ཉེ་ཆར་ཡུལ་ཤུལ་ས་ཁུལ་ལ་ས་ཡོམ་བརྒྱབ་མ་ཐག བཞུགས་སྒར་ངྷ་རམ་ས་ལར་༼ ༤༡༤ ཡུལ་ཤུལ་ས་ཡོམ་གདུང་སེལ་ཚོགས་ཆུང་ ༽ ཞུ་བ་ཞིག་བཙུགས་ཡོད་སྟབས། ཕྱི་ཚེས་ ༢༨ ཉིན་འདི་གའི་གསར་འགོད་པས་ཚོགས་ཆུང་དེའི་མགྲིན་ཚབ་པ་དགེ་འདུན་པ་ཉི་མ་ཚེ་རིང་ལེགས་སུ་བཅར་འདྲི་ཞུས་ཡོད།
དྲི་བ། ཕྱི་ཚེས་ ༡༤ ཉིན་སྐྱེ་རྒུ་མདོའི་ས་ཡོམ་གྱི་གོད་ཆག་བྱུང་མ་ཐག བཞུགས་སྒར་ངྷ་རམ་ས་ལར་ཁྱེད་ཅག་གིས་ ༼ ༤༡༤ ཡུལ་ཤུལ་ས་ཡོམ་གདུང་སེལ་ཚོགས་ཆུང་ ༽ཞུ་བ་ཞིག་གསར་འཛུགས་བྱས་པའི་སྐོར་ངོ་སྤྲོད་གནོང་དང་།
ལན། ཕྱི་ཚེས་ ༡༤ ཉིན་གྱི་ཞོགས་པ་ང་རང་གིས་མཚོ་སྔོན་བོད་སྐད་བརྙན་འཕྲིན་བརྒྱུད་དེ། ཡུལ་ཤུལ་སྐྱེ་རྒུ་མདོར་ས་ཡོམ་བརྒྱབ་པ་གོ་སོང་། འོན་ཀྱང་དེ་འདྲའི་ཚབས་ཆེན་ཞིག་ཡིན་རྒྱུ་རེད་དྲན་མ་སོང་། ཉིན་དེའི་སྔ་དྲོར་གསར་འགྱུར་བརྒྱུད་ལམ་ཁག་མང་པོ་ཞིག་ནས་སྐྱེ་རྒུ་མདོར་ཡིད་སྐྱོ་བའི་གོད་ཆག་ཆེན་པོ་བྱུང་ཡོད་པ་ཇེ་གསལ་རེད། དེ་ནས་ངས་ཁྱིམ་ལ་ཁ་པར་ཐེངས་མང་པོར་བཏང་ཡང་འགྱོག་མཁན་མི་འདུག སེམས་འཚབ་དང་འཇིགས་སྣང་ཇེ་ཆེ་རེད། གཞུང་འབྲེལ་མ་ཡིན་པའི་ཚོགས་པ་ཁག་ལྔའི་གཙུག་ལག་ཁང་དུ་མཆོད་འབུལ་ཞུས་སོང་། དེ་ནས་ང་ཚོ་སྐྱེ་རྒུ་མདོ་ས་ཁུལ་གྱི་མི་ཁག་ཅིག་འཛོམས་ཏེ། ཅི་དྲག་གང་དྲག་ལ་གྲོས་བསྡུར་བྱས་པ་ཡིན། འགའ་རེ་ཡིས་ཞལ་འདེབས་བསྡུ་དགོས་པ་རེད་ཟེར། ཡང་ལ་ལས་ཚོགས་པ་སྐྱིད་སྡུག་ཅིག་འཛུགས་དགོས་པ་རེད་ཟེར། ཉིན་དེར་ཐག་གཅོད་གང་ཡང་བྱུང་མ་སོང་། ཕྱི་ཚེས་ ༡༧ ཉིན་ཡང་བསྐྱར་ངྷ་རམ་ས་ལ་གཡས་གཡོན་དང་སྦིར། ཅོན་ཏ་ར། རྫོང་གསར་བཤད་གྲྭ་སོགས་སུ་སྐྱེ་རྒུ་མདོ་ས་ཁུལ་གྱི་མི་ ༢༠༠ ལྷག་འདུག ཁོང་ཅག་ལ་བརྡ་བཏང་སྟེ་མི་ ༧༠ ཙམ་འཛོམས་སོང་། ཚོགས་འདུ་དེའི་ཐོག་ནས་༼ ༤་༡༤ ཡུལ་ཤུལ་ས་ཡོམ་གདུང་སེལ་ཚོགས་ཆུང་ ༽ འཛུགས་རྒྱུ་ཐག་བཅད་པ་རེད། ཚོགས་ཆུང་འདིར་མི་ ༨ ཡོད། ཚོགས་གཙོ་གཞོན་དང་དྲུང་ཆེ་ཟེར་བ་སོགས་མེད། རྩིས་པ་གཅིག་དང་དངུལ་ཉར་གཉིས། ང་དང་རོགས་པ་གཞན་ཞིག་འབྲེལ་མཐུད་པ་ཡིན། ཚོགས་ཆུང་འདིའི་ལས་ཀ་གཙོ་བོ་ཞལ་འདེབས་བསྡུ་སློང་བྱ་རྒྱུ་དང་། ཤི་བོ་དག་ལ་བསྔོ་སྨོན་མཆོད་འབུལ། དེ་བཞིན། བོད་ནང་ལ་འབྲེལ་བ་བྱས་ཏེ་རྐྱེན་འདས་སུ་སོང་བ་དང་ཤུལ་ལུས་རྨས་མ་དག་གི་གནས་ཚུལ་རྒྱུས་ལོན་བྱ་རྒྱུ་བཅས་ཡིན། ཚོགས་ཆུང་འདི་ཟླ་གཉིས་ཀྱི་རྗེས་ལ་སྒོ་རྒྱག་རྒྱུ་ཐག་གིས་བཅད་ཡོད་པ་རེད།
དྲི་བ། སྐྱེ་རྒུ་མདོར་ས་ཡོམ་བརྒྱབ་སྟེ་ད་བར་ཟླ་ཕྱེད་ཅིག་འགྲོ་བཞིན་ཡོད་པ་རེད། ད་ལྟ་གནས་སྟངས་གང་འདྲ་ཆགས་ཡོད་པ་དང་། རྒུད་སྐྱོབ་དང་ཕྱོགས་མཐའ་ཁག་གི་རོགས་སྐྱོར་གྱི་གནས་སྟངས་གང་འདྲ་ཆགས་འདུག་གམ།
ལན། ཉིན་འདི་འགར་ཡུལ་ཤུལ་ལ་འབྲེལ་བ་ཕྲན་བུ་བྱེད་ཐུབ་ཀྱི་འདུག གསར་ལམ་ཁག་དང་ཁ་པར་སོགས་བརྒྱུད་དེ་གནས་ཚུལ་རག་པ་ལྟར་ན། སྐྱེ་རྒུ་མདོ་ཉེ་འཁོར་གྱི་ས་གནས་ཁག་ཅིག་ནང་གོད་ཆག་བྱུང་ཡོད་པ་ད་བར་ཤེས་རྟོགས་བྱུང་མི་འདུག་ལ། རོགས་སྐྱོར་ཡང་འབྱོར་མི་འདུག གོད་ཆག་ཚབས་ཆེ་ཤོས་སྐྱེ་རྒུ་མདོ་རང་རེད། དེ་ནས་བཀྲ་ཤིས་དར་ཐང་བདེ་བ་དང་སྐྱེ་རྒུ་དགོན་པ། ཁྲ་འགུ་དགོན་པ། དཔལ་ཐང་གནམ་གྲུ་ཐང་ཕྱོགས། རྟ་རྒྱུག་ཐང་ཕྱོགས་བཅས་ནི་ཤི་རྨས་ཚབས་ཆེ་ཤོས་རེད། ད་ཆར་རས་གུར་དང་ཟ་མ་སོགས་འདང་ཙམ་རེ་རག་གིན་ཡོད་ས་རེད། གཞན། བོད་ཀྱི་ལོ་རྒྱུས་ཐོག་སྐད་གྲགས་ཆེ་བའི་རྒྱ་ནག་མ་ཎི་ཡོད་ས་སུམ་མཛེས་གྲོང་པ་དང་། མདོ་ཁམས་དགོན་པ། དད་ཤོད་དགོན་པ། ཡུལ་ཤུལ་རྫོང་འགྲོས་མདའ་ཞང་འོག་གི་འབུམ་ཆུང་དགོན་པ་དང་། འགག་ལ། ཐར་ལམ་དགོན། རཱ་ཉག་དགོན། དེ་བཞིན། ཁྲུན་འདུ་རྫོང་ལབ་ཞང་འོག་གི་ལབ་དགོན་པ་དང་། ཐུབ་བསྟན་དགོན་པ། ཨ་ནེ་དགོན་པ། འབུམ་བུ་དགོན་པ་བཅས་ཀྱི་ཁང་པ་བརྒྱ་ཆ་ ༨༠ ཙམ་རྨེག་མེད་བཏང་འདུག དེ་དག་ལ་ད་དུང་ཡང་རོགས་སྐྱོར་འབྱོར་མི་འདུག དེ་བཞིན། སྐྱེ་རྒུ་མདོ་རུ་བསྡད་ཡོད་པའི་ཡུལ་ཤུལ་ཁུལ་གྱི་རྫོང་ཁག་གཞན་དང་། བོད་ཁུལ་གཞན། དེ་བཞིན་བོད་རིགས་མ་ཡིན་པའི་མི་རིགས་གཞན་དག་ལ་ད་དུང་ཟས་གོས་དང་། རས་གུར་མ་རག་པ་དང་། སྨན་ཁང་གིས་རྨས་མ་ཚོར་ངོས་ལེན་མ་བྱས་པ། རོགས་དངུལ་བགོ་བཤའ་མ་བརྒྱབས་པ་སོགས་ཀྱི་དཀའ་ངལ་ཤུགས་ཆེན་པོ་འཕྲད་ཀྱིན་འདུག
དྲི་བ། ཐེངས་འདིར་ས་ཡོམ་ཤུགས་ཆེ་ཤོས་སྐྱེ་རྒུ་མདོའི་མཁར་གྲོང་ཆགས་ཡོད། དེར་གཞུང་གི་ལས་ཁུངས་ཁག་དང་བཟོ་གྲྭ་མང་པོ་ཡོད་ཀྱང་། གནོད་འཚེ་ཐེབས་ཡུལ་གཙོ་བོ་གྲོང་ཁྱེར་མཐའ་འཁོར་གྱི་མང་ཚོགས་དཀྱུས་མ་ཆགས་དོན་ཅི་ཡིན་ནམ།
ལན། སྐྱེ་རྒུ་གྲོང་རྡལ་གྱི་མང་ཚོགས་དཀྱུས་མའི་ཁང་པ་ཕལ་ཆེ་བ་ས་དང་རྡོ། ཤིང་བཅས་ཀྱིས་བཟོས་ཡོད་སྟབས། གཡོ་འགུལ་ཅུང་ཙམ་བརྒྱབ་དུས་རྩ་བ་ནས་ལོག་འགྲོ་བ་དང་། ཞིག་རལ་དུ་འགྱུར་འགྲོ་བ་རེད། འོན་ཀྱང་། གཞུང་གི་ལས་ཁུངས་ཁག་དང་ལས་ཤག དེ་བཞིན་གྲོང་ཁྱེར་གྱི་ཚོང་ཁང་དང་ཟ་ཁང་། མགྲོན་ཁང་མང་ཆེ་བ་ཨར་འདམ་དང་ས་ཕག ལྕགས་སོགས་ཀྱི་རྒྱུ་ཆ་ཡག་པོ་རྐྱང་རྐྱང་གིས་བཟོས་ཡོད་པ་རེད། ཐེངས་འདིའི་ས་འགུལ་ཁྲོད་དུའང་ཞིག་རལ་ཚབས་ཆེན་བྱུང་མི་འདུག་ལ། ཁང་བརྩེགས་རེ་ཟུང་ལ་གས་ཁ་ཤོར་བ་དང་གཡོ་གཟུར་སོགས་ཀྱི་གནས་སྟངས་ཡོད་ཀྱང་། རྩ་ནས་ལོག་པའི་གནས་ཚུལ་ཉུང་ཉུང་རེད། རྒྱ་གཞུང་གི་སྲིད་ཇུས་ཤིག་གི་འོག ཡུལ་ཤུལ་ས་ཁུལ་གྱི་འབྲོག་པ་མང་པོའི་ཕྱུགས་ཟོག་བཙོང་དུ་བཅུག་ཅིང་། གྲོང་ཁྱེར་ལ་གཞི་སྤོར་བྱས་ཏེ་སྐྱེ་རྒུ་མདོ་མཐའ་འཁོར་དུ་བསྡད་ཡོད་པ་རེད། དེ་བཞིན་ས་གནས་གཞན་ནས་ཡོང་བའི་ཚོང་པ་དང་ལས་ཀ་བ་སོགས་ཐེངས་འདིར་གྱོང་གུད་ཚབས་ཆེ་ཤོས་ཐེབས་ཡུལ་ཆགས་འདུག
དྲི་བ། སྤྱིར་ས་ཡོམ་སོགས་རང་བྱུང་ཁམས་ཀྱི་གནོད་འཚེ་འདི་རིགས་ལ་ཚན་རིག་གི་འགྲེལ་རྒྱག་སྟངས་ཤིག་དང་། ཆོས་ཕྱོགས་ནས་འགྲེལ་རྒྱག་སྟངས་ཤིག་བཅས་ཡོད་ཀྱང་། ས་གནས་ཡུལ་མི་ཚོས་ཐེངས་འདིའི་ས་ཡོམ་དེ་རྒྱུ་རྐྱེན་གང་འདྲར་ངོས་འཛིན་བྱེད་ཀྱིན་འདུག་གམ།
ལན། ཐེངས་འདིར་ཡུལ་ཤུལ་སྐྱེ་རྒུ་མདོར་ས་ཡོམ་བརྒྱབ་པའི་ཐད་བཤད་སྟངས་སྣ་ཚོགས་འདུག འགའ་རེ་ཡིས་བཤད་པ་ལྟར་ན། ཡུལ་ཤུལ་ཁུལ་ཁྲུན་འདུ་རྫོང་གི་ཕྱོགས་སུ་སྒ་སྟོད་ཇོ་བོ་ཟེར་བའི་གནས་རི་འགངས་ཆེན་ཞིག་ཡོད་པ་རེད། ང་ཚོའི་ཕ་ཡུལ་གྱི་རྒན་འཁོག་ཚོར་འདི་འདྲའི་བཤད་སྲོལ་ཅིག་ཡོད། ཡུལ་ཤུལ་ས་ཆར་ས་ཡོམ་སོགས་ཀྱི་གོད་ཆག་ཡོང་གི་མ་རེད། གང་ཡིན་ཟེར་ན། ཡུལ་འདིའི་ས་བདག་ཆུ་བདག་གཙོ་བོ་དེ་སྒ་སྟོད་ཇོ་བོའི་རི་ལ་གནས་ཡོད་ཟེར། ཁ་རྒྱུན་འདི་ལ་མི་ཚང་མས་ཡིད་ཆེས་བྱེད་ཀྱིན་ཡོད་སྟབས། ཐེངས་འདིར་ཡང་ཕྱི་ཚེས་ ༡༤ ཉིན་གྱི་ཞོགས་པའི་ཆུ་ཚོད་ ༥ ཙམ་ལ་ས་འགུལ་ཆུང་ངུ་ཞིག་བརྒྱབ་འདུག དེ་ནི་གོད་ཆག་ཆེན་པོ་དེའི་སྔོན་བརྡ་ཡིན་ཡང་། སྔོན་མ་ཡུལ་ཤུལ་ས་ཆར་འདི་ལྟ་བའི་ས་འགུལ་ཆེན་པོ་བརྒྱབ་མྱོང་མེད་སྟབས། མི་ཚང་མས་དོ་སྣང་དང་ཞེད་སྣང་བྱས་ཡོད་པ་མ་རེད། ལོ་འགའི་སྔོན་ནས་བཟུང་རྒྱ་གཞུང་གིས་སྒ་སྟོད་ཇོ་བོའི་གནས་རི་བསྔོགས་ཏེ་གསེར་གྱི་གཏེར་ཁ་འདོན་བཞིན་ཡོད། གཏེར་ཁ་སྔོག་འདོན་འཕྲུལ་ཆས་ལས་བལྟས་པ་ཡིན་ན། གནས་རི་དེའི་གསེང་དུ་གསེར་གྱི་ལུག་ཅིག་མཐོང་གི་ཡོད་པ་རེད་ཟེར་ནས་བཤད་རྒྱུ་འདུག ཡང་ས་ཡོམ་གྱི་རྒྱུ་རྐྱེན་ལ་བཤད་སྟངས་གཞན་ཞིག་ཡོད་པ་ནི། ཕྱི་ཟླ་ ༤ ཚེས་ ༡༣ ཉིན་དཔལ་ཐང་གནམ་གྲུ་འབབ་ཚིགས་ཕྱོགས་ཀྱི་ས་ཆ་ཞིག་ནས་ཀྱང་། གཏེར་ཁ་སྔོག་འདོན་བྱ་རྒྱུ་ཐག་གིས་བཅད་པ་རེད་ཟེར། ཕལ་ཆེར་བདེན་པ་ཡིན་རྒྱུ་རེད། སྔོན་མ་ཞིག་ནས་ས་དེར་གཏེར་ཁ་ཡོད་རབས་བཤད་རྒྱུ་ཡོད་ཀྱང་། མང་ཚོགས་ཀྱིས་སྔོག་ཏུ་བཅུག་ཡོད་པ་མ་རེད། ཐེངས་འདིར་ཡུལ་ཤུལ་གསོལ་མགྲོན་ཁང་གི་མགོ་བ་ཞིག་དང་ས་གནས་ཀྱི་བླ་མ་ཞིག་བཅས་ངན་འབྲེལ་བྱས་ཏེ། ཚེས་ ༡༣ ཉིན་ཡུལ་ཤུལ་གསོལ་མགྲོན་ཁང་དུ་གནས་རི་དེ་ནས་གཏེར་ཁ་སྔོག་འདོན་བྱ་རྒྱུ་ཐག་གིས་བཅད་ཅིང་། མཛད་སྒོ་ཆེན་པོ་ཞིག་བསྡུས་པ་རེད་ཟེར་ནས་བཤད་ཀྱིན་འདུག
དྲི་བ། ད་བར་འདི་ག་ས་ཡོམ་གདུང་སེལ་ཚོགས་ཆུང་ལ་ཞལ་འདེབས་ག་ཚོད་འབྱོར་ཡོད་པ་དང་། དེ་དག་བོད་ནང་གི་གནོད་ཐེབས་ས་ཁུལ་ལ་འབུལ་ལམ་ཞུ་ཕྱོགས་གང་འདྲ་ཡོད་དམ།
ལན། མང་ཚོགས་ཀྱིས་ཞལ་འདེབས་ཧ་ཅང་ཡག་པོ་གནང་སོང་། ད་ཆར་ང་ཚོར་ཞལ་འདེབས་འབྱོར་ཟིན་པ་ཧིན་སྒོར་འབུམ་བཅུ་ ༡༠༠༠༠༠༠ ཙམ་རེད། གཞན་ཡོང་འཆར་འབུམ་ལྔ་བཅུ་ ༥༠༠༠༠༠༠ ཡས་མས་འདུག ཁྱོན་བསྡོམས་བཙན་བྱོལ་ནང་ ཧིན་སྒོར་འབུམ་བརྒྱ་ ༡༠༠༠༠༠༠༠ ཡས་མས་རག་རྒྱུར་རྩིས་རྒྱག་གི་ཡོད། ཞལ་འདེབས་ཀྱི་དངུལ་གང་འབྱོར་བ་དེ་ང་ཚོས་ས་གནས་ས་ཐོག་ལ་བསྐྱལ་རྒྱུར་ཐབས་ཤེས་བྱ་རྒྱུ་ཡིན། ད་ལྟའི་ཆར་འབྲེལ་བ་བྱེད་བཞིན་ཡོད། ཐོག་མ་ནས་ང་ཚོས་བོད་ནང་གི་ས་ཡོམ་བྱུང་ཡུལ་ལ་མི་གཏོང་རྒྱུར་གྲ་སྒྲིག་ཡོད་པ་ལྟར། ཉེ་ཆར་རྒྱ་ནག་དབུས་གཞུང་གི་མཁོ་ཁྲིད་ཅ་ཆིན་ལེན་གྱིས་ཕྱི་རྒྱལ་ནས་ལུགས་དང་མཐུན་པའི་ཐོག་ནས་ཡོང་མཁན་ཚོར་སྣེ་ལེན་བྱ་རྒྱུ་ཡིན་སྐོར་གསུངས་པ་དེས་ང་ཚོའི་འཆར་གཞི་ལ་རེ་བ་ཆེ་རུ་འགྲོ་སོང་། ཉིན་འགའི་སྔོན་ལ་ང་དང་རོགས་པ་ཞིག་ལྡི་ལི་རྒྱ་ནག་གཞུང་ཚབ་ཁང་ལ་དངོས་སུ་བཅར་བ་ཡིན། ཉིན་དེ་རང་ལ་ཆོག་མཆན་སྤྲད་མ་སོང་མོད། འགྲོ་ཐུབ་རྒྱུར་རེ་བ་འདུག་སྙམ་པ་ཞིག་བྱུང་སོང་། འོན་ཀྱང་། བོད་ནང་དུ་འགྲོ་རྒྱུར་ཁོང་ཚོས་ཆ་རྐྱེན་མང་པོ་ཞིག་འདོན་གྱིན་འདུག གཙོ་བོ་ལྐོག་ལྐོག་སུལ་སུལ་མ་ཡིན་པར། ཕྱི་གསལ་ནང་གསལ་བཟོ་དགོས་པ་དེ་རེད། ཕར་ཕྱོགས་ཀྱི་དངུལ་སྤྲོད་ཡུལ་དང་རྩིས་ཁྲ་གསལ་བོ་བཟོ་དགོས་ཀྱི་འདུག ལྷག་པར་དུ་ཕར་ཕྱོགས་ཀྱི་འབྲེལ་བ་བྱ་ཡུལ་དང་། འདི་ནས་མི་སུ་འགྲོ་རྒྱུ་ཡིན་པ། དེ་དག་གིས་ནམ་རྒྱུན་ལས་ཀ་ཅི་བྱེད་ཀྱི་ཡོད་པ་སོགས་གསལ་བོ་བཟོ་དགོས་ཀྱི་འདུག མི་མང་ཉུང་ལ་མ་ལྟོས་པའི་ཐོག་ནས་སྐུ་ཚབ་ཅིག་ཏན་ཏན་འགྲོ་ཐུབ་ས་རེད་དྲན་སོང་། འོན་ཀྱང་ད་དུང་གཏན་འཁེལ་ཡོད་པ་མ་རེད། ང་ཚོའི་ངོས་ནས་མི་ག་ཚོད་མང་མང་ཅིག་དང་། ཉུང་མཐར་ཡང་མི་བཅུ་གྲངས་ཤིག་གཏོང་ཐུབ་ན་བསམ་གྱི་ཡོད།
དྲི་བ། ཁྱེད་ཅག་ཚོགས་ཆུང་གི་ངོས་ནས་ད་བར་ཡུལ་ཤུལ་ས་ཡོམ་གོད་ཆག་ཁྲོད། མི་ག་ཚོད་རྐྱེན་ལམ་དུ་སོང་བ་ཤེས་རྟོགས་ཡོད་མེད་དང་། བཙན་བྱོལ་སློབ་གྲྭ་ཁག་ཏུའང་སྐྱེ་རྒུ་མདོ་ས་ཁུལ་གྱི་བྱིས་པ་མང་པོ་ཞིག་ཡོད་སྟབས། དེ་དག་ལ་མ་འོངས་པར་ལྟ་སྐྱོང་དང་གྲ་སྒྲིག་གང་འདྲ་ཡོད་དམ།
ལན། ས་ཡོམ་གྱི་གོད་ཆག་ཁྲོད་མི་ག་ཚོད་ཅིག་རྐྱེན་འདས་སུ་སོང་བ་གསལ་བོ་ཤེས་རྒྱུ་ཁག་པོ་རེད། གསར་ལམ་ཁག་ཏུ་གྲངས་ཚད་སྣ་ཚོགས་ཤིག་ཐོན་ཡོང་གིན་འདུག གང་ལྟར་། མི་ཁྲི་ལས་བརྒལ་བ་ཞིག་གྲོངས་ཟིན་པ་ཁ་གཅིག་གྲགས་རེད། དཔེར་ན། ཉེ་ཆར་རང་ལ་སྐྱེ་རྒུ་དགོན་པ་ནས་བེམ་པོ་ ༩༩༠ ཙམ་མེར་བསྲེགས་བཏང་འདུག དེའི་ཁྲོད་བྱིས་པ་ ༥༠༠ ཡས་མས་འདུག་ཟེར། ང་ཚོའི་ལག་ལ་གྲོངས་ཟིན་པའི་མིང་ཐོ་རག་པ་ ༡༥༠༠ ལྷག་ཡོད། ད་དུང་མུ་མཐུད་ནས་ཡོང་གིན་འདུག གཞན། བཙན་བྱོལ་ནང་གི་ཡུལ་ཤུལ་ས་ཁུལ་གྱི་བྱིས་པ་དག་ལ་ང་ཚོར་འཆར་གཞི་གང་ཡང་མེད། གང་ཡིན་ཟེར་ན། ཁོང་ཚོ་བོད་གཞུང་གི་གཟིགས་རྟོགས་འོག་ཡོད། དམིགས་བསལ་གྱི་དཀའ་ངལ་ཡང་ཡོད་པ་མ་རེད། ང་ཚོའི་ལག་ཏུ་མི་མང་གི་ཞལ་འདེབས་གང་རག་པ་དེ་གནོད་འཚེ་ཐེབས་ཡུལ་དུ་བསྐྱལ་ཐབས་བྱ་འཆར་ཡོད། མ་འོངས་པའི་ཐད་ལ་ང་ཚོར་གྲ་སྒྲིག་གང་ཡང་ཡོད་པ་མ་རེད། ང་ཚོའི་ཚོགས་ཆུང་འདི་ཟླ་གཉིས་ཀྱི་རྗེས་སུ་སྒོ་རྒྱག་རྒྱུ་རེད།
དྲི་བ། སྐྱེ་རྒུ་མདོར་ས་ཡོམ་བརྒྱབ་མ་ཐག་བོད་ཡུལ་མདོ་དབུས་ཁམས་གསུམ་ནས་རོགས་སྐྱོར་འབྱོར་ཡོད་ལ། རྒྱ་ནག་གཞུང་དམངས་ནས་ཀྱང་མྱ་ངན་དང་རོགས་རམ་ཤུགས་ཆེན་བྱས་པ་ལྟར། བཙན་བྱོལ་གཞུང་དམངས་ཀྱི་ངོས་ནས་གང་འདྲ་བྱུང་ཡོད་པ་དང་། ༧གོང་ས་མཆོག་གིས་ཡུལ་ཤུལ་དུ་ཕེབས་འདོད་ཡོད་སྐོར་གསུངས་པའི་ཐད་དགོངས་ཚུལ་གང་འདྲ་ཡོད་དམ།
ལན། ཕྱི་ཚེས་ ༡༤ ཉིན་ཡུལ་ཤུལ་སྐྱེ་རྒུ་མདོར་ས་ཡོམ་བརྒྱབ་མ་ཐག བོད་ཆོལ་ཁ་གསུམ་གྱི་ས་གནས་སོ་སོ་ནས་མི་རྒྱུ་གཉིས་ཀྱི་རོགས་སྐྱོར་འབྱོར་བཞིན་འདུག་ལ། ལྷག་པར་དུ་ཨ་མདོའི་ལུང་པ་མང་པོ་ཞིག་གིས་ཆེ་བས་བརྒྱ་འབུལ་སྟོང་འབུལ་དང་ཆུང་བས་གཅིག་འབུལ་གཉིས་འབུལ་བྱས་སོང་། རྒྱ་ནག་གཞུང་དམངས་གཉིས་ནས་ཀྱང་རོགས་སྐྱོར་དང་། གདུང་སེམས་མཉམ་སྐྱེད་ཧ་ཅང་ཡག་པོ་བྱས་སོང་དྲན་ཡོད། གཞན། ང་ཚོ་བཙན་བྱོལ་མི་མང་གི་ངོས་ནས་གང་ཡོང་ཅི་ཡོང་གིས་བསྔོ་སྨོན་མཆོད་འབུལ་དང་། ཞལ་འདེབས་ཡག་པོ་གནང་སོང་། བྱིས་པ་ཆུང་ངུ་ཚོས་ཀྱང་སྒོར་ལྔ་རེ་བཅུ་རེ་བྱས་ཏེ་གང་ཡོང་ཅི་ཡོང་བྱས་སོང་། རྒྱུ་ཡོད་མཁན་གྱིས་རྒྱུ་ཡི་རོགས་རམ་དང་། རྒྱུ་མེད་མཁན་ཚོས་སེམས་ཀྱིས་མཉམ་རུབ་བྱས་པ་རེད། དེ་བཞིན། བོད་གཞུང་གི་ཕྱོགས་ནས་ཀྱང་ང་ཚོས་ལས་འགུལ་གང་བརྩམས་པ་དེར་རྒྱབ་སྐྱོར་ཆ་ཚང་གནང་སོང་། གལ་ཆེ་ཤོས་དེ་༧གོང་ས་མཆོག་ས་གནས་ལ་ཕེབས་ཐུབ་མིན་དེ་རེད། གལ་སྲིད་ཕེབས་ཐུབ་པ་ཡིན་ན། རྐྱེན་ལམ་དུ་ཕྱིན་པའི་ཤི་བོ་ཁྲི་སྟོང་མང་པོར་ཕན་ཐོགས་རྒྱ་ཆེན་པོ་ཡོང་བ་མ་ཟད། ཤུལ་དུ་ཡོད་པའི་སྐྱེ་རྒུ་མི་མང་སྡུག་བསྔལ་གྱི་ནང་ལྷུང་ཡོད་པ་ཚོ་ལའང་ཐུགས་ཕན་ཆེན་པོ་སོས་པ་རེད། དེ་བཞིན། འབྱུང་འགྱུར་ཡང་ས་ཕྱོགས་དེ་ལ་འབྱུང་བཞིའི་གནོད་འཚེ་རིགས་མི་འབྱུང་ཞིང་། ལོ་ཕྱུགས་རྟག་ཏུ་ལེགས་པ་ཡོང་གི་རེད། འདི་ས་གནས་མི་མང་གི་རེ་འདོད་རེད་ལ། བྱེས་ཡུལ་མི་མང་གི་རེ་བ་ཡང་ཡིན།
