སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} ང་གསུམ།

བློ་བཟང་གིས་ཕ་རྒན་གྱི་གདོང་ལ་ལྟ་ཙམ་ཞིག་བྱེད་པ་ལས། མོ་ཡག་བཙོག་གང་ཡང་མ་དྲིས་པ་མ་ཟད། ཕ་རྒན་གྱིས་ཀྱང་དེ་ཡི་སྐོར་གང་ཡང་མ་བཤད་པར། ཁྱེད་ཚོས་ང་ལ་སྒུག་དགོས་ནི་མ་རེད། ཡ་ད་འཐུང་ཟེར་ཞོར་དུ་བློ་བཟང་གི་འཁྲིས་ཀྱི་རྐུབ་སྟེགས་སྟེང་དུ་བསྡད། ནུ་མོ་མཚོ་མོ་སྐྱིད་ཀྱིས་ཨ་ཕ་ཁྱོད་གང་ང་སོང་བ་ཡིན། ང་ཚོ་རྔན་པ་འདྲ་ཉོས་ཨེ་ཡོད་ཅེས་བཤད།

ནུབ་ཚལ་འཐུང་ཚར་རྗེས་སུ། ནུ་མོ་མཚོ་མོ་སྐྱིད་དང་། ཚ་བོ་རྡོ་རྗེ་རྒྱལ་གཉིས་ཀྱིས་འཚང་ཁ་བྱེད་ཞོར་དུ། དོ་ནུབ་ང་ཕུ་བོ་བློ་བཟང་མཉམ་དུ་ཉལ་རྒྱུ་ཡིན་ཟེར་ནས་གཉིས་ཀ་བློ་བཟང་གི་ཉལ་སའི་ནང་དུ་འཛུལ། བློ་བཟང་གིས། དགོད་ཞོར་དུ། འགྲིག་གི་རེད། ང་ཚོ་ཚང་མ་མཉམ་དུ་ཉལ་་་

ནུ་མོ་དང་ཚ་བོ་གཉིས་གཉིད་རྗེས་སུ། ཨ་མ་སྒྲོལ་མ་འཚོས་བློ་བཟང་དང་ཕ་རྒན་འཇིགས་གྲོལ་གཉིས་ལ་ཇ་ཞིག་བལྡུག་ཞོར་དུ། འཇིགས་གྲོལ་དེ་རིང་ཞི་ལུའི་དོན་དག་དེ་ག་འདྲ་འདུག་ཟེར་ནས་དྲིས་དུས། བློ་བཟང་གིས་རང་གི་ཕ་རྒན་གྱིས་གདོང་ལ་བལྟས་དེ་ག་རེ་བཤད་ཡོང་བསམ་ནས་བསྡད།

ཕ་རྒན་འཇིགས་གྲོལ་གྱིས། ཨ་ལགས་ཚང་གིས་ཕྱག་མོ་ཡིན་ན་གཏན་ནས་ཡག་པོ་མི་འདུག དཔེར་ན། ཆུ་ཁའི་ཤིང་ལེབ་སྟེང་དུ་བསྡོད་པ་དང་གཅིག་པ་རེད། བརྟན་པོ་མི་འདུག་གསུངས་སོང་། གལ་ཏེ། བཟའ་ཚང་བྱེད་རྒྱུ་ཡིན་ཟེར་ན་ནི། བཀའ་འགྱུར་ཆ་ཚང་ཞིག བསྟན་འགྱུར་ཆ་ཚང་ཞིག་སྐུ་རིམ་ལ་འབབ་འདུག ད་ཁྱེད་རང་གིས་ལྟོས། ངས་བསམ་ན། ཨ་ལགས་ཚང་གི་གསུངས་པ་དེ་ནོར་ནི་མ་རེད་འདོད་ཀི

བློ་བཟང་གིས་གདོང་གཤིས་ཕྲན་པུ་ཞིག་འགྱུར་ནས། གལ་སྲིད་དེ་འདྲ་ཞིག་ཡིན་ན་ནི། ངེད་གཉིས་ལ་རེ་བ་མེད་པ་འདྲ། ངས་ཚེ་ཐོག་འདིར་དངོས་ནས་ཕ་མ་གཉིས་ལ་ངོ་གནོང་དགོས་པའི་བྱ་བ་མང་བོ་ཞིག་བྱས་མྱོང་ཡོད་པ་རེད་ལ། སྔོན་ཆད་ཁྱེད་གཉིས་ལ་སྐད་ཆ་མ་དྲིས་པར་བྱ་བ་མང་བོ་ཞིག་རང་ཐག་རང་གིས་བཅད་དེ་ཕྱིན་པ་རེད། ད་ནས་བཟུང་། ངས་གཏན་ནས་དེ་འདྲ་བྱེད་འདོད་མི་འདུག ཚེ་གཅིག་གི་ཕ་མ་རེད། ཚེ་ཕྱི་མ་ཟེར་ན་དཀའ་མོ་རེད། ཚེ་འདི་ནས་ཁྱེད་གཉིས་ཀྱི་སེམས་ལ་སྡུག་ཡང་བསྐྱར་མི་འཇོག དེ་ཡིན་དུས་ང་རང་ཕྱིར་རྒྱ་གར་དུ་འགྲོ་འདོད་འདུག གལ་སྲིད་ཁྱེད་གཉིས་ཀྱིས་ང་རང་གཏོང་གི་མིན་ཟེར་ན་ང་རང་འདི་ནས་བསྡད་ཆོག འོན་ཀྱང་། མི་རིང་བར་ང་རང་རྒྱ་འདི་བ་ཚང་གི་ཁྲིམས་ཁང་ནང་དུ་འགྲོ་དགོས་པ་ནི་དངོས་བརྟན་འཁེལ་བ་ཡིན་སོགས་རང་གི་སེམས་ནང་གི་འདོད་པ་དག་ཞིབ་དུ་ཕ་མ་གཉིས་ལ་ཞུས་པ་རེད།

དེ་དུས་མ་རྒན་སྒྲོལ་མ་འཚོས། དངོས་ནས་ཞི་ལུའི་བཤད་པ་བདེན་པ་རེད། འདི་ནས་རྒྱ་རྒན་འདི་བ་ཚང་གིས་ཁྱེད་རང་ཁྲིམས་ཁང་དུ་བཅུགས། ཁྱེད་རང་གི་ལུས་སྡུག་མྱོང་། ངེད་ཚོས་སེམས་སྡུག་མྱོང་། རང་གཞན་གཉིས་ཀ་སྡུག་ལ་སྤྱོར་བ་ལས། ཁྱེད་རང་གི་འདོད་པ་ལྟར། ནུ་མོ་མཚོ་མོ་སྐྱིད་ཁྲིད་དེ་ཕྱིར་རྒྱ་གར་དུ་སོང་ན་འགྲིག་གི་རེད། དངོས་ནས་བྱས་ན། བཟའ་ཚང་བཀང་བོ་ཟ་རྒྱུ་ཁམ་བཀང་མ་གཏོགས་མེད་ཀྱང་ལྷན་དུ་འཛོམ་ནས་བསྡད་ན་སྐྱིད་པོ་འདུག་ན་ཡང་། དེ་ལས་ཁྱེད་རང་གི་མི་ཚེ་གལ་ཆེན་པོ་ཡིན་པ་རེད། ནུ་མོ་མཚོ་མོ་སྐྱིད་ཁྲིད་དེ་འགྲོ་རྒྱུ་ཡིན་ཟེར་ན་དངོས་ནས་སེམས་ཀྱི་ལོངས་དཀའ་མོ་ཞིག་རེད། ལྷག་པར་དུ། སྡེ་བའི་ནང་གི་མི་ཚོས། ཁོང་ཚང་གི་ཞི་མོ་མིན་སྟབས་ཁ་སྐོར་བ་རེད་ཟེར་ནི་རེད་ཅེས་བཤད།

བློ་བཟང་གིས། ཨ་མ་ལགས། ངས་ཀྱང་མཚོ་མོ་སྐྱིད་ཀྱི་མ་འོངས་པ་བསམ་ནས་འདི་ཁྲིད་རྒྱུའི་ཕྱོགས་སུ་བསམ་བློ་བཏང་བ་ཡིན། ད་ལྟ་མོ་རང་ལོ་ཆུང་ཆུང་རེད། རྒྱུ་མཚན་གསལ་བོ་ཤེས་ཀྱི་ཡོད་པ་མ་རེད། དེ་ཡིན་དུས་ཆེན་པོ་ཆགས་ནས་རང་མགོ་མི་ཐོན་པ་དང་ཀ་ངོ་ཡིག་ངོ་ཡག་པོ་ཞིག་ཀྱང་མི་ཆོད་པར་མི་ངོ་འཚོ་དགོས་པའི་དུས་སུ་སླེབས་དུས། ད་གཞི་ནས་མི་དེ་ཚོས་ཁྱེད་རང་དེ་བ་ཚང་གི་ཞི་མོ་ཡིན་ནི་མ་རེད་ཅེས་ངོ་འཚང་འདྲ་དྲིས། ཁྱེད་རང་དྭ་ཕྲུག་ཡིན་ནི་རེད་ཟེར་ནས་གོ་དུས་དངོས་ནས་དཀའ་ནི་རེད། ངས་མཚོ་མོ་སྐྱིད་ཀྱི་མ་འོངས་པ་བསམ་ནས། སུས་ཀྱང་མོ་རང་གི་སྐྱེ་ཁུངས་མི་ཤེས་པའི་རྒྱང་རིང་དེ་ནས། མོ་རང་སློབ་གྲྭ་འགྲིམ་དུ་བཅུགས་དེ། མོ་རང་གི་སེམས་ལ་སྡུག་བསྔལ་དེ་དག་མ་ཡོང་ན་བསམ་པ་ཡིན་ཟེར་ནས་གནས་ལུགས་མང་བོ་ཞིག་བཤད།

བློ་བཟང་གི་ཕ་མ་གཉིས་ཀྱིས། མཚོ་མོ་སྐྱིད་བློ་བཟང་གི་ལྷན་དུ་ཁྲིད་འགྲོ་རྒྱུར་མོས་མཐུན་བྱས་པ་དང་། དེ་ནས་ནང་དུ་དངུལ་མེད་དུས། བློ་བཟང་གིས་དེ་ཡི་ཕྱོགས་སུ་སེམས་ཁྲལ་མ་བྱེད། ང་རང་ལ་འདི་ན་རྒྱ་སྒོར་ཉིས་སྟོང་མ་ཟིན་ཙམ་ཞིག་ལྷག་ཡོད། དེ་ཡིན་དུས་ངའི་གསེར་གྱི་ཚིག་ཁེབས་ཆུང་ཆུང་འདིས་ཀྱང་རྒྱ་སྒོར་ལྔ་བརྒྱ་དྲུག་བརྒྱ་ཞིག་ཁུགས་ངེས་ཡིན་ཞེས་མཚན་མོ་དེར། ཁོང་ཚོས་བློ་བཟང་ཕྱིར་རྒྱ་གར་དུ་འགྲོ་རྒྱུའི་གྲོས་ཐག་བཅད།

བློ་བཟང་གི་ནུ་མོ་རུ་འབོད་པའི་མཚོ་མོ་སྐྱིད་ནི། བློ་བཟང་གི་ནུ་མོ་དངོས་ནས་དེ་མིན་པ་སྡེ་བ་དེ་ཡི་ནང་གི་མི་ཕལ་ཆེ་བ་ཞིག་གིས་གསལ་བོ་ཤེས་ཀྱི་ཡོད་པ་རེད། གང་ཡིན་ཟེར་ན། བློ་བཟང་གི་མ་རྒན་མ་བློ་བཟང་སྤུན་གསུམ་སྐྱེ་བའི་རྗེས་སུ་སྐབས་དེར་རྒྱ་ནག་གིས་ཁྲིམས་ལྟར་སྨན་ཁང་ནས་གཤག་བཅོས་བྱས་ཟིན་པ་རེད། དེ་ཡིན་དུས། ཁོང་ཚོས་ནང་དུ་བུ་གསུམ་ལས་བུ་མོ་མེད་པ་རེད། དེ་ཡི་སྐོར་ཡང་གཞན་གྱིས་གསལ་བོ་ཤེས་ཀྱི་ཡོད། བློ་བཟང་ལོ་བཅོ་ལྔ་ཡིན་དུས་སུ། ཉིན་ཞིག་དྲིན་ཆེན་མ་ལོ་དགོན་པའི་ནང་དུ་བློ་བཟང་གི་སར་ཡོང་ནས། བློ་བཟང་ལ། དེ་རིང་འུ་ཚང་ལ་ཞི་མོ་ཞིག་རེག་སོང་ཞེས་དགའ་བཞིན་སྤྲོ་བཞིན་དུ་བཤད།

བློ་བཟང་གིས། ཨ་མ། ཞི་མོ་ཞིག་རེག་སོང་། ཇི་ལྟར་རེག་སོང་ཞེས་དྲིས་དུས་སུ། བློ་བཟང་གི་ཨ་མ་སྒྲོལ་མ་འཚོས། ད་ནངས་སྔ་བོ་ནམ་མ་གསལ་གོང་དུ་ཆུ་ཚོད་བཞི་ལྔ་ཙམ་ཞིག་ལ་སྒོ་འགྲམ་ནས་བྱིས་པ་ཞིག་ངུས་པའི་སྒྲ་གྲགས་ཀྱི་འདུག དེ་དུས་ངས་ཁྱེད་ཀྱི་ཕ་རྒན་ལ། ཁྱེད་རང་སོང་དང་། སྒོ་ན་བྱིས་པ་ཞིག་ངུ་བཞིན་འདུག་ཟེར་ནས་བཤད་པ་ཡིན། སྐབས་དེར་ཁོ་སོང་ནས་བལྟས་དུས། སྒོ་འགྲམ་དུ་བྱིས་པ་དམར་འཇར་ཞིག་ངུ་བཞིན་འདུག་ཟེར། ཁོས་དེ་ལག་དུ་བཟུང་ནས་ཡར་མར་ལ་བལྟས་དེ་སྐད་བརྒྱབ་ཀྱང་། ཁ་གྲགས་མཁན་མི་འདུག་སྟབས་ནང་དུ་ཁུར་ཡོང་ནས་བལྟས་དུས། ཞི་མོ་ཞིག་རེད་ལ་རྐ་ལག་ཡན་ལག་ཡང་ཚང་མ་ཞིག་རེད། དང་བོ་དངོས་ནས་སྐྲག་སོང་། ཁུ་བཙུར་བསྡམ་ནས་བསྡད་འདུག མཛུབ་མོ་མེད་མཁན་ཞིག་རེད་བསམ་སོང་། ད་དུང་ཁོང་ཚོས་ཞི་མོའི་དཀྲིས་སའི་ནང་དུ་ཡི་གེ་འདི་འདྲ་ཞིག་འདུག་ཞེས་བློ་བཟང་གི་ལག་པར་བཞག

བློ་བཟང་གིས། རས་དཀར་པོ་ཆུང་ཆུང་ཞིག་གི་སྟེང་དུ་བྲིས་པའི་དབུ་ཅན་ཡིག་གཟུགས་ཅན་གྱི་ཡི་གེ་དེ་ཀློག་དུས། ཞི་མོའི་མིང་ལ་མཚོ་མོ་སྐྱིད་ཡིན། ཁྱེད་ཚང་ང་ཚོས་ངོ་ཤེས་ཀྱི་ཡོད།