པདྨ་ཚེ་དབང་ཤཱསྟྲི།
རང་ཡུལ་གངས་ཅན་གྱི་ལྗོངས་དེ་རྒྱ་ནག་གིས་དྲག་པོའི་བཙན་བཟུང་བྱས་ཏེ་མི་ལོ་དྲུག་ཅུ་ལྷག་འགྲོ་བའི་སྐབས་སུའང་། བོད་དོན་བདེན་མཐའ་གསལ་རྒྱུའི་སྐྱ་རེངས་ཙམ་ཡང་འཆར་རྒྱུ་མེད་པའི་ཁར། གཞིས་བཞུགས་བོད་མིའི་གནས་སྟངས་ནི། ཉིན་རེ་ཞིང་ཇེ་ཞན་ཇེ་སྡུག་ཏུ་འགྲོ་བཞིན་པ་དང་། བྱེས་འབྱོར་རྣམས་ནི། རིམ་པས་ནུབ་ཕྱོགས་ཡུལ་གྲུ་ཁག་གི་ནང་དུ་ཁ་ཐོར་དགུ་ཐོར་དུ་འགྲོ་བཞིན་པའི་གནས་སྐབས་འདིར། འདས་དོན་ལ་ཕྱི་མིག་ཅིག་བལྟས་ཏེ་མནོ་བསམ་གཏོང་སྐབས་གཞིས་བྱེས་གཉིས་ཀའི་ནང་དུ་སྤོབས་པ་དང་། དགའ་མགུ་ཡི་རངས་བྱེད་འོས་པའི་གྲུབ་འབྲས་གཟེངས་སུ་ཐོན་པ་མང་དག་ཅིག་བྱུང་ཡོད་ཀྱང་། གངས་ཅན་པ་ས་ཡ་དྲུག་ལ་རིང་ནས་སྙིང་དུ་བརྣག་པའི་འདོད་པའི་དོན་དེ་ནི་ད་དུང་ཡང་ཐག་རིང་དུ་གནས།
བོད་དོན་བདེན་པའི་མཐའ་གསལ་མ་ཐུབ་པའི་ཕྱི་ནང་གི་འགལ་རྐྱེན་དུ་མ་ཞིག་ཡོད་ཀྱང་། དེ་དག་གི་ནང་ནས་གཅིག་ནི། གཞིས་བྱེས་གཉིས་ཀའི་ནང་དུ་འཐབ་རྩོད་ཀྱི་ནུས་ཤུགས་གཅིག་ཏུ་བསྒྲིལ་མ་ཐུབ་པ་དང་། སྤྱི་དམངས་ཀྱིས་ལག་བསྟར་བདེ་བའི་གཞི་རྒྱ་ཆེ་བའི་འགོག་རྒོལ་གྱི་འཆར་གཞི་ངེས་ཅན་འདིང་མ་ཐུབ་པ། འགོག་རྒོལ་ལས་འགུལ་སྣེ་འཁྲིད་མཁན་གྱི་འགོ་ཁྲིད་ངེས་ཅན་གཟེངས་སུ་ཐོན་པ་མེད་པ་སོགས་ལ་བརྟེན་ནས་འཐབ་རྩོད་ལ་དགོས་ངེས་ཀྱི་ནུས་པ་མ་ཐོན་པ་དང་། ལྷག་པར་དུ་བསྒྲུབ་བྱ་རང་བཙན་དང་། མིང་དོན་མཚུངས་པའི་རང་སྲིད་རང་སྐྱོང་གང་ཡིན་ཀྱང་། སྒྲུབ་བྱེད་ཀྱི་ཐབས་ལམ་དེ་འཚེ་མེད་ཞི་བའི་ལམ་ཁོ་ན་ལ་བརྟེན་རྒྱུ་ཡིན་པ་དེ་ནི། བཙན་འབྱོལ་བོད་གཞུང་གིས་གཙོས་པའི་བོད་ཀྱི་གཞོན་ནུ་ལྷན་ཚོགས་དང་། དེ་བཞིན་སྒྲིག་འཛུགས་དང་། ཚོགས་པ་སྐྱིད་སྡུག་ཡོད་དོ་ཅོག དེ་བཞིན་གཞིས་བྱེས་མང་ཚོགས་བཅས་བརྒྱ་ཁ་གཅིག་བསྒྲགས་ཡིན། འོན་ཀྱང་བོད་རྒྱ་འབྲེལ་མོལ་གྱི་ལམ་ནས་བོད་ཀྱི་དཀའ་རྙོག་སེལ་ཐབས་བྱེད་པ་ལ། རྒྱ་ནག་གཞུང་ངོས་ནས་ང་ཚོར་སྐད་ཆ་མ་བཤད་ཐབས་མེད་ཀྱི་གནས་བབ་ཅིག་ཏུ་སླེབས་དགོས་པ་དེ་ང་ཚོས་བཟོ་དགོས།
དེ་ལྟར་ཡོང་བ་ལ་འཐབ་བྱུས་ལྡན་པའི་འཚེ་བ་སྤངས་པའི་སྲིད་དོན་གྱི་འཐབ་རྩོད་འཆར་གཞི་དང་། གོ་རིམ་ལྡན་པའི་སྒོ་ནས་བྱེད་དགོས་པ་ལས། ཆོས་དང་བཟང་སྤྱོད་གཞི་རྩར་བཞག་པའི་ལྟ་གྲུབ་ལྡན་པའི་འཚེ་མེད་ཞི་བའི་ཉམས་ལེན་ཁོ་ནའི་ལམ་ནས་འགྲུབ་མི་ཐུབ། དེས་ན་རྒྱ་ནག་གཞུང་དེས་ང་ཚོར་སྐད་ཆ་མ་བཤད་ཐབས་མེད་ཀྱི་གནས་ལ་སྐྱེལ་བའི་ཐབས་ལམ་བཟང་ཤོས་དེ་བོད་ཕྱི་ནང་གཉིས་སུ་འཚེ་བ་སྤངས་པའི་འགོག་རྒོལ་གཞི་རྒྱ་ཆེ་ལ་རྒྱུན་འཁྱོངས་བ་བྱེད་རྒྱུ་དེ་ཡིན། དེ་ལྟར་བྱེད་པ་ལ་ཐོག་མར་ང་ཚོས་འཚེ་བ་སྤངས་པའི་སྤྱི་དམངས་འགོག་རྒོལ་གྱི་རྣམ་གཞག་དང་། ལག་ལེན་གྱི་སྐོར་ལ་ཤེས་རྟོགས་དང་རྒྱུས་ལོན་བྱེད་གལ་ཤིན་ཏུ་ཆེ། སྤྱི་དམངས་འགོག་རྒོལ་གྱི་ངོ་བོ་དང་། དབྱེ་བ། འཐབ་བྱུས། འཐབ་རྩལ། ཐབས་ལམ་སོགས་ཀྱི་གོ་རྟོགས་དང་ཕན་ནུས་ལ་ངེས་ཤེས་མེད་པའི་སྒོ་ནས་བཀོལ་སྤྱོད་བྱས་ན། དོན་ཕན་ལྡན་པའི་ནུས་ཤུགས་དང་ལམ་ལྷོངས་མི་ཡོང་བའི་ཁར་སྐབས་རེ་ཉེན་ཁ་དང་གྱོང་གུན་གྱི་གནས་སུ་ལྷུངས་ཀྱང་སྲིད།
འཚེ་བ་སྤངས་པའི་འགོག་རྒོལ་གྱི་ནུས་སྟོབས་དང་། ཕན་རླབས་ཀྱི་ཐད་ལ་ཉེ་བའི་ཆར་མ་རི་ཡ། ཇེ། སིཊིཕན་དང་། ཨེ་རི་ཀ་ ཅེ་ནོ་ཝེཐ་གཉིས་ཀྱིས་༡༩༠༠ ནས་༢༠༠༦ བར་དུས་ཡུན་བརྒྱ་ཕྲག་གཅིག་ལྷག་གི་རིང་ལ། འཚེ་བ་དང་བཅས་པ་དང་། འཚེ་བ་སྤངས་པའི་འགོག་རྒོལ་གྱི་ལས་འགུལ་ཆེ་ཁག་ཁྱོན་བསྡོམས་གྲངས་༣༢༣ གྱི་རྒྱུ་ཆ་དང་། ལས་གཞི་ལ་དཔྱད་ཞིབ་དང་། མཚུངས་བསྡུར་གྱིས་ཉམས་ཞིབ་བྱས་པའི་གྲུབ་དོན་གྱི་འགོ་བརྗོད་དུ། ༼ཅིའི་ཕྱིར་སྤྱི་དམངས་འགོག་རྒོལ་གྱིས་དོན་བྱེད་ནུས་སམ།༽ ཅེས་པའི་ཤོག་གྲངས་༤༤ ཅན་གྱི་སྙན་ཐོའི་ནང་དོན་ལྟར་ན། ད་ལྟ་བར་དུ་འཚེ་བ་སྤངས་པའི་ལས་འགུལ་ཆེ་ཁག་ལ་གྲུབ་འབྲས་ལམ་ལྷོངས་བྱུང་བའི་བརྒྱ་ཆ་༥༣ དང་། འཚེ་བ་དང་བཅས་པའི་འགོག་རྒོལ་ལས་འགུལ་ལ་ལམ་ལྷོངས་བྱུང་བའི་བརྒྱ་ཆ་༢༦ ལས་མེད་ཅེས་དང་། ལམ་ལྷོངས་བྱུང་བའི་རྒྱུ་མཚན་ལྟེ་བ་གཉིས་ཡོད་དེ། དང་པོ་ནི། འཚེ་བ་སྤངས་པའི་ཐབས་ལམ་ལ་གཞི་རྟེན་བྱས་པའི་ལས་འགུལ་དེས་ལས་འགུལ་དེ་ཉིད་ཀྱི་ཁྲིམས་མཐུན་གནས་བབ་རྒྱལ་ནང་དང་རྒྱལ་སྤྱིའི་ནང་དུ་གོང་འཕེལ་དུ་གཏོང་བ་དང་། མིག་འབེན་ཁ་གཏད་ཀྱི་ཐོག་ཏུ་གནོན་ཤུགས་འཕར་མ་སྤྲོད་པར་འགོག་རྒོལ་གྱི་ནང་དུ་གཞི་རྒྱ་ཆེ་བའི་མང་ཚོགས་ཀྱིས་ཆ་ཤས་ལེན་རྒྱུར་སྐུལ་མ་བྱེད་ཀྱི་ཡོད། དེ་བཞིན་མང་ཚོགས་ཀྱིས་འགོག་རྒོལ་སྡེ་ཚན་གྱི་བློ་ཁ་མ་ཚིམས་པའི་རང་བཞིན་ངོ་འཕྲོད་པའི་རྐྱེན་གྱིས་ཕྱི་ནང་གཉིས་ཀའི་ཤས་ཆེ་བའི་རྒྱབ་སྐྱོར་འགོག་རྒོལ་སྡེ་ཚན་ལ་ཐོབ་པ་དང་། དུས་མཚུངས་སུ་མིག་འབེན་སྲིད་གཞུང་དེའི་སྲིད་དོན་དང་། དཔལ་འབྱོར། དམག་དོན་སྟོབས་ཤུགས་བཅས་ཀྱི་འབྱུང་ཁུངས་ལྟེ་བ་ཁག་ཉམས་ཉེས་ཁ་བྲལ་དུ་གཏོང་གི་ཡོད། གཉིས་པ་ནི། དྲག་པོའི་གྱེན་ལངས་ཀྱི་ཐད་དུ་སྲིད་གཞུང་གིས་ཀྱང་དྲག་པོའི་གདོང་ལེན་ལས་སླ་པོར་བྱེད་སྲིད་ཀྱང་། འཚེ་བ་སྤངས་པའི་ལས་འགུལ་གྱི་ཐད་དུ་སྲིད་གཞུང་གིས་དྲག་གནོན་བྱས་ན་གྲི་ཁ་རང་ཐོག་ཏུ་ལོག་སྲིད་པ་སོགས་རྒྱུ་མཚན་དུ་མའི་སྒོ་ནས་སྤྱི་དམངས་གཞི་རྩར་བྱས་པའི་འཚེ་བ་སྤངས་པའི་འགོག་རྒོལ་གྱི་ཐབས་ལམ་དེ་འཚེ་བ་དང་བཅས་པའི་ཐབས་ལམ་ལས་ཆེས་ནུས་ཤུགས་ཆེ་བ་དང་། དམིགས་ཡུལ་འགྲུབ་པར་ལམ་ལྷོངས་ཆེ་བ་ཡོད་པའི་མཇུག་བསྡོམས་བརྒྱབ་གནང་ཡོད།
དེས་ན་རང་ཅག་བོད་མི་ཚོས་ཀྱང་འཐབ་བྱུས་ལྡན་པའི་འཚེ་བ་སྤངས་པའི་འགོག་རྒོལ་གྱི་ལྟ་གྲུབ་དང་། ཉམས་ལེན་གྱི་ཐད་ལ་སློབ་སྦྱོང་དང་། ཤེས་རྟོགས། རྒྱུས་ལོན་བཅས་གནང་སྟེ། གོ་རིམ་ལྡན་ལ་གཞི་རྒྱ་ཆེ་བའི་འཐབ་བྱུས་ལྡན་པའི་འཆར་གཞི་ཞིག་གི་ལམ་ནས་ལས་འགུལ་སྤེལ་དགོས་པ་དང་། ལས་འགུལ་གང་སྤེལ་བ་དེ་དག་ཀྱང་ཁ་ཐོར་དུ་མ་སོང་བར་རྡོག་གཅིག་ཏུ་བསྒྲིལ་ཏེ་སྣག་ཐོག་གཙག་འཁེལ་དགོས་རྒྱུ་ནི་གལ་ཆེའི་ནང་གི་དོན་ཆེན་ཡིན། འཚེ་བ་སྤངས་པའི་འགོག་རྒོལ་གྱི་ཐབས་ལམ་ཇི་ལྟར་ལག་བསྟར་དགོས་པའི་ཐད་ལ་སྤྱིར་སྲིད་དོན་ཚན་རིག་པ་དུ་མའི་བརྩམས་ཆོས་མང་པོ་ཡོད་ཀྱང་། མཁས་དབང་ཇཱིན་ཤརྤ་ཀྱིས་མཛད་པའི་༼འཚེ་བ་སྤངས་པའི་བྱེད་ལས་ཀྱི་སྲིད་དོན་༽དང་། ༼འཚེ་བ་སྤངས་པའི་འཐབ་རྩོད་ཀྱི་ཉམས་ལེན་དང་ནུས་པ་༽ ༼སྲིད་དབང་སྒེར་འཛིན་ལམ་ལུགས་ནས་མང་གཙོའི་ལམ་ལུགས་བར༽ ལ་སོགས་པ་དང་། མེས་པོ་དམ་པ་གན་དྷཱིས་མཛད་པའི་༼བདེན་པའི་ཨུ་ཚུགས་༽དང་། ༼རྒྱ་གར་གྱི་རང་དབང་།༽ གཞན་ཡང་རོ་བྷཊ། ཧལ་ཝིས་མཛད་པའི་༼འཐབ་བྱུས་ལྡན་པའི་འཚེ་བ་སྤངས་པའི་འགལ་ཟླའི་ཐོག༽ ཅེས་པ་ལ་སོགས་དུ་མ་ཞིག་མཆིས་སོ།།
༼གནམ་ས་གོ་འབྱེད༽ཀློག་རོགས། བསྡོམས་བརྒྱབ་འདུག ལམ་བསྟན་ཟིན། ད་ག་རེ་བཤད་ཀྱི་ཡོད་དམ།
ངས་མང་པོ་མི་ཤེས་ཀྱང་རྒྱ་གར་གྱི་རང་བཙན་ནི་ཞི་དྲག་གཉིས་ཀའི་ལམ་དུ་བསྐྱོད་ཡོད་པ་ལས་ཞི་བ་ཁོ་ན་ག་ལ་ཡིན།བཟོད་པ་ལྷ་རྩེ་ལགས་ཀྱིས་གསུངས་པ་བདེན་པ་རེད་ལ་ཞི་བ་དང་དྲག་པོ་ཅི་བྱེད་རུང་དང་པོ་རང་ངོས་ནས་ཐམས་ཅད་བློས་གཏང་ནུས་མཁནགྱི་དབུ་འཁྲིད་ཅིག་དགོས་པའི་དེ་སུ་ཡི་བྱེད་དམ།མ་འོངས་པའི་བཀའ་བློན་ཁྲི་པས་དེ་ལྟར་བྱ་ཐུབ་བམ།
བདྨ་ཤསྟྲི་ལགས།སྐུ་ཉིད་ཀྱིས་དེབ་ཁ་ཤས་ངོ་སྤྲོད་ཙམ་ལས་ང་ཚོས་འདི་ལྟར་བྱའོ་ཞེས་པའི་ལམ་བསྟན་གང་ཡང་མི་འདུག་པས་དེ་ལྟར་མིན་པར་ཁྱེད་དང་ཁྱེད་འདྲ་བའི་མཁས་པ་རྣམས་ཀྱི་མ་འོངས་རྐང་ལམ་ཕྲ་མོ་རེ་བསྟན་ཐུབ་ན་དེ་ལས་ཡག་བ་འདུག་དྲན།
པདྨ་ཚེ་དབང་ཤཱསྟྲི། འཚེ་བ་སྤངས་པའི་འགོག་རྒོལ་གྱི་ནུས་པའི་བཀོར་རྒྱས་པོ་དང་ཁ་ཕྱོགས་ལམ་སྟོན་གནད་ལ་འཁེལ་པོ་གསུངས་སོང་བསམ། ལྷག་པར་ཕྱི་ལོ་ 1900 ནས་ཕྱི་ལོ་2006བར་འཚེ་བ་སྤང་པའི་ལས་འགུལ་དང་འཚེ་བ་དང་བཅས་པའི་འགོག་རྒོལ་ལས་འགུལ་གྱིས་ནུས་འབྲས་ཧེ་བག་༼ད་ལྟ་བར་དུ་འཚེ་བ་སྤངས་པའི་ལས་འགུལ་ཆེ་ཁག་ལ་གྲུབ་འབྲས་ལམ་ལྷོངས་བྱུང་བའི་བརྒྱ་ཆ་༥༣ དང་། འཚེ་བ་དང་བཅས་པའི་འགོག་རྒོལ་ལས་འགུལ་ལ་ལམ་ལྷོངས་བྱུང་བའི་བརྒྱ་ཆ་༢༦ ལས་མེད་ཅེས་དང་།༽ཡོད་པའི་རྒྱུ་མཚན་གསུངས་ཏེ་ང་ཚོའི་ཡང་འཚེ་བ་མེད་པའི་ལས་དོན་སྤེལ་དགོས་པའི་ཕྱོགས་སྟོན་གནང་ཡོད། འོན་ཀྱང་དེ་ནི་ཞྭ་དཔེ་ལྷམ་འགེབས་སུ་མུ་གྱུར་རམ། དེ་དག་ལ་བསམ་བློ་བཏང་ས་འདི་ཡོད་རྒྱ་དམར་རིང་ལུགས་པས་མེ་མདའི་ཁ་ནས་སྲིད་དབང་བཟུང་རྒྱུའི་ལྟ་གྲུབ་ཞིག་ཡོད་དེ་ནི་སེམས་ཅན་སྟག་ལྟར་གཏུམ་དྲགས་ཤིན་ཏུ་ཆེ། དཔེར་ན་ང་ཚོའི་གཏུམ་དྲགས་ཅན་གྱི་སེམས་ཅན་སྟག་ཞིག་ལ་འཚེ་བ་སྤང་ཏེ་སྔོ་ལྗང་གི་རྩྭ་ཐང་སྟེང་དུ་བཀག་བསྐྱིལ་ཐུབ་བམ། གོང་དུ་བརྗོད་པ་བཞིན་༼འཚེ་བ་སྤང་ནས་ལས་འགུལ་ཆེ་ཁག་ལ་གྲུབ་འབྲས་ལམ་ལྷོང་བ་བརྒྱ་ཆ་ 52༽ནང་མཚན་གཞི་གཅིག་རྒྱ་གར་གྱི་མེས་པོ་དམ་གྷནདྷི་ཡིན། རྒྱ་གར་དབྱིན་ཇི་ལག་ནས་རང་བཙན་ལེན་པའི་ཐབས་ལམ་འཚེ་བ་སྤང་པའི་ལས་འགུལ་ཁོ་ན་ག་ལ་ཡིན་ལོ་རྒྱུས་པ་ཞིབ་འཇུག་བྱ་དགོས། བལ་ཡུལ་ནང་མའོའི་རིང་ལུགས་པས་ཐོག་མར་ཤིང་གནས་འཕྲོད་དུ་རིགས་དྭགས་ཀྱི་ཤ་དང་ཤིང་གི་སྤག་པ་བཟས་ནས་རང་གི་མངོན་འདོད་གྲུབ་ཐབས་ཀྱི་དཀའ་དཔྱད་འབད་བརྩོན་བྱས་ནས་མི་ལོ་བཅུ་ཡི་ནང་བལ་ཡུལ་གྲོས་ཚོགས་ནང་ཚོགས་མི་མང་ཤོས་ཀྱི་རྒྱལ་ཁ་ལེན་ཐུབ་པ་བྱུང་ཡོད་ལ། སྐབས་གཅིག་རིང་བལ་ཡུལ་གྱི་ཆབ་སྲིད་དབང་ཆ་ཡོངས་རྫོགས་ཁོ་བ་ཚོས་ལག་ཏུ་བླངས་ཡོད། དེ་ནི་དུས་ཚོད་ཐུང་ཐུང་ནང་དཀའ་སྡུག་ལ་འབད་པ་དང་ཆབ་སྲིད་ཆེད་བློས་གཏོང་ཆེན་པོ་ཞིག་བྱས་པའི་གྲུབ་འབྲས་ལྟ་བུར་མཐོང༌། འདས་པའི་བྱུང་རིམ་དེ་དག་ལ་བསམ་ན་སེམས་ཅན་སྟག་འགོད་ཅིག་ཁ་ལོ་སྒྱུར་ཐུབ་པ་དགོས་ན་ཞི་དྲགས་སྤེལ་མའི་ཐོག་ནས་འདུལ་དགོས་པ་ཞིག་ལས་ཞི་བ་ཁོ་ནའི་འདུལ་མི་ཐུབ་པའི་ཁ་ཚོན་ཆེད། དེ་བས་ཆབ་སྲིད་པ་རྣམས་ལ་དཀའ་ཐུབ་བཟོད་སེམས་ཀྱི་བློ་སྟོབས་དང་། རང་མི་རིགས་དང་རིག་གཞུང་སྐྱོབས་འདོད་ཀྱི་ཆོད་སེམས་རྡོ་རྗེ་བྲག་རི་ལྟར་བརྟན་པོ་དགོས་པ་ཡིན། ད་ལྟའི་དུས་སྐབས་འདིར་དེ་ལྟ་བུ་མི་ཞིག་གང་དུ་འཚོལ་དགོས་སམ། གང་ནས་རྙེད་དམ།
པདྨ་ཚེ་དབང་ཤཱསྟྲི། འཚེ་བ་སྤངས་པའི་འགོག་རྒོལ་གྱི་ནུས་པའི་བཀོར་རྒྱས་པོ་དང་ཁ་ཕྱོགས་ལམ་སྟོན་གནད་ལ་འཁེལ་པོ་གསུངས་སོང་བསམ། ལྷག་པར་ཕྱི་ལོ་ 1900 ནས་ཕྱི་ལོ་2006བར་འཚེ་བ་སྤང་པའི་ལས་འགུལ་དང་འཚེ་བ་དང་བཅས་པའི་འགོག་རྒོལ་ལས་འགུལ་གྱིས་ནུས་འབྲས་ཧེ་བག་༼ད་ལྟ་བར་དུ་འཚེ་བ་སྤངས་པའི་ལས་འགུལ་ཆེ་ཁག་ལ་གྲུབ་འབྲས་ལམ་ལྷོངས་བྱུང་བའི་བརྒྱ་ཆ་༥༣ དང་། འཚེ་བ་དང་བཅས་པའི་འགོག་རྒོལ་ལས་འགུལ་ལ་ལམ་ལྷོངས་བྱུང་བའི་བརྒྱ་ཆ་༢༦ ལས་མེད་ཅེས་དང་།༽ཡོད་པའི་རྒྱུ་མཚན་གསུངས་ཏེ་ང་ཚོའི་ཡང་འཚེ་བ་མེད་པའི་ལས་དོན་སྤེལ་དགོས་པའི་ཕྱོགས་སྟོན་གནང་ཡོད། འོན་ཀྱང་དེ་ནི་ཞྭ་དཔེ་ལྷམ་འགེབས་སུ་མུ་གྱུར་རམ། དེ་དག་ལ་བསམ་བློ་བཏང་ས་འདི་ཡོད་རྒྱ་དམར་རིང་ལུགས་པས་མེ་མདའི་ཁ་ནས་སྲིད་དབང་བཟུང་རྒྱུའི་ལྟ་གྲུབ་ཞིག་ཡོད་དེ་ནི་སེམས་ཅན་སྟག་ལྟར་གཏུམ་དྲགས་ཤིན་ཏུ་ཆེ། དཔེར་ན་ང་ཚོའི་གཏུམ་དྲགས་ཅན་གྱི་སེམས་ཅན་སྟག་ཞིག་ལ་འཚེ་བ་སྤང་ཏེ་སྔོ་ལྗང་གི་རྩྭ་ཐང་སྟེང་དུ་བཀག་བསྐྱིལ་ཐུབ་བམ། གོང་དུ་བརྗོད་པ་བཞིན་༼འཚེ་བ་སྤང་ནས་ལས་འགུལ་ཆེ་ཁག་ལ་གྲུབ་འབྲས་ལམ་ལྷོང་བ་བརྒྱ་ཆ་ 52༽ནང་མཚན་གཞི་གཅིག་རྒྱ་གར་གྱི་མེས་པོ་དམ་གྷནདྷི་ཡིན། རྒྱ་གར་དབྱིན་ཇི་ལག་ནས་རང་བཙན་ལེན་པའི་ཐབས་ལམ་འཚེ་བ་སྤང་པའི་ལས་འགུལ་ཁོ་ན་ག་ལ་ཡིན་ལོ་རྒྱུས་པ་ཞིབ་འཇུག་བྱ་དགོས། བལ་ཡུལ་ནང་མའོའི་རིང་ལུགས་པས་ཐོག་མར་ཤིང་གནས་འཕྲོད་དུ་རིགས་དྭགས་ཀྱི་ཤ་དང་ཤིང་གི་སྤག་པ་བཟས་ནས་རང་གི་མངོན་འདོད་གྲུབ་ཐབས་ཀྱི་དཀའ་དཔྱད་འབད་བརྩོན་བྱས་ནས་མི་ལོ་བཅུ་ཡི་ནང་བལ་ཡུལ་གྲོས་ཚོགས་ནང་ཚོགས་མི་མང་ཤོས་ཀྱི་རྒྱལ་ཁ་ལེན་ཐུབ་པ་བྱུང་ཡོད་ལ། སྐབས་གཅིག་རིང་བལ་ཡུལ་གྱི་ཆབ་སྲིད་དབང་ཆ་ཡོངས་རྫོགས་ཁོ་བ་ཚོས་ལག་ཏུ་བླངས་ཡོད། དེ་ནི་དུས་ཚོད་ཐུང་ཐུང་ནང་དཀའ་སྡུག་ལ་འབད་པ་དང་ཆབ་སྲིད་ཆེད་བློས་གཏོང་ཆེན་པོ་ཞིག་བྱས་པའི་གྲུབ་འབྲས་ལྟ་བུར་མཐོང༌། འདས་པའི་བྱུང་རིམ་དེ་དག་ལ་བསམ་ན་སེམས་ཅན་སྟག་འགོད་ཅིག་ཁ་ལོ་སྒྱུར་ཐུབ་པ་དགོས་ན་ཞི་དྲགས་སྤེལ་མའི་ཐོག་ནས་འདུལ་དགོས་པ་ཞིག་ལས་ཞི་བ་ཁོ་ནའི་འདུལ་མི་ཐུབ་པའི་ཁ་ཚོན་ཆེད། དེ་བས་ཆབ་སྲིད་པ་རྣམས་ལ་དཀའ་ཐུབ་བཟོད་སེམས་ཀྱི་བློ་སྟོབས་དང་། རང་མི་རིགས་དང་རིག་གཞུང་སྐྱོབས་འདོད་ཀྱི་ཆོད་སེམས་རྡོ་རྗེ་བྲག་རི་ལྟར་བརྟན་པོ་དགོས་པ་ཡིན། ད་ལྟའི་དུས་སྐབས་འདིར་དེ་ལྟ་བུ་མི་ཞིག་གང་དུ་འཚོལ་དགོས་སམ། གང་ནས་རྙེད་དམ།