ཨོ་སི་ཊོ་ལི་ཡའི་ཆབ་སྲིད་མཁས་དབང་དང་མང་ཚོགས་ཀྱིས་༧གོང་ས་མཆོག་ཁམས་སྐྱེ་རྒུ་མདོར་ཕེབས་རྒྱུར་ཡུལ་དེའི་སྲིད་བློན་མཆོག་ལ་སྙན་ཞུ་ཕུལ་ཡོད་འདུག
ཕྱི་ཚེས་ ༢༢ ཉིན་ཨོ་སི་ཊོ་ལི་ཡའི་གཞུང་འཛིན་ཆབ་སྲིད་མཁས་དབང་དང་གྲོས་ཚོགས་ཀྱི་དབུ་ཁྲིད་སོགས་མི་སྣ་བཅུ་ཚུད་པའི་ཁྱོན་མི་ ༡༡༠༠ ཙམ་གྱིས་མཚན་རྟགས་བསྡུ་རུབ་ཀྱིས་ཡུལ་དེའི་སྲིད་བློན་ Kevin Rudd ཁེ་ཝན་རོ་ཌ་མཆོག་གི་མཚན་ཐོག་ཏུ་ཕྱག་ཡིག་ཅིག་ཕུལ་ཏེ། ཉེ་ཆར་བོད་ཀྱི་ཁམས་སྐྱེ་རྒུ་མདོར་གནོད་འཚེ་ཐེབས་པའི་མི་མང་ཚོས་༧གོང་ས་ཏཱ་ལའི་བླ་མ་མཆོག་གནོད་འཚེ་ཐེབས་ཡུལ་དུ་ཕེབས་པར་རྒྱ་ནག་དབུ་ཁྲིད་བགྲེས་གཞོན་གཉིས་ལ་སྙན་ཞུ་ཞིག་ཕུལ་ཡོད་པ་བཞིན། སྲིད་བློན་མཆོག་གིས་རྒྱ་ནག་སྲིད་འཛིན་ཧུའུ་ཅིན་ཐོ་ལ་༧གོང་ས་མཆོག་གནོད་འཚེ་ཐེབས་ཡུལ་དུ་ཆིབས་སྒྱུར་བསྐྱང་རྒྱུའི་ཐད་ངེས་པར་དུ་བཀའ་མོལ་ཞུ་དགོས་པའི་ཡིག་ཐོག་འབོད་སྐུལ་ཞིག་ཞུས་ཡོད་འདུག་ལ།
དེ་ནི་འདས་པའི་བདུན་ཕྲག་འདིའི་ནང་གོད་ཆག་བྱུང་མཁན་གྱི་བོད་མི་ཚོས་རྒྱ་ནག་སྲིད་འཛིན་ཧུའུ་ཅིན་ཐོ་དང་སྲིད་བློན་ཝུན་ཅ་པོ་གཉིས་ལ་ཡིག་ཐོག་གི་སྙན་ཞུ་ཞིག་ཕུལ་བ་དེར་རྒྱུར་རྒྱབ་སྐྱོར་གྱི་རྣམ་འགྱུར་བསྟན་པ་ཞིག་རེད་འདུག
ཚེས་ ༡༨ ཉིན་༧གོང་ས་མཆོག་གིས་ཁོང་ན་ནིང་ལོར་ཐེ་ཝན་དུ་མྱ་ངན་ཐུགས་གསོ་ཆེད་བཅར་ཐུབ་པ་དེ་ཕན་ཐོགས་ཆེན་པོ་བྱུང་ཅེས་དང་། ཡང་ཁོང་གིས་སྐབས་དེར་གོད་ཆག་བྱུང་ཡུལ་གྱི་མི་མང་ཚོས་རྒྱ་ནག་གི་དབུ་ཁྲིད་ལ་སྙན་ཞུ་ཕུལ་ཡོད་མེད་ཤེས་རྟོགས་མ་བྱུང་ཡང་གནོད་འཚེ་ཐེབས་མཁན་ཚོས་ཁོ་བོ་དེ་གར་བཅར་ཐུབ་རྒྱུའི་རེ་བ་རྒྱག་བཞིན་ཡོད་ཚུལ་ཐོས་མྱོང་ཞེས་ཐེག་ཆེན་ཆོས་གླིང་གཙུག་ལག་ཁང་དུ་གསར་འགོད་པའི་དྲི་བར་བཀའ་ལན་བསྩལ་ཡོད་འདུག
གོང་ཚེས་ཉིན་ཨོ་སི་ཊོ་ལི་ཡའི་བོད་རིགས་སྤྱི་མཐུན་ཚོགས་པས་གསར་འགོད་གསལ་བསྒྲགས་ཤིག་གི་སྐབས་ཨོ་སི་ཊོ་ལི་ཡ་ནི་བོད་རིགས་འདུས་སྡོད་ཀྱི་སྤྱི་ཚོགས་ཆེན་པོ་ཡིན་པར་མ་ཟད། ཐེངས་འདིའི་ས་ཡོམ་གྱི་གོད་ཆག་ནང་རྒྱལ་ཁབ་འདིའི་ནང་གནས་སྡོད་བོད་མི་གང་འཚམ་གྱི་སྤུན་མཆེད་དང་ཉེ་འབྲེལ་སོགས་ལ་ས་ཡོམ་གྱི་གོད་ཆག་ནང་ཤི་རྨས་ཀྱི་གནོད་འཚེ་ཚབས་ཆེན་ཐེབས་ཡོད་པས་སྲིད་བློན་གྱིས་ཁོང་ཚོར་གདུང་སེམས་མཉམ་སྐྱེད་བྱ་དགོས་ལུགས་ཀྱང་བརྗོད་ཡོད་འདུག རྒྱ་ནག་གཞུང་ཕྱོགས་ཀྱི་རྩིས་ཐོ་ལྟར་ན་ཐེངས་འདིའི་གོད་ཆག་ནང་བོད་མི་བརྒྱ་ཆ་ ༩༧ ཙམ་ལ་ཤུགས་རྐྱེན་ཐེབས་ཡོད་ལ་དེ་ནི་བོད་རང་སྐྱོངས་ལྗོངས་ཕྱི་ལོགས་ཀྱི་བོད་རིགས་རང་སྐྱོང་ཁུལ་ཆེ་ཤོས་ཤིག་ཆགས་ཡོད་འདུག
ཨོ་སིའི་སྲིད་བློན་ལ་འབུལ་བའི་ཞུ་སྙན་འདིར་སྲིད་དོན་མཁས་པ་དང་གྲོས་ཚོགས་འཐུས་མི་མི་བཅུ་ཙམ་མ་ཡིན་པར་འདིར་ཨོ་སིའི་དབུས་གྲོས་ཚོགས་ཀྱི་སྲིད་དོན་ཚོགས་པ་ཚང་མའི་སྐུ་ཚབ་མཚོན་པའི་གྲོས་ཚོགས་འཐུས་མི་བཅུས་མཚན་རྟགས་བསྐྱོན་ཡོད་པས་དེ་ག་རེ་མཚོན་ཐུབ་ཀྱི་ཡོད་དམ་ཞེས་ན་ཨོ་སི་མི་མང་ས་ཡ་ཉེར་གཉིས་ཀྱི་འཚབ་མཚོན་ཐུབ་ཀྱི་ཡོད།
ཨོ་སིའི་ནང་བོད་མི་བརྒྱད་བརྒྱ་ཙམ་ལས་མིེད་སྟབས་འཛམ་གླིང་ནང་ནས་བོད་མི་གནས་སྡོད་བྱེད་ས་ཆེན་པོ་ཆགས་ཡོད་ཞེས་པ་ནི་འུར་གཏམ་སོང་ཙང་སྲིད་བློན་མཆོག་གི་མི་ཆོས་རིང་ལུགས་ཀྱི་རོགས་རམ་ཡོང་རྒྱུར་རེ་བ་ཞུས་ན་ལེགས་པ་མཐོང་གི་འདུག
ཅཱ་ཆིན་ལིན་གྱིས་བཤད་པས་སྐད་ཆ་དེ་ལ་དམ་འཛིན་གྱི་བོད་གཞུང་དང་སྐུ་སྒེར་གཉིས་ཀྱི་ཕྱག་ལས་གནང་གི་ཡོད་རྒྱུ་རེད།༧གོང་ས་མཆོག་མྱུར་དུ་ཡུལ་ཤུལ་ས་གནས་སུ་ཕེབས་ཐུབ་པའི་རེ་བ་ཡོད།དེ་ལ་ཚོགས་པ་ཁག་དང་མི་མང་གཉིས་ཀའི་ཐད་ནས་ཆབ་སྲིད་ཀྱི་སྐད་ཆ་མེད་པ་རྒྱ་ནག་གཞུང་ལ་སྙན་ཞུ་གང་མང་མང་དབུལ་དགོས་པ་རེད།
བོད་ལ་ཕེབས་འཇུག་སྐོར་ལ་རྒྱ་གཞུང་ཐད་ཀར་དང་། ཕྱིའི་རྒྱལ་ཚོགས་ཀྱིས་གནོན་ཤུགས་གཉིས་ཀ་ཡོད་དགོས་གལ་ཆེ་རེད།
ད་ལྟ་ངེས་པར་དུ་རྒྱལ་སྤྱིའི་སྤྱི་ཚོགས་དང་། བོད་གཞིས་བྱེས་གཉིས་ཀར་༸གོང་ས་མཆོག་སྐྱེ་རྒུ་རུ་གདན་འདྲེན་ཐབས་ཀྱི་བྱ་འགུལ་སྤེལ་དགོས་ཀྱི་འདུག རྒྱ་རྒན་ཚང་གིས་རོ་ཐོག་རྟ་རྒྱུགས་ཀྱི་ཆབ་སྲིད་གཡོ་བཅོས་བགྲངས་ལས་འདས་པ་བྱས་སོང་། ང་ཚོའི་རང་གི་སྐྱབས་མགོན་རང་ཡུལ་དུ་ཕེབས་པའི་ལས་དོན་ཇི་ལྟར་ཆབ་སྲིད་དུ་གྱུར་པ་རེད་དམ།
ཁ་སང་དེ་རིང་གི་དུས་ཚོད་ལ་བོད་པའི་ཚོགས་སྡེ་དང་བོད་དོན་རྒྱབ་སྐྱོར་བའི་ཚོགས་པ་སུ་ཡིན་ནའང་གནས་སྐབས་རིང་ཆབ་སྲིད་ཀྱི་ཚོར་ཤུགས་ཡོད་པའི་ལས་འགུལ་མ་སྤེལ་ན་ཡག་པོ་འདུག ཉེ་འཆར་ཅཱ་ཆིན་ལིན་གྱིས་བཤད་པའི་ཕྱི་སྡོད་བོད་པ་ཚོས་རོགས་སྐྱོར་ཞལ་འདེབས་ཕུལ་ན་སྣེ་ལེན་ཞུ་ཡི་ཡིན་ཞེས་བའི་སྐད་ཆ་འདི་རྩ་འཛིན་བྱས་ཏེ་ཁ་ཚ་དགོས་གཏུགས་ཀྱི་ཞལ་འདེབས་རོགས་དངུལ་བསྡུས་ཏེ་སྐྱེ་རྒུ་མདོར་བསྐྱལ་རོགས། ཆབ་སྲིད་སྟེགས་བུའི་སྟེང་གི་སྲིད་དོན་པ་ཚོས་གནས་སྐབས་རིང་ཟློས་གར་འདི་མ་འཁྲབ་རོགས། མཐའ་མ་གྱོང་རེགས་ས་དེ་རྨས་སྐྱོན་ཕོགས་པའི་གཞིས་བཞུགས་སྤུན་ཟླ་ཚོ་རེད། གསར་ལམ་ཁག་ཏུ་གནས་ཚུལ་ཐོན་བཞིན་པར་ལྟོས་ན་རྒྱ་ནག་གཞུང་ད་ལྟ་ནས་འདྲོགས་བཞིན་འདུག ཁ་སང་ནས་མྱུར་སྐྱོབ་ཆེད་ཕེབས་པའི་དགེ་འདུན་པ་རྣམས་ཕྱིར་རང་ཡུལ་དུ་འགྲོ་དགོས་ཞེས་བརྡ་ཐོ་བཏང་ཚར་འདུག
ཨོ་སི་ཊོ་ལིཡའི་སྲིད་འཛིན་མཆོག་བརྒྱུད་ནས་༸གོང་མཆོག་ཕེབས་རྒྱུའི་སྙན་ཞུ་ཕུལ་བ་དེ་བྱ་བ་བཟང་པོ་ཞིག་རེད་ལ་ཀུན་སློང་ཡང་ཡུག་པོ་རེད།
ཡིན་ནའང་ངས་བསམས་ན་དེ་ནི་ཀུན་སློང་དང་བྱ་བ་བཟང་པོ་ཞིག་ཡིན་ཀྱང་དེའི་ཐབས་འཇུས་ནོར་བ་རེད་དྲན་བྱུང་། གང་ཡིན་ཟེར་ན་སྙན་ཞུ་དེ་ངེས་པར་དུ་རྒྱ་ནག་དབུས་གཞུང་གི་སྲིད་འཛིན་དང་ཡང་ན་སྲིད་བློན་གཉིས་ལ་ཕུལ་དགོས་པའི་གནད་དོན་ཞིག་ཡིན།
གལ་སྲིད་སྙན་ཞུ་རྒྱ་ནག་དབུས་ལ་ཕུལ་ན་གནད་དོན་དེར་དཔོན་རིགས་ཚོའི་ངོས་ནས་བསམ་ཚུལ་གང་འདྲ་ཞིག་ཡོད་མེད་ཐད་ལ་ནང་ཁུལ་གླེང་སློང་ཞིག་ཏན་ཏན་ཡོང་ངེས་རེད།
ཨོ་སི་ཊོ་ལི་ཡའི་ཆབ་སྲིད་མཁས་དབང་དང་མང་ཚོགས་ཀྱིས་༧གོང་ས་མཆོག་ཁམས་སྐྱེ་རྒུ་མདོར་ཕེབས་རྒྱུར་ཡུལ་དེའི་སྲིད་བློན་མཆོག་ལ་སྙན་ཞུ་ཕུལ་ཡོད་འདུག་པ་ལ་ཐུགས་རྗེ་ཞུ།