མི་འཛམ་གླིང་ཐོག་མེད་དུ་མི་རུང་བ་ཞིག་མིན།

ད་ལོའི་འཛམ་གླིང་ཁོར་ཡུག་ཉིན་མོ་སྟེ་ཕྱི་ཟླ་ ༦ ཚེས་ ༥ ཉིན་ངྷ་རམ་ས་ལའི་གངས་དཀར་ཏི་སི་ཁོར་ཡུག་གོ་རྟོགས་ལས་འགུལ་ཁང་གིས་ངྷ་རམ་ས་ལ་ཉེ་འཁོར་གྱི་དགོན་སྡེ་ཁག་གི་དགེ་འདུན་པ་ཚོར་ཁོར་ཡུག་ཐད་བགྲོ་གླེང་ཞིག་གོ་སྒྲིག་བྱས་ཡོད་པ་དང་། དེ་དང་མཉམ་དུ་བོད་སྒྱུར་བྱས་ཡོད་པའི་ཁོར་ཡུག་སྐོར་གྱི་དཔེ་དེབ་ཁག་ཅིག་དབུ་འབྱེད་གནང་ཡོད། སྐབས་དེ་དང་བསྟུན་ཏེ་འདི་གའི་གསར་འགོད་པས་གངས་དཀར་ཏི་སི་ཁོར་ཡུག་གོ་རྟོགས་ལས་འགུལ་ཁང་གི་འགན་འཛིན་ཚེ་རིང་གཡང་སྐྱིད་ལགས་སུ་བཅར་འདྲི་ཞུས་ཡོད།

དྲི་བ། ཐེངས་འདིའི་འཛམ་གླིང་ཁོར་ཡུག་ཉིན་མོ་དང་བསྟུན་ཏེ། གངས་དཀར་ཏི་སི་ཁོར་ཡུག་གོ་རྟོགས་ལས་འགུལ་ཁང་གིས་དགེ་འདུན་པ་ཚོར་ཁོར་ཡུག་སྐོར་གྱི་བགྲོ་གླེང་ཞིག་གོ་སྒྲིག་བྱས་པའི་ནང་དོན་དང་དམིགས་ཡུལ་སྐོར་ངོ་སྤྲོད་ཅིག་གནང་རོགས། 

ལན། ཕྱི་ཟླ་ ༦ ཚེས་ ༥ དེ་འཛམ་གླིང་ཁོར་ཡུག་ཉིན་མོ་རེད། སྔོན་མ་ང་ཚོའི་ལས་ཁུངས་འདི་ཡང་ཉིན་མོ་དེ་རང་ལ་དབུ་བརྙེས་པ་རེད། སྔོན་མ་ཡིན་ན་ཉིན་མོ་འདི་དང་བསྟུན་ཏེ་བཙན་བྱོལ་བོད་མིའི་གཞིས་ཆགས་ཁག་དང་སློབ་གྲྭ་ཁག་ཏུ་བསྐྱོད་དེ། ཁོར་ཡུག་སྐོར་གྱི་ཟབ་སྦྱོང་སྤྲོད་ཀྱིན་ཡོད་པ་རེད། ཕྱི་ལོ་ ༢༠༠༥ ལོར་རྒྱ་གར་ལྷོ་ཕྱོགས་ཀྱི་དུས་འཁོར་དབང་ཆེན་སྐབས། ས་གནས་སུ་སོང་སྟེ་ཁོར་ཡུག་གཅེས་ཉར་དང་རི་དྭགས་སྲུང་སྐྱོབ་སྐོར་ཁྱབ་བསྒྲགས་བྱས་པ་ཡིན། ད་ལོ་སྔར་དང་མི་འདྲ་བར་དགོན་སྡེ་ཁག་ ༡༤ ཙམ་གྱི་དགེ་འདུན་པ་གཉིས་རེ་བསྐངས་ཏེ། ཁོར་ཡུག་སྐོར་ལ་གླེང་སྟེགས་ཤིག་བསྐྲུན་པ་ཡིན། བགྲོ་གླེང་ཐོག་དགོན་སྡེ་ཁག་ནང་ཁོར་ཡུག་ཚོགས་ཆུང་འཛུགས་རྒྱུ་དང་། ཁོར་ཡུག་སྐོར་གྱི་རྩོམ་ཡིག་འགྲན་བསྡུར་སྤེལ་རྒྱུ། དགོན་པའི་བླ་སྤྲུལ་དགེ་བཤེས་རྣམ་པས་གྲྭ་བཙུན་དང་མང་ཚོགས་ལ་ཁོར་ཡུག་དང་འབྲེལ་བའི་བཀའ་སློབ་ལམ་སྟོན་གནང་རྒྱུ། སློབ་གྲྭའི་སློབ་ཚན་ནང་ཁོར་ཡུག་སྲུང་སྐྱོབ་སྐོར་འཇོག་རྒྱུ་བཅས་དོན་ཚན་ ༡༤ ཙམ་ཐག་གཅོད་གནང་ཡོད་པ་རེད། ང་ཚོའི་ལས་ཁུངས་ཀྱི་དམིགས་ཡུལ་གཙོ་བོ་གང་ཡིན་ཟེར་ན། སྔོན་མའི་བོད་པའི་སྲོལ་རྒྱུན་ནང་། ཁོར་ཡུག་གཅེས་ཉར་དང་སྲུང་སྐྱོབ་སྐོར་གྱི་གོམས་གཤིས་བཟང་པོ་མང་པོ་ཞིག་ཡོད་པ་དེ་དག་ཉམས་གསོ་དང་། དེང་གི་སྤྱི་ཚོགས་ནང་དར་སྤེལ་གཏོང་རྒྱུ་དེ་རེད། དཔེར་ན། གད་སྙིགས་མེར་བསྲེགས་གཏོང་བ་དང་། རྫས་སྦྱོར་གྱི་དངོས་རྫས་མང་པོ་བེད་སྤྱོད་བཏང་ན། དེ་ལ་གནོད་སྐྱོན་ག་རེ་ཡོད་མེད་ངོ་སྤྲོད་བྱས་ཏེ། ཁོར་ཡུག་སྲུང་སྐྱོབ་ཐད་གོ་རྟོགས་སྤེལ་རྒྱུ་དེ་རེད། འོན་ཀྱང་ང་ཚོས་སྐད་ཆ་ཅི་ཙམ་བཤད་ཀྱང་། མང་ཚོགས་ཀྱིས་དེ་ཙམ་དོ་སྣང་བྱེད་གི་མ་རེད། དེ་བས་བོད་མི་ཚོ་བརྩེ་བ་ཡོད་སའི་བླ་མ་དང་གྲྭ་བ་ཚོས་གསུང་པ་ཡིན་ན། ཕན་རླབས་ཆེ་བ་དང་ནུས་པ་འཐོན་རྒྱུར་རེ་བ་རྒྱག་གིན་ཡོད།

དྲི་བ། དེང་སྐབས་འཛམ་གླིང་ཡོངས་ཁོར་ཡུག་ལ་དོ་སྣང་སླེབས་པ་དང་བསྟུན་ཏེ། ཁོར་ཡུག་སྲུང་སྐྱོབ་སྐོར་གྱི་གཞུང་ལུགས་མང་པོ་ཞིག་འཐོན་བཞིན་ཡོད། དེ་བཞིན་བོད་རང་གི་སྲོལ་རྒྱུན་གྱི་རིག་གཞུང་དང་གོམས་སྲོལ་ནང་དུའང་ཁོར་ཡུག་ལ་བདག་གཅེས་ཀྱི་ཤེས་བྱ་མི་ཉུང་བ་ཞིག་ཡོད་སྟབས། ཁྱེད་ཅག་གིས་གང་ལ་རྩ་འཛིན་གནང་གིན་ཡོད་དམ།

ལན། ཁོར་ཡུག་སྲུང་སྐྱོབ་ཐད་ལྟ་གྲུབ་སྣ་ཚོགས་ཡོད་པ་རེད། དཔེར་ན། ཤིང་སྡོང་ལྟ་བུར་མཚོན་ན། ཤིང་སྡོང་དེས་སའི་བཅུད་འཛིན་པ་དང་རང་བྱུང་ཁམས་དོ་མཉམ་བཟོ་བ། མི་ལ་སྲོག་རླུང་དང་དབྱངས་དབུགས་སྩོལ་བ། ཤིང་འབྲས་མིས་ལོངས་སུ་སྤྱོད་དགོས་པ་སོགས་ནི། མིའི་དགོས་མཁོ་གཞིར་བཞག་གིས་རང་བྱུང་ཁམས་སྲུང་སྐྱོབ་བྱེད་སྟངས་ཤིག་རེད། ཡང་ཧ་ཅང་གཏིང་ཟབ་པའི་ཁོར་ཡུག་སྲུང་སྐྱོབ་ཀྱི་ལྟ་གྲུབ་གསར་པ་ཞིག་ཡོད། དེ་ནི་རང་བྱུང་ཁམས་ཆེན་པོའི་ནང་གི་རི་སྐྱེས་སྲོག་ཆགས་དང་། རྩི་ཤིང་ནགས་ཚལ་ཡོངས་རྫོགས་ལ་འཚོ་གནས་ཀྱི་ཐོབ་ཐང་ཡོད་པ་དང་། དེ་ལ་མིས་ཧམ་སྤྱོད་དང་གཏོར་བཤིག་གི་དབང་ཆ་མེད་པའི་བཤད་སྟངས་ཤིག་ཡོད། ལྟ་གྲུབ་འདི་ནང་པའི་ཆོས་དང་འབྲེལ་བ་ཡོད་སྐོར་བཤད་ཀྱིན་ཡོད་སྟབས། ལྟ་གྲུབ་འདིའི་རིགས་གང་ཐུབ་ཀྱིས་ང་ཚོས་བོད་སྒྱུར་བྱེད་ཀྱིན་ཡོད། ད་ཆར་བཟོ་ལས་གསར་བརྗེ་དང་ཁོར་ཡུག་གཏོར་བཅོམ། མཁའ་དབུགས་སྦག་བཙོག་ཡོངས་རྫོགས་མིའི་དགོས་མཁོ་བསྒྲུབ་ཆེད་ཁོ་ན་ལས་བྱུང་བ་རེད། འོན་ཀྱང་རང་བྱུང་ཁམས་ཆེན་པོ་དེ་མི་ཁོ་ནར་དབང་བ་ཞིག་མ་རེད། མཐར་གཏུགས་ན་མི་ལ་འདོད་ཆུང་ཆོག་ཤེས་དགོས་པ་དེ་རེད། བཤད་སྟངས་འདི་ནང་བའི་ཆོས་ཀྱི་ལྟ་གྲུབ་ཅིག་རེད། ང་ཚོས་ལྟ་གྲུབ་འདི་ཉམས་ལེན་བྱ་དགོས་ཀྱི་འདུག་ཟེར་གྱིན་ཡོད།

དྲི་བ། ཡར་རྒྱས་འགྲོ་བཞིན་པའི་རྒྱལ་ཁབ་དང་ལུང་པ་རེ་ཟུང་གིས་སོ་སོའི་ལུང་པའི་ཡར་རྒྱས་ཆེད། ཁོར་ཡུག་སྲུང་སྐྱོབ་ལ་དོ་སྣང་བྱེད་ཀྱིན་མེད་པ་མ་ཟད། ད་དུང་ཁོར་སྲུང་སྐྱོབ་ཀྱི་ལས་འགུལ་སྤེལ་མཁན་ཚོར་འདོད་པ་མེད་པའི་རྣམ་འགྱུར་སྟོན་བཞིན་ཡོད། དེ་བཞིན་དུ་བོད་པ་ཡང་ཡར་རྒྱས་ཕྱིན་མེད་པའི་ཡུལ་ལུང་ཞིག་ཡིན་སྟབས། འདིའི་ཐད་དགོངས་ཚུལ་ག་འདྲ་ཡོད་དམ།

ལན། ང་ཚོས་འཛམ་གླིང་ཡར་རྒྱས་འགྲོ་ཐབས་དང་། མི་ཁོ་ན་འཚོ་གནས་ཐུབ་ཐབས་བཤད་ཀྱི་ཡོད་པ་མ་རེད། འཛམ་གླིང་གི་མི་སྟོང་སོང་རུང་སེམས་ཅན་གཞན་ལ་གནོད་སྐྱོན་ཐེབས་གི་མ་རེད། སྲོག་ཆགས་གཞན་སྟོང་སོང་བ་ཡིན་ན་འཛམ་གླིང་ལ་གནོད་སྐྱོན་ཐེབས་གི་རེད། མི་ཟེར་བ་དེ་གལ་ཆེན་ཞིག་མ་རེད། འཛམ་གླིང་གི་སེམས་ཅན་བགྲང་ལས་འདས་པའི་ནང་མི་དེ་སྲོག་ཆགས་གསར་ཤོས་གྲས་རེད། ང་ཚོས་མི་དེ་གལ་ཆེན་དུ་བརྩི་གི་མེད། མི་འཛམ་གླིང་ཐོག་མེད་དུ་མི་རུང་བ་ཞིག་མ་རེད། རྩི་ཤིང་ནགས་ཚལ་དང་སྲོག་ཆགས་སེམས་ཅན་གཞན་དག་མེད་དུ་མི་རུང་བ་རེད། འོན་ཀྱང་། ནུབ་ཕྱོགས་སུ་བཟོ་ལས་གསར་བརྗེ་དར་བའི་ཚུན་གྱི་ལོ་ངོ་སུམ་བརྒྱའི་རིང་། མི་ཟེར་བ་དེ་འཛམ་གླིང་གི་སེམས་ཅན་གལ་ཆེ་ཤོས་དང་དབང་ཐང་ཆེ་ཤོས་བཟོས་པ་རེད། ང་ཚོའི་བོད་པའི་རིག་གཞུང་ནང་དེ་འདྲ་མེད། མི་ཟེར་བ་དེ་འགྲོ་བ་རིགས་དྲུག་གི་བྱེ་བྲག་ཅིག་ཡིན་པ་དང་། མིས་གང་བྱུང་བྱ་མི་ཆོག་པ་དེ་ཤུགས་ཆེན་པོས་བཤད་ཡོད། བོད་མཐོ་སྒང་དེ་ཡུལ་དུས་གནས་བབ་གང་གི་ཆ་ནས་ཀྱང་། རི་སྐྱེས་སྲོག་ཆགས་རྩ་སྟོང་དང་རྩི་ཤིང་ནགས་ཚལ་འཕྲོ་བརླག་འགྲོ་སླ་བ་ཡོད་ཀྱང་། བོད་པའི་སྲོལ་རྒྱུན་ནང་ལྷ་ལ་སྐྲག་དགོས་པ་དང་ཀླུ་ལ་སྐྲག་དགོས་པའི་ལམ་སྲོལ་འདི་དག་གིས་མཐོ་སྒང་སྲུང་སྐྱོབ་བྱས་ཏེ། ད་ཆར་འཛམ་གླིང་ན་དཀོན་པའི་སྐྱེས་དངོས་རིགས་དང་། རི་དྭགས་སེམས་ཅན་མང་པོ་ཞིག་འཚོ་སྡོད་བྱས་ཡོད།

དྲི་བ། མར་བ་དང་མི་ལ་ཡབ་སྲས་ནས་བརྒྱུད་པའི་བོད་པའི་སྔོན་བྱོན་སྐྱེས་ཆེན་དམ་པ་མང་པོ་ཞིག་གིས་རང་བྱུང་ཁམས་དང་བར་ཐག་ཉེ་བར་འཚོ་ཞིང་། རི་སྐྱེས་སྲོག་ཆགས་དང་འཆམ་མཐུན་གྱི་འཚོ་བ་རོལ་བའི་སྲོལ་བཟང་ཞིག་ཡོད། འོན་ཀྱང་བོད་ཀྱི་གསོ་བ་རིག་པའི་ནང་རི་སྐྱེས་སྲོག་ཆགས་རྩ་ཆེན་རིགས་ཀྱི་ཤ་རུས་ཁྲག་གསུམ་བེད་སྤྱོད་གཏོང་གིན་ཡོད་པ་མ་ཟད། རྩ་སྨན་དང་སྔོ་སྨན་གྱི་རིགས་ཀྱང་མང་ཆེ་བ་ཞིག་སྟོང་ལ་ཉེ་བའི་སྐྱེས་དངོས་རྩ་ཆེན་དག་ཆགས་ཡོད་པའི་ཐད་དགོངས་འཆར་འདྲ་ཡོད་དམ།  

ལན། བོད་པའི་སྲོལ་རྒྱུན་ནང་རང་བྱུང་ཁམས་དང་འབྲེལ་འདྲིས་བྱེད་པའི་ལམ་སྲོལ་དེར་ང་ཚོས་གལ་ཆེན་དུ་བརྩི་བཞིན་ཡོད། བོད་ཀྱི་གསོ་བ་རིག་པའི་ནང་རི་སྐྱེས་སྲོག་ཆགས་ཀྱི་ཤ་ཁྲག་རུས་གསུམ་དགོས་ས་མང་པོ་འདུག ལྷག་པར་དུ་འབྲོང་གི་སྙིང་ཁྲག་དང་། དོམ་མཁྲིས། སྟག་རུས། གླ་རྩི་སོགས་དགོས་པ་རེད། དེ་དག་འགྲིག་གི་མེད་པ་དང་ཁྲིམས་འགལ་ཡིན་སྐོར་རྟག་པར་བཤད་ཀྱིན་ཡོད། དེ་ཙམ་དུ་མ་ཟད་བོད་སྨན་ནང་སྤྱོད་བཞིན་པའི་སྨན་རྩ་མང་ཆེ་བ་ཞིག་རྩ་སྟོང་དུ་འགྲོ་ལ་ཉེ་བའི་གྲས་རེད། ཁོར་ཡུག་སྲུང་སྐྱོབ་ཟེར་དུས་ཧ་ཅང་རྒྱ་ཆེན་པོ་ཞིག་དང་གཏིང་ཟབ་པོ་ཞིག་ཡིན་སྟབས། ངྷ་རམ་ས་ལའི་སྤྱི་ཚོགས་ཆུང་ཆུང་ནང་། ང་ཚོའི་ལས་ཁུངས་གསར་པ་འདི་ལྟ་བུ་ཞིག་གིས་རྒྱ་ཆེན་པོ་ཞིག་ལ་ལག་པ་འཆང་ན། མཚམས་རེར་དཀའ་ངལ་འཕྲད་ཀྱིན་འདུག བོད་པའི་གསོ་བ་རིག་པ་དང་། བོད་མི་རིགས་ཀྱི་སྲོལ་རྒྱུན་ཆས་གོས་དེ་རིགས་ལ་སྐྱོན་བརྗོད་དང་བླང་དོར་བྱ་དགོས་ཚུལ་བཤད་རྒྱུ་ཕར་ཞོག ཐ་ན་གད་སྙིགས་མེར་བསྲེགས་གཏོང་མི་རུང་བའི་སྐོར་བཤད་ཀྱང་ང་ཚོར་ཁ་བརྡུང་རག་ཡོང་གིན་འདུག གོ་ཐོས་ལྟར་ན། བོད་གཞུང་སྨན་རྩིས་ཁང་གིས་ཤ་ཁྲག་རུས་གསུམ་གྱི་ཚབ་ཏུ་སྔོ་སྨན་སྤྱོད་ཐུབ་མིན་ལ་ཚོད་ལྟ་ཞིག་བྱེད་ཀྱིན་ཡོད་པ་གོ་སོང་མོད། རྩི་ཤིང་གི་སྔོ་སྨན་དེ་རིགས་ཀྱང་སྐྱེས་དངོས་རྩ་ཆེན་ཆགས་ཀྱི་ཡོད་པ་རེད། རྒྱ་གར་གྱི་སྨན་པ་ཚོས། སོ་སོས་བེད་སྤྱོད་གཏོང་གིན་ཡོད་པའི་སྨན་རིགས་ཁོང་ཚོ་རང་གིས་འདེབས་འཛུགས་བྱེད་ཀྱིན་ཡོད། བོད་པའི་སྨན་པ་ཚོར་མིས་འདེབས་ལས་བྱས་པའི་སྨན་དང་རང་བྱུང་ཁམས་ཀྱི་སྨན་གཉིས་ཀྱི་ནུས་པ་མི་འདྲ་ཟེར་བའི་བཤད་སྲོལ་ཞིག་ཡོད། ལྷག་པར་དུ་བོད་ནང་གི་བོད་སྨན་ཁང་ཁག་དང་། ལྷག་པར་དུ་ལྷ་ས་སྨན་རྩིས་ཁང་སོགས་སུ་རི་སྐྱེས་སྲོག་ཆགས་ཀྱི་ཤ་ཁྲག་རུས་གསུམ་བེད་སྤྱོད་གཏོང་གིན་ཡོད་པས་མི་ཚད། བརྙན་འཕྲིན་སོགས་སུ་བོད་སྨན་ཁྱབ་བསྒྲགས་བྱེད་སྐབས། གླ་རྩི་དང་དོམ་མཁྲིས། སྟག་རུས་སོགས་ཡོད་སྐོར་ཤུགས་ཆེན་པོས་བཤད་ཀྱིན་འདུག དེ་དག་ལ་སེམས་འཚབ་ཆེན་པོ་ཡོད།

དྲི་བ། ཉེ་ཆར་ཁྱེད་ཅག་གིས་བོད་བསྒྱུར་བྱས་པའི་དེབ་ཆུང་ཞིག་ཏུ་སྐྱེ་ལྡན་སོ་ནམ་འདེབས་ལས་ཀྱི་གལ་ཆེའི་རང་བཞིན་བཀོད་འདུག སྔོན་མ་ཟམ་གདོང་རིན་པོ་ཆེ་མཆོག་བཀའ་བློན་ཁྲི་པར་བཞུགས་མ་ཐག བོད་པའི་གཞིས་ཆགས་ཁག་ནང་སྲོལ་རྒྱུན་སོ་ནམ་འདེབས་ལས་ཀྱི་སྲིད་བྱུས་བཏིང་བ་རེད། འོན་ཀྱང་། བོད་པའི་གཞིས་ཆགས་ཁ་ཤས་ནང་སྲོལ་རྒྱུན་སོ་ནམ་ལ་དཀའ་ངལ་མི་ཉུང་བ་ཞིག་འཕྲད་ཀྱིན་ཡོད་སྐོར་གོ་སོང་། འདིའི་ཐད་དགོངས་ཚུལ་ག་འདྲ་ཡོད་དམ།

ལན། བཀའ་ཁྲི་ཟམ་གདོང་རིན་པོ་ཆེ་མཆོག་གི་སྲིད་བྱུས་དེ་ལ་ང་ཚོས་བསྔགས་བརྗོད་དང་རྒྱབ་སྐྱོར་བྱེད་ཀྱིན་ཡོད། ང་ཚོ་གཞིས་ཆགས་ཁག་ལ་ཟབ་སྦྱོང་སྤྲོད་པར་ཐེངས་ཁ་ཤས་ཕྱིན་པ་ཡིན། བོད་མིའི་གཞིས་ཆགས་ཁག་གི་འཚོ་བའི་རྟེན་ས་གཙོ་བོ་དེ་ཞིང་ལས་མ་རེད། མང་ཆེ་བ་ཚོང་ལས་དང་ནང་མི་ཕྱི་རྒྱལ་དུ་ཡོད་པ། དེ་བཞིན་སྦྱིན་བདག་སོགས་ལ་བརྟེན་འདུག གཞིས་ཆགས་ཐོག་མར་འཛུགས་སྐབས། བྷེལ་ཀོབ་ལྟ་བུར་མཚོན་ན། སྔོན་མ་གླིང་ཆེན་དང་ཕག་པ། ཤ་བ་སོགས་སེམས་ཅན་རྩ་ཆེན་མང་པོ་ཡོད་ས་དང་། རྩི་ཤིང་ནགས་ཚལ་རྩ་ཆེན་མང་པོ་ཞིག་ལ་གཏོར་བཤིག་བཏང་སྟེ། གཞིས་ཆགས་བརྒྱབ་ཅིང་ཞིང་ཁ་བཟོས་ཤིང་། རྒྱུན་རིང་པོ་ཞིག་ལ་རྫས་ལུད་བེད་སྤྱོད་བཏང་བ་རེད། བར་སྐབས་ཤིག་ནས་སའི་ནང་དུ་འབུ་རིགས་གཅིག་ཀྱང་མཐོང་རྒྱུ་མེད་པ་ཆགས་ཤིང་། རྒྱུག་ཆུ་དང་མཚོ་དང་མཚེའུ་མང་པོ་ཞིག་སྐམ་ཡོད་པ་རེད། རྗེས་སུ་ཟམ་གདོང་རིན་པོ་ཆེ་མཆོག་གིས་སྐྱེ་ལྡན་སོ་ནམ་འདེབས་ལས་ཀྱི་སྲིད་བྱུས་ལག་བསྟར་བྱས་རྗེས་སླར་ཡང་འབུ་རིགས་མཐོང་རྒྱུ་ཡོད་པ་ཆགས་ཤིང་། མཚེའུ་དང་ཆུ་འཁྱིལ་ཕྲན་བུ་གང་སར་མཐོང་རྒྱུ་ཡོད་པ་ཆགས་པ་རེད། རྒྱུ་མཚན་དེ་དག་ལ་བརྟེན་ཏེ། བོད་མིའི་གཞིས་ཆགས་ཁག་ནང་སྐྱེ་ལྡན་ཞིང་ལས་ལ་དགའ་མོས་ཡོད་མཁན་མང་དུ་འགྲོ་བཞིན་ཡོད། ལྷག་པར་དུ་སྤྱི་སེམས་ཡོད་མཁན་དང་། བསམ་བློའི་ཕུགས་རྒྱང་རིང་བོ་ཡོད་མཁན་ཞིག་ཡིན་ན་སྐྱེ་ལྡན་སོ་ནམ་འདེབས་ལས་ཀྱི་དགེ་མཚན་གསལ་བོ་ཧ་གོ་གི་རེད། 

དྲི་བ། རྒྱ་ནག་གིས་གཙང་གསུམ་མགོ་ཁུངས་སྲུང་སྐྱོབ་གཙོས་པའི་འབྲོག་པའི་རྩྭ་ཐང་ཉམས་གསོའི་ཆེད་འབྲོག་པ་གཞིས་སྤོར་བྱེད་པ་དང་གྲོང་ཁྱེར་ཅན་དུ་བསྒྱུར་བ། ཕྱུགས་རིགས་ཇེ་ཉུང་དུ་གཏོང་བ་སོགས་ཀྱི་སྲིད་བྱུས་ལག་བསྟར་བྱེད་ཀྱིན་ཡོད། འདི་དག་ཀྱང་ལྟོས་ས་ལྟོས་འཇོག་གིས་ཁོར་ཡུག་སྲུང་སྐྱོབ་དང་འབྲེལ་བ་མེད་ཟེར་དཀའ་ཡང་། བཙན་བྱོལ་བོད་གཞུང་གིས་རྒྱ་ནག་གི་སྲིད་བྱུས་དེ་ནི། བོད་པ་རྩ་མེད་དུ་གཏོང་བའི་སྲིད་བྱུས་གཏིང་ནག་ཅིག་ཡིན་པར་ངོས་འཛིན་གྱིས་སྐྱོན་བརྗོད་བྱེད་ཀྱིན་ཡོད་པའི་ཐད་ལྟ་ཚུལ་གང་འདྲ་ཡོད་དམ།

ལན། རྒྱ་ནག་གི་ལས་གཞི་དེའི་དམིགས་ཡུལ་ངོ་མ་དེ་བོད་ཀྱི་ཁོར་ཡུག་སྲུང་སྐྱོབ་ཡིན་མིན་ཐད། མི་མང་པོ་ཞིག་ལ་དོགས་པ་ཡོང་གིན་ཡོད་པ་རེད། འོན་ཀྱང་། ཁོང་ཚོའི་དམིགས་ཡུལ་ཡག་བཙོག་ལ་མ་ལྟོས་པར་གྲུབ་འབྲས་ནི་ཁོར་ཡུག་སྲུང་སྐྱོབ་ལ་ཕན་པ་ཞིག་ཡིན་ན། ང་ཚོས་དེ་ལ་བསྔགས་བརྗོད་ཞུ་རྒྱུ་ཡིན། འོན་ཀྱང་། བོད་པའི་འབྲོག་པ་རྣམས་གཞིས་སྤོར་དང་གཏན་སྡོད་ཀྱི་འཚོ་སྟངས་ལ་བསྒྱུར་རྗེས། རྒྱ་ནག་ཁོ་རང་ཚོས་ཤུལ་དུ་གཏེར་ཁ་སྔོག་འདོན་བྱེད་པ་དང་། རྨ་ཆུ་དང་འབྲུ་ཆུ། རྫ་ཆུ་གསུམ་གྱི་འབྱུང་ཁུངས་ཁག་ཏུ་གསེར་དངུལ་ཟངས་ལྕགས་ཀྱི་གཏེར་ཁ་སྔོག་འདོན་བྱེད་ཀྱིན་ཡོད་ལ། དེ་བཞིན་ཆུ་རགས་ཆེ་ཆུང་སྣ་ཚོགས་རྒྱག་པ། ཁོར་ཡུག་སྲུང་སྐྱོབ་ས་ཁུལ་ཡིན་ཟེར་བཞིན་དུ་འཛུགས་སྐྲུན་གྱི་ལས་གཞི་མུ་མཐུད་སྤེལ་བ་སོགས་བྱེད་ཀྱིན་ཡོད། ལྷ་ས་ཀོང་པོའི་ས་ཁུལ་དུ་ས་གནས་བོད་རིགས་མང་ཚོགས་ལ་བུད་ཤིང་ཡང་འཐུ་རུ་འཇུག་གིན་མེད་ཀྱང་། རྒྱ་ནག་ཁོ་རང་ཚོས་ཤིང་ནགས་གཅོད་འབྲེག་གིས་རྒྱ་ནང་ལ་སྐྱེལ་འདྲེན་མུ་མཐུད་བྱེད་ཀྱིན་ཡོད། གནས་ཚུལ་དེ་དག་ལ་བལྟས་པ་ཡིན་ན། རང་བཞིན་གྱིས་རྒྱ་གཞུང་གིས་ཁོར་ཡུག་སྲུང་སྐྱོབ་ཟེར་བའི་ལས་གཞི་དེ་དང་། ཁོར་ཡུག་སྲུང་སྐྱོབ་ས་ཁུལ་ཡིན་ཟེར་ནས་བཀག་སྡོམ་བྱས་ཡོད་པ་དེ་དག་ལ་སེམས་འཚབ་ཆེན་པོ་ལངས་དགོས་པའི་གནས་སྟངས་ཤིག་ཆགས་འདུག

དྲི་བ། ༧གོང་ས་མཆོག་གིས་དུས་རྒྱུན་ཁོར་ཡུག་སྲུང་སྐྱོབ་དང་གོ་ལ་ཧྲིལ་བོའི་བདེ་སྡུག་གླེང་གིན་ཡོད། དེ་བཞིན་བཞུགས་སྒར་ངྷ་རམ་ས་ལར་བོད་གཞུང་ཁོར་ཡུག་ཉམས་ཞིབ་སྡེ་ཚན་དང་བཀའ་བརྒྱུད་ཁོར་ཡུག་སྲུང་སྐྱོབ་ཚོགས་པ། ངྷ་ས་བདེ་དོན་ཁོར་ཡུག་ཚོགས་པ། གངས་དཀར་ཏི་སི་ཁོར་ཡུག་གོ་རྟོགས་ལས་འགུལ་ཁང་སོགས་ཡོད་ཀྱང་། ངྷ་རམ་ས་ལ་དེ་ཧི་མ་ཅལ་མངའ་ཁུལ་གྱི་ཁོར་ཡུག་སྦག་བཙོག་ཆེ་ཤོས་གྲས་ཆགས་དོན་ཅི་ཡིན་ནམ། 

 ལན། ཁྱེད་ཀྱིས་གསུངས་པ་དེ་ཧ་ཅང་བདེན་པ་རེད། བོད་པའི་ཁོར་ཡུག་སྲུང་སྐྱོབ་ཚོགས་པ་ཚང་མ་སྡོད་ས་ངྷ་རམ་ས་ལ་གཡས་གཡོན་རེད། འོན་ཀྱང་མིག་གིས་ལྟ་ས་དང་སྐད་རྒྱག་ས་ཐག་རིང་ཆགས་ཀྱི་ཡོད་པ་རེད། ང་ཚོའི་ལས་ཁུངས་ལྟ་བུར་མཚོན་ན། ལོ་རེ་བཞིན་ཐེངས་གཉིས་དང་གསུམ་ལ་ངྷ་རམ་ས་ལ་ཁུལ་དུ་གད་སྙིགས་གཙང་བཟོའི་ལས་ཀ་བྱེད་ཀྱིན་ཡོད། འོན་ཀྱང་གད་སྙིགས་མང་དྲགས་ཏེ་ཅི་བྱེད་འདི་བྱེད་མེད་པ་ཆགས་ཡོང་གིན་འདུག ངྷ་རམ་ས་ལ་ཁུལ་གྱི་གད་སྙིགས་ཕོ་ས་དེ་ཡང་ཚན་རིག་དང་མཐུན་པ་ཞིག་ཆགས་ཀྱི་ཡོད་པ་མ་རེད། གད་སྙིགས་ལ་དབྱེ་འབྱེད་མེད་པར་ངྷ་ཤོད་རླངས་འཁོར་འབབ་ཚིགས་ཀྱི་ཕར་ཕྱོགས་ལུང་པའི་ནང་ཕོ་བཞིན་ཡོད། བོད་གཞུང་གིས་ལོ་ལྟར་འཛམ་གླིང་ཁོར་ཡུག་ཉིན་མོ་དང་བསྟུན་ཏེ། གད་སྙིགས་གཙང་བཟོའི་ལས་འགུལ་ཞིག་སྤེལ་གྱིན་ཡོད་མོད། ཉིན་དེར་གད་སྙིགས་མང་པོ་བཏུས་རྗེས་མེར་བསྲེགས་གཏོང་གིན་འདུག དེ་ནི་གད་སྙིགས་འཐུ་བ་ལས་མ་བཏུས་ན་བཟང་གི་རེད། གད་སྙིགས་ལ་དབྱེ་བ་མ་བཀར་བར་གང་བྱུང་དུ་མེར་བསྲེགས་བཏང་བ་ཡིན་ན། མཁའ་དབུགས་བཙོག་པ་བཟོས་ཤིང་སོལ་རླུང་མང་དུ་བཏང་སྟེ། འཛམ་གླིང་ཁྱོན་ཡོངས་ལ་གནོད་སྐྱོན་ཕོག་པའི་ཉེས་པ་ཚབས་ཆེན་ཞིག་གསོག་གིན་ཡོད་པ་རེད། མ་འོངས་པར་ང་ཚོ་ཁོར་ཡུག་སྲུང་སྐྱོབ་ཀྱི་ཚོགས་པ་བཞི་མཉམ་རུབ་ཐོག་བཞུགས་སྒར་ཁུལ་གྱི་གད་སྙིགས་གཙང་བཟོའི་ཐད་ལས་ཀ་བྱ་དགོས་ཀྱི་འདུག་དྲན་ཡོད།

དྲི་བ། གལ་སྲིད་བོད་ནང་ལྟ་བུ་ཞིག་གིས་ཁོར་ཡུག་སྲུང་སྐྱོབ་ཀྱི་ཚོགས་པ་འཛུགས་ན། ཕྱི་རྒྱལ་གྱི་རོགས་ཚོགས་ལ་མཉམ་འབྲེལ་བྱེད་སྟངས་དང་། རྒྱ་ནག་གཞུང་གི་རྩ་ཁྲིམས་དང་ས་གནས་མི་རིགས་རང་སྐྱོང་བཅའ་ཁྲིམས་སོགས་དང་མ་འགལ་བའི་ཐོག་ནས་ཚོགས་པ་འཛུགས་སྟངས་དང་། ཁོར་ཡུག་སྲུང་སྐྱོབ་བྱེད་སྟངས་ཐད་ལམ་སྟོན་འདྲ་གནང་རྒྱུ་ཡོད་དམ།  

ལན། ཁྱེད་རང་གི་དྲི་བ་འདི་ཧ་ཅང་གལ་ཆེན་པོ་རེད། བོད་ནང་ནས་ཁོར་ཡུག་སྲུང་སྐྱོབ་ཚོགས་པ་ཞིག་འཛུགས་རྒྱུ་ཡིན་ན། ཐོག་མར་སོ་སོར་ཁོར་ཡུག་སྐོར་གྱི་ཤེས་ཡོན་ཡག་པོ་དགོས་པ་དང་། ལས་དོན་འདི་ལ་དགའ་ཞེན་དང་སྐད་ཆ་བཤད་རྒྱུ་སོགས་ལ་དང་འདོད་ཆེན་པོ་དགོས་པ་གལ་ཆེན་པོ་རེད། དེ་བཞིན་རྒྱ་ནག་གི་རྩ་ཁྲིམས་དང་མི་རིགས་ས་གནས་རང་སྐྱོང་བཅའ་ཁྲིམས་ལ་ཞིབ་འཇུག་བྱ་ཐུབ་པའི་རྒྱ་ཡིག་ཡག་པོ་ཤེས་དགོས། ཕྱི་རྒྱལ་རོགས་ཚོགས་ཁག་ལ་འབྲེལ་ལམ་བཟོ་བ་དང་། རོགས་དངུལ་འཚོལ་རྒྱུར་སྙན་ཞུ་འབྲི་ཐུབ་པའི་དབྱིན་ཡིག་ཀྱང་ཡག་པོ་ཤེས་དགོས། གལ་སྲིད་དེ་མ་བྱུང་བ་ཡིན་ན། བོད་ནང་ཁོར་ཡུག་ལ་ཞིབ་འཇུག་བྱེད་དུ་ཡོང་མཁན་ཕྱི་རྒྱལ་བ་དག་ལ་དཀའ་ངལ་བཤད་རྒྱུ་དང་། ཁོང་ཚོར་འབྲེལ་བ་བྱས་ཏེ་མཉམ་འབྲེལ་ཡོང་རྒྱུར་འབད་བརྩོན་བྱ་དགོས། གལ་སྲིད་ཁོར་ཡུག་སྲུང་སྐྱོབ་ཚོགས་པ་དེ་འདྲར་དམིགས་བསལ་གྱིས་འབྲེལ་བ་བྱ་མ་ཐུབ་ན། བོད་ནང་ལྟ་སྐོར་ལ་ཡོང་མཁན་དང་པར་རྒྱག་མཁན་སོགས་ལའང་དཀའ་ངལ་བཤད་དེ་རོགས་སྐྱོར་ཞུས་པ་ཡིན་ན། དེ་ནི་ཆབ་སྲིད་དང་འགལ་བ་ཞིག་ཆགས་ཀྱི་ཡོད་པ་མ་རེད། དེང་སྐབས་འཛམ་གླིང་ཡོངས་ཁོར་ཡུག་ཐོག་དོ་སྣང་སླེབས་ཀྱིན་ཡོད་སྟབས་ཏན་ཏན་ཕན་རོགས་ཡོང་གི་རེད། ཡང་ཕྱི་རྒྱལ་བ་མ་ཡིན་པར་པེ་ཅིན་སོགས་རྒྱ་ནག་ནང་ལོགས་ས་ཁུལ་གྱི་ཤེས་ཡོན་ཅན་དང་། སློབ་གྲྭ་ཆེན་མོ་བ། རྒྱུ་ཆེན་པོ་ཡོད་མཁན་ཚོར་དཀའ་ངལ་བཤད་དེ་འབྲེལ་བ་འཛུགས་དགོས་པ་རེད། གཞན་རྒྱ་ནག་རང་ལ་ཁོར་ཡུག་སྲུང་སྐྱོབ་ཚོགས་པ་མང་པོ་ཡོད་པ་རེད། དེ་དག་ནང་འཛུལ་ཞུགས་བྱ་ཐུབ་པ་ཡིན་ན་ལམ་ཁ་ཞིག་ཡོད་པ་རེད།

གསར་འགོད་པ། དོན་འགྲུབ་བཀྲ་ཤིས།