ཀ་ཅུ་རུ་འབྱོར་མ་ཐག བློ་བཟང་གིས་འུ་གཉིས་ལ་མི་གྲངས་ལག་ཁྱེར་མེད་པས་ད་ནི་མགྲོན་ཁང་ཡག་པོ་ཞིག་གི་ནང་དུ་ཐོ་འགོད་བྱེད་དཀའ་བས། ངེད་གཉིས་སྒེར་བའི་མགྲོན་ཁང་ཞིག་འཚོལ་དུ་འགྲོ མགྲོན་ཁང་ལག་དུ་རེག་སོང་བ་ཡིན་ན་དེ་ནས་ཅ་ལག་རེ་ཉོ་རུ་འགྲོ་ཞེས་བཤད་དུས། བན་སྡེ་འཚོས། ང་རང་ལ་ལས་ཀ་བྱེད་སའི་ལས་བྱེད་ཡིན་པའི་དབང་རྟགས་ལག་ཁྱེར་ཞིག་ཡོད། ཕལ་ཆེར་དེས་འུ་གཉིས་ལ་ཐོ་འགོད་བྱེད་ཐུབ་རྒྱུ་རེད།
བློ་བཟང་གིས་དེས་ན་བཟང་གི ཕར་ཕྱོགས་ཀྱི་མགྲོན་ཁང་དེ་ནི་བལྟས་ཚོད་ལ་མགྲོན་ཁང་གཙང་མ་ཞིག་རེད་འདུག འུ་གཉིས་དེ་རུ་འགྲོ་ཟེར་ནས་དེ་ཡི་ཕྱོགས་སུ་འགྲོ་རྩིས་བྱོས་དུས། བན་སྡེ་འཚོས། མགྲོན་ཁང་དེ་ནི་ཕལ་ཆེར་གོང་ཆེན་པོ་ཡོད་རྒྱུ་རེད། འུ་གཉིས་མགྲོན་ཁང་བརྫིག་པོ་ཞིག་གི་ནང་དུ་བསྡོད་དགོས་དོན་ཡོད་པ་མ་རེད། ཁྱེད་རང་གིས་དངུལ་ཁུགས་བོར་བའི་སྒང་ལ། ད་དུང་། འདི་ནས་མགྲོན་ཁང་འདི་འདྲ་ཞིག་གི་ནང་དུ་བསྡད་པ་ཡིན་ན། ཁྱེད་རང་གི་ནང་མི་ཚོར་ལག་སྐྱེས་འདྲ་ཉོ་དགོས་པ་མ་ཡིན་ནམ། དེ་ལས་གཞན་ཞིག་དུ་འགྲོ་ཟེར་ནས་འགྲོ་རྩིས་བྱས།
བློ་བཟང་གིས། སྐྱོན་ནི་མ་རེད། ང་རང་གིས་སྒོར་ཁུགས་བོར་སོང་རུང་། འུ་གཉིས་འདི་ནས་ཞག་མ་གཅིག་བསྡད་པ་དེར་མི་སྐྱོན། ད་ལྟ་ང་ལ་སྒོར་རྡོག་ཁ་ཤས་ཤིག་ཡོད། ནང་མི་དག་ལ་ལག་སྐྱེས་ཉོ་བྱེད་ཀྱང་འདང་ངེས་ཡིན་ཟེར་ནས་ཁོ་མོར་དེ་རུ་ཐོ་འགོད་བྱེད་དུ་ཨུ་ཚུགས་ཀྱིས་བསྔགས།
ཅུང་མ་འགོར་བར་བན་སྡེ་འཚོ་ཕྱིར་ཡོང་ནས། མི་གཅིག་ལ་རྒྱ་སྒོར་ལྔ་བཅུ་དགོས་ཟེར་གྱི་འདུག དངོས་ནས་གོང་ཆེན་པོ་རེད། དེ་ལས་འུ་གཉིས་གཞན་ཞིག་ལ་འགྲོ མགྲོན་ཁང་གོང་ཆེན་པོ་དེ་འདྲ་ཞིག་ལ་བསྡད་ནས་ཅི་བྱེད་ཅེས་བཤད་དུས། བློ་བཟང་གིས་འུ་གཉིས་འགྲོ་ལ་་གཅིག་བལྟ། ནང་གི་ཆ་རྐྱེན་ཡག་ན། མི་གཅིག་ལ་རྒྱ་སྒོར་ལྔ་བཅུ་ཡིན་ན་སྐྱོན་ནི་མ་རེད་ཅེས་བན་སྡེ་འཚོའི་ལག་མགོར་འཇུས་དེ་ཕྱིར་མགྲོན་ཁང་དེ་ཡི་ནང་དུ་འཛུལ།
བན་སྡེ་འཚོས། བློ་བཟང་། ང་ཚོང་ར་ཆེན་མོ་འདི་ལ་སྔོན་ཆད། གྲོང་ཁྱེར་འདིས་ཉེ་ས་ཞིག་ནས་འོ་མ་བཟོ་གྲྭ་ཞིག་གི་ནང་དུ་ལས་ཀ་བྱེད་སྐབས་སུ། ཐེངས་མ་ཁ་ཤས་ཤིག་ལ་ཡོང་མྱོང་ཡོད། འདི་ན་དངོས་ནས་བྱིས་པ་ཚོར་ལག་སྐྱེས་འདྲ་ཉོ་དགོས་རྒྱུ་འདྲ་ཡོད་ན་སྙིང་རྗེ་དེ་འདྲ་ཡོད་ཟེར་ནས་བཤད་ཞོར་དུ། ཚོང་ར་ཆེན་མོ་དེ་ཡི་སྒོ་ཆེན་ནང་དུ་ཡར་སོང་།
བློ་བཟང་གིས། བན་སྡེ་འཚོ། གོན་པ་དེ་དངོས་ནས་ཁྱེད་རང་ལ་འཚམ་པོ་འདུག་ཟེར་ནས་དེང་རབས་གྱོན་ཆོས་གསར་པ་ཆ་འགྲིག་ཞིག་ལ་མཛུབ་མོ་བཙུགས་དུས། བན་སྡེ་འཚོས། ང་རང་ལ་དེ་འདྲ་འཛའ་ནི་མ་རེད་ཅེས་འཁང་ཆུང་གིས་ལན་བཏབ་དུས། བློ་བཟང་གིས་ཚོང་བདག་མ་རྒྱ་མོར་དེར་བཤད་ནས། གོན་པ་དེ་བན་སྡེ་འཚོ་ལ་ཚོད་ལྟ་བྱེད་དུ་བཅུགས།
བན་སྡེ་འཚོས། ཁྱེད་རང་ལ་དངོས་ནས་དཀའ་ལས་གཏད་པ་མང་དྲགས་སོང་། ཁྱེད་རང་གིས་དེ་འདྲ་བྱས་ན་ང་རང་བདེ་བོ་མི་འདུག་ཟེར་བཞིན། ཁོ་གཉིས་ཀྱིས་བློ་བཟང་གི་ནང་མི་ལ་སྤྲོད་རྒྱུའི་ལག་སྐྱེས་མི་ཉུང་བ་ཞིག་ཉོས་པའི་ཞོར་དུ། བན་སྡེ་འཚོ་ལ་ཡང་། དབྱར་ལྭ་ཆ་ཚང་ཞིག་གི་སྤྱིན་བདག་བློ་བཟང་གིས་བྱས།
བློ་བཟང་གིས། བན་སྡེ་འཚོས་ཆེས་དགའ་བའི་ཟ་མ་ནི། ཆུ་མོག་བཙོས་མ་ཡིན་པ་ཤེས་ཡོད་སྟབས། ཁོ་གཉིས་ཀྱིས་ཆུ་མོག་རྒྱ་མ་གཅིག་དང་ཕྱེད་ཀ ད་དུང་ཟས་རིགས་མི་ཉུང་བ་ཞིག་དང་། འཐུང་ཆུ་མངར་མོའི་རིགས་ཁ་ཤས་ཤིག བློ་བཟང་གིས་རང་ཉིད་ལ་ཐ་མག་སྒམ་ཆུང་གཉིས་བཅས་ཉོས་དེ་ཕྱིར་མགྲོན་ཁང་དུ་འབྱོར་དུས། ཕྱི་དྲོའི་ཆུ་ཚོད་དྲུག་པ་ཟིན་ཡོད་པ་རེད།
བློ་བཟང་གིས་གཟུགས་པོ་ཞིག་དཀྲུས་དེ། ཕྱིར་ཡོང་ནས་རང་གི་ཉལ་ཁྲིའི་སྟེང་ནས་ཟི་ལུང་ནས་ཉོས་པའི་གངས་རྒྱན་མེ་ཏོག་གི་དེབ་གསར་བ་ཁ་ཤས་ཤིག་དང་། སྒྲུང་རྩོམ་གསར་བ་གླུ་འབུམ་མི་རྒོད་ཀྱི་དེབ་དེ་དག་རྒྱབ་ཁུག་ནས་ཕྱིར་བཏོན་ནས། གླུ་འབུམ་མི་རྒོད་ཀྱི་སྒྲུང་རྩོམ་ཀློག་མགོ་བརྩམས་དུས། བན་སྡེ་འཚོས། བརྙན་འཕྲིན་ལ་བལྟ་ཞོར་དུ། ཁྱེད་རང་གིས་ཀློག་བཞིན་པའི་དེབ་དེ་ཅི་ཞིག་གི་སྐོར་རེད་ཅེས་དྲིས།
བློ་བཟང་གིས། འདི་ནི་སྒྲུང་གཏམ་རེད། ཁྱེད་རང་གིས་ཉན་འདོད་ན། ངས་ཁྱེད་རང་ལ་ཀློག་ཆོག འདིར་ཤོག་དང་ཟེར་ཞོར་དུ་རང་གི་ཉལ་ཁྲིའི་སྟེང་ནས་ཕར་ནུར་ཙམ་བྱས་དུས། བན་སྡེ་འཚོས་ཀྱང་། རེད་རེད། དངོས་ནས་ཉན་འདོད་འདུག་ཞེས་ཁོ་རང་གི་ཉལ་ཁྲིའི་ཟུར་དུ་བསྡད།
མུ་འགོད།
དེས་རྗེས་ལ