ནམ་ཞིག་ལས་རྒྱུ་འབྲས་ལ་ངོ་གཏུག་དགོས་པ་རེད།

གཞིས་ལུས་མི་མང་ཚོས་དངངས་སྐྲག་དང་ཛ་དྲག་དེ་འདྲའི་འོག་སྲོག་འབེན་ལ་བཙུགས་ཏེ་སྙིང་སྟོབས་དེ་ཙམ་བསྐྱེད་ཐུབ་ཀྱིན་ཡོད་ཀྱང་། རང་དབང་ལུང་པའི་བོད་མི་ཚོས་སྤྱི་དོན་ལ་བསམ་བློ་ཞེ་དྲག་མ་འཁོར་བར་རང་ཉིད་ཁོ་ན་དང་ལྷོད་གཡེང་བྱས་ནས་བསྡད་པ་དེ་རྒྱུ་འབྲས་ལ་ངོ་གཏུག་དགོས་པ་རེད་ལ་ནོར་འཁྲུལ་རེེད་ཅེས་༧གོང་ས་མཆོག་གིས་ཨོ་རི་སའི་བོད་རིགས་་མི་མང་ལ་གསུངས་ཡོད།

ཕྱི་ཚེས་ ༡༣ ཉིན་གྱི་སྔ་དྲོ་ཆུ་ཚོད་དགུ་པའི་ཐོག་༧གོང་ས་མཆོག་གིས་ཨོ་རི་ས་བོད་མིའི་གཞིས་ཆགས་སུ་སྔོན་འགྲོའི་ཆོས་འབྲེལ་མ་གནང་གོང་དེར་ཡོད་མི་དམངས་ལ་དགེ་བསྙེན་གྱི་སྡོམ་པ་སོགས་ཀྱི་སྔོན་འགྲོའི་གསུང་ཆོས་ལ་སློབ་སྦྱོང་བྱེད་དགོས་པ་དང་ཁོང་ཉིད་ཀྱི་ཉིན་རྒྱུན་གྱི་དུས་ཚོད་སྐྱེལ་སྟངས་སྐོར་མི་མང་ལ་བཀའ་སློབ་གནང་ཡོད་ལ།  ཉིན་རྒྱབ་ཆུ་ཚོད་ ༢ པའི་ཐོག་༧གོང་ས་མཆོག་པདྨ་སཾ་བྷ་བ་གཙུག་ལག་ཁང་དུ་ཆིབས་བསྒྱུར་གྱིས། བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་དང་རི་དགོན་ཐུབ་བསྟན་སྨིན་གྲོལ་གླིང་གི་ནམ་མཁའ་རིན་པོ་ཆེ་མཆོག དེ་བཞིན་ཨོ་རི་ས་ཕུན་ཚོགས་གླིང་བོད་མིའི་གཞིས་སྒར་གྱི་འགན་འཛིན་རྣམ་པ་དང་ས་གནས་མི་མང་བཅས་འདུ་འཛོམས་ཐོག ས་གནས་མགོ་འཛིན་མཆོག་གིས་གཞིས་ཆགས་ཀྱི་ལས་བསྡོམས་སྙན་སྒྲོན་ཞུས་པར། ༧གོང་ས་མཆོག་གིས་ལས་སྡོམ་དང་འབྲེལ་ཏེ་སྔར་ལོ་བོད་ནང་བྱུང་བའི་ཞི་རྒོལ་གྱི་དུས་ཚིགས་སྐོར་ལ་ནོར་བཅོས་ཀྱི་ལམ་སྟོན་བཀའ་སློབ་གནང་ཡོད། ༧གོང་ས་མཆོག་གིས། གོང་གི་ལས་བསྡོམས་སུ་བོད་ནང་གི་ཞི་རྒོལ་དེ་ཕྱི་ལོ་ ༢༠༠༨ ལོའི་ཟླ་ ༣ པའི་ཚེས་ ༡༤ བཀོད་ཡོད་པ་དེ་འགྲིག་མེད་པ་དང་། རྒྱ་མིས་ཕྱི་ལོ་ ༢༠༠༨ ཟླ་ ༣ ཚེས་ ༡༤ ནས་བོད་ནང་དུ་དྲག་ཟིང་བྱུང་བ་རེད་ཅེས་དྲིལ་བསྒྲགས་བྱེད་ཀྱིན་ཡོད་པ་རེད། དེའི་སྐོར་ངོས་རང་ལ་གསལ་བཤད་བྱེད་རྒྱུ་ཡོད། ཟླ་ ༣ ཚེས་ ༡༠ ཉིན་གསུམ་བཅུའི་དུས་དྲན་གྱི་ཉིན་མོར་དྲན་གསོ་བྱེད་ཀྱིན་པ་ལྟར། ངོས་རང་ཆམ་པ་ཕྲན་བུ་ན་ནས་ཉིན་དེའི་མཛད་སྒོ་ཆ་ཚང་ལ་མ་བསྡད་པར་སྐད་ཆ་བཤད་ཚར་རྗེས་ཕྱིར་ལོག་པ་ཡིན། ཉིན་རྒྱབ་ཆུ་ཚོད ༢ ཙམ་ལ་སྐུ་སྒེར་ཡིག་ཚང་གི་ལས་བྱེད་པར་ལྷ་ས་ནས་ཁ་པར་འབྱོར་ཏེ་རྭ་མོ་ཆེའི་གཡས་གཡོན་གྱི་མི་མང་རྣམས་ཀྱིས་ཞི་བའི་ཁྲོམ་སྐོར་བྱེད་ཀྱིན་པའི་གནས་ཚུལ་འབྱོར་བྱུང༌། ཡང་ཉེས་རྡུང་ཧ་ལས་པ་ཕོག་གི་རེད། གང་འདྲ་བསམས་ཏེ་དངངས་སྐྲག་ཚབ་ཆེན་པོ་སྐྱེས་བྱུང་། བྱ་རྒྱུ་ནི་གང་ཡང་མི་འདུག གང་ལྟར། ཞི་བའི་ངོ་རྒོལ་དེ་ཕྱི་ལོ་ ༢༠༠༨ ཟླ་ ༣ ཚེས་ ༡༠ ཕྱི་དྲོ་ནས་མགོ་ཚུགས་པ་རེད། དེ་རྗེས་ཚེས་ ༡༡ དང་ཚེས་ ༡༢ ཚེས་ ༡༣ བཅས་སུ་མུ་མཐུད་ངོ་རྒོལ་བྱས་ཡོད། ཚེས་ ༡༠ ཉིན་འབྲས་སྤུངས་ནས་དགེ་འདུན་པ་ཚོགས་ཁག་གཅིག་རང་སྐྱོང་ལྗོངས་ཁུལ་དུ་ངོ་རྒོལ་བྱེད་པར་ཡོང་སྐབས། རྒྱ་མིའི་བདེ་འཇགས་ལས་བྱེད་པ་ཚོས་བཀག་འགོག་བྱས་ཏེ་དགེ་འདུན་པ་ཁ་ཤས་འཛིན་བཟུང་ཡང་བྱས་པ་སོགས་དེའི་ཉིན་མོ་ནས་མགོ་བཙུགས་ཚར་བ་རེད་ཅེས་སྔར་ལོའི་ཞི་རྒོལ་བྱུང་རིམ་ངོ་སྤྲོད་གནང་ཡོད།

ཡང་༧གོང་ས་མཆོག་གིས།  གཞིས་ལུས་རྒྱ་ཆེའི་མི་མང་ཚོས་དངངས་སྐྲག་དང་ཛ་དྲག་དེ་འདྲའི་འོག་སྲོག་འབེན་ལ་བཙུགས་ཏེ་སྙིང་སྟོབས་དེ་ཙམ་སྐྱེད་ཐུབ་ཀྱི་ཡོད་པ་རེད། ང་ཚོ་རང་དབང་ལུང་པར་ཡོད་མཁན་ཚོས་བོད་སྤྱི་པའི་དོན་དུ་བསམ་བློ་ཞེ་དྲག་མ་འཁོར་བ་བྱས། སོ་སོའི་དོན་ལ་བསམ་བློ་ཁོ་ན་བཏང་བསྡད་པ་ཡིན་ན་ལས་རྒྱུ་འབྲས་ལ་ངོ་གཏུག་དགོས་པ་ཡིན་སྟབས།  སོ་སོའི་མི་རིགས་ཀྱི་ལ་རྒྱ་དང་ཞེན་ཁོག་སོགས་སྐད་ཆ་ཤོད་སྐབས་ངོ་ཚ་དགོས་པ་རེད། ཕར་ཕྱོགས་སུ་དཀའ་ངལ་དེ་འདྲའི་འོག་སེམས་ཤུགས་བསྒྲིམས་ཏེ་དེ་འདྲ་བྱེད་དུས་ང་ཚོ་རང་དབང་ལུང་པར་ཡོད་མཁན་ཚོ་ལྷོད་གཡེང་ངང་བསྡད་པ་ཡིན་ན་ནོར་འཁྲུལ་རེད། ཚང་མས་སེམས་ཤུགས་མ་ཆག་པར་བོད་སྤྱི་པའི་དོན་དག་དེ་དུས་ནམ་ཡང་མ་བརྗེད་པ་བྱེད་དགོས་ཀྱི་རེད་ཅེས་བཀའ་སློབ་སྩལ་ཡོད།

ཕྱི་ཚེས་ ༡༤ ཉིན་༧གོང་ས་མཆོག་གིས་ཐེངས་འདིའི་རྒྱ་གར་ཤར་ཕྱོགས་ཨོ་རི་སའི་ཉིན་བཞིའི་རིང་གི་མཛད་འཕྲིན་ལེགས་པར་གྲུབ་སྟེ། དེ་རིང་རྒྱ་གར་གྱི་མངའ་སྡེ་གུ་ཇ་ར་ཏིའི་གྲོང་ཁྱེར་ཝ་ཌོ་ཌ་རཱའི་ནང་རྒྱལ་ཁབ་ ༡༥ ནས་ཕེབས་པའི་མཁས་དབང་དང་རྒྱ་གར་ནང་པའི་དགེ་འདུན་པ་ ༥༠༠ ལྷག་མཉམ་ཞུགས་གནང་བཞིན་པའི་རྒྱལ་སྤྱིའི་ནང་པའི་ལེགས་བྱང་ལྷན་ཚོགས་ཀྱི་ཚོགས་མགོན་དུ་ཆིབས་སྒྱུར་བསྐྱང་གནང་ཡོད་པ་དང་།  ཕྱི་ཚེས་ ༡༦ ཉིན་ཕྱིར་བཞུགས་སྒར་དུ་ཆིབས་བསྒྱུར་གནང་འཆར་ཡོད་པ་རེད།