བན་སྡེ་འཚོས། གལ་སྲིད་ཁྱེད་རང་གི་དམིགས་ཡུལ་འགྲུབ་སོང་བ་ཡིན་ན། ངས་ཁྱེད་རང་གི་ཐག་ཉེ་ས་ཞིག་ནས་ལས་ཀ་བྱེད་ཆོག སློབ་མཐར་ཕྱིན་རེག་བར་དུ་ངས་ཁྱེད་རང་ལ་སྒུག་ཆོག ཁྱེད་རང་གི་འདོད་པ་གང་ཡོད་པ་དེར་ངས་རྒྱབ་སྐྱོར་བྱེད་ངེས་ཡིན། གལ་སྲིད། ནམ་ཞིག་ཁྱེད་རང་ཕྱིར་རྒྱ་གར་དུ་ལོག་འདོད་ཡོད་ན། ངེད་གཉིས་ལོག་ཆོག དམིགས་ཡུལ་མ་འགྲུབ་པར་ཕྱིར་ལོག་འདོད་ཡོད་ན། འུ་གཉིས་ཕྱིར་ལོག་ན་འགྲིག་གི་རེད། ངས་ད་ལྟའི་བར་དུ་ལས་ཀ་བྱས་ནས་སྒོར་མོ་ཁ་ཤས་ཤིག་གསོག་ཡོད། དེ་ཡི་འུ་གཉིས་ཕྱིར་རྒྱ་གར་ལ་འགྲོ་བའི་འགྲོ་སོང་འདང་ཁོ་ཐག་ཡིན་ཞེས་བཤད།
སྐད་ཆ་དེ་དག་གིས་དངོས་ནས་བློ་བཟང་གི་སེམས་ཁོང་དུ་སྔར་བྱུང་མ་མྱོང་བའི་ཚོར་བ་དེ་དག་ཁོ་མོའི་ལུས་སྟེང་ནས་རྙེད་པའི་སྒང་ལ། སྐད་ཆ་དེ་དག་ནི་དེ་བས་ཀྱང་བུད་མེད་ཡིག་རྨོངས་པ་ཞིག་གིས་སེམས་ཁོང་ན་ཤེས་ཡོན་གྱི་ཕྱུག་པའི་མིས་ཀྱང་རྟོགས་མི་ཐུབ་པའི་རིན་ཐང་གཞལ་དུ་དཀའ་བའི་ཚིག་རེ་འདུག་ཨང་སྙམ་ཞོར་དུ། བན་སྡེ་འཚོ་ལ་འཐམ་ནས། ཁྱེད་རང་དངོས་ནས་བུད་མེད་ཡ་རབས་ཤིག་རེད། ཁྱེད་རང་ང་ལ་ཐོབ་པ་འདི་ངས་བསོད་ནམ་རེད་ཅེས་བཤད།
ཕྱི་དྲོ་དེར་ཆུ་ཚོད་གསུམ་པའི་བརྒྱབ་དུ། ཁོ་གཉིས་མགྲོན་ཁང་དེ་ནས་ཕྱི་ལ་བུད་དེ་རླངས་འཁོར་འབབ་ཚིག་ལ་སོང་། རླངས་འཁོར་ཆུ་ཚོད་གཅིག་ཙམ་སོང་བའི་རྗེས་སུ་ཁོ་གཉིས་ཀྱིས་ལམ་ཕྱོགས་མི་གཅིག་སྟབས། བན་སྡེ་འཚོ་རླངས་འཁོར་དེ་ལས་མར་འབབ་ཞོར་དུ། ངས་ཁྱེད་རང་ལ་སང་ཉིན་དགོང་མོ་ཁ་པར་གཏོང་ཆོག ང་རང་ནངས་ཉིན་བླ་བྲང་དུ་ཡོང་ཐུབ་ནོ་ཁོ་ཐག་ཡིན་ཞེས་བཤད་དེ་ལག་གཡུགས་ཤིག་བྱེད་ཀྱིན་རླངས་འཁོར་དེ་ལས་ས་ལ་འབབ།
བློ་བཟང་གིས་རླངས་འཁོར་གྱི་སྒེའུ་ཁུངས་ནང་ནས་ཁོ་མོའི་ཕྱོགས་སུ་བལྟ་ཞོར་དུ། ཡིད་ལ་སྐྱོ་སྣང་ཞིག་སྐྱེ་ཡང་། ནངས་ཉིན་འཕྲད་ངེས་རེད་བསམ་པའི་ཚོར་བ་དེས་ཁོ་རང་གི་སྐྱོ་སྣང་དེ་ག་ལེར་ཞི།
བློ་བཟང་བླ་བྲང་གི་རླངས་འཁོར་ས་ཚིགས་སུ་འབྱོར་མ་ཐག གླ་བྱེད་རྐང་འཁོར་གྱི་ཁ་ལོ་བ་དང་། གླ་བྱེད་རྐང་གསུམ་སྤག་སྤག་གི་ཁ་ལོ་བ་ཡིན་པའི་བོད་ཀྱི་ཕོ་གསར་ལོ་ཆུང་ཆུང་མི་ཉུང་བ་ཞིག་གིས་རླངས་འཁོར་ནང་དུ་འཚང་ཁ་བརྒྱབ་དེ། ཧ་ལོ་ ཧ་ལོ་ཟེར་བཞིན་ནང་ལོག་གི་རྒྱ་མི་དག་འཕྲོག་རྩོད་བྱེད་ཀྱི་ཡོད་པ་དེ་ཡི་སྐབས་སུ། ཕོ་གསར་ཆུང་ཆུང་ཞིག བློ་བཟང་གི་རྒྱབ་ཁུག་ཆེན་པོ་དེ་ཡི་སྟེང་ལ་འཇུས་དེ། ཧ་ལོ་ བླ་བྲང་དགོན་པ་འགྲོ་འམ་ཟེར་ནས་རྒྱ་སྐད་ཤེས་ལ་མ་ཤེས་ལ་རྒྱག་ཞོར་དུ་རྒྱ་སྒོར་གཉིས་ཡིན་ཟེར་ནས་རྒྱབ་ཁུག་ཆེན་པོ་དེ་རྒྱབ་དུ་ཁུར་རྩིས་བྱོས་དུས། བློ་བཟང་གིས་ང་རང་རྒྱ་མིན། བོད་ཡིན་ཟེར་ནས་ལན་བཏབ་དུས། ཕོ་གསར་དེ་རེ་ཞིག་རིང་ཧད་དེ་བསྡད་ཡོད་པའི་སྐབས་དེར། བློ་བཟང་གི་ཕ་རྒན་འཇིགས་གྲོལ་གྱིས། ཕར་སོང་། ཕར་སོང་། ཁོ་རྒྱ་མ་རེད་ཅེས་བཤད།
བློ་བཟང་གིས་རང་གི་ཕ་རྒན་འཇིགས་གྲོལ་གྱིས་རླངས་འཁོར་འབབ་ཚིགས་དུ་སྒུག་ཡོད་པ་མཐོང་མ་ཐག ཡིད་ལ་ཆེས་སྤྲོ་སྣང་དང་གདོང་ལ་འཛུམ་མདངས་དང་བཅས་དེ་རྒྱབ་ཁུག་དེ་ཚོ་ཕ་རྒན་ལ་སྤྲོད་ཀྱིན་སྐབས་དེར། རླངས་འཁོར་ཕྱི་ནས། ཕུ་བོ་ཟེར་ནས་སྐད་ཞིག་ཐོས་པ་དེ་རུ་བལྟས་དུས། ནུ་བོ་ཀླུ་འབུམ་རྒྱལ་ཡིན་པ་ཤེས་ནས་སེམས་གཏིང་ནས་དགའ་བ་དང་བཅས་རླངས་འཁོར་གྱི་ཕྱི་རུ་འབུད་དུས། ཕོ་གསར་ཆུང་ཆུང་རྐང་གསུམ་སྤག་སྤག་གི་ཁ་ལོ་བ་དེས་ཁོ་རང་གི་རོགས་པ་ཚོར་སྐད་ཆ་ཤུབ་ཤུབ་ཞིག་བཤད་ཀྱིན་པ་བློ་བཟང་གིས་ཕྱིས་བལྟས་ཤིག་བྱེད་ཞོར་དུ། རང་གི་ནུ་བོ་ཀླུ་འབུམ་རྒྱལ་གྱི་སྐེ་རུ་འཐམ་ནས་བདེ་མོ་ཡིན་ནམ་ཞེས་བཤད།
གླ་བྱེད་རླངས་འཁོར་ཞིག་གི་སྒོ་ནང་ནས་ཕ་རྒན་འཇིགས་གྲོལ་གྱིས། ཡ་་ ད་མགྱོགས་པོ་ཤོག ནང་ན་ཨ་མ་དང་བཟའ་ཚང་བཀང་བོས་དེ་རིང་ཁྱེད་ལ་སྒུག་ནས་བསྡད་ཡོད་པ་རེད། ཀླུ་འབུམ་རྒྱལ་སྤག་སྤག་བཏང་ནས་སྔོན་ལ་སོང་། ཕུ་བོ་བློ་བཟང་དང་ངེད་གཉིས་གཞུག་ན་ཡོང་གི་འདུག་ཟེར་ནས་ཤོད་ཅེས་སྐད་བཏང་།
བློ་བཟང་གིས་ནུ་བོ་ཀླུ་འབུམ་རྒྱལ་ལ། རེད་ ཁྱོད་སྔོན་ལ་སོང་། ད་མགྱོགས་པོ་ཐུག་གི་རེད་ཟེར་ཞོར་དུ་གླ་བྱེད་རླངས་འཁོར་དེ་ཡི་ནང་དུ་བུད།
ཨ་ཕ་ཁྱེད་རང་གིས་དེ་རིང་ཡུན་རིང་ལ་སྒུག་ནས་དཀའ་ཡོད་རྒྱུ་རེད་ཅེས་རང་གི་ཕ་རྒན་འཇིགས་གྲོལ་ལ་བློ་བཟང་གིས་སྐད་ཆ་དྲིས་དུས། ཕ་རྒན་འཇིགས་གྲོལ་གྱིས། ད་ནངས་ཆུ་ཚོད་དྲུག་པ་ནས་བཟུང་དེ་འདི་ནས་སྒུག་བསྡད་པ་ཡིན། རླངས་འཁོར་ཡོང་ཡོང་ཚང་མ་ལ་བལྟས་པ་ཡིན། ཉིན་མའི་གུང་ལ་སླེབས་སོང་། གྲོད་ཁོག་ལྟོགས་ནས་ཕར་ནང་དེར་ཕྱེ་ཐིག་འཁྱག་པ་ཞིག་འཐུང་དུ་སོང་བ་ཡིན། དེ་དུས་སྐར་མ་ལྔ་དྲུག་ཞིག་མ་གཏོགས་འགོར་མེད། ཡང་དེ་ཡི་སྐབས་སུ་ཁྱེད་རང་བུད་སོང་ནི་མིན་ན་བསམ་ནས་སེམས་ཁྲལ་བྱོས་དེ་བསྡད་ཡོད་པའི་སྐབས་དེར། ཀླུ་འབུམ་རྒྱལ་སླེབས་ནས། ཁྱེད་རང་ད་དུང་སླེབས་མ་སོང་བ་ཤེས་སོང་། དེ་ནས་ཁོ་རང་གིས་སྒུག་ནས་འདུག ང་སྔོན་ལ་སོང་ནས་ངལ་གསོས་དེ་བསྡོད་ཟེར་ན་ཡང་། ངས་ཆུ་ཚོད་ལྔ་དང་ཕྱེད་ཀ་བར་དུ་སྒུག་དེ་ནས་མ་ཡོང་ན་ང་འགྲོ་ཟེར་ནས་བསྡད་པ་ཡིན།
བློ་བཟང་གི་རླངས་འཁོར་གླ་བྱེད་དེ་ལས་ཕྱིར་བུད་མ་ཐག རས་གུར་གྱི་སྒོ་ཁ་རུ་རང་གི་དྲིན་ཆེན་མ་ལོའི་ལག་དུ་ཁ་བཏགས་དཀར་པོ་ཞིག་བཟུང་དེ་སྒུག་ཡོད་པ་དེ་མཐོང་མ་ཐག ཤ་གསེང་རུས་གསེང་ནས་འདར་སུག་བརྒྱབ་ཀྱང་། ཨ་མ་བདེ་མོ་ཡིན་ན་ཟེར་ནས་ཕར་སྐད་ཆ་དྲིས་མ་ཐག ཨ་མའི་མིག་ཟུང་མཆི་མས་བཀང་ཞོར་དུ། ཨ་མའི་གཅེས་ཕྲུག ཨ་མ་བདེ་མོ་ཡིན། ཁྱེད་རང་ཕྱིར་འཚམ་པོ་བདེ་མོ་སླེབས་པ་དགའ་ཡོད་ཟེེར་ནས་ཁ་བཏགས་དེ་བློ་བཟང་གི་སྐེ་རུ་སྐོན་ནས་བློ་བཟང་ལ་འཐམ་ནས་ངུས། དེ་དུས་བློ་བཟང་གིས་ཨ་མ་ད་མ་ངུ་། ང་ཕྱིར་འཚམ་པོ་ཐོན་ཡོད་པ་འདི་རེད་ཅེས་བཤད།
བློ་བཟང་གི་དྲིན་ཆེན་མའི་རྗེས་སུ་བློ་བཟང་ལ་ཁ་བཏགས་འཐེན་མཁན་གྱི་ཉེ་མི་ཁ་ཤས་ཤིག་རས་གུར་གྱི་མཐའ་རུ་གྲལ་སྒྲིག་ནས་ཡོད་ཀྱང་། བློ་བཟང་གིས་རེ་རེ་བཞིན་སུ་ཡིན་ཡང་ཡག་པོ་ཞིག་སྙམ་འཇོག་ཁོམ་ཡང་མ་བྱུང་བར་རས་གུར་ནང་དུ་འཛུལ་ནས་ལོ་ན་མཐོ་བའི་རང་གི་ཨ་མྱེ་བདེ་ཆེན་ལ་འཚམ་འདྲི་ཞུ་རུ་ཕྱིན།
མུ་འགོད།
བར་སྐབས་ཞིག་ནས་ངས་བསམ་ཚུལ་ཞིག་སྤེལ་དགོས་བསམ་བསྡད་པ་ཡིན། བསམ་ཚུལ་དེ་མ་སྤེལ་ན་བསམ་ནས་ཀྱང་ཡུན་རིང་བསྡད་པ་ཡིན། དེ་རིང་ད་བསམ་ཚུལ་དེ་སྤེལ་གི་ཡིན།
ཁྱོད་ཀྱི་སྒྲུང་འདི་ཀློག་གི་ཡོད། མུ་མཐུད་ནས་འབྲི་རོགས་ཞེས་རེ་སྐུལ་ཡང་ཞུ་གི་ཡིན། ཡིན་ཡང་། ཉིན་རེར་ཚན་པ་རེ་རེ་བྲིས་ནས་སྤེལ་ན་གང་འདྲ་འདུག དེང་སྐབས་ཟིན་བྲིས་ཀྱི་ས་ཆས་མ་འདེང་བར་ཡོད་དུས་ཤིག་ལ་ཁྱོད་གཅིག་པུས་ཟིན་བྲིས་གསར་ཤོས་ཀྱི་ས་མིག་བཅུའི་ཁྲོད་ཀྱི་བཞི་བཟུང་ནས་བསྡད་པ་ཡིན་ན་ཟིན་བྲིས་པ་གཞན་པ་མང་པོ་ཞིག་གི་ཟིན་བྲིས་རྣམས་རྐང་བཙུགས་ནས་ཀློག་མ་བཅུག་པའི་ཚོར་སྣང་དེ་འདྲ་མི་འདུག་གམ། དེང་སྐབས་ཟིན་བྲིས་འདི་དག་ཡ་མཚན་ཞིག་རེད།
ཟིན་བྲིས་གསར་ཤོས་ནང་དུ་བོད་ཤ་ཁྲག་རུས་གསུམ་གྱིས་བཀང་འདུག ཟིན་བྲིས་ཁྱབ་ཤོས་ནང་དུ་ཨ་རིག་དགེ་མཐོང་དང་ཨ་རིག་འགྱུར་མེད་གཉིས་ཀྱིས་བཀང་འདུག ཨ་རིག་ཚང་གི་ཟིན་བྲིས་པ་གཉིས་ལ་དབང་འདུག
ཉི་མ་གསུམ་བཞི་ཞིག་གི་རིང་ལ་རྩོམ་ཟེར་ནོ་རྟ་སྤང་གཏོང་གཏོང་བྱས་དང་ཐལ། དེ་དང་མཉམ་དུ་ཡིག་ནོར་དང་གཏགས་ནོར་ཟེར་ནོ་ཡང་རྟ་སྤང་གཏོང་གཏོང་བྱས་དང་ཐལ། ཅུང་ཙམ་དལ་མོར་བཀོད་ན་ཡིག་ནོར་དང་གཏགས་ནོར་ཀྱང་འདི་ལྟར་ཆུ་བཞུར་བཞུར་བྱེད་རྒྱུ་མ་རེད་འདོད་ཀི་ཡ།
སྐེད་རག་ཅུང་ཙམ་སྡོམ་རྒྱུ་ཞིག་ཨེ་ཡོད་ཀི ལྷོད་དྲག་འདུག་པཱ།
ད་འགྲོ་རན་སོང་། ལས་ཀ་ཟེར་ནོ་ཁྱོའི་རྩོམ་ཡིག་ནང་བཞིན་གཅིག་འཕྲོ་གཅིག་གིས་དེད་འོང་གིས། འདུག་ཁོམ་ཅུང་ཙམ་ཡང་མེད་ཀི རྗེས་སུ་ཡང་སྐོར་རེ་རྒྱགས་ཡ།
ཡག་གི་ངོ་མ་ཡག་གི་རེམ་པོར་ཕྲིས་ཨ