བོད་ནང་གི་གནས་སྟངས་སྔར་བཞིན་ཛ་དྲག་གི་རྣམ་པ་ནས་ཡར་རྒྱས་གང་ཡང་སོང་མེད་སྟབས། འདི་ལོར་ཡང་གཞུང་ཞབས་པ་རྣམས་ཀྱིས་ལོ་གསར་གཏོང་མི་ཆོག་ཟེར།
དེ་རིང་སྟེ་ཕྱི་ཚེས་ ༣ ཉིན་བོད་གཞུང་བཀའ་དྲུང་ཡིག་ཚང་ནས་གསལ་བསྒྲགས་ཤིག་སྤེལ་བའི་ནང་། དེ་སྔོན་ས་བྱི་ལོའི་ནང་བོད་དུ་དྲག་གནོན་གྱི་གནས་ཚུལ་ཚབས་ཆེན་འོག་བོད་མི་བརྒྱ་ཕྲག་མང་བོ་རྐྱེན་འདས་དང་། སྟོང་ཕྲག་མང་བོ་བཙོན་འཇུག་བྱས་པ། ད་ལྟའང་མཚམས་མ་ཆད་པར་བཙན་གནོན་དང་དམ་བསྒྲགས་ཀྱི་གནས་ཚུལ་ས་གླང་ལོའི་ནང་དུའང་རྒྱུན་མཐུད་བཞིན་པ་དང་། བོད་ཀྱི་ས་གནས་མང་བོའི་ནང་ད་དུང་ལོ་གསར་གཏོང་རྒྱུ་མིན་པའི་ཐག་གཅོད་བྱེད་མཁན་བྱུང་འདུག་པར་བརྟེན། འཆར་ལོ་ལྕགས་སྟག་ལོའི་ལོ་གསར་སྐབས་གཞུང་འབྲེལ་གྱི་མཛད་སྒོ་རིམ་པའི་ནང་ཚེས་གཏོར་དང་། བསང་གསོལ་སོགས་ཆོས་ཕྱོགས་ཀྱི་མཛད་སྒོ་རྣམས་སྲོལ་རྒྱུན་ལྟར་གནང་བ་མ་གཏོགས། གསོལ་སྟོན་དང་། ཞབས་གཞས། ཤོག་པག་སྤར་བ་སོགས་བག་ཡངས་སྤྲོ་སྐྱིད་ཀྱི་ལས་རིམ་གཏན་ནས་མེད་པ་གནང་དགོས་རྒྱུ་མ་ཟད། གཞུང་ཞབས་ལས་བྱེད་རྣམས་ཀྱང་སྤྲོ་སྐྱིད་གསོལ་སྟོན་སོགས་སུ་ཕེབས་གནང་མེད་པ་དགོས་རྒྱུ་ཞེས་གསལ་འདུག
འདི་གའི་གསར་འགོད་པས་བཀའ་དྲུང་མི་འགྱུར་རྡོ་རྗེ་ལགས་སུ་དེའི་སྐོར་བཀའ་འདྲི་ཞུས་པར་ཁོང་གིས་གསུངས་དོན། བཀའ་ཤག་ནས་ད་ལོ་བོད་ནང་གི་ས་གནས་ཁག་ཅིག་ཏུ་ལོ་སར་མི་གཏོང་རྒྱུ་བྱས་འདུག་པ་གསན་ཐོས་བྱུང་ཡོད་པ་རེད་ལ། དེ་ལྟ་བུའི་སྙན་གསན་ཞུ་མཁན་ཡང་འགའ་རེ་བྱུང་སོང་། དེ་ལྟར་བྱུང་མིན་ལ་མ་ལྟོས་པར་ལོ་སྔོན་མ་དང་ད་ལོའི་གནས་སྟངས་བར་ཡར་རྒྱས་ཀྱི་རྣམ་པ་གང་ཡང་བྱུང་མེད་པར། ༢༠༠༨ ལོའི་གསུམ་བཅུའི་དུས་དྲན་སྐབས་ནས་མགོ་བཙུགས་པའི་བོད་མི་ཞི་བའི་སྒེར་ལངས་ནང་ཞུགས་མཁན་མང་བོ་ཞིག་མུ་མཐུད་བཙོན་འཇུག་དང་། ཁྲིམས་ཆད་ནན་མོ་ཕོག་པ། ཁྲིམས་ཐག་བཅད་པ། རྨས་སྐྱོན་ཕོག་པ་སོགས་མུ་མཐུད་སྡུག་སྦྱོར་མནར་གཅོད་མྱོང་བཞིན་པར་བརྟེན། ང་ཚོ་རང་དབང་ལུང་པའི་ནང་ཡོད་པའི་བྱེས་གྱར་བོད་མི་རྣམས་ཀྱིས་ཁོང་རྣམ་པར་གདུང་སེམས་མཉམ་སྐྱེད་ཀྱི་ཆེད་དུ་འདི་ལོའི་ལོ་གསར་རྒྱས་སྤྲོས་ཀྱིས་མི་གཏོང་རྒྱུའི་ཐག་གཅོད་བྱས་པ་རེད། ལྷག་པར་དུ་གཞུང་ཞབས་པ་རྣམས་ལ་མཚོན་ན་འགན་ཅུང་ཙམ་ཆེ་བ་ཡོད་པའི་ཆ་ནས་ལོ་སར་སྐབས་ཆོས་ཕྱོགས་ཀྱི་མཛད་སྒོ་ལས་རྒྱས་སྤྲོས་མི་གཏོང་རྒྱུ་དེ་གལ་ཆེན་པོ་རེད་ལ། འདི་གའི་བཀའ་དྲུང་ཡིག་ཚང་ནས་ནན་ཏན་སྒོས་གསལ་བསྒྲགས་ཀྱང་བཏང་ཡོད། འོན་ཀྱང་། གསལ་བསྒྲགས་དེ་ནི་ང་ཚོས་གཞུང་ཞབས་ལས་བྱེད་རྣམས་ལ་ལོ་གསར་མི་གཏོང་རྒྱུའི་གསལ་བསྒྲགས་སྤེལ་བ་ཙམ་རེད་མ་གཏོགས་དམར་བོའི་གཞུང་ལྟར། མི་མང་ལ་ལོ་གསར་གཏོང་མི་ཆོག་པའི་བཀའ་རྒྱ་བཏང་བ་དེ་འདྲ་མ་རེད་ལ། དེ་ལྟར་བཀའ་གཏོང་ཆོག་གི་ཡང་མ་རེད། མི་མང་གིས་ལོ་གསར་གྱི་དགའ་སྟོན་ལ་རོལ་མིན་དེ་ཁོང་ཚོས་བསམ་བློ་གཏོང་ཕྱོགས་ལ་ཐུག་ཡོད་པ་རེད། གཞུང་གི་ངོས་ནས་ཆེད་དུ་དགག་བྱ་དེ་འདྲ་གང་ཡང་ཡོད་པ་མ་རེད་ཅེས་གསུངས་ཡོད།
སྐུ་ཚབ་ཚོ་
ཚུགས་ཀ་མེད་ཀྱང་སྡོག་པ་བྱས་ནས་ས་ཡ་དྲུག་གི་སྐུ་ཚབ་དག།
བོད་ལྭ་གོན་ནས་བོད་ཚུགས་བཏོད་དེ་བོད་ཀྱི་རྒྱལ་ས་གཉིས་བ་ནས།།
༧ཡིད་བཞིན་ནོར་བུར་མགོས་ཕྱག་འཚལ་སྟེ་དམ་བཅའ་ཁས་ལེན་བྱས་བ་དང་།།
ཟ་དང་འཐུང་དང་ཡིན་དང་མིན་སོགས་རྒྱ་སྐད་ཁ་ཤས་སློབ་ཞོར་ལ།།
བོད་ལྭ་ཕུད་ནས་རྒྱ་ལྭ་གོན་ཏེ་མཁའ་ལམ་བརྒྱུད་ནས་ཕེབས་སོང་ཟེར།།
གཞིས་བྱིས་གཉིས་ཀྱི་རེ་བ་ཤི་ཡང་རྣ་བས་ཡང་ཡང་ཉན་པ་ན།།
ཤ་རྩ་དཀར་ལ་ཤ་ཚུགས་ལེགས་པའི་རྒྱ་མོ་འགའ་ཡི་བསུ་བ་བཅས།།
རྒྱ་མཁར་སྨུག་པོའི་ནང་ལ་འཛུལ་རྗེས་ཟ་འཐུང་སྡེར་མའི་ཁྲོག་སྒྲ་ལས།།
བོད་མིའི་བདེ་སྡུག་བཤད་པའི་སྐད་ཆ་སུ་དང་གང་གིས་མ་གོ་ཟེར།།
༧ཡིན་བཞིན་ནོར་བུའི་གསལ་བཤད་བདུན་པོ་ཕར་ལ་འཕྲོད་པའི་བརྡ་ཙམ་དང་།།
མི་རུང་ཁ་ཤོར་བཞི་ཡི་ཐོག་ལ་ཐུགས་རྗེ་ཆེ་ཞུ་ཕུལ་བ་དང་།།
ལག་པ་གཉིས་ཀས་ཕོ་བ་སྐྱོར་ནས་ཟ་འཐུང་བླུགས་པའི་སྒྱེ་མོ་བཞིན།།
པེ་ཅིང་མཁར་ན་ཡོད་པ་འདྲ་པས་བདེ་མོ་སྐྱིད་པོ་ཡིན་པར་སྨོན།།
ཆབ་སྲིད་འཐབ་ཕྱོསག་གཅིག་གྱུར་པུའུ་ཡིས་ཁྱོད་ཚོར་སྐད་ལོག་ཨེ་བྱས་ཐལ།།
པུའུ་ཀྲང་གཞོན་པས་དཔའ་སྐད་འཐེན་སྐབས་ཆོས་སྐྱོང་སྲུང་མ་ཨེ་དྲན་ཐལ།།
སྐུ་ཚབ་རྣམས་ལ་སྐྲག་སྣང་སྐྱེས་ནས་རྒྱུད་པ་གཉིས་ཀ་ཨེ་འདར་ཐལ།།
བདག་དབང་བཤད་སྐབས་མགོ་བོ་རྨོངས་ནས་༧ཡིད་བཞིན་ནོར་བུ་ཨེ་དྲན་ཐལ།།
སྲིད་ཇུས་བཤད་སྐབས་མགོ་ཡོམ་འཁོར་ནས་རྔུལ་ཆུ་མང་བོ་ཨེ་བཞུར་ཐལ།།
རྒྱལ་ཁབ་ཞིག་གི་སྐུ་ཚབ་ཡིན་པས་རྒྱ་ཆེན་རྒྱས་བ་ཨེ་ཐུབ་ཐལ།།
ཡ་ཡ་ལེགས་སོ་ཐུགས་རྗེ་ཆེ་ལས་གཞན་པའི་ཚིག་འགའ་ཨེ་ཤོད་ཐལ།།
༧གོང་ས་མཆོག་ལ་མཚན་སྨོད་བྱེད་སྐབས་སྐྱུ་མོ་གཉེར་ནས་ཨེ་དཀའ་ཐལ།།
རྒྱ་མོ་ཚོ་ལ་རྒྱ་རྒྱོ་བརྒྱབས་ནས་གུང་གསེང་སྐྱིད་པོ་ཨེ་བྱུང་ཐལ།།
མོ་ཐེ་འཐུང་སྐབས་མི་རིགས་ཤིག་གི་བཀའ་དྲིན་ཡིན་པ་ཨེ་ཚོར་ཐལ།།
ཁྱོད་ཚོར་རྟག་ཏུ་རྙོག་དྲ་མི་འདུག་རྒྱུན་དུ་ཕེབས་ཞེས་ཨེ་བཤད་ཐལ།།
མྱི་བཟང་རེད་ཅེས་མྱི་ཆེན་དག་གིས་བསྟོད་པའི་མཐེ་བོང་ཨེ་བསྒྲངས་ཐལ།།
སྒེར་བདག་ཁ་པར་ཨང་གྲངས་སྤྲོད་དང་སྒེར་དོན་བསྒྲུབ་ཞེས་ཨེ་བཤད་ཐལ།།
ང་ཚོ་ཚང་མ་བཟང་ས་ཡིན་པས་ནང་གཏམ་བཤད་ཅེས་ཨེ་བསྐོར་ཐལ།།
ཅི་གསུངས་བཀའ་ལ་ལེགས་སོ་ཙམ་ལས་རང་གི་འདོད་འདུན་ཨེ་ཤོད་ཐལ།།
བོད་པའི་སྐུ་ཚབ་ཡིན་པའི་རྟགས་ལ་བོད་དོན་ཚིག་འགའ་ཨེ་ཁྲོལ་ཐལ།།
ས་མཚམས་ལོ་རྒྱུས་གྲོས་མོལ་བྱེད་སྐབས་ས་རྒྱུས་མེད་པས་ཨེ་མྱངས་ཐལ།།
དྲང་མོར་བཤད་ན་འཕྲིན་སྐྱེལ་ཙམ་ལས་བོད་པའི་སྐུ་ཚབ་ཨེ་ཉན་ཐལ།།
རྡ་རམ་ས་ལའི་ཉེ་སར་འབྱོར་དུས་ཅི་བཤད་བསམ་ནས་ཨེ་སྐྲག་ཐལ།།
བཀའ་བློན་ཁྲི་བའི་བཀའ་བཀྱོན་དྲན་ནས་སྐྱག་རྫུན་བཤད་པྭ་ཨེ་འདོད་ཐལ།།
༧ཡིད་བཞིན་ནོར་བུ་ཡིད་ལ་ཤར་ནས་དགོངས་དག་ཞུ་པྭ་ཨེ་དྲན་ཐལ།།
སྐྱབས་བཅོལ་བ་ཚོ་སེམས་ལ་ཡོང་ནས་རྒྱ་ཆེན་བཤད་པྭ་ཨེ་འདོད་ཐལ།།
གསར་འབྱོར་བ་ཚོས་དྲི་བ་འདྲི་ན་དབྱིན་སྐད་རྒྱག་པྭ་ཨེ་དྲན་ཐལ།།
ཁ་ཤས་གསང་ནས་ཁ་ཤས་བཤད་སྐབས་རང་གིས་འཇོན་སོང་ཨེ་འདོད་ཐལ།།
པེ་ཅིང་ཁོ་ཡ་ཁོག་ནས་ཞུས་ཏེ་མོ་ཐེའི་བཟི་ཁ་དྭངས་བ་ན།།
དྲི་བ་འདི་ཚོར་ལན་ཞིག་གནོངས་ཞེས་གུས་མི་ཤེས་བའི་གུས་ལྡན་པ།།
ས་ཡ་དྲུག་གི་དམའ་ཤོས་དེ་ཡིས་ས་ཁུང་ཞིག་གི་ཡ་ཕུགས་ནས།།
ལག་པའི་ཐལ་མོ་ཐོད་ལ་སྦྱར་ཏེ་པུས་མོ་ས་ལ་བཙུགས་ནས་ཞུས།
མི་ཉག་སྐལ་བཟང་ལགས། ཁྱོད་ཀྱིས་བཤད་པར་རྒྱབ་སྐྱོར་ཡོད། ཡིན་ནའང་སྨྱོན་པ་རྣམས་ཀྱིས་རང་ཉིད་སྨྱོན་པ་ཡིན་པ་གོ་གི་མེད་པ་འཇིག་རྟེན་འདིའི་རང་གཤིས་རེད།
good
དྲྭ་གྲོགས་མི་ཉག་སྐལ་བཟང་ལགས་ཀྱིས་དགོངས་ཚུལ་དེར་རྒྱབ་སྐྱོར་ཡོད། དུས་བབ་དྲྭ་ངོས་ཀྱི་མི་ལ་སྐྱོན་བརྗོད་རྐྱང་བྱས་ནས་སྡོད་མཁན་འདི་ཚོས་རང་ཉིད་ཀྱིས་འཇོན་པ་སྣ་གཅིག་ཀྱང་སྟོན་རྒྱུ་མེད་ཁར་ད་དུང་ཞབས་འདྲེན་ལུང་པ་གང་ཞུས་ནས་བསྡད་ཡོད་པ་མི་སེམས་པར་ཅི་ཡིན་ན།
བོད་མི་ཡོངས་ཀྱི་རྡོག་རྩ་གཅིག་དུ་བྱས་ནས་ལས་དོན་གང་ཡིན་ཡང་སྒྲིགས་ལམ་གཅིག་གི་ཐོག་འཁུར་མཉམ་ལེན་བྱེད་ཐུབ་པ་ཡིན་ན་ཉི་མ་ཤར་བའི་རེ་བ་ཡོད།
བོད་རིགས་སྤུན་ཟླ་རྣམ་པ་ལགས་སུ་ཆེད་ཞུ། ལོ་གསར་ལ་དགའ་སྟོན་མ་བྱེད་བ་ཙམ་གྱི་ཕན་ཐུབ་གང་ཡང་མི་མཐོང་བས། དེ་ལས་ལོ་གསར་དང་སྟབས་བསྟུན་ཏེ་ལས་འགུལ་ཞིག་སྤེལ་ཐུབ་ན་གང་འདྲ་འདུག་གམ།