མཚམས་སྐྱིད་ཀྱིས་རང་གི་ནང་མི་དག་གི་གོ་སྒྲིག་ལྟར། རྡེ་ར་སྒྲོང་དུ་ཁོ་རང་གི་ཕུ་བོ་ངོ་ཤེས་ཤིག་གི་ཡེ་ཤུའི་ཆོས་ཚོགས་ཤིག་གི་ནང་དུ་ལས་ཀ་བྱེད་ཀྱི་ཡོད་པ་དེ་རུ་འགྲོ་དགོས་པར་སྐུལ་བ་ལྟར། ཁོ་མོ་དེ་རུ་འགྲོ་རྒྱུའི་གྲྭ་སྒྲིག་བྱས་པ་དང་བློ་བཟང་གིས་ཀྱང་རྡེ་ར་སྒྲོང་དུ་འགྲོ་བའི་རླངས་འཁོར་འཛིན་བྱང་ཉོས་པ་རེད།
མཚམས་སྐྱིད་ཀྱིས། འུ་གཉིས་བཟའ་ཚང་མི་ཡོང་ན་ཡང་། ང་རང་རྒྱ་གར་དུ་བསྡོད་ཡུན་རིང་འུ་གཉིས་ལོ་གཅིག་གཉིས་ཤིག་གི་རིང་གི་དགའ་རོགས་བྱས་དེ་བསྡད་ན་འགྲིག་གི་རེད། དེ་ཁྱེད་རང་གི་ཁས་ལེན་མ་བྱས་པ་ཡིན་ན་ང་རང་འགྲོ་ཡི་མིན།
བློ་བཟང་ཧང་སངས་ཞོར་དུ། འུ་གཉིས་ཀྱིས་སྐད་ཆ་གཙང་མ་བཤད་ཟིན་པ་ཡིན་མོད། ད་ནི་ཁྱེད་རང་སླར་ཡང་འགྱུར་བ་འགྲོ་དོན་ཅི་རེད། དེ་ལས་ཁྱེད་རང་དོ་ནུབ་ལམ་དུ་ཆས་ན་རེད། ངས་ཁྱེད་རང་ལ་ལམ་འཇུག་བྱེད་ཆོག ཉིན་མ་དེ་རིང་ནས་བཟུང་དེ་འུ་གཉིས་ངོ་ཤེས་ཡིན་པ་ལས། དགའ་རོགས་དང་ཚེ་གྲོགས་སོགས་ཀྱི་འབྲེལ་བ་གཏན་ནས་མེད་པ་དེ་ཁྱེད་རང་གི་སེམས་སུ་ཡོད་པ་དེ་ལྟར་ཡིན། ངས་ཁྱེད་རང་ལ་གོ་སྐབས་མ་སྤྲད་པ་མིན། ཁྱེད་རང་གིས་གཏན་ནས་མ་བླངས་པ་རེད།
མཚམས་སྐྱིད་ཀྱིས། དེས་ན་ང་རང་གིས་ཁྱེད་དང་འགྲོག་ནས་ལོ་ངོ་གཅིག་ཙམ་འགྲོ་བཞིན་ཡོད་པ་འདི་ཡི་ཆེད་དུ་དྲན་རྟེན་ཞིག་ལེན་འདོད་འདུག ཁྱེད་རང་གིས་ང་ལ་དྲན་རྟེན་དེར་སྟེར་འཕོད་ཀྱི་ཡོད་དམ།
བློ་བཟང་གིས། ཁྱེད་རང་ལ་གང་དགོས་པ་དེ་ང་རང་གི་ཐུབ་པ་ཞིག་ཡིན་ན། ཁྱེད་རང་སྤྲོད་ཆོག དེ་འུ་གཉིས་ལོ་ངོ་གཅིག་གི་རིང་ཙམ་ལ་འགྲོག་ནས་ཟེར་ན་རེད། ངོ་ཤེས་ནས་ཟེར་ན་རེད། དེ་ལ་ངས་ཁྱེད་རང་གི་འདོད་པ་ལོས་སྐོང་། ག་རེ་དགོས།
མཚམས་སྐྱིད་ཀྱིས། དེ་ན་ཁྱེད་རང་གི་ལག་ནང་གི་ཐ་མག་དེ་ངའི་ཁྱེད་རང་གི་ལག་པའི་ཤ་སྟེང་བསྲེག་འདོད་འདུག དེ་འགྲིག་གི་རེད་དམ། དེ་བྱས་པ་ཡིན་ན། ཁྱེད་རང་གི་ང་མི་ཚེ་བཀང་བོར་བརྗེད་ཀྱི་མ་རེད།
བློ་བཟང་གིས། དངོས་ནས་ཁྱེད་རང་ལ་དེ་འདྲའི་འདོད་པ་ཞིག་ཡོད་ན་ལོས་འགྲིག འདི་ཟེར་ནས་རང་གི་ལག་ནང་དུ་ཐ་མག་གི་མགོ་ནས་དུ་བ་ཕར་གཡུགས་ཀྱིན་ཁོ་མོ་སྤྲད། ཁོ་མོའི་ཐ་མག་ལག་དུ་བླངས་པ་དང་བློ་བཟང་གི་ལག་མགོར་འཇུས་དེ་ཐ་མག་དེ་ཤ་སྟེང་དུ་བཙུགས་ནས་སྐར་ཆ་གཉིས་གསུམ་གྱི་རྗེས་སུ་ཕྱིར་འཐེན་ནས་བལྟ་ཙམ་བྱས་དེ། ཨོ་་་་ ཡག་པོ་དོད་མི་འདུག ཡང་བསྐྱར་གཅིག་བྱས་ན་འགྲིག་གི་རེད་དམ།
བློ་བཟང་གིས་མིག་གི་ཕར་ཕྱོགས་སུ་བལྟ་བཞིན། འགྲིག་གི་རེད། ཁྱེད་རང་གི་འདོད་པ་འཁེང་བ་ཞིག་བྱེད་རོགས་ཞུ། དེ་དུས་ཁོ་མོའི་སླར་ཡང་ཐ་མག་དེ་བློ་བཟང་གི་ལག་སྟེང་དུ་བཙུགས་ནས་སྐར་ཆ་བཅུ་ཙམ་ལ་བསྡད།
བློ་བཟང་གིས་ཕྱི་དྲོ་དེར་ཁོ་མོ་ལམ་འཇུག་བྱས་དེ་ཕྱིར་ནང་དུ་ཡོང་དུས། ཁོ་རང་གི་གྲོགས་པོའི་དགའ་རོགས་མ་ཨ་རི་ནས་ཡིན་པའི་སྒྲ་ནས་ཡལ་གྱིས་བློ་བཟང་གི་ལག་མགོའི་རྨ་ཤུལ་གསར་བ་དེ་གཉིས་མཐོང་དུས། འདི་ག་རེ་བྱས་པ་རེད།
བློ་བཟང་གིས་དགོད་ཞོར་དུ། ཅུང་མ་རེད། ཐ་མག་གི་མེ་ཤུལ་རེད། སྐྱོན་མི་འདུག་ཞེས་བཤད་ཀྱང་། སྒྲ་ནས་ཡལ་གྱིས་ཨུ་ཚུགས་བྱས་པ་དེར་ངོ་མ་ལྡོག་པར་བྱུང་རིམ་ཞིབ་དུ་བཤད་པ་རེད། ཨ་རི་ནས་ཡིན་པའི་སྒྲ་ནས་ཡལ་གྱི་བྱུང་རིམ་དེ་ཉན་རྗེས་སུ། སྨྱོན་མ་རང་རེད། སྨྱོན་མ་རང་རེད། དེ་འདྲ་ལ་བརྩེ་བ་ཟེར་མི་སྲིད་ཅེས་བཤད་པ་དང་བློ་བཟང་ལ་སེམས་གསོ་བཏང་བ་རེད།
བློ་བཟང་གིས། དེ་ནི་ཁོ་རང་ལ་ཡང་ནོར་འཁྲུལ་ཡོད་པ་སོགས་བཤད་ནས་དགོང་མོའི་ཁ་ལག་བཟོས་རྗེས་སུ། ཁོའི་གྲོགས་པོ་སླེབས་པ་དང་ཁོང་ཚོ་གསུམ་གྱིས་ལྷན་དུ་ཁ་ལག་ཟོས་པ་རེད།
མུ་འགོད།
ཁྱེད་ཅག་ཕེབས་པ་དགའ་ཡོད། བསམ་ཚུལ་གསུངས་པ་ཐུགས་རྗེ་ཆེ། རྗེས་ཕྱོགས་ཀྱང་ཁོམ་ན་ཕེབས་རྐྱང་གནོང་རོགས།
གོང་གི་དེ་ཡང་འདི་དང་གཅིག་མཚུངས་རེད་འདོད་ཀི
བཀྲ་ཤིས་བདེ་ལེགས།
དུས་བབ་ནང་མུ་མཐུད་དུ་འབད་པ་བྱེད་བཞིན་པ་མཐོང་ནས་སྤྲོ་ཡོད།
ཉིད་ཀྱི་བྱ་བ་དག་ལམ་འགྲོ་ཡོང་བའི་སྨོན་འདུན་ཞུ།
གཞན་སྒྲུང་རིང་འདི་བར་མཆ༹མས་ཞིག་ནས་ཀློག་ཐུབ་མ་སོང་།
རྗེས་སུ་ཆ་ཆ༹ང་ཞིག་མཉམ་དུ་ཀློག་གི་ཡིན།
དཔེར་ན། སྒོ་རྡུང་བའི་སྒྲ་ཐོས་མ་ཐག་ང་སོང་ནས་སྒོ་ཕྱེས་པ་ཡིན། བློ་བཟང་ཡིན་པ་ཤེས་པས་མ་སོང་ནས་སྒོ་ཕྱེས་པ་ཡིན། ཟེར་ན་ཚིག་དོན་གཉིས་ཀ་ཉིས་བརྩེགས་ཐེབས་མི་འདུག་གམ། གོང་གི་དེ་ཡང་འདི་དང་གཅིག་མཚུངས་རེད་འདོད་ཀི
ང་ཡོང་ཐེངས་གཅིག་པོ་ནས་སྐྱོན་བཙལ་བ་མིན་ཏེ། འདི་འདྲ་ཞིག་རེད། ཆེས་མཐའ་མའི་དུམ་ཚན་དེར་ལྟོས་དང་།
༼བློ་བཟང་གིས། དེ་ནི་ཁོ་རང་ལ་ཡང་ནོར་འཁྲུལ་ཡོད་པ་སོགས་བཤད་ནས་དགོང་མོའི་ཁ་ལག་བཟོས་རྗེས་སུ། ཁོའི་གྲོགས་པོ་སླེབས་པ་དང་ཁོང་ཚོ་གསུམ་གྱིས་ལྷན་དུ་ཁ་ལག་ཟོས་པ་རེད། ༽
འདི་འདྲ་བ་ནི་ཚིག་དོན་གཉོས་ཏད་ནས་ཆེས་མཛེས་པས་ན་རྣམ་ཤེས་ཅུང་དམ་དུ་བཏང་ནས་འབྲི་རོགས་ཞུ། ངས་ནི་ཚོད་ཚོད་ལ་བསྟོད་བསྔགས་འདྲ་བྱས་ནས་འཇོག་མི་འདོད་ཀི
དེ་ཙམ་ཡིན། ཞིབ་ཏུ་ཀློག་ཁོམ་མི་འདུག དེང་སྐབས་གྲོས་ཚོགས་སྐོར་ལ་ཐད་གཏོང་བརྙན་འཕྲིན་བརྒྱུད་ནས་ལྟ་བཞིན་པའི་སྒང་ཡིན།