སེམས་སྐྱོ་བའི་མིག་ཆུ། ཀརྨ་པ་ཨོ་རྒྱན་ཕྲིན་ལས་རྡོ་རྗེ།

སྒྲུབ་བརྒྱུད་བསྟན་པའི་མངའ་བདག་༧དཔལ་རྒྱལ་དབང་ཀརྨ་པ་མཆོག་གི་སྙན་རྩོམ་འདི་གངས་ཕྲུག་ངས་ཐེངས་དང་པོ་མཇའ་རྒྱུ་བྱུང་བ་དགའ་སྤྲོ་ཤུན་ཏུ་ཆེ།

མཁྱེན་ནོ། མཁྱེན་ནོ། ཀརྨ་པ་མཁྱེན་ནོ།
ཀརྨ་པ་ཨོ་རྒྱན་ཕྲིན་ལས་རྡོ་རྗེ་མཁྱེན་ནོ།

མཁྱེན་ནོ། མཁྱེན་ནོ། ཀརྨ་པ་མཁྱེན་ནོ།
ཀརྨ་པ་ཨོ་རྒྱན་ཕྲིན་ལས་རྡོ་རྗེ་མཁྱེན་ནོ།

མཁྱེན་ནོ། མཁྱེན་ནོ། ཀརྨ་པ་མཁྱེན་ནོ།
ཀརྨ་པ་ཨོ་རྒྱན་ཕྲིན་ལས་རྡོ་རྗེ་མཁྱེན་ནོ།

རིན་པོ་ཆེ་སྙན་རྩོམ་ཡག་པོ་བྲིས་འདུག ངོ་མ་མིང་དོན་མཚུང་གི ད་དུང་མུ་འཐུད་ནས་འདི་འདྲའི་སྙན་རྩོམ་ལ་ཡང་ཡང་མཇལ་ཐུབ་པའི་སྨོན་འདུན་ཞུ།།

སྙན་སྙན་ཀརྨ་པ་ཡི་བཀའ་རྩོམ་དེ།
ཟབ་ཟབ་བྱམས་སེམས་གཞི་བཞུགས་སྤུན་ཟླ་ལ།
ཏག་ཏག་གཟིགས་བཞིན་ཡོད་པར་མངོན་གི་འདུག
ངུ་ངུ་མ་བྱེད་ཤུལ་ལུས་སྤུན་གྲོགས་ཚོ།

ཀརྨ་ལས་ལ་འགྲེལ་ན་བོད་པའི་ལས།
ཀརྨ་པ་ལ་འགྲེལ་ན་བླ་མའི་མཚན།
ཀརྨ་པ་ཡི་སྙན་རྩོམ་མཇལ་དུས་སུ།
ཀརྨ་པ་ཡི་བོད་ལས་བྱེད་པར་མངོན།།

གོང་ལ་མི་བཞུགས་མང་ཚོགས་གྲལ་ལ་ཕེབས།
སྨད་ལ་མི་བསྡོད་རྒྱ་མིའི་འོག་ནས་ཐར།
བར་ན་མི་བཞུགས་དེང་དུས་སློབ་ལ་བརྩོན།
གང་ལ་ཕེབས་ཀྱང་མཛད་འཕྲིན་རྒྱས་ངེས་ཡིན།

བསྟོད་པ་མ་ཡིན་སྒེར་དོན་ཅི་ཡང་མེད།
འོན་ཏེ་འོ་ཚང་བོད་པའི་སྐྱེས་ཆེན་ཡིན།

ཀརྨ་ཞེས་བཅོས་རོགས

བརྩེ་དུང་དྲོན་མོ་དྲི་བཞོན་རླུང་ལ་སྐུར། སྐྱོ་གདུང་མཆི་མའི་བྲང་ཁོག་ལན་བརྒྱར་བརླན། སྙིང་རྗེའི་མེད་པའི་ས་ཆེན་སྲིན་པོ་འདིས།ཉེས་མེད་གཉོམ་ཆུང་སྡུག་ལ་སྦྱར་འདི་སྐྱོ།

༧དཔལ་རྒྱལ་དབང་ཀརྨ་པ་མཆོག་སྐུ་ཚེ་ཞབས་པད་བསྐལ་བརྒྱར་བསྟན་པ་ཤོག ཁྱེད་ཀྱིས་ལྗགས་རྩོམ་གནང་བའི་སྙན་ངག་ནི་གཞན་གྱི་སྙན་ངག་དང་མི་འདྲ་བའི་དམིགས་གསལ་ཁྱད་ཆོས་འདུག དེ་དང་འདྲ་བའི་སྙན་རྩོམ་ཡང་ཡང་མཇལ་བའི་རེ་སྨོན་ཞུ་བཞིན་ཡོད།

འདི་འདྲའི་གསུང་རྩོམ་གནང་བར་ཐུགས་རྗེ་ཆེ།

བཀའ་རྒྱུད་བསྟན་པའི་སྲོལ་འཛིན་དཔལ་རྒྱལ་བ་ཀ་རྨ་པ་ཨུ་རྒྱན་འཕྲིན་ལས་རྡོ་རྗེ་མཆོག་གི་སྐུ་ཚེ་ཡུན་རིང་བརྟེན་ཅིང་མཛད་འཕྲིན་ཕྱོགས་བཅུར་ཁྱབ་པའི་སྨོན་འདུན་ཞུ།

གཟིགས་གཟིགས་ཐུགས་རྗེས་གཟིགས་ཤིག་སྤྱན་རས་གཟིགས།།
མགོན་མགོན་སྐྱབས་མགོན་མཛོད་ཅིག་འོད་དཔག་མེད།།
དཔག་དཔག་ཚེ་དཔག་མེད་ཀྱིས་ཚེ་སྤྱིན་སྩོལ།།
གསོལ་གསོལ་བོད་འབངས་ཡོངས་ཀྱིས་གསོལ་བ་འདེབས།།

མེད་མེད་མཐའ་མེད་འཁོར་བའི་རྒྱ་མཚོ་ལས།།
གྲོལ་གྲོལ་དེད་དཔོན་མཛོད་ཅིག་སྤྱན་རས་གཟིགས།།
འཐིབས་འཐིབས་ཏིག་མུག་མུན་པས་འཐིབས་ཙ་ན་།།
གསལ་གསལ་སྒྲོན་མེ་སྤོར་ཅིག་འོད་དཔག་མེད།།

འབར་འབར་ཞེ་སྡང་མེ་ལྟར་འབར་དུས་འདིར།།
ཞི་ཞི་ཆུ་བསིལ་སྩོལ་ཅིག་ཚེ་དག་མེད།།
འཁྲུགས་འཁྲུགས་འདོད་ཆགས་ཆུ་ལྟར་འཁྲུགས་ཙ་ན།།
ལུགས་ལུགས་གནད་ལུགས་རྟོགས་མཛོད་སྤྱན་རས་གཟིགས།།

བསྡམས་བསྡམས་སེར་སྣའི་མདུད་པས་བསྡམས་དུས་འདིར།།
གཏོང་གཏོང་གཉེར་པ་མཛོད་ཅིག་འོད་དཔག་མེད།།
ལུས་ལུས་སྒྱུ་ལུས་འབྱུང་བཞིས་ཟིན་ཙ་ན།།
སྨིན་སྨིན་སྒྱུ་ལུས་སྨིན་ཅིག་ཚེ་དཔག་མེད།།

སྐྲག་སྐྲག་འཆི་ཁར་འཇིགས་སྐྲག་སྐྱེ་ཙ་ན།།
གསོ་གསོ་སེམས་གསོ་མཛོད་ཅིག་སྤྱན་རས་གཟིགས།།
འཁྱམས་འཁྱམས་བར་བདོའི་འཕྲང་ལ་འཁྱམས་དུས་དེར།།
གཉེན་གཉེན་དམ་པ་མཛོད་ཅིག་འོད་དཔག་མེད།།

མང་མང་དཀྱིལ་ནས་གཅིག་པུར་འགྲོ་ཙ་ན།།
དག་དག་ཞིང་དུ་བསྐྱེལ་ཅིག་ཚེ་དཔག་མེད།།
སྡུག་སྡུག་ལས་ཀྱི་སྡུག་བསྔལ་བྱུང་དུས་འདིར།།
གྲོལ་གྲོལ་དེད་དཔོན་མཛོད་ཅིག་སྤྱན་རས་གཟིགས།།

ངེས་ངེས་སྐྱེ་མཐའ་འཆི་བ་ངེས་པར་འོང་།།
བསྟན་བསྟན་ལུང་བསྟན་མཛོད་ཅིག་འོད་དཔག་མེད།།
འཕེལ་འཕེལ་ཚེ་དང་ཡེ་ཤེས་བསོད་ནམས་སོགས།།
མྱུར་མྱུར་རབ་ཏུ་འཕེལ་མཛོད་ཚེ་དཔག་མེད།།

དད་དད་བསྟན་འཛིན་རྒྱ་མཚོར་རབ་ཏུ་དད།།
དྲན་དྲན་བོད་འབངས་ཀུན་གྱིས་སྙིང་ནས་དྲན།།
ལྷང་ལྷང་ཡི་དྲུག་མ་ཎིས་དབྱངས་རྟ་ལེན།།
སྐྱོ་སྐྱོ་གདུང་སེམས་དྲག་པོས་གསོལ་བ་འདེབས།།

དཔལ་དཔལ་རྒྱལ་བ་ཀརྨའི་སྨོན་ལམ་འདི།།
མཁྱེན་མཁྱེན་གངས་ཅན་མགོན་པོས་མ་དོར་མཛོད།།
དྭངས་དྭངས་བདག་གི་ལྷག་བསམ་དྭངས་མོ་འདིས།།
དཀར་དཀར་གངས་ཅན་དབུ་འཕངས་དགུང་འཐོར་ཤོག།

འདས་འདས་ཚེ་ལས་འདས་པའི་སྐྱེ་འགྲོ་དང་།།
གསོན་གསོན་འགྲོ་བ་དྲུག་གི་སེམས་ཅན་རྣམས།།
དགེ་དགེ་ཚོགས་གཉིས་མཐུ་ལས་སྐུ་གཉིས་འཐོབ།།
སྟོང་སྟོང་ཁམས་གསུམ་འཁོར་བ་སྟོང་གྱུར་ཅིག།

སྤུན་ཟླའི་ཚེ་སྲོག་མདེའུ་ཁར་ཆུང་།།
ཚབ་ཆེའི་གོད་ཆག་དེ་ལས་ལྕི།།
གཞན་དབང་ལུགས་མེད་གཉའ་ནོན་ལྕི།།
ཡིན་ཡང་རེ་དམིགས་མགོན་ཁྱོད་ཉིད།།

དཔལ༸རྒྱལ་བ་ཀརྨ་མཆོག་གི་སྐུ་ཚེ་བསྐལ་བརྒྱར་བརྟན་ཅིང་
བཞེད་དགོངས་མཐའ་དག་གེགས་མེད་མྱུར་འགྲུབ་ཡོང་བའི་རེ་སྨོན་ཞུ།

དམིགས་མེད་བརྩེ་ཆེན་ཀློང་ནས་རྗེས་ཆགས་འོད།།
བསིལ་ལྡན་ལྗོངས་སུ་འཆེད་པའི་དབྱར་སྐྱེའི་རྔས།།
འབྱུང་དགྲའི་གནོད་པས་གཙེས་པའི་ཉམ་ཐག་འབངས།།
དབྱུག་དབྱུང་གདུང་བ་མཐའ་དག་རྨེག་མེད་བྱས།།

དཔལ་རྒྱལ་བ་ཀརྨ་པ་མཆོག་སྐུ་ཚེ་ཡུན་དུ་བརྟན་ཅིང་མཛའ་འཕྲིན་མཁའ་ལྟར་རྒྱས་པའི་སྨོན་འདུན་ཞུ།

མགོ་ནག་བོད་པར་སྐྱེས་པས་ཆུང་་བསམ་པ་ཟིན་ཙམ་ནས་ནང་ཆོས་ལ་དད་པ་སྐྱེས་སོང་། བླ་ཆེན་སྤྲུལ་སྐུ་དག་ལ་ནི་དག་སྣང་དང་དད་པ། སྐྱབས་དང་མཁྱེན་པ་བྱེད་ཀྱི་ཡོད། ཁོད་མི་སྙོམས་པའི་བཙན་བྱོལ་ལམ་བུའི་ཐོག་ཏུ་སླེབས་ཀྱང་དགའ་ས་དང་མོས་ས་ལ་འགྱུར་བ་འགྲོ་ཡི་མི་འདུག་ལ། ད་དུང་ཕ་ཡུལ་དང་འགྱངས་བཞིན་འགྱངས་བཞིན་སྦྲ་ནག་དང་རྩམ་པ་ལ་དུང་བ་ཆེ་རུ་འགྲོ་བ་དང་། མགོ་ཐོག་གི་བླ་མ་དང་རང་རིགས་ཀྱི་རིག་གནས་སོགས་ལ་ཡང་དེ་ལྟར་རེད། རྒྱུ་མཚན་དེ་དག་གིས་ཁོམ་པ་རེ་བྱུང་ཚེ་དྲ་ཐོག་ན་ཡོང་བ་དང་། བོད་དང་འབྲེལ་བའི་གནས་ཚུལ་ཁག་ལ་མིག་ཉུལ་རྒྱག་པ། ད་དུང་བླ་ཆེན་མི་ཆེན་དག་ཀྱང་གང་ཞིག་གནང་གི་ཡོད་འགྲོ་བསམ་བཞིན་འཚོལ་གྱི་ཡོད། བར་སྐབས་ཤིག་ལ་རྒྱལ་བ་ཀརྨ་པ་རྒྱ་མི་ཐེ་ཝན་བ་ཞིག་གི་ས་ནས་རི་མོ་སྦྱོང་གི་ཡོད་པའི་སྐོར་བལྟ་རྒྱུ་འདུག སྐབས་དེ་དུས་ང་ལ་སེམས་ཁྲལ་ཁ་ཤས་བྱུང་། རྒྱ་མི་དེ་ཚོའི་ནང་གསང་ཉུལ་མེད་འགྲོ། རི་མོ་སྦྱངས་ནས་ཕན་གང་ཡོད། དེ་ནི་དུས་བཟང་འཕྲོ་བརླག་དང་རིག་པ་འཆལ་རོགས་རེད། དེ་ལས་གྲུབ་མཐའ་རིས་མེད་ཀྱི་སྐྱེས་ཆེན་དག་ལས་དབང་ལུང་མན་ངག་ཞུ་དགོས་པ་དང་། ནང་ཆོས་ལ་བརྡར་ཤ་དཔྱོད་དགོས་པ། ལྷག་པར་མ་འོངས་དགོས་མཁོ་ཆེ་བར་བསམས་ནས་འཆད་རྩོད་རྩོམ་གསུམ་ལས་འཆད་ཀྱི་སྒྱུ་རྩལ་ཐད་ལ་སྦྱངས་པ་མང་ཙམ་གནང་ན་ཕན་ཐོགས་ཆེན་པོ་ག་འདྲ་མེད་འགྲོ་བསམ་པ་ཞིག་བྱུང་། གོང་ས་མཆོག་གི་བཀའ་མོལ་གསུང་སྟངས་དང་། སྐད་ཆའི་སྒྱུ་རྩལ་དེ་དག་ཧང་སངས་དགོས་པ་ཞིག་འདུག སྐད་ཆ་མགོ་ཡོད་པ། མཇུག་ཡོད་པ། འབྲེལ་ཆགས་པ། འགལ་བ་མེད་པ། གནད་ལ་འཁེལ་བ། ཚོད་ཟིན་པ། སྣེ་འཇོག་པ། ཉན་སྤྲོ་བ། སེམས་ལ་འབབ་པ། དུམ་དུམ་མིན་པ། ད་དུང་སྐུ་ལུས་ཀྱི་རྣམ་འགྱུར་སྟོན་སྟངས། འགྲོ་བའི་མིག་ལ་མཛེས་པ། ང་རྒྱལ་མེད་པ། མཐོན་པོར་གནས་ཀྱང་དམའ་ས་འཛིན་ཤེས་པ། གཡས་གཡོན་གྱི་འཁོར་ལ་ཡང་ཞེ་ས་གུས་ཞབས་བྱེད་ཤེས་པ་སོགས་བོད་པའི་བླ་མ་ཞིག་གིས་བོད་པ་ཙམ་མ་ཡིན་པར་ཕྱི་རོལ་གྱི་འགྲོ་བ་མང་པོ་ཞིག་གདུལ་བྱར་བཟུང་ནས་བོད་ཀྱི་བསྟན་པ་ཆབ་སྲིད་ལ་སྲི་ཞུ་འབུལ་དགོས་དགོངས་ན་གོང་གསལ་གྱི་གནད་དོན་དེ་དག་གལ་ཆེན་པོ་རེད་འདུག་སྙམ། གཞན་ཡང་དེ་རིང་རྒྱལ་བ་ཀརྨ་པའི་སྙན་ངག་མཇལ་བས་རང་སེམས་སུ་ཤོང་དཀའ་བའི་ཚད་དུ་སླེབས་སོང་། གོང་དུ་མཆན་ཞིག་གི་ནང་བཀོད་པ་བཞིན་དངོས་གནས་བོད་ཀྱི་སྐུ་ན་གཞོན་པའི་བླ་ཆེན་དག་གི་ནང་དུ་སྙན་ངག་འདི་ཙམ་འཇོན་མཁན་ཨེ་ཡོད་ན་བསམ་པ་ཞིག་འདུག སེམས་དགའ་སོང་། སྐྱིད་སོང་། ལག་ཐལ་མོ་སྦྱར་ཡོད། མུ་མཐུད་སློབ་གཉེར་ལ་འཐུས་ཤོར་མི་འགྲོ་བ་ཞིག་གནང་རོགས་ཞུ་རྒྱུ་ནི་བོད་འབངས་ཐ་མལ་བ་ཞིག་གི་རེ་བ་ཡིན་ནོ།

སྤྲུལ་སྐུའི་མིང་ཅན་མང་པོ་ལ་ཆོས་དང་རིག་གནས་ཀྱི་ཡོན་ཏན་མེད་པར་མ་ཟད་བོད་བསྟན་སྲིད་ཀྱི་གནས་སྟངས་ལ་སེམས་ཚོར་ཅི་ཡང་མེད་པའི་མུན་སྟོང་དུ་གྱུར་བའི་སྐབས་འདིར། བོད་པའི་རིག་གནས་ཀྱི་བྲོ་བ་ཡོད་པའི་རྒྱལ་དབང་ཀརྨ་པ་མཆོག་གི་རྩོམ་ཡིག་འདི་མཐོང་བས་རང་སེམས་ལ་སྤོབས་པ་རྒྱས་སོང་།
རྒྱལ་དབང་ཀརྨ་པ་མཆོག་ཉིད་བསྟན་འགྲོའི་མགོན་དུ་སྐུ་ཚེ་བརྟན་ཅིང་ཐུགས་ཀྱི་བཞེད་དགོངས་ཆོས་བཞིན་འགྲུབ་པ་དང་། རླབས་ཆེན་གཞན་ཕན་ཀྱི་མཛད་ཕྲིན་འཛམ་གླིང་ཀུན་ནས་ཀུན་ཏུ་འཕེལ་ཞིང་རྒྱས་གྱུར་ཅིག
གོ་སྐབས་འདི་བརྒྱུད་དེ་ཆོས་རྗེ་རྒྱལ་དབང་ཀརྨ་པ་རིན་པོ་ཆེས་གཙོས་པའི་བསྟན་འཛིན་སྐྱེས་ཆེན་རྣམས་ལ། ངས་ལྷག་བསམ་རྣམ་དག་གི་རེ་བསྐུལ་ཁ་ཤས་ཞུས་ན།
༡༽ ཚད་བཀག་མེད་པར་མུ་འཐུད་དེ་རྒྱལ་དབང་ཀརྨ་པ་རིན་པོ་ཆེ་མཆོག་གིས་རིས་མེད་བླ་མ་ཚད་ལྡན་རྣམས་ཀྱི་མདུན་ནས་དབང་ལུང་ཁྲིད་གསུམ་ཟབ་མོ་ཐོབ་ཐབས་གནང་དགོས།
༢༽ སྐུ་གོང་མ་ནང་བཞིན་མདོ་རྒྱུད་མན་ངག་རྣམས་ལ་ཐོས་བསམ་སྒོམ་པར་བྱེད་དགོས་ཞིང་། ཁྱད་པར་བྱང་སེམས་ལ་བློ་སྦྱོང་དང་། ཡང་སྒོས་ཡི་དམ་ཀྱི་ཉམས་ལེན་དང་ཕྱག་རྫོགས་ཀྱི་མན་ངག་ལ་གཞུང་ནས་གསུང་བའི་ཉམས་རྟོགས་ཀྱི་རྟགས་རྣམས་མ་ཐོན་བར་བསྙེན་སྒྲུབ་ལ་བཞུགས་ཐབས་གནང་དགོས།
༣༽ མནའ་བོའི་བོད་ཀྱི་བཅུ་ཕྲག་རིག་གནས་ལ་སློབ་སྦྱོང་ལེགས་པར་བྱེད་དགོས་པ་གཞིར་བཞག དེང་རབས་ཀྱི་རང་བྱུང་ཚན་རིག སྤྱི་ཚོགས་ཚན་རིག སྐྱེ་དངོས་ཚན་རིག སེམས་ཁམས་ཚན་རིག ཚད་བསྡུར་ཚན་རིག་སོགས་ལ་སློབ་སྦྱོང་གང་འཚམས་ཞིག་བྱེད་དགོས་ཏེ། དེང་སང་མི་མང་པོས་ཚན་རིག་ལ་རྨོངས་དད་བྱེད་བཞིན་ཡོད་པར་མ་ཟད་དགེ་བཤེས་དང་སྤྲུལ་སྐུའི་མིང་ཁྱེར་མཁན་གྱི་ཆེ་རློམ་པ་འགའ་རེས་ཀྱང་། གཞན་ཟེར་གཡོམ་བརྒྱུགས་ཀྱིས་སངས་རྒྱས་ཀྱི་ཆོས་ལས་ཚན་རིག་བདེན་པ་ཆེ་སྙམ་པའི་ལོག་རྟོག་གི་སྨྲེང་ངག་འདོན་གྱིན་འདུག་པས་གཟབ་དགོས།
༤༽ དེང་སང་བོད་ཀྱི་མཁན་སྤྲུལ་ཆོས་ཤེས་མཁན་ཅུང་ཟད་ཡོད་པ་ཐམས་ཅད་ཕྱི་རྒྱལ་ལ་ཕེབསཅིང་བཞུགས་ནས། མ་བསྐུལ་དང་ལེན་ཀྱིས་ཕྱི་རྒྱལ་མི་སྐྱ་ཕོ་མོ་ཐམས་ཅད་ལ། དགའ་ཚོར་ཆེན་པོས་བཀའ་ཆོས་གང་ཟབ་གསུང་བ་དང་འབྲེལ། ཆོས་ཞུ་བ་ཚོ་ལ་ཁ་དགའ་ངོ་ཡག་གིས་གུས་བཀུར་ཆེན་པོར་བྱེད་བཞིན་ཡོད་ན་ཡང་། བྱམས་བརྩེ་ཅན་གྱི་མཁན་སྤྲུལ་འདི་ཚོས། བོད་དང་རྒྱ་བལ་འབྲུག་གསུམ་ལ་ཡོད་པའི་བོད་རིགས་མི་སྐྱ་ཕོ་མོ་ཚོ་ལ། ཕྱག་དབང་ཙམ་གནང་བའམ་མྐབས་རེ་ཚེ་དབང་ཙམ་བསྐུར་བ་ལས་དགའ་ཚོར་ཆེན་པོས་བཀའ་ཆོས་གང་ཟབ་གནང་མཁན་ཕལ་ཆེར་མེད་པར་བརྟེན། དེང་སང་བོད་རིགས་མི་སྐྱ་ཕོ་མོ་མང་ཆེ་བས་སངས་རྒྱས་ཆོས་ལ་རྨོངས་དད་ཡོད་ལ་མེད་ལ་ཁད་ཙམ་ལས། མཆོག་གསུམ་ལ་རྒྱུ་མཚན་ཤེས་པའི་དད་པ་ཡང་དག་ཡོད་མཁན་ཤིན་ཏུ་དཀོན་པས། བོད་ཀྱི་མི་རབས་རྗེས་མ་རྣམས་ཆོས་མེད་ཀླ་ཀློའི་མི་རིགས་ཞིག་ཏུ་འགྱུར་ཉེན་ཆེན་པོར་འདུག།
སྐྱབས་མགོན་རྒྱལ་བ་རིན་པོ་ཆེ་དང་བསྟན་འཛིན་སྐྱེས་མཆོག་རྣམས་ཀྱི་བཀའ་དྲིན་ལས་དེང་སྐབས་འཛམ་གླིང་ཡུལ་ཁམས་ཀུན་ཏུ་བོད་ཀྱི་ནང་ཆོས་ལ་སློབ་སྦྱོང་བྱེད་མཁན་དང་ཉམས་ལེན་ཉིན་བཞིན་ཇེ་མང་དུ་འགྲོ་བཞིན་ཡོད་ཀྱང་བོད་ཕྱི་ནང་གི་བོད་མི་མང་པོ་ཞིག་ཆོས་མེད་སྨྲ་བར་འགྱུར་མཁན་ཇེ་མང་ལ་འགྲོ་བཞིན་འདུག བོད་མི་བརྒྱ་ཆ་བརྒྱད་ཅུ་ལྷག་གིས་ཆོས་ལ་སློབ་སྦྱོང་བྱེད་རྒྱུའི་གོ་སྐབས་མ་རགས་པས། བོད་མི་ནང་ཆོས་ཀྱི་རིན་ཐང་དངོས་གནས་་ཤེས་མཁན་ཕལ་ཆེར་མེད་ལ་བོད་ཀྱི་གྲྭ་བ་ཆོས་བཤད་ཕོད་མཁན་ཕལ་ཆེར་མེད་ལྟ་བུ་རེད། དཔེར་ན། བལ་ཡུལ་དུ་བོད་ཀྱི་ཁྱིམ་ཚང་གཅིག་ལ་སྤྲུལ་སྐུ་གསུམ་ལྷག་འཁྲུངས་ོ་དང། སྤྲུལ་སྐུ་དེ་ཚོས་རྒྱལ་ཁབ་དུ་མར་ཆོས་ཚོགས་བཙུགས་པས། མི་མང་པོ་ཞིག་ནང་ཆོས་ལ་དོ་སྣང་བྱེད་ཐུབ་པ་བྱུང་ཡོད་ཀྱང་། སྐྱོ་དགོས་པ་ཞིག་ལ་ཁོ་ཚོའི་ཕ་མ་རྒན་ཁོག་གཉིས་མ་ཡིན་པའི། ནང་མི་སྤུན་མཆེད་ཚང་མ་ཆོས་ལ་དད་པ་མེད་པར་མ་ཟད་བོད་ཞེན་ཙམ་ཡང་མི་འདུག གནས་སྟངས་ཐབས་སྡུག་འདི་འདྲ་འབྱུང་བའི་རྒྱུ་མཚན་ནི། བོད་ཀྱི་བླ་མ་ཚོས་ཕྱི་རྒྱལ་ཀྱི་མི་ལ་ཆོས་བཤད་པ་ལས། རང་རིགས་བོད་མི་ལ་ཆོས་མི་བཤད་པའི་གོམས་སྲོལ་ངན་པ་དང་། བོད་མི་ཕ་མ་ཚོས་བོད་ཀྱི་རིག་གཞུང་ལས་ཕྱི་རྒྱལ་རིག་གཞུང་ཡ་མཚན་ཆེ་སྙམ་པའི་རྨོངས་དད་ཤུགས་ཆེ་ཡོད་པའི་རྐྱེན་ཀྱིས་རེད།
དེར་བརྟེན་གལ་ཏེ་བོད་ཀྱི་མཁན་སྤྲུལ་དགེ་བའི་བཤེས་གཉེན་རྣམས་ལ་བྱམས་སྙིང་རྗེ་རེ་ཡོད་ན། ངེས་པར་དུ་ཐུགས་བརྩེ་བས་ཆོས་ཀྱི་ཤེས་ཡོན་མེད་པའི་བོད་མི་སྐྱ་ཕོ་མོ་ཐམས་ཅད་ལ། ཟབ་མོའི་བཀའ་ཆོས་གང་མང་གནང་ནས་ཆོས་དང་མི་ཚེ་ཕན་ཚུན་གྲོགས་སུ་འགྱུར་བ་ཞིག་བྱས་ཏེ། ཆོས་ཀྱི་རིན་ཐང་ཤེས་ཞིང་མི་ཚེའི དོན་སྙིང་རྙེད་པའི་ཆོས་ལྡན་མི་རིགས་ཞིག་འཛམ་གླིང་ཞི་བདེའི་རྒྱན་དུ་ཡུན་རིང་དུ་གནས་ཐུབ་པར་བྱེད་དགོས།
བོད་ཀྱི་སྐྱབས་མགོན་མཁན་སྤྲུལ་རྣམས་ཀྱིས་བོད་མི་སྐྱབས་མེད་རྣམས་ལ་ཉུང་མཐའ་ཡང་གཟའ་འཁོར་རེའི་གཟའ་ཉི་མའི་ཆུ་ཚོད་བཅུ་བ་ནས་བཅུ་གཉིས་བར་བཀའ་ཆོས་ཐེངས་རེ་གནང་རོགས་ཞུ་རྒྱུ་དང་། གལ་ཏེ་བཀའ་ཆོས་གནང་མཁན་མ་རྙེད་པའམ་སྐབས་རེ་ངེས་པར་དུ་སྐྱབས་མགོན་རྒྱལ་བ་རིན་པོ་ཆེའི་འོད་སྡེར་ལ་བལྟ་ཉན་བྱེད་དགོས།
༥༽ ཁྱད་པར་དགོན་བདག་བླ་མ་ཚོ་ནི། དུས་ཚོད་མང་ཆེ་བ་ཕྱི་རྒྱལ་ཀྱི་སྦྱིན་བདག་ཚོའི་ཆེད་དུ་ངོམ་ཆོས་ཀྱི་མཛད་རིམ་སྣ་ཚོགས་ལ་བྲེལ་ནས་སྒོར་མོ་བཙལ་དགོས་པས། རང་གི་གྲྭ་བ་ཚོ་ལ་ཆོས་བཤད་རིན་མེད་པའམ་བཤད་ཁོམ་མེད་ལ། གྲྭ་བ་ཚོས་ཀྱང་དཔོན་ཉམས་དོད་པའི་དགོན་བདག་བླ་མ་རྣམས་ནི་སྦྱིན་བདག་སྐུ་ངོ་ཀྱི་འདུ་ཤེས་ཙམ་ལས་བླ་སློབ་ཀྱི་འབྲེལ་བ་ངོ་མ་ཞིག་བྱེད་མྱོང་མེད་པའི་སྐྱོན་ཀྱིས། དགོན་པའི་ནང་གི་གྲྭ་བ་མང་ཆེ་བས་ཞོགས་ཚོགས་དགུང་ཚོགས་ལྟ་བུའི་རྒྱུན་འདོན་གྱི་ལྟ་སྒོམ་སྤྱོད་པའི་གོ་དོན་དང་དགོས་པ་རྒྱུ་མཚན་གང་ཡིན་མི་ཤེས་པ་དང་། ཐ་ན་ས་ོསོའི་ཁ་འདོན་ཀྱི་ཚིག་དོན་ཙམ་ཡང་ཚུལ་བཞིན་ཤེས་མཁན་དཀོན་པོ་གྱུར་ཡོད།
ཆོས་མི་ཤེས་པའི་བླ་གྲྭ་མང་པོ་ཞིག་དགོན་པའི་ནང་དུ་ཡུན་རིང་བྲེལ་ཟིང་གིས་མི་ཚེ་བསྐྱལ་ནས་བསྡད་ཀྱང་། ཉོན་མོངས་མར་འགྲིབ་དང་དངོས་གྲུབ་ཡར་འཕེལ་ནི་ཕལ་ཆེར་མེད་པས། ཆོས་ཀྱི་སློབ་སྦྱོང་མ་ཐོབ་པའི་ཉམ་ཆུང་གྲྭ་བ་མང་པོ་རིམ་པས་སྐྱ་སར་བབ་ནས། བོད་ཀྱི་ནང་ཆོས་ནི་ཕྱི་རྫིག་ནང་སྡུག་གི་ཆོ་ག་ཕྱག་ལེན་དང་། རྟགས་གསལ་སྐམ་པོ་ཙམ་རེད་འདུག་སྙམ་པའི་ལོག་ལྟ་སྐྱེས་ནས། བོད་ཀྱི་ནང་ཆོས་ལ་སྐྱོན་བརྗོད་བྱེད་མཁན་མང་པོ་བྱུང་དང་བྱུང་བཞིན་ཡོད་ན། ཤེས་ལྡན་དགོན་བདག་བླ་སྤྲུལ་ཡོངས་ནས་ཆོས་ཀྱི་སློབ་སྦྱོང་ནམ་ཡང་མི་ཐོབ་པའི་ཉམ་ཆུང་དགོན་པའི་གྲྭ་བ་རྣམས་ལ་བྱམས་དང་སྙིང་རྗེ་ཆེན་པོས་་དམིགས་བསལ་ཀྱིས་བཀའ་ཆོས་གང་མང་གནང་ཐུབ་པ་བྱེད་དགོས་སོ།

༧རྒྱལ་དབང་ཀརྨ་པ་མཆོག་གི་ཐུགས་ཀྱི་བུམ་བཟང་ལས་འཁྲུངས་པའི་ལྗགས་རྩོམ་མཇལ་བ་ཤིན་ཏུ་སྤྲོ་བ་བརྟས། ཕྲན་རང་ཉིད་སྙན་རྩོམ་མི་ཤེས་ཀྱང་། བརྗོད་བྱ་རྗོད་བྱེད་ཀྱིས་ཡིད་སེམས་དབང་མེད་དུ་འགུག་ནུས་པ་འདུག སྐུ་ཉིད་བོད་རིགས་སྤྱི་དང་ལྷག་པར་དེང་རབས་གཞོན་སྐྱེས་མང་པོ་ཞིག་གི་རེ་བ་དང་ཡིད་ཆེས་ཤིན་ཏུ་ཆེན་པོ་འདུག
རང་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་ཏུ་སོན་ཅིང་རང་མི་རིགས་ཀྱི་སྐད་ཡིག་རིགས་གཞུང་ལ་ཕྱག་རྗེས་རླབས་པོ་ཆེ་འཇོག་གནང་བའི་རེ་བ་ཤིན་ཏུ་ནས་ཆེ།

སྐབས་འདི་དང་འབྲེལ་བ་དེ་ཙམ་མེད་པ་ཞིག་སྟེ། བོད་པའི་གཞས་པ་གྲགས་ཅན་བཀྲས་ཆུང་ལགས་ནས་གཙོ་ཁྲིད་བྱས་པའི་བོད་པའི་ལོ་རྒྱུས་སྟེང་གི་བོད་རིགས་བྱིས་པའི་གླུ་གཞས་ཆེད་བསྒྲིགས་འོད་སྡེར་སེམས་གཞས་ཞེས་པ་དེ་མི་འགྱངས་པར་བྱང་ཨ་རིའི་བོད་རིགས་འདུས་སྡོད་ས་ཁུལ་གྱིས་གཙོས་པའི་སྤྱི་ཚོགས་སྟེང་འགྲེམ་སྤེལ་དང་སྐོར་སྐྱོད་བྱེད་རྒྱུ་རེད། གནས་ཚུལ་གསལ་བོ་གཤམ་གྱི་དྲ་རྒྱ་ལས་ཤེས་ཐུབ།
http://www.semshae.org

རྒྱལ་དབང་མཆོག་གིས་ཕུལ་དུ་བྱུང་བའི་ཕྱག་རྩོམ་གནང་བར་ཐུགས་རྗེ་ཆེ།
སྐུ་ཉིད་ཀྱི་རྣམ་དཔྱོད་དང་ཐུགས་བསྐྱེད་མཆོག་ཏུ་རྒྱལ་བར་གྱུར་ཅིག

སེམས་ སྐྱོ་བའི་ མིག་ ཆུ།

སེམས་པ་སྨོན་ལམ་བརྒྱབ་ལོངས་དང་། །
སྐྱོ་བའི་ཁ་འཆེམས་བཞག་ལོངས་མེད། །
མིག་སྔར་གཤིན་རྗེ་མཐོང་བཞིན་དུ། །
ཆུ་ཚོད་སྐར་ཆར་འདས་ཚད་གྲོལ། །

སེམས་པ་སྐྱེ་རྒུའི་མདོ་རུ་ཕྱོགས། །
སྐྱོ་བའི་རྨས་དང་ཤུལ་གསོན་ཚོར། །
མིག་ཆུ་ཕྱིས་དང་སེམས་གསོ་ཕྱིར། །
ཆུ་དྭངས་བྱིན་ངག་ཆབ་རྒྱུན་བྲན། །

དཔལ་རྒྱལ་བ་ཀརྨ་པ་མཁྱེན་ནོ། །

རྩོམ་ཡིག་འདི་འདྲ་པོ་ནི་རྩོམ་པ་པོ་ང་ཡིན་ཟེར་མཁན་ཚོས་ཀྱང་བྲིས་པ་མཐོང་དཀོན་པོ་རེད། ཀརྨ་པ་མཆོག་ལ་སེམས་གཏིང་ནས་གུས་མདུད་ཞུ།

སྙན་རྩོམ་འདི་ནི། ངོ་མ་སྐོམ་པ་ལ་ཆུ་ལྟར་ཡིད་གདུང་གི་མཚོ་མོ་འཁྱོམས་པ་ཞིག་རེད། ཁོང་གི་གཏིང་ཟབ་པའི་ཐུགས་ཚོར་དང་གཞི་གཅིག་ཏུ་འདྲེས་ཤིང་། བརྗོད་བྱེད་ཀྱི་ཉམས་འགྱུར་རེ་རེ་ནས་ཆུ་ལ་ཆུ་བཞག་པ་ལྟ་བུའི་ཕུལ་དུ་བྱུང་བའི་ཚིག་སྦྱོར་གྱིས་གུས་པའི་ཡིད་ཀྱི་གཏན་པ་དབང་མེད་འཕྲོག ཐུགས་རྗེ་ཆེ། ཀརྨ་པ་མཁྱེན་ནོ།

དཔལ་རྒྱལ་བ་ཀརྨ་པ་མཆོག་གི་གསུང་རྩོམ་འདི་གཤམ་གྱི་དྲ་བར་བརྒྱུད་བྱ་འདུན་ཆེ་བས་བཀའ་འཁྲོལ་ལྷུག་པར་བསྩོལ་གནང་ཡོང་བར་མཁྱེན་མཁྱེན་ཞུ་ལགས། http://yushul414.blogspot.com/

རྒྱལ་བ་ཀརྨ་པ་མཆོག་གི་རྩོམ་ཡིག་གི་ཐོག་ནས་བོད་མི་རིགས་ལ་ཤ་ཞེ་ཡོད་པར་གསལ་བསྟན་བྱས་འདུག

ཀརྨ་པ་མཆོག་འདི་དགྲ་བོ་ཁ་གཏད་ལངས་མཁན་གྱི་ཕོ་རྒོད་གངས་སེང་འདྲ་ཞིག་ཡོང་བ་ཤོག་ཞེས་སྨོན་ལམ་འདེབས་ཀྱི་ཡིན།

དཔལ་རྒྱལ་བ་ཀརྨ་པ་མཁྱེན་ནོ་

ང་རང་སྒེར་གྱི་བསམ་ཚུལ་ལྟར་ན། ༧དཔལ་རྒྱལ་བ་ཀརྨ་མཆོག་ནི་དུས་དང་རྣམ་པ་ཀུན་ཏུ་མི་མང་དང་མཉམ་དུ་འགྲེང་ནས་ཡོད་པའི་ངེས་དོན་གྱི་བླ་ཆེན་ཞིག་རེད་སྙམ།

རྒྱལ་བ་ཀརྨ་པ་གང་ཉིད་ཀྱི་ཐུགས་གཤིས་དང་སྐུ་ཡོན། གཏོང་ཕོད་དང་ལྷག་བསམ་བཅས་ལ་དུས་རྟག་ཏུ་བླ་མེད་ཀྱི་བརྩི་བཀུར་ཡོད། ཁྱེད་ཀྱི་ཐུགས་བཞེད་མཐའ་དང་གེགས་མེད་མྱུར་དུ་འགྲུབ་པར་ཤོག ། བོད་རྒྱལ་ལོ།།