བསོད་ནམས་དཔལ་ལྡན།
ད་ལམ་ང་རང་དུས་ཚོད་ཡོད་པ་དང་བསྟུན་གཞིས་གྲོང་ཞིག་ཏུ་དཔེ་མཚམས་སུ་སོང་སྟེ་ཉིན་ཉི་ཤུ་ལྷག་ལ་སྡོད་རྒྱུ་བྱུང༌། དུས་ཡུན་འདིའི་རིང་ངས་དགོན་གྲོང་དང་སྐྱ་སེར་བར་འཚོ་བ་སྐྱེལ་སྟངས་དང་བསམ་བློ་འཁུར་སྟངས་སོགས་གཅིག་མཚུངས་མིན་པའི་གནས་སྟངས་དེ་ཤེས་རྟོགས་བྱུང་ཞིང༌། གནས་ཚུལ་གང་ཐད་ནས་སྐྱ་སེར་བར་ཧེ་བག་ཤུགས་ཆེ་ཡོད་པའང་ཤེས་སོང༌།
གཞིས་གྲོང་འདི་ཚོའི་ཁྲོད་དུ་རྒྱལ་སྤྱི་དང་བོད་དོན་གནས་ཚུལ་སོགས་ཀྱི་ཐད་གོ་རྟོགས་ཧ་ཅང་ཉུང་ཞིང་ཤེས་རྟོགས་ཅུང་ཙམ་ཡོད་པ་ནི་མ་འགྲོ་ན་མི་ཆོག་པའི་ཚོགས་འདུའི་ས་ནས་གོ་བའི་སྐད་ཆ་ཁ་ཤས་དེ་རེད་འདུག ང་རང་ཡང་འདིར་སྡོད་དུས་རིང་དྲ་རྒྱ་ལྟ་ཀློག་རག་རྒྱུ་ཕར་ཞོག ཚགས་པར་ཞིག་ཀྱང་ཀློག་རྒྱུ་མི་རག་པའི་དཀའ་ངལ་ཧ་ཅང་བྱུང་ཞིང༌། འདིའི་ཐད་ནས་ངས་གྲོང་དང་དགོན་པ་གཉིས་གོ་ལྡོག་པའི་གནས་སྟངས་ཤིག་ཏག་ཏག་ཆགས་འདུག་ཨང་བསམ་བྱུང༌། ཐ་ན་རང་གི་སྐད་ཡིག་རང་གི་སྤྱི་ཚོགས་ནང་དུ་ཁྱབ་མ་ཐུབ་པའི་གནད་དོན་ཚབས་ཆེན་འདི་འདྲ་ཡོད་པ་གནད་ཡོད་མི་སྣ་ཚོས་མ་ཤེས་པ་འདྲ། ཡང་ན་གཞུང་དང་ཚགས་པར་ལས་ཁུང་ཁག་གིས་འདི་ཉིད་གནད་དོན་ཞིག་ལ་མ་བརྩིས་པ་ཞིག་ཡིན་ཚེ་དེ་ནི་ཤེས་བཞིན་དུ་གཡང་ལ་མཆོང་བཅུག་པ་རེད། མིག་སྔའི་གནས་ཚུལ་འདི་འདྲ་ཅི་མགྱོགས་ཐག་གཅོད་བྱ་དགོས་པ་ནི་བདག་དབང་འཐབ་རྩོད་བྱེད་མཁན་ཞིག་ལ་དགོས་ངེས་ཀྱི་ལག་ཆ་ནི་མི་མང་གི་གོ་རྟོགས་དང་རྒྱུན་ཤེས་ལ་ཐུག་ཡོད་པས་ཡིན། མི་མང་ལ་གོ་རྟོགས་དང་རྒྱུན་ཤེས་ཅུང་ཙམ་ཡང་མེད་ན་སྤྱི་ཚོགས་ཀྱི་འགན་འཁྲི་དང་གཞུང་སྲིད་ཀྱིས་སྤྲད་པའི་ཐོབ་ཐང་ཇི་ལྟར་བེད་སྤྱད་བྱེད་ཐུབ། གོ་རྟོགས་འདི་འདྲའི་འོག་ནས་གཞོན་སྐྱེས་ཚོར་ཕ་མའི་སློབ་གསོ་དང་སྤྱི་ཚོགས་ཀྱི་སློབ་གསོ་བཟང་པོ་དེ་རག་རྒྱུ་ནི་ཉིན་མོའི་སྐར་མ་ལྟར་གྱུར་ཅིང༌། དེང་གི་གཞོན་སྐྱེས་ཚོ་ཡ་རབས་གོམས་གཤིས་དང་ཚད་ལྡན་ཤེས་ཡོན་ལ་ལྟ་ས་མེད་པའི་གནད་དོན་ཞིག་ཆགས་ཀྱིན་ཡོད་པ་དེའང་གནད་དོན་འདི་དག་དང་འབྲེལ་བ་ཤུགས་ཆེ་ཡོད། ད་ནས་བཟུང་གཞུང་དང་ཚགས་པར། གསར་འགྱུར་ལས་ཁུངས་སོ་སོས་ཐབས་ལམ་གསར་པ་ཞིག་མ་བཀོལ་བར་སྔར་རྒྱུན་བཞིན་སྡོད་ན་གོ་རྟོགས་ཅི་ཡང་མེད་པའི་སྤྱི་ཚོགས་ཤིག་ཆགས་ལ་ཉེ་ཞིང་རང་གི་སྐད་ཡིག་དེ་འཁོར་རྒྱུགས་བྱ་ས་གཏན་ནས་མེད་པ་ཞིག་འགྱུར་ཉེན་འདུག
སྡུག་ཅིག་མ་འཕྲད་ན་སྐྱིད་དེ་མི་མཐོང་ཟེར་བ་ལྟར་ད་ཐེངས་ང་ལ་ཕྲད་པའི་དཀའ་ངལ་ཆུང་ཆུང་དེས་རང་ཉིད་སྡོད་སའི་དགོན་སྡེ་དེ་དུས་རབས་ཀྱི་རྗེས་སུ་སླེབས་འདུག་ཨང་སྙམ་སྟེ་དགའ་བ་ཞིག་ལྷག་ཏུ་བྱུང༌། མ་ཟད་གཟའ་མིག་དམར་ནམ་ཡིན་ལ་དགོན་པའི་སྲང་ལམ་དུ་དུས་བབ་དང་བང་ཆེན། ནོར་སྡེ། སྤྱི་ཚོགས་མེ་ལོང་། ཕ་ཡུལ། ལྗང་རླུང་ཤེས་བྱ་སོགས་གཞུང་སྒེར་གྱི་ཚགས་པ་དང་དུས་དེབ་འདྲ་མིན་བཙོང་མཁན་དང་ཉོ་མཁན་བར་འཚང་ཁ་དང་འུར་ཟིང་གིས་འཁྲུག་ཆ་ཧ་ཅང་དོད་པོ་འདི་དྲན་བྱུང་ལ། ང་ཆེས་དགའ་སའི་དུས་བབ་དང་བང་ཆེན་ལྟ་བུའི་ཚགས་ཤོག་འདི་ཚོས་ང་ལ་རྒྱལ་སྤྱིའི་ཆབ་དཔལ་རིག་གསུམ་གྱི་འཕེལ་འགྲིབ་དང་བོད་རྒྱའི་གནད་དོན། བཙན་བྱོལ་བའི་གནས་སྟངས་མང་གཙོའི་ཀ་བ་གསུམ་གྱི་མཛད་ཕྱོགས་སོགས། གལ་ཆེའི་ཤེས་བྱ་དེ་དག་བརྒྱུད་སྤྲོད་བྱས་ཏེ་ཀ་མད་སུམ་ཅུ་མ་གཏོགས་ངོ་མི་ཤེས་པའི་གླེན་པ་ཞིག་ད་ཆ་དེབ་དང་ཚགས་པར་ཀློག་རྒྱུ་མེད་ན་འཚོ་བ་རོལ་མི་ཤེས་མཁན་ལ་གྱུར་བའི་བརྒྱུད་རིམ་འདིའང་དྲན་བྱུང་ཨང༌།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
གྲོགས་རིན་དོན་ལགས་ལ་ཐུགས་རྗེ་ཆེ་ཞུ།
རིན་སྤྲོད་མི་དགོས་པར་དེང་སོང་འདི་ལྟར་བསམ་ཚུལ་བསྟན་མཁན་རག་པ་ནི་ཧ་ཅང་དཀའ་མོ་རེད།
ཁྱེད་ཀྱིས་རིན་མེད་ཀྱི་ཞལ་འདེབས་འདི་ནི་ཆུ་བོའི་རྒྱུན་ལྟར་ཡོད་པའི་རེ་བ་ཞུ།
གྲོགས་བསོད་ནམས་དཔལ་ལྡན་ལགས། ཁྱེད་ཉིད་རྩོམ་ཡིག་འབྲི་རྒྱུར་དགའ་ན་དེ་ནི་ཡོན་ཏན་ཞིག་ཡིན། མུ་མཐུད་དུ་འབད་བརྩོན་གྱིས་དང་རྩོམ་པ་པོ་ཚད་ལྡན་ཞིག་ཆགས་རྒྱུའི་རེ་བ་ཆེན་པོ་ཞིག་སྤྱི་གཙུག་གིས་གནམ་ལ་བཏེགས་ཡོད། རྗེས་སུ་ཡིག་ནོར་ལ་གཟབ་གལ། ཡིག་ནོར་འགའ་བཅོས་ཡོད། ཆེན སྒྱུ ལྟུ ནོར། བཅོས་ ཆེ སྒྱུར ལྟ།
ཁ་བའི་འོད་མདངས་ལགས།
དགེ་གྲོང་གཉིས་གོ་ལྡོག་པ་མ་ཟད་། མི་བུ་འགའ་རེའི་བྱ་སྤྱོད་ནི་དེ་ལས་ཀྱང་གོ་རྡོག་ནས་འདུག
ཁྱེད་ཀྱིས་ཀྱང་མཁྱེན་ངེས་རེད།
བློ་མཐུན་གྲོགས་རིན་དོན་ལགས།
ཁྱེད་ཀྱིས་བདག་ལ་དྲང་གཏམ་བརྗོད་པར་བདག་གིས་སྙིང་དབུས་ནས་ཐུགས་རྗེ་ཆེན་ཞུ།
བདག་གིས་རྩོམ་ཡིག་ཡག་པོ་ཞིག་འབྲི་མི་ཤེས་ཀྱང་རྩོམ་ཡིག་འབྲི་རྒྱུ་ལ་དགའ་བ་ནི་ནམ་ཡང་སྒྱུ་ཐུབ་པ་མི་འདུག དེར་བརྟེན་གནས་ཚུལ་འདི་ལྟུ་བུ་ཆགས་པ་རེད།
གྲོགས་བསོད་ནམས་དཔལ་ལྡན་ལགས། རྩོམ་ཡིག་གི་བརྗོད་བྱ་ཧ་ཅང་ལེགས་པར་མཐོང་། སྒྱུ་རྩལ་དང་སྡེབ་སྦྱོར་ཞན་ཚོད་དུ་འདུག བདག་ནི་སྐད་ཆ་དྲང་མོ་བཤད་རྒྱུར་དགའ་བས་ཐར་ཀར་བཤད་པའི་སྐད་ཆ་ལ་སྙན་ཆ་མེད་ཀྱང་ཕན་ཐོགས་ཆེ། ཝེ་་དཔེ་མཚམ་སོང་ནས་སྙན་ངག་བྲིས་ན་རིག་གནས་དུག་དུ་མཐོང་མཁན་གྱི་དགེ་རྒན་ཚོས་བཀའ་བཀྱོན་རེག་ཡོང།
རོགས་རམ་ཞེས་བཅོས།
གྲོགས་པོ་ཏྲེ་ཟླ་འོད་ལགས། ཕྲན་ངྷ་ས་ནས་དེ་རིང་སེ་ར་འབྱོར་ཡོད། ཁྱེད་རང་གིས་ཟིན་བྲིས་ཤིག་ཉར་རྒྱུ་གསུངས་ཧ་ཅང་དགའ་ཡོད། དྲ་འབུ་མང་བོས་སྐྱོན་བརྗོད་ལ་ཆ་འཇོག་དགོས་དོན་ཡོད་པ་མ་རེད། མི་བུ་རྣམ་དཔྱོད་ཅན་ཞིག་ཡིན་ན་ཁྱེད་ཀྱི་ཟིན་བྲིས་ཀྱི་དོན་ཧ་གོ་ངེས་རེད། སྤྱིར་དུས་བབ་ཀྱི་མདུན་ངོས་ཀྱི་བསམ་འཆར་ཞེས་པའི་རྩོམ་འགོད་ས་འདིར་རྩོམ་ལེགས་པོའི་རིགས་འགོད་རྒྱུ་ཡོད་པ་རེད། འདིར་ཚིགས་བཅད་ལྟ་བུའི་རིགས་འགོད་རྒྱུ་མིན་ཞེས་དྲ་བདག་གིས་གསུངས་བྱུང་། ཁྱེད་ཀྱིས་ཟིན་བྲིས་ཀྱི་ས་མིག་ཅིག་ཉར་རྒྱུ་ཡིན་ན་ཕྲན་ལ་འབྲེལ་གཏུགས་བྱོས་དང་ཕྲན་གྱིས་འཇོན་ཚོད་ཀྱིས་རོགས་རིམ་བྱེད་ངེས་ཡིན།
ཁ་པར་ཨང་གྲངས 9916442227འདིའི་སྟེང་འབྲེལ་བ་བྱོས།
ལོ་འདི་ཁྱོད་རང་གཅིག་པོས་ལོ་གསར་བཏང་བ་ཡིན་ནམ་་ང་ཚོས་བོད་ཕྱིན་ནང་གཉིས་ཀྱིས་ལོ་གསར་ནི་བཏང་མེད་
སྤྱིར་རབ་ཏུ་བྱུང་བ་རྣམས་གྲོང་ནས་དགོན་པར་བསླབ་པ་སློབ་གཉེར་གནང་བར་ཕེབས་དགོས་པ་ལས་དགོན་ནས་གྲོང་དུ་བསླབ་པ་སློབ་གཉེར་གནང་བར་ཕེབས་པའི་གོ་རིམ་ནི་མེད། གྲོང་ནི་རྣམ་གཡེང་དང་འདུ་འཛི་རྒོད་པའི་གནས་དང་དགོན་པ་ནི་དམ་པའི་ཆོས་ཀྱི་ཁྱིམ་བཞེས་དང་ཞི་དུལ་བག་ཡོད་ཅན་གྱི་དགེ་འདུན་པ་རྣམས་པའི་བཞུགས་གནས་སོ། གཞན་ཡང་ཆོས་ཁྲིམས་པར་དཔེ་ཀློག་དང་བློ་འཛིན་ཁྱད་དུ་འགྲོ་དགོས་ཤེས་དགོངས་པ་ཞུས་ནས་གྲོང་ནས་ཁྱིམ་པ་རྣམས་ཀྱིས་གང་ཞིག་བྱེད་ཀྱི་ཡོད་མེད་ལ་གཟིགས་ནས་བཞུགས་ན་འཚམ་པོ་ཡོད་དམ། ཁ་དྲོ།
བསོད་ནམས་དཔལ་ལྡན་ལགས། དགོན་པ་དང་གྲོང་སྡེ་གོ་ལྡོག་པ་རེད་དམ་མི་བུ་རེ་འགའི་བྱ་སྤྱོད་གོ་ལྡོག་པ་རེད།
སྤྱིར་བདག་ཀྱང་གྲོང་ལ་སོང་ནས་དཔེ་མཚམས་སོགས་བྱེད་རིགས་ལ་ལྟ་ཚུལ་ཡོད་མཁན་ཞིག་ཡིན། འོན་ཀྱང་དེ་རིང་ཁོང་གིས་བསམ་ཚུལ་ལ་གོང་འོག་ཚང་མའི་ཐུགས་གནང་བྱེད་དགོས་པ་ཞིག་རེད་་་་་་་་་དཔེ་མཚམས་སོང་ནས་སོང་གོ་ཆཽད་འདུག
སྐུ་ཞབས་ཨརྱ་དང་གྲོགས་བེ་རི་རྒྱལ་པོ་ལགས་གཉིས་ལ་ལན་གཅིག་ཏུ་འབུལ་རྒྱུ།
བདག་འགྲོ་སའི་གཞིས་གྲོང་གང་ཡིན་གནད་དོན་ཞིག་མ་རེད། གནད་དོན་ཞིག་ཡོད་པ་ནི་གཞིས་གྲོང་མང་པོའི་ཁྲོད་དུ་གནད་དོན་འདི་ལྟ་བུ་ཡོད་པ་དེ་རེད།
མ་གཞི་གྲྭ་པ་སྡོད་ས་དགོན་པ་རེད་འོན་ཀྱང་དཔེ་མཚམས་འགྲོ་སྲོལ་འདི་ཆ་ཐམས་ཅད་ནས་ཡག་པོ་མ་རེད་ཅེས་བརྗོད་ན་ཅུང་ཐལ་ཆེ་བར་སྙམ། ལྷ་དར་ས་སྡིག་དར་ཞེས་པ་བཞིན་སྡུག་པའི་ཆ་ཡང་ལོས་ཡོད།
ཧོར་བུ་ཡེ་ཤེས་ལགས། ཁྱེད་ཀྱིས་བདག་ལ་བསམ་ཚུལ་བརྗོད་པ་ཁོ་པས་སྙིང་ནས་ཐུགས་རྗེ་ཆེ་ཞུ་བ་ལགས། ཁྱེད་ཀྱིས་བཤད་པ་བཞིན་དགོན་ལས་གྲོང་དུ་སློབ་སྦྱོང་ཡག་པོ་ཞིག་ཡོང་ཁག་པོ་ཡིན་ཀྱང་དགོན་སྡེ་ནང་ལོ་གསར་སྐབས་འུར་ཟིངས་ཇི་ལྟར་ཡོད་པ་ཁྱེད་ཀྱིས་ཤེས་ལས་ཆེ། དཔེ་མཚམས་ཞེས་པ་དཔེ་ཆ་བློ་འཛིན་རྒྱུ་གཅིག་པོ་ལ་གོ་མི་རུང་སློབ་སྦྱོང་ཅི་ཞིག་བྱས་ཀྱང་འགྲིགས་པ་ཞིག་རེད། དེར་བརྟེན་ད་ཐེངས་ཁོ་པས་དཔེ་ཆ་བློ་འཛིན་ཞེ་དྲག་མ་ཐུབ་ཀྱང་སྙན་ངག་མི་འདྲ་བར་བཅུ་ལྷག་འབྲི་ཐུབ་པ་དང་སྒྲུང་རྩོམ་དང་དཔྱད་རྩོམ་ཡང་ཅུང་འབྲི་ཐུབ་སོང་། འདི་ནི་ངས་དོན་དམ་གྱི་དཔེ་མཚམས་ཤིག་ཆགས་ཡོད་དྲན་བཞིན་ཡོད་དོ།།
སྐུ་ཞབས་དགེ་མཐོང་ལགས། ཁྱེད་ཀྱིས་བདག་ལ་བསྟོད་བསྔགས་གནང་བར་ཐུགས་རྗེ་ཆེ་ཞུ། ཁོ་པས་ཟིན་བྲིས་ཤིག་གཉེར་འདོད་འདུག་པས་བརྒྱུད་རིམ་ཇི་ལྟར་དགོས་པའི་ལམ་བསྟན་ཁ་གསལ་ཞིག་གནང་རོགས།
ཁྱེད་ཀྱིས་ཟིན་བྲིས་ཀྱི་རང་བཞིན་ཅན་གྱི་རྩོམ་ཡིག་སྤུས་དག་ཅིག་བྲིས་པ་ལ་དགའ་བསུ་ཞུ། ཁྱེད་རང་གྲོང་སྡེ་ལ་དཔེ་མཚམས་སུ་ཕེབས་པ་ཡག་པོ་རེད། གུང་གསེང་གྱིས་དུས་ཚོད་འཕྲོ་བརླག་ཏུ་བཏང་བ་འགྲིག་གི སྤྱིར་གྲྭ་ས་ནས་དཔེ་མཚམས་ལ་འགྲོ་མཁན་མང་ཆཻ་བ་དཔེ་ཆ་ཡག་པོ་གཟིགས་མཁན་དག་རེད། འདི་ལ་སྐྱོན་བརྗོད་བྱེད་མཁན་དག་གིས་བསམ་བློ་མ་བཏང་བ་རེད། ཕྲན་སྔོན་མ་གྲྭ་ས་ནས་དཔེ་མཚམས་ལ་མང་བོ་འགྲོ་མྱོང་ཡོད། ད་ལྟ་ངྷ་རམ་ས་ན་སྡོམ་ནས་བསྡད་ཡོད།
གྲྭ་བསོད་ནམས་དཔལ་ལྡན་ལགས།གྲྭ་ས་ཆེན་པོ་དེ་བཞག་ནས་ཁྱོད་གྲོང་ཚོགས་ནང་དུ་ཕྱིན་ནས་སློབ་སྦྱོང་ཡག་པོ་ཞིག་རེག་ཨེ་ཡང་།མ་ཟད་ཁྱོད་ཀྱིས་ས་གནས་ག་བ་ཡིན་དང་གཞི་གྲོང་ག་བ་ཡིན་གསང་དགོས་དོན་ཅི་རེད།ངས་བལྟས་ན་ཁྱོད་ཀྱི་སེམས་ཁུལ་བྱས་མ་ཤེས་པ་ལྟ་བུ་མཐོང་སོང་།
བཤད་པ་བདེན་ཡང་གྲྭ་བ་སྡོད་ས་དགོན་ལས་གྲོང་ལ་སོང་ནས་དཔེ་མཚམས་སུ་སྡོད་དགོས་པ་འདི་ཅི་ཞིག་རེད། ངོ་མ་བཤད་ན་གྲྭ་བ་ཞིག་གིས་དཔེ་གཟིགས་གནང་སར་གདན་ས་ཆེན་པོ་དེ་ཚོ་ལས་ཡག་ཅིག་གང་ན་ཡོད། འོན་ཀྱང་དེང་སེང་གྲྭ་བ་རེ་འགའ་གཞིས་གྲོང་ཁག་ལ་སོང་ནས་དཔེ་བལྟས་དཔེ་མེད་ཅིག་བྱས་རབས་བཤད་ཀྱིན་འདུག་པ་འདི་ལ་ངས་ནི་བསམ་བློ་མང་བོ་གཏོང་དགོས་བྱུང་། ཁྱེད་ཅག་གིས་ལྟས་ན་་་་་་་་་་་་་་་་་
གྲོགས་པོ་བསོད་ནམས་དཔལ་ལྡན་ལག་ཁྱོད་རང་གཞིས་གྲོང་ཞིག་ཏུ་དཔེ་མཚམས་སྡོད་པའི་གཞིས་གྲོང་དེ་གང་ཡིན་ནམ་དངོས་ནས་ཁྱོད་ནི་རྒྱལ་སྤྱི་དང་བོད་དོན་གནས་ཚུལ་སོགས་ཀྱི་ཐད་གོ་རྟོགས་ཧ་ཅང་ཆེན་བའི་གཞོན་སྐྱེས་ཡིན་པ་རྟོགས་་་་་་ང་ཡང་ཁྱོད་འདྲ་བ་དེབ་དང་ཚགས་པར་ཀློག་རྒྱུ་མེད་ན་འཚོ་བ་རོལ་མི་ཤེས་མཁན་ཞིང་བྱུང་ན་དགའ་བ་ལ་
བདེན་གཏམ་ནི་བདེན་གཏམ་རེད།