སྒྱུ་རྩལ་དང་ཚོང་རྫས་སུ་གྱུར་དང་འགྱུར་བཞིན་པའི་བོད་དོན། ཀླུ་སྨྱོན།

བོད་དང་བོད་ཀྱི་གནད་དོན་འདི་ནི་རྗེ་གཉའ་ཁྲི་བཙན་པོ་ནས་ཆོས་རྒྱལ་མེས་དབོན་རྣམ་གསུམ་དང་། དེ་ནས་ད་ལྟ་ལ་ཐུག་གི་བར་དུ་སྔོན་གཤེགས་དཔའ་བོ་དཔའ་མོ་ཁྲི་ཕྲག་དུ་མས་དམར་པོ་ཁྲག་དང་གཅེས་པའི་སྲོག་གི་འགྲོ་སོང་བཏང་སྟེ་རྒྱུན་སྲིང་ཡོང་བ་ཞིག་ཡིན་ཞིང་། བོད་ལ་ཡི་གེ་འབྲི་བའི་ལུགས་སྲོལ་མེད་པའི་དུས་སུ་བོད་དོན་འདི་བོད་མི་ཚོས་རང་རང་གི་སེམས་ཁོང་དུ་ཉར་ཚགས་བྱས་ཤིང་། ཡི་གེ་འབྲི་བའི་ལུགས་སྲོལ་བྱུང་ནས་བཟུང་སྟེ་ལོ་རྒྱུས་ཀྱི་དེབ་ཐེར་སྣ་ཚོགས་ཤིག་གི་སྟེང་དུ་བོད་ཀྱི་གནད་དོན་འདི་སྣག་ཚ་ནག་པོས་ཞིབ་ཚགས་པོར་བྲིས་ཡོད། དེ་ཡང་བོད་ཀྱི་ལོ་རྒྱུས་ཡིག་ཆ་སྔ་གྲས་སྦ་བཞེད་དང་དེའི་རྗེས་ཀྱི་ས་སྐྱའི་རྗེ་བཙུན་གྲགས་པ་རྒྱལ་མཚན་གྱི་བོད་ཀྱི་རྒྱལ་རབས་ལྟ་བུ་བཀླགས་ན་ལོ་ངོ་ཆིག་སྟོང་ཡས་མས་ཀྱི་བོད་པའི་ལོ་རྒྱུས་ཡིག་ཐོག་ཏུ་འབེབ་སྟངས་ཤིག་གསལ་བོར་མཐོང་ཐུབ། ད་དུང་ལྷ་སའི་རྡོ་རིང་དང་ཁྲ་འབྲུག་གི་དྲིལ་བུའི་ཁ་བྱང་ལྟ་བུའི་རྡོ་དང་ཟངས་ཀྱི་དངོས་རྫས་དག་ལ་ཡང་བོད་པ་ཚོས་རང་གི་ལོ་རྒྱུས་ཀྱི་བྱུང་བ་ཁག་ཅིག་གསལ་བོར་བརྐོས་ཡོད།

དེའི་རྗེས་སུ་རྡོ་རིང་གི་ངོས་སུ་ལོ་རྒྱུས་འབྲི་བའི་ལུགས་སྲོལ་འདི་ལ་འགྱུར་བ་ཐེབས་ནས་ཤོག་བུའི་ངོས་སུ་ལོ་རྒྱུས་འབྲི་བའི་ལུགས་སྲོལ་ཏེ་ལོ་རྒྱུས་ཀྱི་དཔེ་དེབ་རྩོམ་པའི་ལུགས་སྲོལ་འདི་དར་ཁྱབ་ཆེན་པོ་ཞིག་ཏུ་གྱུར་ཅིང་། དེབ་ཐེར་སྔོན་པོ་དང་ཚལ་བའི་དེབ་དམར་ལྟ་བུ་ལོ་རྒྱུས་དེ་ལོ་རྒྱུས་ཀྱི་ངོ་བོའི་སྟེང་ནས་ཚིག་རྒྱན་ཅི་ཡང་མེད་པར་བྲིས་ཡོད་པ་ཁག་ཅིག་དང་། རྒྱལ་དབང་ལྔ་པའི་དེབ་ཐེར་དཔྱིད་ཀྱི་རྒྱལ་མོའི་གླུ་དབྱངས་དང་མདོ་མཁར་ཞབས་དྲུང་གི་མི་དབང་རྟོགས་བརྗོད་དང་བཀའ་བློན་རྟོགས་བརྗོད་ལྟ་བུ་ལོ་རྒྱུས་ཀྱི་བྱུང་བ་ཁག་སྒྱུ་རྩལ་གྱི་ལམ་ནས་ཚིག་སྦྱོར་ཕུན་སུམ་ཚོགས་པའི་སྙན་ངག་གིས་སྤྲས་ཏེ་འབྲི་སྲོལ་གཉིས་བྱུང་ཡོད། ཆོས་རྒྱལ་ཚོའི་དུས་སུ་བོད་པའི་དམག་སྡེ་ལ་རྒོད་ཀྱི་སྟོང་སྡེ་དྲུག་ཅུ་རྩ་བཞི་སོགས་སུ་ཕྱེ་སྟེ་དམག་སྡེ་རེ་རེར་ཚོས་གཞི་མི་འདྲ་བའི་དམག་དར་འཕྱར་རྒྱུ་ཡོད་ཅིང་། དམག་དར་རེ་རེའི་ངོས་སུ་ཚོན་མདོག་འདྲ་མིན་གྱི་རི་མོ་འབྲི་སྲོལ་དར་བའི་ལོ་རྒྱུས་ལ་དཔྱད་ན། བོད་ཀྱི་གནད་དོན་འདི་སྒྱུ་རྩལ་གྱི་ལམ་དུ་འདྲེན་སྲོལ་དེ་ཡང་གནའ་སྔ་མོ་ཞིག་ནས་ཡོད་པ་ཤེས་ཐུབ།
 
ཆབ་སྲིད་ཀྱི་ལམ་ལུགས་དེར་སྒྱུ་རྩལ་གྱི་མཛེས་རྒྱན་སྤྲས་ཏེ་རྒྱལ་ཁབ་ཕྱི་ནང་དུ་ངོམ་སྲོལ་ཡོད་པ་འདི་ནི་བོད་པ་གཅིག་པོའི་སྤྱི་ཚོགས་ཁྲོད་ཀྱི་སྣང་ཚུལ་ཞིག་མ་ཡིན་པར་ཕྱི་རྒྱལ་ཁག་ལ་ཡང་ཡོད་པ་ནི། གནའ་སྔ་མོའི་རྒྱ་གར་གྱི་རྒྱལ་ཕྲན་དག་གཅིག་གྱུར་བྱེད་མཁན་གྱི་རྒྱལ་པོ་མྱ་ངན་མེད་ཀྱི་དུས་སུ་བཞེངས་པར་གྲགས་པའི་རྡོ་རིང་དང་ཁོང་གི་ཐམ་ཀའི་ཁ་རིས་སོགས་ལས་ཤེས་ཐུབ་ལ། རྒྱ་ནག་གི་རྒྱལ་པོ་རིམ་བྱོན་གྱི་ཐམ་ཀ་དང་དངུལ་སྒོར་གྱི་མཛེས་རིས་དག་ལས་ཀྱང་གསལ་བོར་རྟོགས་ཐུབ་ཅིང་། ཡོ་རོབ་དང་ཨ་རབ་ཡུལ་གྲུ་ཁག་གི་སྔོན་གྱི་རྒྱལ་པོ་དག་གི་ཤུལ་བཞག་གནའ་རྫས་དག་ལས་ཀྱང་ཤེས་ཐུབ་པ་ཞིག་རེད།

སྐབས་སུ་བབས་པ་བོད་དོན་འདི་སྒྱུ་རྩལ་གྱི་ངོ་བོར་ཇི་ལྟར་འགྱུར་བཞིན་པའི་ཚུལ་ནི་འདི་ལྟ་སྟེ། ད་ལྟའི་དུས་རབས་འདི་ཚོང་ལས་ཀྱི་དུས་རབས་ཤིག་ཡིན་པའི་ཆ་ནས། མི་རྣམས་ཀྱིས་ཆབ་སྲིད་དང་ཆོས་ལུགས་ཀྱི་མཚོན་རྟགས་ལྡན་པའི་ཅ་དངོས་དག་གི་སྟེང་ནས་ཁེ་བཟང་མང་ཙམ་ལེན་ཐུབ་པའི་རིག་པའི་གཞུང་ལུགས་དེ་ཁོང་དུ་ཆུད་ཡོད་ཅིང་། གཞུང་ལུགས་དེ་བེད་སྤྱད་ནས་མི་རྣམས་ཀྱི་དོ་སྣང་བྱེད་བཞིན་པའི་ཆབ་སྲིད་ཀྱི་འབོད་ཚིག་སྣ་ཚོགས་ཀྱང་གོན་ཆས་དང་ཤོག་བུ་འདྲ་མིན་གྱི་ངོས་སུ་པར་སྐྲུན་གྱིས་འཚོང་འགྲེམ་བྱེད་བཞིན་ཡོད་པ་རེད། དེ་ལས་ད་ལྟ་རྒྱ་ནག་དང་ཤར་ཨེ་ཤི་ཡའི་རྒྱལ་ཁབ་ཁག་ཅིག ཨ་ཧྥེ་རི་ཁའི་ཡུལ་གྲྭ་དག་ཕར་ཕུད་པའི་འཛམ་གླིང་གི་རྒྱལ་ཁབ་མང་པོ་ཞིག་གི་མི་དམངས་ཀྱི་མིག་ལམ་དུ་ཆ་རྒྱུས་ཧ་ཅང་ཡོད་པའི་ཆབ་སྲིད་ཀྱི་འབོད་ཚིག་ཁག ཅིག་སྟེ་བོད་རང་དབང་FREE TIBET དང་བོད་སྐྱོབ་SAVE TIBETཞེས་པའི་ཡིག་འབྲུ་འདི་དག་ཅན་གྱི་གྱོན་ཆས་དང་ཤོག་བྱང་ནི་ཚོང་པ་ཚོའི་ཚོང་རྫས་དང་སྒྱུ་རྩལ་པ་ཚོའི་རྩེད་ཆས་སུ་གྱུར་དང་འགྱུར་བཞིན་ཡོད་པ་རེད།

བྱ་དངོས་གང་ཞིག་ཡིན་ཡང་གསར་པ་ནས་རྙིང་བའི་ཕྱོགས་སུ་འགྱུར་ལྡོག་འབྱུང་བར་སུས་ཀྱང་གཡོལ་ཐབས་མེད་པ་ཇི་བཞིན། བོད་རང་དབང་དང་བོད་སྐྱོབ་སོགས་ཀྱི་ཡིག་རིས་འདི་དག་ཀྱང་ཆབ་སྲིད་ཀྱི་ཚོར་བ་ཤུགས་དྲག་སྟེར་བའི་དངོས་པོ་ཞིག་ནས་སྒྱུ་རྩལ་གྱི་མཛེས་རིས་འགྲན་པའི་ཐོན་རྫས་ཤིག་ཏུ་མི་འགྱུར་ཀ་མེད་བྱུང་བ་རེད། དཔེར་ན་ལོ་རབས་བདུན་ཅུ་དང་བརྒྱད་ཅུ་གྱ་གྲངས་ཀྱི་དུས་སུ་རྡ་རམ་ས་ལ་སོགས་བོད་མི་འདུས་སྡོད་ཀྱི་ས་གནས་ཁག་ཏུ་སུམ་ཅུའི་དུས་དྲན་གྱི་ཉིན་མོར་བོད་རང་དབང་གི་འབོད་ཚིག་སྒྲོག་དུས་བོད་མི་ཕལ་མོ་ཆེའི་སེམས་པ་དྲག་ཏུ་ཁོལ་ཞིང་མིག་མཐའ་མཆི་མས་བརླན་པ། སྐད་གསེང་མཐོན་པོས་ང་རོ་སྒྲོག་པ་སོགས་ཆབ་སྲིད་ཀྱི་རྣམ་འགྱུར་བཅོས་པ་མིན་པ་ཞིག་ཡོད་ཀྱང་། ད་ལྟའི་དུས་འདིར་སུམ་ཅུའི་དུས་དྲན་སྲུང་རྩི་བྱེད་དུ་ཡོང་མཁན་ཇེ་ཉུང་ནས་ཇེ་ཉུང་དེ་གྱུར་ཅིང་། ཡོང་བ་དག་གིས་ཀྱང་ཁྲལ་འཁྱོལ་ཙམ་གྱི་སྐད་འབོད་རེ་བྱེད་པ་དང་། མི་མང་པོ་ཞིག་གིས་ཁྲོམ་སྐོར་གྱི་ཁྲོད་དུ་ཡང་ཁ་བརྡ་སྣ་ཚོགས་གློད་ཅིང་ཁ་ཡེངས་མིག་ཡེངས་ཀྱིས་ལོ་རྒྱུས་ཀྱི་རྒྱབ་ལྗོངས་མཐུག་པའི་གོམ་བགྲོད་འདི་ལ་གོམ་བགྲོད་སྤྱིར་བཏང་བ་དཔེར་ན་ཞོགས་པའི་ལུས་སྦྱོང་ལྟ་བུ་ཞིག་གི་འདུ་ཤེས་འཛིན་བཞིན་ཡོད་པ་སོགས། རང་དབང་གི་མཚོན་རྟགས་ནི་སྒྱུ་རྩལ་གྱི་བསྡུས་གཟུགས་སུ་འགྱུར་བཞིན་པ་དང་། ཆབ་སྲིད་པའི་ཁྲོམ་སྐོར་ནི་གནས་སྐབས་ཀྱི་འཁྲབ་སྟོན་ཙམ་ཞིག་ཏུ་འགྱུར་བཞིན་པའི་དུས་འདིར། བོད་པའི་མཚོན་རྟགས་རེ་རེ་བཞིན་ཚོང་རྫས་སུ་གྱུར་དང་འགྱུར་བཞིན་ཡོད་པའི་དཔེ་གསོན་པོ་ཞིག་ནི། ལོ་འགའི་སྔོན་རྒྱ་ནག་གི་བཟོ་གྲྭ་ཞིག་ནས་སྟོན་པའི་སྐུ་བརྙན་རྐང་པ་འཁྲུ་བའི་འདག་རྫས་ཀྱི་སྟེང་དུ་དཔར་པ་དང་། དེའི་རྗེས་སུ་བོད་ལྗོངས་སུ་གཞོང་པ་ལྷ་ཆུའི་བཏུང་ཇའི་ཤོག་སྒམ་སྟེང་པོ་ཏ་དང་སངས་རྒྱས་ཀྱི་སྐུ་བརྙན་བཀོད་པ། ཉེ་ཆར་ཡང་ཕྱི་རྒྱལ་གྱིི་བཟོ་གྲྭ་ཞིག་གིས་སྟོན་པ་སངས་རྒྱས་དང་འཇམ་པའི་དབྱངས་སོགས་ཀྱི་སྐུ་གཟུགས་རྐང་མགོའི་ལྷམ་གྱི་སྟེང་དུ་དཔར་ཏེ་འགྲེམ་ཚོང་བྱས་པ་འདི་ལས་ཤེས་ཐུབ་ཅིང་། བསམ་བློ་དང་འདུ་ཤེས་འཛིན་སྟངས་ཀྱི་རྟགས་མཚན་གང་ཞིག་སྒྱུ་རྩལ་དང་ཚོང་རྫས་སུ་གྱུར་པའི་དུས་དེ་ནས་བཟུང་སྟེ། དངོས་པོ་དེ་དག་གི་སྟེང་གི་ཆབ་སྲིད་ཀྱི་ཚོར་ཤུགས་དྲག་པོ་དེའི་ངོ་བོའམ་རང་བཞིན་དངོས་མ་དེ་ནི་གཞན་དང་གཞན་ཞིག་ཏུ་གྱུར་ཚར་བ་མ་ཡིན་ནམ།

དཔེ་མཚོན་གཞན་ཞིག་ནི་དེང་སང་ཕྱི་གླིང་བའི་ཁྲོད་དུ་གཙགས་རིས་ཀྱི་ལམ་ནས་བོད་པའི་མ་ཎི་ཡིག་དྲུག་འདི་ཡང་རྐང་པ་དང་སྐེ་མཇིང་། དཔུང་བ་སོགས་ཀྱི་སྟེང་དུ་འབྲི་སྲོལ་དར་ཁྱབ་ཆེ་རུ་འགྲོ་བཞིན་ཡོད་ཅིང་། འདི་ནི་མི་རིགས་ཤིག་གི་བླ་སྲོག་གི་དྭངས་མར་འཕོས་པའི་རིག་གཞུང་ཞིག་གི་བསྡུས་གཟུགས་ཤིག་མི་རིགས་གཞན་ཞིག་གིས་སྒྱུ་རྩལ་གྱི་ཐོན་རྫས་ཤིག་ཏུ་བརྩིས་པའི་དཔང་རྟགས་གསོན་པོ་ཞིག་ཡིན་པས། བྱེད་སྟངས་འདིའི་ལྡོག་འོད་ཕྱིར་མི་རིགས་འདིའི་མི་རབས་རྗེས་མ་ཚོའི་ལུས་སྟེང་དུ་འཕྲོ་རྒྱུ་ཡང་ད་ལྟ་ནས་མགོ་བཙུགས་ཚར་ཡོད་ཅིང་། དེ་ནི་དེང་སང་ལག་ཁུག་སྣ་ཚོགས་ཀྱི་ངོས་སུ་མ་ཎི་ཡིག་དྲུག་གང་བྱུང་དུ་བྲིས་ཡོད་པ་འདི་ཡིས་ཤེས་ཐུབ་ལ། བྱེད་སྟངས་འདིས་མི་རབས་སྔོན་མ་ཚོས་ཕྱག་དང་མཆོད་པའི་ཡུལ་དུ་བཟུང་བའི་ནང་ཆོས་ཀྱི་སྲོག་ཟུངས་ཀྱི་བསྡུས་གཟུགས་མ་ཎི་ཡིག་དྲུག་འདི་རང་ཅག་གི་དུས་རབས་འདིར་ཁུག་མ་སྣ་ཚོགས་ཀྱི་མཛེས་རྒྱན་དུ་བསྒྱུར་པའི་རང་རྟགས་ཤིག་ཏུ་ངོས་འཛིན་བྱེད་ཆོག འདི་དང་འདི་ལྟ་བུའི་ཉིན་རེ་ནས་ཉིན་རེ་བཞིན་སྒྱུ་རྩལ་གྱི་ངོ་བོར་གྱུར་དང་འགྱུར་བཞིན་པའི་བོད་དོན་ནམ་བོད་ཀྱི་རིག་གཞུང་དང་དེའི་རྒྱབ་ལྗོངས་དག་མཐོང་ཐེངས་རེ་རེར། བོད་ཀྱི་རིག་གཞུང་གི་རང་མདོག་ངོ་མ་དེ་དང་བོད་དོན་གྱི་ཁ་ཕྱོགས་གཙང་མ་འདི་གཉིས་འཛམ་གླིང་ཆུང་ཆུང་འདིའི་སྟེང་ནས་རྩ་བརླག་ཏུ་འགྲོ་བའི་དུས་ཚོད་དེ་ཡང་མགོ་བཙུགས་ནས་དུས་ཡུན་རིང་པོ་ཞིག་ཕྱིན་ཚར་ཡོད་པ་དེ་ལས་སླ་བོར་རྟོགས་ཐུབ་པ་ཞིག་རེད་ཨང་། །