སྨྱུག་མིང་འོག་བོད་ནས་འབྱོར་བའི་རྩོམ་ཡིག
ར་ཛི་ནྰ་མ།
ཕྲེང་བ་འཛིན་མཁན་ནི་དོན་ངོ་མས་རང་དོན་སྒེར་གཤིས་སུ་འཁྱོག་གཟུགས་ཀྱིས་འཛིན་པ་ལས་གྱེས་མཁན་དག་ཡིན་ཞིང་། ཁོ་ཚོའི་མིག་གི་ལམ་དུ་བཤམས་པའི་གཞུང་ལུགས་དང་རྣ་བའི་ཡུལ་དུ་གྱུར་བའི་སློབ་གསོ་དག་ཀྱང་རང་གཅེས་འཛིན་གྱི་ཐབས་ཁོ་ན་ལས་ལྡོག་པར་བྱ་བ་དེ་ཡིན་མོད། རང་ལུས་གྱི་ནར་བོར་བ་དང་མི་ཚེ་དོན་མེད་དུ་བྲན་བཀོལ་བྱེད་པ་ལས་འདའ་འགོངས་ བྱས་ཏེ། ཤེས་རབ་ཀྱི་སྒོ་ནས་གནས་ལུགས་འཚོལ་བ་ནི་རང་ལ་བལྟས་ཏེ་ཡང་དོན་ཆེ་ལ་གཞན་ལ་བལྟས་ཏེ་ཡང་དོན་ཆེ་བ་ཞིག་ཏུ་མཐོང་གིན་ཡོད། ཁོ་ཚོའི་ངག་རྒྱུན་ལ་ཡང་བསྟན་པའི་དོན་དུ་ཉན་ཐོས་ཀྱི་གོ་ཆ་གྱོན་དགོས་པར་གསུངས་འདུག་པ་འདི་ལས་གོ་འོང་བ་ཞིག་ཀྱང་རེད། འོན་ཀྱང་རྣམ་པའི་ཆ་ནས་ཀྱང་ཞི་བ་དང་དྲག་པོ་བར་མ་གང་བསྟན་དུ་རུང་བ་ཞིག་ཡིན་མོད། ཀུན་སློང་གི་ཆ་ནས་གཞན་དོན་གཙོ་བོར་འཛིན་པ་ཞིག་ཡིན་པས་དེ་ལ་བདག་གཅེས་བྱེད་དགོས་པ་རེད། དུས་ཀྱི་བབ་དང་བསྟུན་ནས་མིའི་རིགས་ལ་ཞབས་འདེགས་ཅི་ལྟར་བྱ་ནུས་པ་ཡིན་ན་དེ་ལྟར་བསྒྲུབ་ཆོག་པའི་འོས་འགན་ཡོད་འདུག དཔེར་ན་པཎ་ཆེན་རིན་པོ་ཆེས། ངས་བོད་མི་མང་ལ་དམག་དཔོན་བྱས་ནས་ཕན་ཐོག་ན་དམག་དཔོན་བཅའ་གི་ཡིན། དེ་ལས་གཞན་ལས་སྣེ་གང་གི་སྒོ་ནས་ཕན་ཐོག་ན་ལས་སྣེ་དེ་ཡི་མི་བཅའ་གི་ཡིན་གསུངས་པའི་གཏམ་ཞིག་འདུག་པ་དེ་ཡང་གཞན་ཕན་གྱི་སྒོ་དང་མཐུན་པའི་གསུང་བཤད་ཅིག་ཡིན་པས། ངེད་ཅག་ཕྲེང་བ་འཛིན་པའི་རིགས་ཀྱང་དེ་ལས་མ་འདས་སོ། །
ང་ཚོའི་གཞུང་ལུགས་ནས་ནམ་མཁའི་མཐའ་དང་མཉམ་པའི་སེམས་ཅན་ཀུན་པོའི་དོན་བསྒྲུབ་དགོས་པར་གླེང་བ་དེ་ཡང་ཐོག་མར་ཉེ་ས་ནས་རིང་སར་འགྲོ་དགོས་པར་བཤད་པ་ཞིག་ལོས་ཡིན་སྙམ། དཔེར་ན་རང་ཉིད་ཀྱི་ད་ལྟའི་མ་རྒན་འདི་ཐེ་བའི་མི་རིགས་ནས་མི་རིགས་གཞན་ལ་ཁ་ཕྱོགས་ཏེ་གནས་ལུགས་དར་སྤེལ་དུ་བཏང་བ་ནི་མ་རྒན་སེམས་ཅན་ཐམས་ཅད་ཀྱི་དོན་བྱ་ཚུལ་ཞིག་ཡིན་ངེས། དེའི་ཕྱིར་ཕྲེང་བ་བཟུང་བ་ཀུན་པོས་སྒེར་དོན་གྱི་ཆེད་དུ་སེམས་ཅན་ལ་རྨ་ཕབ་མཁན་གྱི་མི་རིགས་དང་ལྟ་བ་ལ་ཞི་བའི་སྐད་འབོད་བརྒྱག་པའི་ལམ་ཁ་ནི་ཆོས་སྲིད་གང་གི་ཐད་ན་ཡང་ཡོད་ངེས་རེད། གཏམ་རྒྱུད་ཅིག་ཏུ་དེད་དཔོན་སྙིང་རྗེ་ཅན་གྱིས་མི་ནག་མདུང་ཐུང་བསད་པར་རྐྱེན་བྱས་ཏེ་ཚོགས་རྒྱ་ཆེན་པོ་བསགས་པ་དེ་ཡང་རྣམ་པའི་སྟེང་ནས་མ་ཡིན་པར་ཀུན་སློང་གི་སྟེང་ནས་དོན་དེ་འདྲ་ཞིག་འགྲུབ་སོང་བ་ཡིན་ལོས་ཆེ། ད་དུང་སྐད་གྲགས་ཡོད་པའི་རྭ་ལོ་ཙཱ་བས་ཀྱང་མཐུ་ཤེད་ནས་མི་རླབས་ཆེན་འགའ་རེ་བསྒྲལ་བའི་ལོ་རྒྱུས་དག་ལ་བལྟས་པའི་འབྲས་བུར་ང་ཚོས་ཀྱང་ཀུན་སློང་དག་མ་ཞིག་ཡིན་ན་གཞན་དོན་བྱ་བ་ནི་མཚམས་ཁང་ཁོ་ན་ནས་སྨོན་ལམ་འདེབས་རྒྱུ་ཙམ་ཞིག་མ་ཡིན་པ་དེ་གོ་འོང་བས། སེམས་ཅན་གྱི་དོན་ནམ་བདེན་པའི་དོན་དུ་ཕྲེང་བ་བཟུང་བ་ཀུན་གྱིས་རྣམ་པ་དྲག་ཞན་གང་གི་སྒོ་ནས་ཀྱང་ཧུར་བརྩོན་བྱ་ཆོག་པའི་འོས་འགན་ཡོད་འདུག ལྷག་པར་དུ་གནས་ལུགས་ལ་རྒྱབ་ཀྱིས་ཕྱོགས་པའི་ཁ་གཏད་དུ་ཕྲེང་བ་འཛིན་མཁན་དག་གིས་བདེན་པ་བརྡར་ཆོག་ཆོག་ཅིག་ཡིན་པས། བྱབ་ཆུང་རེ་འགས་དེ་ནི་ཆོས་དང་མི་མཐུན་པ་ཞིག་རེད་ཅེས་ཟེར་བ་དང་བསྟན་པའི་དོན་དུ་མ་རེད་ཟེར་བ་ནི་མིག་རྒྱང་ཐུང་དྲགས་པས་ལན་པ་ཞིག་རེད་འདུག ཆོས་ལུགས་རིག་གནས་ནི་མི་རིགས་ལ་ཞབས་འདེགས་སྒྲུབ་སྤྱད་ཅིག་ཡིན་པ་དང་། དེ་བརྒྱུད་འཛིན་བྱེད་མཁན་དག་ནི་མི་རིགས་ལ་ཞབས་འདེགས་སྒྲུབ་མཁན་ཞིག་ངེས་པར་དུ་ཡིན་དགོས་པ་རེད། མི་རིགས་ལ་ཞབས་འདེགས་བསྒྲུབ་ཕྱོགས་ཀྱི་ཐད་ནས་དྲག་པོ་དང་ཞི་བ་གང་རུང་ཡོང་སྲིད་པ་རེད། འོན་ཀྱང་འདི་ནས་དྲག་པོ་ཟེར་བ་དེ་ནི་མེ་མདའ་བཀོལ་བ་དང་མེ་སྒྱོགས་བཀོལ་བ་ལྟ་བུ་ཞིག་མ་ཡིན་པར། གནས་ལུགས་ཀྱི་ཆེད་དུ་གཞན་གྱི་གདོང་ལ་གདོང་ཕྱོགས་ནས་སྐད་འབོད་འདོན་པ་དང་མི་མང་གི་སྣེ་འཁྲིད་ནས་བདེན་ལུགས་རྩོད་སྟངས་ཤིག་རེད། དཔེར་ན་དྲང་བདེན་མ་ཡིན་པའི་སྲིད་གཞུང་དང་དཔོན་རིགས་ལ་གབ་པའི་ཚུལ་དུ་འམ་ཡང་ན་གཞུང་ལས་ཁང་ག་གེ་མོ་ནས་སྐད་གདངས་དམའ་མོས་སེམས་ངོ་བསྟན་ཏེ་གནས་ལུགས་བཤད་པས་འབྲས་བུ་གང་ཡང་འབྱུང་གི་མ་རེད། དེའི་ཕྱིར་འཛམ་གླིང་མི་མང་གི་རྣ་བས་ཐོས་པ་དང་མིག་གིས་མཐོང་ཐུབ་པའི་བྱ་འགུལ་ཞིག་ལ་ཅིས་ཀྱང་བརྩོན་དགོས་པ་དེ་རེད། དེའི་ཕྱིར་སྐབས་ཀྱི་དགེ་བ་ལ་འདང་རྒྱག་མཁན་གྱི་ཕྲེང་འཛིན་པ་མང་པོ་ཞིག་གིས་ཆེ་ས་ནས་རང་སྲོག་བོར་ཡོད་པ་དང་དམའ་ས་ནས་ཀྱང་སྐད་འབོད་འདོན་པའི་བྱ་འགུལ་དུ་ཞུགས་པ་དེ་རེད། ངས་བལྟས་ན་བྱ་འགུལ་འདི་དག་ཆོས་དང་ཆབ་སྲིད་གང་ལ་ཡང་འགལ་མི་འདུག་པ་ཞིག་ལས་ཅི་ཡང་སྣང་གིན་མི་འདུག ཆབ་སྲིད་ཀྱི་ཕྱོགས་ནས་ཀྱང་ཆེ་བས་ཆུང་བར་གཉའ་གནོན་དང་བྲན་བཀོལ་སྒེར་གཅོད་བཅས་ཀྱི་བྱ་འགུལ་སྤེལ་ན་བྱ་འགུལ་སྤེལ་ཡུལ་གྱི་མི་སེར་དག་ལ་ཡང་འོས་ལངས་དང་སྐད་འབོད་གཏོང་རྒྱུའི་ཐོབ་ཐང་ཡོད་པ་འགྲོ་བ་མིའི་བདེན་ལུགས་ཀྱི་ནང་དུ་གསལ་བོ་ཡིན་པ་དེ་རེད།
ཆོས་ཕྱོགས་ནས་བལྟས་ཀྱང་འགལ་བ་མེད་སྟངས་གོང་དུ་གླེང་བ་དེ་འདྲ་ཞིག་ཡིན་པས་བསྐྱར་དུ་བཤད་དགོས་མེད། འདས་ལོའི་སྐབས་སུ་བལྟས་ན་ཡང་ཤེས་འོང་བ་ཞིག་རེད། ཕྲེང་འཛིན་པ་དག་གི་སེམས་ངོར་སྡུག་བསྔལ་འདི་བཤད་ས་ཞིག་གང་དུ་ཡོད་དམ་སྙམ་ནས་སྲང་ལམ་ན་རྒྱུག་པ་ཙམ་ལས། རང་ཉིད་དམག་ཇི་འདྲ་ཞིག་ལ་དམར་འཛིང་བྱེད་ཐུབ་བམ་སྙམ་པ་ཞིག་བློ་ཡི་གུད་དུ་ཡང་ མེད། དེ་ཡི་རྟགས་སུ་ལག་པའི་ནང་ན་མཚོན་ཆའི་རིགས་ཕར་བསལ་རྡོ་བ་བྱེའུ་མགོ་ཙམ་ཞིག་ཀྱང་ཡོད་པ་མ་རེད། ཁོ་ཚོས་མདུན་ཐད་ན་རུ་དཔུང་བསྒྲིགས་པ་དག་གི་རྫིག་ཉམས་མ་མཐོང་བ་དང་དེ་དག་གིས་དྲག་པོའི་བྱ་སྤྱོད་མི་སྤེལ་བར་ཡིད་ཆེས་ཡོད་པས་མ་ཡིན་ཏེ། ཁོ་ཚོའི་ལག་གི་མེ་མདའ་དང་ཁོ་ཚོས་དྲག་པོའི་བྱ་སྤྱོད་སྤེལ་སྟངས་སྔར་ནས་རྣ་བས་ཐོས་ཡོད་ལ། མངོན་སུམ་དུ་མིག་གིས་ཀྱང་མཐོང་ཡོད་མོད་འོན་ཀྱང་ད་དུང་ཚོམ་མེད་དུ་ལག་ལ་ཕྲེང་བ་ཁོ་ན་བཟུང་ནས་རྒྱུག་པ་ནི་བདེན་ལུགས་ལ་ཡིད་ཆེ་བས་རེད་འདུག ད་དུང་འཛམ་གླིང་ཞི་བདེ་ལ་མིག་དཔེ་སྟོན་པའི་སླད་དུ་ཡིན་འདུག དེ་ལྟ་བུའི་བསམ་བློ་རྣམ་དག་ཅིག་སྐྱེས་ཡོད་པ་ནི་ང་ཚོ་ལ་དམངས་གཙོ་དང་འགྲོ་བ་མིའི་ཐོབ་ཐང་རྩོད་ལེན་སོགས་ཀྱི་རྟོགས་པ་སད་འདུག་པས་མ་ཡིན་པར་གཞན་ཕན་སྙིང་རྗེ་ཅན་གྱི་ཆོས་ལུགས་ཤིག་ཡོད་པས་ཡིན་འདུག་སྟབས། ང་ཚོའི་ཆོས་ལུགས་པའི་སྙིང་སྟོབས་དང་ཆོས་ལུགས་གཞུང་ལུགས་ཀྱི་ལྟ་གྲུབ་ཀུན་ལ་སྨན་པ་དེ་ལྷང་ལ་བུད་པ་ཞིག་རེད། དེ་བས་མེ་མདའ་འཛིན་མཁན་དག་གིས་ང་ཚོ་ལ་མེ་མདའ་ཅི་ལྟར་འཕེན་དགོས་པའི་གོ་སྐབས་མང་པོ་མ་རྙེད་པ་དང་། ང་ཚོ་ལ་སྒྲོ་འདོགས་བྱེད་དགོས་སའི་གཏམ་ཡན་གང་ཡང་མ་རེག་པའི་སྟབས་ཀྱིས་བཙན་ཁང་དང་མགོན་ཁང་ནང་གི་ཡི་དམ་ཆོས་སྐྱོང་གི་ཕྱག་ཆ་དང་འཚོ་བའི་ཡོ་བྱད་ནང་གི་མར་གྲི་དང་སོ་གྲི་དག་བརྙན་འཕྲིན་དུ་བསྒྱུར་དགོས་བྱུང་བ་རེད། ནམ་རྒྱུན་མེ་མདའ་འཛིན་མཁན་དག་ལ་མཚོན་ན་ང་ཚོའི་ཁ་བྲལ་གྱི་བྱ་འགུལ་མང་པོ་ཞིག་ནི་མི་མང་གིས་བསང་ཕུད་པ་དང་ལྷ་རྒྱལ་གཏོང་བ་གསོལ་འདེབས་འདོན་པ། སྐུ་པར་བཤམས་པ་དག་ལ་ངོས་བཟུང་འདུག་པས་ཁོ་ཚོས་མེ་མདའ་འཕེན་ས་ལར་ནས་རྙེད་གིན་མེད་མོད། སྲང་ལམ་གཡས་གཡོན་ན་མཚོན་འགོག་དང་མཚོན་ཆ་གང་བཟང་རེ་འཁྱེར་ནས་རུ་དཔུང་ནམ་རྒྱུན་གྲལ་དུ་བསྒྲིགས་འདུག ཁོ་ཚོས་བཤད་པའི་འཆམ་མཐུན་ཟེར་བ་ནི་འཆམ་ཕབ་ཅིག་དང་ཅི་འདྲའི་མཚུངས་ཨང་།
མེ་མདའ་འཛིན་མཁན་དག་ལ་མཚོན་ན་ནི་མེ་མདའ་རིང་ཐུང་ཅི་རིགས་ཤིག་གི་ཁོག་ལ་དུག་རྫས་དང་མདེའུ་རིང་ཐུང་ཅི་རིགས་ཤིག་བླུཊ་ནས་སུ་ཞིག་གི་སྟེང་ལ་འཕེན་ཆོག་ཆོག་དང་གང་ཞིག་དེ་རུ་བསླེབས་ན་དེ་ལ་ཡ་ལན་དྲག་པོའི་སྒོ་ནས་རྩོད་ཆོག་ཆོག་བྱས་ཡོད་འདུག འགྲོ་འདུག་སྤྱོད་གསུམ་གང་གི་ཐད་ནས་ཀྱང་གདུག་རྩུབ་ཀྱི་རྣམ་པ་ལྷན་ནེ་ལྷང་ངེར་བུད་ཡོད། སྐད་ཆ་ཤོད་དུས་དྲག་སྐད་འདོན་པ་དང་ཡར་འགྲོ་མར་འགྲོ་བྱེད་སྐབས་ལྟིག་སྒྲ་དང་ཁྲོག་སྒྲ་མཐོ་བར་གཏོང་བར་མ་ཟད། བྱིས་པ་ཡན་ཆད་ལ་མེ་མདའི་མཆུ་དང་མདེའུ་ཡི་ཕྲེང་བ་ངོམ་ནས་མིའི་སེམས་ལ་ཅི་ལྟར་འཚེ་ན་དེ་ལྟར་བྱེད་པ་རེད། ཁོ་ཚོའི་དམིགས་ཡུལ་ན་བདེན་ལུགས་ཟེར་བ་དང་ཐོབ་ཐང་ཟེར་བ་ཞིག་ལར་ནས་མེད་པར་གཉའ་གནོན་དང་འཇིགས་སྐུལ་ཁོ་ནས་ཁྱབ་ཡོད་འདུག དཔེར་ན་འདས་ལོར་གྲྭ་ཤག་དག་སྔོག་བཤེར་བྱེད་དུས་མེ་མདའ་འཛིན་མཁན་དག་གིས་ཁང་བདག་གི་བྲང་དང་གཡས་གཡོན་ལ་མེ་མདའ་བཙུགས་ནས་ཅི་འདོད་བྱེད་པར་མ་ཟད། ཁང་བའི་རྒྱ་སྒོ་ཡན་ཆད་ལ་ལག་པ་མ་རེག་པར་རྡོག་པས་གཞུ་བ་རེད། ཁང་བདག་ཁྱིམ་དུ་མ་བསླེབས་པ་དག་གིས་ཁང་བའི་སྒོ་ལ་སྟ་རེས་བསྣུན་ཏེ་བཅགས་པར་མ་ ཟད། དངོས་རྫས་བོར་བརླགས་ཀྱི་བྱ་བ་མང་དུ་བྱུང་ཡོད་མོད། ཕྲེང་འཛིན་པ་དག་ལ་དབང་ཆུང་དྲགས་པས་དང་མེ་མདའ་འཛིན་མཁན་དག་ལ་དྲག་ཤུགས་མཐོ་དྲགས་པས་ང་ཚོས་ཅི་ལྟར་བྱ། ཁོ་ཚོ་ལ་ཕྱོགས་གཅིག་ནས་བཤད་ན་ཁེག་ཡང་མི་འདུག་སྟེ། རང་གི་ཡན་ཆད་ན་ད་དུང་སྟག་གི་མཆེ་བ་ལས་རྣོ་བའི་འཇིགས་ཟིལ་ཞིག་ཡོད་པས་ཡིན་སྲིད་དོ།། དོན་མང་པོ་ཞིག་ལ་དབྱེ་ཞིབ་བྱ་རྒྱུ་ཞིག་བྱུང་ན་འཕྲེང་བ་འཛིན་མཁན་གྱི་རིགས་ནི་རྒྱལ་གཅེས་པ་དང་མེ་མདའ་འཛིན་མཁན་གྱི་རིགས་ནི་སྒེར་གཅོད་པ་རེད་ཅེས་ན་ཡང་ ང་ཚོའི་གནས་བབ་འདིའི་འོག་ནས་མི་འགལ་བར་སེམས་སོ།། དེ་ལས་གཞན་མེ་མདའ་མཁན་འཛིན་དག་ལ་མཚོན་ན་རང་སྲུང་གཙོ་བོ་བྱེད་པ་ལས་རྒྱལ་ཁབ་དང་མི་རིགས་གཙོ་བོ་བྱེད་ཀྱིན་མི་འདུག དེ་ཡང་སློབ་གསོ་ལ་རེག་ལས་པ་ཞིག་ཡིན་ལོས་ཆེ། ཁོ་ཚོའི་རྣ་ཁར་འོང་བ་ནི་ཕྲེང་བ་འཛིན་མཁན་དག་ནི་འཇིགས་སྐུལ་བ། ལོག་སྤྱོད་པ། རྡུང་བ་བོ། འཕྲོག་པ་པོ་ཞིག་ཏུ་བསྒྲགས་པ་མང་དྲགས་པས་གོམས་པའི་གཤིས་སུ་སོང་བ་ཡིན་ངེས། གོ་ཐོས་ལ་འཕྲེང་བ་འཛིན་པ་དག་རྒྱ་མོ་ལོ་གཞོན་ཚོས་མཐོང་ན་སྡུག་སྐད་བཏོན་ནས་འབྲོ་བར་བཤད། ངོ་མ་འདི་ལྟའི་སློབ་གསོ་ཞིག་གི་འོག་ནས་ཉམ་ཆུང་བའི་ཕྲེང་བ་འཛིན་པ་དག་ཅི་ལྟར་འདུག་དགོས་ཨང་། ཤོག་དངུལ་གྱིས་གྱོང་གུད་གསུབ་ཏུ་མེད་པ་ཞིག་ཡིན་པ་མེ་མདའ་འཛིན་མཁན་དག་གིས་ངོ་མ་མ་ཤེས་པ་ཡིན་ནམ། ན་ནིང་མེ་མདའ་བསྟན་ནས་འཇིགས་ཟིང་གི་ནང་དུ་དེ་འདྲ་ཞིག་བསྐྱལ་ཅིང་། ད་ལོར་ཤོག་དངུལ་རེ་བསྟན་ནས་འཆམ་མཐུན་འཆམ་མཐུན་ཞེས་འབོད་སྐུལ་གཏོང་བ་ནི་ཁ་མཚར་སྐྱིད་པོ་ཞིག་མ་རེད་དམ།
༢ ཕྲེང་བ་འཛིན་མཁན་དག་ལ་གཞན་གྱི་སྲོག་ལ་རྒོལ་བའི་སྙིང་སྟོབས་མེད་པ་མིན།
ཕྲེང་བ་འཛིན་མཁན་དག་ལ་འགས་གཏོར་དང་དམར་གསོད་བྱེད་པའི་སྙིང་སྟོབས་མེད་པ་མ་རེད། རང་ལུས་ལ་མེ་སྦར་ནས་རང་སྲོག་ཐལ་བ་སྤར་གང་ལ་ཡང་རྩིས་མི་བརྒྱགས་པའི་དཔའ་བོ་དང་། བདེན་པའི་འབོད་སྐད་སིང་སིང་སྒྲོག་གིན་མེ་མདའ་དང་མེ་སྒྱོགས་ཀྱི་ཁ་ན་རི་བོ་བཞིན་དུ་ཀྲོང་ངེར་འགྱིངས་པའི་ངང་ཚུལ་ལ་ལྟོས་ཤིག་དང་། རོ་སྐྱིན་ལ་རོ་ལེན་མི་ཐུབ་པའི་སྡར་མ་ཝ་འདྲ་བ་ཞིག་ལར་ནས་མིན་པ་འཛམ་གླིང་མི་མང་གིས་ཤེས་ངེས་པ་དེ་རེད། རྔ་བའི་ཡུལ་གྱི་གྲྭ་བ་བཀྲ་བྷེ་དང་རྭ་རྒྱ་དགོན་པའི་བཀྲ་ཤིས་བཟང་པོ་དེ་མིན་ས་བྱི་ལོའི་གསར་བརྗེས་ཆེན་མོའི་སྐབས་ཀྱི་བདེན་པའི་སྙིང་ལ་སྟག་གི་དཔའ་ཚུལ་རྫོགས་པ་དག་གིས་ར་སྤྲད་འོང་བ་དེའོ།། འོན་ཀྱང་ཞི་བའི་སྦྱོར་བ་ལ་མཐའ་གཅིག་ཏུ་རང་སྲོག་འབུལ་བའི་མི་རིགས་འདི་ནི་མིང་དུ་གྲགས་པའི་ཞི་བདེ་ཡི་རྟགས་མ་ཞིག་ལ་རྒྱབ་ཀྱིས་བསྙེས་པའི་རུས་པ་ཅན་ཞིག་ཡིན་པའི་ཆ་ནས། དྲག་པོའི་ལས་ལ་ནམ་ཡང་རིང་དུ་གྱུར་བ་རེད། དེ་མིན་ཤར་ཏི་ཀི་སུ་ཐེན་གྱིས་རྒྱ་གཞུང་ལ་རྒོལ་བའི་སྙིང་སྟོབས་དེ་འདྲ་ང་ཚོ་ལ་ཡར་ལྡན་དུ་ཚང་ཡོད་པར་མ་ཟད། དེ་ལས་ཀྱང་ཚད་མཐོ་བའི་སྙིང་སྟོབས་ཡོད། རྒྱ་གར་གྱི་གནྔྷེ་ཡིས་མཚོན་ཆ་འཛིན་མཁན་དག་ནི་སྡར་མ་དང་མཚོན་ཆ་མི་འཛིན་མཁན་དེ་ནི་དཔའ་བོར་བགྲངས་འདུག་པ་དངོས་ནས་གནས་ལུགས་རྒྱ་ཆེན་པོ་འདུག་པའི་གཏམ་རེད།
ང་ཚོས་རིག་གཞུང་གི་ངོས་ནས་སམ་ཡང་ན་ང་ཚོའི་སྲིད་ལུགས་ཀྱི་འགྲོ་སྟངས་གང་གི་ཆ་ནས་ཀྱང་བཟོད་པ་གཙོ་བོར་བྱེད་པ་དང་གཞན་ཕན་གཙོ་བོར་བྱེད་པ་རེད། དེའི་ཕྱིར་ང་ཚོ་ལ་ཞི་བདེ་ཡི་ལྟེ་བ་ཞིག་ཏུ་ངོས་འཛིན་ཆོག་པ་རེད། ན་ནིང་ལྟ་བུའི་ཆེས་གནད་འགག་གི་སྐབས་སུ་ཡང་ཞི་བའི་ངོ་རྒོལ་ལས་འདའ་འགོངས་བྱས་མེད་པ་རེད། དེ་མིན་རྒྱལ་ཁབ་གཞན་དང་མི་རིགས་གཞན་ལ་མཚོན་ན་ཞི་བདེ་ཞེས་པ་ད་དུང་ཁ་གཡང་ཙམ་གྱི་ཚུལ་དུ་ལུས་འདུག དོན་གྱི་འགག་མདོར་ཐུག་ནས་ལག་པ་མཚོན་ཆར་འཆིང་བཞིན་ཡོད་པ་སུ་ཞིག་གིས་ཀྱང་ར་སྤྲོད་དགོས་པ་མི་འདུག དཔེར་ན་སྒེར་གཅོད་པ་འདི་དག་ལ་མཚོན་ན་ཆེས་ཞི་བའི་ལྟེ་གནས་བོད་པ་ཚོའི་ལག་ཏུ་མཚོན་ཆ་འབར་རྫས་ཅི་ཡང་མེད་པ་ཉི་མ་ཤར་ཤར་དང་ནམ་མཁའ་ལངས་ལངས་ཀྱི་ཚུལ་དུ་ཤེས་མོད། དེང་རབས་ཀྱི་སྒྱོགས་མདེལ་དང་མེ་མདའ་སྣ་ཚོགས་ལག་ཏུ་འཕྱར་ཞིང་ལྐོག་ཏུ་སྦ་ནས་འཁྱེར་འོང་གིན་འདུག་པར་བལྟས་པས་ཤེས་ནུས། ཁོ་ཚོས་རྒྱལ་ཁ་ནི་མེ་མདའི་ཁ་ན་ཡོད་ཅེས་པའི་གཏམ་རྙིང་ཞིག་ལ་སྐྱབས་འཆས་ནས་ དུས་རབས་ཉེར་གཅིག་པའི་རིང་ལ་ཡང་ད་དུང་གདུག་རྩུབ་སྙིང་འགས་པ་ལྟ་བུ་ཞིག་སྟོན་གིན་ང་ཚོའི་མཐའ་བསྐོར་ནས་ཡོད་མོད། ང་ཚོ་ནི་ཞི་བས་ལས་ལ་སྦྱོང་མཁན་ཞིག་ཡིན་པའི་ངོས་ནས་དེ་ཡི་སྲོག་ལ་རྒོལ་དགོས་ པའི་བསམ་བློ་ཞིག་ལར་ནས་མེད། རེ་ཞུ་དང་སྐད་འབོད་ཁོ་ནར་ཤུགས་རྒྱག་གིན་ཡོད། འོན་ཀྱང་ཁ་དཔེར་དབང་ཆེན་གྱིས་རྫ་མ་བཅགས་ན་སྦྱོར་སྲོལ་ཡོད་པ་དང་། དབང་མེད་ཀྱི་གོ་རེ་བཅགས་ན་ཟ་སྲོལ་མེད་པའི་ཡུལ་དུ་ལྷུང་བས་ང་ཚོར་གདུག་བཙིར་གནོན་བཙིར་ཤིན་ཏུ་ལྕི་མོད། བདེན་པ་ལ་རང་སྲོག་འབུལ་བའི་ཕྲེང་འཛིན་པ་དག་གིས་སྐབས་ཀྱི་གཡོ་སྒྱུ་དང་གདུག་རྩུབ་ལ་མགོ་བོ་འབུལ་མི་སྲིད་པར་མ་ཟད། དུས་ཚོད་ཐུང་ཐུང་ཞིག་གི་དགོས་མཁོ་མ་ཡིན་པར་མི་ལོ་དུ་མར་འགུལ་སྐྱོད་ཅིག་བྱ་དགོས་པ་ཡང་རྟོགས་ཡོད། ང་ཚོ་ལ་མིག་དང་རྣ་བ་གསལ་བོ་ཞིག་ཡོད་པས་རྒྱལ་གཅེས་པ་གནྔྷེ་སོགས་ཀྱིས་ཀྱང་ལོ་ངོ་ག་ཙམ་ལ་དཀའ་ལས་བརྒྱབས་པའི་རྣམ་ཐར་ལ་སློབ་སྦྱོང་བྱ་གིན་ཡོད། དེ་ལས་གཞན་སྒེར་གཅོད་པའི་འཁྲུལ་ཤེས་ལ་ང་ཚོ་འཕྲེང་འཛིན་པ་དག་གིས་མི་གཅིག་གི་ངོར་བལྟས་ནས་སྡོད་ཀྱིན་ཡོད་པའི་བསམ་བློ་བཏང་སྟེ་ང་ཚོར་དུས་ཚོད་རིང་དུ་བསྲིངས་པ་ནི་གོ་སྐབས་མཆོག་ཏུ་གྱུར་བ་ཞིག་ཏུ་སེམས་མོད། ང་ཚོས་ནི་མི་རིགས་ཤིག་གི་མ་འོངས་པར་བསམ་བློ་གཏོང་གིན་ཡོད་པ་ལས་མི་གཅིག་གི་ཚེ་ཡི་རིང་ཐུང་ལ་བསམ་བློ་གཏོང་གིན་མེད། དེ་ནི་ཁོ་ཚོས་ང་ཚོར་འཕྱ་སྨོད་བྱས་དྲགས་པ་རེད། རྒྱ་ནག་པའི་ཁ་དཔེར་ཁྲེན་ཀྲིན་ཤི་ན་ད་དུང་ཁྲེན་ཀྲིན་ཡོད་ཅེས་པ་དེ་དང་ལྟོ་སྦྱར་ན་འགྲིག་པོ་རེད། དེ་ལས་གཞན་ང་ཚོའི་བྱེས་གྱར་བ་དག་གི་ལམ་ལུགས་ནི་བཀས་བཀོལ་རྒྱུད་འཛིན་ཡིན་པ་དང་དེ་སླར་གསོ་བྱ་འདོད་ཡོད་པ་དང་། མི་གཅིག་གི་སྒེར་གཅོད་ཀྱི་ལྟ་བ་ཡིན་ཚུལ་སོགས་བྱིས་པ་ན་ཚོད་ཤེད་མ་རྒྱས་པ་དག་ལ་རི་གན་གི་ཕ་གི་ན་སྤྱང་ཀི་ཡོད་ཅེས་པ་ལྟ་བུའི་སྐད་ཆ་རྫུན་མ་ལབ་པ་འདི་ཡང་སྐབས་ཀྱི་སྒེར་གཅོད་མགོ་ཡེངས་རྩིང་རགས་ཅན་རེ་འགས་དུས་ཚོད་ཕུད་སྤྱད་ཙམ་ལས་ཅི་ཡང་མིན་པ་ང་ཚོས་ཤེས་ཡོད་པར་མ་ཟད། ལྐོག་ཏུ་དགོད་ཀྱིན་ཡོད། བོད་ནང་ལ་འཕེལ་རྒྱས་ཡོངས་ཡོད་ཚད་རྒྱ་ལབ་སྟོང་ལབ་བྱས་ཏེ་གསར་འགྱུར་རྫུན་མ་རེར་སྒོར་མོ་དང་གོ་ས་ཕྲན་བུ་རེ་ཡི་རྔན་པ་དང་ལྷན་དུ་སྒྲོག་གིན་ཡོད་པ་དེ་ཡང་ནམ་གསལ་གསལ་ཡིན་པ་ཀུན་གྱིས་ཤེས་པ་དེ་ལགས་པས་ང་ཚོ་ལྐོག་ན་ངུ་གིན་ཡོད། བྱ་བ་ཙག་ཙིག་འདི་དང་འདིའི་རིགས་ནས་བྱ་བ་ཆེན་པོ་རྒྱལ་ཁབ་ཀྱི་བརྟན་བརླིང་བར་དུ་རྫུན་གྱི་འཕྲེང་བསྒྲིགས་ཏེ་མིག་ལྡན་ལ་ལོང་བས་མགོ་སྐོར་བྱེད་པའི་བྱ་ཐབས་ཡ་ང་བ་འདི་ནམ་ཞིག་གི་དུས་ལ་མཇུག་རྫོགས་པར་ང་ཚོར་ཡིད་ཆེ་ཡང་ཡོད། འོན་ཀྱང་ཁོ་ཚོའི་གཞུང་ལུགས་ན་རྫུན་པ་མང་དུ་བསྒྲིགས་ན་མཐར་བདེན་པར་འགྱུར་བའི་བཤད་སྟངས་ཤིག་ཡོད་པ་དེར་ཁོ་ཚོས་ཡིད་ཆེས་བྱས་ཏེ་ཧུར་ཐག་གིས་འཇུ་གིན་འདུག་ཀྱང་། དེ་ནི་འཕྲལ་གྱི་སྣང་ལུགས་ཤིག་ལས་ལོ་ངོ་བརྒྱ་ཕྲག་ལ་སྲ་ཞིང་འགྱུར་མེད་ཀྱི་བདེན་པ་ཞིག་ག་ལ་ཡིན། དེ་ནི་དཔེར་ན་འཕྲལ་གྱི་འཁྲུལ་རྒྱུས་སླད་པའི་དུང་དཀར་སེར་སྣང་ཙམ་ཡིན་པས་བདེན་པའི་ཕུ་ངོ་མ་དེ་ལྷང་ལ་འབུད་པར་ཡིད་ཆེ་ང་ཚོར་མཐའ་གཅིག་ཏུ་ཡོད། དེའི་ཕྱིར་ང་ཚོའི་འཕྲེང་འཛིན་པའི་འབོད་སྐུལ་དང་རེ་ཞུ་ནི་མི་རབས་ནས་མི་རབས་སུ་རྒྱུན་སྐྱོང་ཐུབ་རྒྱུར་ལྷག་པར་ཡིད་རྟོན་བརྟན་པོ་ཡོད། དུས་རབས་རེ་རེ་བརྗེས་ན་འཛམ་གླིང་མི་མང་དང་ཕྲེང་འཛིན་པའི་སྡེ་ཡི་མིག་དབང་ཇེ་གསལ་ཡིན་པར་མ་ཟད། སྒེར་གཅོད་པ་རང་ལ་མཚོན་ན་ཡང་ངོ་ཚ་ཇེ་ཆེ་ཡིན་པ་རྟེན་འབྲེལ་གྱི་གཤིས་སུ་གྲུབ་ཅིང་། སྒེར་གཅོད་པའི་རིགས་སུ་གཏོགས་པའི་རྟོགས་སད་པ་ལོ་རེ་ནས་ལོ་རེར་ཇེ་མང་དུ་འགྲོ་བ་འདིས་ཀྱང་བདེན་དཔང་འཕེར་བ་ཞིག་རེད་འདུག སྒེར་གཅོད་པ་ཚོ་ལ་མཚོན་ན་དམག་མི་དང་མི་འབོར་གྱི་གྲངས་ལ་དམིགས་ནས་ཡིད་ཚིམས་པ་དང་། ད་ལྟའི་དཔལ་འབྱོར་གྱི་གནས་སྟངས་ཙམ་ལ་བལྟས་ཏེ་ང་རྒྱལ་ཆེན་པོ་བྱེད་བཞིན་ཡོད་ཀྱང་། མི་ནི་དཔལ་འབྱོར་གྱི་གཡོག་ཏུ་ནམ་ནམ་ཞར་ཞར་ལ་ཚུད་པ་ཞིག་མ་ཡིན་པར་མཐར་ཐུག་གི་མིའི་འདོད་བློ་ནི་ནང་སེམས་ཀྱི་ཞི་བ་དེ་སྙེགས་པར་འདོད་ཀྱིན་ཡོད་པ་ནི་དངོས་པོའི་ཆོས་ཉིད་ཀྱིས་ར་འཕྲོད་འོང་བ་ཞིག་ཡིན་སྟབས། རྣམ་པ་ཐམས་ཅད་དུ་རྟག་པ་ཐེར་ཟུག་གི་བསམ་བློ་གཏོང་མཁན་དག་གི་བསམ་ཚུལ་ལ་དགོད་བྲོ་བའི་ལྟ་ཚུལ་བྱུང་ཡོད།
འདི་ནི་ལྷག་པར་ཕྲེང་འཛིན་པའི་ཚོགས་ཀྱིས་སྔར་ནས་ཤེས་ཡོད་པའི་སྡོམ་ཚིག་ཅིག་ཡིན། ཕྱི་ཡི་འགྱུར་བ་དང་ནང་གི་འགྱུར་བ་གང་ལ་བསམ་བློ་བཏང་ན་ཡང་ང་ཚོའི་ལས་འགུལ་ལ་འབྲས་བུ་མི་འབྱུང་བ་དང་། གཞན་གྱི་རྒྱལ་ཁ་ནི་རྣམ་པར་མི་གཡོ་བ་ཞིག་མིན་པའི་གནས་ལུགས་ཀྱིས་ང་ཚོས་མུ་མཐུད་དུ་ཞི་བའི་སྐད་འབོད་གཏོང་སྲིད་ཅིང་། བདེན་པར་རེ་བ་ཤུགས་ཆེན་བརྒྱག་ངེས་ཡིན། འོན་ཀྱང་ང་ཚོས་སྒེར་གཅོད་པར་གོ་སྐབས་སྟེར་བའི་ལས་འགུལ་དྲག་པོའི་ཆ་དང་འདྲེས་པའི་རྡུང་འཕྲོག་བཅོམ་གསུམ་ནམ་ཡང་བྱེད་གི་མ་རེད། རྒྱུ་མཚན་ནི་ང་ཚོ་རང་རྒྱལ་གཞན་ཕམ་ཁོ་ནར་བརྩོན་པ་དག་མ་ཡིན་པར་རང་གཞན་གཉིས་ལ་མིག་གིས་བལྟས་ཏེ་བདེན་ལུགས་འཚོལ་མཁན་ཞིག་ཡིན་པའི་ཕྱིར་རོ།། ང་ཚོའི་འཕྲེང་འཛིན་པའི་ཚོགས་ཀྱི་ལངས་ཕྱོགས་ནི་སྒེར་གཅོད་པའི་མེ་མདའི་ཁ་ནས་མི་གཅིག་མ་གཏོགས་ལྷག་པར་མི་འགྱུར་རུང་མི་གཅིག་པོས་བདེན་ལུགས་མི་འདོར་བ་དང་། འཚེ་བའི་སྤྱོད་པར་མི་ཞུགས་རྒྱུ་དེ་ཡིན་པས་མ་འོངས་པ་དང་འཛམ་གླིང་ལ་བལྟས་ཏེ་ང་ཚོར་རྒྱལ་ཁ་ཡོད། འོན་ཀྱང་སྐབས་ལན་རེར་སྒེར་གཅོད་པའི་ལག་འོག་ནས་ང་ཚོ་ཕམ་པའི་ཟོལ་ནམ་ཡང་བྱུང་བ་དང་འབྱུང་གི་རེད། ཡིན་ཡང་དེ་ཙམ་གྱིས་བདེན་པ་དོར་འགྲོ་བ་ཞིག་དང་བདེན་པ་ལ་སྙིང་བོ་མེད་པ་ཞིག་ཏུ་ཡེ་ནས་བསམ་བློ་འཁོར་གིན་མེད། ང་ཚོས་ཅུང་གཟབ་ནན་བྱེད་དགོས་ས་ནི་གྲུབ་མཐའ་ཕན་ཚུན་གྱི་འགལ་ཟླ་དང་ཆོལ་ཁ་སྐྱ་སེར་བར་གྱི་འགལ་ཟླའི་རིགས་སྲིད་དབང་སྒེར་གཅོད་པའི་བེད་སྤྱོད་གཏོང་རྒྱུའི་ཉེན་འདུག་པས་རྣམ་ཤེས་གྲིམ་པོར་བྱ་དགོས་སོ། སྐབས་སུ་སྤྲུལ་སྐུ་རེ་འགའ་དང་ལྐོག་ཟ་རུལ་སུངས་ཀྱི་མགོ་འཁྲིད་རེ་གཉིས་བེད་སྤྱོད་གཏོང་བཞིན་པ་ཡིན་མོད། དེ་ལ་དེ་ཙམ་གྱི་རིན་ཐང་ཆེན་པོ་དང་ཉེན་ཁ་ཆེན་པོ་མི་འདུག་གོ། རྒྱུ་མཚན་ནི་ང་ཚོའི་ཕྲེང་འཛིན་པའི་རིགས་ཀྱི་གོ་རྟོགས་ཇེ་སད་དུ་འགྲོ་གིན་ཡོད་པ་ཉིན་རེ་ལས་གསལ་བ་མ་ཟད། ལྷག་པར་དུ་ཆབ་སྲིད་ཀྱི་རིག་པ་ཇེ་སྦོམ་ནས་ཇེ་སྦོམ་ཡིན་པ་སྐབས་ཀྱི་གནས་བབ་ལས་ངོ་འཕྲོད་ཡོང་གི་འདུག དེའི་ཕྱིར་ཞི་ལ་དཀར་པོ་དང་ནག་པོ་གང་ཡིན་རུང་བྱི་བ་གསོད་མཁན་ཡིན་པའི་གོ་རྟོགས་རྙེད་ཡོད། འདས་ལོར་སྒྲུབ་ཁང་ཟེར་བ་དང་ཚེར་སྨོན་གླིང་ཟེར་བ་དེ་མིན་ཀུན་མཁྱེན་སོགས་མང་པོས་སྐད་གཅོང་སྦོམ་པོས་དགེ་འདུན་པ་དག་གི་རང་དབང་གི་ཞི་རྒོལ་དེ་ཆོས་དང་འགལ་ཡོད་ཚད། ང་ཚོའི་དབུ་ཁྲིད་ཆོས་གོས་གྱོན་པའི་ཁྲམ་པ་ཡིན་སྟངས་ཤོད་ནས་རྫིག་པོ་ཅི་ལྟར་བཅོས་རུང་། སེམས་དངལྡན་པ་ཞིག་ཡིན་དུས་ཀ་ཁ་ག་ངའི་མགོ་རྔ་མི་ཤེས་ཀྱང་རྒྱུད་ལ་བསླབ་བྱ་ཞིག་བཞག་ཡོད་པ་ཕར་ཞོག རང་མི་འདྲེ་ཡི་སོང་ཡོད་པ་དང་སྲུང་མ་བདུད་དུ་བབ་པའི་ངེས་ཤེས་ལྷང་ངེར་སྐྱེས་འདུག དོན་འདི་ཡིས་ང་ཚོར་བརྡ་ཞིག་སྤྲད་འོང་བ་ནི་མི་སེར་སྤེལ་མཁན་གྱི་ལག་ཆར་གྱུར་བ་ཁོ་ཚོས་སྔར་ནས་ད་ལྟའི་བར་དུ་ལོ་རྒྱུས་ཉེས་ཅན་དུ་བཏང་འོང་བའི་བརྒྱུད་རིམ་ དེར་བསམ་ཞིབ་ཅིག་ཞུ་བ་ལས། དེ་དག་གིས་སྤྱི་ཚོགས་ལ་ནུས་པ་ཞིག་མ་འོངས་པར་ཐོན་པའི་འཇིགས་པ་སེམས་ཀྱི་ཟུར་ དུ་ཡང་མི་ཤར་རོ།།
སྒེར་གཅོད་པས་དེ་དག་ཆེད་དུ་གསོ་སྐྱོང་བྱས་ནས་འབངས་མི་རྨོངས་འཐོམས་ཀྱིས་འགུག་འདོད་པ་དེ་ཡང་ངེད་ཅག་ཕྲེང་འཛིན་པའི་སྡེ་ཡིས་སྔར་ནས་ཤེས་པས། ཁོ་ཚོའི་འདོད་པ་དེ་འཁྲུལ་བ་ཡིན་པ་ཡང་ཤེས་ཡོད།། མི་སེར་སྤེལ་མཁན་གྱི་སྒེར་གཅོད་པ་ཞིག་ལ་མཚོན་ན་དྲག་པོའི་དམག་དཔུང་དང་། དཔལ་འབྱོར་གྱི་བསླུ་བྲིད་མཁོ་བར་མ་ཟད། མི་སེར་སྤེལ་ཡུལ་གྱི་རྒྱལ་བཙོང་བ་རེ་འགའ་ལག་འོག་ཏུ་ལེན་པའི་ཐབས་ཤེས་ཀྱང་ངེས་པར་དགོས་སྟབས། བོད་ལ་མཚོན་ན་རིག་པ་ནང་དུ་བརྡིབས་ཤིང་འདོད་པ་ཐུར་དུ་བསྲིངས་པའི་སྤྲུལ་སྐུ་ཚོ་ལས་ལག་གཡོག་པ་ཚད་ལྡན་ཞིག་མེད་པའི་འགྲོ་སྟངས་ཤེས་ཡོད། དེའི་ཕྱིར་ཁོ་ཚོས་སྤྲུལ་སྐུ་མང་པོ་ཞིག་ལ་མཁོ་བའི་འདོད་པ་སྤྲོད་ལ་མཐར་གཏུགས་ན་དེའི་རིགས་ཀྱི་བདག་དབང་ལྷ་སྡེ་མི་སྡེ་ལས་རང་ལ་གཏོགས་པའི་ཧམ་པ་ཡང་བཅངས་གིན་ཡོད་པའི་ཚུལ་དག་ཕྲེང་འཛིན་པའི་དཔུང་གིས་ཡོངས་སུ་ཤེས་ཡོད་པའི་མི་ཚད། དད་ལྡན་མང་ཚོགས་ལའང་གསལ་ཁ་དང་བཅས་ཏེ་ངོ་སྤྲོད་ཅི་ཐུབ་བྱ་ངེས་ཡིན། ཡིན་ཡང་རྣམ་པ་གཞན་ཞིག་འདི་ནས་གསལ་བཤད་བྱ་དགོས་པ་ནི། མི་སེར་སྤེལ་མཁན་སྒེར་གཅོད་པས་མི་སེར་སྤེལ་བའི་བྱེད་ཐབས་གཞན་ཞིག་བཀོལ་གྱིན་པ་ཡོད་པ་དེ་ཡང་ང་ཚོས་ཤེས་དགོས་པའི་གནད་ཅིག་རེད། དེ་གང་རེད་ཅེས་ན་ས་གནས་རང་སྐྱོང་ཟེར་བ་དང་གྲོང་བརྡལ་གསར་བ་ཟེར་བ་དགོན་པ་སླར་གསོ་ཟེར་བ་སོགས་ལ་ཁ་གཡར་ནས་དཔལ་འབྱོར་གྱི་བསླུ་བྲིད་མང་པོ་ཞིག་གིས་དམངས་སེམས་བསླུ་བ་དང་ས་གནས་ཀྱི་བླ་དཔོན་དག་གི་མགོ་འཐོམས་པར་བྱས་ནས་མ་འོངས་པའི་ལོ་རྒྱུས་ཉེས་ཅན་དུ་གཏོང་བའི་ཐད་ལ་བསམ་ཞིབ་གནང་དགོས་པར་མ་ཟད། རང་གི་རྐང་འོག་གི་ཕ་མེས་ཡང་མེས་ནས་བརྒྱུད་པའི་སྲ་ཐག་ཐག་གི་ས་གཞི་འདི་ཡང་ཤོར་རྒྱུའི་ཉེན་ཁ་ཆེན་པོ་རེད། གཡོ་ཐབས་འདི་ལ་ཁ་དཔེར་འགད་རྫས་ཀྱི་སྟེང་དུ་སྦྲང་རྩི་བྱུགས་པའི་གཡོ་ཐབས་ཟེར། འདི་ང་ཚོས་ཡོངས་སུ་ཤེས་དགོས། དཔེར་ན་བོད་ཀྱི་ཡུལ་དབུས་ལྷ་སའི་སྲང་ལམ་དག་གི་མིང་ལ་པེ་ཅིང་ལམ་ཅང་སུའུ་ལམ་ཟེར་བ་སོགས་མི་ལོ་དུ་མའི་རྗེས་སུ་ལོ་རྒྱུས་སུ་འགྲོ་གཟོ་འདུག་པ་དག་ལ་བལྟས་པས་ཤེས་འོང་བ་ཞིག་རེད། འུ་ཅག་གི་སེམས་ངོར་སྒེར་གཅོད་པས་དངུལ་གྱི་གཏོང་ཕོད་ཡངས་པོར་ཕྱེས་ཡོད་པ་འདི་ཡ་མཚན་ཞིག་ཏུ་འཛིན་རུང་། དེ་ལས་ཡ་མཚན་དགོས་པ་དང་དེ་ལས་རིན་ཐང་གཞན་ཞིག་ཤོར་གྲབས་ཡོད་པ་ནི་རང་ཅག་གི་ཤ་དང་རུས་པ། རིག་གཞུང་དང་ས་གཞི་རེད། ཁྱོད་ལ་སྤྲད་པའི་དངུལ་སྒོར་གྱི་མི་ཚེ་གཅིག་ཙམ་ཞིག་མཐར་འཁྱོལ་ཐུབ་མིན་དེ་ ཡིན་ལ། དེ་ལ་བརྟེན་ནས་ཤོར་བའི་ལོ་རྒྱུས་ནི་ཅི་སྲིད་བསྐལ་བ་ནམ་གནས་ཀྱི་ཕུག་དོན་ཞིག་ཡིན་པ་ཤེས་པར་བྱས་ཏེ། ང་ཚོའི་ཆེ་དགུ་དག་གིས་འདོད་པ་ལ་བག་ཡོད་པར་བྱས་ན་སྙམ་མོ།། ང་ཚོས་ནམ་རྒྱུན་བག་ཡོད་པའི་སྒོ་ནས་བྱ་སྤྱོད་འདི་རིགས་ལ་ཞི་བའི་ངོ་རྒོལ་བྱ་ ཐུབ་པ་ཡིན་ན། སྒེར་གཅོད་པས་བཙན་དབང་ལ་དེ་ལས་ལྷག་པའི་ཡ་ལན་སྤྲོད་པའི་ཐབས་ཤེས་ཁྱོན་ནས་མེད་ དོ།། སྒེར་གཅོད་པ་ལ་མཚོན་ན་ཡང་ཚུལ་ཅི་ལྟ་བུ་ཞིག་གི་སྒོ་ནས་མི་སེར་སྤེལ་བའི་བཙན་དབང་ལམ་ལུགས་དེ་རྟབ་རྟབ་པོའི་ངང་དུ་འགྱུར་བར་གདོན་མི་ཟ། མ་མཐའི་གདམས་ཀ་ཆེས་ནོར་འཁྲུལ་ཅན་དྲག་པོའི་གཉའ་གནོན་ལས་ཁོ་ཚོར་བྱ་ཐབས་གཞན་མེད། དེ་ནི་འཛམ་གླིང་གི་མདུན་དུ་ཆུང་བ་ཆེ་རུ་འགྲོ་བའི་གནད་དོན་ཞིག་ལྷང་ལ་བུད་པ་ཡིན་སྟབས་ང་ཚོའི་རེ་འབྲས་ཀྱང་གང་འཚམ་གྱིས་འགྲུབ་པར་བསམ་ཆོག་གོ།
འཚེ་མེད་ཞི་བའི་ལྟ་གྲུབ་ཤེས་ན། །
ཆོས་དང་འཇིག་རྟེན་གཉིས་ཀ་ཤེས་ཡོད། །
འཚེ་མེད་ཞི་བའི་ལག་ལེན་བཀལ་ན། །
ཆོས་དང་འཇིག་རྟེན་གཉིས་ཀ་ཚང་ཡོད། །
དགྲ་ལ་འཚེ་བ་མེད་པའི་སྒོ་ནས། །
རང་གི་རང་དབང་ལག་ཏུ་ལེན་དགོས། །
སེམས་དཔའ་ཆེན་པོ་གྷན་ དྷིས།
གཞན་གྱི་བཙན་འོག་ཏུ་གསོན་པ་ལས། །
རང་དབང་གི་ཆེད་དུ་འཆི་བ་དགའ། ། ཞེས་གསུངས།
རང་གི་ཁ་གཏད་ལ་འཁོན་འཛིན་སྤོངས་དགོས། །
རང་གི་ཁ་གཏད་ལ་བདེན་དོན་རྩོད་དགོས། །
འཕྲེང་བ་འཛིན་པས་རང་ གཞན་གཉིས་ཀ་དར། །
མེ་མདའ་འཕེན་པས་རང་གཞན་ གཉིས་ཀ་རྒུད། །
ཕྲན་གྱི་ངོ་ཤེས་གྲོགས་པོ་ཞིག་གིས་ཁ་པར་ཐོག་ནས་བཤད་དོན། སུམ་ཅུ་དུས་དྲན་ཉིན་ལྷ་སར་ཧ་་ཅང་གི་དམ་དྲག་ཆེས་བས། བོད་མི་ཡོངས་ལ་ཞིབ་གཤེར་དང་། གང་དུ་བསྐྱོད་ཀྱང་བལྟ་སྲུང་བྱས་འདུག རྒྱ་ནག་གི་ས་ཁུལ་ཁག་ཏུའང་བོད་རིགས་དམ་དྲག་བྱས་བྱུང་ཟེར།
ཧོར་བུ་ཡེ་ཤེས་ལགས། ༼འཚེར་མེད་ཞི་བ་༽༼མཚོན་མེད་ཞི་བ་༽༼འཚེར་བ་༽༼འཚེར་༽འདི་ཐམས་ཅད་ཡིག་ནོར་ཤོར་འདུག་ལགས། ༼འཚེར་བ་༽ཞེས་པའི་དོན་ནི་རྟ་ལ་སོགས་པའི་སྐད་སྒྲོག་པའི་དོན་རེད། རྟ་འཚེར་ཞེས་ལྟ་བུ་རེད།
ཁྱེད་ཚིག་མཛོད་ཞིག་རྒྱུན་དུ་བེད་སྤྱོད་བྱས་དེ་ཡི་གེ་འབྲི་ཐུབ་ན་ཡག་པོ་འོངས་ས་རེད།
དངོས་གནས་བསམ་དཀར་ཡིན།
གཞིས་སྡོད་སྤུན་གྲོགས་དག་གིས་སྙིང་སྟོབས་དང་བློ་གྲོས། རིགས་ཞེན། ཕུགས་རྒྱང་སོགས་བུ་རུལ་ང་འཛམ་གླིང་འདིར་གཟི་བརྗིད་ཀྱིས་འཚོ་བའི་སྲོག་དབང་གི་འཕར་རྩ་ཡིན། ཐུགས་རྗེ་སྤུན་གྲོགས་ཆེ་ར་ཛི་ནྰ་མ།
ཡ་ཇི་འདྲ་འདུག
མར་ཡིན་པ་འདྲ་ཡང་བཅུད་མི་འདྲ་བ་འདུག
ཐུགས་རྗེ་ཆེ་རྩོམ་པ་པོ་ལགས།
ང་ཚོ་ཚང་མས་དཔུང་པ་མཉམ་ཞིབ་ཀྱིས་ཧུར་བརྩོན་བྱེད་པའི་དུས་ལ་བསླེབས་འདུག།།
རྩོམ་པ་པོ་ལགས།ཡག་པོ་ཞེ་དྲག་བྲིས་འདུག།གོ་རྟོག་ཡག་པོ་སྤེལ་སོང་བའི་ཐུགས་རྗེ་ཆེ།
སྐབས་འདི་དང་སྟུན་ནས་ངས་རྒྱན་རིང་པོ་བསམ་བློ་བཏང་བའི་དྲི་བ་ཞིག་དྲ་རོགས་རྣམས་ལ་གཤམ་དུ་དབུལ་རྒྱུ་ཡིན་པའི་སྣང་ཆུང་མེད་པར་དགོང་ཚུལ་ཅི་ཡོད་གསུང་རོགས་བྱོས།ང་ཚོས་༼འཚེར་མེད་ཞི་བ་༽ཟེར་བའི་ཚིག་དེ་དང་༼མཚོན་མེད་ཞི་བ་༽དེ་གཉིས་ལ་ང་རང་གི་ངོས་ནས་ཁྱད་པར་ཆེན་པོ་ཞིག་མཐོང་ཡོང་གིན།༼འཚེར་བ་༽ཞེས་པ་ནི་ཆེན་ས་ནས་སྲོག་བཅད་པ་དང་ཆུང་ས་ནས་ཁབ་ཞིག་བཙུགས་པའི་ན་ཚ་ལ་གོ་བར་མཐོང་།ང་རང་ཚོས་ལག་སྟོང་གི་སྐད་འབོད་བྱེད་ཀྱིན་ཡོད་རེད།ཡིན་ནའང་ཕ་རོལ་པོའི་སེམས་ལ་གནོད་༼འཚེར་༽ཆེན་པོ་འགྲོ་ཡི་ཡོད་པ་རེད།དེ་ལས་༼མཚོན་མེད་ཞི་བ་༽ཟེར་ན་དངོས་ཡོད་རེད་འདུག་དྲན་གྱི།དགོང་ཚུལ་ཅི་ཡོད་གསུང་རོགས་གནོང་།
སེམས་དཔའ་ཆེན་པོ་གྷན་དྷིས།
འཛམ་བུ་གླིང་འདི་ལ་ང་ལ་གསར་པ་གང་ཡང་སློབ་ཡ་མེད།
དྲང་བདེན་དང་འཚེ་མ་མེད་པ་དེ་ཚོ་ནི་རྙིང་ལོས་རི་དེ་ཚོ་དང་མཚུངས་པ་རེད།
སྙིང་དབུས་ནས་ཐུགས་རྗེ་ཆེ་ཞེས་ཞུ།། བསྟོད་འོས་པ་ཞིག་བྲིས་འདུག་ག། ཕྲེང་བ་ཅན་དང་མེ་མདའ་ཅན་གྱི་ཁྱེད་པར་དང་ཆོལ་ཁ་དང་ཆོས་ལུགས་བར་གྱི་མཐུན་འབྲེལ་སོགས་ཧ་ཅང་གི་ཡིད་འཕྲོགས་པ་ཞིག་བྲིས་འདུག།
ཕྲེང་བ་འཛིན་མཁན་དང་མེ་མདའ་འཛིན་མཁན་བར་གྱི་མི་འདྲ་བའི་ཁྱད་ཆོས་གཏིང་ཟབ་པོ་བྲིས་འདུག་ལ་བོད་མི་རྣམས་ཀྱིས་ཡིད་གཟབ་གནང་དགོས་པའི་དོན་མང་པོ་ཞིག་བྲིས་འདུག མི་རིགས་ཤིག་ལ་འོད་སྟོང་འབར་བའི་མདུན་ལམ་ཡོད་མིན་ནི་མི་རིགས་གང་གི་མི་དམངས་ཀྱི་བསམ་བློའི་གོ་རྟོག་ལ་རག་ལུས་པ་ཡིན་པས་རྩོམ་པ་པོའི་རེ་བ་ལྟར་ང་ཚོ་བོད་མི་ཚང་མས་རིག་པ་གྲུང་ཙམ་བྱས་ནས་དབང་སྒྱུར་བའི་གཡོ་འོག་ཏུ་མི་ཚུད་པ་བྱེད་དགོས་པ་དང་། རང་ཉིད་ཀྱི་མི་ཚེ་གཅིག་གི་བདེ་སྡུག་ཙམ་མིན་པར་མི་རིགས་ཧྲིལ་པོའི་འགན་ཁྲི་ཕྲག་པར་བླངས་ནས་མི་ལུས་བླངས་པའི་སྙིང་པོ་འཚོལ་དགོས་པར་འདུག
འཚེ་མེད་ཞི་བའི་ལྟ་གྲུབ་ ཟེར་ན་འདི་འདྲ་བ་ཞིག་གོ་དགོས་འདུག། ཚང་མས་འཚེ་མེད་ཞི་བའི་ལྟ་གྲུབ་ལ་སྦྱངས་པ་མཐར་ཕྱིན་དགོས་གལ་ཆེ་ལ་སྤྱི་དོན་ལ་ཤིན་ཏུ་སྨན་པ་ཞིག་ཡོང་ངེས།
གཞིས་བཞུགས་ཀྱི་བོད་ཕྲུག་ཚོ་མིན་ན་བོད་པ་ཚང་ཤི་ཚར་ཡོད། ནང་བཞུགས་ཀྱི་གྲོགས་པོ་ཚོས་སྙིང་སྟོབས་དང་། ལྷག་བསམ། ཤེས་འཇོན་བྱེས་སོང་ཚོས་རྩ་ནས་འདྲན་དུ་མེད། བྱེས་སོང་འགས་ཆབས་སྲིད་ཀྱི་མིང་རྫུན་རེ་ཁྱེར་ནས་ཚོད་འཇོག་གི་རྩོམ་ཡིག་རེ་སྤེལ་ཐབས་ཙམ་མིན་པར་ བོད་ནང་གི་ངོས་བྱུང་རྩོམ་ཡིག་གང་མང་སྤེལ་བར་རྩོམ་སྒྲིག་པ་རྣམས་ཀྱིས་ཧུར་ཐག་བྱེད་རོགས།
ཡག་པོ་འདུག་་་་་་་ཐུགས་རྗེ་ཆེ་་་་་་་་་་་་་་་་ཡོན་ཏན་ཡོད་པའི་མི་ཞིག་གིས་བྲིས་པར་འདྲ། བོན་རྒྱ་གཙོ་བྱེད་པའི་ཁོས་རྗེས་འབྲངས་པ་ཚོས་སློབ་སྦྱང་བྱ་དགོས་པའི་གནད་དོན་མང་པོ་འདུག
ཨེ་ཁྱེད་ཚོ་མགྱོགས་པོ་ཤོག་་་་་་་་་་ལོག་རྟོག་བསལ་ཐུབ་པའི་རེ་བ་འདུག་་་ལུག་རྫི་ལགས།