འབའ་ཁྲི་བློ་བཟང་ལུང་རིགས་ལགས་འཛིན་བཟུང་བྱས་ཏེ་གར་སོང་ཆ་མེད་དུ་གྱུར་ནས་ལོ་གཅིག་ལྷག་འགྲོ་བཞིན་འདུག
ཕྱི་ལོ་ ༢༠༢༤ ཟླ་ ༡༢ ཚེས་ ༢༦ ཉིན་མཚོ་སྔོན་ཉིན་རེ་གསར་འགྱུར་ཁང་གིས་སྤེལ་བའི་གནས་ཚུལ་ལྟར་ན། མཚོ་སྔོན་ཞིང་ཆེན་སྲིད་གྲོས་ཀྱི་སྐབས་བཅུ་གསུམ་པའི་གྲོས་ཚོགས་ཐེངས་བཅུ་གཅིག་པའི་ཐོག་མཚོ་སྔོན་ཞིང་ཆེན་གྱི་སྲིད་གྲོས་རྒྱུན་ལས་ཡིན་པ་སྤྲུལ་སྐུ་བློ་བཟང་ལུང་རིགས་ལགས་ཀྱི་གོ་གནས་མེད་པར་བཟོས་རྗེས། འཛིན་བཟུང་གིས་གར་སོང་ཆ་མེད་དུ་གྱུར་ཡོད་འདུག
དེ་འབྲེལ་མཚོ་སྔོན་ཉིན་རེ་གསར་འགྱུར་ཁང་གིས་སྤེལ་བའི་གནས་ཚུལ་ནང་། མཚོ་སྔོན་ཞིང་ཆེན་སྲིད་གྲོས་ཀྱི་སྐབས་བཅུ་གསུམ་པའི་རྒྱུན་ལས་བློ་བཟང་ལུང་རིགས་དང་། རྒྱུན་ལས་ཀྱི་ཚོགས་གཙོ་གཞོན་པ་མ་ཧྥང་ཧྲང་དང་ཀྲའོ་ཤུས་ཀྲང་གསུམ་གྱི་གོ་གནས་མེད་པར་བཟོས་པའི་ཐག་གཅོད་བྱས་པ་ཡིན། ཞེས་གསལ་འདུག་མོད། ཁོ་ཚོའི་གོ་གནས་མེད་པར་བཟོ་དགོས་པའི་རྒྱུ་མཚན་སོགས་གང་ཡང་གསལ་མི་འདུག
སྤྲུལ་སྐུ་བློ་བཟང་ལུང་རིགས་ཀྱིས། རྒྱ་གར་ནས་ཕྱིར་བོད་དུ་ལོག་པའི་དགེ་བཤེས་ཤིག་ལ་རོགས་རམ་བྱས་པ་དང་ཕྱི་རྒྱལ་དུ་དངུལ་བཏང་བའི་ཉེས་འཛུགས་འོག་འཛིན་བཟུང་བཀའ་རྒྱ་བཏང་ཞིང་། ཁོང་དགོན་པ་ནས་ཕྱིར་བུད་དེ་ཆུ་དམར་ལེབ་རྫོང་དུ་བྲོས་བྱོལ་བྱས་ཡོད་ཀྱང་། མཐར་རྒྱ་ནག་གཞུང་གིས་ཁོང་འཛིན་བཟུང་བྱས་ཏེ་གར་སོང་ཆ་མེད་དུ་གྱུར་ཡོད་པ་མ་ཟད། རྒྱ་ནག་གཞུང་གིས་བློ་བཟང་ལུང་རིགས་ལགས་འཛིན་བཟུང་བྱས་པའི་ཁྲིམས་ཐོག་གི་རྒྱུ་རྐྱེན་གང་ཡིན་ཁ་གསལ་འགྲེལ་བརྗོད་བྱས་མེད་ལ། ཁོང་གང་དུ་ཡོད་མེད་དང་ཁྲིམས་ཐོག་གི་རོགས་རམ་འཐོབ་མིན་སོགས་གསལ་བཤད་ཅི་ཡང་བྱས་མེད། ཁོང་འཛིན་བཟུང་བཀག་ཉར་དང་གར་སོང་ཆ་མེད་དུ་གྱུར་བ་དེ་ནི་འགྲོ་བ་མིའི་ཐོབ་ཐང་ལ་འགལ་འཛོལ་ཆེན་པོ་ཞིག་ཆགས་ཡོད་པ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བརྗོད་འདུག
བློ་བཟང་ལུང་རིང་ལགས་ཕྱི་ལོ་ ༡༩༧༥ ཟླ་ ༨ ཚེས་ ༢༥ ཉིན་ཆུ་དམར་ལེབ་རྫོང་དུ་འཁྲུངས་། ༡༩༨༢ ལོར་འབའ་ཁྲི་རྒྱུ་ཆེན་སྐུ་ཕྲེང་བཅུ་གཅིག་པར་ངོས་འཛིན་ཞུས་པ་དང་། ལྷ་སའི་སེ་ར་དགོན་དུ་མི་ལོ་ ༢༡ རིང་སློབ་གཉེར་གནང་ཞིང་། ཕྱི་ལོ ༢༠༠༢ ལོའི་ཟླ་ ༧ པར་བོད་རིག་པའི་ཞིབ་འཇུག་ལྟེ་གནས་ཁང་གི་བཀའ་བསྟན་དཀར་ཆག་རྩོམ་སྒྲིག་ཁང་གི་སློབ་སྟོན་པར་བསྐོ་བཞག་བྱས། ཕྱི་ལོ་ ༢༠༠༣ ལོར་བོད་བརྒྱུད་ནང་བསྟན་མཐོ་རིམ་སློབ་གཉེར་ཁང་ནས་སློབ་མཐར་ཕྱིན་པ་དང་། ཕྱི་ལོ་ ༢༠༡༥ ཟླ་ ༣ པར་མཚོ་སྔོན་དགེ་འོས་སློབ་ཆེན་ནས་རབ་བྱམས་པའི་མཚན་གནས་ཐོབ་ཡོད།
བློ་བཟང་ལུང་རིགས་ལགས་ནི་ཕྱི་ལོ་ ༡༩༧༥ ལོའི་ཟླ་ ༨ པའི་ཚེས་ ༢༥ ཉིན་ཆུ་དམར་ལེབ་རྫོང་གི་དམར་ཤུལ་འབྲོག་སྡེ་རུ་སྐྱེས། ཕྱི་ལོ་ ༡༩༨༢ ལོར་འབར་ཁྲི་བ་རྒྱུད་ཆེན་སྐུ་ཕྲེང་བཅུ་གཅིག་པར་ངོས་འཛིན་གནང་། ༡༩༨༤ ལོར་སེ་ར་དགེ་བཤེས་རྒྱལ་མཚན་ཤཱཀྱ་དྲུང་དུ་དགེ་ཚུལ་སློང་གི་སྡོམ་པ་ཞུས། མི་ལོ་ ༢༡ རིང་་སེ་ར་དགོན་དུ་གཞུང་ཆེན་ཁག་ལ་སྦྱངས་པ་མཐར་ཕྱིན། ཕྱི་ལོ་ ༡༩༩༩ ལོར་ཡུལ་ཤུལ་ནང་བསྟན་མཐུན་ཚོགས་སུ་བྱ་བ་གཉེར། ཕྱི་ལོ་ ༢༠༠༢ ལོའི་ཟླ་ ༧ པར་ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱི་བཀའ་བསྟན་འགྱུར་ཞིབ་འཇུག་ཚད་ལེན་དུ་གདན་ཞུ་དང་བློ་འདྲི་བའི་འགན་ཁུར། ཕྱི་ལོ་ ༢༠༠༣ ལོར་ཀྲུང་གོའི་བོད་བརྒྱུད་མཐོ་རིམ་ནང་བསྟན་སློབ་གླིང་ནས་མཐར་ཕྱིན། ༢༠༠༤ ལོར་ཆུ་དམར་ལེབ་རྫོང་སློབ་ཆུང་གཉིས་པའི་སློབ་གཙོའི་འགན་ཁུར། ༢༠༡༥ ལོའི་ཟླ་ ༣ པར་མཚོ་སྔོན་དགེ་འོས་སློབ་ཆེན་ནས་རབ་འབྱམས་པ་མཐར་ཕྱིན། ༢༠༢༡ ལོར་ཡུལ་ཤུལ་ཁུལ་སྲིད་གྲོས་ཀྱི་འགན་འཛིན་གཞོན་པ་དང་མཚོ་སྔོན་ཞིང་ཆེན་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ། ཡུལ་ཤུལ་ཁུལ་ནང་བསྟན་མཐུན་ཚོགས་ཀྱི་རྒྱུན་ལས་ཚོགས་གཙོ་གཞོན་པ་སོགས་གནང་མྱོང་འདུག
གསར་འགོད་པ། སྐལ་བཟང་སྦྱིན་པ།
