རྒྱ་ནག་རིག་པ་གསར་པ་ཞིག

ཁེ་ཝན་རུ་ཌེ། ཨོ་སི་ཊོ་ལི་ཡའི་སྲིད་བློན།

མི་ནག་ཚང་ལུང་རིགས་རྒྱལ་གྱིས་བསྒྱུར།

རྒྱ་ནག་གི་སྟོབས་འབྱོར་དང་ཤུགས་རྐྱེན་ནི་འཕེལ་བཞིན་ཡོད། ཡིན་ཡང་། ཁོའི་མ་འོངས་པ་ནི་མུ་མཐུད་ནས་ངེས་གཏན་མེད་པ་ཞིག་ཡིན། འཛམ་གླིང་གི་གོ་རིམ་བཟོ་བར་རྒྱ་ནག་གིས་ནུས་པ་གང་འདྲ་ཞིག་འདོན་རྒྱུ་ཤེས་དགོས་ན། ང་ཚོས་རྒྱ་ནག་འདི་སྔར་ལས་གཏིང་ཟབ་མོའི་སྒོ་ནས་ཤེས་དགོས་ལ། ཁ་ཞེ་གཉིས་མེད་ཀྱི་སྒོ་ནས་རྒྱ་ནག་དང་མཉམ་དུ་གཤིབ་དགོས་པར་འདུག

ཨོ་སི་ཊོ་ལི་ཡ་ལ་སྔ་མོ་ནས་རྒྱ་ནག་ལྟ་མཁན་གྱི་རྩོམ་པ་པོ་དང་བསམ་བློ་བའི་སྲོལ་རྒྱུན་ཞིག་ཡོད། ཊེམ་དུས་དེབ་ཀྱི་རྒྱ་ནག་གསར་འགོད་པ་ཐོག་མ་ རྗོར་རྗི་ ཨེ་ མོ་རེ་སོན་ ལྟ་བུ་རེད། བསམ་བློ་བ་འདི་དག་གིས་ག་དུས་ཡིན་ཡང་རྒྱ་ནག་ཤེས་དགོས་ན་ཁོའི་འདས་ཟིན་པའི་ལོ་རྒྱུས་དང་རྩོམ་རིག ལྟ་གྲུབ་སོགས་གཞི་ལ་བཞག་པའི་གོ་རྟོགས་ཤིག་དགོས་པ་ཤེས་ཡོད་པ་རེད། འདི་ནི་སྲོལ་རྒྱུན་གྱི་གཙིགས་འཛིན་དང་འདོད་ཕྱོགས་ཙམ་དུ་མ་ཟད། མིག་རྒྱ་ཕྱེ་བའི་དབྱེ་ཞིབ་ཅིག་ཀྱང་ཡིན།

རྒྱ་ནག་གི་མ་འོངས་པར་དབྱེ་ཞིབ་བྱེད་ན། ང་ཚོས་རྒྱ་ནག་གི་ཕྱི་འབྲེལ་དང་ཁོའི་བཅོས་སྒྱུར་གྱི་འཕེལ་འགྱུར་རིང་པོ་སོགས་ཚུད་པའི་རྒྱ་ནག་གི་རྒྱུན་ལྡན་མིན་པའི་ལོ་རྒྱུས་ཀྱི་བྱུང་བ་དག་ལ་སྔར་ལྷག་གི་གོ་རྟོགས་རྙེད་དགོས། དེ་ནི་རྙོག་འཛིང་གི་ལས་དོན་ཞིག་ཡིན། རྒྱ་ནག་རང་གི་ནང་དུའང་རྒྱ་ནག་གི་ལོ་རྒྱུས་དང་། ཁོའི་ད་ལྟ་དང་མ་འོངས་པ་སོགས་ཀྱི་ཐད་ལ་འགྲན་རྩོད་རང་བཞིན་གྱི་ལྟ་སྟངས་ཧ་ཅང་མང་པོ་ཡོད།

ང་ཚོས་ཨོ་སི་ཊོ་ལི་ཡའི་མི་རིགས་གཙུག་ལག་སློབ་གླིང་དུ་ཨོ་སི་ཊོ་ལི་ཡའི་འཛམ་གླིང་རྒྱ་ནག་བསྟི་གནས་ཞེས་པ་གསར་འཛུགས་བྱེད་བཞིན་པའི་དོན་ཡང་དེ་ཡིན། བསྟི་གནས་འདི་ནི་རྒྱ་ནག་ལ་གོ་རྟོགས་མཐོར་འདེགས་བྱེད་མཁན་དང་རྒྱ་ནག་མཉམ་དུ་འབྲེལ་མོལ་གོང་འཕེལ་གཏོང་མཁན་གྱི་རྒྱལ་སྤྱིའི་བསྟི་གནས་ཤིག་ཏུ་བསྒྱུར་རྒྱུ་ཡིན། དེས་ལྷག་པར་དུ་འཛམ་གླིང་ནང་རྒྱ་ནག་གིས་ནུས་པ་ཅི་ཞིག་འདོན་པའི་ཐད་ལྟ་རྒྱུ་ཡིན།

ང་ཚོས་བསྟི་གནས་ཁང་འདི་རྒྱ་ནག་ལ་མངོན་གསལ་གྱི་འགྱུར་བ་འགྲོ་བཞིན་པའི་དུས་སྐབས་ཤིག་ལ་ཕྱེ་སྟེ། མ་འོངས་པར་རྒྱ་ནག་གིས་བྱེད་ལས་གང་འདྲ་ཞིག་མཐོང་བར་སྤྲོ་སེམས་སྐྱེད་དུ་འཇུག་རྒྱུ་ཡིན། རྒྱ་ནག་ལ་ལྟ་སྟངས་ཀྱི་ཕྱོགས་ནས་ད་ཡོད་ཀྱི་འཛམ་གླིང་གི་གོ་རིམ་ལ་ཉེན་ཁ་སྤྲོད་སྲིད་པའི་མཁྲེགས་འཛིན་གྱི་ལྟ་ཚུལ་འཛིན་མཁན་དང་། དེ་ལས་ལྡོག་སྟེ། ༼ཝ་ཤིན་ཊོན་གྱི་ཐག་གཅོད་༽ཀྱི་ཚབ་ཏུ། ༼པེ་ཅིན་གྱི་ཐག་གཅོད་༽འཇོག་དགོས་པའི་ལྟ་ཚུལ་འཛིན་མཁན་ཡོད་ལ། འདི་གཉིས་ཀྱི་བར་ནས་བཤད་མཁན་ཡང་ཤིན་ཏུ་མང་། དོན་དངོས་ཐོག་བཤད་ན། རྒྱ་ནག་དང་དེའི་མ་འོངས་པའི་ཐད་ལ་རྩོད་རྙོག་གི་ལྟ་ཚུལ་མང་པོ་ཡོད། ལྟ་ཚུལ་མི་འདྲ་བ་འདི་དག་ནི་གཞན་གྱིས་བཟུང་ཡོད་པ་དེ་བཞིན་དུ་རྒྱ་རིགས་ཚོས་ཀྱང་བཟུང་ཡོད་པ་རེད།

རྒྱ་ནག་ལ་མཚོན་ན་ཁོས་རྒྱལ་ནང་གི་དཔལ་འབྱོར་བཅོས་སྒྱུར་དང་གོ་ལ་རང་བཞིན་གྱི་དཔལ་འབྱོར་མཉམ་ཞུགས་ཀྱི་སྲིད་བྱུས་སྟེང་ནས་ཁེ་བཟང་ཆེན་པོ་བྱུང་ཡོད་པ་རེད། ཡིན་ཡང་། དཔལ་འབྱོར་བཅོས་སྒྱུར་གྱི་ཐད་ལ་རྒྱ་ནག་རང་དུ་ད་དུང་ཡང་རྩོད་གླེང་ཞིག་འགྲོ་བསྡད་ཡོད་པ་རེད། དེ་བཞིན་རྒྱ་ནག་གི་མ་འོངས་པའི་ཐད་ལའང་རྒྱལ་སྤྱི་རང་བཞིན་གྱི་བགྲོ་གླེང་ཡོད་པ་རེད། རྒྱ་ནག་གི་འགྲོ་བ་མིའི་ཐོབ་ཐང་ལག་བསྟར་བྱ་ཕྱོགས་དང་། དོན་དངོས་ཀྱི་ཕྱི་གསལ་ནང་གསལ་གྱི་གཞུང་འཛིན་དང་རང་དབང་ལྡན་པའི་ཁྲིམས་བཤེར་ལམ་ལུགས་ཤིག་ལ་ཡར་རྒྱས་གཏོང་རྒྱུའི་སྐོར་ལ་གནད་དོན་ཆེན་པོ་ཡོད་པ་རེད། རྒྱ་ནག་གི་གྲོགས་པོ་ཚོས་ཀྱང་རྒྱ་ནག་གི་དཔལ་འབྱོར་ལམ་ལུགས་ཡར་རྒྱས་དེ་ནི་རྒྱ་ནག་དང་ཁོའི་མི་དམངས་དེ་གོ་ལ་རང་བཞིན་གྱི་འཛམ་གླིང་དཔལ་འབྱོར་གྱི་ནང་དུ་འཁྲིད་ཐུབ་པ་ཞིག་ལ་མཐོང་འདོད་ཡོད་པ་རེད།

ཡར་རྒྱས་འགྲོ་བཞིན་པའི་རྒྱ་ནག་ལ་མཚོན་ན་གོ་ལ་རང་བཞིན་གྱི་སྟེང་ནས་སོ་སོའི་འདོད་འདུན་དེ་འཚོལ་གི་རེད། དེ་ནི་རང་བཞིན་གྱི་གནས་ཚུལ་རེད། ངས་ནི་རྒྱ་ནག་གིས་ཉེ་བའི་ལོ་རབས་འགའི་ནང་དུ་རྒྱ་ནག་ལ་ཕན་ཐོགས་གང་ལེགས་བྱུང་བའི་རྒྱལ་སྤྱིའི་ལམ་ལུགས་དེར་ངོ་རྒོལ་བྱེད་རྒྱུ་མིན་པར། དེ་དང་མཉམ་དུ་ལས་ཀ་བྱེད་སྐབས་ཀྱི་སོ་སོའི་གཞི་རྩའི་ཁེ་ཕན་དེ་ངོས་ཟིན་པའི་ཡིད་ཆེས་བྱེད་ཀྱི་ཡོད། ང་ཚོས་འདི་དག་ནི་རྒྱ་ནག་གིས་སྟོབས་ཆེན་ཉི་ཤུ་ (G20) ནང་དུ་ནུས་པ་འདོན་སྟངས་ལས་མཐོང་ཐུབ་ལ། དེའི་ནང་དུ་རྒྱ་ནག་གིས་སྟོབས་ཆེན་རྒྱལ་ཁབ་གཞན་རྣམས་དང་མཉམ་རོགས་ཀྱིས་གོ་ལ་རང་བཞིན་གྱི་དཔལ་འབྱོར་ཉམས་རྒུད་ལ་རྩོད་ལེན་བྱས་ཡོད། དེས་མི་ཚད་རྒྱ་ནག་གིས་རྒྱལ་སྤྱིའི་སྤྱི་ཚོགས་དང་མཉམ་རུབ་ཀྱིས་ནམ་ཟླའི་འགྱུར་ལྡོག་གི་གདོང་ལེན་ལ་ལག་པ་འཆིང་ཡོད། ཡིན་ཡང་དཀའ་རྙོག་འདིའི་ཁྲོད་དུ་རྒྱ་ནག་གིས་སྔར་ལས་ལྷག་པའི་དབུ་ཁྲིད་ཆེན་པོ་ཞིག་གི་ནུས་པ་འདོན་དགོས་པར་འདུག

རྒྱ་ནག་གིས་ཨེ་ཤ་ཡ་དང་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་རྣམས་དང་མཉམ་དུའང་འབྲེལ་བ་གཏིང་ཟབ་མོ་འཛིན་གི་ཡོད། ཨོ་སི་ཊོ་ལི་ཡའི་དམིགས་ཡུལ་ནི་མ་འོངས་པའི་དཀའ་ངལ་ལ་བསམ་སྟེ་མངའ་ཁུལ་འཛུགས་སྐྲུན་དང་པོ་ཆགས་རྒྱུ་དེ་ཡིན་ལ། རྒྱ་ནག་གིས་འདིའི་ཐད་དུའང་སེམས་སྐུལ་རང་བཞིན་གྱི་མཉམ་ལས་བྱས་ཡོད།

རྒྱ་ནག་གིས་འཛམ་གླིང་གི་གོ་རིམ་ཐད་ཕུལ་བའི་ལེགས་སྐྱེས་ནི་ངོས་ལེན་མི་བྱེད་ཐབས་མེད་ཅིག་ཡིན། ཡིན་ཡང་། ད་དུང་སྒྲུབ་དགོས་པའི་ལས་དོན་དེ་ལས་མང་བ་ཡོད།  རྒྱ་ནག་གིས་ཨབ་གྷན་དང་ཨི་རན་ལྟ་བུ་གོ་ལ་རང་བཞིན་གྱི་བདེ་འཇགས་ཀྱི་ཕྱོགས་ལ་རྒྱལ་སྤྱིའི་འབད་བརྩོན་ལ་སྔར་ལྷག་གི་རྒྱབ་སྐྱོར་བྱ་ཐུབ་གི་རེད་ལ། བྱེད་ཀྱང་དགོས་པ་ཞིག་རེད།

རྒྱ་ནག་གིས་འཛམ་གླིང་གི་གོ་རིམ་འདི་ཁྲིམས་ལ་གཞི་བཅོལ་ཞིང་། རྒྱུན་གནས་དང་ནུས་ཤུགས་ཀྱི་སྒོ་ནས་བརྟན་ལྷིང་ཡོང་བའི་ཐད་རྒྱལ་སྤྱིའི་སྟོབས་ཤུགས་ཀྱི་གྲལ་དུ་ནུས་པ་བཏོན་པ་ཡིན་ན་རྒྱ་ནག་ལ་ཕན་ཆེ་ལ། འཛམ་གླིང་ལའང་ཕན་ཆེ་བ་ཡོད།

རྒྱ་ནག་གིས་འཛམ་གླིང་གོ་རིམ་གྱི་འགྱུར་རིམ་ཁྲོད་ནུས་པ་ཅི་ཞིག་འདོན་ངེས་པ་དང་། འདོན་ཐུབ་པ། འདོན་དགོས་པ་བཅས་ཤེས་དགོས་ན་ང་ཚོས་རྒྱ་ནག་འདི་གཏིང་ཟབ་མོའི་སྒོ་ནས་ཤེས་དགོས་ལ། རིམ་པ་མཐའ་དག་ནས་རྒྱ་ནག་མཉམ་དུ་དྲང་པོ་དྲང་བཞག་གིས་མཉམ་འབྲེལ་བྱེད་དགོས། ང་རང་གིས་ད་ནི་རྒྱ་ནག་རིག་པ་གསར་པ་ཞིག་གི་དུས་སྐབས་ཡིན་པར་ཡིད་ཆེས་བྱེད་ཀྱིན་ཡོད།

འདི་ནི་ངེས་པར་གྲང་དམག་རྙིང་བའི་སྐབས་ཀྱི་རྒྱ་རྒོལ་དང་རྒྱ་ཕྱོགས་ཞེས་པའི་འདུ་ཤེས་དེའི་ཕ་རོལ་ཏུ་བརྒལ་དགོས་པ་རེད། ད་ལྟའི་དངོས་ཡོད་ནི་སྔོན་མའི་ཕྱོགས་གཉིས་འགལ་བའི་རྣམ་པ་ཅན་གྱི་བསམ་ཚུལ་དེ་ལས་མགོ་རྙོག་ཆེ་བ་ཡོད། ང་ཚོས་རྒྱ་ནག་མཉམ་དུ་བསམ་ཚུལ་བཤད་དུས་ང་ཚོས་རྒྱ་ནག་ལ་བཅིངས་པའི་གྲོགས་འབྲེལ་དང་རྒྱ་ནག་གིས་ཨོ་སི་ཊོ་ལི་ཡར་བཟུང་བའི་གྲོགས་འབྲེལ་ལ་གཞི་མི་འཇོག་པར། ང་ཚོའི་ཡིད་ཆེས་དང་རིན་ཐང་ལྟ་ཚུལ་གྱི་ཐད་ནས་གླེང་སྟེ་གནད་དོན་གྱི་སྟེང་ལ་འབོད་དགོས་པ་རེད། ང་ཚོས་སྔར་ལས་ཀྱང་གསལ་བཤད་དམ་གསེད་བཀྲོལ་རང་བཞིན་གྱི་འབྲེལ་མོལ་སྟེ། སྟོབས་ཤུགས་རྒྱས་བཞིན་པའི་ཕྱོགས་སུ་ལམ་ཁ་གསར་པ་ཞིག་ནས་སྐྱོད་དགོས་པར་འདུག

ངས་འབྲེལ་མོལ་འདི་ནི་མཆེད་གྲོགས་ (zhengyou) ཞིག་གི་རྩ་དོན་སྟེང་ནས་འབྱུང་དགོས་པར་མཐོང་གི་ཡོད། མཆེད་གྲོགས་ནི་བློས་ཐུབ་ཀྱི་གྲོགས་པོ་ཡིན་ལ། དེ་ལྟའི་གྲོགས་པོ་ཞིག་གིས་སྐབས་ཐོག་གི་ཁེ་བཟང་གི་ཕ་རོལ་མཐོང་ཐུབ་ལ། ཁ་ཞེ་གཉིས་མེད་དང་གཏིང་ཟབ་པའི་གྲོགས་འབྲེལ་གྱི་རྨང་གཞིའི་ཐོག་ནས་བདེན་པ་བཤད་གི་རེད།

ཨོ་སི་ཊོ་ལི་ཡའི་ངོས་ནས་བཤད་ན། འདིའི་གོ་དོན་ནི་རང་གི་མངོན་འདོད་བཤད་དུས་དྲང་པོ་དྲང་བཞག་གི་སྒོ་ནས་རྒྱ་ནག་ལ་སྐད་ཆ་བཤད་ཐུབ་པ་དང་། རྒྱ་ནག་གི་ཕྱོགས་ནས་ཀྱང་དེ་ལྟར་བཤད་ཡོང་བར་རེ་བ་བྱེད་པ་སྟེ།  བརྩི་བཀུར་དང་། གོ་རྟོགས། རིན་ཐང་བཅས་ལ་གཉིས་མོས་ཀྱི་ངོས་འཛིན་ཡོད་པའི་ཐོག་ནས་འབྲེལ་མོལ་བྱ་རྒྱུ་དེ་ཡིན། འབྲེལ་ལམ་དང་གོ་རྟོགས་ཀྱི་རྩ་དོན་གསར་པ་འདི་ནི་རྒྱ་ནག་ལ་གལ་ཆེ་བ་ཇི་བཞིན་དུ་ཨོ་སི་ཊོ་ལི་ཡར་གལ་ཆེ་ལ། དེ་བཞིན་དུ་ཕྱོགས་བསྡུས་རང་བཞིན་གྱི་ནུབ་ཕྱོགས་པར་ཡང་གལ་ཆེན་པོ་ཆགས་ཡོད།

གསལ་བཤད། སྐུ་ཞབས་ རུ་ཌི་ ནི་ཨོ་སི་ཊོ་ལི་ཡའི་སྲིད་བློན་ཡིན་ལ། འདི་ནི་ཉེ་སྔོན་ཁོང་གིས་ཨོ་སི་ཊོ་ལི་ཡའི་འཛམ་གླིང་རྒྱ་ནག་བསྟི་གནས་ཞེས་པ་དབུ་འབྱེད་སྐབས་ཀྱི་གཏམ་བཤད་ནས་བསྡུས་ཤིང་རྩོམ་སྒྲིག་དང་བཅས་ Wall Street Journal གསར་ཤོག་གིས་བཏོན་པ་བོད་བསྒྱུར་བྱས་པ་ཡིན།