བན་སྡེ་འཚོས་གཟུགས་པོ་ཞིག་དཀྲུས་རྗེས་མེ་ལོང་ཆེན་པོ་དེ་ཡི་ཟུར་ནས་སྐྲ་རིང་བོ་དེ་ཤད་ཀྱིན་བརྙན་འཕྲིན་ལ་བལྟ་ཞོར་དུ། བློ་བཟང་ལ་ཁྱེད་རང་གིས་གཟུགས་པོ་མི་དཀྲུ་ནས་ཞེས་དྲིས་དུས། བློ་བཟང་གིས་སྨྱུ་གུའི་རྩེ་མོར་སོ་འདེབས་ཀྱིན། མིན། ཅུང་ཙམ་རྗེས་སུ་ང་རང་གདོང་པ་ཞིག་དཀྲུ་རུ་འགྲོ་ངེས་ཡིན། ཁྱེད་རང་གིས་སྒོ་བརྒྱབ་ན་འགྲིག་གི་ཡོད་ཅེས་བཤད།
ཉིན་ཐོ།
ཉིན་ཐོ་ཟེར་ན་ཅི་རེད།
བློ་བཟང་ཅུང་ཡ་མཚར་ཞོར་དུ། ཁྱེད་རང་གིས་དངོས་ནས་ཤེས་ཀྱི་མེད་ན་ཟེར་ནས་ཉིན་ཐོའི་སྐོར་ལ་འགྲེལ་བཤད་ཐུང་ཐུང་ཞིག་བྱས་པ་དང་། དེ་ནས་གོན་པ་ཡང་མ་འཕུད་པར་རང་གིས་ཉལ་ཁྲིའི་སྟེང་གི་ཉལ་ཐུལ་ཚུར་འཐེན་ཞོར་དུ། ཞོགས་པ་ང་རང་སྔ་བོ་བླངས་དེ་རླངས་འཁོར་འཛིན་བྱང་ཉོ་རུ་འགྲོ་ཆོག ཁྱེད་རང་ང་ཕྱིར་ཡོང་རོགས་བར་དུ་ཉལ་བསྡད་ན་འགྲིག་གི་རེད་ཅེས་བཤད་དུས། བན་སྡེ་འཚོས། ཁྱེད་རང་གིས་བརྙན་འཕྲིན་ལ་བལྟས་དེ་ཅུང་ཙམ་མི་འདུག་གམ།
ད་མི་འདུག ཁྱེད་རང་གིས་ལྟོས། སྔ་བོ་ཉལ་ན་ཡག་ས་རེད། དེ་རིང་ཡར་མར་ལ་འཆམ་ནས་ཐང་ཆད་འདུག་ཟེར་བཞིན་མགོ་བོ་ཉལ་ཐུལ་ནང་དུ་བརྒྱབ་དེ་ཉལ།
བློ་བཟང་གིས་རླངས་འཁོར་འཛིན་བྱང་གཉིས་ཉོས་དེ་སྒོར་ཁུག་ལག་པར་བསྡམ་ནས་ཁ་ཕྱིར་འཁོར་དུས་སུ། གྲྭ་རྒན་ཞིག་གིས་ལག་དུ་རྒྱ་སྒོར་ཉི་ཤུ་ལོར་ཞིག་བཟུང་དེ་ཡར་མར་ལ་བལྟ་བཞིན་པ་དེ་བློ་བཟང་གིས་མཐོང་ནས། ཨ་ཁུ་ལགས། ཁྱེད་རང་གང་དུ་འགྲོ་མཁན་ཡིན་ཟེར་ནས་དྲིས་དུས། གྲྭ་བ་དེས། ཨ་ཙི། ཁྱེད་རང་བོད་པ་ཞིག་ཡིན་ནམ། ད་དངོས་ནས་བཟང་གི ང་རང་གཅན་ཙ་ལ་འགྲོ་མཁན་ཡིན། ཁྱེད་རང་གིས་ང་ལ་རླངས་འཁོར་འཛིན་བྱང་ཞིག་ཉོ་རོགས་བྱོས་ན་འགྲིག་གི་རེད་དམ།
བློ་བཟང་གིས་འདི་ཁྱེད་རང་གི་སྒོར་ལྷག་རེད། འདི་གཅན་ཙ་ལ་འགྲོ་བའི་རླངས་འཁོར་འཛིན་བྱང་རེད། ཆུ་ཚོད་འདི་འདྲ་ཞིག་གི་སྒང་དུ་འགྲོ་མཁན་རེད་འདུག་ཟེར་ནས་གྲྭ་བ་དེར་བཤད་ཀྱིན་རང་གི་ཨམ་ཕྲག་ནང་དུ་ལག་གཉོབ་ཞིག་བྱོས་དུས། རང་གི་དངུལ་ཁུགས་མེད་པ་ཤེས་ནས། གྲྭ་བ་དེར་ཁྱེད་ཀྱིས་ང་རང་གི་རྒྱབ་ལོག་དུ་མི་འདྲ་ཡོད་པ་མཐོང་སོང་ངམ། ངའི་དངུལ་ཁུགས་མི་འདུག་ཟེར་ནས་གྲྭ་བ་དེར་སྐད་ཆ་དྲིས་དུས། གྲྭ་བ་དེས། ངས་མཐོང་མ་སོང་། ཕལ་ཆེར་ཁྱེད་རང་གིས་བསྡུ་ས་ནོར་བ་ཡིན་རྒྱུ་རེད། གཟབ་ནན་གྱིས་ལྟོས་དང་། བློ་བཟང་གིས་རང་གི་ཨམ་ཕྲག་ཚང་མས་ནང་དུ་བསྔོག་ཀྱང་རང་གི་དངུལ་ཁུགས་ནི་གཏན་ནས་མ་རྙེད།
དེ་དུས་གྲྭ་བ་དེར་ལྟ་ཞོར་དུ། སྒོར་མོ་ཁྱེར་སོང་ན་མི་སྐྱོན་མོད། ནང་དུ་ང་རང་ས་མཚམས་ལ་བསྐྱོད་ཆོག་པའི་ཐོངས་ཆེན་ལག་ཁྱེར་དང་མི་གྲངས་ལག་ཁྱེར་གཉིས་ཀ་ཡོད། ད་ཚར་སོང་བ་རེད། འགྱོད་ཀྱང་མི་ཕན་ཟེར་ཞོར་དུ་གདོང་ལ་འཛུམ་མདངས་ཤིག་བླངས་ཀྱིན། བན་སྡེ་འཚོས་གོར་མོ་ནས་བཟུང་དེ་ཁོ་རང་ལ་ཡང་ཡང་བཤད་པའི་སྐད་ཆ་དེ་དྲན། ཁྱེད་རང་གི་དངུལ་ཁུགས་དོར་མའི་ཨམ་ཕྲག་ནང་དུ་མ་བསྡུ། རྐུན་མས་བརྐུས་ཡོང་།
བློ་བཟང་ཕྱིར་མགྲོན་ཁང་དུ་འབྱོར་དུས། བན་སྡེ་འཚོས། ཅ་ལག་ཚང་མ་བསྡུ་གསོག་བརྒྱབ་དེ་ཁོ་རང་ལ་སྒུག་ནས་ཡོད་པ་མཐོང་དུས། ཁོ་རང་དགོད་ཞོར་དུ། ངའི་དངུལ་ཁུགས་རྐུ་མའི་བརྐུས་འདུག་ཞེས་བཤད་དུས། བན་སྡེ་འཚོས། ད་དེ་རེད། ངས་སྔོན་མ་ནས་ཁྱེད་རང་ལ་བཤད་ན་ཡང་ཁྱེད་རང་གིས་ཉན་མ་སོང་། ད་སེམས་ཁྲལ་མ་བྱེད། ཁྱེད་རང་གི་ཕ་ཡུལ་བར་དུ་སླེབས་བྱེད་ཀྱི་སྒོར་མོ་ཞིག་ང་རང་ལ་ཡང་ཡོད་ཟེར་ནས་བློ་བཟང་ལ་བཤད།
བློ་བཟང་གིས་སྒོར་མོ་གཅིག་བུ་མིན། སྒོར་མོ་ད་དུང་ང་རང་ལ་ཡོད། དེ་ཡི་ཕྱོགས་སུ་ཁྱེད་རང་གིས་སེམས་ཁྲལ་མ་བྱེད། སྒོར་ཁུགས་ནང་དུ་ཐོངས་ཆེན་ལག་ཁྱེར་དང་མི་གྲངས་ལག་ཁྱེར་གཉིས་ཀ་ཡོད།
སྐབས་དེར་བན་སྡེ་འཚོས། གླེན་པ་ཁྱོད། ཟེར་ནས་བློ་བཟང་གི་ཕྲག་པར་ལག་བརྡེབས་ཤིག་བྱེད་ཀྱིན། ཡ་་་ད་འགྲོ རླངས་འཁོར་རྗེས་ལུས་ཐེབས་པ་ལས་སྔ་ས་ནས་སོང་ན་བཟང་གི་རེད། གཅིག་བྱས་ན། ཁྱེད་རང་སྒོར་ཁུགས་རྐུ་མཁན་དེས་ཐོངས་ཆེན་ལག་ཁྱེར་དང་མི་གྲངས་ལག་ཁྱེར་རླངས་འཁོར་འབབ་ཚིག་ན་གཡུགས་ཡོད་ན་ཐང་།
ཀ་ཅུ་རུ་འགྲོ་བའི་རླངས་འཁོར་ནང་དུ་བུད་ནས་ཁོ་རང་གཉིས་རྐུབ་སྟེགས་གཅིག་གི་འཁྲིས་སུ་གཅིག་ཡོད་པ་དེ་འདྲ་ཞིག་ཡིན་དུས། གོར་མོ་ནས་མེ་འཁོར་ནང་དུ་ཡོང་བ་བཞིན་བར་ཐག་བཞག་ནས་བསྡོད་མི་ཐུབ་ཀྱང་། བློ་བཟང་གིས་རང་གི་ས་ནས་ཁ་རོག་གེར་བསྡད་དུས། རླངས་འཁོར་འགྲོ་བའི་འགོ་བཙུགས་མ་ཐག བན་སྡེ་འཚོས། རང་གི་ལག་པ་བློ་བཟང་གི་ལག་པའི་ནང་དུ་བཞག་ནས། ཆེས་སེམས་ཐག་ཉེ་བའི་སྙིང་གི་གྲོགས་པོ་ཞིག་གི་ངང་ཚུལ་དེས། བློ་བཟང་གི་སེམས་པ་འཁྲུགས་དུ་བཅུགས།
བློ་བཟང་གིས། ད་འབུ་ཚེ་གཟད་གྲོག་ཚང་སྒོ་ཟེར་བ་དེ་ཅི་མ་བདེན་སྙམ་ཞོར་དུ། མ་ཤེས་ཁུལ་བྱས་ནས་ཁོ་མོའི་ལག་པ་ལ་དམ་པོར་བསྡམ་ནས་བསྡད། དེ་དུས་བན་སྡེ་འཚོས་ག་ལེར་གཉིད་ཁུལ་བྱེད་ཞོར་དུ་རང་གི་མགོ་བློ་བཟང་གི་ཕྲག་སྟེང་དུ་བཞག་ནས་མིག་བཙུམ་པ་རེད།
ཆུ་ཚོད་ཁ་ཤས་ཤིག་གི་རྗེས་སུ། བན་སྡེ་འཚོས། བློ་བཟང་ལ་ཁྱེད་རང་ཀ་ཅུ་རུ་སླེབས་མ་ཐག ཕ་ཡུལ་དུ་ལོག་འགྲོ་ངེས་ཡིན། དེ་རིང་ཀ་ཅུ་ནས་ལག་སྐྱེས་རེ་ཉོས་དེ་སང་ཉིན་འགྲོ་རྒྱུ་ཡིན་ཞེས་དྲིས་དུས། བློ་བཟང་གིས་ཁྱེད་རང་ཀ་ཅུ་ནས་བསྡོད་རྩིས་ཡོད་དམ་ཞེས་ཕར་དྲི་བ་གཅིག་པ་ཞིག་དྲིས་དུས། མོ་རང་གིས་མགོ་བོ་ཅུང་དམའ་རུ་འཛིན་བཞིན། ཁྱེད་རང་བསྡད་འདོད་ཡོད་ན་ངས་ཁྱེད་རང་ལ་རོགས་པ་བྱེད་ཆོག་ཞེས་བཤད།
མུ་འགོད།
རྐུན་མ་དུ་རང་མིན་པར་སྨོན།
བཀླགས་ཟིན་ཡག་པོ་འདུག་རྐུན་མིན་ན་དེ་བས་ཀྱང་ཡག་གི་ལོ