ཡངས་གླིང་རྡོ་རྗེ་གླེང་བ། ལུང་རིགས་རྒྱལ་གྱིས།

ཉིས་སྟོང་བརྒྱད་ལོའི་ཞི་བའི་ངོ་རྒོལ་བྱུང་བ་ནས་བཟུང་། བོད་ཕྱི་ནང་གཉིས་ཀར་བོད་ནང་གི་བོད་རིགས་དབུ་ཁྲིད་དག་གིས་རང་རང་གི་འཚོ་དོད་དོན་དུ་ཏང་དང་རྒྱལ་ཁབ་ཀྱི་ངོར་བལྟས་ནས་མི་འདུག་པར། བོད་མི་རིགས་ཀྱི་སྐྱིད་སྡུག་ལ་འགན་འཁུར་དགོས་པའི་བསམ་ཚུལ་སྔར་ལས་ཀྱང་ཤུགས་ཆེར་བྱུང་ཡོད་ལ། དེའི་ཐད་རྩོམ་ཡིག་འབྲི་མཁན་ཡང་བྱུང་།

བདུན་ཕྲག་གསུམ་གྱི་ཡར་སྔོན་ལ་བོད་རིགས་དམར་ཤོག་རྒན་རབས་པ་ཞིག་གིས་རྒྱ་ནག་གཞུང་གིས་བོད་ལ་བཟུང་བའི་སྲིད་བྱུས་ལ་ནོར་འཁྲུལ་ཤོར་ཡོད་པ་དང་། རྒྱ་ནག་གཞུང་གིས་བོད་ས་ཁུལ་དུ་ཁ་བྲལ་གསུམ་གྱི་སྲིད་བྱུས་ལག་བསྟར་བྱེད་ཀྱིན་ཡོད་སྐོར་མངོན་གསལ་གྱིས་སྐྱོན་བརྗོད་བྱས་ཡོད།

གོང་གི་བོད་རིགས་དམར་ཤོག་རྒན་རབས་པ་དེ་ནི་སྐུ་ཞབས་ཡངས་གླིང་རྡོ་རྗེ་རེད། ཁོང་གིས་ཉིན་ཤས་སྔོན་རྒྱ་ནག་གཞུང་ལ་སྐྱོན་བརྗོད་བྱས་པའི་ཚིག་དོན་རྣམས་མ་གླེང་བའི་སྔོན་ལ། ཁོང་གི་མི་ཚེའི་ལོ་རྒྱུས་དང་རྒྱབ་ལྗོངས་བཅས་མདོར་ཙམ་གླེང་རྒྱུ་ཡང་གལ་ཆེན་པོ་རེད་འདོད།

སྐུ་ཞབས་ཡངས་གླིང་རྡོ་རྗེ་ལགས་ནི་ ༡༩༣༡ ལོར་ཁམས་འབའ་ཐང་ནས་སྐྱེས་ཤིང་། ཀྲུང་གོ་གསར་པ་དབུ་བརྙེས་པའི་ལོ་སྟེ། ༡༩༤༩ ལོར་ཁོང་ཉིད་དགུང་ལོ་ ༡༨ ལ་སོན་སྐབས་རྒྱ་ནག་དམར་ཤོག་ཚོགས་པའི་ནང་དུ་ཞུགས། ༡༩༨༠ གྱ་གྲངས་ཀྱི་ནང་དུ་ཁོང་དམར་ཤོག་ཚོགས་པ་དང་སྲིད་གཞུང་གི་མཐོ་རིམ་མགོ་ཁྲིད་ཀྱི་གྲས་སུ་བསླེབས། ཡིན་ཡང་འདི་དག་གིས་ཁོང་ལ་མཚམས་རེར་གཞུང་གི་སྲིད་བྱུས་ཀྱི་ལམ་ལུགས་མི་འགྲིག་པའི་སྐོར་ལ་སྐྱོན་བརྗོད་བྱེད་པའི་གཤིས་ཀ་དེར་འགྱུར་བ་གཏོང་ཐུབ་མེད། དཔེ་མཚོན་ཙམ་ཞུས་ན། སྔོན་མ་ཁོང་སི་ཁྲོན་ནས་ཕྱིར་རྒྱ་ནག་ཏུ་ལས་གནས་མ་བསྒྱུར་བའི་སྔོན་ལ་ཁོང་གིས། ཀྲུང་དབྱང་གིས་བོད་རིགས་བྱིས་པ་ཚོའི་ཤེས་ཡོན་སློབ་གསོའི་སྟེང་རོགས་སྐྱོར་མ་དངུལ་གང་འཚམ་ཞིག་བཏང་བ་དེ་དག་རྒྱ་ནག་གཞུང་གི་ལས་བྱེད་ཚོས་ལྐོག་ནས་ཁོང་ཚོའི་བྱིས་པ་ཚོའི་མདུན་ལམ་ཆེད་དུ་བཏང་བའི་ཐད་སྐྱོན་བརྗོད་ཤུགས་ཆེར་བྱས་འདུག

ཡངས་གླིང་རྡོ་རྗེ་ལགས་ཀྱིས་ཁོང་གི་མི་ཚེའི་བྱ་གཞག་གི་དུས་ཡུན་རིང་ཤོས་དེ་སི་ཁྲོན་ཏུ་བསྐྱལ་ཡོད། ཐོག་མར་དམར་ཤོག་གུང་གཞོན་ཚོགས་པའི་མགོ་ཁྲིད་དང་། དེ་རྗེས་སྡེ་དགེ་རྫོང་དང་རྔ་པ་ཁུལ་གྱི་དམར་ཤོག་ཚོགས་པའི་ཚོགས་མི་གནང་ཞིང་། མཐའ་མར་སི་ཁྲོན་ཞིང་ཆེན་གྱི་སྲིད་སྐྱོང་བ་གཞོན་པའི་གོ་གནས་སུ་བསླེབས། ༡༩༨༠ ལོ་ནས་ ༡༩༨༦ ལོའི་བར་ཁོང་ཉིད་གོང་གི་གོ་གནས་རང་འཇགས་ཐོག་བོད་རང་སྐྱོང་ལྗོངས་ཀྱི་སྲིད་སྐྱོང་བ་གཞོན་པའི་ཕྱག་ལས་གནང་བ་དང་། དེའི་རྗེས་སུ་བོད་རང་སྐྱོང་ལྗོངས་དམར་ཤོག་ཚོགས་པའི་སྤྱི་ཁྱབ་དྲུང་ཆེ་གཞོན་པ་དང་བོད་རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་བཅས་ཀྱི་གོ་གནས་སུ་བསླེབས། ཕྱིར་སི་ཁྲོན་དུ་ཕེབས་པ་ནས་བཟུང་ཁོང་གིས་སི་ཁྲོན་ཞིང་ཆེན་གྱི་སྲིད་གྲོས་དང་དབུས་དམར་ཤོག་ཚོགས་པའི་ཚོགས་མི་སོགས་གོ་གནས་མཐོ་ས་དག་ཏུ་ཕྱག་ལས་གནང་ལ། ཁོང་གི་ཕྱག་ལས་ཕལ་ཆེ་བ་རིག་གཞུང་གི་ཕྱོགས་ཡིན་འདུག

ཟླ་སྔོན་མའི་ཚེས་ ༡༩ ཉིན་ཁོང་གིས་ཁྲིན་ཏུའུ་རུ་སི་ཁྲོན་ཞིང་ཆེན་བོད་རིག་པ་ཞིབ་འཇུག་ཚོགས་པའི་བོད་དོན་གྲོས་མོལ་ཚོགས་འདུ་ཐེངས་ ༦ པའི་ཚོགས་འདུའི་གཙོ་སྐྱོང་གནང་ལ། ཚོགས་ཆེན་དེའི་སྟེང་བོད་ཀྱི་ས་ཁུལ་གང་ས་ནས་ཕེབས་པའི་བོད་རིག་པའི་མཁས་པ་དང་ཉམས་ཞིབ་པ་མི་ ༡༢༠ འཛོམས་ཡོད་ཅིང་། ཡང་གླིང་རྡོ་རྗེ་ལགས་ཀྱི་གཏམ་བཤད་ཀྱི་བརྗོད་གཞི་ནི། ༼རྒྱ་ནག་གཞུང་གིས་མི་རིགས་དང་ཆོས་ལུགས་ལས་དོན་ཐད་བཟུང་བའི་སྲིད་བྱུས་༽ཞེས་པ་ཡིན་འདུག

གཏམ་བཤད་དེའི་ཐོག་ཁོང་གིས་ ༡༩༧༩ ལོ་དང་ ༡༩༨༩ ལོ། ༢༠༠༩ ལོ་བཅས་ལ་སི་ཁྲོན་ཁོངས་གཏོགས་ཀྱི་བོད་རིགས་ས་ཁུལ་དག་ལ་བྱུང་བའི་དོན་རྐྱེན་དག་གི་ཐད་ཁོ་རང་ཉིད་ཀྱི་བསམ་ཚུལ་ཅི་ཡིན་བཤད་འདུག ཁོང་གིས་བཤད་དོན། རིག་གནས་གསར་བརྗེའི་སྐབས་ང་ཚོར་གསབ་ཐབས་མེད་པའི་གཏོར་སྐྱོན་ཞིག་བྱུང་ཡོད་སྟབས་ ༡༩༧༩ ལོར་ངས་རྒྱ་ནག་གིས་མི་རིགས་དང་ཆོས་ལུགས་ལ་བཟུང་བའི་སྲིད་བྱུས་ཀྱི་གནད་དོན་སྐོར་གླེང་བ་ཡིན། ༡༩༨༩ ལོར་རྒྱ་ནག་དབུས་གཞུང་གིས་སི་ཁྲོན་ས་ཁུལ་གྱི་བོད་རིགས་མི་དམངས་ཀྱིས་ངོ་ལོག་ཟིང་འཁྲུག་བསླངས་ཚུལ་གྱི་སྐྱོན་འཛུགས་བྱས་པ་རེད། སྐབས་དེའི་རྒྱ་ནག་གི་སྲིད་འཛིན་ཡང་ཧྲན་ཁུན་གྱིས་བོད་ཐོག་འཛིན་པའི་སྲིད་བྱུས་ཀྱི་གཏམ་བཤད་ཅིག་ཀྱང་གནང་སོང་། ངས་སི་ཁྲོན་དུ་ཡོད་པའི་བོད་རིགས་ས་ཁུལ་དག་ལ་རྟོག་ཞིབ་བྱས་སྐབས་བོད་མི་ཚོས་ངོ་ལོག་ཟིང་འཁྲུག་བསླངས་པའི་རྟགས་མཚན་ཅི་ཡང་མི་འདུག ངས་སྲིད་འཛིན་ཡང་ཧྲན་ཁུན་ལ་སྙན་ཞུ་འབུལ་སྐབས་བོད་རིགས་ས་ཁུལ་དག་ཏུ་ངོ་ལོག་ཟིང་འཁྲུག་ཅིག་མི་འདུག་ལ། ཟིང་འཁྲུག་མེད་བཞིན་དུ་གོང་རིམ་ནས་ཟིང་ཆ་ཞི་འཇགས་ཀྱི་གྲ་སྒྲིག་ཇི་ལྟར་བྱས་པ་ཡིན། རྒྱ་ནག་གི་ས་ཁུལ་གཞན་པ་དག་ནས་དྲག་པོའི་ངོ་རྒོལ་བྱས་པ་དེ་དྲག་པོའི་ངོ་རྒོལ་གྱི་རྣམ་པར་འཇོག་པ་དང་བོད་ས་ཁུལ་ལ་བསླེབས་དུས་ངོ་ལོག་ཟིང་འཁྲུག་གི་ཉེས་མིང་འགེལ་དོན་ཅི་རེད། ས་གནས་དཔོན་རིགས་འགའ་རེས་སོ་སོའི་ཁེ་ཕན་གྱི་ཆེད་དུ་སྒྲུང་བཟོ་གི་ཡོད་པ་རེད། ཡིན་ཡང་། དེས་བོད་རིགས་ཚོར་གནོད་པ་ཚབས་ཆེན་ཕོག་གི་འདུག་ཅེས་བཤད་པ་ཡིན་ཟེར།

ཡངས་གླིང་རྡོ་རྗེ་ལགས་ཀྱིས་ ༢༠༠༩ ལོའི་དོན་རྐྱེན་ཐད་བཤད་དོན། དེང་སྐབས་རྒྱ་ནག་གཞུང་གིས་༼ཁ་བྲལ་གསུམ་༽གྱི་སྲིད་བྱུས་ཁྱབ་སྤེལ་བྱེད་ཀྱིན་འདུག ཆོས་ལུགས་ཀྱིས་ཆབ་སྲིད་ལ་བྱུས་གཏོགས་མི་བྱ་རྒྱུ། ཆོས་ལུགས་ཀྱིས་སློབ་གསོར་བྱུས་གཏོགས་མི་བྱ་རྒྱུ། ཆོས་ལུགས་ཀྱིས་འཕྲོད་བསྟེན་ལ་བྱུས་གཏོགས་མི་བྱ་རྒྱུ་བཅས་རེད། གཞུང་གི་ལས་བྱེད་པ་དག་གིས་བཤད་རྒྱུར། ཆོས་ལུགས་ནི་མི་རྣམས་ཀྱི་ཆང་སའི་གནད་དོན་དང་། རྒྱལ་ཁབ་ཀྱི་ཁྲིམས། གཞུང་འཛིན་སྐྱོང་དང་འཕྲོད་བསྟེན་ལ་སོགས་ལ་བསྲེ་རྒྱུ་མི་འདུག་ཟེར། ངས་བལྟས་ན་འདི་ནི་ཚབས་ཆེ་བའི་ནོར་འཁྲུལ་ཅིག་རེད།

དང་པོ་དེར། བོད་ས་ཁུལ་གྱི་དགོན་པ་དག་ནི་རྒྱལ་ཁབ་ཀྱི་ཆོག་མཆན་ལྟར་བསྐྱར་གསོ་བྱས་པ་རེད། བོད་ཀྱི་བླ་སྤྲུལ་རྣམས་ནི་རྒྱལ་ཁབ་ཀྱི་ཆོས་ལུགས་ལས་དོན་ཅུའུ་ཡི་ཆོག་མཆན་ལྟར་ངོས་འཛིན་བྱས་པ་རེད། གྲྭ་བཙུན་རྣམས་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་སེར་རེད། སྤྱི་ཚོགས་རིང་ལུགས་ནི་ཀྲུང་གོའི་སྲིད་བྱུས་རེད། དེར་བརྟེན། མི་སེར་རྣམས་ཀྱིས་སྤྱི་ཚོགས་རིང་ལུགས་ཀྱི་གཞུང་ལ་བྱུས་གཏོགས་མི་བྱ་རྒྱུ་དང་། ཆོས་ལུགས་ཀྱིས་ཆབ་སྲིད་ལ་བྱུས་གཏོགས་མི་བྱ་རྒྱུ་ནི་ཀྲུང་གོའི་ཆོས་ལུགས་སྲིད་བྱུས་ཀྱི་དགོངས་དོན་དང་རྒྱབ་འགལ་དུ་འགྲོ་གི་འདུག

གཉིས་པ་དེར། ཆོས་ལུགས་ཀྱིས་སློབ་གསོ་ལ་བྱུས་གཏོགས་མི་བྱ་རྒྱུ་དེ་ནི་དཀའ་རྙོག་ཡིན། ཆོས་ལུགས་ནི་མ་གཞི་ནས་སློབ་གསོའི་རིགས་ཤིག་ཡིན་ལ། དགོན་པ་དང་ལྷ་ཁང་སོགས་ནི་སློབ་གསོ་དང་རིག་གཞུང་གི་བསྟི་གནས་ཡིན་སྟབས་དེ་དག་མེད་ཚེ་སློབ་གསོ་ཡང་མེད། དགོན་པའི་ཕྱོགས་ལ་ཅི་གང་མི་ཤེས་ཤིང་ཆོས་དད་རང་དབང་གི་འོག་ན་བཀག་རྒྱ་མང་པོ་ཞིག་ཡོད་པར་བཤད་མཁན་དག་གིས་དགོན་པའི་བྱེད་སྒོ་དག་ལ་འགོག་སྡོམ་དང་དགོན་པ་རྣམས་སྟངས་འཛིན་ནན་མོའི་འོག་བཀག་ཡོད། དགོན་པ་ཁག་ཅིག་ནི་ཁ་བྲལ་རིང་ལུགས་པ་ཡིན་པའི་ངོས་འཛིན་བྱས་ཡོད། ཡིན་ཡང་འདི་ལ་དོན་སྙིང་ཅི་ཡང་མི་འདུག གལ་སྲིད་འགྲིམ་འགྲུལ་སྡེ་ཚན་གྱི་མི་ཞིག་གིས་ལྐོག་རྔན་བླངས་པ་ཡིན་ན་ང་ཚོས་ལྐོག་རྔན་ལེན་མཁན་དེར་ཉེས་ཆད་གཅོད་དགོས་པ་ལས། སྡེ་ཚན་དེ་ཡོངས་རྫོགས་ནག་ཅན་ཏུ་ཇི་ལྟར་བསྒྱུར་དགོས། ང་ཚོས་མི་རིགས་དབྱེ་འབྱེད་ཀྱི་ལྟ་བ་ཆུང་དུ་བཏང་ཞིང་། ཚང་མ་འདྲ་མཉམ་ཡིན་པའི་བསམ་བློ་དེ་བསྐྲུན་དགོས་པ་རེད།

གསུམ་པ་ནི། ཆོས་ལུགས་ཀྱིས་འཕྲོད་བསྟེན་ལ་བྱུས་གཏོགས་མི་བྱེད་པ་དེ་རེད། གལ་སྲིད་དགེ་འདུན་པ་ཞིག་ལ་ན་ཚ་བྱུང་བ་ཡིན་ན་ཁོང་ལ་བོད་མིའི་སྲོལ་རྒྱུན་གྱི་སྨན་དགོས་པ་བརྗོད་མ་དགོས་པ་རེད། བོད་ཀྱི་གསོ་རིག་ནི་བོད་མིའི་སྲོལ་རྒྱུན་རིག་གནས་རེད། བོད་སྨན་དང་རྒྱ་སྨན་མཉམ་འབྲེལ་བྱེད་པ་ནི་རྒྱ་སྨན་དང་ཕྱི་ལུགས་ཀྱི་སྨན་མཉམ་སྡེབ་བྱེད་པ་དང་གཅིག་པ་ཡིན། དགེ་འདུན་པ་ཞིག་ལ་ན་ཚ་ཕོག་སྐབས་སྨན་པ་ལ་མི་སྟོན་ཐབས་མེད་ཡིན་ལ། བོད་ཀྱི་གསོ་རིག་ཚན་རིག་ནི་ང་ཚོའི་སྲོལ་རྒྱུན་གྱི་འཕྲོད་བསྟེན་ཡིན།

བཞི་པ་ནི། ཆོས་ལུགས་ཀྱིས་གཞུང་གི་སྲིད་བྱུས་ལ་བྱུས་གཏོགས་མི་བྱེད་པ་ཞེས་པ་འདི་རེད། ཆོས་ལུགས་ནི་སེམས་ཀྱི་རང་བཞིན་ཞིག་ཡིན། དེའི་རྐྱེན་གྱིས་བྱུས་གཏོགས་ཞེས་པའི་སྐད་ཆ་དེ་ཡོང་གི་མེད། བྱུས་གཏོགས་ཡོང་གཞི་ཁོ་ན་ནི་དགེ་འདུན་པ་རྣམས་མི་སེར་ཡིན་པ་དེ་ཡིན། ཁོང་ཚོས་རང་ཉིད་མི་སེར་ཞིག་ཡིན་པའི་སྟེང་ནས་སྐད་ཆ་བཤད་ཀྱིན་ཡོད་སྟབས་བྱུས་གཏོགས་ཞེས་པ་དེར་འབྲེལ་བ་མི་འདུག རྒྱའི་ཚིག་མཛོད་དུ་གསལ་བའི་བྱུས་གཏོགས་གི་གོ་དོན་ལྟར་ན་ང་ཚོར་གོ་བ་འདི་འདྲ་ཞིག་སྟེར་སྲིད། མི་སེར་ཡིན་པའི་དགེ་འདུན་པ་འདི་དག་གིས་གཞུང་གི་སྲིད་བྱུས་ལ་བྱུས་གཏོགས་བྱ་མི་ཆོག་པ་དེ་རེད། འདི་ནི་ནོར་འཁྲུལ་རེད། ཅེས་བཤད་ཡོད།

གཞན་ཡང་བོད་རིག་པའི་ཚོགས་སྟེང་དེར་ཞུགས་མཁན་མཁས་པ་དག་གིས་ཀྱང་བོད་ཀྱི་གནད་དོན་ཐད་རང་རང་གི་བསམ་ཚུལ་བཏོན་ཡོད། དཔེར་ན། སི་ཁྲོན་ཞིང་ཆེན་ནོར་སྲིད་ལྷན་ཁང་དུ་ཕྱག་ལས་གནང་མཁན་ཞིག་གིས་བཤད་དོན། རྒྱ་ནག་ནང་དུ་མི་རིགས་ཀྱི་གནད་དོན་ཚབས་ཆེན་པོ་རེད། གལ་སྲིད་རྒྱ་ནག་གིས་སྔར་ནས་མི་རིགས་འདྲ་མཉམ་གྱི་སྲིད་བྱུས་ལག་བསྟར་བྱས་ཡོད་ཚེ་མི་རིགས་ཀྱི་ཚབས་ཆེའི་འགལ་བ་དང་མི་རིགས་ཁྱད་གསོད་ཀྱི་གནད་དོན་ཡོང་གི་མ་རེད། རྒྱ་ནག་གིས་བོད་དབང་སྒྱུར་བྱས་ནས་ལོ་ ༦༠ འགོར་ཡོད་པ་རེད། དེར་བརྟེན་ག་རེ་བྱས་ནས་ཕྱིའི་རྒྱལ་ཁབ་དང་ང་ཚོའི་མཐའ་མཚམས་ཕ་རོལ་གྱི་མི་རྣམས་ཀྱིས་བོད་ཀྱི་གནད་དོན་ཐོག་ལག་པ་བསྲིངས་པ་རེད། འདི་ནི་ང་ཚོའི་ནང་ཁུལ་དུ་དཀའ་ངལ་ཡོད་སྟབས་ཕྱི་ཕྱོགས་ནས་གོ་སྐབས་བཙལ་བ་རེད། རྒྱ་ནག་གིས་མི་རིགས་སྲིད་བྱུས་ཀྱི་ཐད་ལ་བསམ་བློ་བསྐྱར་དུ་གཏོང་དགོས་ཀྱི་འདུག དཀའ་ངལ་ནི་དེ་རེད་དམ། རྒྱ་ནག་གཞུང་གིས་ངོས་འཛིན་བྱས་པའི་བླ་མ་རྣམས་ལ་དད་ལྡན་མང་ཚོགས་ཀྱིས་ཡིད་ཆེས་མི་བྱེད་པ་དེར་རྒྱ་ནག་གཞུང་ཧང་སང་གི་ཡོད་སྲིད། ངས་དེའི་རྒྱུ་མཚན་བཤད་ཆོག རྒྱ་ནག་གཞུང་གིས་མུ་མཐུད་ནས་ཆོས་ལུགས་ནི་མི་དམངས་ཀྱི་ཉལ་ཐ་ཡིན་པ་དང་བླ་མ་རྣམས་ནི་རྫུན་མ་ཡིན་པའི་ལྟ་ཚུལ་དེར་རྒྱབ་སྐྱོར་བྱེད་བཞིན་པའི་དབང་གིས་རེད། དེར་བརྟེན་ཆོས་ལུགས་ནི་ཉལ་ཐ་ཡིན་པར་ཡིད་ཆེས་བྱེད་མཁན་ཞིག་གིས་ངོས་འཛིན་བྱས་པའི་བླ་མ་དེར་སུས་ཡིད་ཆེས་བྱེད་གི་རེད། རྒྱལ་ཡོངས་མི་དམངས་འཐུས་མིའི་ཚོགས་ཆེན་སྟེང་གི་བླ་མ་དག་གིས་རང་གི་ཆོས་ལུགས་ཀྱི་རྩ་དོན་ལ་གཏོར་བརླག་གཏོང་གི་ཡོད་པ་རེད། དེང་སྐབས་རྒྱ་ནག་གཞུང་གིས་དགོན་པ་ཁག་ནི་ཡུལ་སྐོར་སྤྲོ་འཆམ་པའི་བསྟི་གནས་ལ་སྒྱུར་གྱིན་ཡོད་ལ། རྩ་ཆེའི་བླ་མ་རྣམས་ཀྱིས་སྤྱིར་བཏང་གི་ངལ་རྩོལ་བྱེད་ཀྱིན་ཡོད་པ་རེད། སྲིད་གཞུང་གིས་ད་ནི་ཆོས་སྲིད་ཟུང་འབྲེལ་གསར་པ་ཞིག་འཛུགས་ཀྱིན་ཡོད་ལ། ཀྲུང་གོ་གུང་ཁྲན་ཏང་གི་སྲིད་ཁྲིམས་སྡེ་ཚན་གྱི་ལས་བྱེད་རྣམས་དང་། དྲིལ་བསྒྲགས་སྡེ་ཚན། དེ་བཞིན་གཞུང་གི་སྤྱི་བདེ་ཚན་ཁག་གི་ལས་བྱེད་དག་གིས་ཆོས་ལུགས་ཀྱི་ལས་དོན་དག་ལ་མཛུབ་སྟོན་བྱེད་ཀྱིན་ཡོད། དེང་སྐབས་ལས་བྱེད་འདི་དག་ནི་༼སངས་རྒྱས་དངོས་༽དང་ཁོང་ཚོས་ཁྲིམས་འགལ་གྱི་སྒོ་ནས་ཆོས་སྲིད་ཟུང་འབྲེལ་གྱི་ལམ་ལུགས་གསར་པ་ཞིག་འཛུགས་ཀྱིན་འདུག་ཅེས་བཤད་འདུག

དེ་བཞིན་སྡེ་དགེ་རྫོང་ནས་ཡིན་པའི་ཚེ་རིང་རྡོ་རྗེ་ཞུ་བ་ཞིག་གིས་བཤད་དོན། ཞིན་ཅང་གི་བདུན་པའི་ཚེས་ལྔ་དང་འབྲེལ་བའི་དོན་རྐྱེན་སྐོར་རྒྱ་ནག་གིས་དྲིལ་བསྒྲགས་བྱས་པའི་རྗེས་ནས་བཟུང་རཱ་བྷེ་ཡ་ ཁ་ཌེར་ནི་ཡུ་གུར་བའི་དབུ་ཁྲིད་ཅིག་ཏུ་གྱུར་བ་རེད། ང་ཚོར་འདིའི་ཕྱོགས་ནས་ཉམས་མྱོང་ཐོབ་དགོས་པ་རེད། ངས་ ༡༩༦༤ ལོ་ནས་བཟུང་སྲིད་གཞུང་གི་ལས་ཀ་བྱས་པ་ཡིན། ངའི་ཚོར་སྣང་ལ་ད་སྐབས་ང་ཚོས་ལས་འགུལ་མང་པོ་ཞིག་བསྐྱར་བཅོས་ཀྱི་སྤེལ་བཞིན་འདུག ང་ཚོས་ཆོས་ལུགས་མ་གླེང་བར་ཆབ་སྲིད་གླེང་མི་ཐུབ། ང་ཚོས་མང་ཚོགས་མ་གླེང་བར་གུང་ཁྲན་ཏང་གླེང་མི་ཐུབ། ངའི་རེ་བ་ལ་མི་རིགས་དང་ཆོས་ལུགས་ཀྱི་དཀའ་རྙོག་བྱུང་སྐབས་སྲིད་གཞུང་གིས་ཁ་ཐུག་ཏུ་ཏཱ་ལའི་བླ་མར་སྐྱོན་འཛུགས་མ་གནང་རོགས། གནད་དོན་གང་ནས་བྱུང་ས་དེ་ནས་ཐག་གཅོད་དགོས་པ་རེད་ཅེས་བཤད་འདུག

ལོ་སྔོན་མའི་ཞི་རྒོལ་སྐབས་ནས་བཟུང་རྒྱ་རིགས་ཤེས་ཡོན་པ་མང་པོ་ཞིག་གིས་བོད་མི་རིགས་ཀྱི་བདེ་སྡུག་དང་རྒྱ་ནག་གཞུང་གིས་བོད་ཐོག་བཟུང་བའི་སྲིད་བྱུས་ལ་བསྐྱར་ཞིབ་བྱ་དགོས་སྐོར་འབོད་སྐུལ་ཞུས་ཡོད་ལ། བོད་རིགས་ཤེས་ཡོན་པ་ཚོའི་ནང་དུ་འདི་ལྟའི་རེ་སྐུལ་ཞུ་མཁན་དཀོན་པོར་གྱུར་ཡོད། ཡིན་ཡང་། ཉེ་ཆར་ཁྲིན་ཏུའུ་ནས་འཚོགས་པའི་བོད་རིག་པའི་ཚོགས་ཆེན་སྟེང་གི་བོད་རིགས་ཤེས་ཡོན་པ་དག་གི་དགོངས་ཚུལ་འདི་དག་གིས་རྒྱ་ནག་གཞུང་དང་བོད་རིགས་ཤེས་ཡོན་པ་རྣམས་ལ་མི་རིགས་སྲིད་བྱུས་ཀྱི་ནོར་འཁྲུལ་ལ་དྲན་སྐུལ་དང་མི་རིགས་ཀྱི་འོས་འགན་འཁྱེར་སྟངས་ལ་ཁ་ཕྱོགས་གསལ་བོ་ཞིག་བཟོས་ཡོད་པར་འདོད།

མཆན། ༡༽ ཡང་གླིང་རྡོ་རྗེའི་མིང་གི་དག་ཆ་འདི་ཡིན་མིན་གསལ་བོ་མེད་སྟབས་མཁྱེན་མཁན་ཡོད་ན་འདིར་འགོད་རོགས།

     ༢༽ བོད་རིག་པའི་ཚོགས་འདུའི་སྐོར་འདི་རྒྱ་ཡིག་གི་ལམ་ནས་ཀློག་འདོད་མཁན་ཚོས་དྲ་ཐག་ narba.tibetcul.com/75508.html ལ་བསྣུན་ཏེ་ཀློག་རོགས།