བློ་བཟང་གིས་ནང་དུ་ཉིན་ཐོ་ཞིག་འབྲི་བཞིན་པའི་སྐབས་སུ། ཕྱི་རོལ་ནས་མི་ཞིག་གིས་སྒོ་ཐག་ཐག་ཐག་ཟེར་ནས་བརྡུང་བ་དང་བློ་བཟང་ཡར་བླངས་དེ་སྒོ་ཕྱེ་དུ་སོང་བ་རེད།
སྒོ་ཕྱེ་དུས་སྒོ་ཁ་རུ་འབྱོར་ཡོད་པ་དེ་ནི་ནོར་བུ་བཟང་མོ་ཡིན་པ་ཤེས་ནས་བློ་བཟང་གིས་ཁྱེད་རང་ཡིན་ནམ་ནང་དུ་ཤོག
ནོར་བུ་བཟང་མོ་ནང་དུ་སླེབས་མ་ཐག བློ་བཟང་གི་སྐེ་རུ་འཐམ་ནས་བློ་བཟང་ལ་འོ་ཞིག་བྱས་པ་དང་ཁྱེད་རང་གི་ལམ་ཁ་ནས་དཀའ་ལས་ཁག་མ་སོང་ངམ།
བློ་བཟང་གིས་ལམ་ཁ་ནས་དཀའ་ལས་ཁག་མ་སོང་། ངས་ད་རེབས་རང་གི་ནུ་མོ་མཚོ་མོ་སྐྱིད་དང་རང་གི་སྤུན་མཆེད་བཀྲ་ཤིས་དོན་འགྲུབ། གཞན་གྲྭ་བ་ཞིག་དང་རྡོར་སྐྱབས་ཟེར་བ་ཞིག་བཅས་ཁྲིད་དེ་ཡོང་ཡོད།
དེ་ནས་ཁོ་གཉིས་ཀྱི་རང་རང་གི་འདོད་མོས་ལྟར་གླེང་མོལ་སྣ་ཚོགས་བྱས་པ་དང་བློ་བཟང་གིས་རང་ཉིད་ཀྱི་ལམ་བར་གྱི་དཀའ་ངལ་སྐོར་དང་ནོར་བུ་བཟང་མོས་རང་ཉིད་ཀྱི་གྲོད་ཁོག་ནང་གི་བྱིས་པ་དེ་ཡི་ཕ་རྒན་ཁོ་རང་ཡིན་པ་དེ་སླར་ཡང་དྲན་སྐུལ་བྱས་པ་རེད།
བློ་བཟང་གིས། ཁྱེད་རང་གི་རྒན་པོ་དེ་ཡག་པོ་འདུག་གམ། ཁྱེད་རང་ལ་བྱམས་པོ་བྱེད་ཀྱི་འདུག་གམ། ཁྱེད་གཉིས་ག་དུས་ཤིག་ལ་ཕྱི་རྒྱལ་འགྲོ་ཐུབ་ཀྱི་འདུག་གམ།
ནོར་བུ་བཟང་མོས། ཁོ་རང་དངོས་ནས་ངའི་སྟེང་ལ་ཡག་པོ་འདུག ངེད་གཉིས་མི་རིང་བར་འགྲོ་རྒྱུ་ཡིན། ཉིན་མ་ཁ་ཤས་ཀྱི་རྗེས་སུ་ང་ཚོ་འགྲོ་ཁའི་ཐུགས་སྤྲོ་ཞིག་གྱེས་འཛོམ་ཟ་ཁང་དུ་གཏོང་རྩིས་ཡོད། ཁྱེད་རང་དེར་ཡིན་གཅིག་མིན་གཅིག་ཡོང་རོགས། དེ་ནས་བཟུང་། འུ་གཉིས་ལོ་ངོ་ག་ཚོད་ཅིག་གི་རྗེས་སུ་ཐུག་མིན་སུས་ཤེས། ཡིན་ཡང་། ངས་ཁྱེད་རང་ལ་སྒུག་ནས་འདུག ནམ་ཞིག་ཁྱེད་རང་གི་སེམས་ཐག་གཅོད་སོང་བ་ཡིན་ན། ངས་ཁྱེད་རང་གི་མགོ་དཀར་པོ་ཆགས་ན་ཡང་། ང་རང་སྙེགས་ནས་ཡོང་རྒྱུར་རེ་བ་ཡོད།
བློ་བཟང་གིས། ཁྱེད་རང་ཕར་སོང་ནས་བྱིས་པ་བཙས་པ་ཡིན་ན། བྱིས་པ་སྐྱེས་ནས་བྱིས་པ་དེ་ང་རང་འདྲ་བོ་ཞིག་ཆགས་ན་དེ་དུས་ཁྱེད་གཉིས་ཀྱི་མི་ཚེ་ལ་བར་ཆད་ཏན་ཏན་ཡོང་སྲིད་པ་རེད། དེ་དུས་ཁྱེད་རང་གི་ག་རེ་བྱེད་ཀྱི་ཡིན།
ནོར་བུ་བཟང་མོས། གལ་ཏེ། བྱིས་པ་ཁྱེད་རང་དང་འདྲ་བོ་ཞིག་ཡོད་ཀྱང་། ལོ་ངོ་ཁ་ཤས་ཀྱི་བར་དུ་བྱིས་པ་དེ་སུས་ཡིན་མིན་ངོ་ཐག་གཅོད་མི་སྲིད་པ་རེད། ལོ་ངོ་ཁ་ཤས་ཀྱི་རྗེས་སུ་ངོ་ཐག་གཅོད་སོང་བ་ཡིན་ན། ད་ནི་ང་རང་གི་རང་མགོ་གང་ཙམ་ཐོན་ཡོད་ངེས་ཡིན། དེ་དུས་ང་རང་ལ་འགྱོད་པ་གང་ཡང་མེད། ངས་ཁྱེད་རང་བཙལ་ནས་ཡོང་ཁོ་ཐག་ཡིན། ཁྱེད་རང་གིས་གཞན་ལ་བཟའ་ཚང་མ་བྱེད་རོགས།
བློ་བཟང་གིས། དེ་འདྲ་མ་གསུང་། ད་ནི་ཁྱེད་རང་གཞན་ལ་དབང་ཟིན་པ་དང་། ཐག་རིང་དེ་འདྲ་ཞིག་དུ་བུད་སོང་བ་ཡིན་ན། ཕྱིར་ཡོང་རྒྱུ་ཟེར་བ་དེ་ཡང་ལས་སླ་བོ་མེད་ངེས་ཡིན། ལྷག་པར་དུ་ཁྱེད་རང་གི་རྒན་པོ་དེ་ཁྱེད་རང་ལ་དེ་འདྲའི་བཟང་ན། དངོས་ནས་ལྷན་དུ་མི་ཚེ་བསྐྱེལ་བ་ཡིན་ན་ཡག་པོ་ཡོད་པ་རེད།
ཁོ་གཉིས་ཀྱིས་ཉིན་དེར་ཕན་ཚུན་གྱི་སེམས་ནང་གི་སྐད་ཆ་མི་ཉུང་བ་ཞིག་བཤད་ཀྱིན། ཉིན་མ་དེ་ཡང་ཐུང་ཐུང་ཞིག་གི་སྣང་བ་མ་གཏོགས་སྐྱེ་མེད་པ་དང་། བློ་བཟང་ལ་ནོར་བུ་བཟང་མོས་ཁོ་མོའི་གྲོད་ཁོག་སྟེང་ལ་རེག་དུ་བཅུགས་ནས། འདིར་ལྟོས་དང་བྱིས་པའི་འཕག་འཚག་རྒྱག་གི་འདུག
བློ་བཟང་གིས། ཨེ་་་ དངོས་ནས་རེད་འདུག་ཟེར་ཞོར་དུ། ཁོ་མོའི་གྲོད་ཁོག་སྟེང་ལ་ལག་པའི་ག་ལེར་རེག་རྗེས། རང་གི་རྣ་ཅོག་ཁོ་མོའི་གྲོད་ཁོག་སྒང་དུ་བཞག་ནས་ཉན་པ་རེད།
ཉིན་མ་ཁ་ཤས་ཀྱི་རྗེས་སུ་བློ་བཟང་ཁོ་རང་གི་གྲོགས་པོ་རྙིང་བ་དེ་དང་ལྷན་དུ་ནོར་བུ་བཟང་མོ་བཟའ་མི་གཉིས་ཀྱི་གྱེས་ཁའི་ཐུགས་སྤྲོའི་སྟེང་དུ་སོང་བ་དང་། མཚན་མོ་དེར་བློ་བཟང་གིས་ཆང་ཚོད་མེད་དུ་འཐུང་ནས་བཟི་བཞིན་པའི་སྐབས་སུ། དང་བླང་གིས་སྒོ་ནས་གླུ་བླངས་པ་དང་གླུ་ཚིག་འདྲ་མིན་ལེན་བཞིན་པའི་སྐབས་དེར་ཁོ་རང་གི་འཁྲིས་ཀྱི་གྲོགས་པོ་དེ་ཡི་ཁོ་ལ་ད་འུ་གཉིས་ཕྱིར་ནང་དུ་སོང་ན་རེད།
བློ་བཟང་དེ་མ་ཐག་ཡར་བླངས་ནས། རེད་རེད། འགྲོ་ཟེར་ནས་སྒོ་ཕྱི་རུ་བུད་མ་ཐག བློ་བཟང་གི་གྲོགས་པོ་དེས་སྒོ་ཕྱི་ནས་ནོར་བུ་བཟང་མོའི་ཨ་ཅེ་ལྷ་མོ་ལ་སྐད་ཆ་ཞིག་བཤད་བཞིན་སྐབས་སུ་བློ་བཟང་སྔོན་དུ་ཕྱིན་པ་རེད།
བློ་བཟང་གི་གྲོགས་པོ་ནང་དུ་སླེབས་དུས། བློ་བཟང་གཏན་ནས་རིག་རྒྱུ་མེད་སྟབས། ཕྱིར་སྲང་བར་དུ་བློ་བཟང་འཚོལ་དུ་སོང་བ་རེད། ཡར་མར་གཉིས་ལ་བཙལ་ན་ཡང་ལག་དུ་མ་རེག་པར་ལམ་ཁ་གཞན་ཞིག་སྐོར་ནས་ཕྱིར་ནང་དུ་ལོག་པའི་ལམ་བར་དུ་ཁོ་རང་མུན་ནག་ཁྲོད་དུ་རྐང་བ་གཅིག་ལ་ཐོག་པ་རེད།
མུ་འགོད།
སྤུན་ཟླ་ཁྱེད་ཅག་ཕེབས་པ་དགའ་ཡོད། རྗེས་ཕྱོགས་ཀྱང་གང་ཐུབ་ཀྱིས་ཡོང་རོགས་གནོང་།
བློ་བཟང་འདིས་འདོད་ཆགས་ཡག་པོ་བྱས་ཤེས་པར་འདྲ།་་་་་་་ཧཧཧཧཧཧ
དྲ་གྲོགས་ལགས་གནམ་ལོ་གསར་བའི་ནངབཀྲ་ཤིས་བདེ་ལེགས་ཞུ་བ་དང་ཆབས་ཅིག་ཅི་བསམ་ལྷུན་གྱིས་འགྲུབ་སྨོན་འདུན་ཡང་ཡོད་ད།
དྲ་གྲོགས་བཟང་པོ་ད་ལྟ་རང་བཀླགས་ཟིན་ ཡ་མུ་མཐུད་ཡིན་ད་སྙན་པོ་ཞིག་སྤེལ་འདུག
ཁྱེད་ངའི་ཟིན་བྲིས་སུ་ཕེབས་ན་ངས་ཀྱང་གསར་པ་ཞིག་སྤེལ་ཡོད་