ད་ལོ་ཁྱེད་ཀྱིས་མཛངས་མའི་དབུ་རྒྱན་སུ་ལ་བསྒྲོན་རྒྱུ།

ད་ལོའི་བོད་ཀྱི་མཛངས་མའི་དབུ་རྒྱན་འགྲན་རྩོད་ཀྱི་མཛད་སྒོ་ཐེངས་དགུ་བ་དེ་དངོས་སུ་མགོ་འཛུགས་བྱས་ཡོད། ད་ལོ་ཡང་སྔར་ལོ་དང་འདྲ་བར་འགྲན་ཞུགས་བུ་མོ་བཞི་ལས་བྱུང་མེད། ཕྱི་ལོ་ ༢༠༠༢ ལོའི་སྐབས་དང་པོར་འགྲན་ཞུགས་པ་ ༤ དང་། སྐབས་གཉིས་པར་ ༡ ། སྐབས་གསུམ་པར་ ༥ ། སྐབས་བཞི་བར་ ༡ ། སྐབས་ལྔ་བར་ ༦ ། སྐབས་དྲུག་པར་ ༥ ། སྐབས་བདུན་པར་ ༢ ། སྐབས་བརྒྱད་པར་ ༤ བཅས་ད་བར་ཁྱོན་བསྡོམས་བུ་མོ་ ༢༨ ཙམ་བྱུང་ཡོད།

དེ་རིང་ཉིན་གུང་ཆུ་ཚོད་ ༡༢ སྟེང་བཞུགས་སྒར་ངྷ་རམ་ས་ལར་ཕྱི་ལོ་ ༢༠༡༠ ལོའི་བོད་ཀྱི་མཛངས་མ་འགྲན་བསྡུར་གྱི་སྔོན་འགྲོའི་གསར་འགོད་གསལ་བསྒྲགས་བསྐྱངས་ཡོད། ད་ལོ་བོད་ཀྱི་མཛངས་མ་འགྲན་བསྡུར་ནང་ཞུགས་མཁན་བུ་མོ་ ༤ ཡོད་པ་དང་། དེ་དག་ནི་རང་ལོ་ ༡༩ ཡིན་པའི་ངྷ་རམ་ས་ལའི་དབྱངས་ཅན་མེ་ཏོག་དང་། རང་ལོ་ ༢༥ ཡིན་པའི་བྷིང་ལོར་གྱི་རིན་ཆེན་ཆོས་སྒྲོན། རང་ལོ་ ༢༢ ཡིན་པའི་བྷིང་གྱི་བསྟན་འཛིན་རྣམ་ཆོས། རང་ལོ་ ༢༣ ཡིན་ཞིང་ཝ་རཱ་ན་སི་ནས་ཡིན་པའི་བསྟན་འཛིན་ནོར་འཛོམ་བཅས་རེད། གསར་འགོད་གསལ་བསྒྲགས་ཐོག་བོད་ཀྱི་མཛངས་མ་འགྲན་བསྡུར་གྱི་སྤྱི་ཁྱབ་བཀོད་འདོམ་པ་བློ་བཟང་དབང་རྒྱལ་ལགས་ཀྱིས་ཕྱི་ལོ་ ༢༠༡༠ ལོའི་བོད་ཀྱི་མཛངས་མ་འགྲན་བསྡུར་གྱི་སྔ་ཕྱིའི་བྱུང་རིམ་ངོ་སྤྲོད་གནང་དོན། ཐོག་མ་ད་ལོ་མཛངས་མའི་འགྲན་བསྡུར་ནང་ཞུགས་མཁན་བཅུ་གྲངས་ཤིག་བྱུང་ཡོད་ཀྱང་། རིམ་གྱིས་རྒྱུ་རྐྱེན་འདྲ་མིན་གྱི་དབང་གིས་ཕྱིར་འཐེན་བྱས་ཏེ་ད་ཆར་དངོས་སུ་ཞུགས་མཁན་བུ་མོ་བཞི་ཡོད། འདས་པའི་བདུ་ཕྲག་ཅིག་ཙམ་ནས་འགྲན་ཞུགས་པ་དག་བཞུགས་སྒར་དུ་འཛོམས་ཏེ། ཁོང་ཅག་ངྷ་རམ་ས་ལ་གཡས་གཡོན་དུ་གཟིགས་སྐོར་དང་། ཆེད་མཁས་པ་དང་གནད་ཡོད་མི་སྣ་གདན་འདྲེན་ཞུས་ཏེ་སློབ་གསོ་ལམ་སྟོན་དང་སྦྱོང་བསྡུར་སྤྲད་པ་ཡིན།  

བདུན་ཕྲག་གཅིག་གི་རྗེས་དངོས་གཞིའི་འགྲན་བསྡུར་དེ་མགོ་འཛུགས་ཞུ་རྒྱུ་ཡིན། ཉིན་དང་པོར་ཆུ་རྐྱལ་གྱི་རོལ་རྩེད་དང་། ཉིན་གཉིས་པར་གཏམ་བཤད་དང་ལུས་རྩལ་འགྲན་བསྡུར་ཡིན། ཉིན་གསུམ་པར་བོད་གཞུང་ཟློས་གར་ཐང་ཆེན་དུ་མཐའ་མའི་སྟེང་རྩོད་འགྲན་བསྡུར་བྱ་རྒྱུ་རེད། ལོ་སྔ་མ་དག་དང་མི་འདྲ་བར་ད་ལོ་མཛངས་མས་གར་སྟབས་ངོམ་སའི་གར་སྟེགས་དང་། གློག་སྒྲོན་འདྲ་མིན་སོགས་ཀྱི་ཇུས་འགོད་ཅན་ངྷ་སྒར་གྱི་བཟོ་གྲྭ་ཞིག་གིས་འཁྱེར་ཡོང་གིན་ཡོད། ཉིན་དེའི་དགོང་མོ་བོད་གཞུང་ཟློས་གར་ཐང་ཆེན་དུ་མི་དམངས་འདུ་འཛོམས་ཐོག བུ་མོ་རེ་རེ་བཞིན་བོད་པའི་ཐུན་མོང་མ་ཡིན་པའི་ཆས་གོས་དང་། ཕྱི་ལུགས་དེང་རབས་ཀྱི་ཆས་གོས་འདྲ་མིན་བརྗེ་སྤོར་གྱིས་མི་དམངས་ཀྱི་མདུན་དུ་ཡོང་སྟེ། དཔྱད་འདེམ་པ་རྣམ་པའི་དྲི་བ་དྲིས་ལན་དང་། གླུ་དབྱངས་དང་ཞབས་བྲོ་སོགས་སོ་སོའི་ཁྱད་ཆོས་གང་ཡོད་ངོམ་རྗེས་མཛངས་མ་རྩེ་ཕུད་དེ་བདམས་ཏེ། ཕྱི་ལོ་ ༢༠༡༠ ལོའི་བོད་ཀྱི་མཛངས་མའི་དབུ་རྒྱན་སྒྲོན་རྒྱུ་རེད། ཨང་དང་པོར་ཧིན་སྒོར་འབུམ་གཅིག་དང་། ཨང་གཉིས་པར་ཧིན་སྒོར་ལྔ་ཁྲི། ཨང་གསུམ་པར་ཧིན་སྒོར་ཉིས་ཁྲི་ལྔ་སྟོང་། མཐའ་མ་དེར་ཆེ་མཐོང་བྱ་དགའ་བཅས་སྤྲོད་རྒྱུ་ཡིན། ཞེས་ངོ་སྤྲོད་གནང་བྱུང་། དེའི་རྗེས་འགྲན་ཞུགས་པ་དག་ལ་མཛངས་མའི་འགྲན་བསྡུར་ནང་ཞུགས་དོན་གང་ཡིན་དང་། ཨང་དང་པོ་ཐོབས་ཚེ་དམིགས་ཡུལ་གང་ཡོད་བཅར་འདྲི་ཞུས་ཡོད།

ངའི་མིང་ལ་བསྟན་འཛིན་རྣམ་ཆོས་ཟེར་གྱི་ཡོད། ང་རང་ ༢༠༠༠ ལོར་རྒྱ་གར་ལ་ཡོང་སྟེ་སུ་ཇ་བོད་ཁྱིམ་ནས་སློབ་སྦྱོང་བྱས་ཤིང་། ༢༠༠༩ ལོར་གྷོལ་པ་པུར་བོད་ཁྱིམ་ནས་འབྱུང་རིག་ཐོག་སློབ་སྦྱོང་ཐོན་རྗེས་ད་ཆར་བྷིང་ལོར་མཐོ་སློབ་དུ་སྤྱི་ཚོགས་ཞབས་ཞུའི་ཐོག་སློབ་སྦྱོང་ལོ་རིམ་གཉིས་པ་ཡིན། ང་རང་གི་རེ་བ་ལ། བོད་པའི་སྤྱི་ཚོགས་གཅིག་པུ་མ་ཡིན་པར་རྒྱ་གར་དང་། ཕྱི་རྒྱལ་བ་སུ་ཞིག་ཡིན་རུང་མི་ཡིན་པ་གཅིག་མཚུངས་ཀྱི་འདུ་ཤེས་ཐོག ཁོང་ཅག་ལ་ཕན་ཐོགས་པའི་ལས་ཀ་ཞིག་བྱ་ཐུབ་ན་དྲན་ཡོད། ངས་བྱེད་ཐུབ་པའི་ལས་ཀ་དེ་རྒྱ་མཚོའི་ནང་དུ་ཆུ་ཐིགས་ལྟ་བུ་ཞིག་ཡིན་ནའང་། ལས་ཀ་ཆུང་ཆུང་དེ་སྤུས་དག་པོ་ཞིག་དང་གཞུག་གཙང་མ་ཞིག་ཡོང་རྒྱུར་འབད་བརྩོན་བྱེད་ཀྱི་ཡོད། བོད་ཀྱི་མཛངས་མ་དེ་སོ་སོར་ཐོབ་མིན་གཙོ་བོ་མ་རེད། འགྲན་བསྡུར་གང་ཞིག་ཡིན་རུང་ཐོབ་པ་དང་ཤོར་བ་གཉིས་ཀ་ཡོང་སྲིད་པ་ཞིག་རེད། ཉམས་མྱོང་དང་སློབ་སྦྱོང་། གོ་སྐབས་སོགས་མ་ཤོར་བ་བྱ་རྒྱུ་གལ་ཆེན་པོ་རེད།  གལ་སྲིད་ང་ལ་ཨང་དང་པོ་ཐོབ་པ་ཡིན་ནའང་། ང་རང་ནམ་རྒྱུན་གྱི་བུ་མོ་དེ་རེད། འོན་ཀྱང་སོ་སོའི་སྟེང་གི་ཞན་ཆ་ཡར་རྒྱས་སུ་གཏོང་རྒྱུ་དང་། སྔར་སོ་སོས་ནོར་འཁྲུལ་བཟོས་མྱོང་བའི་ཕྱོགས་ལ་གུན་གསབ་བྱ་རྒྱུ། དེ་བཞིན་མ་འོངས་པར་བོད་ཀྱི་མཛངས་མའི་མིང་བེད་སྤྱོད་ལོག་པར་མི་འགྲོ་བ་ཞིག་ལ་ཐབས་ཤེས་བྱ་འདོད་ཡོད།

ངའི་མིང་ལ་དབྱངས་ཅན་མེ་ཏོག་ཟེར་ཞིང་། ཕ་ཡུལ་མགོ་ལོག་ནས་ཡིན། བོད་ནས་སློབ་འབྲིང་བར་བཏོན་རྗེས་ ༢༠༠༨ ལོར་རྒྱ་གར་དུ་ཡོང་བ་ཡིན། ད་ཆར་ངྷ་རམ་ས་ལར་དབྱིན་ཡིག་སྦྱོང་གིན་ཡོད། ཐེངས་འདིའི་མཛངས་མ་འགྲན་བསྡུར་ནང་ཞུགས་དོན་གང་ཡིན་ཟེར་ན། བོད་པའི་བུད་མེད་ཚོ་སོ་སོར་ཡིད་ཆེས་ཞེ་དྲག་མི་འདུག ང་རང་གིས་བལྟས་ན་བློ་བཟང་དབང་རྒྱལ་གྱིས་མཛངས་མ་འགྲན་བསྡུར་ཟེར་བ་འདི་མཛངས་མ་གཅིག་འཚོལ་རྒྱུ་དེ་ཡིན་རྒྱུ་མ་རེད། ལས་འགུལ་འདི་བརྒྱུད་དེ་བོད་ཀྱི་བུད་མེད་མང་པོ་ཞིག་ལ་སེམས་ཤུགས་དང་བློ་ཁོག་ཆེ་རུ་གཏོང་རྒྱུ་དང་། བོད་པའི་བུད་མེད་ཚོས་ཀྱང་ད་ལྟའི་དུས་ཚོད་ཀྱི་ཆ་ཤས་མང་པོ་ཞིག་ལེན་ཐུབ་རྒྱུར་ལམ་ཁ་བཟོ་རྒྱུ་དེ་ཡིན་རྒྱུ་རེད་སྙམ་ཟེར། གལ་སྲིད་ང་རང་ལ་ཨང་དང་པོ་ཐོབ་ཚེ་དམིགས་ག་རེ་ཡོད་སྐོར་དྲིས་པར། བོད་ནང་གི་ཡུལ་ཤུལ་ས་ཆར་གོད་ཆག་བྱུང་ཡུལ་དུ་རོགས་པ་ཞིག་བྱ་ཐུབ་ན་བསམ་ཡོད། ང་རང་ཆུང་དུས་ནས་རྒྱ་གར་དུ་འགྲོ་འདོད་ཆེན་པོ་ཡོད། མ་འོངས་པར་རྒྱ་གར་ལ་ཕྱིན་ཏེ་༧རྒྱལ་བ་རིན་པོ་ཆེ་ལ་ཐེངས་གཅིག་མཇལ་རྗེས། ཕྱི་རྒྱལ་བ་དག་དང་འདྲ་བར་ཤེས་ཡོན་ཡོད་པ་དང་། སྐད་ཡིག་མང་པོ་ཞེས་མཁན་ཞིག་བྱ་དགོས་ཀྱི་འདུག་དྲན་ཡོད། ང་ཚོས་བོད་པ་བོད་མི་ཟེར་ནས་བཤད་ཀྱིན་ཡོད་ཀྱང་། བོད་དང་བོད་མིར་ཤ་ཚ་དང་ལ་རྒྱ་འཛིན་དགོས་ན། ཨང་དང་པོ་སོ་སོ་མི་ཡག་པོ་ཞིག་བྱ་དགོས་པ་རེད། དེ་ལ་གདོང་པ་དང་གྱོན་པ་ཡག་པོ་ཡོད་པས་འགྲིག་གི་མ་རེད། ནང་ན་ཤེས་ཡོན་དང་བསམ་བློ་དགོས་པ་རེད་དྲན་ཡོད།

ངའི་མང་ལ་བསྟན་འཛིན་ནོར་འཛོམ་དང་གཞིས་ཆགས་ཧོར་སོར་ནས་ཡིན། ཝ་ར་ན་སཱར་ལོ་བདུན་ལ་སློབ་སྦྱོང་བྱས་པ་ཡིན། ང་རང་བོད་ཀྱི་མཛངས་མ་འགྲན་བསྡུར་ནང་ཞུགས་དོན་གཙོ་བོ། སྡིངས་ཆ་འདི་བོད་ཀྱི་བུ་མོ་ཚོའི་ཆེད་དུ་བཟོས་པ་རེད། འོན་ཀྱང་འདིར་ཞུགས་མཁན་ཉུང་ཉུང་རེད། སྔོན་མ་ང་རང་གིས་ཀྱང་མཛངས་མ་འགྲན་བསྡུར་འདི་སྡུག་ཅག་རེད་དྲན་ཡོད། དེ་ལྟ་ཚུལ་ནོར་བ་རེད། སྔོན་མ་ནས་ཞུགས་ཡོད་ན། ང་ལོ་ཆུང་སྟབས་ཐོབ་རྒྱུའི་རེ་བ་ཆེན་པོ་ཡོད་ལ། གལ་སྲིད་ཐོབ་མེད་ཀྱང་སློབ་སྦྱོང་མང་པོ་རག་ཡོད་པ་རེད། དེ་ལ་ཅུང་བློ་ཕམ་སྐྱེ་ཀྱི་འདུག་ཟེར། གསར་འགོད་པའི་ཁོ་མོར་གལ་སྲིད་ཨང་དང་པོ་ཐོབ་ན་ཕྱག་ལས་ག་རེ་གནང་རྩིས་ཡོད་སྐོར་དྲིས་པར། ལ་ང་ལ་བོད་ཀྱི་མཛངས་མ་ཐོབ་སོང་བ་ཡིན་ན། ཕྱི་རྒྱལ་གྱི་བུད་མེད་མང་པོ་ཞིག་དང་འབྲེལ་བ་ཡོང་གི་རེད། འཛམ་གླིང་ནང་བོད་ཀྱི་ལུང་པ་ཧ་མི་གོ་མཁན་མང་པོ་ཞིག་ཡོད་པ་རེད། ཧ་གོ་མཁན་ཚོས་ཀྱང་བོད་ཀྱི་གནས་སྟངས་དང་། རྒྱ་ནག་གི་བྱེད་སྟངས་མང་པོ་ཞིག་ཤེས་ཀྱི་ཡོད་པ་མ་རེད། ངས་བོད་ཀྱི་མཛངས་མའི་མིང་ཐོག་ནས་བོད་དོན་ཁྱབ་བསྒྲགས་དང་། བོད་མི་ཟེར་བ་དེ་ག་འདྲ་ཞིག་ཡིན་པ་འཛམ་གླིང་ལ་ཤེས་ཐུབ་པ་ཞིག་བྱ་ཐུབ་ན་དྲན་ཡོད། ཡང་ཆ་རྐྱེན་ཚང་དགོས་པ་རེད། བོད་ཀྱི་མཛངས་མ་ཟེར་ན། གཙོ་བོ་ནང་གི་སློབ་སྦྱོང་དང་རྣམ་པ་གཉིས་ཀ་དགོས་པ་རེད། ལྷག་པར་དུ་བོད་ཀྱི་གནས་སྟངས་ཡག་པོ་ཞིག་ཤེས་དགོས་པ་རེད་དྲན་ཡོད།

ངའི་མིང་རིན་ཆེན་ཆོས་སྒྲོན་ཟེར་གྱི་ཡོད། ང་རང་སྐྱེས་ས་མོན་རྟ་དབང་ཡིན། ང་རང་ཆུང་དུས་ནས་རྒྱ་གར་སློབ་གྲྭར་སོང་བ་ཡིན། མཐོ་སློབ་ཐོན་རྗེས་རྒྱ་གར་ལྷོ་ཕྱོགས་བྷིང་ལོར་གྲོང་ཁྱེར་ནང་མཛེས་བཟོ་དང་སྐྲ་བཟོ་ཡི་ལས་ཀ་བྱེད་ཀྱིན་ཡོད། ང་རང་གིས་བོད་སྐད་མི་ཤེས་ཀྱང་། བོད་ཀྱི་མཛངས་མ་འགྲན་བསྡུར་ནང་ཞུགས་རྒྱུ་གལ་ཆེན་པོ་རེད་དྲན་སོང་། བོད་པའི་བུ་མོ་མང་པོ་ཞིག་སྡིངས་ཆ་འདི་ལྟ་བུའི་ཐོག་ལ་འབུད་རྒྱུར་ཞེད་ཀྱི་ཡོད་པ་རེད། གལ་སྲིད་ང་ལ་ཐེངས་འདིར་ཨང་དང་པོ་ཐོབ་པ་ཡིན་ན། རྒྱ་གར་ལྷོ་ཕྱོགས་བྷེལ་ཀོབ་དང་མོན་གྷོ་བོད་པའི་གཞིས་ཆགས་ནང་གི་བདག་པོ་མེད་པའི་རྒན་འཁོགས་ཚོར་རོགས་སྐྱོར་བྱ་དགོས་བསམ་ཡོད། ང་རང་གིས་བལྟས་ན། སྤྱིར་རྒྱལ་ཁབ་གཞན་དང་མི་རིགས་གཞན་གྱི་མཛངས་མ་ཟེར་དུས་ཤེས་ཡོན་དང་འཇོན་ཐང་། རྣམ་པ་སོགས་མང་པོ་ཞིག་འཛོམ་དགོས་ཀྱང་། བོད་པ་སྐྱབས་བཅོལ་བའི་ནང་གི་མཛངས་མ་ཟེར་དུས་སྤོབས་པ་དང་། ལྷག་པར་དུ་དོན་དག་ཆེ་ཆུང་གང་ལ་ཐུག་ཀྱང་གདོང་ལེན་བྱ་ཐུབ་པའི་བློ་སྟོབས་གལ་ཆེན་པོ་རེད་དྲན་ཡོད་ཟེར། ཡང་ཁོ་མོར་བོད་སྐད་མ་ཤེས་པའི་ཐད་དགོངས་ཚུལ་ག་འདྲ་ཡོད་སྐོར་དྲིས་པར། ངས་བོད་སྐད་མ་ཤེས་པའི་ཐད་བསམ་ཚུལ་དམིགས་བསལ་མེད། རྒྱ་གར་དང་ཕྱི་རྒྱལ་སོགས་སུ་བོད་པ་བོད་སྐད་མི་ཤེས་མཁན་མང་པོ་ཡོད་པ་རེད། སྤྱིར་ངས་བོད་སྐད་བཤད་མི་ཐུབ་ཀྱང་བོད་སྐད་གོ་ཐུབ་ཀྱི་ཡོད། ད་སྐབས་བོད་ཡིག་བོད་སྐད་སློབ་སྦྱོང་བྱེད་ཀྱིན་ཡོད།

གསར་འགོད་པ་དོན་འགྲུབ་བཀྲ་ཤིས།