ། བོད་མི་རིགས་ཀྱི་རིག་གཞུང་དེ་ཡང་ཁ་ནང་གི་བཤད་ཤེས་པ་ཞིག་ལས་ལག་ལེན་དངོས་ཀྱི་ར་སྤྲོད་བྱེད་དགོས་པར་གཏིང་སྐུལ་བྱེད་མཁན་དུ་གྱུར་བ་ཡིན། འོན་ཀྱང་། ཡིད་འཕངས་པ་ནས་མིག་ཆུ་ཤོར་དགོས་པ་ཞིག་ནི། བསོད་ནམ་དམན་པའི་སྐུ་ཉིད་ཀྱི་མཐའ་སྐོར་གྱི་གཅན་གཟན་ལས་ཀྱང་གདུག་རྩུབ་ཅན་གྱིས་སྲིད་གཞུང་ངན་པ་དེས། སྐུ་ཉིད་ཀྱི་ཚེ་སྲོག་དེ་ཡང་རང་དབང་ངང་འཚོ་རུ་བཅུགས་མེད།
པན་ཆེན་ལགས། རིན་པོ་ཆེ་མཇུག་འབྲས་དེ་ཡི་ཉེར་ལེན་གྱིས་དེ་རིང་ཡང་ང་ཚོའི་སེམས་ཁོང་དུ་ནམ་ཡང་གསོས་ཐབས་མེད་པའི་རྨ་ཁ་ཞིག་བཟོས་ཡོད་པ་མ་ཟད། ཐ་ན་སྐུ་ཉིད་ཀྱི་ཡང་སྲིད་དེ་ཡང་བོད་མི་རིགས་ཀྱི་མིག་མདུན་ནས་གློ་བུར་དུ་ཁྲིད་དེ་ཤི་གསོན་གང་ཡང་མི་ཤེས་པའི་གནས་ཤིག་ལ་བསྐྱལ་ཡོད་པ་འདིས་ཀྱང་། དེ་རིང་གི་ཉིན་མ་འདི་ནི་བོད་མི་རིགས་ཀྱི་སེམས་ཁོང་དུ་མུན་ནག་གི་ཉིན་མོ་ཞིག་དུ་བཏང་ཡོད་པ་རེད།
པན་ཆེན་ལགས། རིན་པོ་ཆེ་ལགས། དོན་དངོས་སུ་དེ་རིང་ཡང་འདི་ནས་ངེད་ཅག་གི་ཁྱེད་རང་གླེང་བཞིན་ཡོད་ལ། གླེང་མཁན་ང་ཚོས་ཀྱང་སྐུ་ཉིད་ཀྱི་མཛད་པ་འཕྲིན་ལས་མཐའ་དག་གི་ཟུར་ཞིག་ལས་མཐོང་བའི་མིག་ཟུང་མེད་སྟབས། ལོ་རེ་ལ་དུས་ཚིགས་ཤིག་ལ་སྒུག་ནས་འཆར་ཅན་གྱི་གཏམ་བཤད་རེ་གནང་དེ་མི་ལོ་འདི་དག་གར་སོང་ཆ་མེད་དུ་གྱུར་བ་རེད་ལ། དེ་རིང་ཡང་དེ་ལྟར་འཆར་ཅན་གྱི་ལས་གཞི་དེ་ཉིད་རྒྱུན་སྐྱོང་བྱེད་ཀྱི་ཡོད་པ་ལས། བོད་མི་རིགས་ལ་དོན་དངོས་ཐོག་སྐུ་ཉིད་དགོས་ཀྱི་ཡོད་པའི་འབད་བརྩོན་ལྷོད་གཡེང་མེད་པ་ཞིག་བྱེད་ཐུབ་ཀྱི་མེད་པ་འདི་ནི། སྐབས་རེར་བདག་གི་སེམས་ཁོང་དུ་ཡང་ཐེ་ཚོམ་གྱི་དྲི་གཞི་ཞིག་སྐྱེ་ནས་འོང་གི་འདུག་ལགས།
པན་ཆེན་ལགས། རིན་པོ་ཆེ་ལགས། ཆོས་ལུགས་པ་དག་གིས་སྐུ་ཉིད་མགོན་པོ་འོད་དཔག་སྐུ་ངོས་ཡིན་པར་ཡིད་ཆེས་བྱེད་ལ། མི་རིགས་རང་ལུགས་པ་དག་གིས་སྐུ་ཉིད་ནི་བོད་མི་རིགས་ཀྱི་དབའ་བོ་ཞིག་ཡིན་པར་ཡིད་ཆེས་བྱེད་ཀྱི་ཡོད་པ་རེད་ལགས། དོན་དངོས་ཐོག གནམ་འོག་འདི་ན་དྲང་བདེན་ལ་དགའ་བའི་སྐྱེ་བོ་དམ་པ་ཁྱེད་ཉིད་བཞུད་རྗེས་ཀྱི་ཞབས་རྗེས་རེ་རེ་ལ་ཉིན་མཚན་མེད་པར་སྙེགས་མཁན་ནི་དངོས་ནས་དཀོན་པོ་ཆགས་ཡོད་པ་དེར་སྐུ་ཉིད་ལ་ཐུགས་ཕམ་ཡོང་གི་འདུག་གམ་ལགས། ལྷག་པར་དུ་སྐུ་ཉིད་ཀྱིས་བོད་མི་རིགས་ལ{ལས་ལ་བརྩོན་ཞིང་དཔའ་ངར་ལྡན་པའི་བོད་མི་་རིགས་ཀྱི་བུ་རབས་ཚ་བརྒྱུད་ཀྱི་མཚན་སྙན་ལ་གནོད་པའི་ཤུལ་རྗེས་ཕྲ་མོ་ཙམ་ཡང་ངའི་ལོ་རྒྱུས་ནང་མི་འཇོག་པའི་དམ་བཅའ་བཞག་ཡོད}ཅེས་པ་ལྟར་ཤ་གསེང་རུས་གསེང་ནས་གཅེས་འཛིན་བྱེད་མཁན་ནི་བྱུང་གི་མེད་པ་ལྟ་བུ་ཞིག་ཆགས་ཀྱི་ཡོད་པ་ཡིན་དུས། དེ་རིང་གི་ཉིན་མོ་འདི་ལ་ཉིད་ཀྱིས་ཡང་སྲིད་དེ་ཉིད་འཁྲུངས་ནས་མི་ལོ་ཉི་ཤུ་འགྲོ་བཞིན་ཡོད་ན་ཡང་། ངེད་ཅག་གིས་ཤི་གསོན་ཙམ་ཡང་རྩར་གཅོད་མི་ཐུབ་པའི་གནས་སྐབས་འདི་ནི་ང་ཚོའི་སྐུ་ཉིད་ལ་བཅིངས་པའི་ཡིད་ཆེས་དང་སྟོབས་ཤུགས་ཀྱི་མ་འདང་བར་དགོངས་ཀྱི་ཡོད་དམ་ལགས།
པན་ཆེན་ལགས། རིན་པོ་ཆེ་ལགས། ད་ལྟ་དངོས་ནས་དྲང་གནས་ཀྱི་བོད་མི་དག་ལ་སྐུ་ཉིད་ལྟ་བའི་རླབས་ཆེན་གྱི་སྐྱེ་བུ་དེ་ཡི་ཞབས་རྗེས་འགྲེང་མཁན་ཞིག་གི་དགོས་མཁོ་ཆེན་པོ་འདུག་ལགས།
བོད་ཤ་ཁྲག་ལགས་བཀླགས་ཟིན་པ་ཡིན་ཧ་ཅང་གི་ལེགས་པོ་བྲིས་གནང་འདུག།
སྤུན་ཟླ་ཁྱེད་ཅག་གི་རེ་རེ་བཞིན། འདི་རུ་ཕེབས་ནས་རང་རང་གི་བསམ་ཚུལ་རེ་གསུངས་དེ་ཕེབས་ཟིན་པ་དེར་ང་རང་དགའ་ཡོད་ལགས། རེད་དེ། འུ་ཅག་གིས་རང་གི་རིགས་ཀྱི་བླ་མེད་ཀྱི་དབུ་ཁྲིད་དག་གཅིག་རྗེས་གཉིས་མཐུད་དུ་འུ་ཅག་གི་མིག་མདུན་དུ་འཚོ་བཞེས་གནང་བ་ནས་བཞུད་ཟིན་པ་དང་བཞུད་ངེས་པ་དེ་དག་ལ་བསམ་བློ་ཞིབ་མོ་ཞིག་གཏོང་བ་ཙམ་མིན་པར། རང་གི་ཉེ་ཁོར་ནས་མགོ་བརྩམ་ནས་གང་ཞིག་བྱེད་ཐུབ་པ་དང་གང་ཞིག་བྱེད་ནུས་པའི་བསྐོར་ལ་ལག་ལེན་ཡོད་པ་ཞིག་བྱེད་རྒྱུར་རེ་སྐུལ་ཡོད་ལགས།
དྲ་གྲོགས་ཤ་ཁྲག་རུས་པ་ལགས།
ཁྱེད་ཀྱི་བཤད་པ་དེ་དག་ངོ་མ་བདེན་ནི་རེད། སྐྱབས་མགོན་པན་ཆེན་རིན་
པོ་ཆེ་ལྟ་བུའི་དཔལ་རྒོད་ལོས་དྲན་དྲན་ནི་རེད། དྲན་རྩོམ་ཀློགས་ཟིན་ཐུགས་
རྗེ་ཆེ།
༼དྲ་གྲོགས་བཟང་བོ་བོད་ཨ་རིག་ཤ་ཁྲག་རུས་གསུམ་ལགས།༽
དགེ་མཐོང་འདི་སྙིང་རྗེ་འདི་ཅི་ཡིན་པའི་སྐད་ཆ་རེད།
ངས་བཀླགས་ཏེ་བུད་སོང་།
ཆོས་ཀྱི་རྒྱལ་མཚན་བསྒྲེང་བར་ཤོག།
ཁྱོད་ཀྱིས་བོད་མིའི་སྐྱབས་མགོན་པཎ་ཆེན་རིན་པོ་ཆེར་ཁོང་རྗེ་དྲན་དང་
འདི་ལྟ་བུའི་དུས་ཆེན་ཁྱད་པར་ཅན་ལ་མཁུར་བཞེས་ནས་སྔ་མོ་ལངས་ནས་ཟིན་བྲིས་སྤེལ་གནང་བར་སེམས་གཏིང་ནས་ཡིད་རངས་ཡོད།
དྲ་གྲོགས་བཟང་བོ་བོད་ཨ་རིག་ཤ་ཁྲག་རུས་གསུམ་ལགས། ཁྱེད་ཀྱིས་པན་ཆེན་རིན་པོ་གླེང་བ་སྙིང་ནས་དགའ་ཡོད། དེ་རིང་གི་ཁྱེད་ཀྱི་སྐུ་མགྲོན་ཐོག་མ་ང་ཡིན། ངའི་དགེ་མཐོང་ཟེར་ལ། མིང་འདིའི་གོ་དོན་གླེང་ན་ཟབ་མོ་སྟོང་ཉིད་ཀྱི་དོན་རྟོགས་པའམ་ངེས་པ་ལ་གོ་དགོས། དེའི་ཕྱིར་རྟེན་འབྲེལ་ཡག་པོ་བྱུང་སོང་སྙམ། བདེ་མོ་བྱོས། རྗེས་སུ་མཇལ། གནས་སྐབས་གནས་མཆོག་རྡོ་གདན་དུ་བུད་འགྲོ་ལོ།