གཞོང་པ་སྟོང་པའི་སྟོང་འཛིང་། ཁང་གསར་རྡོ་རྗེ།

དྲྭ་རོགས་གནམ་ལྕགས་ཀྱི་ལེགས་སོ་ལ་ཅི་ཡང་མི་ཞུ། ཉིན་གཅིག་ངས་དབུ་ཁྱུད་དེ་ཡང་མི་དགོས་རབས་ཤིག་འབྲི་སྲིད་པས་དགའ་བསུ་ཞུ་བར་མ་སྔ།

དྲྭ་རོགས་རང་བཙན་གཙང་མ་ལགས། ཁྱེད་ཀྱིས་སེམས་པ་བཟང་པོས་སྙིང་གཏམ་གསུངས་པར་ཐུགས་རྗེ་ཆེ།

ང་རང་ཚོ་ག་ཚོད་གནས་ཚད་ཞན་ཟེར་ཡང་དམངས་གཙོའི་སྤྱི་ཚོགས་ཤིག་གི་ནང་སླེབས་ཟིན་པ་རེད། འགའ་རེས་ང་༸རྒྱལ་བ་རིན་པོ་ཆེའི་དགྲ་རེད་ཟེར་ན་དགྲ་རུ་གྱུར་འགྲོ་བ་དང་། འགའ་རེས་ཁོང་གི་གཉེན་རེད་ཟེར་ན་གཉེན་དུ་འགྱུར་འགྲོ་བ་དེ་འདྲ་མ་རེད། ང་ནི་ང་རང་སྟེ། ཁང་གསར་རྡོ་རྗེ་ཡིན། མཐོ་ནའང་དེ་རེད་དམའ་ནའང་དེ་རེད། ཉེས་རྡུང་བཏང་ནའང་དེ་རེད། བསྟོད་བསྔགས་བྱས་ནའང་དེ་རེད། ངས་བཤད་པ་རྣམས་ལ་ངས་འགན་འཁྱེར་གྱི་རེད། ངས་བཤད་པ་རྣམས་ངའི་སྐད་ཆ་རེད། དེ་བླ་མའི་ཐུགས་ལ་ཕོག་མིན་དང་བླ་མའི་གཟིམ་ཁྱིའི་སྣ་ལ་ཕོག་མིན་ལ་ངས་བསམ་བློ་གཏོང་གི་མེད། ཀློག་པ་པོ་ཚོས་ཀྱང་ངའི་སྐད་ཆ་རྣམས་བླ་ཆེན་མི་ཆེན་གྱི་གསུང་དང་མཐུན་མིན་དང་། བླ་ཆེན་མི་ཆེན་ལ་ཕོག་ཐུག་འགྲོ་མིན་ལ་གཞིགས་ཏེ་ཚད་འཇལ་མ་གནང་རོགས། ངས་བཤད་པའི་རྒྱུ་མཚན་དེ་ཚོ་འཐད་ལྡན་རེད་མ་རེད། དེ་ཚོར་དགོངས་པ་བཞེས་ནས་གདེང་འཇོག་གནང་རོགས་ཞུ།

སྔོན་ནས་བསམ་བློ་ནན་ཏན་བཏང་སྟེ་མགོ་བོ་འདི་བར་བསྲིངས་ཚར་དུས། ཕྱིར་འཐེན་བྱ་སེམས་མེད། དུས་ཚོད་དཀོན་པའི་དཀའ་ངལ་ཆེ་བ་མ་གཏོགས་འདི་འདྲ་བ་མུ་མཐུད་འབྲི་ངེས་ཡིན།

དྲྭ་རོགས་ཁང་གསར་ལགས། ཟླ་བ་ཁ་ཤས་རིང་དུས་བབ་དྲྭ་ཚིགས་མྱུལ་རྗེས། སྤྱི་ཚོགས་དང་ཆབ་སྲིད། རིག་གནས་གང་ཐད་ནས་བློ་སྐྱེད་སེམས་འགུལ་དགོས་པ་སྦྱིན་མཁན་ཉིད་ལྷག་མེད་པ་མཐོང་སོང་།

འདས་པའི་ཟླ་ཤས་ནང་ཉིད་ཀྱིས་འཛེམས་ཟོན་སྤངས་ཏེ་སྤེལ་བའི་ཟིན་བྲིས་དེ་ཚོ་ནི། བཙན་བྱོལ་ནང་གི་བསམ་གཞིགས་ཀྱི་གནས་ཚད་དང་ཡར་སྤེལ་གྱི་ཆུ་ཚད་མཚོན་པའི་རྡོ་རིང་ལྟ་བུ་ཞིག་ཏུ་མཐོང་། གལ་ཏེ་ལོ་ ༥༠ རྗེས་སུ་བཙན་བྱོལ་གྱི་མང་གཙོའི་འཕེལ་རིམ་ལ་དཔྱད་པ་གཏོང་མཁན་ཡོད་ཚེ། ཁྱེད་ཀྱིས་བྲིས་པ་འདི་ཚོ་ནི་ཚད་མཐོ་ཤོས་ཀྱི་དཔྱད་གཞི་རེད།

སྔ་ལོའི་གྲོས་ཚོགས་དང་ད་ལོའི་ཉན་ཞིབ་གཉིས་ཀ་ང་ཚོ་བོད་མི་ཚང་མས་མིག་གིས་མཐོང་གིན་ཡོད་ཀྱང་། སུས་ཀྱང་དེ་ལ་ཚད་དང་ལྡན་པའི་དཔྱད་བརྗོད་སྤེལ་མ་ཐུབ་པའམ་མ་སྤེལ་བའི་སྐབས་སུ། ཁྱེད་ཀྱིས་གཟུ་བོར་གནས་ལ་མིང་རྒྱང་རིང་བ། གནད་འགག་རྟོགས་པའི་སྒོ་ནས་དཔྱད་བརྗོད་རུས་པའི་གཏིང་ལ་ཟུག་པ་འདྲ་བ་སྤེལ་སོང་། འདི་ཚོ་ནི་དོན་ངོ་མའི་མཁས་པ་ཡིན་པའི་རྟགས་རེད།

ཉེ་དུས་ནས་དྷ་རམ་ས་ལ་དང་གྲྭ་སའི་སྤྱི་ཚོགས་ནང་། ཁྱེད་རང་ལ་ཚིག་མཚོན་འདེབས་མཁན་ཇེ་མང་དུ་འགྲོ་བཞིན་འདུག ད་ལྟ་བོད་མི་མང་སྤྱི་འཐུས་ཤིག་དང་དབུ་མའི་ལམ་གྱི་ལས་འགུལ་ཁང་གི་སྣེ་ཁྲིད་གཅིག་གིས་མདུན་ལ་ཐོན་ཏེ་ཁྱེད་ལ་དགག་པ་རྒྱག་འགོ་བཙུགས་པར་མ་ཟད། གྲྭ་སའི་གྲྭ་པ་ཧོལ་རྒྱུག་ཅན་ཞིག་གིས་ཀྱང་དངོས་སུ་མདུན་ལ་ཐོན་ཏེ། ཁྱེད་རང་༸རྒྱལ་བ་རིན་པོ་ཆེའི་དགྲ་ཡིན་ཚུལ་བཤད་ཀྱིན་འདུག ད་དུང་ངས་གོ་ཐོས་ལ་བླ་ཆེན་མི་ཆེན་ཁ་ཤས་ཀྱིས་ཀྱང་གྲོས་བྱས་ཏེ་བྱང་ཨ་རིའི་དོན་གཅོད་དང་དེ་ཁུལ་གྱི་བོད་རིགས་སྤྱི་མཐུན་ཚོགས་པ་བརྒྱུད་ཁྱེད་རང་རྩད་གཅོད་བྱེད་བཞིན་ཡོད་པ་འདྲ།

ངས་སྐུ་ཉིད་ཀྱི་མཁྱེན་ཡོན་ཆེ་ལ་རྣམ་དཔྱོད་མཐོན་པོ་ཡོད་པ་ཚོད་དཔག་ཐུབ་ཀྱི་འདུག དེར་བརྟེན་མ་འོངས་པར་བོད་མི་དམངས་ལ་ཁྱེད་འདྲ་བ་མཁོ་བ་རེད། ད་ལྟ་ནས་ནག་པོ་ཆགས་ན་ཆགས་རིན་རྩ་བ་ནས་མེད། དེར་བརྟེན་གནས་སྐབས་༸རྒྱལ་བ་རིན་པོ་ཆེ་དང་འབྲེལ་བའི་རྩོམ་ཡིག་མ་སྤེལ་རོགས། ང་ཚོ་གཞོན་སྐྱེས་མང་པོས་ཁྱེད་ལ་དགའ་ཡང་། མི་ཆེན་དེ་ཚོས་ནག་པོ་བཟོ་དུས་ང་ཚོས་གང་ཡང་བྱེད་ཐུབ་ཀྱི་མ་རེད། ཁོང་ཚོས་བཤད་ཐེངས་གཅིག་རེད། དེར་བརྟེན་གནས་སྐབས་ཚོད་འཛིན་གནང་རོགས།

འདི་ནི་སེམས་གཏིང་གི་སྐད་ཆ་ཡིན།

ཁང་སར་ལགས། ང་ལ་ཁྱོད་རང་ནག་པོ་བཟོ་བསམ་པའི་དམིགས་ཡུལ་གང་ཡང་མེད། འོན་ཀྱང་རང་གིས་བཤད་སྟངས་དེ་ལ་མ་འགྲིག་པ་མཐོང་བྱུང་།
ལར་ནི་རང་གིས་ཆབ་སྲིད་ཅེས་པ་དེ་ཐབས་ཇུས་རེད་ལབ་འདུག་། ཡིན་ཡང་ཁྱོད་རང་གིས་ཐབས་ཇུས་དང་འབྲེལ་བ་མེད་པའི་བསམ་ཚུལ་མང་པོ་ཞིག་གསུངས་དགོས་པ་ག་རེ་ཡིན་ན་།

གསར་བརྗེ་སྐྱབས་ལགས་ཁྱེད་རང་བླ་མ་ལྔ་བཅུ་བ་ཞེས་པའི་མིང་ཐོག་ཚུལ་ལ་མགོ་རྨོངས་ཀྱིན་འདུག་སྙམ། གང་ལྟར་ཁང་གསར་རྒད་པོས་ཀླད་པ་གསར་བ་འཁྲབ་ཀྱིན་འདུག

ལྷུན་གྲུབ་རང་གིས་ང་ནག་པོ་བཟོ་འདོད་ན་བཟོས་ཤིག ངས་ནི་སྐད་ཆ་དྲང་པོ་བཤད་པ་ཡིན། ངའི་སྐད་ཆ་དང་ཕྱོགས་མཐུན་ཞིག་བོད་གཞུང་དང་སྐུ་ཚབ་རྣམ་པས་ཀྱང་གསུང་གི་འདུག བོད་མིའི་སྤྱི་ཚོགས་ནས་དགག་བྱ་ཤུགས་ཆེ་ཡོད་པར་མ་ལྟོས་པར། རྒྱ་བོད་གཉིས་སྨན་ཞིག་ཡོང་ཆེད། བབས་ས་མེད་ན་མ་གཏོགས་བབས་པ་ཡིན་ཟེར་བ་དེ་ཚོའི་གོ་དོན་ག་རེ་རེད།

ཉེ་དུས་ཉན་ཞིབ་སྐབས། རྒྱ་རི་རིན་པོ་ཆེས། བོད་མི་ཚང་མས་སེམས་ནང་བསམ་རྒྱུ་རང་བཙན་ཡིན་སྐོར་ཞིག་གསུངས་མ་སོང་ངམ།

བླ་སློབ་དམ་ཚིག་གཙང་མ།

འདི་རྩ་བའི་ཆ་ནས་ཆོས་ཕྱོགས་ཀྱི་མིང་ཚིག་རྣལ་མ་ཞིག་རེད། ཆོས་ཕྱོགས་ནས་བླ་མ་ལ་ལུས་ངག་ཡིད་གསུམ་གྱི་དད་གུས་དང་དམ་ཚིག་འཛིན་སྟངས་ལ་བཅོས་ཁྲིམས་སྟོང་ཕྲག་བརྒལ་བ་ཞིག་འདུག སྔོན་མ་༼ བླ་མ་ལྔ་བཅུ་བ། ༽ཞེས་པ་ཞིག་ལ་སློབ་ཁྲིད་ལ་འགྲོ་མྱོང་ཡོད། བསྟན་བཅོས་དེའི་ནང་བླ་མ་ལ་སློབ་མས་ལུས་ངག་ཡིད་གསུམ་གྱིས་གུས་བརྩི་བྱེད་སྟངས་ཐད་ཚིགས་བཅད་ལྔ་བཅུ་འདུག དེ་དང་རྒྱ་ནག་གི་ཕོ་བྲང་རིགས་གནས་ནང་རྒྱལ་བློན་འབངས་གསུམ་གྱི་བར་དམ་ཚིག་སྲུང་སྟངས་དང་། འབངས་བློན་གྱིས་རྒྱལ་བོར་གུས་བརྩི་བྱེད་སྟངས་གཉིས་ལ་ཆ་འདྲ་ས་མང་པོ་འདུག ཆོས་ཕྱོགས་ནས་སློབ་མས་བླ་མར་གུས་བརྩི་དང་དམ་ཚིག་གཙང་མ་སྲུང་དགོས་པ་མདོ་བསྔགས་རིག་གནས་ནང་བཅས་པ་མཛད་ཡོད་པ་རེད། བཅོས་པ་དང་འགལ་ནས་བླ་སློབ་དམ་ཚིག་མ་གཙང་ན་ཆོས་པ་རྣལ་མ་ཞིག་ཡོང་ཐབས་མེད་པ་རེད། འདིའི་ནང་ད་ལྟ་ནང་བཞིན་རང་དབང་། དམངས་གཙོ། འདྲ་མཉམ་ཟེར་ས་མེད་པ་རེད། འདི་ཆོས་པ་ལ་མཚོན་ན་མེད་དུ་མི་རུང་བའི་ཐུན་མིན་ཁྱད་ཆོས་ཤིག་རེད།

དབུ་ཁྲིད་དང་མི་དམངས་ཟེར་བ་འདི་གཙོ་བོ་སྲིད་ཕྱོགས་ནས་ཡོང་གི་ཡོད་པ་རེད། ལྷག་པར་དུ་དེང་གི་རང་དབང་། དམངས་གཙོ། འདྲ་མཉམ་རྩ་བར་བཟུང་བའི་སྲིད་ལུགས་འགྲོ་སྟངས་ནང་དབུ་ཁྲིད་དང་མི་མང་བར་ལྟ་བ་མི་མཐུན་པ་དང་། ལངས་ཕྱོགས་མི་མཐུན་པ། འཐབ་རྩོད་མི་མཐུན་སོགས་ཡོང་དགོས་ངེས་ཤིག་ཆགས་ཡོད་པ་རེད། འདི་ཆོས་ཕྱོགས་ནས་བླ་སློབ་དམ་ཚིག་མ་གཙང་ན་ཆོས་པ་རྣལ་མ་ཞིག་མི་ཡོང་བ་ནང་བཞིན། སྲིད་ཕྱོགས་ནས་དབུ་ཁྲིད་དང་མི་དམངས་བར་ལྟ་བ་དང་ལངས་ཕྱོགས། འཐབ་རྩོད་སོགས་མི་མཐུན་པ་མ་ཡོང་ན་རང་དབང་། དམངས་གཙོ། འདྲ་མཉམ་ཟེར་བ་འདི་དག་ཡོང་ཐུབ་ཐབས་མེད། བླ་སློབ་དམ་ཚིག་གཙང་མ་ཆོས་ཀྱི་ཐུན་མིན་ཁྱད་ཆོས་ཡིན་པ་ནང་བཞིན། རང་དབང་། དམངས་གཙོ། འདྲ་མཉམ་ཡང་སྲིད་ཕྱོགས་ནས་དབུ་ཁྲིད་དང་མི་དམངས་བར་མེད་དུ་མི་རུང་ཐུན་མིན་ཁྱད་ཆོས་ཤིག་ཆགས་ཡོད།

རྒྱལ་བ་རིན་པོ་ཆེ་ལ་བོད་མི་ཚོས་བླ་སློབ་ཀྱི་དམ་ཚིག་གཙང་མ་སྲུང་སྟངས་དེ་ཆོས་ཕྱོགས་ཀྱི་ཚད་ཐིག་གཅིག་པུའི་སྒང་ལ་བཞག་ན་གནས་སྟངས་དང་མཐུན་པ་ཞིག་མ་རེད། རྒྱལ་བ་རིན་པོ་ཆེ་བོད་མིའི་བླ་མ་ཙམ་དུ་མ་ཟད། སྲིད་ཕྱོགས་ནས་བོད་མིའི་དབུ་ཁྲིད་རེད། བླ་མ་དང་སློབ་མ་ཟེར་བ་ཆོས་ཕྱོགས་ནས་འཇོག་གི་ཡོད་ནའང་། དབུ་ཁྲིད་དང་མི་དམངས་ཞེས་སྲིད་ཀྱི་སྐད་ཆ་རེད། བོད་དོན་འཐབ་རྩོད་དང་། འཛིན་སྐྱོང་སྒྲིག་འཛུགས་ཟེར་བ་འདིག་དག་ཡང་སྲིད་ཀྱི་སྐད་ཆ་རྐྱང་རྐྱང་རེད། འཐད་རྩོད་དང་སྒྲིག་འཛུགས་སོགས་ཀྱི་ནང་རྒྱལ་བ་རིན་པོ་ཆེའི་དགོངས་གཞི་དང་མི་མཐུན་པའི་བསམ་ཚུལ་ཡོང་བའམ། ལྟ་མི་མཐུན་པ། དེ་བཞིན་ཁོང་གི་ཞལ་ལ་མི་ཉན་མཁན་ཡོང་བ། ཁ་ཐུག་གི་སྐད་ཆ་བཤད་ན་རང་བཙན་འཐབ་རྩོད་པ་སོགས་ལ་རྒྱལ་བ་རིན་པ་ཆེ་དང་བླ་སློབ་ཀྱི་དམ་ཚིག་གཙང་མ་རེད་ཟེར་བཞིན་སྐྱོན་བརྗོད་བྱས་ན་ཏག་ཏག་ཅིག་ཆགས་མེད། འདི་སྐྱོན་བརྗོད་བྱེད་ན་བྱེད་སྟངས་ཤིག་དེ་བས་ཀྱང་མ་རེད་འདོད།

ད་ཉལ་རན་སོང་། སང་ཉིན་ལས་ཀ་ཡོད། དུས་ཚོད་ཡོད་དུས་རིམ་བཞིན་རྒྱལ་བ་རིན་པོ་ཆེ་དང་བོད་མི་དམངས་བར་དྲིན་གཟོ་སྟངས་དང། ཀུན་སྤྱོད་ལ་འགན་ཁུར་སྟངས་ཀྱི་ཐད་ནས་བཤད་ཨེ་ཐུབ་ལྟ་ཀི་ཡིན།

ཁང་གསར་རྡོ་རྗེ་ལགས་ཐུགས་རྗེ་ཆེ་རྩོམ་ཡིག་ཡག་པོ་ཞིག་སྤེལ་འདུག།མི་ཁ་ཤས་ཀྱིས་བསམ་བློ་བཏང་མ་ཤེས་པ་ལྟ་བུའི་རང་བཙན་དང་དབུ་མའི་ལམ་ཞེས་བཤད་མཁན་མི་མྱུང་བ་ཞིག་ཡོད་པ་རེད།ང་རང་ངེས་ནས་བལྟས་ན་མི་དེ་ཚོ་མཐོང་རྒྱ་ཆུང་བ་ལྟ་བུ་སྣང་།རང་བཙན་དང་དབུ་མའི་ལམ་གཉིས་ཀ་དགོས་ལ་མི་ཞིག་གི་མིག་གཉིས་དང་འདྲ།ད་དུང་དམག་སྒ་༢༢པ་དེའང་ཡར་རྒྱས་གང་ཐུབ་གཏང་དགོས་པ་ཞིག་མཐོང་སོང།

རྨོག་རུ་བསྟན་པ་ལགས། ཁྱེད་ལ་དངོས་སུ་བྱུང་བའི་གནས་ཚུལ་དེ་ཚོ་བཀླགས་དུས་ངས་རང་གི་བྲིས་པ་འདི། སྤྱི་ཚོགས་ཀྱི་གནད་དོན་ཟབ་ས་ཞིག་ལ་ཐུག་ཡོད་པའིོ་ངེས་པ་རྙེད་བྱུང་། གོང་དུ་འཇིགས་བྲལ་བསྟན་འཛིན་གྱིས་ཀྱང་དེ་དང་འདྲ་བའི་གནས་ཚུལ་ཞིག་བཀོད་འདུག
༢༠༠༨ ལོར་ཁྱེད་ལ་འཕྲད་པའི་གནས་ཚུལ་འདྲ་བོ་འདི་གར་ཡང་བྱུང་བ་རེད། བྱང་ཨ་རིའི་དོན་གཅོད་ཀྱིས་ཊོ་རོན་ཊོ་བོད་རིགས་སྤྱི་མཐུན་ཚོགས་པ་ནས་ལས་འགུལ་གྱི་གསལ་བསྒྲགས་ཤིག་ཡོང་གི་ཡོད་རེད། གཞོན་ནུ་ལྷན་ཚོགས་ནས་གཅིག་ཡོང་གི་ཡོད་རེད། སློབ་ཕྲུག་རང་དབང་ཚོགས་པ་ནས་གཅིག་ཡོང་གི་འདུག དེ་ཚོ་འདྲ་གི་མི་འདུག ང་ཚོ་བོད་པ་མང་པོ་མགོ་རྨོངས་ནས། ཨོ་ལིམ་ཕིག་དཔལ་འབར་ལ་ངོ་རྒོལ་བྱེད་དགོས་རེད་མ་རེད་ལྟ་བུའི་དྲི་བ་མང་པོ་ཤར་བ་རེད། མཐའ་མ་ང་ཚོས་བྱང་ཨ་རིའི་སྐུ་ཚབ་དོན་གཅོད་དང་བྱང་ཨ་རིའི་སྤྱི་འཐུས་ལ་ཁ་པར་བཏང་ནས་སྐད་ཆ་དྲིས་པ་རེད། ཁོང་རྣམ་པ་ཚོས་གསལ་བཤད་གནང་བ་ཚོར་ཡིད་མ་ཆེས་པར་བོད་གཞུང་མང་ཛ་དྲག་ཚོགས་ཆུང་གི་ཚོགས་གཙོ་དང་རྒྱུན་ལས་ལའང་ཁ་པར་བཏང་ནས་སྐད་ཆ་དྲིས་པ་ཡིན། ཐ་མ་བོད་གཞུང་མང་ཛ་དྲག་ཚོགས་ཆུང་གི་དྲྭ་རྒྱ་དེས་ང་ཚོར་ཕན་ཐོགས་ཆེན་པོ་བྱུང་།
མདོར་ན་ཛ་དྲག་ལས་འགུལ་ཚོགས་ཆུང་གི་བསྒྲུབ་བྱའི་ནང་ལ། རང་བཙན་དང་དབུ་མའི་ལམ་གཉིས་ཀ་མི་འདུག བོད་ནང་གི་ཛ་དྲག་དཀའ་ངལ་སེལ་ཐབས་བྱ་རྒྱུ་དེ་དམིགས་ཡུལ་རེད་འདུག དེའི་ནང་བཀའ་སྤྱི་གཉིས་དང་གཞོན་ལྷན་ཕུད་གཞུང་འབྲེལ་མ་ཡིན་པའི་ཚོགས་པ་གཞན་ཕལ་མོ་ཆེས་མཉམ་ཞུགས་གནང་འདུག ཚོགས་པའི་ལམ་སྟོན་གསལ་པོ་འདུག གཅིག་འཚེ་མེད་ཞི་བ་དང་མ་འགལ་བ་དང་གཉིས་པ་ཡུལ་ཁྲིམས་དང་མ་འགལ་བ་དགོས་ཞེས་འདུག རང་བཙན་དང་དབུ་མའི་ལམ་གྱི་རྩོད་པ་དེ་མེད་ཅེས་གསུངས་འདུག དེ་ཡག་པོ་མཐོང་སོང་། གལ་ཆེ་ཤོས་བོད་ནང་གི་ཛ་དྲག་དཀའ་ངལ་སེལ་ཐབས་བྱ་རྒྱུ་དེ་རེད། ང་ཚོས་ཀྱང་དེ་ག་རང་ལ་ཉན་ནས་ཤུགས་རྒྱབ་པ་ཡིན། ཛ་དྲག་ལས་འགུལ་ཚོགས་ཆུང་གི་བཀའ་ལ་མ་ཉན་པར་ལས་འགུལ་སྤེལ་མཁན་ཡང་བྱུང་བ་རེད། དེ་ལ་འདི་ཁུལ་སྡང་ཟུག་བྱེད་མཁན་བྱུང་མ་སོང་དྲན།
གནས་ཚུལ་འདི་ཚོར་བསམ་གཞིགས་བྱེད་སྐབས། སྐད་ཆ་གཞན་ཞིག་བཤད་འདོད་བྱུང་། ང་རང་ཚོ་བོད་མི་ནང་ཁུལ་ལ་ཚོགས་པ་མི་འདྲ་བ་དང་དམིགས་ཡུལ་མི་འདྲ་བ་ཡོད་རེད། འོན་ཀྱང་ཕྱི་མི་ཚོས་བལྟ་དུས་ང་ཚོ་ཚང་མ་གཅིག་ལ་མཐོང་གི་འདུག་མ་གཏོགས་དབྱེ་འབྱེད་བྱེད་ཐུབ་ཀྱི་མ་རེད། ༢༠༠༨ ལོར་རྒྱལ་སྤྱིའི་ནང་བོད་སྐོར་གྱི་བརྡ་འཕྲིན་དེ་ཟང་ངེ་ཟིང་ངེ་རེད། རང་བཙན་རྩོད་ཀྱི་ཡོད་ཟེར་མཁན་དང་མེད་ཟེར་མཁན། རྒྱ་ནག་ལ་ཨོ་ལིམ་ཕིག་འཚོགས་པར་ངོ་རྒོལ་ཡོད་ཟེར་མཁན་དང་ངོ་རྒོལ་མེད། དགའ་བསུ་ཡོད་ཟེར་བ་སོགས་སྣ་ཚོགས་རེད། དངོས་གནས་བྱས་ན། སྐབས་དེར་གནས་སྟངས་དངོས་གནས་ཛ་དྲག་ཡིན་སྟབས། ཚོགས་པ་སོ་སོའི་ཕུགས་ཀྱི་ལྟ་བ་དེ་གནས་སྐབས་རིང་ཟུར་དུ་བཞག་སྟེ། ཚང་མས་འབོད་སྒྲ་གཅིག་གི་འོག་ནས་ལས་འགུལ་སྤེལ་ཐུབ་ན་ནུས་པ་ཆེ་བ་ཡོང་ས་རེད།
དེ་ནས་སྐུ་ཉིད་ལ་འདི་ཞུ་འདོིད་བྱུང་། སྐུ་ཉིད་སྐབས་དེར་ས་གནས་བོད་གཞུང་མང་ཛ་དྲག་ཚོགས་ཆུང་གི་གནད་ཡོད་ལས་བྱེད་ཅིག་ཡིན་དུས། ཚོགས་ཆུང་གི་བཀའ་བཀོད་དང་ལམ་སྟོན་བཞིན་འགྲོ་དགོས་པ་དེ་གལ་ཆེན་པོ་རེད། གང་ཡིན་ཟེར་ན་སྐུ་ཉིད་ཀྱིས་མཚོན་པ་དེ་སྐུ་ཉིད་སྒེར་མིན་པར། ཛ་དྲག་ཚོགས་ཆུང་མཚོན་གྱི་ཡོད་རེད། ལྟ་ཚུལ་མི་མཐུན་པ་ཡོད་ན། དབུས་ཀྱི་ཚོགས་ཆུང་ལ་ཞུས་ན་འགྲིག་གི་རེད། ཚོགས་པའི་ནང་ལས་ཀ་བྱེད་དུས་གནང་སྟངས་དེ་འདྲ་ཞིག་མེད་ན་འགྲིག་གི་མ་རེད། འདི་ངས་ཁ་རི་ཁ་ཐུག་ཏུ་ཞུས་པ་ཡིན།

ཟ་ལེ་རྒྱལ་གྱིས་ཕ་མ་གཉིས་ལས་སུ་འདེམས་དགོས་མིན་གླེང་བ་དེ་དངོས་གནས་སྙན་ངག་མཁན་ཅི་ཡང་རྒྱན་ཟེར་བ་དེ་དོན་དངོས་ཡིན་པའི་རྟགས་རེད། ཕ་དགོས་མ་མི་དགོས་ཟེར་ན་ནོར་བ་རེད། མ་དགོས་ཕ་མི་དགོས་ཟེར་ནའང་ནོར་བ་རེད། ཧ་ཅང་ལས་སླ་བའི་བྱ་བ་ཁ་ཤས་རང་ཅག་གིས་རྙོག་དྲ་ཆེན་པོར་གཏོང་བ་འདི། གཅིག་བྱས་ན་འགྲོ་བ་མིའི་རྣམ་དཔྱོད་ཟེར་བ་དེ་ཡིན་ས་རེད།

ཀུན་དགའ་བདེ་ཆེན་ལགས་ཀྱིས་གསུང་པར། རང་བཙན་རྩོད་མཁན་རྣམས་ཀྱིས་ག་རེ་འཇོན་འདུག་ཟེར། དེས་ན་དབུ་མའི་ལམ་དུ་འགྲོ་མཁན་ཚོ་ཡང་ག་རེ་འཇོན་འདུག་ཞིག་དྲི་བ་བཏང་ན་ལན་ག་རེ་རྒྱབ་བམ། རང་བཙན་དང་དབུ་མའི་ལམ་གང་ཡིན་ཀྱང་བོད་མི་ཡོད་དོ་ཅོག་གི་ལས་འགན་རེད། ཁྱོད་དེ་ཆོག་དང་དེ་མི་ཆོག་ཞིག་ལབ་ན་མ་འགྲིག་པ་ཞིག་ཏུ་མཐོང་། གནས་སྐབས་ཁེ་ཕན་ག་རེ་ཆེ་ན་དེའི་ཕྱོགས་སུ་འགྲོ་རྒྱུ་གལ་ཆེ། རང་བཙན་ཀྱང་དོར་ན་མ་འགྲིག་པ་ཞིག་ཏུ་མཐོང་། བོད་མི་བརྒྱ་ཕྲག་མང་པོས་རང་སྲོག་དོར་དེ་རྩོད་ལན་བྱས་ཡོད་དེ་ནི་རང་བཙན་གྱི་དོན་ཁོ་ན་རེད། དེ་དག་དྲན་དུས་སེམས་ནས་བཟོད་ཀྱི་འདུག་གམ། འདི་ནི་ང་ཚོར་གདམས་ང་ཡོད་པ་མ་ཡིན་པར་བསམ་ཚུལ་སྤེལ་རེ་བྱེད་པ་ཙམ་རེད། ཁོང་ཁྲོ་ཡང་བྱ་དགོས་དོན་མི་འདུག་སྙམ། བོད་མིའི་ཡ་རབས་ཀྱི་སྤྱོད་པ་དང་འགལ་འགྲོ། གང་ལྟར་བོད་པར་ཁེ་ཕན་ཡོད་པ་ཞིག་གི་ཕྱོགས་སུ་བསྐྱོད་ན་འགྲིག་པར་མཐོང་། དབུ་མའི་ལམ་ལ་བོད་ཀྱི་རྒྱལ་དར་དང་རྒྱལ་གླུ་དགོས་མཁོ་ཡོད་དམ། རྩེད་མོ་ཡིན་དགོངས་པ་དང་འགལ་བ་མེད་པར་ཞུ།

ཁང་གསར་ལགས། ཕྱི་ལོ་༢༠༠༧་ལོར་ངེད་ཀྱིས་དབུ་མའི་ལམ་གསར་ཤོག་བཏོན་པ་ཡིན། དེ་བཞིན་དབུ་མའི་ལམ་ལས་འགུལ་ཁང་གི་ཚོགས་ཆེན་དང་པོར་དང་བླངས་ཀྱིས་ཞུགས་ཏེ་རེ་བ་ཆེན་པོ་བྱས་པ་ཡིན། འདི་ཡང་སོ་སོའི་ལངས་ཕྱོགས་ཤིག་གི་ཆེད་ཡིན།

སྟབས་མ་ལེགས་པར་༢༠༠༨་ལོར་གཞུང་མང་ཛ་དྲག་ཚོགས་ཆུང་ཚུགས་རྗེས་མོན་གྷོ་ཊི་ནས་བསྟན་པ་ཀྲི་ཀེ་ཚོགས་གཙོ་རེད། ང་རང་ཛ་དྲག་ཚོགས་ཆུང་གི་དྲིལ་བསྒྲགས་འགན་འཛིན་ཡིན། སྐབས་དེར་བསྟན་པ་ཀྲི་ཀེ་གཙོ་བོས་ཁ་ཤས་ཤིག་སྨྱོན་པ་ནང་བཞིན་རེད། ཛ་དྲག་ཚོགས་ཆུང་གི་བཀའ་བཀོད་ལ་མི་ཉན་མཁན་ཞིག་ཡོད་ན་༸གོང་ས་མཆོག་དང་།བོད་གཞུང་གི་བཀའ་དགོངས་འོག་མི་འགྲོ་མཁན་ཡིན་པའི་ཁྱབ་བསྒྲགས་བྱས་གིན་འདུག སྐབས་ཤིག་གཞུང་འབྲེལ་མ་ཡིན་པ་ཚང་མར་གནོན་ཤུགས་སྤྲད་ཀྱིན་འདུག ང་རང་དབུ་མའི་ལམ་དུ་འགྲོ་མཁན་ཞིག་དང་ཛ་དྲག་གི་ཚོགས་མི་ཞིག་ཡིན་ཀྱང་འུ་ཏུག་ནས་ངོ་རྒོལ་བྱས་པ་ཡིན། ངེད་ཀྱིས་ཛ་དྲག་ཚོགས་ཆུང་གིས་རང་གི་ལྟ་གྲུབ་དང་ལངས་ཕྱོགས་གཞིར་བཟུང་ལས་འགུལ་སྤེལ་རྒྱུུ་ལས་གཞུང་འབྲེལ་མ་ཡིན་པ་ཚང་མ་བཀའ་བཀོད་གཅིག་སྡུག་ཡག་པོ་མི་འདུག་བརྗོད་པ་ཡིན།ཁོང་ཚོ་ང་ལ་སྐྱོན་བརྗོད་བྱས་སོང་།ཙི་ཙི་རེད་ཟེར་ན་གཤོག་པ་ཡོད་མཁན།བྱ་རེད་ཟེར་ན་ཙིའི་མགོ་ཡིན་མཁན་ཞེས་ས་གནས་འཏུས་ཚོགས་ནང་ཟུར་ཟ་དང་འཕྱ་སྨོད་བྱེད་ཀྱིན་འདུག
སྐབས་དེར་ས་གནས་གཞོན་ནུའི་ཚོགས་གཙོ་ཕུན་ཚོགས་ལའང་ངོ་ཚ་མི་འདུག རང་གི་ཚོགས་པའི་ལྟ་བ་དང་ལངས་ཕྱོགས་གཡུག་འདུག ལས་འགུལ་ཤིག་ཁྱབ་བསྒྲགས་བྱེད་སྐབས་ཀྱི་སྔོན་འགྲོར་ང་ཚོས་རང་བཙན་སྐད་ཆ་ནམ་ཡང་བཤད་ཀྱིན་མེད་ཞེས་རང་བཙན་བཤད་པར་ཉེས་ཅན་པ་ཞིག་ཡིན་མདོག་གིས་གནོང་ངོས་ལེན་བྱེད་ཀྱིན་འདུག
རྒྱལ་ཡོངས་རྩེད་འགྲན་ཆེན་མོའི་དཔལ་འབར་འཁྱེར་སྐབས་ང་རང་དང་བླངས་ངང་ལྡི་ལིར་ཡོང་བ་ཡིན།བཙོན་ཁང་ནང་ཉིན་བཅོ་ལྔར་བཀག་སྡོམ་བྱས་བྱུང་།
གློད་བཀྲོལ་གྱིས་ཕྱིར་མོན་གྷོར་སླེབས་པའི་ཉིན་གཉིས་ཀྱི་རྗེས་སུ་མོན་གྷོ་ཛ་དྲག་ཚོགས་ཆུང་གི་ཚོགས་འདུ་འཚོགས་སོང་།
བསྟན་པ་ཀྲི་ཀེ་ཡི་ངར་སྐད་བཏོན་སོང་།དཔལ་འབར་ལ་ངོ་རྒོལ་བྱེད་པ་དེ་རྒྱལ་བ་རིན་པོ་ཆེ་བཀའ་དང་འགལ་ཡོད་པ་རེད།སྐུ་ཞོགས་ཁྱེད་རང་ཛ་དྲག་ཚོགས་ཆུང་གི་ཚོགས་མི་ཡིན་པ་གང་ཞིག་ལ་༸གོང་ས་མཆོག་གི་བཀའ་ལ་རྒྱབ་འགལ་བྱེད་པ་ཧ་ཅང་སྐྱོ་བོ་མ་རེད་དམ།
ངོ་མ་ང་རང་སེམས་ཤུགས་ཆག་སོང་།ཉིན་དེ་ནས་ཛ་དྲག་ཚོགས་ཆུང་ནས་དགོངས་པ་ཞུས་ཡིན།ད་དུང་སྐབས་དེར་གཞུང་ཕྱོགས་ཀྱི་མི་ཁ་ཤས་རེ་སླེབས་སོང་།གཞུང་འབྲེལ་མ་ཡིན་པ་ཚོས་༸གོང་ས་མཆོག་གི་བཀའ་ལ་ཉན་གྱི་མེད་པ་མ་ཟད།བོད་རྒྱ་ཞི་མོལ་གྱི་ཁོར་ཡུག་དཀྲུགས་ཚུལ་གླེང་སོང་། བོད་གཞུང་མང་གི་དམིགས་བསལ་ཚོགས་ཆེན་སྐབས་མང་ཚོགས་ནང་བསམ་ཚུལ་བསྡུ་རུབ་བྱས་པ་རེད།བསྟན་པ་ཀྲི་ཀེ་དང་། བསྟན་འཛིན་ཕུན་ཚོགས།ངེད་གསུམ་ནས་ཞིབ་འཇུག་བྱས་པ་ཡིན། དབུ་མའི་ལམ་དང་རང་བཙན་ཟེར་མཁན་གཉིས་ཀ་འདུག ངེད་ཀྱིས་དེ་ལྟར་བཤད་པ་ཡིན། ཁོ་ཚོས་རང་བཙན་ཟེར་མཁན་ཉུང་ཙམ་ལས་མེད་པས་རྩིས་མེད་བཏང་ན་འགྲིག་ཟེར།ངས་དེ་ལྟར་མི་ཉན་པར་བཤད་པ་ཡིན།བསམ་ཚུལ་ལ་ཕྱོགས་བསྡོམས་བྱས་པའི་ཚོགས་འདུ་འཚོགས་སོང་། རང་བཙན་དགོས་འདུན་སྐོར་གང་ཡང་བཞག་མི་འདུག ངས་ཁ་ཏུག་ལ་རང་བཙན་གྱི་དགོས་འདུན་བཤད་མཁན་ཡོད་པར་བརྗོད་པ་ཡིན། ཕྱག་མཛོད་ཁ་ཤས་ཤིག་ཚོགས་ཏོག་ནས་ལངས་ཏེ་མ་འདོད་པའི་རྣམ་འགྱུར་མངོན་ཕྱིར་འགྲོ་སོང་།བསྟན་པ་ཀྲི་ཀེ་ཡིས་སྐུ་ཞོགས་ཀྱིས་རང་བཙན་དགོས་འདུན་བཏོན་མཁན་འདུག་ཟེར། འོ་ན།་ང་ཚོའི་གཞུང་ལ་ཕུལ་རྒྱུའི་ཡིག་ཆ་ནང་རང་བཙན་ཟེར་མཁན་ཡང་ཁ་ཤས་འདུག་ཞེས་བྲིས་ན་ཟེར།དེ་ལྟར་འགྲིག་མང་མོས་ཀྱིས་ཁ་གྲགས་སོང་།
དེ་ནས་བཟུང་ཁོ་ཚོས་ང་ནི་ཕྱོགས་འགལ་བ་ཞིག་ཏུ་ངོས་འཛིན་བྱས་པ་མ་ཟད།རྒྱ་མིའི་སོ་བ་ཡིན་པར་མི་མང་ནང་དུ་མི་མངོན་པའི་ཚུལ་གྱིས་ཁྱབ་བསྒྲགས་བྱས་པ་རེད།
ང་ནི་དབུ་མའི་ལམ་གྱི་ལས་འགུལ་བ་ཞིག་པའི་ལྟ་ཚུལ་དང་ལངས་ཕྱོགས་ལ་འགྱུར་བ་ནམ་ཡང་མེད་ཀྱང་། རང་བཙན་རྩོད་མཁན་ལ་ཕྱོགས་འགལ་དུ་ལྟ་བའི་བསམ་བློ་ཡང་མེད།
འཇིགས་བྲལ་ངེད་གཉིས་དབུ་མའི་ལམ་གྱི་ལས་འགུལ་ཁང་གི་གོ་སྒྲིག་འོག་ལྷོ་ཕྱོགས་གཞིས་ཆགས་ཁག་ཏུ་བསྐྱོད་པ་ཡིན། ངེད་ཀྱིས་ལྟ་གྲུབ་ཕྱོགས་གཅིག་མ་མཏུན་པ་ཙམ་གྱིས་འགལ་ཟླར་ལྟ་མི་རུང་ཞེས་པའི་བརྗོད་གཞི་ཞིག་བཟུང་བ་ཡིན།
ཁང་གསར་ལགས།
ཁྱེད་ཀྱི་བསམ་ཚུལ་འདིར་ང་ཧ་ཅང་འཏད།

ཁང་གསར་རྡོ་རྗེའི་ཟིན་བྲིས་སྔ་མ་དེ་ཚོ་མཐོང་ནས་བཟུང་ག་རེ་བྲིས་ནའི་བློ་ལ་བབས་ཀྱི་མི་འདུག ང་རང་གིས་དགའ་ཤོས་བྱེད་སའི་མི་ཞིག་གིས་མགོ་སྐོར་བཏང་བ་ལྟ་བུ་བྱུང་། ཡང་ཁང་གསར་གྱིས་གཅིག་བྲིས་འདུག་ཟེར་དུས་ཀློག་ཙམ་མ་བྱས་རང་བྱས་ཡོང་གི་འདུག ད་ག་རེ་བཤད་དགོས་རེད། ང་རང་གིས་ཀྱང་རང་ཚུགས་ཐུབ་པ་ཞིག་བྱེད་དྲན་གྱི་འདུག ཡིན་ནའི་ཟིན་བྲིས་སྔ་མའི་ནང་རྒྱལ་བ་རིན་པོ་ཆེ་ལ་གཅིག་བཤད་ཡོང་དུས་ཚོད་འཛིན་ཐུབ་ཐབས་མི་འདུག

དྲི་བ་གཅིག་ཡོད། རང་བཙན་འཐབ་རྩོད་པ་ཚོས་ག་རེ་འཇོན་སོང་། དེ་བཤད་ན་ཕོ་ཁྱོ་ག་ཡིན།

ད་དགོང་མོའི་ཆུ་ཚོད་ ༡༢ ཡོལ་ཟིན་འདུག གཉིད་ཅིག་ཉལ་གྱི་ཡིན། དབྱངས་བུའི་དྲི་བ་དེ་ཚོར་སང་ཉིན་བགྲོ་གླེང་ཞུས་ཆོག

ཐུགས་རྗེ་ཆེ།

འཇིགས་བྲལ་བསྟན་འཛིན་གྱིས་སྒྲུང་རིང་པོ་ཞིག་གསུངས་པ་དེ་ང་ལ་ཆ་རྒྱུས་མེད་སྟབས། འདི་ཡིན་འདི་མིན་ཞུ་ཐུབ་ཀྱི་མི་འདུག འོན་ཀྱང་བར་ལམ་བཀའ་ཤག་གིས་བོད་ཆོལ་ཁ་གསུམ་ཞེས་པའི་མིང་ཚིག་འདི་གཞུང་གི་ཡིག་ཆའི་ནང་བཀོད་མི་ཆོག་པར་གསུངས་པ་དེར་དབུ་མའི་ལམ་གྱི་རྗེས་འཇུག་པའི་ཁྲོད་དུའང་བསམ་ཚུལ་ཡོད་པ་མཐོང་གི་འདུག
ཆབ་སྲིད་རང་གི་ཐད་ནས་བཤད་ན། དབུ་མའི་ལམ་འདི་བོད་གཞུང་གི་སྲིད་བྱུས་ཡིན་པར་བཤད་ན་དགོས་དོན་ཆེན་པོ་ཡོད། འོན་ཀྱང་དྲིལ་བསྒྲགས་བྱེད་མཁན་ཚོས་དེ་ལ་ཁས་ལེན་མི་བྱེད་པ་དེར་གནད་དོན་ཁ་ཤས་ཡོད་ངེས་རེད། གཅིག་ནི་དབུ་མའི་ལམ་གྱི་སྲིད་བྱུས་འདིའི་སྲོལ་འབྱེད་མཁན་༸གོང་ས་མཆོག་ཡིན་པ་དེ་གསལ་པོ་བཟོ་འདོད་པ་ཡིན་སྲིད། གཉིས་ནི། ༸གོང་ས་མཆོག་གི་དགོངས་པ་རེད་ལབ་ན། མང་ཚོགས་ནང་རྩོད་པ་རྒྱག་ནུས་མཁན་ཡོང་གི་མ་རེད། དེ་འདྲའི་གནས་ཚུལ་མང་པོ་འདུས་ཡོད་ངེས་རེད།
སྤྱིར་བཏང་། འདི་ག་ནུབ་ཕྱོགས་སུའང་ཚོགས་པའི་ལས་ཀ་བྱེད་སྟངས་བཤད་དུས། བསམ་ཚུལ་མི་མཐུན་པ་ཡོང་གི་འདུག ཚོགས་པའི་ལས་ཀ་ཡིན་དུས་གཙོ་བོ་མང་མོས་ལ་གཟིགས་དགོས་པ་དེ་གལ་ཆེན་པོ་རེད། མང་མོས་མ་བལྟས་གོང་རྩོད་བཤད་བྱས། མང་མོས་བྱུང་རྗེས། ཉུང་བ་ཚོས་མང་བའི་བསམ་ཚུལ་དེ་ལ་བསྟུན་དགོས་པའང་གལ་ཆེན་རེད།

འཇིགས་བྲལ་བསྟན་འཛིན་ལགས། གཞོང་པ་སྟོང་པའི་སྟོང་འཛིང་ཟེར་བ་དེ། དབུས་གཙང་གི་གཏམ་དཔེ་ཞིག་རེད། གཞོང་པ་སྟོང་པ་ཞིག་འཛིང་མོ་བྱས་ནས་རང་རང་གི་སྟོབས་ཤུགས་ཟད་དེ་སྤྱི་ལ་གྱོང་མ་གཏོགས། ཁེ་ཡོང་རྒྱུ་མེད་པར་ཟེར་བ་རེད། དེ་ནི་དབུ་མའི་ལམ་དང་རང་བཙན་གྱི་རྩོད་པའི་ཐོག་ལ་བལྟས་ཏེ་བཤད་པ་ཞིག་ཡིན། འོན་ཀྱང་རང་བཙན་བརྩད་ནའང་ཐོབ་རྒྱུ་མེད་པ་དང་། དབུ་མའི་ལམ་ལ་སོང་ནའང་སྟོང་པ་རེད་ཟེར་གྱི་མེད། འཁོན་འཛིང་བྱེད་སྟངས་འདི་སྟོང་པ་རེད་ཟེར་གྱི་ཡོད། འདིས་གསལ་པོ་ཆགས་པའི་རེ་བ་ཡོད།

ཁང་གསར་ལགས་ཀྱི་རྩོམ་ཡིག་ཆ་ཚང་བཀླགས་རྗེས་བསམ་ཚུལ་འགའ་ཞུ་འདོད་བྱུང།

དང་པོ། དབུ་མའི་ལམ་དེ་ལྟ་གྲུབ་མ་ཡིན་པར་ཐབས་ལམ་བམ་སྲིད་བྱུས་ཤིག་ཡིན་པ་བདེན་པ་རེད། འོན་ཀྱང་ཚད་ལྡན་གྱི་སྲིད་བྱུས་གང་འདྲ་ཞིག་ཡིན་རུང་རྒྱབ་བརྟེན་ཡང་དག་པའི་ལྟ་གྲུབ་ཞིག་ལ་གཞི་བཅོལ་ནས་བཟོས་བ་ཞིག་ཡིན་པ་ཁྱེད་ཀྱི་མཁྱེན་གསལ་ལྟར་ལགས། དེ་བཞིན་དབུ་མའི་ལམ་གྱི་སྲིད་བྱུས་དེ་ཡང་རྒྱབ་བརྟེན་འཚེ་བ་མེད་པའི་ཡང་དག་པའི་ལྟ་གྲུབ་ལ་གཞི་བཅོལ་ནས་བཟོས་པ་ཞིག་ཡིན་པ་མཁྱེན་དགོས།

གཉིས་པ། རང་བཙན་འཐབ་རྩོད་པ་གྲགས་ཅན་མང་པོའི་མདུན་ནས་གཏམ་བཤད་ཉན་མྱོང་ལ། བོད་ཀྱི་གཞོན་ནུའི་ཚོགས་གཙོ་ཟུར་པར་རང་བཙན་རྩོད་པའི་ཐབས་ལམ་དང། འཆར་གཞི། སྒྲིག་འཛུགས། གཅིག་སྒྲིལ་གྱི་ནུས་པ་འདོན་རྒྱུར་སྒྲོམ་གཞི་གང་འདྲ་ཡོད་དམ། ཞེས་དེ་སྔ་ང་རང་མཐོ་སློབ་ལ་སྡོད་སྐབས་ནས་དྲི་བ་འདོན་མྱོང་མོད། ལན་འདེབས་ཁ་གསལ་སྐྱོན་རྒྱུ་མེད་པའམ་མ་སྐྱོན་པར་གཏམ་བཤད་ཀྱི་ཁ་བསྒྱུར་སོང།

གསུམ་པ། བོད་ཀྱི་དཔའ་བོ་མཐུ་བསྟན་དངོས་གྲུབ་ལགས་ཀྱིས་རང་བཙན་དང་དབུ་མའི་ལམ་གཉིས་ཀར་རྒྱབ་སྐྱོར་མཛད་ཀྱི་ཡོད་པ་དངོས་བདེན་རེད་དམ། དེས་ན་དེ་སྔ་ང་རང་བོད་ཀྱི་གཞོན་ནུའི་གནས་ཡོད་མི་མང་པོ་ཞིག་གི་གཏམ་བཤད་ནང་དམ་པ་ཁོང་ནི་རང་བཙན་རྩོད་ལེན་པ་ཁོ་ནར་གསུངས་པ་ལས། དབུ་མའི་ལམ་ལ་རྒྱབ་སྐྱོར་གནང་མཁན་ཞིག་ལ་མི་གསུངས་དོན་ཅི་ཡིན་ནམ།

བཞི་པ། ཁྱེད་ཀྱིས་གསུངས་པ་ལྟར་ན། བོད་རིགས་མི་གཅིག་གིས་རང་བཙན་དང་དབུ་མའི་ལམ་གཉིས་ཀར་རྒྱབ་སྐྱོར་བྱས་ན་འགྲིག་ཚུལ་གསུངས་སོང་ལ། དེའི་རྒྱུ་མཚན་ལ་བོད་ཀྱི་དོན་དུ་རྩོད་པའི་རྒྱུ་མཚན་བཀོད་འདུག འོན་ཀྱང་དེ་སྔ་བོད་གཞུང་གི་གནས་ཡོད་མི་སྣ་གཅིག་གིས་ཁབ་རྩེ་གཉིས་ཀྱི་འཚེམ་བུ་མི་ཡོང་བ་ལྟར། དབུ་མའི་ལམ་དང་རང་བཙན་འཐབ་རྩོད་གཉིས་ཀར་གང་ཟག་གཅིག་གིས་རྒྱབ་སྐྱོར་བྱས་ལས་དོན་སྒྲུབ་མི་ཐུབ་ཚུལ་གསུངས་སོང། རྒྱུ་མཚན་ཞིག་འདུག་གམ།

མདོར་ན་གོང་ཞུས་གུས་པའི་བསམ་ཚུལ་རྣམས་ལ་བཀའ་ལན་གནང་སྐྱོངས་ཡོང་བའི་རེ་བ་ཆེ།

སྐུ་ཉིད་ལ་གུས་པས་རྗེས་སུ་ཡི་རང་ཞུ་བཞིན་ཡོད་པས། མུ་མཐུད་རྩོམ་ཡིག་འབྲི་གནངསྐྱོངས་་ཡོང་བ་ཞུ་རྒྱུ་དང་བཅས།།

ཁང་རྡོར་ལགས་ཀྱིས་གསུང་པར་རྒྱུ་མཚན་འདུག ང་རང་གིས་དད་གུས་དང་བརྩི་བཀུར་ཞུ་ས་ཨང་དང་པོ་གོང་ས་མཆོག་ལས་ལྷག་པ་སུ་ཡང་མེད། འོན་ཀྱང་ཆབ་སྲིད་ནི་ཆོས་ལུགས་དང་ཐ་དད་རེད། ཁེ་ཕན་གྱི་ཕྱོགས་ལ་འགྲོ་རྒྱུ་ལས་གཞན་ཐབས་ཅི་ཡོད།

བོད་ཀྱི་སྐད་ཡིག་ལ་བར་སྟོང་་འཇོག་དགོས་མིན་ཐོག་ཏུ་བསམ་ཚུལ་ཆུང་ཆུང་ཞིག་མ་མཐུན་པ་ཙམ་གྱིས་སྙན་ངག་འདི་འདྲ་འབྲི་མཁན་སུ་ཡོད་རེད། ཨྭ། འཇིགས་བྲལ།
ཁང་གསར་འདི་ཡིན་ན།

ཅོ་རི་ཁྱོད་འབྲེལ་མེད་ཀྱི་སྐད་ཅོར་མ་རྒྱག་དང་། དེ་ལས་གནད་ལ་འཁེལ་བའི་བགྲོ་གླེང་ཞིག་བྱོས་དང་། ཅི་རེད། རྟག་པར་སྐད་རྒྱབ་ནས། ཨཱ།

དབུ་མའི་ལམ་འདི་༸གོང་ས་མཆོག་གིས་བཏོན་པ་ཞིག་མིན་པར། འཇམ་དབྱངས་ནོར་བུ་ལྟ་བུའི་གང་ཟག་གཞན་ཞིག་གིས་བཏོན་པ་ཡིན་ཚེ། བོད་མི་གཞན་དག་ལྟ་ཅི། དབུ་མའི་ལམ་གྱི་ལས་འགུལ་ཁང་གི་མི་དེ་ཚོས་ཀྱང་དེ་ལ་ཁས་ལེན་རྩ་བ་ནས་བྱེད་ཀྱི་མ་རེད། ཅེས་བཤད་པ་དེ་ཇི་བཞིན་དུ་ཁས་ལན་བྱེད་ཀྱི་ཡིན། དེ་ཡང་ལོ་རྒྱུས་གཅིག་བཤད་ཆོག་པ་ཞུ།
སྔ་ལོ་རྡ་སར་དབུ་མའི་ལམ་གྱི་ལས་འགུལ་ཁང་གི་ཚོགས་འདུ་ཐེངས་གཉིས་པ་དེ་འཚོགས་པ་རེད། སྐབས་དེར་དོན་ཚན་འདི་འདྲ་ཞིག་གྲོས་ཆོད་ནང་བཀོད་ཡོད་པ་རེད། ༸གོང་ས་མཆོག་གི་དགོངས་གཞི་དབུ་མའི་ལམ་ལ་ཐེ་ཚོམ་མེད་པར་ཤར་བསྐྱོད་བྱ་རྒྱུ་ཟེར་བ་ཞིག་བྲིས་ཡོད་པ་ཡོད། ཚིག་ཇི་བཞིན་མི་དྲན་ཀྱང་དོན་དེ་རང་ཡིན། སྐབས་དེར་གུས་པས་། བཙན་བྱོལ་བོད་གཞུང་གི་ལངས་ཕྱོགས་དབུ་མའི་ལམ་གྱི་ཐོག་ཤར་བསྐྱོད་བྱ་རྒྱུ་ཅེས་བྲིས་ན་ཡག་པོ་འདུག འདི་༸གོང་ས་མཆོག་གི་གནད་དོན་མ་རེད། བོད་ཀྱི་གནད་དོན་རེད། རྒྱ་ནག་གིས་རྟག་པར་ཏཱ་ལའི་བླ་མའི་སྐུ་ཚབ་ལ་ཐུག་འཕྲད་བྱེད་ཀྱི་ཡིན། ཁོང་སྐུ་སྒེར་གྱི་གནད་དོན་སྐོར་ལ་གྲོས་བསྡུར་བྱེད་ཀྱི་ཡིན། དེ་མིན་བོད་གཞུང་ཟེར་ཁྲིམས་འགལ་རེད། བོད་ཀྱི་གནད་དོན་ཟེར་བ་མེད་ཟེར་ནས་༸གོང་ས་མཆོག་ངོས་ལེན་བྱེད་པ་ལས་ཀྱང་བཙན་བྱོལ་གཞུང་ངོས་ལེན་ཁག་པོ་བྱེད་ཀྱི་ཡོད་པ་འདི་རྩ་བའི་གནད་དོན་རེད། དེ་བས་ང་ཚོས་བོད་མིའི་ཁྲིམས་མཐུན་སྲིད་གཞུང་བཙན་བྱོལ་གཞུང་གི་ལངས་ཕྱོགས་ལ་འགྲོ་རྒྱུ་བྲིས་ན་ཡག་པོ་ཡོད་རེད། རྒྱ་ནག་བཙན་བྱོལ་བོད་གཞུང་ངོས་ལེན་བྱས་ན་བོད་ཀྱི་བདེ་སྡུག་ངོས་ལེན་བྱས་པ་རེད་སོགས་རྒྱུ་མཚན་ཇི་ལྟར་བཤད་ཀྱང་ངོས་ལེན་ལྟ་ཅི་བློར་རྩ་བ་ནས་ཤོང་གི་མི་འདུག དཱ་མདོར་བསྡུས་ན་བཙན་བྱོལ་བོད་གཞུང་གི་དབུ་མའི་ལམ་ཞེས་འབྲི་འདོད་བྱེད་ཀྱི་མེད་ན་འཇམ་དབྱངས་ནོར་བུ་ལགས་ཀྱིས་བཏོན་པའི་དབུ་མའི་ལམ་ཡིན་ན་ཁས་ལེན་མི་བྱེད་པ་གསལ་པོ་གསལ་རྐྱང་མ་རེད་དམ།
དེ་ནས་གནད་དོན་གཉིས་པ་དེ་ལ། མང་ཚོགས་ལ་དབུ་མའི་ལམ་འགྲེལ་བཤད་སྐྱོན་གྱི་ཡིན་ཟེར་གྱི་ཡོད་པ་རེད། འགྲེལ་བཤད་སྐྱོན་པར་ཕེབས་ན་༼བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་༽གཞིར་བཟུང་གི་དེའི་ནང་དོན་གསལ་པོ་བཤད་ན་ཡག་པོ་ཡོད་རེད་ཅེས་བཤད་ཀྱང་ནན་འཇོག་ལྟ་ཅི་དེ་ལབ་གང་མིན་ཚད་ཡིན་མདོག་གི་རྣམ་འགྱུར་སྟོན་གྱི་འདུག
ཡང་དོན་ཚན་གཅིག་ཏུ་ངེས་པར་ཆོལ་གསུམ་འབྲི་དགོས་ཟེར་ཨུ་ཚུགས་མཐའ་སྐྱེལ་བྱེད་ཀྱི་འདུག་པར། གུས་པས་གཞུང་འབྲེལ་ཡིག་ཆ་༼བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་༽དང་། ༢༠༠༩ལོའི་གསུམ་དུས་གསུང་འཕྲིན་མིག་སྟོན་བྱས་ཀྱང་མ་ཕན་པར་གྲོས་ཆོད་གཅིག་ཏུ་ཆོལ་གསུམ་བྲིས་པ་རེད། ད་༸གོང་ས་མཆོག་གི་གསུམ་དུས་གསུང་འཕྲིན་དང་། གཞུང་གི་ཡིག་ཆ་ཁག་ཏུ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་བྱེད་པའི་བསམ་འཆར་ཡིག་གཉིས་ཀར་ཆོལ་གསུམ་གྱི་ཐ་སྙད་མེད་པར་བཟོས་པའི་ལངས་ཕྱོགས་ཤེས་བཞིན་དུ་ཨུ་ཚུགས་བྱས་ཏེ་ཆོལ་གསུམ་འབྲི་གི་འདུག འདིས་ག་རེ་མཚོན་གྱི་འདུག
ཡང་བདག་གིས་༸གོང་ས་མཆོག་གི་བཀའ་དགོངས་སྒྲུབ་མཁན་ཡིན་མདོག་བྱས་ཏེ་ཁོང་གི་མཚན་དམར་རྗེན་དུ་བེད་སྤྱོད་བྱེད་པ་༸གོང་ས་མཆོག་ལ་མ་གུས་པ་ཞིག་ཡིན་པ་དང་། ཕྱོགས་གཞན་ཞིག་ནས་བོད་དོན་ཆབ་སྲིད་ཤེས་མཁན་དང་གཞོན་སྐྱེས་དོ་སྣང་དང་སེམས་ཤུགས་ཡོད་མཁན་ཚོས་༸གོང་ས་མཆོག་ཁ་ལ་འཁྱེར་མཁན་གྱི་སྐབས་འཚོལ་བར་ངོས་འཛིན་བྱེད་ཀྱི་ཡོད་པ་དང་། གཉིས་ཐད་ནས་༸གོང་ས་མཆོག་གི་དགོངས་པ་རེད་ཟེར་ནས་ཤུགས་ཆེན་པོ་བཤད་ན་ཚང་མས་དེ་རང་རེད་ཟེར་བ་ལས་རང་རང་གི་བསམ་ཚུལ་བརྗོད་པར་འགོག་རྐྱེན་ཆགས་ཀྱི་འདུག་པས་དེས་བཙན་བྱོལ་མང་གཙོ་འཕེལ་རྒྱས་ལ་ཡང་གནོད་ཀྱི་འདུག འདི་ཡང་ཕུགས་རྒྱང་གི་ཆ་ནས་ཡག་པོ་མིན་ཚུལ་བཤད་ཀྱང་ཉན་མཁན་གཅིག་ཀྱང་མ་བྱུང་།
མཐར་ངས་ཁོང་ཚོར། དབུ་མའིལམ་ལ་ངེས་པ་རྙེད་དེ་ལས་འགུལ་ཡང་སྤེལ་གྱི་ཡིན་ཟེར་གྱི་ཡོད་པ་རེད། ཡིན་ནའང་༸གོང་ས་མཆོག་གི་མཚན་བེད་སྤྱོད་མི་བྱེད་པར་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་ཆ་རྐྱེན་ཁག་ལག་བསྟར་དགོས་པའི་རེ་སྐུལ་བྱེད་པ་དེ་ཡང་དག་པ་ཡིན་ལུགས་ཁྱོད་ཚོ་ལ་དངོས་ཡོད་རྒྱུ་མཚན་གྱི་ལམ་ནས་གསལ་བཤད་བྱ་རྒྱུའི་སྤོབས་པ་ཙམ་ཡང་མི་འདུག་པ་གསལ་པོ་ཆགས་སོང་བ། དཱ་ཁྱོད་ཚོས་དབུ་མའི་ལམ་ངོ་སྤྲོད་བྱེད་མཁན་ཞིག་ཡིན་ཁུལ་བྱེད་དོན་གང་ཡིན་དོགས་པ་སྣོན་པ་ཞིག་སྐྱེ་གཞི་ཞིག་ལས་ལྷག་པའི་དོན་རྙིང་ཅང་འདུག་གམ། ཟེར་ནས་དྲི་བ་གཏོང་དགོས་བྱུང་སོང་།

ཁང་གསར་ལགས་ཀྱི་རྩོམ་ཡིག་འདི་ཞིབ་ཀློག་བྱས་པ་ཡིན། གོང་ས་མཆོག་གི་དབུ་མའི་ལམ་ཕྱོགས་ལ་རྒྱབ་སྐྱོར་ཡོད་གསུངས་འདུག མིག་སྔར་གྱི་ཕྱི་ནང་གནས་ཚུལ་བསམ་ཚེ་ང་ཡང་གོང་ས་མཆོག་གི་དབུ་མའི་ལམ་འདི་ནི་ད་ལྟ་མི་རིགས་ཀྱི་གནས་བབས་ཉག་ཕྲ་བའི་སྐབས་འདིར་ཕྱོགས་ཡོངས་ནས་ཁེ་ཕན་ལེན་ཐབས་བཟང་ཤོས་དེ་རེད་བསམ་གྱི་ཡོད། ཡིན་ནའང་དབུ་མའི་ལྟ་བ་འདི་ལ་མོས་མཐུན་ཡོད་པའི་རྒྱུ་མཚན་གྱིས་རང་བཙན་བརྩོན་ལེན་པ་རྣམས་ལ་ལྟ་སྟངས་ངན་དུ་འགྲོ་རྒྱུ་ཕར་བཞག ཁོང་རྣམས་ཀྱི་ཞུམ་པ་མེད་པའི་སྙིང་སྟོབས་དང་རང་མི་རིགས་ལ་འཛིན་པའི་ཟོལ་མེད་ཀྱི་བརྩེ་དུང་དེ་དག་ལ་རྗེས་སུ་ཡི་རང་ཡོད། རང་བཙན་བརྩོན་ལེན་པ་རྣམས་ཀྱི་ཁྲོད་ནས་ཆེས་ཚབ་མཚོན་ལྡན་པའི་མི་སྣ་གཉིས་ནི་འཇམ་དབྱངས་ནོར་བུ་ལགས་དང་བསྟན་འཛིན་བརྩོན་འགྲུས་རྣམ་གཉིས་རེད། ང་ནི་བོད་ནང་ཁུལ་ནས་ཕྱི་རོལ་རང་དབང་གི་འཇིག་རྟེན་དུ་འབྱོར་ནས་ལོ་ཤས་སོང་བའི་མི་ཞིག་ཡིན་ལ། ལོ་འདི་དག་ནང་དུ་གོང་ས་མཆོག་ལ་ལྡན་པའི་ཐུན་མོང་མ་ཡིན་པའི་རྣམ་དཔྱོད་དང་ཐུགས་གཤིས། བོད་དོན་གྱི་ཆེད་དུ་སྐུ་ངལ་ཚད་མེད་བཀྱོན་གནང་བའི་མཛད་འཕྲིན་དེ་དག་གིས་བོད་ཅེས་པ་སྒྲ་ཅན་ཁ་ནང་དུ་ཡོད་ཀྱང་ད་དུང་འཛམ་བུ་གླིང་གི་གླེང་བྱ་ཞིག་དང་དོ་སྣང་བྱེད་ས་ཞིག་ཆགས་ཡོད་པའི་ངེས་ཤེས་བྱུང་ལ། བོད་དོན་དྲིལ་བསྒྲག་གི་ཐད་ལ་གོང་ས་མཆོག་ཕུད་ལུང་དང་གཏན་ཚིག་གི་སྒོ་ནས་དྲིལ་བསྒྲག་གནང་ཐུབ་མཁན་འཇམ་དབྱངས་ནོར་བུ་དང་། སྨྲ་ལྕེ་དང་ལུས་པོ་འགུལ་ནས་དྲིལ་བསྒྲག་ཤུགས་ཆེན་པོ་གནང་ཐུབ་མཁན་བསྟན་འཛིན་བརྩོན་འགྲུས་ལས་ལྷག་པ་ཞིག་མཐོང་མ་སོང་། རྒྱུ་མཚན་དེ་དག་གིས་ཁ་ཅིག་གིས་བསྟན་འཛིན་བརྩོན་འགྲུས་ལ་སྨད་པའི་ཚུལ་གྱིས་གོང་ས་མཆོག་ལ་བསྟོད་ཁུལ་བྱེད་པ་ནི་གཞན་གྱིས་རྟོགས་མི་རུང་བའི་གཡོ་སྒྱུ་ཁོག་ཏུ་འཆང་མེད་པ་ཡིན་ན་བསྟོད་བསམ་ཀྱང་བསྟོད་སྟངས་མ་ཤེས་པའམ་སྲིད་ཟེར་བ་འདི་ལ་རྒྱུས་མངའ་ཏིལ་འབྲུ་ཙམ་ཡང་མེད་པའི་རྟགས་མཚན་ཡིན་ངེས་རེད།

ཁང་རྡོ་རྗེའི་བསམ་ཚུལ་ལ་ཞིབ་ཀློག་བྱེད་ཀྱི་ཡིན། ད་ལྟ་ཀློག་ཙམ་བྱས་པར་འདི་འདྲ་ཞིག་གི་མཐོང་ཚུལ་བྱུང་། དེ་ཡང་ཁ་བྱང་དེའི་ནང་དོན་གྱི་ཐོག་ནས་ནང་ཁུལ་ཐུག་རུང་མ་ཐུག་རུང་གདོང་རྒྱུ་མེད་པའི་གཞོང་སྟོང་རེད་ཟེར་བ་དེ་རེད།
དེ་འདྲ་ཞིག་ཡིན་ནམ་ཡང་ན་གོ་བ་གཞན་ཞིག་ལེན་དགོས། ཁང་གསར་རྡོ་རྗེ་ལགས།

ཁང་གསར་གྱི་ལན།

ཅོ་རི་ཉི་མ་ལགས། ཁྱོན་ཡོངས་ཀྱི་བྱེད་སྟངས་ལ་ཞེ་སུན་པའི་སུན་སྣང་ཞིག་ཡིན། དེའི་ནང་ཁྱེད་རང་ཚུད་ཡོད་མེད་ཁྱེད་རང་གིས་མཁྱེན་ངེས་རེད།