ཟླ་གཅིག་ལྷག་གི་གོང་དུ་བཙན་བྱོལ་བོད་གཞུང་གིས་རྒྱ་ནག་གིས་ཕོ་བྲང་པོ་ཏ་ལའི་འོག་ཏུ་ཤར་ནས་ནུབ་ལ་སྤྲེལ་བའི་ས་འོག་གཞུང་ལམ་བཟོ་སྐབས་ཆུ་ལོག་བྱུང་སྟེ། མཐའ་འཁོར་གྱི་ས་ངོས་སུ་སེར་ག་ཤོར་བའི་དབང་གིས་ཕོ་བྲང་པོ་ཏ་ལའི་བརྟན་གནས་ཉེན་ཁ་བསླེབས་འདུག་ཅེས་བརྗོད་ཡོད་ཀྱང་། ཕྱི་ཚེས་ ༡༡ ཉིན་རྒྱ་ནག་གིས་ཕོ་བྲང་པོ་ཏ་ལའི་ཐང་ཆེན་གྱི་ས་འོག་བགྲོད་ལམ་ལེགས་གྲུབ་མཛད་སྒོ་ལྷ་སར་བསྡུས་ཡོད་འདུག
དེ་རིང་ཀྲུང་གོའི་བོད་ལྗོངས་དྲ་བས་གནས་ཚུལ་སྤེལ་བ་ལྟར་ན། ཁ་སང་ཕོ་བྲང་པོ་ཏ་ལའི་ཐང་ཆེན་གྱི་ས་འོག་བགྲོད་ལམ་ལེགས་གྲུབ་མཛད་སྒོ་ལྷ་སར་བསྡུས་པ་དང་། མཛད་སྒོའི་སྟེང་བོད་རང་སྐྱོང་ལྗོངས་ཀྱི་རྒྱུན་ལས་མགོ་གཙོ་གཞོན་པ་ཝུའུ་ཡིང་ཅེ་དང་། བོད་རང་སྐྱོང་ལྗོངས་ཏང་ཨུའི་རྒྱུན་ལས་ཨུ་ཡོན་ཆིན་དབྱི་ཀྲི། བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཚོགས་གཙོ་སུང་ཧྲན་ལི། བོད་རང་སྐྱོང་ལྗོངས་སྲིད་གྲོས་ཀྱི་མགོ་གཙོ་གཞོན་པ་བློ་བཟང་རྡོ་རྗེ་སོགས་མཛད་སྒོར་ཕེབས་ཤིང་། ལས་གྲྭ་དེ་ལེགས་གྲུབ་བྱུང་བ་མཚོན་པའི་དར་ཚོན་བཅད་པ་དང་། ལྷ་ས་གྲོང་ཁྱེར་གྱི་གྲོང་གཙོ་ཨ་བུ་ཡིས་མཛད་སྒོའི་སྟེང་ཤིས་ཚིག་ཕུལ།
ཕོ་བྲང་པོ་ཏ་ལའི་ཐང་ཆེན་གྱི་ས་འོག་བགྲོད་ལམ་ནང་ལོགས་སུ་བོད་མི་རིགས་ཀྱི་ཐུན་མིན་ཁྱད་ཆོས་ལྡན་པའི་འཛུགས་སྐྲུན་མཛེས་རྒྱན་གྱིས་རྣམ་པར་སྤུད་རྒྱུ་ཡིན་པ་ཕུད། དེ་དང་དུས་མཚུངས་སུ་མེ་གསོད་མེ་འགོག་ཡོ་བྱད་དང་། བདེ་འཇགས་མྱུལ་ལྟའི་ཚོད་འཛིན་ཡོ་བྱད་དང་། ཉེར་མཁོའི་སྣང་བྱེད་གློག་སྒྲོན་སོགས་སྒྲིག་སྦྱོར་བྱས་ཡོད་པ་རེད་ཅེས་ཟེར།
གསར་འགྱུར་དེའི་ནང་མུ་མཐུད་དེ་གསལ་དོན། ༢༠༠༥ ལོར་བོད་རང་སྐྱོང་ལྗོངས་སྲིད་གཞུང་གིས་ཕོ་བྲང་པོ་ཏ་ལའི་ཉེ་འཁོར་གྱི་ཁོར་ཡུག་ཇེ་ལེགས་སུ་གཏོང་མགོ་བརྩམས་ཤིང་། ཕོ་བྲང་པོ་ཏ་ལའི་ཐང་ཆེན་གྱི་ས་འོག་བགྲོད་ལམ་བཏོད་པའི་ལས་དེ་ཕོ་བྲང་པོ་ཏ་ལའི་ཁོར་ཡུག་ཇེ་ལེགས་སུ་གཏོང་བའི་འཆར་གཞིའི་གྲས་སུ་བཞག་པ་རེད། ལོ་དེའི་ཟླ་ ༥ བར་ལྷ་ས་གྲོང་ཁྱེར་འཛུགས་སྐྲུན་ཅུས་ཀྱིས་ཇུས་འགོད་ལས་ཁུངས་ལ་ཇུས་གཞི་འགོད་དུ་བཅུག་པ་དང་། ཟླ་ ༡༠ བར་ལྷ་ས་གྲོང་ཁྱེར་སྲིད་གཞུང་གིས་ཆེད་ལས་མཁས་པ་སྒྲིག་འཛུགས་བྱས་ཏེ་ཁྲིན་ཏུའུ་ནས་ས་འོག་བགྲོད་ལམ་ལ་དམིགས་པའི་རིགས་ལུང་ཁུངས་སྐྱེལ་གྱི་བགྲོ་གླེང་མཛད། ༢༠༠༧ ལོའི་ཟླ་ ༦ པར་ལྷ་ས་གྲོང་ཁྱེར་འཛུགས་སྐྲུན་སྡེ་ཁག་གིས་འོག་གི་མིའི་བགྲོད་ལམ་གྱི་ཇུས་གཞིར་ཡང་བསྐྱར་རིགས་ལུང་གི་བརྟག་དཔྱད་བྱས་ཏེ་བརྡར་ཤ་བཅད། ༢༠༠༩ ལོའི་ཟླ་ ༨ ཚེས་ ༡༢ ཉིན་བོད་རང་སྐྱོང་ལྗོངས་སྲིད་གཞུང་གི་རྒྱུན་ལས་གྲོས་ཚོགས་སྟེང་ས་འོག་བགྲོད་ལམ་གཏོད་པའི་ཇུས་གཞིའི་སྐོར་གྱི་སྙན་ཞུ་ལ་གསན་རྗེས། ད་གཟོད་ཇུས་གཞི་ལ་གྲོས་འཆམ་བྱུང་བ་རེད། ཅེས་ཟེར།
ས་འོག་བགྲོད་ལམ་དེ་ནི་ཕོ་བྲང་པོ་ཏ་ལའི་ཤར་ནུབ་གཉིས་སུ་ཕར་འགྲོ་ཚུར་འོང་བྱེད་པའི་རླངས་འཁོར་དང་མཇལ་སྐོར་བ། ལམ་འགྲོ་བ་སོགས་ཧ་ཅང་མང་བས་རྟག་ཏུ་འཚང་ཁ་ཤིག་ཤིག་བྱེད་ཀྱི་ཡོད་པར་དམིགས་ནས་བསྐྲུན་པ་ཡིན་ཞིང་། ས་འོག་གི་མིའི་བགྲོད་ལམ་འདི་བཏོད་རྗེས་འགྲིམ་འགྲུལ་སྟབས་བདེ་མིན་པའི་གནས་ཚུལ་དེ་དུས་ད་ནས་བཟུང་འདས་སོང་གི་ལོ་རྒྱུས་ལྟ་བུ་ཞིག་ཏུ་འགྱུར་རྒྱུ་མ་ཟད། གནམ་ཟམ་དང་། ས་འོག་གི་མིའི་བགྲོད་ལམ་ཡོད་པའི་རྣམ་པ་གསར་བ་ཞིག་ཀྱང་ང་ཚོའི་མིག་ལམ་དུ་མངོན་རྒྱུ་རེད།
བགྲོད་ལམ་དེ་གཉིས་ནི་ནུབ་བྱང་གི་ཕྱོགས་སུ་ཡོད་དེ། ལམ་དེའི་ནུབ་ནས་བྱང་བར་གྱི་རིང་ཚད་ལ་སྨི་དྲུག་ཅུ་ནས་བརྒྱད་ཅུ་ཡོད་པ་དང་། མ་དངུལ་ཁྱོན་སྡོམ་སྒོར་ཁྲི་ལྔ་སྟོང་ལྷག་བཏང་ཁར། ཨར་ལས་ལག་རྩལ་དང་ས་འོག་བགྲོད་ལམ་གྱི་སྣེ་གཉིས་ཀྱི་སྒོ་མོ་བཅས་ཀྱི་བཟོ་བཀོད་ཡོད་ཚད་ཕོ་བྲང་པོ་ཏ་ལའི་ཉེ་འཁོར་གྱི་བཀོད་པ་དང་མཐུན་པར་བྱས་ནས་མི་རིགས་ཀྱི་ཁྱད་ཆོས་མངོན་ཐུབ་པ་བྱས་ཡོད། ཅེས་ཟེར།
འོན་ཀྱང་། ཕྱི་ཟླ་གསུམ་པའི་ནང་བཙན་བྱོལ་བོད་གཞུང་གིས་སྤེལ་བའི་གནས་ཚུལ་ལྟར་ན། པོ་ཏ་ལའི་འོག་གི་ས་འོག་གཞུང་ལམ་དེ་བཟོ་བཞིན་པའི་སྐབས་སུ། ཆུ་ལོག་བྱུང་བའི་ཤུགས་རྐྱེན་གྱི་དབང་གིས་ཕོ་བྲང་པོ་ཏ་ལའི་ཉེ་འཁོར་གྱི་ས་ངོས་སུ་སེར་ག་གས་པ་དང་། ཕོ་བྲང་གི་བརྟན་གནས་ལ་གནོད་ཚབས་ཆེན་པོར་གྱུར་འདུག་ཅེས་དང་། ༡༩༨༨ ལོ་ནས་ ༡༩༩༣ ལོའི་བར་གྱི་ཞིག་གསོའི་སྲིད་བྱུས་ཀྱི་འོག་ནས་རྒྱ་གཞུང་གིས་ཕོ་བྲང་པོ་ཏ་ལར་ཡང་ཉམས་གསོ་བྱེད་པའི་ལས་གཞི་མགོ་བཙུགས་ཡོད་ལ། ༢༠༠༠ ལོར་ཕོ་བྲང་ནང་ལོག་གི་སྡེབས་རིས་དང་བརྐོས་རིས་མང་པོ་ཞིག་བསྐྱར་ཏུ་བྲིས་ཡོད། སྐབས་དེར་བོད་ལུགས་ཀྱི་སྒྱུ་རྩལ་ལ་ཉམས་མྱོང་མེད་པའི་དབང་གིས་སྡེབས་རིས་འགའ་ཤས་ལ་རྒྱ་ནག་གི་སྒྱུ་རྩལ་བ་དག་གིས་ལག་པ་འཆང་སྟེ་སྐྱོན་ཆེན་པོ་བཟོས་ཡོད་སྐོར་གསུངས་པ་མ་ཟད།
བཙན་བྱོལ་བོད་གཞུང་གིས་བཤད་དོན། རྒྱ་ནག་གཞུང་གིས་བོད་ནང་དུ་དེང་རབས་ཀྱི་གྲོང་ཚོ་གསར་པ་འཛུགས་བསྐྲུན་བྱེད་པའི་ལས་འགུལ་འོག ཕོ་བྲང་པོ་ཏ་ལ་གཙོས་པའི་བོད་ཀྱི་རིག་གནས་སྒྱུ་རྩལ་དང་ཤུལ་དངོས་རྩ་ཆེན་མང་པོ་ཞིག་གཏོར་བཤིག་བཏང་ཡོད་འདུག བོད་མི་རིགས་ཀྱིས་རྒྱལ་སྤྱིའི་སྤྱི་ཚོགས་ཁྲོད་འཛམ་གླིང་སྟེང་གི་རིག་གནས་ཀྱི་ཤུལ་བཞག་གལ་ཆེན་འདི་གཏོར་བཤིག་ལས་སྲུང་སྐྱོབ་ཡོང་བར་འབོད་སྐུལ་ཞུ་གིན་ཡོད་ཅེས་གསལ་ཡོད།
དཔེ་ཡག་པོ་རེད་ཐུགས་རྗེ་ཆེ།
གང་ལྟར་མི་དམངས་ལ་ཕན་པའི་བྱ་བ་ཞིག་ཡིན་ཕྱིན་དགག་བྱ་མེད།
འོན་ཀྱང་དེ་རིག་ལ་མི་རིག་དབྱེ་འབྱེད་དང་འབྱོར་ཕྱུག་དབྱེ་འབྱེད་མེད་པར་སྤྱོད་ཆོག་ན་དངོས་ནས་ཡག་པོ་རེད།
ལམ་ལེགས་གྲུབ་བྱུང་བ་ལ་དགའ་བསུ་ཡོད། འོན་ཀྱང་མི་མང་ལ་དཀག་རྒྱ་མེད་པའི་ཐོག་
ལོང་སྤྱོད་ཆོག་པ་དགོས།
སྐུ་མགྲོན་ཚོ་རྒྱ་སྐྱག་ཏག་ཏག་རེད་ལ།
དེ་ཡག་པོ་རེད་ ཡར་རྒྱས་བོད་ལ་ཡང་དགོས་ངེས་རེད། ཡར་རྒྱས་མ་བཏང་ན་རྒྱ་གུང་ཁྲན་ལ་ཡང་འཛམ་གླིང་ཡུལ་གྲུ་རྣམས་ནས་སྐྱོན་བརྗོད་བྱེད་སྲིད། ལྷག་པར་བཙན་བྱོལ་བོད་གཞུང་ནས་
རེད་རེད་ ཡག་པོ་རེད བཟོ་མ་དགོས་བ་རེད
ཁོ་བ་ཚོའི་བསམ་དོན་ཡང་འགྲུབ་ཡོད་རྒྱུ་རེད ་་ང་རང་ཚོ་ལ་ཡང་ཅིག་ཐོབ་པ་རེད་ ་་་གང་ལྟར་གཉིས་ཕན་རེད་
འདི་ལ་ལེགས་ཉེས་གཅིས་ཀར་ཡོད་པས། སོ་སོར་དབྱེ་འབྱེད་བྱེད་ཤེས་དགོས།
འདི་འདྲའི་སྐབས་སུ་ང་ཚོས་མཐའ་གཅིག་ཏུ་ལྡོག་ཕྱོགས་ནས་བསམ་བློ་གཏོང་དགོས་དོན་མི་འདུག་དྲན་བྱུང་། གཅིག་བྱས་ན་འདི་དག་ནི་ང་ཚོར་ཕན་པའི་ལས་ཤིག་ཀྱང་ཡིན་སྲིད། གལ་སྲིད་བོད་འདི་ཕྱིར་ལོག་པའི་དུས་ཤིག་ཤར་ན། ལས་ཀ་འདི་དག་ནི་ང་ཚོས་དུས་ནམ་ཡང་བསྒྲུབ་མི་བཏུབ་པ་ཞིག་མ་རེད་དམ།
གཅིགགཏོར་ནས་གཅིག་བཟོ་དགོས་པ་དེ་འགྲོ་ལུགས་ཞིག་མ་རུ་དམ།
འོ་འདི་ཡག་པོ་རེད།ང་ཚོའི་བཟོ་མ་དགོས་པ་རེད།