ཁང་གསར་རྡོ་རྗེ།
དད་གུས་ཀྱི་དབང་གིས་ཡིན་ནམ་ཡང་ན་བསམ་བློ་ལ་རང་དབང་མེད་པས་ཡིན། རྣམ་པ་གཅིག་ཏུ་ན་འདི་གཉིས་ཐ་དད་ཡིན་སྲིད་ལ་གཞན་དུ་ན་བབས་ས་གཅིག་མཚུངས་ཀྱང་ཡིན་སྲིད།
བསྟན་འཛིན་ཕན་བདེའི་༧རྒྱལ་བ་རིན་པོ་ཆེའི་བཞུགས་ཁྲི་ཞེས་པའི་རྩོམ་ཐུང་དེ་ཡང་མཐར་གཏུགས་ནས་བཤད་ན་དད་གུས་ཀྱི་ལྟ་སྟངས་འོག་ནས་བལྟས་པའི་མཐོང་ཚུལ་ཞིག་རེད་ལ། ངས་བྲིས་པ་ཁག་ཅིག་ཀྱང་ལྟ་སྟངས་དེ་རང་གི་འོག་ནས་བྲིས་ཡོད། ལྟ་སྟངས་དེའི་འོག་ནས་སོང་ན། རྔ་མོང་ཆེ་ན་ལྕི་བ་ཡང་ཆེ་དགོས་པའི་ལོག་རྟོག་བཟུང་སྟེ། མི་ཆེན་གྱིས་བཤད་ཚད་ལ་མཐོང་ཆེན་དང་མི་ཆུང་གི་སྐད་ཆ་ཚང་མ་ཆོ་མེད་དུ་བརྩི་རྐྱང་བྱེད་ངེས་པ་ནི་བཤད་མི་དགོས་པ་ཞིག་རེད། འོན་ཀྱང་གང་ཟག་ལ་མ་རྟོན་ཆོས་ལ་རྟོན་ཞེས་པའི་ལྟ་སྟངས་དེའི་དབང་དུ་བྱས་ན། བསམ་ཚུལ་ཚང་མར་བསམ་ཚུལ་ཡིན་མཉམ་གྱི་ལྟ་སྟངས་ཤིག་གི་ཐོག་ནས་རིན་ཐང་འཇོག་དགོས་པ་རེད་མ་གཏོགས། བཤད་མཁན་སུ་ཡིན་མིན་གྱི་ཐད་ནས་རིན་ཐང་འཇོག་མི་རུང་བ་རེད། ད་ནི་དོན་ཚན་ལ་དབབ་སྟེ་བཤད་པར་བྱ།
༡༽ ངའི་སྐད་ཆ་དེ་ཚོ་སུ་ལ་དམིགས་པ་དང་གང་ལ་གཟས་ཏེ་བཤད་མིན་ཐད། སྐུ་ཉིད་ཀྱིས་མཚོན་པའི་ཀློག་པ་པོ་སུས་གོ་བ་ག་རེ་བླངས་ནའང་ངས་དེ་འགྲིགས་མི་འདུག་ཅེས་བཤད་ཀི་མིན། གང་ཡིན་ཟེར་ན། ངས་བཤད་པའི་ང་ཚོའི་སྤྱི་ཚོགས་ཀྱི་མི་མངོན་པའི་སྒྲོམ་གཞི་དེ་གཞི་རྒྱ་ཆེན་པོ་ཞིག་ཡིན་པ་ལས་ཆུང་ཆུང་མ་རེད། དེའི་དབང་གིས་མི་འབུམ་གཅིག་ལྷག་གི་ནང་ལ་བཤད་པའི་སྐད་ཆ་དེ་སུའི་གནོངས་ལའང་ཕོག་ཆོག་པ་ལ་གནོངས་ཅན་ཞིག་གིས་ངོས་བླངས་ན་དེར་ཟད་ཀྱི་ངས་མཛུབ་བཙུགས་བྱས་པ་མིན།
༢༽ དངོས་ཡོད་གནས་ཚུལ་ལ་ཞིབ་ཏུ་བསམས་ན། ཉིད་ཀྱིས་མགོ་ནས་མཇུག་བར་ག་རེ་བྲིས་པ་དེ་ག་སྒྲོམ་གཞི་དེའི་གཙོ་གནད་རེད། ༸རྒྱལ་བ་རིན་པོ་ཆེར་དད་པ་ཡོད། ཁོང་དྲིན་ཆེ། ཁོང་གིས་དམངས་གཙོ་གསོལ་རས་གནང་བ་རེད། ཁོང་བླ་ན་མེད་པ་རེད། དེའི་དགོངས་པ་དང་མི་མཐུན་པ་སྨྲས་ན་མི་རིགས་ཀྱི་ཞབས་འདྲེན་རེད། ངོས་ལེན་མེད། ངོ་རྒོལ་ཡོད་ཟེར་གྱི་ཡོད་རེད། སྐད་ཆ་འདི་འདྲ་བཤད་དེ་ང་ཚོ་རྡོག་རྡོག་བཟོི་ཐུབ་ན། སྐད་ཆ་འདི་ག་རང་གིས་ང་ཚོ་དུམ་བུ་མང་པོར་གཏོང་ཐུབ་ཀྱི་རེད།
༣༽ང་ཚོའི་དམངས་གཙོ་འདི་༸རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་པ་ཆེན་པོས་གསོལ་རས་གནང་བ་རེད། དེ་དོན་དངོས་རེད། ལུང་པ་ཆུས་འཁྱེར་ན་རྡོ་ལེབ་སྐམ་པོར་མི་གནས་པ་བཞིན་མང་གཙོའི་རྒྱལ་ཁབ་ཆེ་ཤོས་རྒྱ་གར་ནང་ལ་ཕེབས་རྗེས་མང་གཙོའི་ལུགས་བཟང་དུ་མ་ཕེབས་རང་ཕེབས་ཡིན་པ་དེ་ཡང་དོན་དངོས་རེད།
འོ་ན། བོད་མི་ཚོས་འདས་པའི་ལོ་ངོ་ ༣༦༠ ལྷག་གི་རིང་ལ་ཅིའི་ཕྱིར་ལམ་ལུགས་གསར་པ་ཞིག་ལ་རྩོད་ལེན་མ་བྱས་པ་རེད། ད་ལྟ་རང་གི་ཕྲག་སྟེང་དུ་ལྷུང་པའི་འགན་འཁྲི་ཡང་ངོས་འཛིན་མི་ཐུབ་པ་འདི་འདྲ་ཇི་ལྟར་ཆགས་པ་རེད། འདིའི་ཕུགས་དེད་ན་༸རྒྱལ་བ་སྐུ་ཕྲེང་ལྔ་པ་ནས་བརྩིས་པའི་བོད་ཀྱི་དབུ་ཁྲིད་དང་ལས་སྣེ་ཚོས། བསམ་བཞིན་དུའང་བསམ་བཞིན་མ་ཡིན་པར། བོད་མི་དམངས་རྣམས་མུན་འཐོམ་དུ་བཞག་པ་དང་འབྲེལ་བ་ཡོད་པ་དེ་ཡང་དོན་དངོས་རེད། མདོར་བསྡུས་ནས་བཤད་ན། ༡༩༥༩ གོང་དུ་༸རྒྱལ་བ་རིན་པོ་ཆེས་དབུ་འཁྲིད་པའི་བོད་གཞུང་དགའ་ལྡན་ཕོ་བྲང་གིས་བོད་མི་དཀྱུས་མ་ཚོ་ལ་ཕན་པའི་སློབ་གྲྭ་ག་ཚོད་བཙུགས་འདུག་གམ། འདི་གཅིག་པུ་ལ་བསམ་བློ་བཏང་ན་ཤེས། ལོ་བརྒྱ་ཕྲག་མུན་འཐོམ་དུ་བཞག་པའི་མི་རིགས་ཤིག་ལ་ལོ་ཁ་ཤས་ནང་༸རྒྱལ་ཁབ་ཀྱི་འགན་ལེན་པར་ཤོག་ཟེར་ན་ཁག་པོ་ལོས་བྱེད།
༤༽ ངས་གཏམ་དཔེ་གསར་པ་ཞིག་རྩོམ་འདོད་བྱུང་། དེ་ནི། བཟང་བཟང་བླ་མ་དང་ངན་ངན་མང་ཚོགས། ཞེས་པ་འདི་ཡིན། ང་ཚོས་གྲུབ་འབྲས་གླེང་སྐབས། བླ་ཆེན་འདི་དང་འདིའི་བཀའ་དྲིན་ཉག་གཅིག་ལ་བརྟེན་ནས་བྱུང་ཞེས་བརྗོད་པ་ལས། ལས་དོན་དེའི་ནང་དངོས་སུ་དཀའ་ཚེགས་མྱངས་ཏེ་ལས་ཀ་བྱེད་མཁན་ཚོའི་བྱས་རྗེས་བགྲངས་པ་ཧ་ལམ་མཐོང་རྒྱུ་མེད་ཅིང་། ཡང་ལས་དོན་འཐུས་ཤོར་དང་བྱུས་ཉེས་ཀྱི་སྐོར་གླེང་སྐབས། གོང་རིམ་གྱི་བཀོད་འདོམས་འོག་ཏུ་ལས་དོན་སྒྲུབ་མཁན་གཤམ་འོག་ལས་བྱེད་པ་རྣམས་དང་། མང་ཚོགས་ཀྱིས་མ་འཇོན་རབས་མ་གཏོགས། དཀོན་མཆོག་གོང་ཕུད་ཅེས་སྦུག་རྩ་ངོ་མ་དེར་ཅི་ཡང་བརྗོད་ཕོད་ཀྱི་མེད་པའམ་བརྗོད་ཀྱི་མེད། ཅི་མཛད་ཡང་དག་པ་དང་ཅི་གསུང་ལེགས་བཤད་རེད།
ང་རང་རྒྱ་ནག་ནང་དུ་ཕྲན་བུ་སྡོད་མྱོང་། རྒྱ་ནག་ནང་དུའང་མང་ཚོགས་ཕལ་མོ་ཆེས་སྲིད་གཞུང་དང་སྲིད་འཛིན་ལ་སྐྱོན་བརྗོད་བྱས་པ་ཉུང་ཉུང་རེད། མང་ཆེ་བས་སྲིད་གཞུང་གི་གཤམ་འོག་ལས་བྱེད་པས་སྲིད་བྱུས་ཚུལ་བཞིན་ལག་བསྟར་མ་བྱས་པར་བསམས་ཏེ། དབུས་གཞུང་ལ་ཞུ་གཏུགས་བྱེད་ཅིང་། ནམ་ཞིག་དབུས་གཞུང་གིས་མཁྱེན་ན་གནས་དོན་ཐག་གཅོད་ཡོང་གི་རེད་དྲན་བཞིན་ཡོད། རྒྱ་མི་སྟོང་ཕྲག་མང་པོས་ཡིད་ཆེས་དེ་འདྲ་ཞིག་བཅངས་ཏེ་ཉིན་ལྟར་རྒྱ་གཞུང་ལ་སྙན་ཞུ་འབུལ་བཞིན་ཡོད། ཞུ་གཏུགས་བྱེད་བཞིན་ཡོད།
འོན་ཀྱང་རྒྱ་གར་དང་ཨ་རི། ཁེ་ཎ་ཌ་སོགས་ཚད་ལྡན་གྱི་དམངས་གཙོའི་རྒྱལ་ཁབ་ནང་། ཐད་ཀར་སྲིད་འཛིན་དང་སྲིད་གཞུང་ལ་སྐྱོན་བརྗོད་བྱེད་ཀྱི་འདུག འདི་ལ་ཞིབ་ཏུ་བསམས་ཤེས་ན། དངོས་གནས་ཀྱི་དམངས་གཙོའི་གནས་ཚད་དུ་སླེབས་ཡོད་མེད་ཀྱི་ཚད་གཞི་ཞིག་མཐོང་གི་རེད།
༥༽ འདི་ལྟར་བཤད་དུས་ང་༸རྒྱལ་བ་རིན་པོ་ཆེ་ལ་མ་དད་པ་དང་། ངོ་རྒོལ་བྱེད་མཁན་ཞིག་ཏུ་དགོངས་སྲིད། ༸རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་པ་འདི་ང་ཚོ་བོད་ཀྱི་ནོར་བུ་རེད། ཡིད་བཞིན་ནོར་བུ་རེད། དེ་ལ་གུས་བརྩི་ཡོད། ང་ཚོས་ཁོང་ལ་སྲུང་སྐྱོབ་ཡིན་ཁུལ་གྱིས་མང་ཚོགས་ཀྱི་བསམ་ཚུལ་འབུར་འཇོམས་བྱས་ན་ནོར་བ་རེད། ཁོང་རླབས་ཆེན་ཞིག་ཡིན་པའི་རྟགས་སུ་དམངས་གཙོ་ལ་ཐུགས་དགྱེས་མཉེས་དང་རྒྱུན་དུ་བསམ་ཚུལ་གསར་པར་ཐུགས་སྣང་། ལྷག་པར་དུ་མི་རིགས་འདི་འགྱེལ་ས་ནས་ལངས་ཐུབ་པ་ཞིག་བཟོ་དགོས་དགོངས་བཞིན་ཡོད།
ང་ཚོས་དད་གུས་བྱེད་སྟངས་དེར་ཡང་བསམ་བློ་གཏོང་དགོས། ལྕེ་ནར་ནར་དང་ལུས་གུག་གུག་དེ་དད་གུས་ངོ་མ་མ་རེད། ཁོང་གིས་ཅི་བཤད་ལ་ཉན་པ་ལས་གཞན་དག་འབུར་འཇོམས་བྱེད་པ་དེ་དད་གུས་བྱེད་སྟངས་མ་རེད། ཤ་རིའི་བུ་དང་མོངྒལ་གྱི་བུ་སོགས་ཀྱིས་ཀྱང་སངས་རྒྱས་ཀྱི་གསུང་ལ་དོགས་འདྲི་དང་གླེང་སློང་། བརྒལ་བརྟག་གནང་ཡོད། དེ་ལྟར་གནང་བ་དེ་བླ་ན་མེད་པའི་དད་གུས་རེད། ང་ཚོས་སེམས་ནང་འདི་ཁྱད་མཚར་དྲན་ནའང་ཅི་མཛད་ལེགས་མཐོང་བྱེད་དགོས་ཞེས་མནན་གྱིན་ཡོད། ངའི་ལྟ་སྟངས་ལྟར་ན་དེ་ཚོ་དད་གུས་མ་རེད།
ངས་རང་གི་བསམ་ཚུལ་རྣམས་སྔོན་མ་བཤད་ཟིན་ལ་ད་ལྟའང་་བཤད་ཀྱིན་ཡོད། མ་འོངས་པར་ཡང་བཤད་ཀྱི་ཡིན། ངས་བཤད་པའི་བསམ་ཚུལ་རྣམས་༸རྒྱལ་བ་རིན་པོ་ཆེའི་དགོངས་པ་བྱེ་བྲག་གི་གནད་ཁ་ཤས་དང་མི་མཐུན་པ་ཡོང་གི་རེད། ཆོས་ཉིད་ཀྱི་དབང་གིས་དེ་ཡོང་ཆོག་པ་ཞིག་དང་ཡོང་དགོས་པ་ཞིག་རེད། ངས་བཤད་པ་རྣམས་ང་རང་གི་བསམ་ཚུལ་རེད། དེ་ཡང་དག་དང་མ་དག་དེ་ངས་བཤད་པའི་རྒྱུ་མཚན་ལ་བལྟ་རྒྱུ་རེད་མ་གཏོགས་བླ་ཆེན་མི་ཆེན་ཞིག་གི་དགོངས་པ་དང་མཐུན་མ་མཐུན་ལ་གཟིགས་རྒྱུ་མ་རེད།
འོན་ཀྱང་གསལ་པོ་བཟོ་དགོས་པ་ཞིག་ལ། བསམ་ཚུལ་མི་མཐུན་པ་བཤད་པའི་རྒྱུ་མཚན་གྱིས་༸རྒྱལ་བ་རིན་པོ་ཆེ་ལ་གུས་བརྩི་མེད་པའམ་ངོ་རྒོལ་བྱེད་མཁན་ཡིན་པར་བཤད་ན་སྤྱིར་བཏང་གི་འགྲོ་སྟངས་ཐོག་ནས་ནོར་བ་རེད་ལ། མཛངས་དཀྱེལ་ཆེ་བའི་༸གོང་ས་མཆོག་གི་དགོངས་པར་བབས་པའི་བྱ་བ་ཞིག་ཀྱང་མ་རེད།
༦༽ རྒྱ་ནག་གི་ནང་དུ་ཏཱ་ལའི་བླ་མ་ལ་དགག་པ་བརྒྱབ་ནས་འཚོ་བ་སྐྱེལ་མཁན་ཁྱུ་གཅིག་ཡོད་རེད། དྷ་རམ་ས་ལས་གཙོ་བོ་བྱས་པའི་རྒྱ་གར་ནང་དབུ་མའི་ལམ་དང་༸རྒྱལ་བ་རིན་པོ་ཆེར་བསྟོད་པ་འཐེན་ཏེ་འཚོ་བ་སྐྱེལ་མཁན་ཁྱུ་གཅིག་ཡོད་རེད། ཕྱི་མ་དེས་ཧ་ལམ་རང་ཉིད་༸རྒྱལ་བ་རིན་པོ་ཆེའི་དགོངས་པ་སྲུང་སྐྱོབས་དང་དར་སྤེལ་གཏོང་མཁན་གྱི་སྲུང་མ་ཡིན་དྲན་བཞིན་ཡོད། ༸རྒྱལ་བ་རིན་པོ་ཆེའི་དགོངས་པ་ཟེར་དུས་རྒྱ་ཆེན་པོ་རེད། དབུ་མའི་ལམ་ཙམ་མ་རེད། རང་བཙན་རྩོད་མཁན་ལ་རང་གི་སྐད་སྒྲ་སྒྲོག་སའི་ལམ་ཞིག་བསྐྲུན་དགོས་པ་དེ་ཡང་༸རྒྱལ་བ་རིན་པོ་ཆེའི་དགོངས་གཞི་རེད། ༸རྒྱལ་བ་རང་ཉིད་ཞལ་མ་བཞུགས་པའི་སྐབས་སུའང་བོད་དོན་མུ་མཐུད་དེ་གནས་དགོས་པ་དང་། དེ་ལྟར་གནས་ཐུབ་པའི་འགན་ལེན་བྱེད་དགོས་པ་དེ་ཡང་༸རྒྱལ་བ་རིན་པོ་ཆེའི་དགོངས་པ་རེད།
དེར་བརྟེན་༸རྒྱལ་བ་རིན་པོ་ཆེ་ཞལ་བཞུགས་ཐོག་འདིར་གནད་དོན་གང་ལའང་བློ་རྒྱ་ཆེན་པོས་སྦྱང་བཤད་བྱས། ཐབས་ལམ་གང་ལའང་བསམ་བློ་བཏང་སྟེ། མང་ཚོགས་རང་གིས་འགན་འཁྱེར་ཐུབ་པའི་གནས་སྟངས་ཤིག་ཏུ་འཁྲིད་དགོས་པ་དེ། བོད་དོན་འཐབ་རྩོད་ཀྱི་དགོས་མཁོ་རེད་ལ་༸རྒྱལ་བ་རིན་པོ་ཆེའི་དགོངས་པ་གལ་ཆེ་ཤོས་ཤིག་རེད། དེར་བརྟེན། རྟག་པར་ཡེ་ཤེས་དབྱིངས་དཔྱད་ཀྱི་ཐོག་ཏུ་འབབ་ཐབས་བྱེད་པ་འདི་མངོན་ཤེས་ལྟ་ཅི་རྗེས་དཔག་ཙམ་ཡང་མེད་པའི་སྲུང་མ་ཐ་ཆད་ཀྱི་བྱེད་སྟངས་རེད།
སྐུ་ཉིད་ཀྱིས་ང་མི་ཆུང་ཞིག་གི་བསམ་ཚུལ་ལ་ཐུགས་སྣང་གནང་བར་དགའ་བསུ་ཡོད། ཇི་ལྟར་ཤོག་བུའི་སྒོར་མོ་ཞིག་ལ་རྒྱབ་མདུན་གཉིས་ཡོད་པ་ཇི་བཞིན་༼བསམ་ཚུལ་འབུར་འཇོམས་དང་འུར་རྒྱག་པ་༽ཟེར་བ་དེ་ཤོག་སྒོར་གྱི་ངོས་གཅིག་རེད། དེ་མིན་གྱི་ངོས་གཞན་དེ་ཕྲན་གྱི་ཟིན་བྲིས་གཞན་དག་ལ་བཀོད་ཡོད་པས་དེར་གཟིགས་པར་འཚལ། ཁང་གསར་རྡོ་རྗེས་བྲེལ་སྟབས་སུ་བྲིས་ཏེ་ཕུལ།། །།
ད་མཇུག་བསྡོམས་སུ་མདོར་བསྡུས་ཤིག་ཞུ་གི་ཡིན།
༡༽ བགྲོ་གླེང་འདི་འགོ་བཙུགས་པ་ནས་མཇུག་མ་བསྡུས་བར། ཕྲན་གྱིས་བཤད་པའི་རྒྱུ་མཚན་ལ་རྒྱུ་མཚན་དུ་གཟིགས་ཏེ་རྒྱབ་སྐྱོར་གནང་མཁན་མང་པོ་ཞིག་བྱུང་། དེ་དག་ལ་ད་བར་གང་ཡང་ཞུས་མེད། མཇུག་བསྡོམས་ཀྱི་མཚམས་འདིར་ངས་སེམས་ཚོར་ཟབ་མོས་ཚིག་གཅིག་བཤད་འདོད་པ་ནི། ཁྱེད་ཅག་ལྟ་བུའི་དཔྱོད་ལྡན་ཡོད་ངེས་པ་དང་ཡོད་དགོས་པའི་ཡིད་ཆེས་ཤིག་གིས་དྲངས་ཏེ་རྩོམ་འདི་སྤེལ་བ་ཡིན་ལ། རྩོམ་ཐུང་འདི་སྤེལ་རྗེས་ངའི་ཡིད་ཆེས་དེ་ཇེ་བརྟན་དུ་ཕྱིན་སོང་ཞེས་ཞུ་བར་འདོད།
༢༽ ང་རང་མི་སྤྲོ་ཐུང་ཐུང་ཞིག་ཡིན། གྲོགས་པོ་ཚོས་ང་ལ་ཁྱེད་རང་དབུས་པ་ཁམས་པའི་གཤིས་ཀ་ཅན་ཞིག་རེད་ཅེས་བཤད་ཀྱི་ཡོད། སྐད་ཆ་ཁོག་ལ་སྦས་ཐུབ་ཀྱི་མེད། འདིས་ང་རང་རྒྱ་འོག་ཏུ་སྡོད་སྐབས་དཀའ་ངལ་བཟོ་མྱོང་། འོན་ཀྱང་གཤིས་ཀ་འདི་འགྱུར་ཐུབ་ཀྱི་མི་འདུག
བགྲོ་གླེང་འདི་དང་གཞན་དུ་ངས་སྐད་ཆ་མི་འཚམས་པ་བཤད་ཡོད་སྲིད། ཁོང་ཁྲོ་བསླངས་ཡོད་སྲིད། དེ་དག་ལ་སྙིང་ཐག་པ་ནས་བཟོད་གསོལ་ཞུ་རྒྱུ་ཡིན།
༣༽ དྲྭ་གྲོགས་མང་པོ་ཞིག་གིས་ང་ལ་དགག་པ་དང་། དོགས་འདྲི་གནང་བྱུང་ལ། ཁ་ཤས་ཀྱིས་མ་འདོད་པའི་རྣམ་འགྱུར་བསྟན་བྱུང་། ལྷག་པར་ཁ་ཤས་ཀྱིས་ངའི་རྒྱབ་ལྗོངས་ལ་དོགས་པ་གནང་བ་རེད།
རྒྱ་ཆེ་ས་ནས་བསམས་ན། བསམ་བློའི་གོ་རྟོགས་འཕེལ་བ་ལ་གདོང་ཐུག་བྱེད་དགོས་རེད། འགལ་བ་ཡོད་དགོས་རེད། དགག་སྒྲུབ་བྱེད་དགོས་རེད། དེར་བརྟེན། ཇི་ཙམ་གྱིས་དགག་སྒྲུབ་ཀྱི་མེ་འོབ་ནང་ནས་ལངས་ཡོང་ན། དེ་ཙམ་གྱིས་རྒྱུ་མཚན་གྱི་ཚོད་བགམ་ཐེབས་པའི་རྟགས་རེད། དེར་བརྟེན་གྲུབ་འབྲས་ཤིག་བྱུང་ཡོད་ན། མི་མཐུན་པར་སྨྲ་མཁན་རྣམ་པའི་གྲུབ་འབྲས་དེ་ཆུང་ཆུང་མ་རེད།
༤༽ བརྒྱུད་རིམ་གྱི་ཐད་ནས་བཤད་ན། ངའི་རྩོམ་ཐུང་འདི་མཐོང་བ་དང་འདྲོགས་ལངས་ཏེ་གང་བྱུང་སྨྲ་བ་དང་། འཚིག་པ་ཟོས་ཏེ་གཤེ་ཞིང་སྤྱོ་བ། བརྣག་སེམས་སྐྱེས་ཏེ་ནག་པོ་བཟོ་ཐབས་ཀྱི་སྦྱོར་ངན་རྩོམ་པའི་སྐབས་བྱུང་ཡང་། རྒྱུ་མཚན་དང་གནས་ལུགས་རྣམས་སྐྱོ་ངལ་མེད་པར་བགྲང་པའི་མཐའ་རུ་ཡིད་མོས་དང་རྒྱབ་སྐྱོར་གནང་མཁན་མང་དུ་སོང་བ་འདི་ལས་བདེན་པ་དང་རྒྱུ་མཚན་ལ་ཡིད་ཆེས་བརྙེད། ངས་འདི་ཙམ་ཞིག་བཤད་ནས་མཚམས་འཇོག་གི་ཡིན།
དྲྭ་རོགས་འཇིགས་བྲལ་བསྟན་འཛིན་ལགས་ཀྱིས། མཐའ་བསྡོམས་དོགས་སེལ་གྱི་རྩོམ་ཞིག་འབྲི་བར་བསྐུལ་ཡང་གཅིག་ནས་དུས་ཚོད་དཀོན་པ་དང་། གཉིས་ནས་བསམ་ཚུལ་གཞན་ལ་དག་པ་མི་སྟེར་བའི་མི་རྣམས་ལ་ཇི་ཙམ་སྨྲས་ཀྱང་གོ་བརྡ་འཕྲོད་པའི་སྐབས་ཕྲ་བ་རང་གི་མྱོང་བའི་ནང་མང་དུ་བྱུང་བས། ད་ཐེངས་འདི་ཙམ་གྱིས་ཆོག་ཤེས་པར་བྱས་སོ།
ཚང་མར་ཐུགས་རྗེ་ཆེ་ཞུའོ།།
ང་ཚོ་སྐབས་གཞན་དུ་མཇལ་སྲིད།
དངོས་གནས་ཁྱད་མཚར་རེད། འབྲུག་པ་མི་འབོར་ཉུང་བ་ས་ཁྱོན་ཆུང་བ། སྔར་བོད་པ་ཡིན་བཞིན་དུ་འཛམ་གླིང་མཉམ་འབྲེལ་རྒྱལ་ཚོགས་སུ་འབྲེལ་བ་གནང་སྟེ། ད་ལྟ་རང་བཙན་གཙང་མའི་ངོ་བོར་གནས་ཡོད། ང་ཚོ་བོད་པ་ག་རེ་བྱས་ཏེ་འདི་འདྲ་ཆགས་སོང་རེད།
ཐེངས་འདིར་ཕྱོགས་གང་ནས་བལྟས་ཀྱང་རིག་པའི་གཞུང་ལུགས་ཀྱི་སྟེང་ནས་ཁང་གསར་བ་རྒྱལ་འདུག ཡ་ད་རྒྱལ་རྔ་རྡུངས་ཤིག དྲག་ཏུ་རྡུངས་ཤིག ཀྱེ།
དག་བཅོས་ཀྱིས་བསྐྱར་འགོད།
དྲ་གྲོགས་ཀུན་དགའ་བདེ་ཆེན་ལགས།
༡ ཁང་གསར་རྡོ་རྗེ་ལགས་ཤེས་ཡོན་ལེགས་པོ་ཡོད་པ་ཁྱེད་རང་གིས་རྩོམ་ལ་བལྟས་ནས་མ་ཤེས་ཀྱང་མི་ལ་དྲིས་ནས་ཤེས་ཡོད་པས་ང་དགའ་ཡོད།
༢ རི་བོ་རྡོག་པས་མནན་ནས་རྟག་པར་རི་ལ་འགྲོ་རྒྱུར་དགའ་བ་ཁང་རྡོར་ལགས་ཀྱིས་ཟིན་བྲིས་ངོ་སྤྲོད་དུ་བྲིས་འདུག བོད་མི་ཚོ་རི་ལ་འཁྱམ་རྒྱུའི་ལུགས་སྲོལ་ཞེ་དྲག་མེད་པས་སྤྱོད་པ་ཁྱད་མཚར་མཐོང་བ་ཡིན་གྱི་རེད།
༣ དེང་སང་བོད་གཞུང་དང་༸རྒྱལ་བ་རིན་པོ་ཆེས་ཀྱང་རྒྱ་རིགས་དང་འགྲོགས་འདྲིས་བྱེད་དགོས་པའི་ལམ་སྟོན་རྒྱུན་མར་གནང་གི་ཡོད་པ་དང་། སྔ་ལོ་རྒྱ་མི་དང་མཉམ་དུ་༸རྒྱལ་བ་རིན་པོ་ཆེ་དང་། ཟམ་གདོང་རིན་པོ་ཆེ་སོགས་བོད་ཀྱི་དབུ་ཁྲིད་ཚོས་ཚོགས་འདུ་འཚོགས་པ་རེད། ནིའུ་ཡོག་ཏུ་བོད་རྒྱ་མཐུན་ཚོགས་བཙུགས་ཡོད་པ་རེད། མཐའ་མ་རྒྱ་མི་དང་སྐད་ཆ་བཤད་ནས་བོད་དོན་ཐག་གཅོད་དགོས་པས་ད་ལྟ་ནས་རྒྱ་མི་དང་འབྲེལ་བ་བྱས་ནས་བོད་རྒྱ་འབྲེལ་མོལ་བྱེད་ཀྱི་ཡོད་པ་རེད། གོང་རིམ་ནས་རྒྱ་མི་དང་འབྲེལ་བ་བྱས་ན་ཡག་པོ་དང་། འོག་ནས་རྒྱ་མི་དང་འབྲེལ་བ་བྱས་ན་སྡུག་ཅག་རེད་དམ། མ་གཞི་ནས་ཁང་གསར་རྡོ་རྗེས་རྒྱ་མི་དང་འབྲེལ་འདྲིས་ཀྱིས་བོད་དོན་ལ་རྩོད་པ་རྒྱག་གི་ཡོད་པ་སྤོབས་པ་བྱས་ནས་གསུང་གི་འདུག ཁྱོད་ཀྱིས་མཐོང་མེད་ན་རྩོམ་མཆན་བུ་དང་བཅས་པ་ཀློགས།
༤ ཁྱོད་རང་གིས་ལྷག་པར་ཆོས་ལ་དད་པ་མེད་པ་ཞིག་རེད་ཟེར་གྱི་འདུག་ཅེས་ཧང་སངས་མདོག་ཁ་པོ་བྱས་འདུག བཙན་བྱོལ་བོད་གཞུང་གི་བཅའ་ཁྲིམས་རིན་པོ་ཆེ་མཇལ་ཨེ་མྱོང་། དེའི་ནང་ལ་ཆོས་ལ་དད་པ་མེད་ན་བོད་པའི་ཐོབ་ཐང་མེད་ལབ་ཨེ་འདུག དེ་བཞིན་ཆོས་ལ་དད་པ་མེད་ན་བོད་དོན་ཤོད་ཡག་གི་ཐོབ་ཐང་མེད་པ་རེད་དམ། ཆོས་ལ་དད་པ་མེད་ན་བོད་དོན་ཤོད་ཡག་གི་ལས་འགན་མེད་པ་རེད་དམ། མ་གཞི་ནས་ཆོས་ཟེར་ན་ག་རེ་ལ་ངོས་འཛིན་གྱི་ཡོད། སོ་སོའི་ཁ་ནང་གི་ཚིག་དེ་ཆོས་པའི་ཚིག་རེད་ཨེ་འདུག གཞིས་ལུས་རྒྱ་ཆེའི་མི་མང་ཡོངས་རྫོགས་ཆོས་པ་ཨེ་རེད། བོད་མི་ཡོངས་རྫོགས་ཀྱིས་ཆོས་ཀྱི་ཆེད་ཁོ་ནར་བོད་དོན་རྩོད་ཀྱི་ཡོད་པ་ཨེ་རེད། ཕྱི་ལོ་ ༡༩༥༩ ལོར་བཙན་བྱོལ་དུ་སླེབས་དུས་བོད་མི་སུ་གང་གིས་ཆོས་ཤོར་སོང་། ང་ཚོ་བཙན་བྱོལ་ལ་ཡོང་བ་ཡིན་གསུངས་མི་འདུག སྐབས་དེར་བོད་མི་ཚོས་ག་རེ་གསུངས་ཡོད་པ་ཤེས་ཀྱི་ཨེ་ཡོད། བོད་ས་ཤོར་སོང་གསུངས་ཡོད་པ་ལས། ཆོས་ཤོར་སོང་གསུངས་མི་འདུག དེར་བརྟེན་རྩ་དོན་ས་ཤོར་པ་དེ་རེད། བོད་ས་ཤོར་པ་ཚུར་ལེན་ཐུབ་ས་ཨེ་རེད།
༥ གལ་སྲིད་ཁང་གསར་རྡོ་རྗེ་ལ་དོགས་པ་ཡོད་ན་ང་ཡང་ཁྱོད་ལ་དོགས་པ་ཆེན་པོ་ཡོད། གང་ཡིན་ཟེར་ན། བོད་དོན་ལ་ལྷག་བསམ་ཟོལ་མེད་ཀྱིས་གཏམ་དྲང་མོ་རེ་ཤོད་མཁན་སླེབས་དུས་སྤྱི་ཚོགས་ནང་ནག་པོ་བཟོ་ཐབས་བྱེད་པ་འདི་མི་གང་འདྲ་ཞིག་གིས་བྱེད་དགོས་པའི་ལས་ཀ་རེད། དེར་བརྟེན་ང་ཡང་ཁྱོད་ལ་དོགས་པ་ཆེན་པོ་ཡོད་པས་རྗེས་ཕྱོགས་ཁྱོད་ཀྱི་བྱ་སྤྱོད་ལ་མུ་མཐུད་བལྟ་ཞིབ་བྱེད་རྒྱུ་ཡིན། དྲ་གྲོགས་ཚོ། གཟབ་གཟབ་གནང་དགོས།