སྤོབས་པ་མཐའ་ཡས།
ང་ཚོས་དྲ་ཐོག་ཏུ་ཉིན་འདི་འགའི་རིང་ང་ཕོད་ངག་དབང་འཇིགས་མེད་གྲོངས་པ་དང་བསྟུན་ནས་ཁོ་གསོན་པའི་རིང་གི་བྱ་སྤྱོད་ལས་འཕྲོས་ཏེ་མང་པོ་ཞིག་བཤད། མི་མང་པོ་ཞིག་གིས་ང་ཕོད་ནི་བྱས་རྗེས་ཆེ་བའི་རླབས་ཆེན་མི་སྣ་ཞིག་ཡིན་ཚུལ་དང་། ལ་ལས་བླ་མ་ཆེ་གེ་མོས་ལུང་གིས་ཟིན་པའི་བདུད་ཅིག་ཡིན་ཚུལ་སོགས་སྡུག་ཚུལ་ཟུར་ཙམ་རེ་གླེངས་སོང་། ཡིན་ན་ཡང་མི་མང་པོ་ཞིག་རང་གི་བསམ་ཚུལ་ངོ་མ་དེ་ཤོད་འདོད་མེད་པའམ་བཤད་རྒྱུར་ཞེད་ཀྱིན་ཡོད་པ་འདྲ། ངས་ལོ་རྒྱུས་དང་ཆབ་སྲིད་སོགས་གང་ཡང་མི་ཤེས་མོད་བོད་མི་དཀྱུས་མ་ཞིག་གི་གོ་མྱོང་ལས་བྱུང་བའི་སེམས་ཚོར་དེ་འདིར་བཤད་འདོད་བྱུང་། སྤྱིར་ང་ཚོའི་མགོ་ཐོག་ཏུ་ལྷུང་བའི་ཆག་ཆེ་ཉམས་ང་ཡོངས་རྫོགས་ང་ཕོད་མི་གཅིག་གིས་བཟོས་པ་ཡིན་ཟེར་ན་ཐལ་ཆེ་ལོས་འགྲོ་ཡང་བོད་ཀྱི་ཉེ་རབས་ལོ་རྒྱུས་སྟེང་དུ་ང་ཕོད་ཀྱིས་བསགས་པའི་ནག་ཉེས་དེ་ཡང་ཆུང་ཆུང་ཞིག་མིན། མདོ་ཚུར་བསྡུས་ན་ང་ཕོད་ལ་གདམ་ཀ་གཞན་མེད་དུ་ཆུག་ཀྱང་ང་ཕོད་ཀྱིས་ཆབ་མདོའི་གོ་མཛོད་མེར་བསྲེགས་སྐབས་ཁོ་ག་རེ་བྱས་ནས་མེ་ནང་དུ་ལྕེབས་ནས་ཤི་མ་ཐུབ་པ་རེད། དང་པོ་ཁོས་གོ་མཛོད་མེར་བསྲེགས་ནས་ཝ་བྲོས་བྱས་ཤིང་འབྲོ་ས་མ་རག་སྐབས་མགོ་འདོགས་བྱས། དམག་དཔོན་ཟེར་བ་དེས་འཐབ་དགོས་པ་རེད། རྒྱལ་ཁ་ལེན་དགོས་པ་རེད། དེ་མ་བྱུང་ན་ཤི་ཐུབ་དགོས་པ་རེད། སྲོག་ཁྲིམས་ཡོད་སའི་ལུང་པ་ཞིག་ཡིན་ན་དམག་དཔོན་ཞིག་གིས་བྱས་ཉེས་དེ་འདྲ་ཞིག་བྱས་ན་སྲོག་ཁྲིམས་ཀྱི་ཉེས་ཆད་མ་གཏོགས་འགྲོ་ས་མེད། གྲོས་མཐུན་དོན་ཚན་བཅུ་བདུན་ལ་མིང་རྟགས་མ་བཀོད་གོང་ང་ཕོད་ཀྱིས་ག་རེ་བྱས་ནས་དུག་འཐུང་ནས་ཤི་མ་ཐུབ་པ་རེད། འདི་མི་གཅིག་གཉིས་ཤིག་གི་ཚེ་སྲོག་གི་གནད་དོན་མ་རེད། ཁྱིམ་ཚང་གཅིག་གཉིས་ཤིག་གི་འབྱོར་རྒུད་ཀྱི་གནད་དོན་མ་རེད། འདི་རྒྱལ་ཁབ་ཅིག་ཤིི་གསོན་གྱི་གནད་དོན་ལ་ཐུག་ཡོད་རེད། ཉི་མ་དེ་ལ་ཁོས་རྒྱལ་ཁབ་ཅིག་གི་ཚེ་སྲོག་ལས་ང་ཕོད་རང་གི་ཚེ་སྲོག་བདམས་པ་རེད། སྡེ་པ་གཞུང་གི་བཀའ་དྲིན་ལས་གུང་ཁྲན་ཏང་གི་གཡོ་སྒྱུའི་འཛུམ་མདངས་དེ་བདམས་པ་རེད། རྒྱལ་བ་རིན་པོ་ཆེའི་ཞལ་བཀོད་ལས་མའོ་ཙེ་ཏུང་གི་ལམ་སྟོན་བདམས་པ་རེད། མདོར་ན་བོད་མི་མང་ལས་ཁོ་རང་གི་གོ་གནས་དེ་བདམས་པ་རེད། ཁོས་བོད་མི་མང་བློས་གཏོང་ཐུབ་ས་ནས་ང་ཚོས་ག་རེ་བྱས་ནས་ཁོ་བློས་མི་ཐོང་བ་རེད།
ཁྱོད་ཚོ་ང་ཕོད་ལ་ཁག་མེད་ཟེར་མཁན་ཚོས་ཅི་བསམ་པ་ཡིན་མི་ཤེས། དེ་འདྲ་ལ་ཁག་མེད་ཟེར་བ་ཡིན་ན་ཁག་ཡོད་མཁན་སུ་གཅིག་ཀྱང་མེད། ཝ་བྲོས་བྱེད་པར་ཡང་ཁག་མེད། མགོ་འདོགས་བྱེད་པར་ཡང་ཁག་མེད། ཐོག་མར་ཁྲིམས་འགལ་གྱིས་བཙན་འཛུལ་བ་ལ་བསུ་བ་བྱས་པར་ཡང་ཁག་མེད། བར་དུ་དགྲ་བོའི་ཁྲིམས་འགལ་གྱི་བྱ་སྤྱོད་དེ་ཁྲིམས་མཐུན་གྱི་ངོ་བོར་བཟོ་ཆེད་ཆིངས་ཡིག་ནག་པོ་ལ་མིང་རྟགས་བཀོད་པར་ཡང་ཁག་མེད། ཐ་མ་བོད་མི་མང་གི་སྡུག་མ་ཐེག་པར་ཞི་རྒོལ་བྱས་པར་ཡང་འཁྱོག་བཤད་བྱས་པར་ཡང་ཁག་མེད། ད སུ་ལ་ཁག་ཡོད་པ་རེད། མཚམས་རེ་ལ་ནི་ཁྱོད་ཚོས་ཡ་གི་རྒྱ་མིའི་རྒྱུགས་ཁྱི་རེད། དེ་གསད་དགོས། མ་གི་གུང་ཁྲན་གྱི་ཉུལ་མ་རེད། དེ་ཤེས་དགོས་ཞེས་གྲུང་གྲུང་ངར་ངར་ཆེ་བ་ལ་ཚོད་ཅིག་མི་འདུག མཚམས་རེ་ལ་ནི་ཅིག་ཅིག་ལ་ཁག་མེད། ཅིག་ཅིག་སྙིང་རྗེ། ཉིས་ཉིས་ལ་བྱས་རྗེས་ཡོད་སོགས་དད་པ་དག་སྣང་སྙིང་རྗེ་བཏང་སྙོམས་ཆེ་བས་ཕལ་ཆེར་བྱང་ཆུབ་སེམས་དཔའ་འམ་དེ་མིན་ནམ་བསམ་པ་རེ་ཡང་འཁྲབ་རྒྱུ་འདུག
དོན་ཚན་གཅིག་ནི་ང་ཕོད་བདུད་ཡིན་མིན་དེ་རེད། སྤྱིར་ང་རང་ཉིད་ལ་མིའི་མིག་ཐེབས་ཆག་འདི་ལས་ལྷ་འདྲེ་མཐོང་བའི་མིག་སོགས་མེད་དུས་འདི་ལྷ་རེད་དང་དེ་འདྲེ་རེད་ཅེས་ཐག་གཅོད་མི་ཐུབ། ཡིན་ན་ཡང་བདུད་ཅེས་པ་དེ་མཐའ་གཅིག་ཏུ་མགོ་ལ་རྭ་དང་ཁ་ལ་མཆེ་བ་ཅན་རེ་ཡིན་དགོས་ན་མི་ཤེས་མ་གཏོགས་དེ་མིན་ན་ང་ཕོད་བདུད་རེད་ཟེར་ན་ཡང་མི་ཆོག་པ་ཞིག་མིན་པ་འདྲ། འདི་ང་ཕོད་གཅིག་པོས་རྒྱལ་བློན་བླ་སློབ་དཔོན་འབངས་བར་གྱི་དམ་ཚིག་བསྲུངས་མེད་པའི་གནད་དོན་ཙམ་མིན་པར་ང་ཕོད་དང་ང་ཕོད་འདྲ་བ་ཁག་གཅིག་གི་བྱས་ཉེས་ལ་བརྟེན་ནས་བོད་གངས་རིའི་ལྗོངས་པ་ཡོངས་རྫོགས་ལ་དཀའ་སྡུག་ག་ཚོད་ཅིག་བྱུང་ཡོད། བསྟན་པ་དེ་འཛིན་དང་བཅས་པ་ལ་ཉམས་ཆག་འོ་བརྒྱལ་ག་ཚོད་ཅིག་བྱུང་ཡོད། འདི་ཚོས་དོན་དངོས་ལོག་འགྲེལ་བྱས་ནས་རྒྱ་ནག་མི་མང་གཙོས་པའི་མི་མང་ག་ཚོད་ཅིག་ལོག་ལམ་དུ་འཁྲིད་བཞིན་ཡོད། འདི་འདྲ་ཞིག་ལ་བདུད་མི་ཟེར་ན་སུ་ལ་བདུད་ཟེར་དགོས།
བོད་གཞུང་བཀའ་ཤག་གིས་མྱ་ངན་ཞུས་པ་དེ་ཡང་ང་ཕོད་དང་ང་ཕོད་ཀྱི་ནང་མིར་དུང་དྲགས་ནས་ཡིན་ནམ་རྒྱ་དམར་གཞུང་ལ་ཞེད་དྲགས་པ་གང་ཡིན་མི་ཤེས། འདི་ནོར་འཁྲུལ་ཡིན་པ་གསལ་པོ་རེད། ང་ཚོས་ང་ཕོད་དང་ང་ཕོད་ཀྱི་ནང་མི་སྙིང་ག་ཚོད་རྗེ་ན་ཡང་མི་རིགས་དང་རྒྱལ་ཁབ་ཀྱི་ལོ་རྒྱུས་དང་འབྲེལ་བའི་གནད་དོན་དེ་ཚོ་ནམ་ཡིན་ཡང་དཀར་ནག་གོ་ལྡོག་ཀྱིས་བཤད་ན་ཕུགས་སུ་གནོད་ཆེན་པོ་སྐྱེལ་གྱི་རེད། ཉི་མ་གཅིག་ལ་རྒྱ་དམར་གྱིས་ང་ཚོས་གྲོས་མཐུན་གྱི་ནང་དུ་ས་གནས་སྲིད་གཞུང་གི་དཔོན་རིགས་ཚོའི་གོ་གནས་མི་ཕབ་པར་ཁས་ལེན་བྱས་པ་བཞིན་ང་ཕོད་སོགས་ལ་གོ་ས་མཐོ་ཤོས་གྲས་སྤྲད་ཡོད་ལ་ལས་དོན་དེས་བོད་མི་མང་གི་འདོད་བློ་ཚིམས་ཡོད་པ་ཏཱ་ལའི་རུ་ཚོགས་ཀྱིས་ཀྱང་ཁས་བླངས་ཡོད། དེ་མིན་ན་ཁོང་ཚོས་ང་ཕོད་གྲོངས་སྐབས་གཟེངས་བསྟོད་དང་མྱ་ངན་ག་ལ་ཞུ་ཞེས་བརྗོད་ཀྱི་རེད།
རྒྱ་དམར་གཞུང་གིས་བསྐོ་བཞག་བྱས་པའི་ང་ཕོད་དང་ང་ཕོད་ལྟ་བུའི་མི་སྣ་ཚོས་བོད་མི་མང་གི་ཚབ་བྱེད་ཐུབ་ཀྱི་མི་འདུག བོད་མི་མང་གི་ཕྱོགས་སུ་ལངས་ནས་སྐད་ཆ་བཤད་ཐུབ་ཀྱིན་མི་འདུག བོད་མི་མང་གི་སྐྱིད་སྡུག་ངོ་མ་དེ་ཀྲུང་དབྱང་ལ་ཞུ་ཕོད་ཀྱིན་མི་འདུག མི་འདི་འདྲས་རྒྱལ་ཁབ་དང་མི་རིགས་ལ་བྱས་རྗེས་འཇོག་པ་ལས་ལྡོག་སྟེ་མི་རིགས་དང་དབུས་གཞུང་བར་དང་མི་རིགས་དང་མི་རིགས་བར་གྱི་སེམས་ཐག་ཇེ་རིང་དུ་གཏོང་གིན་འདུག་ཅེས་རྒྱ་ནག་གཞུང་ལ་ཡང་བཤད་ཕོད་དགོས་ཀྱི་འདུག རྒྱ་ནག་གཞུང་གིས་ཀྱང་མི་རིགས་ལྔ་བཅུ་ང་དྲུག་ཡིན་ནམ་དེའི་ཚབ་བྱེད་ནུས་པའི་སྲིད་གཞུང་ངོ་མ་ཞིག་བྱེད་འདོད་ཡོད་ན་མི་རིགས་ཀྱི་དབུ་ཁྲིད་ལ་ང་ཕོད་འདྲ་བ་ཚོ་བསྐོ་བཞག་བྱས་མ་ཡོང་ན་ཡག་པོ་རེད།
༡༩༨༠ནང་བོད་ཀྱི་སྐད་ཡིག་སྦྱོང་སྤྱོད་སྤེལ་དགོས་སྐོར་པཎ་ཆེན་བླ་མའི་རྗེས་ཟློས་ལྟ་བུ་རེ་བྱས་འདུག་པ་དེ་ལ་བཤད་རིན་ཤིག་མེད། དེ་ནི་ཁོའི་སྒེར་གྱི་ཁེ་ཕན་སྲུང་ཐབས་ཤིག་ཡིན། གསལ་པོར་བཤད་ན་དུས་ཚོད་དེ་ལ་སྐད་ཆ་དེ་འདྲ་རེ་མ་བཤད་ན་མི་རིགས་ཀྱི་ཚབ་མཚོན་མགོ་ཁྲིད་གྱི་གོ་ས་ལ་སྡོད་མི་ཐུབ་པའི་དུས་ཚོད་ཅིག་ཤར་གྲབས་བྱས་པ་རེད། ཡིན་ན་ཡང་རྒྱ་ནག་གི་ཚོད་ལྟ་དེ་ལ་ཕམ་ཉེས་བྱུང་སྟབས་པཎ་ཆེན་བླ་མ་བཀྲོངས་པ་དང་གནམ་བདེ་སྒོ་ཆེན་གྱི་ཞི་རྒོལ་ལ་དྲག་གནོན་གྱི་དོན་རྐྱེན་རྗེས་སུ་ང་ཕོད་སླར་ཡང་བཞུགས་སྟེགས་མཐོན་པོ་དེའི་སྒང་དུ་བཞུགས་ནས་རྒྱ་དམར་གྱི་ཁྱབ་བསྒྲགས་དམ་དུམ་འགའ་རེ་ཁ་འདོན་ཞིག་གི་ཚབ་ལ་བགྲང་བཞིན་དུ་གྲོངས་པ་རེད།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
འདན་ཕྲུག་བློ་བཟང་ལགས།
བཀའ་སློབ་གནང་བར་ཐུགས་རྗེ་ཆེ། ཕྱི་གསལ་ནང་གསལ་གྱི་གནས་ཚུལ་ལ་ཕྱོགས་གང་ནས་བལྟས་ཀྱང་ཡོས་ལ་བབ་རྒྱུ་རྩམ་པ་ལས་མི་འདུག་ལགས།
རང་གི་རྒྱལ་ཁབ་ལ་གྱོང་གུད་འདི་འདྲ་ཞིག་ཕོག་པ་མཐོང་དུས་སྔར་མ་ཝའི་རིགས་རྒྱུད་འདི་རིགས་ལ་ཁ་སྐྲོ་ཁ་ནས་ལངས་ ཞེ་སྐྲོ་གཏིང་ནས་ལངས་གི་འདུག་ལགས་ འདི་ནི་འགྲོ་བ་མིའི་རང་གཤིས་ཞིག་ཡིན་པ་འདྲ་།
སྐབས་དེར་བོད་ཤར་ཕྱོགས་སུ་ཡོད་པའི་གཞུང་དམག་དང་ཁམས་པའི་ཡུལ་དམག་གཉིས་ཀར་གོ་མཚོན་མི་ལྡང་བའི་དཀའ་ངལ་ཤིན་ཏུ་ཡོད་པ་ཧ་གོ་བཞིན་དུ་ཁྱི་ངན་འདིས་གོ་མཛོད་མེར་སྲེག་བཏང་སྟངས་འདི་ཁོ་ན་ལ་གཅིག་གཟིགས་དང་ ཧུ།
དྲ་གྲོགས་བྱམས་རྒྱལ་ལགས་ ང་ཕོད་ཀྱི་མཛད་རྗེས་མཁྱེན་འདོད་ན་ དང་ཐོག་ཁ་སྔོན་བཀའ་ཤག་གི་གསུང་བཤད་ལ་ཅུང་ཙམ་གཟིགས་དང་།
རྗེས་སུ་ངས་ཁྱེད་ལ་འགྲེལ་བརྗོད་ཞུ་ཆོག
ད་ལྟ་ང་དུས་ཚོད་མེད་པས་དགོངས་སེལ་ཞུ་ཡ་ལས་ཐབས་གཞན་མི་འདུག་
སྤྱིར་ནམ་རྒྱུན་ཕྱོགས་ཀུན་ལ་ཅུང་ཙམ་གཟིགས་ན་ལེགས།
དྲ་གྲོགས་ཚོར་ད་བར་དུ་ངག་ཕད་འདས་པོས་བྱས་ངན་ཤག་སྟག་གསུངས་སོང་།ཁ་ཤས་ཀྱིས་བྱས་རྗེས་ཡོད་ཀྱང་གསུངས་འདུག།ཡིན་ནའང་བྱས་རྗེས་འདིཡིན་་ཟེར་བ་ཞིག་ཁ་གསལ་མི་འདུག།གསལ་པོ་ཞིག་གསུང་ཐུབ་ན་དགའ་བསུ་ཞུ་རྒྱུ་ཡིན་ལ་ང་རང་གཙོ་བྱེད་པའི་དྲ་རོགས་མང་པོ་དོགས་པའི་དྲ་བ་ལས་ཐར་ཐུབ།
ཁ་ཤས་ཀྱི་གཞས་ཚིག་རེ་བཀོད་ནས་བྱས་རྗེས་ཡོད་ཁུལ་ཡང་གསུངས་འདུག་དེ་ཙམ་གྱི་ཨེ་འགྲིག་ན།དེ་ལྟར་ཡིན་ན་གཞས་མ་ཚེ་བསྟན་སྒྲོལ་མས་མའོ་ཚེ་ཏོང་དང་ཀང་ཁྲིན་ཏང་ལའང་བསྟོད་པའི་གཞས་མང་བཏང་ཡོད་པའི་ང་ཚོས་ཁོང་གཉིས་ལའང་གུས་ཞབས་བྱེད་མི་དགོས་སམ།
མགྲིན་པ་ཟབ་མོས་གསུངས་པར་བདེན་པ་མཐོང་།བྱས་རྗེས་ཀྱང་དེ་ལྟར་གསུང་མཁན་ཡོད་དམ།
གྲོགས་པོ་ལགས། གནས་ལུགས་ཀྱི་སྐད་ཆ་དེ་འདྲ་བཤད་ཐུབ་པ་ནི་ཁྱེད་ཀྱི་སྤོབས་པ་རེད། ངས་བཀླགས་ཚར།
དྲང་པོ་བཤད་པ་ཡིན་ན། ང་ཕོད་ཀྱིས་གུང་ཁྲན་ཏང་ལ་བློ་སྙིང་བྲང་གསུམ་བསྟན་ཚུལ་དང་དོ་རྒྱལ་ཚོགས་པའི་གངས་ཅན་བླ་མས་གུང་ཁྲན་ལ་བློ་སྙིང་བྲང་གསུམ་སྟོན་བཞིན་པར་ཁྱད་པར་ཅི་ཡང་མཐོང་གིན་མི་འདུག གལ་ཏེ་ང་ཕོད་ཀྱིས་བཟང་ཕྱོགས་བོད་དོན་བསྒྲུབས་མྱོང་བ་ལྟ་བུའི་ལོ་རྒྱུས་ཕྲན་བུ་རེ་བཤད་རྒྱུ་ཡོད་རུང་། གངས་ཅན་བླ་མར་ཡང་དེ་བཞིན་ཡོད་པས་སོ། གང་ལྟར་ང་ཕོད་ལོ་བརྒྱར་ཤི་སོང་བ་ནི་ཤིང་རྒན་ལོ་བརྒྱར་གནས་པ་ཞིག་རུལ་ནས་འགྱེལ་བ་ལྟ་བུའི་ཚོར་སྣང་ཙམ་ལས་མྱ་ངན་ཞུ་བའི་དགོས་པ་མ་མཐོང་ངོ་།
བདེ་བ་ཅན་ལགས། ཏག་ཏག་རེད་ང་ཕོད་ཀྱི་ སྤོབས་པ་དེ་སུས་ཉམས་སུ་བཅུག་གི་མ་རེད བོད་ཀྱི་དུས་བབ་ནང་ད་ལྟ་རང་སྤེལ་བའི་༼རྒྱ་ནག་གིས་ང་ཕོད་གླེང་སྟངས་ཤིག༽དེ་ནང་གཟིགས་དང་དངོས་གནས་སྤོབས་པ་ཉམས་བཅུག་གི་མི་འདུག་། ཁྱེད་ལས་ལྷག་པའི་སྤོབས་པ་སྦྱིན་མཁན་འདུག་གོ་།།
མགྲིན་པ་ཟབ་མོས་རྒྱུ་མཚན་གསུངས་པ་འགྲིག་འདུག་
དབང་པོ་ལྔ་ཡི་དཀྱིལ་ནས། །མི་གོ་ཆོད་པ་གཅིག་རེད།། ཟེར་ཡ་དེ་ཕལ་ཆེར ཁྱེད་ཀྱིས་ དབང་པོ་ལྔ་ཡི་དཀྱིལ་ནས། །བདུད་གོ་ཆོད་པ་གཅིག་རེད།། ཟེར་ཡ་དང་ནོར་ཡིན་ས་རེད་། གལ་ཏེ་ཁྱེད་ཀྱིས་ཚིག་དེ་ནོར་མེད་ནའང་ཞུ་ས་དེ་ནོར་བཞག་ མི་གོ་ཆོད་ངོ་མ་རྒྱ་སྟག་ངར་མ་འདྲ་བའི་དཔའ་བོ་གཅིག་བྱུང་ཡོད་པ་དེ་ནི་པན་ཆེན་རིན་པོ་ཆེ་རེད་། མི་གོ་ཆོད་ཁོང་ལ་ཞུ་གི་ཡོད་རེད་།
ང་ཕོད་ཀྱི་ནག་ཉེས་ཚང་མ་ཇེ་གསལ་ཇེ་གསལ་འགྲོ་བཞིན་འདུག་པས་ཁོ་བོས་བྲིས་པའི་ངལ་བ་མ་བྱས་ ང་ཕོད་ཀྱི་སྐོར་དེ་ཁ་སེང་ སྤྱི་ཚེས་༢༦ ཉིན་གྱི་ཨེ་ཤི་ཡའི་རང་དབང་རླུང་འཕྲིན་ཁང་གི་བགྲོ་གླིང་ནང ལྟོས་དང་ ཧོར་གཙང་འཇིགས་མེད་ཀྱིས་ག་རེ་གསུངས་འདུག་།
རྣམ་པ་ཚོས་ང་ཕོད་ཀྱི་གནས་བབ་ལ་ལྟ་སྟངས་ཏོག་ཙམ་འགྲིག་གི་མེད་པ་འདྲ།
རྒྱ་གཞུང་གིས་ང་ཕོད་ནི་པན་ཆེན་རིན་པོ་ཆེ་དང་འབའ་བ་ཕུན་ཚོགས་དབང་རྒྱལ་གཉིས་ཀྱི་གནས་བབ་དང་མི་འདྲ་བ་ཤེས་ཡོད་པ་རེད། དེར་བརྟེན་ང་ཕོད་བསད་ན་འགྲིག་གི་མ་རེད། བཙོན་ལ་བཅུག་ན་དེ་བས་ཀྱང་འགྲིག་གི་མ་རེད།
ང་ཕོད་ནི་ཆིངས་ཡིག་དོན་ཚན་བཅུ་བདུན་གྱི་དཔང་མི་རེད། རྒྱ་ནག་གིས་བཟོས་པའི་ཐམ་ཀ་རེད། ཁོང་གི་སྐུ་ཚེ་རིང་ཐུང་དང་བདེ་སྐྱིད་ཀྱིས་རྒྱ་ནག་གི་འོག་ཏུ་ཡོད་པའི་བོད་མི་རིགས་ཀྱི་བདེ་སྐྱིད་མཚོན་དགོས་པ་རེད། ཏང་ཀྲུང་དབྱང་གིས་ཆིངས་ཡིག་དོན་ཚན་བཅུ་བདུན་གྱི་འོག་ནས་ཐོག་མཐའ་བར་གསུམ་དུ་ཁས་ལེན་བྱས་པའི་སྲིད་བྱུས་མཚོན་དགོས་པ་རེད། ང་ཕོད་ཀྱི་སྐུ་ཚེ་བརྟན་དགོས་པ་རེད། ང་ཕོད་ཀྱི་ཞལ་དམ་དགོས་པ་རེད།
ང་ཕོད་བཙོན་དུ་བཅུག་པ་ཡིན་ན་ཆིངས་ཡིག་དོན་ཚན་བཅུ་བདུན་ལ་འགྲེལ་བཤད་རྒྱག་ས་འགྲོ་གི་མ་རེད། ཁོང་གི་མཚན་རྟགས་དེ་བཙན་གནོན་འོག་བཀོད་པ་ཕྱི་གསལ་ནང་གསལ་ཆགས་འགྲོ་གི་རེད། དེ་བས་ཁོང་བཙོན་དུ་འཇུག་པ་ནི་ཁོང་བསད་པ་ལས་ཀྱང་ཚབས་ཆེན་པོ་ཆགས་འགྲོ་གི་རེད།
ང་ཕོད་ས་དབང་ཆེ་མོ་ང་ཚོ་དང་གཏན་དུ་ཞལ་བྲལ་བ་རེད། ང་ཚོས་ལོ་རྒྱུས་ལ་ནམ་ཡིན་ཡང་འགྱུར་བ་གཏོང་ཐུབ་ཀྱི་མ་རེད། ཀུན་གཟིགས་པཎ་ཆེན་རིན་པོ་ཆེ་མཆོག་དང་། འབའ་པ་ཕུན་ཚོགས་དབང་རྒྱལ་ལགས་རྣམ་གཉིས་བཙོན་དུ་ཞུགས་དགོས་བྱུང་བ་དང༌། བོད་ཀྱི་ས་དབང་གྲས་ནས་ང་ཕོད་བཙོན་དུ་ཚུད་ཡོད་མ་རེད། གཞན་མི་དྲག་གྲས་ནས་བོད་དབུས་གཙང་ཁུལ་དུ་ཧ་ལམ་གཅིག་ཀྱང་མ་ལུས་པར་རྡུང་རྡེག་དང་བཙོན་བཅུག་ཕོག་མྱོང་ཡོད། ཡིན་ནའང་ས་དབང་ང་ཕོད་ནི་བོད་ཀྱི་ལོ་རྒྱུས་ཐོག་གཞུང་ཞབས་ཐེག་པ་རིམ་འཛེགས་གནང་མྱོང་བའི་སྐྱེས་སྦྱངས་གཉིས་ལྡན་གྱི་མི་ཞིག་ཡིན་པས་རྒྱ་མིས་ཁོང་ལ་བསྟུན་མཁས་བྱེད་དགོས་པའི་ལོ་རྒྱུས་བྱུང་ཡོད། ད་ལྟའང་ང་ཚོས་གསལ་པོ་ ཤེས་དགོས་པ་ཞིག་ལ་བོད་ནང་བཙོན་ཁང་ནང་ཚུད་པ་ཐམས་ཅད་བྱས་རྗེས་ཡོད་པའི་དབང་གི་ཚུད་ཀྱི་ཡོད་པའི་ཁྱབ་པ་མེད། དེ་ལྟར་ཡིན་ཚེ་བོད་ས་ཤོར་བ་ནས་བཟུང་ད་བར་བོད་མི་རིགས་ཀྱི་སྤྱི་སེམས་འཁུར་ཏེ་ལྷག་བསམ་རྣམ་དག་གི་བོད་མི་རིགས་དང་བསྟན་སྲིད་ལ་ཕན་པའི་ཞབས་འདེགས་ཞུ་མཁན་གྱི་མི་རབས་རྒྱུན་མ་ཆད་པར་ཐོན་མེད་ཚེ་ཐམས་ཅད་ང་ཚོ་ནང་བཞིན་རང་མགོ་གང་ཐོན་གྱིས་བྲོས་ནས་ཡོང་བ་དང༌། བྱ་བ་ཆུང་རྩག་རེ་རེའི་དོན་དུ་བཙོན་དུ་སྡོད་དགོས་པའི་ཐབས་སྡུག་གི་གནས་ཚུལ་དེ་ཚོ་ལྷགས་ཚེ་བོད་མི་རིགས་དང་བོད་ཞེས་པ་མཛུབ་མོ་བཙུགས་ས་མེད་པ་ཞིག་ཏུ་གྱུར་ཡོད་སྲིད། ང་ཕོད་ས་དབང་དམ་པ་ནི་རྣམ་དཔྱོད་དང་ཤེས་རྩལ་གྱི་ཕྱུག་པའི་བོད་ཀྱི་གཞུང་ཞབས་རྙིང་པ་ཞིག་ཡིན་སྟབས་གང་ལ་གང་གདུལ་གྱི་རྣམ་དཔྱོད་བཟུང་སྟེ་ཐབས་མཁས་པོའི་ཐོག་ནས་བསྟུན་མཁས་དང་། ཕྱོགས་གཅིག་ནས་རང་མི་རིགས་ཀྱི་སྐད་ཡིག་ཡར་རྒྱས་གཏོང་ཕྱོགས་སོགས་ཀྱི་ཐད་ནུས་པ་གང་ཐུབ་བཏོན་ཡོད། ནམ་མཁར་འཕུར་བའི་བྱ་ལ་གཤོག་སྒྲོ་གཉིས་ལྡན་དགོས་པ་ལྟར། དགྲ་བོའི་མདུན་དུ་མཆོངས་སྐབས་ཀྱང་རྒྱབ་གནོན་དང་དཔུང་གནོན་གཞོགས་འདེགས་ཀྱི་སྒྲོམ་གཞི་དགོས་པ་ལས། བོད་ལེན་རྒྱུ་འདི་ང་ཕོད་གཅིག་པུའི་ལག་པ་དང་དཔུང་པར་བཀལ་བ་དང༌།བོད་ཤོར་བའི་མིང་དེའང་ང་ཕོད་གཅིག་པུར་གཡོག་ན་རྩ་བ་ནས་ལེན་པོ་མེད། ང་ཚོ་བསམ་ཚུལ་གསུང་མཁན་མང་ཆེ་བས་ལྷག་བསམ་རྣམ་དག་ཡིན་སྲིད་ཀྱང་། སྐབས་དེ་དུས་ང་ཚོ་ལྟ་བུ་ང་ཕོད་ཡིན་པའི་དབང་དུ་བཏང་ན་ག་རེ་བྱ་རྒྱུ་ཡོད་པ་རེད་དམ། དེ་དང་དེ་བྱེད་རྒྱུ་འདུག་ཅེས་འགྲེལ་བཤད་བརྒྱབ་དང་། ངས་བལྟས་གསེར་རྟ་ཚུལ་ཁྲིམས་ཕ་ཡུལ་གཅིག་པའི་ཞེན་ཁོག་དང་ལུང་ཁུག་དེ་ཚོའི་ནང་འར་བཤད་བྱ་རྒྱུར་དགའ་ཙམ་ཡོད་བཟོ་ལས། བསམ་བློ་ཆེ་ས་ནས་བཏང་སྟེ་ཆོལ་གསུམ་ཆིག་བསྒྲིལ་ཡོང་རྒྱུར་གཏོར་བཤིགས་གཏོང་རྒྱུའི་བསམ་བློ་རྩ་བ་ནས་མ་དོར་མཁན་ཞིག་ཏུ་ངོས་འཛིན་བྱ་གི་ཡོད། དེ་ནང་བཞིན་ཁོ་བོའི་རྗེས་སུ་འབྲངས་བཞིན་པའི་སྐྱེ་བོ་ཁག་ཅིག་གིས་ཀྱང་ཆོལ་ཁའི་ཞེན་ཁོག་འཁྱེར་ཏེ་རྒྱུ་མཚན་མེད་པའི་ཐོག་ང་ཕོད་ས་དབང་དམ་པར་དམའ་འབེབས་གཏོང་གི་ཡོད་ཚེ་དེ་ནི་ལས་འབྲས་དང་དངོས་བྱུང་ལོ་རྒྱུས་ཀྱི་ནམ་ཡང་ཁས་ལེན་གྱི་མ་རེད་ལ། ང་ཕོད་ཀྱང་མིར་སྐྱེས་ཏེ་སྐྱེས་ཁུངས་དང་ལོ་རྒྱུས་ཡོད་པའི་མི་སྣ་ཞིག་ཡིན་སྟབས་སུས་ཀྱང་སྤོབས་པ་དེ་ཉམས་སུ་བཅུག་གི་མ་རེད༎
འདི་ན་ཡང་ཁྱི་རྐུན་འོ་བཟོ་ཁ་རུ་འཆམ་འདུག་གཱ
ཨ་རོགས་སྤོབས་པ། ཁྱེད་ཀྱིས་དྲངས་པའི་གཞས་ཚིག་དེ་ལྔ་བཅུའི་འགོ་ཐོད་དུ་རེད། དེའི་རྗེས་སུ་ཡང་བསྐྱར་གཞས་ཚིག་དེ་འདྲ་ཡོད། དཔེར་ན། དབང་པོ་ལྔ་ཡི་དཀྱིལ་ནས། །མི་གོ་ཆོད་པ་གཅིག་རེད།། ཅེས་པ་ལྟ་བུ་ཡིན། དེ་ནི་དེ་སྐབས་ཀྱི་མི་དམངས་ཚོས་གཏོང་བའི་དམངས་གཞས་རེད། དེའི་ནང་གི་མི་གོ་ཆོད་པ་གཅིག་དེ་ང་ཕོད་རེད། གཞས་དེ་གཉིས་ལ་འགལ་གང་འདྲ་མི་འདུག་གམ། མ་རེད། གཞས་དེ་གཉིས་ཀ་མི་གཅིག་གི་ལོ་རྒྱུས་དང་། དུས་ཚོད་སྔ་ཕྱི་གཉིས་ཀྱི་དམངས་གཞས་ཡིན།
སྐུ་ངོ་སྤྱི་འཐུས་ལགས། དམ་པ་ང་ཕོད་ལ་ལུང་བསྟན་རྫུན་མ་འདྲ་བཟོ་བ་ལས། གནས་སྐབས་རིང་ང་ཕོད་དང་ང་ཕོད། ཀོང་པོ་དང་མལ་དྲོ། སོགས་ཐ་སྙད་འདི་ཚོར་ཡག་པོ་ཞིག་སྦྱོངས་དང་། དེ་ནས་བོད་ཀྱི་ཉེ་རབས་ཀྱི་ལོ་རྒྱུས་དང་། དེང་རབས་ཀྱི་ལོ་རྒྱུས་ལ་ཅུང་སྦྱང་པ་གནང་ན་ལེགས་སྙམ། དགེ་བཤེས་ལགས་རང་སོ་སོའི་རྣམ་རྟོག་སྤོང་མི་ཐུབ་ཀྱང་། མི་གཞན་ལ་རྣམ་རྟོག་གི་ས་བོན་མ་འདེབས་རོགས། ངན་པ་དགུ་དང་བཟང་པོ་བཅུ་ལ་ཁྱད་པར་གང་ཡང་མེད། འདི་ཚོ་ཚང་མར་ཚན་རིག་དང་ཚུལ་གསུམ་རིག་པའི་དཔྱད་གཞི་གང་ཡང་མེད་པ་རེད། དེ་ལས་ང་ཕོད་ཀྱི་བྱས་ཉེས་ཁུངས་འཕེར་ལོ་རྒྱུས་ལས་དྲངས་ན་དགའ། མ་རེད་དམ། དེས་ན་ཁོང་གི་ལོ་རྒྱུས་ནང་དཀར་ནག་གི་ལྕི་ཡང་གང་འདྲ་རེད་འདུག་དཔྱོད་དགོས། སྔ་མ་དྲག སྔ་མ་དྲག མགོ་མཁྲེགས་ཚོ། རྒྱ་གུང་བྲན་གྱིས་དགོད་ཚུལ་འདིར་བརྟགས་ན། ཡང་ང་ཚོར་ཕམ་ཁ་ཞིག་བྱུང་ཡོད།
བཀྲ་ཤིས་རྒྱ་མཚོ། ཁྱེད་རང་གིས་མ་ཚོར་བ་ཡིན་རྒྱུ་རེད་མ་གཏོགས་ང་ཕོད་མ་ཤི་གོང་ནསབོད་མི་མང་གིས་སྡུག་སྐད་མང་པོ་བརྒྱབས་འདུག དཔེ་མཚོན་གཅིག་ནི། ང་ཕོད་ངར་ནས་ཐོན་སོང་། །ཆབ་མདོ་བསྐྱལ་ནས་སླེབས་སོང་། །ཞེས་གཞས་འདྲ་ཡང་བཏང་འདུག
ང་ཕོད་འདྲ་འདྲ་དེ་ཚོ་ཚེ་རིང་ནས་བཟང་རྒྱུ་ཅི་ཡོད། བླ་མ་གོང་མ་ཚོས་སྡིག་པོ་ཆེ་ཚེ་ཐུང་བར་ཤོག ཟེར་ནས་སྨོན་ལམ་བརྒྱབ་འདུག་ག
ག་རེ་བཀའ་ཟུར། བོད་གཞུངགི་བཀའ་ཟུར་ཟེར་ས་དེ་འདི་འདྲ་ཞིག་ཡིན་ན་བོད་གཞུང་ཚར་འདུག རྒྱལ་བ་རིན་པོ་ཆེ་ལ་ཁ་རྐྱང་རྐྱང་གཏོང་མཁན། བོད་མི་མང་གི་རེ་འདུན་ལས་ལོག་པ་རྐྱང་རྐྱང་བྱེད་མཁན། འདི་ལ་མྱ་ངན་ཞུ་དགོས་ན་མོའོ་ཙེ་ཏུང་ལ་ཡང་ཞུ་དགོས་རྒྱུ་རེད། འདི་ཚོའི་གྲས་མི་ཤི་ན་ཡང་གཏམ་ཤི་རྒྱུ་མ་རེད་གྲོགས་པོ་ཚོ།
༡༩༧༦ལོའི་ཟླ་༡ཚེས་༡ཉིན་ཞེས་པ་དེ་༡༩༧༦ལོའི་ཟླ་༡ཚེས་༨ཉིན་ཞེས་བཅོས་དགོས།
ཆེས་ཤིན་ཏུ་བཀུར་བར་འོས་པའི་གཟུར་གནས་མཁྱེན་ལྡན་དྲ་གྲོགས་ལྷན་རྒྱས་ལ་ཞུ་རྒྱུ།
ངེད་བོད་པ་ཚང་གི་ང་ཕོད་འདིའི་མི་ཚེའི་ནང་གི་བྱ་བ་ཚང་མ་ད་ཚར་བ་རེད།
ང་ཕོད་ཀྱིས་རང་ཉིད་ཀྱི་བྱས་རྗེས་སྐོར་བྲིས་པ་འདི་རེད་ཅེས་ཅིག་བྱས་དུས་མ་འོངས་པར་ཉིན་གཅིག་དེབ་གཟུགས་ཅིག་ཐོན་སྲིད་ཀྱང་ཁོང་འཚོ་བཞུགས་སྐབས་མི་ལ་སྟོན་འོས་པའིརླབས་ཆེན་ལོ་རྒྱུས་ཤིག་མ་བྱུང་བར་རྒྱ་དམར་ལ་སྤྲེལ་ལད་རྐྱང་འཁྲབ་མཁན་གྱི་ཞབས་འདྲེན་རྒྱལ་ཚོང་པ་འདི་ཤི་ཚར་བའི་སྐབས་ཀྱི་དེབ་གཟུགས་དེར་ཕྲན་གྱིས་ངོས་ལེན་བྱེད་ཐུབ་ཐབས་ཡོད་པ་མ་རེད།
དེ་གཅིག་ཡིན།
གང་ལྟར་ང་ཕོད་ཀྱི་མི་ཚེའི་ཐོག་མཐའ་བར་གསུམ་དུ་ཁ་སེང་དང་པོ་ང་དགའ་དགོས་ས་གཅིག་བྱུང་བ་འདི་ཁོ་གྲོངས་ཉིན་དེ་སྤྱི་ཟླ་༡༢པའི་ཚེས་༢༣་དང། བོད་ཟླ་༡༡པའི་ཚེས་ ༧ ཉིན་ལ་ཁེལ་ཡོད་པ་དང། ཉིན་དེ་བོད་པ་ཚོས་བཟང་བོ་༡༠འཛོམས་ཡིན་ཤག་བྱེད་བཞིན་པའདི་ཡིན། དེར་བརྟེན་ཕྲན་གྱིས་ཀྱང་ཐོག་མར་དེ་ག་རང་ཡིན་ཤག་བྱས་པ་རེད།
ཁོང་གི་མི་ཚེའི་ནང་ལ་ཞབས་འདྲེན་ག་ཚོད་ཞུས་ཀྱང་ཁོང་ང་ཚོའི་བཀའ་ཟུར་བགྲེས་སོང་ཀུན་གྱིས་ཡང་ཡང་རེ་བ་རྒྱག་ས་ཞིག་དང། རེ་བ་ཆ་ཚང་འཕྲོ་བརླགས་གཏོང་མཁན་ཞིག་ཆགས་ཡོད་པ་མ་རེད། ཅེས་ང་ཚོ་སུས་ཀྱང་བཤད་མི་ཐུབ། དེའི་ཕྱིར་ཁོང་གྲོངས་ཉིན་དེ་དུས་ཚོད་བཟང་པོ་ཞིག་ལ་ཁེལ་ཐུབ་ན་འདི་ཡང་འོ་སྐོལ་སྒང་བ་བོད་པར་ལམ་འགྲོ་ཞིག་གི་རྟགས་མཚན་ཡིན་ཤས་ཆེ། སྙམ་པས་ཡིན།
འོན་ཀྱང་སྟབས་མ་ལགས་པ་ཞིག་ཏུ་ང་ལས་སྣང་མ་དག་པས་ཡིན་ནམ། ཡང་ན་ངས་ལོ་ཐོར་ལྟ་མ་ཤེས་པ་ཡིན་ནམ། ཡང་ན་ལོ་ཐོ་མ་དག་པས་ཡིན་ནམ། ཡང་ན་ངས་མཐོང་བ་དངོས་གནས་ཡིན་སོགས་ཁྱེད་གཟུར་གནས་དྲ་གྲོགས་ཚོས་གཟིགས་རོགས་གནང།
གང་ལྟར་ང་ཕོད་གྲོངས་ཉིན་དེ་ངན་པ་དགུ་འཛོམས་ཉིན་ཡིན་པ་འདྲ་ཞིག་འདུག
ཅི་ཡིན་ཞེ་ན།
བོད་གཞུང་སྨན་རྩིས་ཁང་གིས་བཏོན་གནང་བའི་རབ་གནས་ས་གླང་ལོའི་ལོ་ཐོ་བསྡུས་པའི་ནང་གི་སྤྱི་ཚེས་༢༢ཉིན་གྱི་རེའུ་མིག་ནང་ ངན་པ་དགུ་འཛོམས། Nine Bad Omens day ཆུ་ཚོད་༢༡ ནས་ཚེས་ ༧ ཚོུད་ ༢༣ བར། ཞེས་གསལ་འདུག་པ་དེ་ལྟར་ན་ངན་པ་དགུ་འཛོམས་བོད་ཚེས་༦་ཉིན་གྱི་མཚན་མོའི་ཆུ་ཚོད་༩་ནས་མགོ་ཚུགས་ཏེ། བོད་ཚེས་བདུན་ཉིན་གྱི་མཚན་མོའི་ཆུ་ཚོད་༡༡བར་ཁེལ་ཡོད་འདུག་པ་དང།
ང་ཕོད་བོད་ཚེས་༧་དང། ཕྱི་ཚེས་༢༣ཉིན་གྱི་པེ་ཅིན་གྱི་ཆུ་ཚོད་༤དང། སྐར་མ་༥༠ཐོག་གྲོངས་ཡོད་འདུག་པ་དང། པེ་ཅིན་གྱི་ཆུ་ཚོད་༤དང། སྐར་མ་༥༠དེ་ང་ཚོ་རྒྱ་གར་ས་ཐོག་གི་ཆུ་ཚོད་༢དང། སྐར་མ་༢༠ཙམ་ཡིན་ཕྱིར་སྐབས་དེར་ཁཽང་གྲོངས་པ་ཡིན་པ་ཡོངས་གྲགས་ལ་སོང་ངན་པ་དགུ་འཛོམས་མ་གཏོགས་འགྲོ་ས་ཞིག་འདུག་གམ།
འདི་ལ་བརྟེན་ང་ནི་སླར་ཡང་སེམས་པ་མ་སྐྱིད་པ་ཞིག་ཆགས་ཡོད།
འོན་ཀྱང་ཧ་ཅང་ཉེན་ཁ་རང་ཨེ་ཡོད།
འདི་རྒྱ་དམར་ལ་ཐན་ལྟས་ཞིག་མིན་འགྲོ་སྙམ། གང་གིས་ཡིན་ནམ་ཞེ་ན། རྒྱ་ནག་གི་སྲིད་བློན་ཀྲོའུ་ཨེན་ལའེ་ཡང་སྤྱི་ལོ་༡༩༧༦ལོའི་ཟླ་༡ཚེས་༡ཉིན་ངན་པ་དགུ་འཛོམས་ཉིན་འདས་གྲོངས་སོང་བ་ཡིན་ཕྱིར་ང་ཕོད་དང་འདས་གྲོངས་འགྲོ་ཉིན་གཅིག་པ་ཆགས་འདུག་པ་འདིས་གང་ཞིག་མཚོན་བཞིན་འདུག་གམ།
ང་ཕོད་འདི་བོད་མིའི་གདོང་ལྤགས་ཅན་གྱི་རྒྱ་དཔོན་ཚོ་དང་ལས་སྨོན་གྱི་འབྲེལ་བ་དམ་ཟབ་ཡོད་པའི་མི་རྒན་ཞིག་ཡིན་པར་མཚོན་གྱི་མི་འདུག་གམ།
གྲོགས་པོ། གྲོགས་པོ་ལགས། གྲོགས་པོ་ལགས་རེད་ཡཱ།
འདན་ཕྲུག་བློ་བཟང་ལགས། དང་པོ་ཁྱེད་ཀྱིས་ང་ཕོད་ཀྱི་ཕན་ཐོགས་ཡོད་པའི་མཛད་རྗེས་ཉུང་ཉུང་ མིན་པ་དེ་གསུངས་དང། སྐུ་མཁྱེན་
ཤེས་འདོད་འདུག་།
སྤྱིར་ནག་ཉེས་ཕྲ་ཙམ་ནི་སུ་ལའང་མཆིས་སྲིད། དེས་ན་འདས་གྲོངས་སུ་ཕྱིན་ཟིན་པའི་ང་ཕོད་མཆོག་ཀྱང་ཡོད་ངེས་རེད །
ཡིན་ཡང་་་ཁོང་གིས་མི་རིགས་རིག་གཞུང་དང་བཅས་པར་ཕན་ཐོག་ཡོད་པའི་མཛད་རྗེས་ཀྱང་ཉུང་ཉུང་མིན།
དེས་ན་ངས་བོད་མི་རྒན་གྲས་ཅིག་ལ་ངོས་འཛིན་བྱེད་རྒྱུ་ཡིན་མ་གཏོགས།
ལྷ་འདྲེ་གཉིས་ཀ་གང་ཡང་བཤད་མི་ཕོད །
ལྷག་དོན་བཀའ་ཤག་གིས་མྱ་ངན་ཞུས་པ་འདི་གནས་ལུགས་དང་མཐུན་པ་གཅིག་རེད་ལ་ཆབ་སྲིད་ཀྱི་གོ་རྟོབས་སད་པའི་བརྡ་རྟགས་ཅིག་ཀྱང་རེད་སྙམས །
ང་ཕོད་ཚང་གི་ཡབ་མེས་ཤིག་ལ་མན་ཇུ་གོང་མས་སྲོག་ཁྲིམས་བཏང་འདུག་ག
ང་ཕོད་རྡོ་རྗེ་རྒྱལ་པོ།
ཀོང་ཡུལ་དུ་སྐྱེས། མན་ཇུ་རྒྱལ་རབས་ཀྱིས་ཇུན་གར་དུས་ཟིང་ལྷིང་འཇགས་སུ་གཏོང་དུས་ཁོས་བྱས་རྗེས་བཞག་པའི་རྐྱེན་གྱིས་པེ་ཙེས་ཞེས་པའི་གོ་གནས་ཐོབ། རབ་བྱུང་བཅུ་གཉིས་པའི་ལྕགས་གླང་ལོར་གོང་མའི་བཀའ་ལྟར་བོད་ཀྱི་བཀའ་བློན་བྱས། རབ་བྱུང་བཅུ་གཉིས་པའི་མེ་ལུག་ལོར་ངན་པ་ཁ་མཐུན་གྱིས་དབུ་བཞུགས་བཀའ་བློན་ཁང་ཆེན་བསོད་ནམས་རྒྱལ་པོ་དམར་གསོད་བྱས་པས་མན་ཇུ་གོང་མས་སྲོག་ཐོག་གི་ཁྲིམས་གཅོད་བཏང༌།
འདི་ཚང་ཤེས་མཁན་ཡོད་དམ།
ང་ཕོད་ཅེས་པའི་མིང་ཇི་ལྟར་ཐོག་པ་རེད།
ཡིག་འབྲུ་ཁྲི་བདུན་གྱི་སྙན་ཞུ་དང་། བོད་མི་གསར་བརྗེ་བ་ཞིག་ཅེས་པ་གཉིས་བཀླགས་ཚར། ད་ནི་དེབ་ཅིག་ལ་བསྒུག་ནས་བསྡད་ཡོད། ལོ་རྒྱུས་ཤིག་ཇི་ལྟར་འགྲེལ་མིན་ཡང་བཀླག་རྒྱུར་བསྡད་པའི་དེབ་འདིར་ཐུག་ཡོད། དེ་མིན་མཐོ་བཤད་དམའ་བཤད་བརྒྱབ་ཤེས་ས་མ་རེད།
རྭ་ལོ་ལགས། ཉིད་ཀྱིས་དཔྱད་བསྡུར་ཆེད་མི་སྣ་གལ་ཆེན་གསུམ་གྱི་མཚན་དྲངས་ཏེ་བསམ་ཚུལ་མདོ་ཙམ་བརྗོད་པ་ཞེ་དྲག་ཡག་པོ་འདུག གང་ཟག་འདི་གསུམ་ནིསྐྱེས་ཡུལ་མི་འདྲ་བ་ཙམ་དུ་མ་ཟད། ལོ་རྒྱུས་ཀྱི་རྒྱབ་ལྗོངས་དང། མི་གཤིས། ལྟ་གྲུབ། ཤེས་ཡོན་བྱེད་སའི་ཁོར་ཡུག་དང་ཤེས་ཡོན་གྱི་ངོ་བོ། ལས་གནས་སོགས་མི་འདྲ་ས་ཧ་ཅང་མང་ནའང་དོན་དངོས་བོད་མི་རིགས་ལ་བཅངས་པའི་བརྩེ་སེམས་དང་མཛད་རྗེས་གང་ཡོད་ཤེས་གལ་ཆེ།
རེད་ རེད ངོ་མ་རེད་་ ཁྱེད་ཀྱིས་དེ་རིང་དྲང་བདེན་གྱི་གླུ་དབྱངས་ཤིག་གྱེར་འདུག
ཡང་སྟབས་ཡག་པ་ཤིག་ལ་ང་ཕོད་བཙན་བྱོལ་དུ་མ་ཡོང་པ་ནི་ཁོ་རང་གི་བསོད་ནམས་རེད། གལ་སྲིད་ཁོ་རང་ཡོང་པ་ཡིན་ན་བཙན་བྱོལ་དུ་འབྱོར་བའི་སྐུ་དྲགས་གཞན་ལ་དཀའ་ངལ་བྱུང་བ་གཅིག་མཚུངས་ཡོང་ངེས་རེད་ལ་ཚེ་ལོ་བརྒྱ་ཐུབ་རྒྱུ་དེ་བས་ཁག་པོ་མིན་འགྲོ།
པན་ཆེན་མཆོག་བཙོན་ཁང་དུ་ལོ་ ༩ རིང་བཞུགས་པ་རེད། འབའ་བ་ཕུན་ཚོགས་དབང་རྒྱལ་བཙོན་ཁང་དུ་ལོ་ ༡༩ བཞུགས་པ་རེད། ང་ཕོད་ངག་དབང་འཇིགས་མེད་པེ་ཅིན་ནས་ལོ་ ༥༠ བཞུགས་པ་རེད།
མི་འདི་གསུམ་པོ་བོད་མི་རིགས་ཀྱི་ཤ་ཁྲག་རུས་གསུམ་ལས་མཆེད་པ་གཅིག་མཚུངས་རེད། ཡིན་ཡང་། ཁོང་ཚོ་མཐའ་མར་པེ་ཅིན་ལ་འབྱོར་དུས་ཀྱི་རྒྱབ་ལྗོངས་ཁ་ཁ་དང་། ད་བར་གྱི་ལས་དབང་ཡང་ཐ་དད་རེད། ཁོང་ཚོ་ནི་གུང་ཁྲན་ཏང་གི་འོག་ལ་ཤོར་བའི་བོད་མི་རིགས་ཀྱི་སྐུ་ཚབ་དང་། བློ་ཁོག ཐམ་ཀ་བཅས་སུ་གྱུར།
ང་ཚོས་དྲང་པོ་བཤད་རྒྱུ་ནི་གལ་ཆེནི་པོ་རེད། དེ་རིང་འདིར་ང་ཕོད་སྐོར་རེད།
བཙན་བྱོལ་གཞུང་གིས་མྱ་ངན་ཞུས་པ་ལ་མི་འགྲིག་པ་མེད། ཡིན་ཡང་ང་ཕོད་ནི་
ཁོ་རང་གི་ནང་མི་དང་ཁོ་རང་གི་གོ་གནས་ལས་གཞན་བོད་མི་རིགས་དང་བོད་ཀྱི་རིག་གཞུང་གི་ཆེད་དུ་སྐད་ཆ་ཚིག་གཅིག་ལབ་མེད་པ་དང་ལས་ཀ་སྣེ་གཅིག་བྱས་མེད་པ་ནི་བདེན་པ་རེད། ཁོ་རང་སྔར་དུས་སུ་གོ་གནས་ཡོད་ལ་ཕྱི་དུས་སུ་གོ་གནས་ཡོད་པས། བོད་ཕྱི་ནང་གཉིས་ནས་ང་ཕོད་ལ་རེ་བ་མང་པོ་བྱས་ཀྱང་སྟོང་པ་གྱུར་པ་རེད།
འདི་འདྲིའི་སྡུག་སྐད་མང་བོ་ཞིག་རྒྱག་རྒྱུ་ཡོད་ན་ང་ཕོད་མ་ཤི་སྔོན་ལ་རྒྱག་དགོས་བ་རེད། མི་ཤི་ཚར་རྗེས་སྡུག་སྐད་ཇི་ཙམ་རྒྱབ་ཀྱང་ཆུ་ནང་ལ་སྟུག་དྲི་བཏང་བ་ལས་གཞན་མ་འདས། མི་རང་ཤི་རྒྱག་རྒྱུ་དང་རང་སྲོག་གཞན་ལག་ཏུ་འཇོགས་རྒྱུ་དེ་ལས་སླ་མོ་ཞིག་མིན་པས་ང་ཚོ་ཚང་མ་ཤི་མ་ཐུབ་ནས་སྐྱབས་བཙོལ་དུ་ཡོང་བ་མ་ཡིན་ནམ། བཙན་བྱོལ་བོད་གཞུང་གིས་ང་ཕོད་ལ་མྱ་ངན་ཞུས་བ་དེ་ཡང་སྔ་ཕྱི་རིམ་པ་མང་བོ་ཞིག་ལ་བསམ་བློ་བཏང་ནས་དགོས་དབང་གི་མྱ་ངན་ཞུས་བ་ལས་ཕ་རོལ་ལ་ཞེད་ནས་ང་ཕོད་ལ་མྱ་ངན་ཞུས་བ་ཞིག་མིན་ཚོད་རེད།
སྤྱིར་ང་ཚོའི་བཙན་བྱོལ་གཞུང་ཆུང་ཆུང་འདི་ལ་ཕྱི་ནང་གཉིས་ནས་སྐྱོན་འཛུགས་བྱེད་དགོས་དོན་མེད་པར་སེམས།