ཞོགས་པ་སྔ་བོ་རླངས་འཁོར་ནང་གི་སྐུ་མགྲོན་ཚང་མ་ཟ་ཁང་ཆུང་ཆུང་མང་བོ་ཡོད་སའི་ལམ་བར་ཞིག་ནས་ཞོགས་ཇ་འཐུང་རྒྱུར་ཁ་ལོ་བའི་བཤད་པ་ལྟར། བློ་བཟང་དང་བན་སྡེ་འཚོ། ད་དུང་། ཕ་བུ་གཉིས་དང་བྱིས་པ་གཉིས་བཅས་ཁོང་ཚོ་མི་དྲུག་ལྷན་དུ་ཟ་ཁང་ཞིག་གི་ནང་དུ་ཅོག་རྩེ་གཅིག་གི་སྒང་དུ་བསྡད་དེ་ཞོགས་ཇ་བསྔགས། ཞོགས་ཇ་ནི་ཧ་ཅང་སྟབས་བདེ་བོ་ཡིན་པ་མ་ཟད། གོང་ཡང་དེ་འདྲའི་ཆེན་པོ་ཞིག་མ་རེད་འདོད་མཁན་དེ་ནི་བློ་བཟང་ཁོ་རང་རེད།
ཞོགས་ཇ་འཐུང་ནས་རྩིས་རྒྱག་རན་ཁར་བློ་བཟང་གིས་ལག་པ་སྔོན་དུ་སླེབས་ནས་ཁོང་ཚོ་ཚང་མའི་ཞོགས་ཇའི་རིན་པ་ཁོ་རང་གིས་སྤྲད་དུས་སུ། ཕ་བུ་གཉིས་ཀྱིས། ཁྱེད་རང་ལ་དཀའ་ལས་གཏད་སོང་ཟེར་ནས་ཁ་ཡག་ཞིག་བཤད་དུས་སུ། བན་སྡེ་འཚོས་ཟུར་ནས་གང་ཡང་མི་བཤད་པར་ཁ་རོག་གེར་བསྡད། ཕྱིར་རླངས་འཁོར་ནང་དུ་འབྱོར་དུས་སུ། བན་སྡེ་འཚོས་བློ་བཟང་ལ་ཁྱེད་རང་དེ་འདྲ་བྱེད་དགོས་ཀྱི་མ་རེད། མི་ཚང་མས་ཟས་རིན་ཁྱེད་རང་གིས་སྤྲད་ན་འགྲིག་གི་མ་རེད། འདི་་་་ ང་རང་གིས་ཟས་རིན་དེ་ལེན་རོགས་ཟེར་ནས་རྒྱ་སྒོར་བཅུ་ལོ་ཞིག་ཁོ་ལ་གཏད་དུས། བློ་བཟང་གིས་གདོང་ལ་འཛུམ་ཞིག་སྟོན་ཞོར་དུ། བོད་རིགས་གཅིག་པ་རེད་མོད། ཐེངས་གཅིག་ལ་སྐྱོན་ནི་མ་རེད་ཟེར་ནས་བན་སྡེ་འཚོས་སྐད་ཆ་དེར་ངེས་ལེན་མ་བྱས།
རླངས་འཁོར་ག་ལེར་གོར་མོའི་ཕྱོགས་སུ་བསྐྱོད་མགོ་བརྩམས་པ་དང་བློ་བཟང་དང་བན་སྡེ་འཚོ་གཉིས་ཀྱིས་ཀྱང་གཞི་ནས་འདང་ནུབ་ཀྱི་སྐད་ཆ་དེ་དག་གི་འཕྲོར་མཐུད།
བན་སྡེ་འཚོས། བློ་བཟང་ཁྱེད་རང་ལྷ་སར་གང་བྱེད་དུ་སོང་བ་ཡིན། ཚོང་འདྲ་རྒྱག་གི་ཡོད་ནི་མིན་ན་ཞེས་གཏིང་འདྲི་ཞིག་བྱས་དུས་སུ། བློ་བཟང་གིས་བསམ་བློ་ཞིག་གཏོང་བཞིན། སྐད་ཆ་དྲང་མོ་བཤད་པ་དེར་སྐྱོན་མི་འདུག་སྙམ་གྱིན། ང་རང་ལྷ་སར་སོང་བ་དེ་འདྲ་གང་ཡང་མིན། ང་རང་རྒྱ་གར་ནས་ཡོང་བ་ཡིན། ལྷ་ས་ནས་ཉིན་གསུམ་མ་གཏོགས་འདུག་ཁོམ་མ་བྱུང་། ཕ་མ་ཚོས་མགྱོགས་པོ་ཡོང་རོགས་ཟེར་བས་ནང་དུ་ལོག་བཞིན་ཡོད།
བན་སྡེ་འཚོས་བློ་བཟང་གི་སྐད་ཆ་དེ་གོ་བ་དང་ཅུང་ཧ་ལས་པའི་རྣམ་འགྱུར་དང་བཅས་དེ། དེ་འདྲ་ཞིག་ཡིན་ས་རེད། ངས་ཁ་སང་ཁྱེད་རང་ཐོག་མར་མཐོང་དུས་སུ། རྒྱ་ཞིག་རེད་བསམ་སོང་ལ། གོན་པ་གོན་སྟངས་ཀྱང་མི་འདྲ་བ་ཞིག་འདུག ཁྱེད་རང་དངོས་ནས་མི་ལས་ཅན་ཞིག་རེད། རྒྱ་གར་ནས་ལོ་ག་ཚོད་ཅིག་བསྡད་པ་ཡིན་ཟེར་ནས་དྲིས།
བློ་བཟང་གིས་ང་རང་རྒྱ་གར་དུ་སོང་ནས་ལོ་ངོ་བཞི་ཙམ་ཞིག་ཕྱིན་འདུག ཨ་མས་ཡང་ཡང་ནང་དུ་ལོག་རོགས་ཟེར་བས་ངོ་ལྡོག་མ་ཐུབ་པར་ཕྱིར་ཡོང་བ་ཡིན།
བན་སྡེ་འཚོས། ཨོ་རེད། དེས་ན་ད་ཁྱེད་རང་གིས་༧རྒྱལ་བ་རིན་པོ་ཆེ་ཚང་ལ་ཐེངས་མ་ག་ཚོད་ཅིག་མཇལ་རྒྱུ་རེག་སོང་། ཁོང་ཚང་བདེ་བོ་རེད་དམ་ཟེར་ནས་དྲིས་དུས། བློ་བཟང་གི་ཤ་གསེང་རུས་གསེང་ནས་འདར་སུག་ཞིག་རྒྱག་ཞོར་དུ། རེད་རེད། ཁོང་ཚང་བདེ་མོ་རེད། ང་རང་༧རྒྱལ་བ་རིན་པོ་ཆེ་ཚང་ལ་དངོས་སུ་ཐེངས་གཅིག་ཙམ་མཇལ་བ་ཡིན། འོན་ཀྱང་། གསུང་ཆོས་ཁ་ཤས་ལ་བཅར་མྱོང་ཡོད།
བན་སྡེ་འཚོས། ཁྱེད་རང་སློབ་གྲྭར་སོང་བ་ཡིན་རྒྱུ་རེད། དབྱིན་ཡིག་ཡག་པོ་ཤེས་ཀྱི་ཡོད་དམ་ཟེར་ནས་དྲིས་དུས། བློ་བཟང་ལ་རང་དབང་མེད་པར་ཕྱིར་དྲན་ཞིག་གི་སྒོ་མོ་ཕྱེ་རུ་བཅུགས།
བློ་བཟང་གིས། རེད་རེད། ང་སློབ་གྲྭ་ཞིག་ལ་སོང་བ་ཡིན། སློབ་གྲྭའི་མིང་ལ་ཤེས་རབ་དགའ་ཚལ་སློབ་གླིང་ཟེར་བ་རེད། དེ་རུ་བོད་ནས་ཡོང་བའི་ལོ་ན་བཅུ་བདུན་སྒང་དུ་སླེབས་པ་ཚོ་འགྲོ་ཡུལ་རེད། ང་རང་ལ་སྐྱེན་ཞིག་དང་འཕྲད་དེ་སློབ་གྲྭ་ནས་ཡུན་རིང་འདུག་ཐུབ་མ་སོང་བ་མ་ཟད། དབྱིན་ཡིག་ཡང་ཡག་པོ་སྤྱང་ཐུབ་མ་སོང་ལ། དབྱིན་སྐད་ཀྱང་ཤེས་ཀྱི་མེད་ཅེས་ལན་བཏབ།
བན་སྡེ་འཚོས། དེས་ན་ཁྱེད་རང་བོད་དུ་ཕྱིར་ལོག་ནས་ལས་ཀ་ག་རེ་བྱེད་རྩིས་ཡོད་དམ་ཟེར་ནས་དྲིས་དུས། བློ་བཟང་གིས་རང་གི་དམིགས་ཡུལ་དེ་དག་བན་སྡེ་འཚོ་ལ་མ་གསང་བར་དྲང་མོ་བཤད།
བན་སྡེ་འཚོས། བློ་བཟང་གི་དམིགས་ཡུལ་དེར་ཡིད་སྨོན་བྱས་པ་དང་། དངོས་ནས་དྲང་གནས་ཀྱི་བསམ་བློ་ཡག་པོ་རེད་ཅེས་བསྟོད་བསྔགས་ཀྱང་བྱས་དུས་སུ། བློ་བཟང་གིས་དེ་ནི་ང་རང་གི་དམིགས་ཡུལ་ཞིག་ལས་འགྲུབ་ཐུབ་མིན་དེ་ནི་རང་གི་ནང་མི་དག་ལ་བསྟེན་དགོས་དུས། ད་དུང་བཤད་མི་ཤེས་པར་གླེང་།
བན་སྡེ་འཚོས་སྐད་ཆ་དེ་གོ་བ་དང་། དེས་ན་གལ་སྲིད་ཁྱེད་རང་གིས་དམིགས་ཡུལ་དེ་མ་འགྲུབ་པ་ཡིན་ན་ཕྱིར་རྒྱ་གར་དུ་འགྲོ་རྒྱུ་ཡིན་ནམ། ཡང་ན། ཕ་ཡུལ་དུ་འདུག་རྩིས་ཡིན་ཞེས་དྲིས་དུས་སུ། བློ་བཟང་གིས་ང་རང་གི་རེ་བ་ནི་དམིགས་ཡུལ་དེ་འགྲུབ་རྒྱུ་དེ་ཡིན་མོད། འོན་ཀྱང་། ལམ་འགྲོ་མ་བྱུང་བ་ཡིན་ན་ནི། ཕ་མ་དག་གི་རེ་བ་ལྟར་ཕ་ཡུལ་ནས་བསྡོད་པ་ལས་ཐབས་ཤེས་གང་ཡོད་ཅེས་བཤད།
སྐབས་དེ་འདྲ་ཞིག་ལ། བན་སྡེ་འཚོས་རླངས་འཁོར་གྱི་སྒེའུ་ཁུངས་ནས་ཕྱི་ལ་བལྟ་བ་ལས་དྲི་བ་གཞན་གང་ཡང་མ་དྲིས་པར་ཁུ་སིམ་མེར་སོང་དུས། བློ་བཟང་གིས་ཁྱེད་རང་སྐུ་འབུམ་དགོན་པར་མཇལ་ཨེ་མྱོང་ཟེར་བའི་དྲི་བ་ཞིག་གློ་བར་དུ་ངག་ལས་ཤོར་བ་དེས་ཁོ་གཉིས་ལ་སླར་ཡང་ཁ་བརྡ་ཞིག་གི་མགོ་བཙུགས།
མཇལ་འདོད་ཡོད་དམ།
མཇལ་འདོད་ཡོད། འོན་ཀྱང་། ང་རང་གཅིག་བུ་འགྲོ་རྒྱུར་སྐྲག་གི
དེས་ན་ངས་ཁྱེད་རང་ལ་འགྲོ་རོགས་བྱས་ན་ག་འདྲ་འདུག
དེ་འགྲིག་གི་མ་རེད། ཁྱེད་རང་ལ་ཕ་མ་དག་གིས་སྒུག་ཡོད་པ་རེད།
ཉིན་གཅིག་ལ་ཁྱད་པར་ཡོད་པ་མ་རེད།
གཅིག་བྱས་ན་ཉིན་གཅིག་ཀྱང་དལ་འགོར་བྱེད་མི་དགོས་ན་ཐང་མོད། ང་སྔོན་ཆད་བོད་དུ་ཡོད་དུས་སུ་ཟི་ལུང་ནས་ཐད་ཀར་ཀ་ཅུ་{ཀ་ཅུ་ཟེར་བ་འདི་ནི་ཁ་ཆེ་མང་སའི་གྲོང་ཁྱེར་ཞིག་གི་མིང་རེད}ལ་འགྲོ་མཁན་གྱི་རླངས་འཁོར་ཉིན་གུང་ཡང་ཡོད་པ་རེད། དེ་འདྲ་ཡིན་དུས། གོར་མོ་སླེབས་མ་ཐག མེ་འཁོར་ནང་དུ་ཟི་ལུང་ལ་སོང་བ་ཡིན་ན། ཞོགས་པ་སྔ་བོ་ཟི་ལུང་དུ་འབྱོར་མ་ཐག ཐད་ཀར་སྐུ་འབུམ་ལ་མཇལ་དུ་སོང་། དེ་ནས་ཕྱིར་ཡོང་ནས་རླངས་འཁོར་ཞིག་བཙལ་ནས་ཤར་རྒྱུགས་སོང་ན་འགྲིག་གི་རེད། ཁྱེད་རང་ལ་དངོས་ནས་མཇལ་འདོད་ཡོད་ན་ངས་རོགས་བྱེད་ཆོག་བཅས་བཤད།
བན་སྡེ་འཚོས། ངོ་མ་བཤད་ན་ང་རང་ལ་མཇལ་འདོད་འདུག ཡིན་ཡང་། ཁྱེད་རང་ལ་དཀའ་ལས་གཏད་ན་འགྲིག་གི་མ་རེད་ཅེས་འཁང་ཆུང་གིས་ཚུལ་དུ་བཤད། བློ་བཟང་གིས། དེ་ལ་དཀའ་ལས་ཀྱང་ཡོད་པ་མ་རེད། ངས་འགྲོ་ཞོར་གྱི་ལམ་ཁ་རེད་ཟེར་ནས་ཁོ་གཉིས་གོར་མོ་ནས་མེ་འཁོར་ལ་འགྲོ་རྒྱུ་བྱས་པ་དང་། ཟི་ལུང་ལ་འབྱོར་མ་ཐག སྐུ་འབུམ་ལ་འགྲོ་རྒྱུའི་ཐག་བཅད།
མུ་འགོད།
ཁོམ་དུས་ཁོམ་དུས་ཡོང་གི་བསྡོད། བསམ་ཚུལ་བཟང་ངན་གང་ཡིན་་གསུང་གི་བསྡོད།
ཧ་་ཧ་་་་་་་་་་དེ་རིང་ད་ང་ཁྱོད་ཀྱི་སྐུ་མགྲོན་ཐོག་མ་ཡིན་ད། ཇ་ཞིམ་པོ་ཞིག་སྐོལ། ཨོ་ཨོ་་་ རེད། དེ་རིང་འཐུང་ཁོམ་མ་བྱུང་བས་རྗེས་སུ་དལ་མོར་ཡོང་གི་ཡིན།
དེ་རིང་ད་ང་ཁྱོད་ཀྱི་སྐུ་མགྲོན་ཐོག་མ་ཡིན་ད། ཇ་ཞིམ་པོ་ཞིག་སྐོལ། ཨོ་ཨོ་་་ རེད། དེ་རིང་འཐུང་ཁོམ་མ་བྱུང་བས་རྗེས་སུ་དལ་མོར་ཡོང་གི་ཡིན།