བསྔོ་སྨོན་མཆོད་འབུལ།

རྫོང་སར་བཤད་གྲྭའི་མཁན་པོ་ཚེ་བཀྲ་ལགས་ཀྱིས་འདི་གར་གནས་ཚུལ་བཏང་འབྱོར་བྱུང་བ་ལྟར་ན། རྫོང་སར་བཤད་གྲྭ་ཆོས་ཀྱི་བློ་གྲོས་ཀྱི་ངོས་ནས་བོད་ནང་གི་ས་ཡོམ་གྱིས་གནོད་འཚེ་ཕོག་པའི་མི་མང་རྣམས་ཀྱི་ཆེད་དུ་དུང་སེམས་མཉམ་སྐྱེད་ཀྱི་ལས་འགུལ་ཞིག་སྤེལ་བའི་དབུ་བཞུགས་ཚོགས་མགོན་དཔལ་ས་སྐྱའི་ཕུན་ཚོགས་ཕོ་བྲང་གི་གདུང་སྲས་སྐྱབས་རྗེ་ཨ་བྷི་ཀྲི་ཏི་རིན་པོ་ཆེ་དང་། བཤད་གྲྭའི་དགེ་སློབ་ཐུན་མོང་བཅས་ནས་ཐུགས་གསོའི་འཚམས་འཕྲིན་ཀྱང་གནང་འདུག

ཕྱི་ཟླ་བ་བཞི་པའི་ཚེས་ ༡༦ ཉིན་ཧྲིལ་བོར་རྫོང་སར་བཤད་གྲྭའི་འདུས་སློབ་ཡོངས་ནས་ཀུན་རིག་རྣམ་པར་སྣང་མཛད་ཀྱི་ངན་སོང་སྦྱོང་བའི་ཆོ་གས་བསྔོ་སྨོན་གནང་བ་དང་། ཁྱད་པར་དུ་དགོང་དྲོའི་ཆུ་ཚོད་དྲུག་པ་ནས་དབུ་འཛུགས་ཐོག་རྫོང་སར་བཤད་གྲྭའི་མཁན་སློབ་འདུས་པ་ཡོངས་དང་སུ་ཇ་སློབ་གྲྭ་དང་དེ་མིན་ཅོན་ཏ་ར་བོད་ཕྲུག་ཁྱིམ་སྡེ། སམྦོ་ཊ་སློབ་གྲྭ་སོགས་ཀྱི་སློབ་ཕྲུག་ཁག ཉེ་འཁོར་བྷིར་དང་ཅོན་ཏ་ར་གཉིས་ཀྱི་སྡེ་དགེ་དང་ནང་ཆེན་གྱི་གཞིས་ཆགས་ཁག་གི་གཞིས་མི་བཅས་བཤད་གྲྭའི་གཙུག་ལག་ཁང་གི་མདུན་ཐང་དུ་མཉམ་འཛོམས་ཐོག བཤད་གྲྭར་ཆོས་བཞུགས་སློབ་གཉེར་མཛད་བཞིན་པའི་དཔལ་ལྡན་ས་སྐྱའི་གདུང་སྲས་སྐྱབས་རྗེ་ཨ་བྷེ་རིན་པོ་ཆེས་མཆོག་གིས་སྐུ་པར་མཐོང་གྲོལ་རིན་པོ་ཆེའི་མདུན་དུ་སྣང་གསལ་མར་མེ་སྒྲོན་གནང་མཛད་དེ། ཚང་མས་ཚད་མེད་ཡོན་ཏན་དང་རྒྱལ་བའི་ཞབས་བརྟན་གསུངས་མཐར་ངག་བསྡམས་གུས་འདུད་སྐར་མ་གཅིག་གི་རྗེས་རྫ་ཚེ་རིང་བཀྲ་ཤིས་ནས་ས་ཡོམ་གྱི་གནས་བབས་ལ་སྐོར་གྱི་སྙན་སྒྲོན་གཏམ་བཤད་ཞུས་ཤིང་། བོད་ནང་གི་གྲྭ་བཙུན་གཙོ་བོར་གྱུར་པའི་བོད་རིགས་ཡོངས་ཀྱིས་རོགས་སྐྱོར་གནང་བཞིན་པའི་སྐོར་དང་། ཁྱད་པར་དུ། རྒྱ་ནག་གིས་སྐབས་འདིའི་གོད་ཆག་བོད་མིའི་སེམས་པ་འགུག་པའི་གོ་སྐབས་སུ་བེད་སྤྱོད་བྱ་ངེས་ཡིིན་པ་དང་། དེ་བཞིན་འདས་པའི་དུས་ཀྱི་ཐེ་ཝན་གྱི་ས་ཡོམ་དང་ལུང་དགུའི་ས་ཡོམ་སོགས་ཕྱོགས་སོ་སོའི་འཐབ་ཕྱོགས་གཅིག་གྱུར་གྱི་མཐུན་ཕྱོགས་སུ་བེད་སྤྱོད་བྱས་པ་ལྟར་ང་ཚོའི་ངོས་ནས་ཀྱང་ངེས་པར་དུ་ས་ཡོམ་འདི་བོད་ཕྱི་ནང་གཉིས་དང་ཆོལ་ཁ་གསུམ་སྔར་ལས་ལྷག་པའི་གཅིག་སེམས་གཅིག་དང་གཅིག་རྒྱབ་གཅིག་ལངས་ཀྱི་ངོ་བོ་གསལ་སྟོན་བྱེད་པའི་གོ་སྐབས་སུ་བེད་སྤྱོད་དགོས་པའི་རེ་བ་བཏོན།

དེ་རྗེས་ཁག་སོ་སོའི་འཛིན་གྲྭ་ཁག་གི་སློབ་ཕྲུག་མང་པོས་བོད་དབྱིན་སྐད་རིགས་གཉིས་ཀྱི་ཐོག་ནས་མྱ་ངན་ཞུ་ཚིག་གི་སྙན་ངག་དང་རྩོམ་ཡིག་བཅུ་ཕྲག་ལྷག་ཅིག་གྱེར་འདོན་གནང་། དེ་ནས་མཁན་པོ་ཆོས་དབྱིངས་རྡོ་རྗེ་མཆོག་ནས་འཕགས་ཡུལ་རྫོང་སར་བཤད་གྲྭས་གནོད་འཚེ་ཕོག་པའི་འདས་གསོན་ཡོངས་ལ་ཕུལ་བའི་འཚམས་འཕྲིན་སྒྲོགས་སྦྱང་གནང་དོན། ཁྱེད་ཅག་གི་ཉེ་འཁོར་ན་ཡོད་པའི་དགེ་འདུན་པ་གཙོས་པའི་མི་མང་ཤིན་ཏུ་མང་པོ་དག་གིས་མ་བསྐུལ་དང་བླངས་ཀྱིས་ཉེན་སྐྱོབ་ཀྱི་བྱ་བ་བསྒྲུབས་ཤིང་ཆོལ་ཁ་གསུམ་དང་། གཞི་བྱེས་གཉིས་ཀྱིས་མཚོན་པའི་སྤུན་ཟླ་ཡོངས་ཐེངས་འདིའི་ཡ་ང་བའི་གོད་ཆག་ལ་ཚད་མཐོའི་གདུང་སེམས་མཚོན་པའི་ཉམས་ཞུགས་གནང་རྒྱུ་ཡིན་པའི་མངོན་རྟགས་བཟང་བོ་ཤར་བ་འདིས། ང་ཚོས་དཀའ་ངལ་གྱི་ཁྲོད་ནས་རིན་ཐང་གཞན་ཞིག་དང་འདུ་ཤེས་གཞན་ཞིག་རྙེད་མགོ་བརྩམས་པར་བརྗོད་ཆོག་ཅིང། འདིས་ནི་ང་ཚོ་རྩ་བས་འགྲོ་བ་མིའི་རིགས་ཀྱི་ཕན་ཚུན་རོགས་རེས་ཀྱི་བཟང་སྤྱོད་མཚོན་པ་ཙམ་མ་ཟད། དེ་བས་ཀྱང་སྤུན་ཟླ་གངས་ཅན་པའི་སྐྱིད་སྡུག་མཉམ་མྱོང་གི་འགྱུར་བ་མེད་པའི་སྙིང་སྟོབས་དང་རླབས་ཆེན་གྱི་རང་བཞིན་མཚོན་ཡོད། ཅེས་དང་། ཚར་བའི་ལས་ལ་བྱ་བའི་ཐབས་མེད་པའི་དྲན་ཤེས་དང་བཅས་བཟོད་བསྒོམས་ཆེན་པོ་གནང་བ་དང་ཆབ་གཅིག བླ་མ་དཀོན་མཆོག་ལ་གསོལ་བ་འདེབས་ཤིང་རང་གི་སྔོན་གསགས་ལས་ངན་སྦྱོང་བའི་ཐབས་སུ་བསམ་སྟེ་ཆོས་ཀྱི་བློ་སྦྱོང་གང་ལེགས་གནང་རྒྱུ་དང་། དེ་མིན་མྱུར་སྐྱོབ་དང་སྒར་གཞིས་གསར་འཛུགས་སོགས་ཀྱི་ལས་དོན་མཐའ་ དག་ལྷོད་གཡེངས་མེད་པར་ཕན་ཚུན་རོགས་རེས་ཀྱི་ཐོག་ནས་འབད་བརྩོན་གནང་གལ། ཞེས་བཀོད་འདུག

དེའི་རྗེས་དཔལ་ལྡན་ས་སྐྱའི་གདུང་སྲས་ཨ་བྷི་རིན་པོ་ཆེ་མཆོག་ནས་ཐུགས་གསོའི་བཀའ་སློབ་འཚམས་འཕྲིན་དང་འབྲེལ་བསྔོ་སྨོན་མཚམས་སྦྱོར་གནང་ཞིང་། དེ་ཡང་སྐྱབས་རྗེ་གདུང་སྲས་མཆོག་གིས་བཀའ་སློབ་བསྩལ་དོན། སོ་སོའི་སྙིང་དང་འདྲ་བའི་ཕ་མ་བུ་རྒྱུད་མིང་སྲིང་རྣམས་འདས་གྲོང་ཤོར་བ་དང་། ཚེ་གང་ལ་བསགས་པའི་རྒྱུ་ནོར། དེ་བཞིན་འདི་ཕྱིའི་རེ་ལྟོས་འཆའ་ཡུལ་གྱི་དགོན་པ་གྲྭ་ཚང་སོགས་ཡོངས་རྫོགས་རང་བྱུང་འབྱུང་པའི་གནོད་ཚེའི་འོག་བོར་སྟོར་ཞིག་རལ་དུ་ཤོར་ནས་། ཤིན་ཏུ་ཡ་ང་ཞིང་ཉམ་ཐག་པ། ཡིད་སྐྱོ་བའི་གནས་སུ་ལྷུང་བའི་སྒ་སྐྱེ་རྒུ་མདོ་ཡི་ཡུལ་མི་ཡོངས་དང་། སྐྱེ་རྒུ་དགོན་པ་དང་། ཁྲ་འགུ་དགོན་པ་སོགས་ལ་ངོས་དང་ང་ཚོ་སྦིར་དང་ཅོང་ཏ་རའི་ས་གནས་སུ་ཡོད་པའི་གཞིས་ཆགས་ཁག་དང་། སློབ་གྲྭ་ཁག་དང་། དགོན་སྡེ་ཁག་ལ་སོགས་པ་ཡོངས་ཀྱིས་སེམས་གཏིང་ནས་གདུང་སེམས་མཉམ་བསྐྱེད་ཡོད། འཁོར་བའི་ཆོས་ཉིད་འདི་ལྟར་ཡིན་པར་ཤེས་ནས། བློ་རྒྱ་ཆེར་བསྐྱེད་ཀྱིས། སེམས་སྡུག་ཡིད་སྐྱོའི་བློ་འགྱོད་བསགས་པས་ཤི་གསོན་གང་ལ་ཕན་ཐོགས་ཡོང་གི་མེད་པར་ཤེས་པའི་ཐོག ཚེ་འདས་རྣམས་ཀྱི་ཆེད་དུ་དགེ་བསྔོ་དང་། གནོད་སྐྱོན་ཚབ་ཆེན་ཕོག་པས་གཙོས་ནད་པ་རྣམས་དྲག་བསྐྱེད་ཡོང་པའི་ཐབས་ཤེས་རིམ་གྲོ། སྨན་དཔྱད་ལག་ལེན་གང་ཐུབ་བྱེད་ཅིང་། འདི་དང་ཕྱི་མར་ཇི་དགེའི་ལས་ལ་འབད་འབུང་བྱེད་པར་གཡར་དམ་བཅའ་བའི་དུས་སྐབས་ཤིག་རེད། ཅེས་གསུངས་སོང་།

དེ་ལྟར་ལས་འགུལ་གྱི་བྱེད་སྒོ་ཁག་གྲུབ་རྗེས་ཚོགས་མང་ནས་བཟང་སྤྱོད་སྨོན་ལམ་སོགས་གསུངས་མཐར་གདུང་སེམས་ མཉམ་བསྐྱེད་མཚོན་པའི་རི་མོ་དང་འཛིན་གྲྭ་སོ་སོས་རྣམ་པ་མི་འདྲ་བའི་མྱ་ངན་ཞུ་ཚིག་དང་གདུང་སེམས་མཉམ་བསྐྱེད་ཀྱི་རི་མོ་དང་ཡེ་གེ་སྣ་ཚོགས་འཁོད་པའི་འཕྲེད་དར་བྱང་བུ་སྣ་ཚོགས་དང་མར་མེ་ཕྱག་ཏུ་བསྣམས་ཏེ་གཙུག་ལག་ཁང་ལ་མ་ཎིའི་པད་དབྱངས་དང་ཆབ་གཅིག་ག ཡས་བསྐོར་གནང་མཐར་ཡོངས་སུ་གྲུབ་པར་བྱས་འདུག