བོད་སྐད་དང་བོད་ཡིག་མ་ཤེས་ན་བོད་མིན།

བོད་སྐད་དང་བོད་ཡིག་མ་ཤེས་ན་བོད་མི་མ་ཡིན་པར་འགྱུར་ན་ཧ་ཅང་ཐལ་ཏེ།
གདངས་ནུབ་སྐྱེས་མ་ཐག་པའི་བོད་ཕྲུག་རྣམས་བོད་མི་མ་ཡིན་པར་འགྱུར་བའི་ཕྱིར།།

མཁྱེན་ཡངས་བོད་ཤ་ཁྲག་རུས་གསུམ་ལགས། ངས་ཁྱེད་ཀྱི་རྩོམ་བྱང་དེ་མཐོང་མ་ཐག་ཁྱེད་ཀྱི་རྩོམ་ཡིག་དེར་བལྟ་འདོད་ཀྱི་འདུན་པ་ཆེན་པོ་ཞིག་སྐྱེས་སོང་། དེར་བརྟེན་ངས་རྩོམ་ཡིག་དེ་བཀླགས་པ་ཡིན། ཉིད་ཀྱི་རྩོམ་ཡིག་དེ་ཀློག་པའི་བརྒྱུད་རིམ་ཁྲོད་རང་རིགས་རྣམས་ཀྱི་ཁྲོད་རིགས་ཞེན་གྱི་སྐྱེོ་བོ་ཁྱེད་འདྲ་བོ་མང་ཙམ་ཡོད་ན་ཅི་མ་རུང་སྙམ་པའི་ཚོར་བ་ཞིག་ཀྱང་བསྟེར་བྱུང་། དེ་ནི་ངས་ཁྱེད་ཀྱི་བརྩོམ་ཡིག་དེ་ཐེངས་དང་པོ་ཀློག་པའི་སྐབས་ཀྱི་ཚོར་འདུ་དེ་རེད། དེ་རྗེས་ངས་རྩོམ་ཡིག་དེ་སླར་ཡང་ཐེངས་གཅིག་བཀླགས་པ་ཡིན། སྐབས་དེར་ང་ལ་མྱོང་ཚོར་མི་འདྲ་བ་ཞིག་བྱུང་། དེ་ཡང་ཁྱེད་ཀྱིས་གནད་དོན་དེའི་ཐད་ཕྱོགས་ཡོངས་ལ་དགོངས་པ་དེ་ཙམ་མ་བཞེས་པར་སེམས་ཚོར་དྲག་པོའི་སྒོ་ནས་བྲིས་པའི་མྱོང་ཚོར་ཞིག་ཕྲན་ལ་སྦྱིན་བྱུང་། འོན་ཀྱང་མྱོང་ཚོར་ནི་མྱོང་ཚོར་རང་ཡིན་སྟབས་མཐའ་གཅིག་ཏུ་དེ་ལྟར་ཡིན་པའི་ངེས་པ་མེད། དེས་ན་གལ་ཏེ་ཕྲན་གྱིས་གོ་ནོར་ཐེབས་ཡོད་ན་དགོངས་འགལ་མེད་པ་ཞུ། གཤམ་དུ་གུས་པས་རང་ཉིད་ཀྱིས་སྐུ་ཉིད་ཀྱིས་གསུངས་པའི་གནད་དོན་དེ་དང་འབྲེལ་བའི་སྐོར་ལ་མདོ་ཙམ་བརྗོད་འདོད་པར་འདོད། གུས་པའི་བསམ་པར། ང་ཚོས་བོད་སྐད་དང་བོད་ཡིག་མ་ཤེས་ན་བོད་པ་ཡིན་མིན་གྱི་གནད་དོན་དེར་ལག་པ་མ་འཆང་གོང་ནས་གང་འདྲ་ཞིག་ལ་མི་རིགས་གཅིག་པ་ཟེར་མིན་གྱི་གནད་དོན་དེར་བསམ་གཞིགས་བྱེད་དགོས་པར་སེམས། ང་ཚོས་མི་རིགས་གཅིག་པ་ཞེས་པའི་གོ་དོན་དེ་གསལ་རྟོགས་ཐུབ་ཚེ་གཞི་ནས་གོང་གི་སྐུ་ཉིད་ཀྱིས་གསུངས་པའི་གནད་དོན་དེར་བརྩོད་གླེང་བྱས་ན་གནད་དོན་དེར་ངོས་འཛིན་བྱེད་སྟངས་རང་བཞིན་གྱིས་ལས་སླ་རུ་འགྲོ་ངེས་ཡིན། གུས་པའི་རྨོངས་ཚོད་ལ་མི་རིགས་གཅིག་པ་ཟེར་བ་ནི་ཐུན་མོང་གི་རིགས་རྒྱུད་དང་། ལོ་རྒྱུས། སྐད་ཡིག རིགས་གཞུང་། ཡུལ་སྲོལ་སོགས་ཡོད་མཁན་ཞིག་ལ་གོ་དགོས་སྙམ།དེ་ལྟར་ཡིན་ཚེ་བོད་སྐད་དང་བོད་རིགས་མི་ཤེས་མཁན་དེ་དག་ཀྱང་བོད་རིགས་ཡིན་པར་ཁས་ལེན་དགོས་པར་སེམས། གང་ཡིན་ཟེར་ན་ཁོང་ཚོའི་ལུས་སྟེང་དུ་མིའུ་གདུང་དྲུག་དང་བཙན་པོའི་ཁྲག་རྒྱུན་འདྲེས་ཡོད་པ་རེད། དེ་ནི་ང་ཚོས་ངེས་པར་དུ་ཁས་ལེན་བྱེད་དགོས་པའི་དོན་དངོས་ཤིག་ཡིན། དེ་ཡང་དཔེ་མཚོན་ཞིག་བཀོད་ནས་བརྗོད་ན། གལ་སྲིད་སྐུ་ཉིད་ཀྱི་བུས་བོད་སྐད་དང་བོད་ཡིག་མ་ཤེས་པ་ཡིན་ན་ཁྱེད་ཀྱིས་རང་ཉིད་ཀྱི་བུ་དེ་རང་ཉིད་ཀྱི་བུ་ཡིན་པར་ཁས་ལེན་གྱི་མིན་ནམ། གང་ཡིན་ཟེར་ན་ཁྱེད་རང་ལྷད་མེད་པའི་བོད་རིགས་གཙང་མ་ཞིག་རེད། འོན་ཀྱང་ཁྱེད་ཀྱི་གསུང་སྟངས་ལ་གཞིགས་ན་ཁྱེད་ཀྱི་བུ་དེ་ཁྱེད་ཀྱི་བུ་ཡིན་པར་ཁས་ལེན་ཐབས་མེད་པ་རེད། གང་ཡིན་ཟེར་ན་བུ་དེས་བོད་སྐད་དང་བོད་ཡིག་མ་ཤེས་པས་བོད་པ་མིན་པའི་ཕྱིར། ཁྱེད་རང་ངོས་ནས་བརྗོད་ན་དེ་ནི་ནམ་ཡང་དང་ལེན་བྱེད་འདོད་མེད་པའི་དོན་དངོས་ཤིག་རེད། གང་ཡིན་ཟེར་ན་ཁྱེད་དང་བུ་གཉིས་དབར་ཁྲག་རྒྱུད་ཀྱི་འབྲེལ་བ་ཡོད་ལ་ཕ་བུའི་བརྩེ་སེམས་ཀྱང་ཡོད་པ་རེད། འོན་ཀྱང་བོད་ཀྱི་སྐད་ཡིག་མི་ཤེས་མཁན་རྣམས་བོད་པ་ཆ་ཚང་བ་ཞིག་རེད་ཟེར་ན་གཏན་ནས་མ་རེད། མཐར་གཏུགས་ནས་བཤད་ན།རིགས་གཞུང་ཞེས་པ་དེ་བསམ་བློའི་ཁྱེར་བཟོའི་ཐོག་ནས་བཞག་ན་མི་འགྲིག་པ་གང་ཡང་མེད་པར་སེམས། མི་རིགས་རང་ག་བ་ཞིག་ལ་ཐུན་མོང་གི་བསམ་བློའི་ཁྱེར་སྟངས་ཤིག་ཡོད་པ་རེད། ཐུན་མོང་གི་བསམ་བློའི་ཁྱེར་སྟངས་དེ་མི་རིགས་དེའི་སྐད་དང་རིགས་གཞུང་གི་རྒྱབ་བརྟེན་ལ་བརྟེན་ནས་གྲུབ་པ་རེད།བོད་སྐད་དང་བོད་ཡིག་མི་ཤེས་ཀྱི་བོད་རིགས་རྣམས་དང་ང་ཚོའི་དབར་བསམ་བློའི་ཁྱེར་ཕྱོགས་ཐད་ཁྱད་པར་ཆེན་པོ་ཡོད་པ་རེད། འོན་ཀྱང་བོད་ཀྱི་སྐད་ཡིག་མི་ཤེས་མཁན་གྱི་སྤུན་ཟླའི་ཟུངས་ཁྲག་རྣམས་དང་ང་ཚོོའི་ཟུངས་ཁྲག་འདྲེས་ཡོད་པ་དེ་དོན་དངོས་རེད། རྒྱུ་མཚན་དེ་ལ་བརྟེན་ནས་སྤུན་ཟླ་དེ་རིགས་མི་ཉུང་བ་ཞིག་གིས་རང་ཉིད་ཀྱིས་བོད་ཀྱི་སྐད་ཡིག་མི་ཤེས་ཀྱང་རང་ཉིད་ཀྱི་ཁྲག་རྩའི་ནང་བོད་རིགས་ཀྱི་ཁྲག་རྒྱུན་བཞུར་གྱི་ཡོད་པ་ངོས་འཛིན་གསལ་པོ་བྱས་ཏེ་སྐྱོ་གར་གྱི་གཙེས་པའི་ང་ཚོའི་མི་རིགས་འདིའི་ཆེད་རང་ཉིད་ཀྱི་ནུས་ཚོད་ལ་དཔག་པའི་ལེགས་སྐྱེས་འབུལ་བཞིནཡོད་པ་རེད། དེ་ནི་བདག་གིས་བོད་ཀྱི་སྐད་ཡིག་མི་ཤེས་མཁན་གྱི་བོད་རིགས་དེ་རིགས་བོད་པ་ཡིན་པ་གང་ཞིག་ལ་བོད་པ་ཆ་ཚང་བ་ཞིག་མ་རེད་ཞེས་བརྗོད་པའི་སྒྲུབ་བྱེད་ངོ་མ་དེ་ཡིན། མཐར་བདག་གིས་སྐུ་ཉིད་ཀྱི་དགོངས་པར་གོ་ནོར་ཐེབས་ཡོད་ན་དགོངས་སེལ་ཡོད་པ་ཞུ།

བྱ་གཞུང་གངས་རིའི་གླིང་བུ་ལགས། ཉིད་ཀྱི་གསལ་བརྡ་དེ་མཐོང་སོང་། བཀའ་དྲིན་ཆེ།

ཇིང་སྲས་མིག་གསུམ་པ་ལགས། ཕ་མ་དག་ལ་དངོས་ནས་འགན་འཁུར་ཆེན་པོ་ཡོད་པ་དེ་ནི་དངོས་ནས་བདེན་པ་ཡིན། ཕ་མ་དེ་རིགས་ཀྱི་ནད་ཚ་དེ་ཡང་རང་བཞིན་གྱིས་སླེབས་པ་ཞིག་མིན། རང་སྐད་དང་རང་གི་ཡི་གེ་ལ་དོན་སྣང་མི་ཡོང་བའི་ནད་ཚ་དེ་ཡི་འབྱུང་གནས་ལ་ད་ལྟ་ང་ཚོ་དངོས་སུ་ནག་ཐོག་ཚ་འདེད་བྱེད་དགོས་ཀྱི་ཡོད་པ་རེད། དེ་ཡིན་དུས་བདག་གིས་ཆེད་དུ་བོད་ཀྱི་སྐད་དང་བོད་ཀྱི་ཡི་གེ་མི་ཤེས་པའི་སྐྱེ་བ་བོད་ལ་སྐྱེ་བའི་མི་དེ་དག་ནི་བོད་མི་ཡིན་པར་ངེས་འཛིན་བྱེད་ཐུབ་ཀྱི་མི་འདུག་ཟེར་ནས་ཞུ་བཞིན་ཡོད་ལགས། ང་ཚོའི་རང་གི་མི་རིགས་འདི་ཉིད་ལ་ཤ་ཚ་ཡོད་པ་དང་ལར་ཞེན་ཡོད་པ་བདེན་པ་ཡིན་ན། ཐོག་མར་རང་གི་སྐད་དང་ཡི་གེ་མ་ཤེས་པར་ལར་ཞེན་སྲུང་སྐྱོབས་བྱེད་སྟངས་ཤིག་མེད། དཔལ་འབྱོར་དར་རྒྱས་ཀྱི་སྐོར་ཁོ་ནའི་འགྲིག་གི་ཡོད་པར་འདོད་མཁན་དག་ལ། མི་རིགས་ཟེར་བ་དེ་ཡོད་མེད་ལ་བསམ་བློ་ཞེ་དྲགས་གཏོང་འདོད་མེད་པའི་ནད་ངན་ཞིག་བྱུང་ཡོད་པ་རེད། དེ་ཡིན་དུས་དེ་ཡི་རིགས་ཀྱིས་རང་གི་སྐད་ཡིག་གི་གོང་ཚད་ནི་རང་གི་ཁྱིམ་དང་བཟའ་མི་ལས་ཀྱང་གོང་ཆེན་པོ་ཡིན་པ་ཤེས་ཀྱི་མེད་པ་རེད།

བཟོད་པ་ལྷ་རྩེ་ལགས། ཉིད་ཀྱིས་བསམ་ཚུལ་གསུངས་པ་དེར་ཐུགས་རྗེ་ཆེ། དངོས་ནས་འདྲ་བོ་ཞིག་འདུག བོད་མིའི་རིགས་སུ་སྐྱེ་བའི་བོད་སྐད་དང་བོད་ཡིག་མི་ཤེས་པའི་རིགས་དེ་ལ་ཕྱི་རྒྱལ་བོད་མིའི་རོགས་ཚོགས་ཞེས་བཏགས་ན་དངོས་ནས་འཚམ་པོ་འདུག དེ་མིན་པའི་བོད་སྐད་དང་བོད་ཡིག་མ་ཤེས་ན་བོད་མིན་ཟེར་བ་དེར་ངས་དུས་ཡུན་རིང་བོར་བསམ་བློ་བཏང་བ་ཞིག་ཡིན་ལགས།

བོད། ཤ་ཁྲག་རུས་གསུམ་ལགས་ང་ཁྱེད་ཀྱི་ཟིན་བྲིས་ནང་འཆམ་འཆམ་ལ་གཅིག་ཡོང་བས་བོད་སྐད་དང་བོད་ཡིག་མ་ཤེས་ན་བོད་མི་མ་རེད་ཟེར་བའི་དཔྱད་རྩོམ་མམ་བསམ་ཚུལ་དེར་ཅུང་འགརཆེ་བའི་རྣམ་པ་ཞིག་མཐོང༌། དེ་ན་བོད་སྐད་དང་བོད་ཡིག་གང་ཡང་མི་ཤེས་པའི་རང་རིགས་ཚ་བོ་ཚ་མོ་བོད་དོན་ཐོག་ལ་ལས་འགུལ་སྣ་ཚོགས་སྤེལ་དང་སྤེལ་བཞིན་པ་རྣམས་ཕྱི་རྒྱལ་གྱི་རོགས་ཚོགས་མི་སྣ་ཞིག་ཏུ་འགྲེལ་བརྗོད་བྱས་ན་ག་ལ་འགྲིག་སྙམ། དེའི་ཕྱིར་བོད་སྐད་དང་བོད་ཡིག་མི་ཤེས་པ་བོད་ཀྱི་རིགས་ཞེན་མེད་ན་བོད་པ་མིན་གསུང་ན་ཧ་ཅང་ལེགས་སྙམ་པ་ད་དུང་དཔྱད་པ་འཚལ།

ཇིང་སྲས་མིག་གསུམ་པ་ལགས། བོད་ལྭ་གྱོན་མིན་དེ་ནི་དེ་འདྲའི་གལ་ཆེན་པོ་ཞིག་ཆགས་མི་འདུག ཡིན་ཡང་། དེ་ནི་གྱོན་གོས་ཀྱི་ཐད་ནས་བཤད་པ་ཡིན་ན་བོད་པའི་བོད་ལྭ་གྱོན་རྒྱུ་དེ་ནི་དངོས་ནས་དགེ་མཚན་ལྡན་པ་ཞིག་རེད་ལགས། ཉིད་ལ་བདག་གི་བསམ་ཚུལ་འདིའི་ཐད་དུ་བསམ་ཚུལ་ཐད་ཀར་དུ་གསུང་རྒྱུ་འདྲ་མེད་དམ་ལགས།

གནམ་ལྕགས་ལགས། ངས་འདིའི་སྐོར་ལ་བསམ་བློ་མང་བོ་ཞིག་བཏང་བ་ཡིན། དེ་ཡི་སྟབས་ཀྱིས་བདག་གིས་སེམས་ཐག་གཅོད་པོའི་སྒོ་ནས་དེ་ལྟར་བཤད་པ་ཡིན། ཉིད་ལ་དེ་ཡི་སྐོར་ལ་བསམ་ཚུལ་མི་མཐུན་པ་གང་ཡོད་ན་གསུང་ན་དགའ་བསུ་ཡོད་ལགས།

བོད་སྐད་མི་ཤེས་པའི་བོད་པ།
སྐྱབས་འགྲོ་མི་ཤེས་པའི་ནང་པ།
ཆབ་སྲིད་མི་ཤེས་པའི་སྤྱི་འཐུས།
འདིར་གསུམ་སྡུག་གི་གཞི་རྩ་རེད།

བོད་ཡིག་འདི་བཙན་བྱོལ་གཞུང་གི་གཞུང་ཡིག་ཡིན་ནམ། གཞུང་གི་ལས་ཁུངས་རྣམས་ཀྱི་ནང་དུ་བོད་ཡིག་གི་སྙན་ཞུ་ཙམ་ཡང་འགྲོ་སར་མི་འདུག་ཟེར་བ་འདི་ཚོ་བདེན་པར་ཡིན་ནམ།