གསར་འགོད་རྟོཊ་ཞིབ་སྐོར་སྐྱོད།

བོད་ཀྱི་གསར་འགོད་མཐུན་ཚོགས་ཀྱི་ཚོགས་མི་བཅུ་གཅིག་གིས་གྲུབ་པའི་ཚོགས་ཆུང་ཞིག ཉིན་འདི་འགར་རྒྱ་གར་ལྡི་ལིར་རྟེན་གཞི་བྱས་པའི་རྒྱལ་སྤྱི་དང་རྒྱ་གར་གྱི་གསར་ལམ་ཆེ་ཁག་འགར་སྐོར་སྐྱོད་རྟོགས་ཞིབ་བྱེད་ཀྱིན་ཡོད།

རྒྱ་གར་ངྷ་རམ་ས་ལར་རྟེན་གཞི་བྱས་པའི་བོད་ཀྱི་གསར་འགོད་པའི་མཐུན་ཚོགས་ཀྱི་གོ་སྒྲིག་འོག ཕྱི་ཚེས་ ༡༣ ཉིན་ནས་ ༡༥ བར་ཉིན་གསུམ་རིང་ངྷ་རམ་ས་ལ་གཙོས་པའི་རྒྱལ་ས་ལྡི་ལི་དང་བལ་ཡུལ་བཅས་ནས་ཕེབས་པའི་ཨེ་ཤ་ཡ་རང་དབང་རླུང་འཕྲིན་ཁང་དང་ནོར་ཝེ་བོད་ཀྱི་རླུང་འཕྲིན་ཁང་། བོད་ཀྱི་དུས་བབ་གསར་ཁང་། བོད་ཀྱི་ཆ་འཕྲིན་ལྟེ་གནས། ཕ་ཡུལ་དབྱིན་ཡིག་དྲ་བ་བཅས་ཀྱི་རྩོམ་སྒྲིག་པ་དང་གསར་འགོད་པ་བཅུ་གཉིས་ལས་གྲུབ་པའི་ཚོགས་ཆུང་ཞིག རྒྱ་གར་རྒྱལ་ས་ལྡི་ལིའི་རྒྱལ་སྤྱི་དང་རྒྱ་གར་གྱི་གསར་ལམ་ཆེ་ཁག་གི་དབུས་དང་ཡན་ལག་ལས་ཁུངས་བཅས་སུ་སྐོར་སྐྱོད་རྟོགས་ཞིབ་ཏུ་སྐྱོད་ཀྱིན་པ་དང་། ཁ་སང་ཕྱི་ཚེས་ ༡༣ ཉིན་གྱི་ཉིན་རྒྱབ་རྒྱ་གར་གྱི་ཧིན་རྡི་དུས་བབ་ Hindustan times གསར་ཤོག་གི་གྲོང་ཁྱེར་ཚན་པའི་རྩོམ་སྒྲིག་པ་བོད་རིགས་བུ་མོ་བསྟན་འཛིན་སྣང་གསལ་ལགས་དང་། རྒྱ་གར་ཆ་འཕྲིན་ Indian Express གསར་ཤོག་གི་པར་པ་བོད་རིགས་བཀྲ་ཤིས་སྟོབས་རྒྱལ་ལགས། དེ་བཞིན་རྒྱ་གར་དུས་བབ་ Times of India དང་། ཨེ་པེ་བརྙན་འཕྲིན་ཁང་ AP Television བཅས་ཀྱི་གསར་འགོད་པ་དང་རྩོམ་སྒྲིག་པ་ཁག་ཅིག་དང་ལྷན་དུ་གསར་འགྱུར་ལས་རིགས་ཐོག་བགྲོ་གླེང་གནང་ཡོད། 

ཉིན་དེའི་ཕྱི་དྲོའི་ཆུ་ཚོད་ ༥ པའི་སྟེང་། རྒྱ་གར་བརྙན་འཕྲིན་ NDTV གསར་ཁང་བསྙན་འཕྲིན་སྒྲིག་སྦྱོར་བ་བོད་རིགས་ན་གཞོན་བསོད་ཚེ་ལགས་ཀྱི་སྣེ་ཤན་འོག རྒྱ་གར་བརྙན་འཕྲིན་ NDTV གསར་ཁང་དབུས་དོ་དམ་ཁང་དུ་རྟོགས་ཞིབ་བྱས་ཡོད་ལ། སྐབས་དེར་བསོད་ཚེ་ལགས་ཀྱིས་གསར་ཁང་དེ་གའི་སྤྱི་ཡོངས་ཀྱི་གནས་སྟངས་དང་། ཉིན་རེའི་ལས་ཀ་བྱེད་སྟངས། གསར་འགྱུར་སྒྲིག་བཟོ་དང་ཐད་གཏོང་བྱེད་ཕྱོགས་སོགས་ངོ་སྤྲོད་གནང་བྱུང་། ཐེངས་འདིའི་གསར་འགོད་མཐུན་ཚོགས་ཀྱི་རྟོགས་ཞིབ་སྐོར་སྐྱོད་སྐབས། འཛམ་གླིང་གི་གསར་འགྱུར་ཆེ་ཁག་ BBC དང་ CNN.  AP སོགས་དང་། རྒྱ་གར་བརྙན་འཕྲིན་ NDTV དང་། རྒྱ་གར་ཆ་འཕྲིན་ Indain express  ཧིན་ངྷིའི་དུས་བབ་ Hindustan Times སོགས་སུ་སྐོར་སྐྱོད་རྟོགས་ཞིབ་ཀྱིས་གསར་ཁང་དེ་དག་གི་ཉིན་རེའི་ལས་ཀ་བྱེད་སྟངས་དང་། གསར་ཁང་གི་སྒྲིག་འཛུགས་དང་ངོ་བོ། གསར་འགྱུར་སྒྲིག་སྦྱོར་བྱེད་སྟངས་སོགས་ལ་རྒྱུས་ལོན་བྱེད་ཀྱིན་ཡོད་པ་དང་། དེ་རིང་ཕྱི་ཚེས་ ༡༤ ཉིན་གྱི་སྔ་དྲོ་ CNN གསར་ཁང་དུ་བཅར་ཏེ། བོད་ནང་གི་སྐྱེ་རྒུ་མདོར་ས་ཡོམ་གྱི་དོན་རྐྱེན་བྱུང་སྟེ། མི་ཤི་རྨས་བྱུང་བའི་གྲངས་ཚད་ཐད་གསལ་གསལ་བཤད་དང་གནས་ཚུལ་བརྗེ་ལེན་བྱས་ཡོད།

ཐེངས་འདིའི་སྐོར་སྐྱོད་རྟོགས་ཞིབ་མ་བྱས་པའི་སྔོན་ཏེ། ཕྱི་ཚེས་ ༡༡ ཉིན་ངྷ་ས་བོད་ཀྱི་གསོལ་མགྲོན་ཁང་དུ་གསར་འགོད་མཐུན་ཚོགས་ཀྱི་ཚོགས་མི་དང་། གསར་ཁང་ཁག་ཅིག་གི་གསར་འགོད་པ་སུམ་ཅུ་ཡས་མས་ཤིག་ལ་ཉིན་གཅིག་རིང་གསར་འགྱུར་རིག་པའི་སྐོར་ལ་ཟབ་སྦྱོང་ཞིག་ཀྱང་སྤྲད་ཡོད་པ་རེད།

ཐེངས་འདིའི་སྐོར་སྐྱོད་ཐད་འདི་གའི་གསར་འགོད་པས་གསར་འགོད་མཐུན་ཚོགས་ཀྱི་ཚོགས་གཙོ་བཀྲ་ཤིས་དབང་ཕྱུག་ལགས་སུ་བཀའ་འདྲི་ཞུས་པར་ཁོང་གིས་གསུངས་དོན། ནམ་རྒྱུན་ང་ཚོས་གསར་འགོད་པ་ཚོར་ཟབ་སྦྱོང་མང་བོ་སྤྲད་ཚར་བ་རེད། མུ་མཐུད་ཟབ་སྦྱོང་སྤྲད་བསྡད་ན་ལས་རིམ་དེ་ནི་ཡང་དང་རིམ་པར་བསྐྱར་སྐོར་རྒྱག་བཞིན་པ་ཞིག་དང་། གསར་འགོད་པའི་ལྟ་སྤྱོད་དང་ཚུལ་ཁྲིམས་སྲུང་ཕྱོགས་ཚང་མ་ཤེས་ཀྱི་ཡོད་སྟབས། དམིགས་བསལ་གྱི་ཕན་ཐོགས་ཡོད་པ་ཞིག་ལ་མཐོང་གི་མེད། དེར་བརྟེན་ངྷ་སར་ཉིན་གཅིག་རིང་གསར་འགོད་པ་ཚོར་གསར་འགྱུར་རིག་པའི་སྐོར་ལ་སྦྱོང་བརྡར་ཞིག་སྤྲད་པ་དང་། དེ་ལ་གསར་འགྱུར་རང་དབང་ཆ་ཚང་ཡོད་པའི་རྒྱ་གར་གྱི་གསར་ཁང་ཁག་གིས་གསར་འགྱུར་གྱི་ལས་ཀ་གང་འདྲ་བྱེད་ཀྱིན་ཡོད་མེད་དང་། རྒྱལ་སྤྱིའི་གསར་ཁང་ཆེ་ཁག་གི་ལས་ཀ་བྱེད་ཕྱོགས་དངོས་སུ་མཐོང་ན། གསར་འགོད་པ་ཚོས་སྔར་དང་མི་འདྲ་བའི་མིག་ཆེན་པོ་ཞིག་འབྱེད་ཐུབ་ཀྱི་རེད་སྙམ་སྟེ། ཐེངས་འདིའི་ཉིན་གསུམ་རིང་གི་སྐོར་སྐྱོད་རྟོགས་ཞིབ་འདི་གོ་སྒྲིག་བྱས་པ་ཡིན། སྤྱིར་སྔོན་མ་ནས་བོད་པའི་གསར་འགོད་མཐུན་ཚོགས་ཀྱི་ངོས་ནས་བོད་པའི་གསར་འགོད་པ་ཚོར་གསར་འགྱུར་ལས་རིགས་ཐད་ལས་འགུལ་མང་པོ་ཞིག་སྤེལ་གྱིན་ཡོད་ནའང་། ལྟ་སྐོར་འདི་ལྟ་བུ་ཞིག་བྱེད་ཐུབ་ན་ཚོགས་མི་ཚོར་དམིགས་བསལ་གྱིས་ཕན་ཐོགས་ཤིག་འབྱུང་གི་རེད་སྙམ་སྟེ། ཐེངས་འདིར་བཞུགས་སྒར་ངྷ་རམ་ས་ལ་གཙོས་པའི་བལ་ཡུལ་དང་ལྡི་ལི་བཅས་ཀྱི་བོད་པའི་གསར་འགོད་པ་དང་རྩོམ་སྒྲིག་པ་ཁག་ཅིག རྒྱ་གར་རྒྱལ་ས་ལྡི་ལིའི་རྒྱལ་སྤྱི་དང་རྒྱ་གར་རྒྱལ་ནང་གི་གསར་ལམ་ཆེ་ཁག་ཏུ་སྐོར་སྐྱོད་རྟོགས་ཞིབ་གོ་སྒྲིག་བྱས་པ་ཡིན། ཞེས་གསུངས་སོང་།