བོད་ཀྱི་དུས་བབ་སྤྱིའི་འདོན་ཐེངས་ ༤༧༩ སྟེང་གི་རྩོམ་སྒྲིག་པའི་གཏམ།
བར་སྐབས་ཤིག་ནས་བཙན་བྱོལ་བོད་མི་ཚོས་མཉམ་འབྲེལ་རྒྱལ་ཚོགས་བློས་བཏང་སོང་། བློས་གཏོང་དོན་ནི་རྒྱལ་ཚོགས་ལ་རེ་བ་མེད་པའི་རྐྱེན་གྱིས་ཡིན་ལུགས་བགྲང་། རྒྱལ་ཚོགས་ཀྱི་ལོ་འཁོར་ཚོགས་ཆེན་སྟེང་ལ་བོད་དོན་གྲོས་ཆོད་འཇོག་པ་དང་རྒྱ་ནག་ལ་རྒོལ་བའི་རིགས་ནི་ཕན་ཐོགས་མེད་པ་ཞིག་ཏུ་བརྩིས་ཤིང་། བོད་མིའི་ཕྱོགས་ནས་སྙན་ཐོ་འདོན་གི་མིན་པར་བཤད།
དེའི་རྗེས་ཤིག་ནས་བཙན་བྱོལ་བོད་མི་ཚོས་བོད་དོན་རྒྱབ་སྐྱོར་བ་རྣམས་ཀྱང་བློས་གཏོང་བྱེད་མགོ་བརྩམས། ཁོང་ཚོ་བློས་གཏོང་དོན་གཙོ་བོ་ཞིག་ནི་བོད་དོན་འཐབ་རྩོད་ཀྱི་ལངས་ཕྱོགས་དབང་གིས་ཡིན། འཐབ་རྩོད་ཀྱི་འབོད་ཚིག་སྒྲོག་སྟངས་ཚུན་ལ་སྟངས་འཛིན་བྱས། དེ་ལ་བརྟེན་ནས་བོད་དོན་རྒྱབ་སྐྱོར་བ་དང་བོད་མི་མང་པོ་ཞིག་ནི་བཙན་བྱོལ་བོད་གཞུང་གི་གནང་སྟངས་ལ་སྐད་ཤོར་མགོ་བཙུགས། ཁོང་ཚོས་བཙན་བྱོལ་བོད་མིའི་དཔོན་རིགས་ཚོ་པེ་ཅིན་གྱི་མགོ་སྐོར་འོག་ལ་ཚུད་སོང་བར་བཤད།
འདི་དག་ནི་ཉེ་རབས་ཀྱི་བྱུང་བ་སྟེ། འདས་པའི་ལོ་བཅུའི་རིང་གི་མིག་མཐོང་ལག་ཟིན་གྱི་གནས་ཚུལ་རིགས་ཡིན། སྐབས་དེ་ཙམ་ཞིག་ལ་རྒྱ་ནག་གིས་ངྷ་ས་དང་པེ་ཅིན་བར་གྱི་འཐབ་རྩོད་འདི་ནི་བསམ་བློའི་དྲིལ་བསྒྲགས་བར་ནས་གཏིང་ཐག་གཅོད་དགོས་པའི་འཐབ་རྩོད་ཅིག་ཡིན་པར་བསྒྲགས།
རིམ་བཞིན་རྒྱ་ནག་གི་རྒྱུ་ཤུགས་ནི་མངོན་གསལ་དོད་པོའི་སྒོ་ནས་ཇེ་ཆེར་གྱུར། རྒྱུ་ཤུགས་ཁྱེར་ནས་དབང་ཤུགས་ཀྱང་ཉོས། མཐའ་མ་དེར་ང་ཚོར་བློ་དོགས་ཆེན་པོ་ཞིག་སྐྱེས་བཞིན་ཡོད་ལ། དེ་ནི་རྒྱ་ནག་གི་དབང་ཤུགས་འོག་ནས་ཐ་ན་༧གོང་ས་མཆོག་གི་རྒྱལ་སྤྱིའི་མགྲོན་ལམ་མང་པོ་ཞིག་འགག་པར་འདོད་པ་དེ་ཡིན། བཀའ་ཁྲི་མཆོག་གིས་ཉིན་ཤས་གོང་གནས་ཚུལ་འདི་ཉེན་བརྡའི་ཚུལ་གྱིས་ཨེ་ཤ་ཡའི་བོད་དོན་རྒྱབ་སྐྱོར་པ་རྣམས་ལ་གསུངས་ཤིང་། བོད་དོན་རྒྱབ་སྐྱོར་བ་རྣམས་ནི་ང་ཚོའི་སྐྱབས་རེ་ས་བཞི་པ་དེ་ཡིན་སྐོར་གསལ་འདེབས་ཀྱང་བྱས།
རྒྱ་ནག་གིས་སྔ་མོ་ནས་ཐབས་ལམ་སྣ་མང་སྤྱད་ནས་༧གོང་ས་མཆོག་གི་ཕེབས་ལམ་ག་ས་གང་ནས་འགོག་གིན་ཡོད། ༧གོང་ས་མཆོག་གི་མཚན་སྙན་ཤིན་ཏུ་རྒྱས་པའི་ད་ལྟའི་སྐབས་འདིར་ཡང་མགྲོན་ལམ་མང་པོ་ཞིག་ཕྱེ་ཐུབ་མེད། དེའི་ནང་དུ་ཐ་ན་དུས་རབས་མང་པོར་བོད་དང་འབྲེལ་བ་ཡོད་མཁན་དང་། བོད་དང་ཆོས་རིག་གི་འབྲེལ་བ་ཡོད་མཁན་ཡང་ཡོད།
རྒྱ་ནག་གིས་འདི་དག་ནི་དྲིལ་བསྒྲགས་དང་རྒྱལ་སྤྱིའི་འབྲེལ་བའི་འཐབ་བྱུས་ལ་ཐུག་ཡོད་ཚུལ་བཤད་ནའང་། ང་ཚོར་ཐ་ན་དེའི་སྐོར་ལ་ད་དུང་ཡང་ཡིད་ཆེས་མེད་པ་ལྟར་དུ་གྱུར་ཅིང་། སྔོན་ཆད་ཡོད་བསྡད་པའི་བོད་དོན་རྒྱབ་སྐྱོར་བ་རྣམས་ལའང་ང་རང་ཚོའི་ངོས་ནས་ཕྱི་ཐག་ཐུང་ཞིང་། ཤེས་འཇོན་གྱིས་མ་ལྕོགས་པའི་རྣམ་འགྱུར་བསྟན་ཡོད། དེས་ན་ང་ཚོས་རྒྱ་ནག་མཉམ་དུ་ཞི་མོལ་ཡོང་མིན་གཅིག་པུར་བློ་རིག་སྒྲིམ་ནས་མི་འདུག་པར། བཙན་བྱོལ་བོད་མིའི་སྤྱི་ཚོགས་དང་རྒྱལ་སྤྱིའི་འབྲེལ་བ་གོང་མཐོར་གཏོང་ཐབས་དང་། བོད་དོན་རྒྱབ་སྐྱོར་བ་སྔར་ལས་ཇེ་མང་དུ་གཏོང་ཐབས་ལ་འབད་པར་རིགས་སོ།།
མཉམ་འབྲེལ་རྒྱལ་ཚོགས་ལ་རེ་སེམས། རྒྱབ་སྐྱོར་ཚོགས་པར་རེ་བཅོལ། བོད་དོན་དེ་ཕྱོགས་གང་ས་ནས་སྒྲུབ་དགོས་བགྱིད་འདུག ད་དུང་ཐབས་ཤེས་གསར་པ་ཡང་འཚོལ་དགོས།
རྩོམ་སྒྲིག་པའི་གཏམ་འདི་བཀླགས་པ་ཡིན།
རྩོམ་སྒྲིག་པའི་གཏམ་འདི་ཀློག་སྐབས་བཀའ་ཤག་གི་ཁོར་ཡུག་བསྐྲུན་པའི་སྲིད་བྱུས་ཟེར་བ་དེ་དྲན་ཡོང་གི་འདུག
༡ དེ་ཡང་སྲིད་བྱུས་འདིའི་འོག་ནས་རྒྱལ་སྤྱིར་བོད་དོན་གླེང་སློང་བྱེད་ཤུགས་ཆུང་དུ་བཏང་བ་དང་གཅིག
༢ མི་རིགས་ས་གནས་རང་སྐྱོང་གི་ཐོག་བསྐྱོད་དེ་བོད་དོན་ཟེར་བ་དེ་རིག་གཞུང་དང་། བོད་རིགས་ཅེས་པའི་མི་རིགས་བྱེ་བྲག་པ་གཉིས་ཀྱི་གནད་དོན་དུ་བསྒྱུར་ཏེ་རྒྱ་བོད་ཀྱི་འཐབ་རྩོད་ཟེར་བ་འཛུབ་མོ་འཛུགས་ཡུལ་མེད་པ་བཟོས་པ་དང་གཉིས།
༣ དེ་འདྲའི་རེ་འདུན་ལ་བདག་སྤྲོད་བྱུང་ན་༸གོང་ས་མཆོག་གི་མཐུན་འགྱུར་བེད་སྤྱོད་བྱས་ཏེ་བོད་མི་མང་གིས་ཁས་ལེན་དགོས་པ་བྱེད་རྒྱུ་བྱས་པ་དང་གསུམ།
༤ རྒྱལ་སྤྱི་དང་། བཙན་བྱོལ་ནང་གི་རང་བཙན་འཐབ་རྩོད་པ་རྣམས་ལ་དབུ་མའི་ལམ་ཁས་མི་ལེན་མཁན་ཟེར་བ་དང་། ༸གོང་ས་མཆོག་གི་བཀའ་མི་སྒྲུབ་མཁན་ཟེར་བའི་བརྗོད་བབ་འོག་མནན་ཏེ་ནུས་མེད་བཟོས་པ་དང་བཞི།
༥ བོད་ཀྱི་བདག་དབང་རྒྱ་ནག་ལ་ཡོད་པ་དང་། ད་ལྟའི་རྒྱ་ནག་གི་ཁྲིམས་ལུགས་ལ་ཁས་ལེན་བྱེད་ཀྱི་ཡོད་པའི་འོག་ནས་བོད་ཀྱི་ཆབ་སྲིད་བཙོན་པ་རྣམས་ལ་རྒྱལ་སྤྱིའི་ཆབ་སྲིད་ཀྱི་འགྲོ་ལུགས་བཞིན་༼རྣམ་དཔྱོད་ལྡན་པའི་བཙོན་པའི༽གནས་བབ་ནས་༼ཁྲིམས་འགལ་བར་༽གྱུར་ཏེ་བདག་སྤྲོད་བྱེད་ཡུལ་མེད་པ་ཆགས་པ་སྟེ་ཕྱོགས་གཉིས་ཀྱི་རྩོད་གཞིའི་ངོས་ནས་ཁས་ལེན་མི་བྱེད་ཀ་མེད་ཀྱི་གནས་བབ་ཏུ་བཏང་བ་དང་ལྡ།
འདི་ཚོ་དྲན་ཡོང་དུས་བོད་ཀྱི་མ་འོངས་མི་རབས་ལ་ཚོད་དཔག་གི་ལམ་ནས་མཐོང་ཆུང་བྱས་པ་དེ་ཐལ་དྲག་འདུག་སེམས།
བོད་མི་རིགས་འདི་རྒྱ་ནག་དམར་པོའི་རྩ་ཁྲིམས་འོག་ཏུ་མཉམ་གནས་བྱ་རྒྱུ་ཡིན་ཞེས་པའི་ལམ་ལུགས་འདི་བཙན་བྱོལ་བོད་གཞུང་གིས་ལག་ལེན་སྟར་བ་ནས་བཟུང་བོད་དོན་རྒྱབ་སྐྱོར་བ་དང་བོད་མི་རྒྱལ་ཞེན་པ་དག་ལ་རྩོད་གཞི་མེད་པར་གྱུར་བ་རེད།
རྒྱ་ནག་གི་ཤུགས་རྐྱེན་དང་དྲན་ཐོ་ཡི་བརྗོད་བྱ་དང་མཐུན་པའི་བོད་དོན་སྒྲུབ་སྐབས་སུ་བོད་ཀྱི་རྒྱལ་དར་འདི་འཛམ་གླིང་ཐོག་ཏུ་བེད་མེད་གྱུར་ཡོད། དེར་བརྟེན་ཧྥེ་རན་སི་ཡི་གྲོས་ཚོགས་འཐུས་མི་ཁ་ཅིག་གིས་ད་ལོར་ནས་བཟུང་ཧྥེ་རན་སིའི་ནང་དུ་བོད་ཀྱི་རྒྱལ་དར་མི་འཛུགས་པའི་འབད་བསྐུལ་ཞུས་ཡོད་པར་རེད།
འདན་མག་སྲིད་གཞུང་གིས་བོད་་འདི་རྒྱ་ནག་གི་ཆ་ཤས་ཡིན་པའི་ཡིག་ཆ་ཁྱབ་བསྒྲགས་བྱས་པ་དང་བལ་ཡུལ་གཞུང་གིས་བོད་འདི་ལོ་རྒྱུས་ཐོག་ནས་རྒྱ་ནག་གི་མངའ་ཁུངས་ཡིན་པ་གཞུང་གི་སློབ་དེབ་ནང་དུ་བཀོད་བཞིན་ཡོད་རབ་འདུག
ཁ་ཞེ་གཉིས་མེད་ཀྱི་རྒྱ་ནག་གཞུང་གི་རྩ་ཁྲིམས་འོག་ཏུ་མི་ཚེ་སྐྱེལ་འདོད་ཡོད་པའི་བོད་མི་སུ་ཡང་མེད་བཞིན་དུ་ཨུ་ཚུགས་ཀྱི་རྒྱ་ནག་གཞུང་གི་རྩ་ཁྲིམས་འོག་ཏུ་མཉམ་གནས་བྱེད་རྒྱུ་ཡིན་ཞེས་པ་འདི་ནི་བོད་མིའི་མངོན་འདོད་དང་མཐུན་གྱི་མེད།
རྒྱ་ནག་གི་རྩ་ཁྲིམས་ནི་ང་ཚོའི་དགྲ་མ་ཡིན།
རྒྱ་མི་རིགས་ནི་དགྲ་མ་ཡིན།
འོ་ན་ང་ཚོའི་དགྲ་བོ་གང་རེད་དམ། ང་ཚོའི་རྩོད་གཞི་གང་རེད་དམ།