གངས་ཅན་རིག་གནས་སློབ་གྲྭའི་ནང༌། སློབ་ཕྲུག་སྐྱ་སེར་ཕོ་མོ་དབྱེར་མེད་དང༌། རྒྱལ་ཁབ་དང་མི་རིགས་ཁྱད་མེད། ལོ་ན་རྒན་གཞོན་ཚད་བཀག་མེད་པའི་ཐོག་ནས་བསྡུ་རྒྱུ་ཡིན་ལ། སློབ་ཡུན་སློབ་མ་སོ་སོའི་འདོད་པ་ལྟར་དུས་ཡུན་ཐུང་ཤོས་བདུན་ཕྲག་གཉིས་ནས་རིང་ཤོས་ལོ་གསུམ་བར་ཡིན་ཟེར།
ཕྱི་ཚེས་ ༢༢ ཉིན་གྱི་ཞོགས་པར་རྒྱ་གར་ལྷོ་ཕྱོགས་ཧོན་སུར་བོད་མིའི་གཞིས་སྒར་གྱི་ཉེ་འཁྲིས། དཔལ་ལྡན་སྨད་རྒྱུད་གྲྭ་ཚང་གིས་གསར་འཛུགས་གནང་བའི་གངས་ཅན་རིག་གནས་སློབ་གྲྭ་རུ་ཉིན་ལྔའི་རིང་གི་༼ ནང་ཆོས་འཆད་ཉན་དང་བགྲོ་གླེང་འདུ་འཛོམས ༽ ཞུ་བ་དེ་དབུ་འཛུགས་བྱས་ཡོད། སྐུ་མགྲོན་གཙོ་བོར་རྒྱུད་སྨད་མཁན་རིན་པོ་ཆེས་དབུས་བའི་དགེ་བཤེས་ལྷ་རིམ་པ་རྣམ་པ་དང་སློབ་གྲྭའི་དགེ་ལས་སོགས་ཕེབས་འདུག་ལ། བགྲོ་གླེང་ལ་མཉམ་ཞུགས་གནང་མཁན་ངྷ་རམ་ས་ལའི་བོད་ཁྱིམ་སློབ་གྲྭ་དང་བྷེང་ལོར་མཐོ་སློབ། ལྷོ་ཕྱོགས་བོད་མིའི་གཞིས་སྒར་ཁག་གི་སློབ་ཕྲུག་ཕོ་མོ་ ༨༠ ཙམ་ཆེད་བཅར་གནང་འདུག བགྲོ་གླེང་དབུ་འབྱེད་ཀྱི་ཐོག་མར་མཁན་རིན་པོ་ཆེ་མཆོག་གིས་སློབ་གྲྭའི་སློབ་མ་དང་དགོན་པའི་དགེ་འདུན་པའི་བར་ནང་ཆོས་བགྲོ་གླེང་གནང་བའི་གལ་ཆེའི་རང་བཞིན་སྐོར་དང༌། དེའི་རྗེས་བྱང་རྩེ་ཆོས་རྗེ་བློ་བཟང་བསྟན་འཛིན་མཆོག་གིས་བགྲོ་གླེང་ལ་ཕེབས་མཁན་སློབ་མ་རྣམས་དང༌། གྲྭ་ཚང་གི་དགེ་འདུན་པ་མཉམ་ཞུགས་ཐོག་ནང་ཆོས་ཀྱི་སྤྱི་ཁོག་ངོ་སྤྲོད་གནང་ཡོད།
སྐབས་དེར་སློབ་གྲྭའི་དགེ་རྒན་ཡོན་ཏན་ནོར་བུ་མཆོག་གིས་སློབ་གྲྭའི་ལས་འཆར་གཙོ་བོ་ཁག་ངོ་སྤྲོད་གནང་དོན། ཧོན་སུར་རབ་རྒྱས་གླིང་བོད་མིའི་གཞིས་སྒར་དུ་རྟེན་གཞི་བྱས་པའི་དཔལ་ལྡན་སྨད་རྒྱུད་གྲྭ་ཚང་འདིར། དེ་སྔ་༧གོང་ས་སྐྱབས་མགོན་ཆེན་པོས་བཀའ་སློབ་ལམ་སྟོན་ཅི་གནང་བ་བཞིན། ༼ གངས་ཅན་རིག་གནས་སློབ་གྲྭ ༽ ཞེས་པ་འདི་གསར་འཛུགས་གནང་བ་རེད། སློབ་གྲྭ་འདིར་དོན་གནད་དང་པོར། བོད་གྱི་རིག་གཞུང་གི་གཞི་རྩ་ནང་དོན་རིག་པ་དང༌རིག་གནས་གཞན་བཅས་ལ་སློབ་ཁྲིད་གནང་རྒྱུ་གཏན་འབེབས་གནང་སྟེ། འཆར་ཅན་གྱི་འཛིན་གྲྭ་ཚོགས་རྒྱུའི་ལས་རིམ་སྒྲིག་ཡོད། དེང་སྐབས་འཛམ་གླིང་འདིར་ནང་སེམས་རྒྱུད་མ་དུལ་བའི་དབང་གིས་དམག་འཁྲུག་དང༌། མི་གསོད་ཁྲག་སྦྱོར་སོགས་མི་འདོད་པའི་སྡུག་བསྔལ་ཡོང་གི་ཡོད་པ་དང༌། གཉིས་པ་འཛམ་གླིང་ནང་ཆོས་ལུགས་མང་པོ་ཡོད་པ་དག་ལས་གཟུར་གནས་བློ་ལྡན་ཚན་རིག་པའི་བཤད་ཚུལ་དང་མཐུན་པའི་ཆ་མང་དུ་ཡོད་ཅིང༌། དེ་དང་འདྲ་མཉམ་དུ་འགྲོ་ཐུབ་པ་ནི་ནང་པ་ཙམ་ཡིན་པ། གསུམ་པ། ཕྱི་དངོས་པོ་ཡར་རྒྱས་གཅིག་པུས་བདེ་སྐྱིད་བསྐྲུན་མི་ཐུབ་པ་མཐོང་ནས། ནང་སེམས་ཀྱི་སྦྱོང་བརྡར་ལ་བརྟེན་ཏེ། བདེ་སྐྱིད་བསྐྲུན་པའི་ནུས་པ་རླབས་ཆེན་ཡོད་པ་དངོས་ཡོད་ཡིན་པ། བཞི་པ། འཛམ་གླིང་ཞི་བདེ་ནི་སྤྱིའི་འགན་ཁུར་ཡིན་པའི་རྒྱུ་གཏིང་ཟབ་ཤོས་དེ་ནང་ཆོས་ནས་བཤད་པའི་བསླབ་བྱ་རྣམས་ཡིན་པ་ཁྱབ་སྤེལ་བཅས་ཡིན། ཞེས་གསུངས་སོང༌།
ཁོང་གིས་མུ་མཐུད་དུ་གོང་གི་ལས་རིམ་དེ་དག་གི་དགོས་དམིགས་གསུངས་དོན། དང་པོ། རང་རེའི་བོད་ཕྲུག་རྣམས་ནི་མ་འོངས་བོད་ཀྱི་སོན་རྩ་ཡིན་སྟབས། སློབ་ཕྲུག་རྣམས་ལ་འདབ་ཆགས་གཤོག་པ་གཉིས་ལྡན་ལྟར། ལུགས་གཉིས་ཀྱི་ཤེས་ཡོན་ཟུང་འབྲེལ་དགོས་པ་དང༌། གཉིས་པ། དེང་སྐབས་རང་ཅག་རྣམས་གནས་སྡོད་བྱེད་ས་དེ་འཕྲུལ་རིགས་ཀྱི་རྣམ་གྲངས་དུ་མས་འཁྲུགས་ཆ་དོད་པོ་དང༌། ངོ་ཚ་ཁྲེལ་མེད་ཀྱི་ཁོར་ཡུག་ནང་འཚོ་གནས་བྱ་དགོས་སྟབས། རང་བཞིན་གྱིས་ཕ་མེས་ནས་ཡོད་པའི་ཡ་རབས་སྤྱོད་བཟང་གི་གཤིས་ཀ་ཉམས་ཆག་འགྲོ་ཡི་ཡོད་པ། གསུམ་པ། ༧གོང་ས་མཆོག་གིས་ནང་ཆོས་སློབ་སྦྱོང་བྱ་དགོས་ཞེས་ལན་གྲངས་བརྒྱ་ཕྲག་མང་པོ་བཀའ་ཕེབས་ཀྱི་ཡོད་སྟབས། བཀའ་གསུང་དང་ལེན་གྱིས་སྒྲུབ་པའི་མཆོད་པ་ཕུལ་བ་དང༌། བཞི་པ། དགོན་པ་གྲྭ་ཚང་ཆེན་པོ་ཞིག་གི་ངོས་ནས། མང་ཚོགས་སམ་སྤྱི་ཚོགས་ཞབས་ཞུ་འདི་གལ་ཆེན་ཞིག་ཡིན་སྟབས། གནས་སྐབས་གྲྭ་ཚང་ནས་དཔལ་འབྱོར་སོགས་ཀྱི་ཞབས་འདེགས་ཞུ་མ་ཐུབ་ཀྱང༌། དང་བླངས་ཆོས་ཀྱི་ཞབས་འདེགས་ནི་འདི་ཕྱི་གཉིས་ཕན་གྱི་ཕུགས་རྒྱང་རིང་བའི་ཞབས་འདེགས་ཤིག་ཡིན། ཞེས་གསུངས་སོང༌།
ཉིན་གུང་གསོལ་ཚིགས་བར་གསེང་དུ་གསར་འགོད་པའི་གངས་ཅན་རིག་གནས་སློབ་གྲྭའི་སློབ་སྤྱིའི་ལས་རོགས་བློ་བཟང་ཟླ་བ་ལགས་སུ། སློབ་གྲྭའི་སློབ་དེབ་དང་སློབ་ཕྲུག་བསྡུ་སྟངས་སྐོར་དྲིས་པར་ཁོང་གིས། སློབ་གྲྭ་འདི་ཕྱི་ལོ་ ༢༠༠༧ ཟླ་ ༡ ནང་རྒྱུད་སྨད་ཀྱི་མདོ་སྔགས་བཤད་སྒྲུབ་སློབ་གྲྭ་དབུ་འབྱེད་ཐོག་༧གོང་ས་མཆོག་ཕེབས་སྐབས། ཁྱེད་རང་ཚོའི་སློབ་གྲྭ་འདི་ཧ་ཅང་ཡག་པོ་བྱུང་འདུག ད་སྐྱ་སེར་ཕོ་མོ་དབྱེར་མེད་ཐོག་འཛམ་གླིང་ཡུལ་གྲུ་གང་ནས་ཕེབས་ཀྱང་ནང་ཆོས་སློབ་སྦྱོང་བྱ་ས་ཡོད་པའི་ལྟེ་གནས་ཤིག་འཛུགས་ཐུབ་པ་ཡིན་ན་ཡག་པོ་ཡོང་ས་རེད། ཁྱེད་ཚོའི་ཁོར་ཡུག་ཏུ་ས་ཡག་པོ་འདུག་ཅེས་བཀའ་གནང་སོང༌། ལོ་དེའི་ཟླ་ ༩ ནང་མགོ་འཛུགས་བྱས་ཏེ་ད་ལོའི་ཕྱི་ཟླ་ ༤ ཚེས་ ༢༨ ཉིན་སྒོ་འབྱེད་གནང་བ་རེད། དེ་རྗེས་ནས་རིམ་པ་བཞིན་སྦེལ་ཀོབ་དང་ཧོན་སུར་གྱི་སློབ་ཕྲུག་དང༌། དེ་བཞིན་མི་དམངས་བཅས་ལ་ནང་ཆོས་ངོ་སྤྲོད་ཀྱི་ལས་རིམ་འགྲོ་བཞིན་པ་ཡིན། ཅེས་གསུངས་སོང༌།
ཡང་ཁོང་ལ་སློབ་ཕྲུག་བསྡུ་སྟངས་གང་འདྲ་ཡིན་མིན་དྲིས་པར་ཁོང་གིས། སློབ་ཕྲུག་སྐྱ་སེར་ཕོ་མོ་དབྱེར་མེད་དང༌། རྒྱལ་ཁབ་དང་མི་རིགས་ཁྱད་མེད། ལོ་རྒན་གཞོན་ལ་ཚད་བཀག་མེད་པའི་ཐོག་ནས་བསྡུ་རྒྱུ་ཡིན། སློབ་ཡུན་སློབ་མ་སོ་སོའི་འདོད་པ་ལྟར་དུས་ཡུན་ཐུང་ཤོས་བདུན་ཕྲག་གཉིས་ནས་རིང་ཤོས་ལོ་གསུམ་བར་ཡིན། འོན་ཀྱང༌། མཐུན་རྐྱེན་ཆ་ཚང་གྲྭ་ཚང་གི་ངོས་ནས་བཏང་སྟེ་རིན་མེད་བྱ་རྒྱུ་ཅུང་ཁག་པོ་འདྲ་ཞིག་རེད། དེར་བརྟེན་དབྱེ་བ་གཉིས་ཕྱེས་ཏེ། བོིད་པ་དང་ཧི་མ་ལ་ཡའི་རི་རྒྱུད་ཁག་ནས་ཕེབས་མཁན་ཚོར་སློབ་ཟེར་ལ་འདྲ༌། ཞལ་ལག་དང་ཆུ་རིན་གློག་རིན་གྱི་ཆེད་དུ་ཟླ་རེར་ཧིན་སྒོར་གཉིས་སྟོང་ ༢༠༠༠ རེ་དང༌། དེ་མ་ཡིན་པའི་ཕྱི་རྒྱལ་ཁག་གི་མི་རིགས་ལ་ཟླ་རེར་ཧིན་སྒོར་བཞི་སྟོང་ ༤༠༠༠ རེ་བཅས་བསྡུ་རྒྱུའི་འཆར་གཞི་ཡོད་པ་རེད། ཅེས་དང༌། སློབ་ཚན་གྱི་ཐད་ནས་ནང་ཆོས་གཙོ་བོར་གྱུར་བའི་བོད་པའི་རིག་ཕལ་ཆེ་བ་འཁྲིད་ཐུབ་རྒྱུར་ཐབས་ཤེས་གནང་གི་ཡོད་པ་རེད། དཔེར་ན། སངས་རྒྱས་ཀྱི་རྣམ་མཐར་ནས་མགོ་བཙུགས་ཏེ་བློ་རྟགས་འཕར་ཕྱིན། ལམ་སྔགས་གཉིས། རིག་གནས་ཀྱི་ཐད་ནས་མགོ་ཀ་ཁ་ནས་བཟུང་སྟེ། སུམ་དག་རྟགས་གསུམ་དང་སྙན་ངག དེ་བཞིན་བོད་པའི་རིག་གཞུང་དང་ཡུལ་སྲོལ་གོམ་གཤིས་གཞན་དག་ཀྱང་ཟུར་ལྟའི་ཚུལ་གྱིས་ངོ་སྤྲོད་བཅས་ཡོད།
༼ གསར་འགོད་པ་དོན་འགྲུབ་བཀྲ་ཤིས་ཀྱིས་རྒྱ་གར་ལྷོ་ཕྱོགས་ཧོན་སུར་ནང་སྤེལ ༽
ཐོག་མར་བཀྲ་ཤིས་བདེ་ལེགས་ཞུ་རྒྱུ་ཡིན། ཧ་ཅང་ཡག་པོ་རེད་བཞག།། ཐུགས་རྗེ་ཆེ། དགོན་སྡེ་གྲཱ་ཚང་ཚོས་ངེས་པར་དུ་མི་མང་དང་སྤི་ཚོགས་ལ་ཕན་པའི་བྱ་བ་འདི་རིགས་བྱེད་དགོས་པ་རེད། གངས་ལྗོངས་རིག་གནས་སློབ་གྲཱ་མི་དཔེ་ཧ་ཅང་ཡག་པོ་བསྟན་སོང་ མ་འོངས་པར་ཡང་ནང་ཆོས་ཙམ་མ་ཡིན་པར་ སློབ་ཕྲུག་དང་མི་མང་ལ་བོད་ཀྱི་རིག་གནས་སོགས་ཟབ་སྦྱོང་དང་བགྲོ་གླིང་ལྟ་བུར་གནང་ཐུབ་ན་ཧ་ཅང་དགེ་མཚན་ཆེ་བར་སེམས།། །།
གསར་འགྱུར་འདིའི་ཡི་གེ་རྣམས་དྲི་རྟགས་རྐྱང་རྐྱང་རེད། གསར་འགོད་པས་བསྐྱར་འགོད་ཅིག་བྱེད་ཐུབ་ན་ལེགས། ཐུགས་རྗེ་ཆེ།