སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} རེ་གསུམ།

ད་ང་ཚོ་འདི་ནས་རྐང་འཐུང་ལ་སོང་ན་ཡང་ལམ་ཐག་རིང་བོ་མ་རེད། ཞོགས་པ་སྔ་བོ་ཡིན་དུས་ང་ཚོའི་ལག་དུ་གླ་བྱེད་རླངས་འཁོར་ཡང་རེག་ཁག་པོ་ཡིན་ནི་རེད། ཁྱེད་གཉིས་ཕྱིར་སྔ་བོ་འགྲོ་དགོས་དུས་ང་ཚོ་ལམ་ལ་འབུད་ཟེར་ནས་ཁོང་ཚོ་གསུམ་པོ་ནུ་བོ་ཀླུ་འབུམ་རྒྱལ་གྱི་ཁང་བ་ནས་ཕྱི་ལ་བུད།

ལམ་བར་དུ་ཁོང་ཚོས་ཁ་བརྡ་བྱེད་བཞིན་སོང་བ་དང་། བན་སྡེ་འཚོས་ཨ་ཅེ་ཡིས་བློ་བཟང་ལ་ཁྱེད་རང་མི་འགྱངས་པར་མཛོ་དགེ་རུ་ཡོང་ཐུབ་པ་ཡིན་ན་དངོས་ནས་ཡག་པོ་འདུག བན་སྡེ་འཚོའི་ཕ་མ་གཉིས་ཀྱིས་ཀྱང་ཁྱེད་རང་ལ་ཐུག་འདོད་བྱེད་ཀྱི་འདུག

བློ་བཟང་གིས་ཁོ་གཉིས་རྫོང་རླངས་འཁོར་འབབ་ཚིགས་སུ་བསྐྱལ་བ་དང་ཀན་ལྷོ་བོད་རིགས་རང་སྐྱོང་ཁུལ་དུ་འགྲོ་བའི་རླངས་འཁོར་འཛིན་བྱང་ཡང་ཁོ་རང་གིས་ཉོས་དུས་སུ། བན་སྡེ་འཚོས། བློ་བཟང་གི་ལག་ནང་དུ་རྒྱ་སྒོར་བརྒྱ་ལོ་ཞིག་བརྫངས་དེ། ནམ་ཡིན་ན་ཁྱེད་རང་གི་འགྲོ་སོང་བཏང་ན་ག་ལ་འགྲིག་ཞེས་བཤད།

བློ་བཟང་གིས་སྐྱོན་ནི་མ་རེད། འུ་གཉིས་གཅིག་རེད། ད་དེ་མ་བྱེད་འདིར་ཕར་ལོངས་ཟེར་ནས་ཕྱིར་སྤྲོད་དུས་སུ། བན་སྡེ་འཚོས་གཏན་ནས་མ་བླངས་པ་མ་ཟད། དེས་ཁྱེད་རང་གི་ཚ་བོ་ཚ་མོ་དག་ལ་ཁ་མ་རེ་ཉོ་བྱེད་དུ་ངས་སྤྲད་པ་ཡིན་ཟེར་ནས་གཏན་ནས་མ་བླངས་སྟབས། བློ་བཟང་ལ་ཡང་ཐབས་ཤེས་མེད་པར་རུམ་ནང་དུ་བསྡུ་ཞོར། ངས་ཁྱེད་རང་ལ་རྒྱན་ཆའི་སྐོར་བཤད་པ་དེ་ཁྱེད་རང་གི་སེམས་སུ་འཛིན་རོགས། ང་རང་མགྱོགས་པོ་ཕར་ཡོང་ཐུབ་མིན་སང་ཉིན་ནངས་ཉིན་ངེད་གཉིས་ཀྱིས་ཁ་པར་ནང་ནས་ཁ་བརྡ་བྱེད་ཆོག་གི་རེད་ཅེས་བཤད།

བན་སྡེ་འཚོས། ཡ་ཡ་ བཤད་རྒྱུ་མེད། ངའི་སེམས་སུ་བཟུང་ཡོད། རྗེས་ཕྱོགས་ངས་རྒྱན་ཆ་མི་འདོག ཚེས་ཆེན་དུས་ཆེན་ལ་མ་གཏོགས་ཟེར་བཞིན་བློ་བཟང་གི་ལག་མགོ་འཇར་ནས་བདེ་མོ་བྱོས། མགྱོགས་པོ་ཐུག་རྒྱུར་ང་རང་ལ་རེ་བ་ཡོད་ཅེས་རླངས་འཁོར་གྱི་ནང་དུ་འབུད།

བློ་བཟང་གིས་ལག་གཡུགས་བྱེད་ཀྱིན་ཁོ་གཉིས་ལ་སྐྱེལ་མ་བྱས་རྗེས། ག་ལེར་ཐ་མག་ཞིག་ཁ་ནང་དུ་བཙུགས་དེ་གླ་བྱེད་རླངས་འཁོར་ཞིག་ལ་སྐད་བཏང་།

ཉིན་མ་རེ་རེ་བཞིན་བློ་བཟང་ལ་བན་སྡེ་འཚོས་ཁ་པར་ཡོང་གི་ཡོད་པ་མ་ཟད། བློ་བཟང་གང་མགྱོགས་ཀན་ལྷོ་མཛོ་དགེ་རུ་མོ་རང་གི་ཕ་ཡུལ་དུ་ཡོང་ཐུབ་མིན་སྐོར་ལ་ཡང་རེ་བ་ཡོད་རབས་རྒྱུན་དུ་བཤད་བཞིན་ཡོད་པ་རེད། གང་ལྟར། དུས་ཚོད་འགྲོ་བ་ནི་ཧ་ཅང་མགྱོགས་སྟབས། བློ་བཟང་གིས་རང་གི་དམིགས་ཡུལ་ཡང་གཏན་ནས་མི་འགྲུབ་པའི་རྒྱུ་མཚན་ཚང་མ་ཤེས་རྗེས་སུ། བན་སྡེ་འཚོ་ལ་དེ་ཡི་སྐོར་ཁོ་རང་ནང་དུ་སླེབས་ནས་ཉིན་མ་ཉི་ཤུའི་རྗེས་སུ་གསལ་བོ་བཤད།

བན་སྡེ་འཚོས། སྐད་ཆ་དེ་གོ་ནས་དངོས་ནས་འདོད་ཐོག་དུ་རྟ་རྒྱུགས་པ་ལྟར། ད་ཁྱེད་རང་གི་སེམས་ཁྲལ་བྱས་དེ་འོང་རྒྱུ་གང་ཡང་མེད་པ་རེད། དེ་ལས་འུ་གཉིས་ཀྱིས་ད་ནི་མི་ཚེའི་ཁྱིམ་གཞིའི་སྐོར་ལ་འདང་ཞིག་བརྒྱབ་ན་ག་འདྲ་འདུག་ཟེར་ནས་བློ་བཟང་ལ་འབོད་སྐུལ་ཞུས་པ་ལྟར། བློ་བཟང་གིས་ཀྱང་དེ་ལྟར་བྱེད་རྒྱུའི་ཕྱོགས་སུ་བསམ་བློ་གཏོང་བཞིན་པའི་ཉིན་མཚན་མང་བོ་ཞིག་སོང་བའི་མཚན་མོ་ཞིག་ལ། བན་སྡེ་འཚོས་ནམ་རྒྱུན་ལྟར་ཁ་པར་སླེབས།

བློ་བཟང་། ངས་ཁྱེད་རང་ལ་གྲོས་ཁ་ཞིག་བྱེད་དགོས་ཀྱི་འདུག ཁ་པར་ནང་ནས་བཤད་པ་ཡིན་ན་སྟབས་བདེ་བོ་མི་འདུག ངས་ཁྱེད་རང་ལ་བཤད་པ་ལྟར། སང་ཉིན་ང་རང་ཀ་ཅུའི་ཉེ་འགྲམ་གྱི་འོ་མ་བཟོ་གྲྭ་དེ་རུ་ལས་ཀ་བྱེད་དུ་འགྲོ་རྒྱུའི་གྲངས་ལ་ཐོ་འགོད་བྱས་པ་ལྟར་འགྲོ་བཞིན་ཡོད། དེ་རུ་གླ་ཆ་ཡང་འདི་ནས་ལས་ཀ་བྱེད་པ་ལས་བཟང་གི ད་ཁྱེད་རང་འདི་ལ་ཡོང་མི་ཐུབ་ན་ང་རང་སང་ཉིན་དེ་རུ་འགྲོ་རྒྱུའི་ཐག་བཅད་པ་ཡིན་ན་ག་འདྲ་འདུག དེ་འགྲིག་ན། ཉིན་གཉིས་ཀྱི་རྗེས་སུ་ཁྱེད་རང་ཡིན་གཅིག་མིན་གཅིག་ང་རང་ལ་ཐུག་འཕྲད་བྱེད་དུ་ཤོག་དང་། དེ་ནས་ངས་ཁྱེད་རང་ལ་གནས་ཚུལ་གསལ་བོ་བཤད་ཆོག

བློ་བཟང་གིས་དེ་འདྲ་ཡིན་ན་བཟང་གི ང་རང་ལ་གནས་སྐབས་རིང་མི་གྲངས་ལག་ཁྱེར་ཡང་མེད་དུས་ལས་ཀ་ཞིག་བྱེད་རྒྱུའི་ཐད་དུ་ཡང་དཀའ་ངལ་ཡོད་པ་རེད། དེ་ཡིན་དུས་མི་གྲངས་ལག་ཁྱེར་སླེབས་རེག་བར་དུ་མི་སྒུག་ཐབས་མེད་རེད། ཁྱེད་རང་དེ་རུ་སོང་ན་འགྲིག་གི་འདུག དེ་ནས་ངེད་གཉིས་ཀྱིས་དལ་མོར་བལྟ་ཆོག་གི་རེད།

བན་སྡེ་འཚོས། དེས་ན་སང་ནུབ་ཁ་པར་མ་སླེབས་པ་ཡིན་ན། ནངས་ཉིན་ཁྱེད་རང་སྔོན་ཆད་ངེད་གཉིས་ཐོག་མར་བསྡོད་སའི་ཀ་ཅུའི་མགྲོན་ཁང་དེ་རུ་ཕྱི་དྲོ་ཆུ་ཚོད་བདུན་པའི་སྟེང་དུ་སླེབས་ཐུབ་པ་བྱོས། དེ་ནས་འུ་གཉིས་ཐུག་ཆོག