འཁྲིག་སྤྱོད་ཀྱི་བརྙན་པར་དང་སེམས་ཁྲལ།

བཀུར་འོས་སྤྱིར་གྱི་དྲྭ་གྲོགས་ཁག་དང་ལྷག་དོན་རབ་བྱུང་གི་རྟགས་ཆ་ལུགས་འཆང་མཁན་ཡོངས་ཀྱི་སྙན་ལམ་དུ།

དེང་སང་གློག་ཀླད་ཀྱི་ཤེས་ཡོན་དང་གནས་ཚད་རྒྱུན་མི་ཆད་པར་ཡར་རྒྱས་འགྲོ་བཞིན་པའི་སྐབས་འདིར་ང་ཚོས་སོ་སོའི་སྐད་ཡིག་སྲུང་སྐྱོབ་དང་ཤེས་བྱའི་གནས་ལུགས་འཚོལ་ཞིབ་སོགས་མི་ཚེའི་ནང་འདོར་དུ་མེད་པའི་གནད་དོན་མང་དག་ཅིག་གི་བྱ་བ་དྲྭ་རྒྱ་བརྒྱུད་ནས་སྒྲུབ་ཀྱིན་ཡོད་པ་རེད། མདོར་བསྡུས་ནས་བཤད་ན་དེང་སང་དྲྭ་རྒྱའི་མཐུན་རྐྱེན་འདི་མེད་ན་འཇིག་རྟེན་འདིར་འཚོ་གནས་མི་ཐུབ་པའི་ཚད་ལ་བསླེབས་ཡོད་པ་ཡིན།

ང་ཚོའི་འཚོ་བའི་ནང་འདི་ལྟའི་གལ་ཆེན་གྱི་གནས་བབ་ཟིན་པའི་བརྒྱུད་ལམ་འདི་བེད་སྤྱོད་གཏོང་ཤེས་ན་རླབས་ཆེན་གྱི་བྱ་བ་བསྒྲུབ་པའི་གོ་སྐབས་ཡོད་ཅིང་བེད་ལོག་ཏུ་སོང་ན་རླབས་ཆེན་གྱི་ནོར་འཁྲུལ་ཤོར་བའི་གོ་སྐབས་ཀྱང་ཡོད་པ་ཡིན།
ཆོས་ཕྱོགས་ནས་བཤད་ན་དེ་སྔ་སྤྱན་དང་མངོན་ཤེས་ཀྱིས་བསྒྲུབ་དགོས་པའི་བྱ་བའི་རིགས་མང་དག་ཅིག་དེང་སང་དྲྭ་བའི་བརྒྱུད་ལམ་ནས་སྟབས་བདེ་པོས་བསྒྲུབ་སྐབས་ཡོད་ཅིང་།
ཏོག་ཙམ་འུད་ཤོབ་ཀྱིས་བཤད་ན་མཆོག་གི་སྤྲུལ་སྐུའི་མཛད་པ་ཁག་ཅིག་ཀྱང་ཕྱོགས་མཐུན་ཙམ་ཞིག་ས་ལམ་སྒྲུབ་པ་ལ་ལྟོས་མི་དགོས་པར་དྲྭ་རྒྱའི་མཐུན་རྐྱེན་ལ་བརྟེན་ནས་མལ་ཁྲི་གྲུ་བཞིའི་སྟེང་ནས་ཉལ་སྟབས་ཀྱིས་བསྒྲུབ་ཐུབ་པ་འདུག

སྲིད་ཕྱོགས་ཀྱི་གནས་སྟངས་དང་འབྲེལ་ནས་བཤད་ན་ཚར་རབས་མི་འདུག་ཀྱང་དོན་སྙིང་བསྒྲིལ་ན་དེང་སང་འཛམ་གླིང་གི་རྒྱལ་ཁབ་ཁག་དང་ཚོགས་སྡེ་ཁག མི་སྒེར་སོགས་ཡོངས་རྫོགས་ཀྱི་སྲིད་འབྱོར་རིག་གསུམ་གྱི་གནད་དོན་ཡོངས་རྫོགས་དྲྭ་རྒྱའི་བརྒྱུད་ལམ་ལ་བརྟེན་ཡོད་པ་འདིས་ཤེས་ནུས་པ་ཡིན།

འདི་ལྟའི་ཕན་ནུས་རླབས་ཆེན་ལྡན་པའི་ཆ་ནས་བཤད་ན་གྲྭ་པ་ཞིག་གི་ངོས་ནས་དྲྭ་རྒྱ་བེད་སྤྱོད་གཏོང་བ་འདི་འོས་ཤིང་འཚམ་པ་རེད། འོན་ཀྱང་དྲྭ་རྒྱའི་ཤེས་ཡོན་དང་གནས་ཚད་ཀྱིས་ང་ཚོ་མ་སྒུག་པར་རྒྱུན་མི་ཆད་པར་ཡར་རྒྱས་འགྲོ་བའི་སྐབས་འདིར་ང་ཚོས་གཟབ་གཟབ་ངེས་པར་བྱེད་དགོས་པའི་དོན་དག་ཁག་ཅིག་འདུག ལྷག་དོན་རབ་བྱུང་ཚོས་གཟབ་དགོས་ཀྱི་འདུག

དཔེར་ན་འཁྲིག་སྤྱོད་ཀྱི་བརྙན་པར་སོགས་གང་བྱུང་གང་འདོད་དུ་བལྟ་བསྔོག་བྱ་རྒྱུ་འདི་ཡིན། གྲྭ་པ་ཚོར་དངོས་སུ་འཁྲིག་སྤྱོད་ཀྱི་ལག་ལེན་བྱེད་སྐབས་མེད་སྟབས་ལྟད་མོ་འདི་རིགས་བལྟ་བའི་སྤྲོ་སྣང་དང་གྲངས་ཀའི་ཆ་ནས་བཤད་ན་སྐྱ་མི་ལས་མང་ཚོད་ཡིན་པ་འདྲ། གཅིག་བྱས་ན་མཚར་སྣང་དང་དྭོགས་སྣང་གི་རྐྱེན་གྱིས་ཀྱང་ཡིན་སྲིད། གང་ལྟར་ཡང་གྲྭ་པ་ཚོས་སོ་སོའི་གློག་ཀླད་ནང་ཕྱི་ནང་གི་གནས་སྟངས་ཡོངས་རྫོགས་ཤེས་མཁན་སོ་སོ་ལས་མེད་སྙམ་གྱི་ལོག་རྟོག་དེ་བཅངས་ནས་གང་བྱུང་བལྟ་བསྔོག་མ་བྱེད་རོགས།

དྲྭ་རྒྱའི་ཡར་རྒྱས་འདི་ཧ་ཅང་ཚད་མཐོ་བའི་དབང་གིས་ཁྱེད་ཀྱི་གློག་ཀླད་ནང་གི་གསང་བ་ཡོངས་རྫོགས་དང་ལྷག་དོན་ཁྱེད་ཀྱིས་ཁྱེད་རང་གི་གློག་ཀླད་ནང་ཡི་གེ་ཀ་ལྟ་བུ་ཞིག་འབྲི་ཡི་ཡོད་པའི་གསང་བ་དེ་ཡང་ཁྱེད་དང་འབྲེལ་མེད་ཅིག་གིས་ལེ་དབར་སྟོང་ཕྲག་གི་ཕ་རོལ་ནས་ཧ་གོ་ཡིན་འདུག འདི་རྣམ་མཁྱེན་གྱིས་ཆོས་ཐམས་ཅད་ལག་མཐིལ་དུ་སྐྱུ་རུ་ར་ལྟར་གཞལ་ཟེར་བའི་ཡོན་ཏན་དེ་དང་ཕྱོགས་མཐུན་ཙམ་ཞིག་ཡིན་པ་འདྲ།

དེ་རིང་ཉིན་དགུང་ངོ་ཤེས་ཕོ་གསར་ཞིག་དང་ལབ་གླེང་སྐབས་འབྲེལ་ཡོད་དྲྭ་རྒྱའི་སྐོར་གྱི་ཆེད་མཁས་པ་ཞིག་གིས་དུས་རྒྱུན་དྲྭ་རྒྱ་དང་འབྲེལ་བའི་ལས་དོན་སྒྲུབ་པའི་བརྒྱུད་རིམ་ནང་དགོན་སྡེ་ག་གེ་མོ་ཞིག་གི་དགེ་འདུན་པ་དྲྭ་རྒྱ་སྤྱོད་མཁན་ཁག་གིས་འཁྲིག་སྤྱོད་གློག་བརྙན་བལྟ་བསྔོག་བྱས་པའི་གྲངས་ཚད་ནི་ཧ་ལས་པ་ཞིག་ཡིན་པ་ཤེས་འདུག
ཁོ་པས་སྐད་ཆ་འདི་བུད་སོགས་མང་ས་ནས་བཤད་པ་སྟབས་དངོས་གནས་ང་ཚ་དང་ཁ་སྐྱེངས་ཀྱི་ཚོར་བ་ཞིག་བྱུང་།

འདིའི་སྐབས་ངས་གོང་གི་མཚར་སྣང་དང་དྭོགས་སྣང་ཞེས་པའི་འགྲེལ་བཤད་དེ་བརྒྱག་ཐབས་བྱས་པ་ཡིན། འོན་ཀྱང་འགྲེལ་བཤད་འདིས་ང་ཚོའི་ངོ་གདོང་སྦས་འགེབ་བྱ་རྒྱུ་ལས་སླ་པོ་མ་རེད།