ང་ཚོ་ཀྲུང་གོ་བ་རེད་དམ།

དེང་སང་ང་རང་གི་ལས་ཀ་བྱེད་ས་འདི་རུ་ལས་ཀ་བྱས་དེ་ཟླ་ངོ་གཉིས་ལྷག་ཏག་ཏག་འགྲོ་བཞིན་ཡོད་ལ། ང་རང་གི་ལས་ཀའི་ཆ་ནས་བཤད་ན། དུས་ཚོད་ལ་གཏན་ཁེལ་ཞིག་ཡོད་པ་དེ་ནི་ཉིན་གཅིག་ལ་ཆུ་ཚོད་བཅུའི་རིང་དུ་ལས་ཀ་བྱེད་རྒྱུ་དེ་ཡིན། མང་ཤོས་ཤིག་ཉིན་གུང་ཆུ་ཚོད་བཅུ་གཉིས་ནས་སྒོ་རུ་བུད་དེ། སྤྱི་སྤྱོད་རླངས་འཁོར་ཡོང་སའི་འབབ་ཚིགས་དེར་སོང་ནས་སྒུག་དགོས་པ་ཡིན། མཚམས་རེར་སྐར་མ་བཅོ་ལྔ་ཉི་ཤུ་ཞིག་ལ་སྒུག་དགོས་ཀྱི་ཡོད། ཉུང་ན་སྐར་མ་ལྔ་ནས་བཅུ་ཡིན།

དེ་ནས་སྤྱི་སྤྱོད་རླངས་འཁོར་ས་ཚིགས་གཉིས་པ་དེ་ནས་ཡང་སྐྱར་དེ་ལྟར་སྒུག་དགོས་ཀྱི་ཡོད། སྤྱི་སྤྱོད་རླངས་འཁོར་གཉིས་པ་དེ་ནས་ཕྱི་རུ་འབབ་དུས་སུ། མང་ཤོས་ཆུ་ཚོད་གཅིག་མ་ཟིན་པ་ལ་སྐར་མ་གཉིས་གསུམ་ཡིན། ལས་ཀ་བྱེད་སར་སླེབས་མ་ཐག ནམ་རྒྱུན་དུ་གོན་པ་བརྗེ་རུ་འགྲོ་བ་དང་། རང་གི་བོད་བཟོའི་རྒྱབ་ཁུག་སྔོན་པོ་དེ་མི་སྒེར་ལ་གཏོགས་པའི་ཤིང་སྒམ་གྲུབ་བཞི་མ་དེ་ཡི་ནང་དུ་བླུགས།

ཐབ་ཚང་དུ་འབྱོར་ནས། ཨེས་སུ་རལ་གྱི་ལས་ཀ་བ་དེ་དག་ལ་འཕྲད་རྗེས་སུ། ཁོང་ཚོའི་སྐད་ཀྱི་སྟེང་ནས་ཞོགས་པ་བདེ་ལེགས་སམ། ཁྱེད་བདེ་མོ་ཟེར་གྱི་ཡོད། རྒྱ་ནག་ནས་འབྱོར་བའི་མ་བྱན་ཆེན་མོ་དང་ལས་མི་གཞན་གསུམ་ལ། རྒྱ་སྐད་ཀྱི་སྟེང་ནས་ཁྱེད་བདེ་མོ་ཟེར་གྱི་ཡོད། ཁ་ན་སྒྲ་ནས་ཡིན་པའི་མ་བྱན་འབྲིང་བ་དེར་ཐུག་དུས་དབྱིན་སྐད་ཀྱི་སྟེང་ནས། ཁྱེད་བདེ་མོ་ཟེར་གྱི་ཡོད། འོན་ཀྱང་། ཁ་ཆེ་བ་སྡེར་མ་དཀྲུ་མཁན་གཉིས་ཡོད་པ་དེ་གཉིས་ལ་ངས་རྩ་བ་ནས་ཁ་ཆེ་བའི་སྐད་ཆ་ཚིག་གཅིག་མི་ཤེས་སྟབས། ཨེས་པོའི་སྐད་ཀྱི་སྟེང་ནས་བདེ་མོ་ཡིན་ནམ་ཟེར་གྱི་ཡོད།

ང་རང་དུས་རྒྱུན་དུ་ཟ་ཁང་ནང་དུ་ཐབ་ཚང་གཅིག་ལ་སྡེ་ཚན་གཉིས་ནས་གསུམ་ཡོད་པ་རེད། སྡེ་ཚན་གསུམ་པ་དེ་ནི་ང་ཚོ་ཡོད་ས་དེར་མི་གཏོགས་པར་ཕར་ཕྱོགས་སུ་ཡོད། ཁོང་ཚོས་ཉི་ཧོང་གི་ཁ་ལག་རྐྱང་རྐྱང་བཟོ་བཞིན་ཡོད། སྡེ་ཚན་གཞན་གཉིས་ཡོད། སྡེ་ཚན་གཅིག་ཤོས་དེ་ནི་ཤར་ཕྱོགས་ཀྱི་ཁ་ལག་བཟོ་བཞིན་ཡོད་པ་རེད། ཤར་ཕྱོགས་ཐེ་ལན་ཀྲའི་ཁ་ལག་གཙོ་བོར་བཟུང་ཡོད་ཀྱང་། བཟོ་མཁན་རྒྱ་ནག་ནས་ཡོང་བའི་མ་བྱན་ཡིན། ང་རང་སྡེ་ཚན་གཉིས་པ་དེར་གཏོགས་པ་དང་། ང་ཚོས་བཟོ་བཞིན་པ་དེ་དག་ནི་ཁུ་བའི་རིགས་དང་གྲང་ཚལ་གྱི་རིགས་ཡིན། ད་དུང་། ཟུར་ཟས་སམ་ཞོར་ཟས་མངར་མོའི་རིགས་བཟོ་བཞིན་ཡོད་པ་རེད།

ང་རང་དེང་ཐོག་ནས་ཐབ་ཚང་ནང་གི་རྒྱ་མི་དང་། ཁ་ན་སྒྲའི་མ་བྱན། ཨེས་སུ་རལ་གྱི་མ་བྱན། ཁ་ཆེ་བའི་མི་གཉིས་ཁོང་ཚོ་སུ་ཡིན་ཡང་མཐུན་ལམ་ཡག་པོ་བྱས་སྟབས། མི་སུས་ཀྱང་། བྱ་བ་ཆེ་མ་ཆུང་གསུམ་གང་ལ་ཡིན་ཡང་ང་རང་ལ་སྐད་གཏོང་གི་ཡོད། དེ་ནི་ཁོང་ཚོས་ང་རང་གིས་ཕྱིར་ཁ་ལན་མ་ལོག་པའི་གོ་སྐབས་དེར་དམ་འཛིན་བྱེད་ཀྱི་ཡོད་པ་རེད།

རྒྱ་མི་དག་གིས་ང་རང་ལ་རྒྱ་སྐད་ཀྱི་སྟེང་ནས་ཁ་བརྡ་བྱེད་པ་དང་ལས་སྐུལ་བྱེད་ཀྱི་ཡོད། ཁ་ན་སྒྲ་ནས་ཡིན་པའི་མ་བྱན་འབྲིང་བ་དེས་ནམ་རྒྱུན་ང་རང་ལ་དབྱིན་སྐད་བཤད་ཀྱི་ཡོད། ཨེས་སུ་རལ་གྱི་ལས་མ་དག་གིས་ང་རང་ལ་ཨེས་པོས་བཤད་ཅི་ཐུབ་བྱེད་ཀྱི་ཡོད་ལ། མང་ཤོས་ཤིག་ང་རང་གི་གཏན་ནས་གོ་ཐུབ་ཀྱི་མེད་ཀྱང་། ཟ་མ་མི་ཉུང་བ་ཞིག་ཁོང་ཚོས་ནམ་རྒྱུན་བཤད་བཤད་ནས་ད་ལྟ་རྣ་ལམ་དུ་ཅུང་ཙམ་བྱུང་འདུག་ཡང་། ངས་ད་ལྟ་ཡང་ཁོང་ཚོའི་སྐད་གཏན་ནས་ཤེས་ཀྱི་མེད་ཟེར་ན་མི་འགྲིག་ཡང་། རང་འགོ་ཐོན་པ་ཞིག་ཤེས་ཀྱི་མེད་ལ། ཐབ་ཚང་ནང་གི་ལས་སྣེ་གལ་ཆེན་ཞིག་ང་རང་གི་འཛིན་མི་ཐུབ་པ་དེ་ཡང་། ངས་ཨེས་པོ་མི་ཤེས་པའི་ཡིན། རྒྱུ་མཚན་ཟས་ཐོ་ཚང་མ་ཨེས་པོའི་སྟེང་ནས་རྩིས་འཁོར་བརྒྱུད་ཚུར་ཐབ་ཚང་ལ་གཏོང་གི་ཡོད་དུས། ངས་ཀློག་ཤེས་ཀྱི་མེད་པས་ཡིན། ད་སྐབས་ཟུར་ཟས་རིགས་ཁ་ཤས་ཤིག་ཡོད་པ་དེ་དག་ཉིན་ལྟར་བལྟས་པ་ཡིན་སྟབས། ད་ནི་ཟུར་ཟས་རིགས་ཁ་ཤས་ཀྱི་མིང་དེ་ང་རང་གི་ཤེས་ཀྱི་ཡོད་ཀྱང་། ཁ་ལག་གཞན་དག་གི་མིང་ད་ལྟ་ཡང་ཀློག་ཐུབ་ཀྱི་མེད།

ལས་ཀ་བྱེད་ས་ནས་དུས་ཡུན་རིང་དྲགས་པ་ཡིན་མིན་མི་ཤེས་ཀྱང་། ལས་ཀ་བྱེད་ས་ནས་ལས་ཀ་བྱེད་པར་སྤྲོ་སྣང་ཡོང་བ་ལ་ཚང་མ་འཆམ་མཐུན་ཡོང་བ་དེ་ནི་གལ་ཆེན་པོ་ཡིན་ཡང་། ལས་མི་ཚང་མ་ཕྱོགས་སོ་སོ་ནས་ཡོང་བའི་གོམས་གཤིས་མི་འདྲ་བའི་དབང་གིས་ཕན་ཚུན་ལ་ལྟ་སྟངས་ཟེར་ནས་བཤད་ཁག་པོ་ཡིན་མོད། ལས་ཀའི་ཕྱོགས་ནས་སྡུག་རུས་བྱེད་ཐུབ་མིན་གྱི་བར་ཆད་ཧ་ཅང་ཆེ་བའི་ས་འདིའི་མི་མང་ཤོས་ཀྱི་ལས་ཡུན་རིང་བོ་མི་བྱེད་པ་དང་། ཁོང་ཚོ་ཆུ་ཚོད་ལྟར་གླ་ཆ་དགོས་ཀྱི་ཡོད་ལ། ཆུ་ཚོད་ཚང་བ་དང་བུད་འགྲོ་ངེས་ཡིན། འོན་ཀྱང་། ཤར་ཕྱོགས་ནས་ཡོང་བའི་རྒྱ་མི་དེ་དག་ནི་ལས་གླ་ཟླ་བ་ལ་རྩིས་བརྒྱབ་དེ་སྤྲོད་ཀྱི་ཡོད་ལ། ལས་ཡུན་ཡང་ཧ་ཅང་རིང་བོ་ཡིན། ཞོགས་པ་ཆུ་ཚོད་བཅུ་བ་ནས་དགོང་མོའི་ཆུ་ཚོད་དང་པོ་བར་དུ་བསྡོད་མཁན་ཡོད་ལ། ཉིན་གུང་ཆུ་ཚོད་དང་བོ་ནས་དགོང་མོའི་ཆུ་ཚོད་དང་བོ་བར་དུ་བསྡོད་མཁན་ཡང་ཡོད།

ལས་གླ་ཡང་ཕར་དེད་ནས་སོང་དུས་ལས་གླ་མང་ཤོས་དེ་རེག་ས་ནི། ཡུལ་མི་ཨེས་སུ་རལ་གྱི་མི་དེ་ཚོ་ཆགས་ཀྱི་ཡོད་པ་དང་། ལས་ཡུན་རིང་བ་དང་དཀའ་ལས་ཁག་ཤོས་བྱེད་མཁན་དེ་དག་ལ་རེག་གི་མེད་པ་རེད། འོན་ཀྱང་། རྒྱ་ནག་ནས་ཡོང་བའི་ལས་མི་དེ་དག་གིས་རང་ཉིད་ཡོང་སའི་རྒྱལ་ཁབ་ཀྱི་ལས་གླ་ལ་བསམ་བློ་བཏང་དུས་བསྡབས་ཁ་ཤས་ཀྱི་འཕར་ཡོད་སྟབས་ཁ་རོག་གེར་མགོ་བོ་སྒུར་ནས་བྱེད་ཀྱི་ཡོད་པ་རེད་ལ། ཤར་ཕྱོགས་ནས་ཡོང་བའི་མི་མང་བོ་ཞིག་གིས་དེ་ལྟར་བསམ་ནས་སྤྱི་ཚོགས་གསར་བ་དང་རྒྱལ་ཁབ་གསར་བ་ཞིག་ནས་ལས་ཀ་ཡར་མར་མང་བོ་བརྗེ་བོ་རྒྱག་རྒྱུར་སྐྲག་ནས་བསྡད་ཡོད་པ་རེད།

ང་རང་གི་རྒྱ་སྐད་ཡག་པོ་མེད་ཀྱང་། ཁོང་ཚོས་གང་བཤད་པའི་བརྒྱ་ཆའི་དྲུག་བཅུ་ནས་བདུན་བཅུ་གོ་ཐུབ་པ་དང་ཕར་ལན་ཡང་གང་ཙམ་ཞིག་ལོག་ཐུབ་ཀྱི་ཡོད་པས། ཁོང་ཚོའི་ནམ་རྒྱུན་དུ་ང་རང་ལ་སེམས་ཐག་ཉེ་བོ་བྱེད་ཁུལ་བྱེད་ལ། ཁོང་ཚོས་ནམ་རྒྱུན་དུ་ང་རང་ནི་ཀྲུང་གོ་བ་ཞིག་ཡིན་པར་འདོད་ཀྱི་ཡོད་ཀྱང་། ངས་ཁོང་ཚོ་ལ་ང་རང་བོད་པ་ཡིན་ཟེར་ནས་གླེང་དུས། མ་བྱན་ཆེན་མོ་དེས་བོད་ཟེར་ན་རྒྱལ་ཁབ་གང་ལ་ཟེར་གྱི་ཡོད་པ་རེད་ཟེར་ནས་ཐེངས་མ་ཁ་ཤས་ལ་དྲིས་སོང་། དེ་དུས་ངས་ཁོ་ལ་ཁྱེད་ཅག་གིས་ནམ་རྒྱུན་ཤིས་ཙང་ཟེར་ནས་ཐོས་བསྡད་པ་དེ་ལ་ཟེར་གྱི་ཡོད་པ་རེད་ཅེས་བཤད་དུས་སུ། མགོ་བོ་གཡུགས་ཞོར་དུ། དེ་ནི་ཀྲུང་གོ་བ་མ་རེད་དམ་ཟེར་ནས་བཤད་སོང་། ངས་དེ་ལ་དེ་ནི་རྒྱ་ནག་སྲིད་གཞུང་གི་ལྟ་ཚུལ་རེད། ཡིན་ཡང་། ད་ལྟའི་འཆར་ང་ཚོའི་༧རྒྱལ་བ་རིན་པོ་ཡིས་རྒྱ་ནག་སྲིད་གཞུང་གིས་བོད་ལ་རང་དབང་སྤྲད་པ་ཡིན་ན། རྒྱའི་མངའ་ཁུངས་སུ་བསྡོད་རྒྱུར་རེ་བ་ཡོད་ཅེས་གསུང་གི་ཡོད་པ་རེད་ཅེས་བཤད་དུས་སུ། ཁོས་དེ་རེད། བོད་འདི་ཤང་ཀང་ལྟ་བུ་ཞིག་ཆགས་ཡིན་ན་ཡག་པོ་འདུག རྒྱལ་ཁབ་གཅིག་ལ་ལམ་ལུགས་གཉིས་ཟེར་བ་དེ་བྱས་པ་ཡིན་ན་ཟེར། ངས་རེད་རེད། འོན་ཀྱང་། ད་ལྟའི་སྲིད་གཞུང་འདིས་བྱེད་སྟངས་ལ་བལྟས་པ་ཡིན་ན་ཁག་པོ་རེད་ཅེས་བཤད་པ་ཡིན།

གང་ལྟར། དེ་ནས་བཟུང་ཁོས་ཐབ་ཚང་ནང་ནས་ལས་མི་གཞན་དག་དང་ལྷན་དུ་ལས་ཀ་འགྲིག་མིན་སོགས་ཕྲན་པུ་རེ་བྱུང་དུས་སུ། ཁོས་ང་ཚོ་ཀྲུང་གོ་བ་ཚོས་ནམ་ཡང་མཐོང་ཆུང་གསེད་མི་སྲིད་ཟེར་ནས་ང་ལ་ཡང་ཡང་བཤད་ཀྱི་ཡོད། ངས་དེ་ལ་གཏན་ནས་ལན་འདེབས་བྱེད་འདོད་མེད་པར་བཞག་པ་ཡིན། ཁ་རོག་གེར་བསྡོད་ཀྱི་ཡོད། རྒྱུ་མཚན་ནི་ཁོ་རང་གིས་ཀྲུང་གོ་རྒྱལ་ཁབ་ནི་ད་ལྟའི་འཆར་སྟོབས་ཆེན་རྒྱལ་ཁབ་དང་འཛམ་གླིང་སྟེང་གི་ཆེས་ཡར་རྒྱས་ཅན་གྱི་རྒྱལ་ཁབ་ཞིག་ལ་འཁྲུལ་ནས་ཡོད་པའི་ཡིད་ཆེས་ཤིག་བྱེད་ཀྱི་ཡོད་པ་དེར་ངས་རྒྱ་སྐད་ཀྱི་སྟེང་ནས་གོ་བརྡ་གསལ་བོ་ཞིག་སྤྲོད་ཐུབ་ཀྱི་མེད་སྟབས། ངས་རྩོད་པ་ཙམ་ཞིག་ཁོ་ལ་བྱས་པ་དེར་དོན་སྙིང་མེད་པར་མཐོང་སོང་། ཡིན་ཡང་། སྤུན་ཟླ་ཚོ། ང་ཚོ་ཀྲུང་གོ་བ་རེད་དམ།