གཅེས་འོས་པའི་བུ་ཕྲུག་དང་བཀུར་འོས་པའི་ཡབ་ཆེན། ཆབ་བྲག་ལྷ་མོ་སྐྱབས།

ཕྲན་གྱི་གླེང་སློང་སྔོན་མ་དང་འབྲེལ་བའི་དྲ་གྲོགས་ཚོའི་བསམ་ཚུལ་སྤྱི་ཡོངས་ལ་ཕུལ་བ།

    ང་ཆུང་དུས། སློབ་དེབ་སོགས་སུ་མའོ་ཀྲུ་ཞི་དང་གུང་ཁྲན་ཏང་གི་བུ་ཕྲུག གསར་བརྗེའི་བུ་སྤུན་དམག་མི་ཟེར་བ་སོགས་མཐོང་མྱོང་ལ། རྗེས་སུ་དཔེ་ཆའི་ནང་ནས་ཀྱང་ཕ་དམ་པ་སངས་རྒྱས་དང། མ་ཅིག་ལབ་སྒྲོན། རྒྱལ་བ་ཡབ་སྲས་ཟེར་བ་དག་ཀྱང་མཇལ་མྱོང། དེ་དག་གི་ནང་དོན་ནི་ཤ་ཁྲག་རུས་པའི་འབྲེལ་བ་ཅན་གྱི་ཕ་དང་བུའི་གོ་དོན་མིན་པར་དྲིན་གཟོ་དང་མཛའ་བརྩེའི་འདུ་ཤེས་ཟབ་མོ་ཞིག་གི་ཆེ་བརྗོད་ཡིན་པའང་རིམ་བཞིན་གསལ་རྟོགས་བྱུང། ཡིན་ཡང་སྨྱུག་འཛིན་པ་གང་གིས་ད་དུང་ཡང་ཐ་སྙད་འདིར་གོ་བ་མ་ལོན་པ་སྙིང་རྗེ། དྲིན་ཆེན་ལ་དྲིན་གཟོ་བའི་འདུ་ཤེས་ནང་ཕ་དང་མ་རུ་བཀུར་བ་ནི་ཆེས་བླ་ན་མེད་པའི་བསམ་བློ་ཞིག་མ་ཡིན་ནམ།

    འདི་ལྟར་ཁོང་ཉིད་ཀྱི་དྲིན་གཟོའི་འདུ་ཤེས་ཀྱི་ཐད་ནས་བཤད་ན། ཁོང་ནི་རྒྱ་གར་བའི་བུ་ཕྲུག་ཞིག་ཡིན་པར་མ་ཟད་འཛམ་གླིང་གི་བུ་ཕྲུག་ཅིག་ཏུའང་འགྱུར་གྱིན་ཡོད། འོན་ཀྱང་ང་ཚོའི་བརྩི་མཐོང་གི་ངོས་ནས་བལྟས་ན། ཁོང་ནི་འཛམ་གླིང་གི་ཡབ་ཆེན་ཞིག་ཏུའང་སྣང་བར་འགྱུར། འཛམ་གླིང་ན་ཞི་བདེའི་དེད་དཔོན་ཉུང་ཤས་ལས་མེད། དེ་བས་ཀྱང་བྱང་ཆུབ་སེམས་དཔའ་དཀོན། བོད་ཀྱི་བུ་ཕྲུག་ལྷ་མོ་དོན་གྲུབ་ཁོང་རྒྱ་ནག་གིས་བུ་ཕྲུག་ཅིག་ཏུ་གསོ་སྐྱོང་བྱ་འདུན་ཆེ་ཡང་མ་ཐུབ་པ་རེད། དེ་ལས་ལྡོག་ནས་རྒྱ་གར་དང་འཛམ་གླིང་གི་བུ་ཕྲུག་ཏུ་གྱུར་བར་མ་ཟད། ཕྱིར་འཁོར་ནས་རྒྱ་དཀར་ནག་དང་བཅས་པའི་འཛམ་གླིང་གི་ཡབ་ཆེན་དུ་འགྱུར་གྱིན་འདུག འདི་ནི་ཅི་འདྲའི་བསམ་ཡུལ་ལས་འདས་པ་ཞིག་རེད་ཨང། ཁོང་འདི་ལྟར་ཆེས་བྱམས་ཤིང་ཆེས་བཀུར་འོས་པ། ཆེས་ནུས་པ་ཅན་གྱི་དྲང་ཞིང་སྦོམ་པའི་མིའི་རིགས་ཀྱི་སྲོག་ཤིང་ཞིག་ཏུ་འགྱུར་གྱིན་འདུག

    འོན་ཀྱང་རྒྱ་ནག་གུང་ཁྲན་ཏང་གི་དར་དམར་གྱིས་མིག་ཟུང་བཀབ་པ་ཚོའི་མིག་ལམ་དུ་དཀར་ནག་གོ་ལྡོག་གི་སྣང་ཚུལ་འབྱུང་བར་ཡ་མཚན་ཅི་ཡང་མེད། གལ་ཏེ་ཏཱ་ལའི་བླ་མས་ཁ་ཞེ་གཉིས་མེད་ཀྱིས་འཚེ་མེད་ཞི་བའི་ཕྱག་ལས་ཤིག་གནང་མེད་ན་འཛམ་གླིང་ཞི་བདེའི་དེད་དཔོན་གྱི་མཚན་སྙན་བཞེས་པ་ཙམ་མ་ཡིན་པར་མུ་མཐུད་དེ་དད་ཅིང་བཀུར་བའི་ཆེ་མཐོང་གི་རྒྱལ་མཚན་འདི་མཐོ་ནས་མཐོ་རུ་ཇི་ལྟར་སྐྱོད་ཐུབ། འོན་ཀྱང་ཁོང་གི་གསོས་ཕྲུག་དག་གི་ནང་ན་ཁོང་ལ་དད་བཀུར་བྱེད་ཚུལ་མི་ཤེས་པ་དང་ཁོང་ཉིད་ཟླ་བ་མར་ངོ་ལྟར་ཕྲ་བར་འགྱུར་བཞིན་པའི་བྱིས་པའི་མཐོང་སྣང་ཞིག་དངོས་ཤུགས་རྒྱུད་གསུམ་ནས་འོང་བཞིན་པ་འདི་དག་རིམ་བཞིན་ཇེ་ཆེར་མཆེད་ན་དེ་ནི་བོད་དོན་ཐད་ནས་ཆེས་ཉེན་ཁ་ཞིག་རེད།

    ཁོང་ཉིད་རང་གི་ཚེ་འདི་ཕྱིའི་སྐྱབས་མགོན་ཉག་གཅིག་ཏུ་ཡིད་ཆེས་མཁན་ཚོས། ཅི་ཡང་མི་ཤེས་ཅི་ཡང་མི་འཇོན་རུང་ཁོང་གི་ཞབས་རྗེས་ལ་སྙེགས་པ་ཙམ་གྱིས་ཀྱང་ཁ་ཕྱོགས་ནོར་མེད་ལ། གནོད་པ་བསྐྱལ་མེད།

    ཡང། ནང་རིག་སྨྲ་བ་ཚོའི་རྩོད་པ་བྱེད་ཚུལ་ལ། ལུང་རིགས་དཔེ་གསུམ་ཚང་བའི་ལམ་ནས་རྩོད་པ་བྱེད་པ་དེ་གཏིང་ཟབ་ཤོས། ཁ་གསལ་ཤོས། ཡང་དག་ཤོས་ཆགས་ཀྱིན་ཡོད་པ་བཞིན། བོད་ཀྱི་རང་བཙན་དང་དབུ་མའི་ལམ་གྱི་ལྟ་བ་གླེང་ནའང་རྩོད་ཚུལ་དེ་ཆེས་ཡག་ཤོས་རེད། ཏཱ་ལའི་བླ་མ་ཆུང་དུས་དོལ་རྒྱལ་བསྟེན་དགོས་བྱུང་བ་ནས་རིམ་བཞིན་མཚམས་འཇོག་གནང་དགོས་པ་དང། དེ་ཡང་རང་ངོས་ནས་མཚམས་བཞག་པ་ཙམ་གྱིས་མི་ཆོག་པར་སྤྱི་ཡོངས་ནས་མཚམས་འཇོག་དགོས་ཚུལ་གྱི་ལམ་སྟོན་རིམ་པར་གནངས། དེ་བཞིན་ཐོག་མར་སྐྱབས་བཅོལ་ལ་ཕེབས་དུས་བོད་རང་བཙན་དང་དེ་ནས་རིམ་པས་འགྱུར་བ་ཇི་ལྟར་བཏང་ཚུལ། ད་ལྟ་ཡོངས་ཁྱབ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཞིབ་ཚགས་བཅས་ཡོད་པས། བཙན་བྱོལ་བོད་པ་ཚོའི་ནང་ན་མ་གོ་མ་མཐོང་མི་ཤེས་པའི་ཚུལ་ཞིག་མེད་ན་ཆོག་མོད། ད་དུང་ཡོད་པ་འདྲ། གལ་ཏེ་ཡོད་ན་དེ་དག་ལ་སློབ་སྦྱོང་བྱས་ན་བཟང། དེ་ནས་སྤྱི་ཡོངས་ནས་མི་འགྲིགས་པའམ་བྱེ་བྲག་གི་ནོར་སྐྱོན་ཅི་ཡོད་སོགས་གླེང་སློང་བྱེད་འོས། གལ་ཏེ་ཁས་ལེན་མི་ཐུབ་པའམ་རྦད་དེ་ནོར་འཁྲུལ་ཞིག་ཏུ་མཐོང་ན། ཐད་ཀར་ཏཱ་ལའི་བླ་མ་ལའང་དོགས་སློང་དང་སྙན་ཞུ་འབུལ་རྒྱུ་དེ་དམངས་གཙོའི་ཐོབ་ཐང་དང་འོས་འགན་ཡིན་པ་ལས། རང་ཕྱོགས་ལ་ལམ་སྟོན་པ་ཆེན་པོ་དང་མཁས་པའི་ལུང་འདྲེན་བྱ་རྒྱུ་མེད་པས་ཕར་ཕྱོགས་ལ་ཏཱ་ལའི་བླ་མ་རྒྱབ་ལ་ཁུར་ནས་སྐད་ཆ་མ་ཤོད་ཟེར་བ་དེ་ལ་སྙིང་བོ་ཅི་ཡོད།
   
ང་ཏཱ་ལའི་བླ་མའི་རིང་ལུགས་འཛིན་མཁན་ཞིག་ཡིན་པས་ཆ་ནས་ངས་ནམ་ཡང་ཁོང་གི་གསུང་ལུང་འདྲེན་བྱ་ངེས་ཡིན། དེ་ངའི་ཐོབ་ཐང་དང་ངའི་འོས་འགན་ཞིག་ཀྱང་རེད། ལ་ལས་འདི་དད་པའི་རྗེས་འབྲང་བ་ཙམ་དུ་མཐོང་ན་ཡང། ང་རང་ངོས་ནས་རིགས་པ་དང་དད་པ་གཉི་གའི་རྗེས་འབྲང་བ་ཞིག་ཡིན་བསམས་ཡོད།

    བོད་རྒྱ་འབྲེལ་མོལ་མང་པོ་བྱས་སོང་ཕན་ཐོགས་གང་ཡང་མ་བྱུང་ཟེར་ན། ༡༩༥༩ ལོ་ནས་ ༡༩༧༩ བར་ལོ་ཉི་ཤུ་ལ་རང་བཙན་བརྩད་དེ་ཕན་ཐོགས་ཅི་བྱུང་སོང། དེའི་སྔོན་ལ་རྒྱ་ཁོངས་ལ་ལོ་དགུར་བསྡད་དུས་ཀྱང་གནོད་ལས་ཕན་ཐོགས་བྱུང་མེད་པས། ད་འོ་ན་ལམ་གང་ལ་འགྲོ་དགོས་པ་རེད། རྒྱ་གཞུང་གིས་ངོས་ལེན་བྱེད་འདོད་མེད་པས་ང་ཚོའི་མུ་མཐུད་རེ་བ་བྱེད་པ་དོན་མེད་དང་ནོར་འཁྲུལ་ཡིན་ན། ཚང་མ་ཡིན་ཁྱབ་མཉམ་རེད། ཕྱིར་འཁོར་ནས་རང་བཙན་རྩོད་དགོས་དོན་ཅི།

    མཇུག་བསྡུའི་རེ་བ་ནི། གང་ཟག་སྒེར་ངོས་ནས་ཏཱ་ལའི་བླ་མར་མཐོང་སྣང་འདྲ་མིན་དང་དད་མོས་བྱེད་མིན་དེ་རང་དབང་རེད། འོན་ཀྱང་ད་ལྟའི་བོད་སྤྱི་དོན་གྱི་འགན་འཁུར་རོགས་བྱེད་མཁན་ཞིག་ཡིན་ན་ཁོང་ལ་གཡས་སྐྱོར་གཡོན་འདེགས་རེ་བྱེད་མ་ཐུབ་ན་ཡང་། རྒྱབ་འཐེན་མདུན་འགོག་རེ་མ་བྱེད་རོགས། དེ་ལས་རང་གི་མི་ཚེ་ཡག་པོ་ཞིག་སྐྱེལ་བསྡད་ན་དེ་བཟང་ཞེས་སེམས་གཏིང་ནས་ཞུ་བ་འཐེན་གྱིན་ཡོད།

གངས་ཅན་བོད་ཀྱི་བསམ་དོན་མ་ལུས་པ། གངས་ཅན་མགོན་པོར་བཅོལ་བའི་ཚུལ་བསམས་ནས།
ལྷ་མོ་སྐྱབས་ཀྱི་ལུས་ངག་ཡིད་གསུམ་ཡང། ལྷ་མོ་དོན་གྲུབ་དོན་བྱ་འགྲུབ་སླད་འབུལ།།