རྒྱ་ནག་གིས་བོད་ནང་གི་བསྐྱར་པར་ཁང་དག་གིས་རྒྱལ་ཁབ་ཁ་བྲལ་དང་ཆབ་སྲིད་དང་འབྲེལ་བའི་ཡིག་རིགས་བསྐྱར་པར་བྱེད་བཞིན་པའི་དོགས་ཟོན་འོག་དམ་དྲག་ཤུགས་ཆེར་བྱེད་ཀྱིན་ཡོད་འདུག
ཕྱི་ཚེས་ ༡༨ ཉིན་ལྷ་སའི་ཉིན་རེའི་ཚགས་པར་སྟེང་གནས་ཚུལ་སྤེལ་བ་ལྟར་ན། ཉེ་ཆར་ལྷ་ས་ཁུལ་སྤྱི་བདེ་ལས་ཁུང་གིས་རྒྱལ་ཁབ་ཁ་བྲལ་གྱི་བྱ་སྤྱོད་སྤེལ་རིགས་ཀྱིས་བསྐྱར་པར་གྱི་ལམ་ནས་རྒྱལ་ཁབ་ཁ་བྲལ་གྱི་ཡིག་རིགས་དང་ཆབ་སྲིད་དང་འབྲེལ་བའི་བྱ་འགུལ་སྤེལ་རིགས་ལ་དོགས་ཟོན་དང་བཀག་འགོག་བྱ་ཆེད། ལྷ་ས་གྲོང་ཁྱེར་དང་དེའི་ཉེ་ཁུལ་གྱི་རྫོང་བདུན་ནང་ཉེན་རྟོག་མི་སྣ་ལས་བགོས་བྱས་ཏེ། བསྐྱར་པར་ཁང་ཡོངས་སུ་ཞིབ་བཤེར་བྱེད་བཞིན་ཡོད་པ་དང་། ཚོགས་པ་དང་མི་སྒེར་གྱིས་གཉེར་བའི་བསྐྱར་པར་ཁང་གིས་ངེས་པར་དུ་ཐོ་འགོད་བྱས་ཏེ། བསྐྱར་པར་བདག་དབང་གི་ཡིག་ཆ་བཟོ་དགོས་པའི་བཀའ་ཁྱབ་བཏང་ཡོད་པར་མ་ཟད། བསྐྱར་པར་ཁང་གི་བདག་གཉེར་བས་ངེས་པར་དུ་ཞང་དང་རྫོང་རིམ་པའི་སྲིད་གཞུང་གི་བདེན་དཔང་དང་ཁྱབ་ཁོངས་གྲོང་ཁྱེར་གྱི་རྒྱབ་གཉེར་སོགས་ལེན་དགོས་པའི་དགོས་འདུན་བཏོན་འདུག་ལ། བསྐྱར་པར་སྐབས་མིང་དང་སྡོད་གནས། ལས་ཁུངས། བསྐྱར་པར་ནང་དོན་དང་ཡིག་ཆའི་ཁ་གྲངས་སོགས་འགོད་དགོས་ཚུལ་བརྗོད་ཡོད་པ་དང་། གལ་སྲིད། གོང་གསལ་གྱི་ཡིག་ཆ་དང་ཆ་རྐྱེན་རིགས་ལ་དོ་སྣང་མ་བྱས་པར་བསྐྱར་པར་གྱི་ལས་ཀ་གཉེར་ཏེ་གནད་དོན་བྱུང་ཚེ། ཁྲིམས་ལུགས་གཞིར་བཟུང་ཐོག་ཐག་གཅོད་བྱ་རྒྱུ་ཡིན་པའི་གསལ་བསྒྲགས་གནང་ཡོད་པ་དང་། ད་ལྟའི་ཆར་བསྐྱར་པར་ཁང་ཡོངས་ལ་ཞིབ་བཤེར་དང་ཐོ་འགོད་བྱེད་བཞིན་ཡོད་འདུག
གནས་ཚུལ་འདི་ལྟ་བུ་ནི་ནམ་རྒྱུན་འབྱུང་གི་ཡོད་པ་ངོ་མ་ཡིན།2005ལོར་ངས་ཀན་ལྷོ་ཁུལ་གཙོས་གྲོང་ཁྱེར་གྱི་ཤར་ལམ་དང་པོར་སམབྷོཌ་བསྐྱར་པར་ཁང་ཞེས་པ་ཞིག་ཕྱེས་ཡིན།ཟླ་འགའི་རྗེས་ཉེན་རྟོགས་པ་ཡོང་སྟེ།ཁྱོད་ཚོས་ཁྲིམས་འགལ་གྱི་ཡིག་ཆ་དཔར་གྱི་འདུག་ཟེར།ངས་ཁོ་ཚོར་ཁྲིམས་འགལ་གྱི་ཡིག་ཆ་གང་དཔར་འདུག་ཅེས་གསལ་བོ་དྲིས་སྐབས།བོད་རིགས་ཉེན་རྟོགས་པ་ཞིག་གིས་ཟུར་ནས།སྐད་ཆ་མང་པོ་བཤད་རྒྱུ་ཡོད་པ་མ་རེད།ཁོ་ཚོས་བཤད་ན་བསྐྱར་པར་ཁང་འདི་ནམ་རྒྱུན་གྲྭ་བ་དང་སློབ་མ་རྐྱང་རྐྱང་འཚོག་གིན་འདུག་པས་ཁོ་ཚོ་དོགས་པ་སློང་གི་ཡོད་པ་རེད།ཅེས་གསང་བའི་ཚུལ་གྱིས་བཤད།
དེ་ནས་ངས་ཀྱང་སྐད་ཆ་མང་པོ་མ་བཤད་པར་ཁོ་ཚོས་ཅི་བཤད་ལ་ཉན་ནས་སྡོད་སྐབས།ཁོ་ཚོས་དེ་རིང་ནས་ཁྱོད་ཀྱིས་འདི་ནས་ཚོང་བརྒྱབ་མི་ཆོག་རྒྱུ་མཚན་ཁྱོད་རང་གི་འདི་ནས་ཡིག་ཆ་འདྲ་མིན་པར་ལོག་རྒྱག་གིའདུག་ཟེར་བཞིནཚོང་བཀག་ཡིག་ཆ་ཞེས་པའི་ཁུལ་ཉེན་རྟོགས་པའི་གཞུང་ཐེལ་ཡོད་པ་ཞིག་སྒོ་འགྲམ་དུ་སྦྱར་དེ་བུད་སོང།ངས་ཡིག་ཆ་ཅི་ཞིག་ཅེས་ནན་འདྲི་བྱས་ཀྱང་ལན་གསལ་བོ་ཅི་ཡང་བཏབས་མ་སོང།
ཉིན་འགའི་རྗེས་གྲོགས་པོ་གང་མང་ཞིག་གིས་ད་ཁྱོད་ཀྱིས་བསྐྱར་པར་ཁང་འདི་སྒོ་བརྒྱབ་ན་བཟང་རྒྱུ་རེད་མ་གཏོགས་གནས་ཚུལ་སྡུག་རུ་འགྲོ་གི་རེད་ཟེར་བས་ཨུ་ཐུག་ཐབས་ཟད་ངང་སྒོ་རྒྱག་དགོས་བྱུང།