ཡེ་ཤེས་མཚོ་མོས་རང་གི་ཨ་ཕ་གླེང་བ།

ཞོགས་དུང་གི་བུ་མོ་ཡེ་ཤེས་མཚོ་མོ་ལགས་ཀྱིས་ཕྱི་ཚེས་ ༢༩ ཉིན་ཨེ་ཤ་ཡའི་གསར་འགོད་པ་དཔལ་ལྡན་རྒྱལ་དང་མཉམ་དུ་ཁོང་གི་ཨ་ཕའི་ད་ལྟའི་གནས་སྟངས་དང་། ནང་མིའི་སེསམ་ཁྲལ་དང་རེ་བ་སོགས་གླེང་ཡོད་པ་རེད།

དཔལ་ལྡན་རྒྱལ། ཁྱོད་ཀྱི་ཨ་ཕ་དེང་སྐབས་གང་དུ་ཡོད་མེད་གོ་ཡོད་མེད་ཤེས་ཡོད་དམ།
ཡེ་ཤེས་མཚོ་མོ། ཨ་ཕ་དེང་སྐབས་ཟི་ལིང་གྲོང་ཁྱེར་གྱི་བཀག་སྐྱིལ་ཁང་དང་པོ་རུ་འདུག་ཅེས་བཤད་འདུག

དཔལ་ལྡན་རྒྱལ། ཁྱོད་ཚོར་ལྟ་རུ་འཇུག་གམ།
ཡེ་ཤེས་མཚོ་མོ། ལྟ་གི་མི་འཇུག་གི། ཟ་མ་ཡང་བསྐྱལ་གི་མི་འཇུག་གི

དཔལ་ལྡན་རྒྱལ། ཁོ་རང་ཕྱི་ཚེས་ ༢༣ ཉིན་འཛིན་དུས་ཡི་གེ་ཞིག་སྤྲད་པ་རེད་ཟེར་གི། ཡི་གེ་དེའི་ནང་དུ་ཅི་ཞིག་བཀོད་འདུག
ཡེ་ཤེས་མཚོ་མོ། ཡི་གེ་དེའི་ནང་དུ་གཞན་པ་ཅང་བྲིས་མི་འདུག བརྡ་སྦྱོར་དེའི་སྟེང་ན་ཨ་ཕ་འཛིན་དོན་གྱི་ཉེས་པ་ཟེར་ན་འདྲ། ཁོ་ཚོས་འཛིན་དགོས་པའི་རྒྱུ་མཚན་གཙོ་བོ་ནི་རྒྱལ་ཁབ་ཁ་བྲལ་བྱེད་པའི་ཀུན་སློང་འདུག་ཅེས་བྲིས་འདུག

དཔལ་ལྡན་རྒྱལ། ཁྲིད་ནས་འགྲོ་དུས་ཁོ་ཚོས་ཁྱོད་ཚོར་དམིགས་བསལ་ཅང་བཤད་སོང་ངམ།
ཡེ་ཤེས་མཚོ་མོ། ཅི་གང་ཟེར་གི་མི་འདུག ཁྲིད་ནས་འགྲོ་དུས་ཨ་ཕའི་ལག་གི་སྒོར་མོ་དང་། དངུལ་ཁང་གི་བྱང་བུ། ཐོབ་ཐང་ལག་ཁྱེར་དེ་ཚང་མ་བླངས་སོང་། གཞན་པ་ཅི་ཡང་མི་ཟེར་གི།

དཔལ་ལྡན་རྒྱལ། ཁྱེད་རང་གི་ངོས་ནས་སེམས་ཁུར་གཙོ་བོ་ཅི་ཞིག་བྱེད་གིན་ཡོད།
ཡེ་ཤེས་མཚོ་མོ། ང་ཚོས་ཨ་ཕ་མགྱོགས་པོར་གློད་ཡོང་ན་འདོད་གི།

དཔལ་ལྡན་རྒྱལ། ཁྱོའི་ཨ་ཕས་རྩོམ་ཡིག་བྲིས་པར་བརྟེན་རྒྱ་ནག་གཞུང་གིས་བཟུང་སོང་ན། ཁྱོའི་སེམས་ལ་ཅི་ཞིག་དྲན་གི།
ཡེ་ཤེས་མཚོ་མོ། ང་ལ་མཚོན་ནའང་རེད། ཨ་མ་མཚོན་ནའང་རེད། ཨ་མས་ཡི་གེ་ཤེས་གི་མ་རེད། ང་ལ་མཚོན་ན་དཔེ་ཆར་ཏོག་ཙམ་བལྟས་ཡོད་པ་རེད། ཨ་ཕའི་དཔེ་ཆ་ལའང་གང་འཚམ་བལྟས་ཡོད་པ་རེད། བལྟས་ཡོང་ན་འཛིན་བཟུང་བྱེད་དགོས་པའི་ཚད་ལ་ཐོན་མེད་པ་འདྲ་ཞིག་འདུག སྨྲ་བརྗོད་རང་དབང་ཞེས་ཁོ་ཚོས་ཀྱང་བཤད་གི་ཡོད་པ་རེད། ཡིན་ནའང་། དཔེ་ཆ་ཞིག་བྲིས་ཡོང་དུས་འདི་ལྟར་འཛིན་བཟུང་བྱེད་དགོས་པའི་ཚད་ལ་ཐོན་མི་འདུག ངས་བསམ་ན་དེ་འདྲ་ཞིག་རེད།

དཔལ་ལྡན་རྒྱལ། རྒྱ་ནག་གི་རྩ་ཁྲིམས་ནང་དུའང་སྨྲ་བརྗོད་རང་དབང་ཡོད། སོ་སོའི་བསམ་ཚུལ་བཏོན་ན་ཆོག་གི་ཡོད་ཅེས་བཤད་ཡོད་པ་རེད། རྩ་ཁྲིམས་དང་མ་མཐུན་པའི་ལས་ཀ་གཅིག་ཀྱང་བྱས་མི་འདུག བཟུང་ཚར་དུས་ཁྱོའི་ངོས་ནས་ཨ་ཕ་གློད་གྲོལ་གཏོང་བའི་ཐབས་ཤེས་འདྲ་འཐེན་གི་ཡོད་དམ།
ཡེ་ཤེས་མཚོ་མོ། ལས་ཀ་བྱེད་གི་ཡོད། ཡོད་ཀྱང་ང་ལ་མཚོན་ན་དེའི་བསམ་བློ་ཡོད་པ་མ་གཏོགས། དེ་ཇི་ལྟར་ལག་བསྟར་བྱེད་དགོས་པའི་སྐོར་མི་ཤེས་གི། སྐད་ཆ་མང་པོ་ཞིག་དང་བྱ་བ་མང་པོ་ཞིག་ལས་ཉན་དང་མི་ཉན་ཡང་མི་ཤེས་གི། ད་དེ་འདྲ་བོ་ཞིག་གི་ཚད་རེད།

དཔལ་ལྡན་རྒྱལ། ཨ་ཕ་བཀག་རྗེས་ཀྱི་ཁ་སང་ཁས་ཉིན་ཁྱོད་ཚོ་ལྟ་རུ་སོང་ངམ།
ཡེ་ཤེས་མཚོ་མོ། སོང་བ་ཡིན། དེ་རིང་ནི་ཉིན་བདུན་པ་དེ་རེད། ང་ཚོ་ཉི་མ་རྟག་པར་སོང་བ་ཡིན། ཉིན་མ་རྟག་པར་སོང་རུང་ང་ཚོར་ངོ་ཐུག་གི་འཇུག་ནི་མ་རེད་དེ། ཐ་ན་ཟ་མ་ཡང་བསྐྱལ་མི་འཇུག་གི། ཁོ་ཚོའི་རྒྱལ་སྒོའི་ཁ་ན་ཚོང་ཁང་ཆུང་ཆུང་ཞིག་འདུག གཞན་པ་ཚོར་ཚོང་ཁང་དེའི་ནང་ནས་ཟ་རྒྱུ་འཐུང་རྒྱུ་ཉོས་ནས་འཁྱེར་གི་འཇུག་གི་འདུག ང་ཚོར་དེ་ཡང་བྱེད་དུ་མི་འཇུག་གི།

དཔལ་ལྡན་རྒྱལ། ཁྱོད་ཚོ་དེར་སོང་སྐབས་ཅི་ཟེར་གི།
ཡེ་ཤེས་མཚོ་མོ། ཕར་སོང་དུས། ཚོང་ཁང་ནང་གི་མི་དེས་མགོ་ཐོག་དེར་ནང་ན་མི་འདི་འདྲ་ཞིག་མི་འདུག་ཟེར་གི། ནང་ན་བཀག་བཞག་པའི་མི་དེ་དག་གི་བཟའ་ཚང་དང་ཁྱིམ་མི་ཚོ་ཡོང་ན་ཚོང་ཁང་དེའི་ནང་ནས་ཅ་ལག་འདྲ་ཉོས་ཏེ་དེ་ནས་ཕར་བརྒྱུད་སྤྲོད་བྱེད་གི་འདུག དེར་བརྟེན་ནང་ན་མི་འདི་འདྲ་ཞིག་མི་འདུག་ཟེར་གི། དེའི་རྗེས་ནས་ཨ་མ་ངེད་གཉིས་ཀྱིས་ཨ་ཕའི་དོན་དག་འདི་མགོ་ནས་མཇུག་བར་ཐག་གཅོད་བྱེད་མཁན་གྱི་སྤྱི་བདེ་མི་སྣ་གཉིས་ཡོད་པ་དེ་གཉིས་ལ་ཁ་པར་བཏང་ནས་དྲིས་སྐབས། དེ་གཉིས་ཀྱིས་གསལ་བོ་དག་པོ་བྱས་ནས་ཨ་ཕ་ནང་ན་ཡོད་ཟེར་གི། དེའི་རྗེས་ནས་གཞེས་ཉིན་ཨ་མ་ངེད་གཉིས་རྒྱལ་སྒོ་ཁར་སོང་སྟེ་སྒུག་ནས་བསྡད་དུས་དེ་ཚོས་ནང་ནས་ཨ་ཕར་ཁ་དྲིས་བཏང་ནས་ཡོང་གི་འདུག ཨ་ཕར་འདྲི་གཅོད་བྱས་ནས་ཡོང་གི་འདུག ཁོ་རང་གི་ལག་ན་ཡི་གེ་ཞིག་འདུག ཡི་གེ་དེའི་སྟེང་ལ་ངས་ཞིབ་ལྟ་བྱས་སྐབས་ཨ་ཕས་མཛུབ་ཐེལ་མནན་བཞག་པ་དངོས་སུ་མཐོང་བྱུང་། དེའི་ནང་དུ་ཨ་ཕ་བཀག་སྐྱིལ་བྱེད་པའི་ཉི་མ་ཇེ་རིང་ལ་གཏོང་རྒྱུའི་ཡི་གེ་དེ་འདུག

དཔལ་ལྡན་རྒྱལ། བཀག་སྐྱིལ་གྱི་ཉི་མ་ཅི་ཙམ་ཇེ་རིང་ལ་བཏང་འདུག
ཡེ་ཤེས་མཚོ་མོ། ཉི་མ་ག་ཚོད་ཇེ་རིང་དུ་བཏང་བའི་སྐོར་མཐོང་མ་སོང་། བཀག་སྐྱིལ་གྱི་ཉི་མ་ཇེ་རིང་ལ་བཏང་བའི་རྒྱ་ཡིག་དེ་ངས་མཐོང་སོང་། ཡི་གེའི་ཏག་ཏག་དེར་བཀག་སྐྱིལ་གྱི་ཉི་མ་ཇེ་རིང་དུ་གཏོང་བ་ཞེས་པ་དེ་ངས་མཐོང་སོང་། དེའི་སྟེང་ནས་ངས་ཨ་ཕ་དེའི་ནང་ན་ཡོད་པ་གང་འདྲ་བྱས་ནས་ཐག་ཆོད་གི་འདུག་ཅེ་ན། ཡི་གེ་དེའི་མཇུག་ན་ཨ་ཕའི་མཛུབ་ཐེལ་ཡོད་པ་དེས་ཐོག་ནས་ཤེས་གི་འདུག དེའི་ནང་ན་ཡོད་པ་གསལ་བོ་དག་པོ་རེད།

དཔལ་ལྡན་རྒྱལ། དེ་ག་དུས་རེད།
ཡེ་ཤེས་མཚོ་མོ། ཕྱི་ཚེས་ ༢༥ ཡི་ཉིན་མོ་རེད།

དཔལ་ལྡན་རྒྱལ། ཨ་ཕ་འཛིན་དུས་ཁྱོད་ལ་སྤྲད་པ་དེ་འཛིན་བཟུང་གི་བརྡ་སྦྱོར་རེད་དམ། བཀག་ཉར་གྱི་བརྡ་སྦྱོར་རེད།
ཡེ་ཤེས་མཚོ་མོ། བཀག་ཉར་གྱི་ཡི་གེ་རེད།

དཔལ་ལྡན་རྒྱལ། ༢༥ ཉིན་ཁྱོད་ཚོས་མཐོང་བ་རེད། དེའི་རྗེས་ནས་ཕྱིན་སྐབས་ཚོང་ཁང་བདག་པོ་དེས་མི་དེ་འདྲ་ཞིག་མི་འདུག་ཟེར་གི་ཡོད་པ་རེད།
ཡེ་ཤེས་མཚོ་མོ། རེད། མི་འདུག་ཟེར་གི ཟ་མ་སྟེར་གི་མི་འཇུག་གི། མི་ནི་ནང་ན་འདུག ཚོང་ཁང་ནང་གི་མི་དེ་ཚོས་གསལ་བོ་དག་པོ་ཞིག་ཤེས་གི་མི་འདུག ནང་གི་མིས་ཅི་ཞིག་བཤད་ཀྱིན་པའི་སྐོར་ཁོ་ཚོར་བཤད་རྒྱུའི་དབང་ཆ་ཡང་མེད་པ་འདྲ། ཨ་ཕ་ད་སྔ་དེ་རུ་ཡོད་པ་གསལ་བོ་དག་པོ་རེད།

དཔལ་ལྡན་རྒྱལ། ནང་གི་མི་དེ་ཚོས་དེར་ཡོད་ཟེར་གི་ཡོད་པ་མ་གཏོགས། ཕྱི་ཚེས་ ༢༥ ཡི་རྗེས་ནས་དེར་ཡོད་མེད་ཁྱེད་ཚོས་ཀྱང་ཤེས་གི་ཡོད་པ་མ་རེད།
ཡེ་ཤེས་མཚོ་མོ། རེད་རེད།

དཔལ་ལྡན་རྒྱལ། རྒྱན་རིང་པོར་བཀག་བསྡད་པ་ཡིན་ན། ཁྱོས་ཨ་ཕའི་ཕྱོགས་ལ་སེམས་ཁུར་ཆེ་ཤོས་ཅི་ཞིག་བྱེད་གི་ཡོད།
ཡེ་ཤེས་མཚོ་མོ།  ཡུན་རིང་པོར་བཀག་བསྡད་པ་ཡིན། ཨ་ཕ་འཚམས་པོ་བདེ་མོ་ཡིན་མིན་དང་། ང་ཚོ་ཚང་མར་འབྲེལ་གཏུགས་ཀྱང་བྱེད་གི་མི་འཇུག་གི། ཁོང་ལ་ན་གི་འདྲ་ཨེ་ཡོད། དེའི་ཕྱོགས་ནས་ཁོང་ཚོས་གཅར་རྡུང་འདྲ་བྱེད་གི་ཨེ་ཡོད། ཁོང་གི་བདེ་ཐང་གི་ཐད་ལ་ང་ཚོ་ཚང་མར་ཧ་ལས་པའི་སེམས་ཁུར་ཆེ་གི། དེའི་ཕན་ནས་ང་ཚོའི་རེ་བ་ཡིན་ན། ཨ་ཕ་གང་མགྱོགས་མགྱོགས་སྒོ་ལ་ཡོང་ཐུབ་རྒྱུ་དེ་ཡིན།

དཔལ་ལྡན་རྒྱལ། སྤྱིར་བཏང་ཨ་ཕའི་འཕྲོད་བསྟེན་ཡག་པོ་ཡོད་དམ།
ཡེ་ཤེས་མཚོ་མོ། ཨ་ཕའི་གཟུགས་པོ་ཡག་པོ་ཡོད། མི་བདེ་རྒྱུ་འདྲ་གཅིག་ཀྱང་མེད། དཔེ་ཆར་མང་པོ་བལྟས་པའི་དབང་གིས་མིག་དེ་ཙམ་བཟང་རྒྱུ་མེད། མིག་དབང་གི་ཚད་གཞི་དེ་ ༣༠༠ ཙམ་ཡིན། དེའི་ཕན་ནས་ཁོང་གི་སྐེ་ཚིགས་ཀྱི་རུས་པ་ཅུང་གཅུས་བསྡད་ཡོད་ཀྱང་དེ་ཡང་མཚམས་མེར་མི་བདེ་བ་ཙམ་མ་གཏོགས་ན་རྒྱུ་འདྲ་མེད། ཁོང་ཉལ་དུས་སྔས་མགོ་འཇོག་གི་མ་རེད། སྔས་མགོ་མ་བཞག་པར་ཉལ་བ་ཡིན་ན་དེ་བདེ་བསྡད་ཡོད་པ་རེད། བདེ་ཐང་གི་ཕྱོགས་ནས་ན་རྒྱུ་ཟུག་རྒྱུ་འདྲ་མེད།

དཔལ་ལྡན་རྒྱལ། ཕྱི་ཕྱོགས་ནའང་དེའི་སྐོར་ལ་དོ་སྣང་དང་སེམས་ཁྲལ་བྱེད་མཁན་མང་པོ་འདུག ཁྱོའི་ཨ་ཕའི་ཕྱོགས་ནས་ཁྱོད་ལ་རྒྱལ་སྤྱིའི་སྒང་ལ་འབོད་སྐུལ་ཞུ་རྒྱུ་འདྲ་ཡོད་དམ།
ཡེ་ཤེས་མཚོ་མོ། འབོད་སྐུལ་ཞུ་རྒྱུ་བཤད་ན། ངོ་མས་བཤད་ན་ཨ་ཕས་དཔེ་ཆ་དེ་འདྲ་ཞིག་བྲིས་ཀྱང་། སྤྱིར་སྨྲ་བརྗོད་རང་དབང་གི་ཐོག་ནས་བཤད་ན་འཛིན་དགོས་པའི་ཚད་མ་རེད་འདོད། དཔེ་ཆ་དེ་བྲིས་པའི་དབང་གིས་བཀག་སྐྱིལ་བྱས་པ་དེ་ངེད་ཁྱིམ་ཚང་དང་བཟའ་ཚང་གི་ངོས་ནས་བཤད་ན་གྱོང་གུད་ཧ་ཅང་ཆེ་བའི་ཚད་ལ་ོན་བསྡད་ཡོད་པ་རེད། ངའི་ཨ་མ་དང་། ངའི་སྲིང་མོ། ང་བཅས་ངེད་གསུམ་པོ་ཧ་ཅང་ཧ་ཅང་གིས་དཀའ་དུས་ཀྱི་ཚད་ལ་ཐོན་བསྡད་ཡོད་པ་རེད། དེ་ཡིན་དུས་མི་སུ་དང་སུ་ཡིན་རུང་རང་རང་གིས་བཤད་འདོད་པའི་སྐད་ཆ་རེ་ཡོད་ནི་རེད། དེ་བཤད་རྒྱུའི་དབང་ཆ་ང་ཚོར་ཡང་ཡོད་ན་འགྲིག་གི། དེ་ཡིན་དུས་དཔེ་ཆ་དེའི་ནང་དོན་གྱི་ཐད་ལ་བལྟས་ཡོང་བ་ཡིན་ནའང་འདི་ལྟར་བཀག་སྐྱིལ་བྱེད་དགོས་པའི་ཚད་ལ་ཐོན་མེད་པ་འདྲ་བོ་ཞིག་བསམ་གི། དེའི་ཕྱོགས་ནས་ངེད་ཚོའི་རེ་བ་ཡིན་ན་ཨ་ཕ་གང་མགྱོགས་མགྱོགས་སྒོ་ལ་ཡོང་ཐུབ་ན་བསམ་གི་ཡོད།

སྒྲ་ལ་ཉན་ན་ ཡེ་ཤེས་མཚོ་མོས་རང་གི་ཨ་ཕ་གླེང་བ་ འདི་ཡིན། འདིར་ཡིག་ཐོག་ལ་ཕབ་བཤུ་བྱེད་མཁན་བོད་ཀྱི་དུས་བབ་གསར་ཁང་ཡིན།