སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} གྱ་དགུ

བློ་བཟང་གིས་སྐད་ཆ་དེ་གོ་བ་དང་། འདང་ནུབ་ལམ་འཇུག་བྱས་ཀྱང་དེ་རིང་ཞོགས་པ་ཕྱིར་ཡོང་ཡོད་པ་འདི་གང་ཡིན་ནམ། ཕར་མ་སོང་བར་ལམ་བར་ནས་ཁ་ཕྱིར་འཁོར་བ་ཡིན་རྒྱུ་རེད་སོགས་བསམ་བློ་འདྲ་མིན་ཞིག་འཁོར་བཞིན་ནང་དུ་འབྱོར་དུས། མཚམས་སྐྱིད་ཉལ་ཁྲིའི་སྟེང་དུ་ཉལ་ནས་ན་ཟུག་དྲག་པོ་ཞིག་ཡོད་པའི་ཁུལ་དང་བཅས་འགྲེ་ལོག་རྒྱག་བཞིན་པ་མཐོང་མ་ཐག མཚམས་སྐྱིད་ཁྱེད་རང་ལ་ག་རེ་བྱས་སོང་། ཕར་མ་སོང་བར་ཕྱིར་ཡོང་ནས་གང་བྱེད།

མཚམས་སྐྱིད་ཀྱིས། ངུ་སྐད་དང་བཅས་དེ། ཁྱེད་རང་དངོས་ནས་ང་ལ་གཏན་ནས་བརྩེ་བ་ཞིག་མི་འདུག ང་རང་འགྲོ་རྒྱུ་ཡིན་ཟེར་ནས་སོང་ཡང་། ཁྱེད་རང་གི་ངའི་སྐོར་ལ་སེམས་ཁྲལ་ཞིག་གཏན་ནས་བྱེད་ཀྱི་མི་འདུག ང་རང་སློབ་གྲྭ་ནས་འབུད་དོན་ཡང་ཁྱེད་རང་གི་ཆེད་དུ་ཡིན། ད་ཁྱེད་རང་གིས་ང་འདི་ལྟར་སྐྱུར་བ་རེད། དངོས་ནས་ང་རང་ཁྱེད་དང་བྲལ་འདོད་མི་འདུག འགྲོ་དགོས་ན་འུ་གཉིས་ལྷན་དུ་འགྲོ དེ་མིན་ན་ང་རང་འདི་ནས་ཤུ་རྒྱུ་ཡིན་ཟེར་ནས་ལག་ནང་དུ་བསྡམ་ནས་ཡོད་པའི་རིལ་བུ་སྤར་མོ་བཀང་དེ་ཁ་ནང་དུ་འཇུག་རྩིས་བྱེད་སྐབས་དེར། བློ་བཟང་གིས་ཁོ་མོའི་ལག་པ་ནས་བཟུང་དེ། རིལ་བུ་ཡོད་ཚད་ཚུར་འཕྲོག་པ་དང་།

བློ་བཟང་གིས། ཁྱེད་རང་གིས་ད་གཏན་ནས་ང་རང་བསྡོད་དུ་འཇུག་རྩིས་མེད་པ་རེད། ཁྱེད་རང་ཤི་མི་དགོས། ཤི་དགོས་པ་དེ་ང་ཡིན་པ་རེད་ཟེར་བཞིན་རིལ་བུ་ཡོངས་རྫོགས་རང་གི་ཁ་ནང་དུ་བླུགས་བཞིན་པའི་སྐབས་སུ་མཚམས་སྐྱིད་ཉལ་ཁྲི་ལས་མཆོང་རྒྱག་དང་བཅས་བློ་བཟང་གི་ཁ་ཤའི་ནང་དུ་འཐམ་ནས་ཨ་ཁུ་ལོ་ལོ། ཁྱེད་རང་གི་དེ་འདྲ་མ་བྱེད།

སྐབས་དེ་ཡི་ངང་ཚུལ་ནི་གློག་བརྙན་བཞིན་དངོས་སུ་མིག་ལམ་དུ་མཐོང་རྒྱུ་ཡོད་པ་ཞིག་ཡིན་ན་ནི། དངོས་ནས་དགོད་བྲོ་བ་དང་སྙིང་རྗེ་བ་ཞིག་ཆགས་ཡོད་པ་ནི། བློ་བཟང་གིས་རང་གི་ཁ་ནང་དུ་བསྡུ་བཞིན་པའི་རིལ་བུ་དེ་དག་རིལ་དཀར་ཡིན་པ་གཏན་ནས་ཤེས་ཀྱི་མེད་ལ། ད་ནི་ཁོ་རང་གི་འཆི་ཉིན་སླེབས་པ་རེད་བསམ་བཞིན་ཡོད་པ་དང་། མཚམས་སྐྱིད་ཀྱིས་རང་གི་དགའ་སའི་ཕོ་གསར་བློ་བཟང་ཕྱིར་རང་ལ་དབང་ན་བསམ་པའི་བྱེད་ཐབས་ཤིག་བཀོལ་བཞིན་པ་དེ་ཡིན།

གློ་བར་བའི་དོན་རྐྱེན་དེ་མཇུག་བསྡུས་མ་ཐག མཚམས་སྐྱིད་བློ་བཟང་ལ་འཐམ་ནས་ངུ་བཞིན་ཡོད་པ་དང་། བློ་བཟང་གིས་ད་ནི་ཁྱེད་རང་གིས་ང་ལ་ཀུ་རེ་རྩེད་མཚམས་བཞག་པ་ཡིན་ན་དངོས་ནས་ཡག་པོ་འདུག འུ་གཉིས་གཏན་ནས་བཟའ་ཚང་མི་ཡོང་བ་ནི་ཐག་གཅོད་པ་རེད། དེ་ལས་ཁྱེད་རང་འདི་ནས་ཁ་བྲལ་བ་ཡིན་ན་ཡག་པོ་རེད། འོན་ཀྱང་། ཁྱེད་རང་ལ་འགྲོ་རོགས་ཤིག་མེད་པར་འགྲོ་ཐུབ་ཀྱི་མེད་ན་ནི། ངས་ཁྱེད་རང་ལ་འགྲོ་རོགས་ཤིག་གོ་སྒྲིག་བྱེད་ཆོག

མཚམས་སྐྱིད་ཀྱིས། རེད་འགྲིག་གི་རེད། དེས་ན་ང་འགྲོ་ཆོག དེ་རིང་ཁྱེད་རང་གིས་ངའི་འདོད་པ་ཞིག་སྐོང་དགོས་ཀྱི་ཡོད། རྗེས་ཕྱོགས་འུ་གཉིས་ངོ་ཐུག་མིན་ཡང་སུས་ཤེས། ང་རང་ཁྱེད་དང་ལྷན་དུ་ཐེངས་གཅིག་ཉལ་འདོད་འདུག་ཟེར་ནས་ཉལ་ཁྲིའི་སྒང་ནས་དོར་མ་དེ་ག་ལེར་འཕུད་པ་རེད།

ཕྱིར་ཉིན་བློ་བཟང་གི་གྲོགས་པོའི་དགའ་རོགས་མ་སྒྲ་ནས་ཡལ་གྱིས་མཚམས་སྐྱིད་ལ་ཁ་བརྡ་སློབ་གསོ་ཞིག་བརྒྱབ་པ་དེ་ནི་ཡག་ཕྱོགས་སུ་འགྲོ་རྒྱུ་ལས་ལྡོག་ནས། སྒྲ་ནས་ཡལ་ལ་ཁྱེད་རང་བློ་བཟང་ལ་དགའ་ཡི་ཡོད་པ་འདྲ། ཁྱེད་གཉིས་ལ་ཕལ་ཆེར་འབྲེལ་བ་ཡོད་པ་ཡིན་རྒྱུ་རེད་སོགས་བཤད་པ་མ་ཟད། བློ་བཟང་ཡོད་སར་ཡོང་ནས་སྒྲ་ནས་ཡལ་དང་ཁྱེད་གཉིས་འབྲེལ་བ་ག་རེ་ཡོད།

བློ་བཟང་གིས། ད་ཁྱེད་རང་གིས་དངོས་ནས་ཚོད་བཟུང་བ་ཡིན་ན་ཡག་པོ་འདུག ངས་དེ་རིང་བར་དུ་ཁྱེད་རང་ལ་ཁྱེད་རང་གི་སློབ་གྲྭ་ནས་ག་རེ་བྱས་པའི་སྐོར་ལ་གཏན་ནས་དྲིས་མྱོང་མེད། རྒྱུ་མཚན་ནི་ངས་ཁྱེད་རང་ལ་ཡིད་ཆེས་བྱས་པ་ཡིན། ད་ནི་ཁྱེད་དང་འུ་གཉིས་ཁ་ཁར་ཆགས་པ་རེད། བཤད་ཀྱང་མི་འགྲིག་པ་མི་འདུག ཁྱེད་རང་གིས་རང་གི་སློབ་གྲྭ་ནས་དགའ་རོགས་འདྲ་མིན་སྒྲིག་པ་དེ་ལ་བསམ་བློ་བཏང་ནས་ད་གཟོད་ང་རང་ཡང་དེ་འདྲ་ཞིག་རེད་བསམ་བཞིན་ཡོད་ན་ནོར་བ་རེད། ངས་རེ་བ་ལ་ད་ཁྱེད་རང་གི་འདྲ་མིན་སྣ་ཚོགས་མང་བོ་ཞིག་མ་དྲན་ན་དགའ་ངེས་ཡིན།

ཉིན་མ་ཁ་ཤས་ཀྱི་རྗེས་སུ་མཚམས་སྐྱིད་དངོས་ནས་རྡེ་རེ་སྒྲོང་དུ་འགྲོ་རྒྱུ་བྱས་པ་དང་། བློ་བཟང་གིས་ཁོ་མོ་ལམ་མཇུག་བྱས་པ་མ་ཟད། ཁོ་རང་ལ་སང་ཉིན་ཁྱེད་རང་འབྱོར་སོང་བ་ཡིན་ན། ང་ལ་ཁ་པར་ཞིག་གཏོང་། དེ་ནས་བཟུང་དེ་ཁྱེད་རང་གི་ང་ལ་ཁ་པར་མ་བཏང་ན་འགྲིག འུ་གཉིས་ད་ནས་བཟུང་ངོ་ཤེས་གྲོགས་པོ་ཡིན་པ་མ་གཏོགས། ཕོ་མོའི་འབྲེལ་བ་གཏན་ནས་མེད་ཅེས་ལམ་འཇུག་བྱས་པ་རེད།

ཕྱིར་ཉིན་ཞོགས་པ་སྔ་བོ་ལ། ཁོ་རང་གི་གྲོགས་པོའི་ལག་ཁྱེར་ཁ་པར་སྟེང་ལ་ཁ་པར་སླེབས་ནས་ང་རང་ད་ལྟ་རྡེ་ར་སྒྲོང་དུ་འབྱོར་སོང་། ཁྱེད་རང་གིས་སེམས་ཁྲལ་བྱེད་དགོས་དོན་མི་འདུག ད་ནི་འུ་གཉིས་ཀྱི་བར་ན་བྱིས་པ་དེ་འདྲ་ཡང་མི་འདུག འདང་ནུབ་ང་རང་ལ་ཟླ་མཚན་སླེབས་སོང་ཞེས་བཤད་པ་དེས་བློ་བཟང་གི་སེམས་འཁུར་བྱེད་ས་དངོས་དེ་ར་སྤྲོད་བྱུང་བ་དང་ཁོ་རང་སེམས་གཏིང་ནས་སྐད་ཆ་དེ་གོ་བ་དགའ་བ་རེད།