༼ བོད་
སྐབས་བཅུ་བཞི་བའི་བཀའ་བློན་ཁྲི་པ་དང་། སྐབས་བཅོ་ལྔ་བའི་བོད་མི་མང་སྤྱི་འཐུས་གཉིས་ཀྱི་འོས་བསྡུའི་ལས་རིམ་ཆེན་མོ་འགྲོ་བཞིན་པའི་སྐབས་འདིར། མང་ཚོགས་ཚོས་དོ་སྣང་བྱེད་ཡུལ་ནོར་མི་ཉན་ལ། སྤྱི་ཚོགས་ཀྱི་སྣེ་ཟུར་མཐིལ་གསུམ་དང་། དངོས་ཤུགས་བརྒྱུད་གསུམ་སོ་སོར་ཉམས་འཇོག་བྱ་དགོས། ཕྱི་ལྟར་དུ་སུ་ཞིག་འཁྲབ་སྟོན་ལ་མཁས་པ་དང་། ནང་ལྟར་དུ་སུ་ཞིག་ལག་ལེན་ལ་འཇོན་པ་སོགས་ཀྱི་དཔྱོད་བྱེད་རིག་པའི་རྩལ་རྣོ་དགོས།
སྤྱི་འཐུས་ཀྱི་འོས་གཞི་རག་མིན་ཐད་སྔོན་མ་ནས་མང་ཚོགས་ལ་དཀའ་ངལ་འཕྲད་རབས་མེད་ལ། ཐེངས་འདིར་ཡང་འོས་གཞི་མང་དྲགས་མེད་ན་ཉུང་དྲགས་པའི་དཀའ་ངལ་འཕྲད་ཀྱི་མེད། དེ་ནི་བོད་པའི་སྤྱི་ཚོགས་ནང་མི་ཚད་ལྡན་མང་དྲགས་པ་མ་ཡིན་པར། མང་ཚོགས་ཀྱི་ཆབ་སྲིད་གོ་རྟོགས་ཞན་དྲགས་པའི་སྐྱོན་དན་རྟགས་ཡིན་པ། ཉིན་འདི་འགར་སྤྱི་འཐུས་ཀྱི་འོས་མི་འབལ་འབལ་ལྷུག་ལྷུག་ཏུ་བཏོན་དང་འདོན་བཞིན་ཡོད་པ་དེ་དག་རེ་རེ་བཞིན་ཞིབ་འཇུག་བྱས་ན་རྟོགས་ཐུབ། མང་ཚོགས་ཀྱི་དགོངས་པར་བོད་མི་མང་སྤྱི་འཐུས་ལྷན་ཚོགས་འདི་མི་མང་པོ་མཉམ་རུབ་ཀྱི་ལས་དོན་བྱེད་ས་ཞིག་ཡིན་སྟབས། སྤྱི་འཐུས་བྱེ་བྲག་པ་རེ་རེ་དེ་ཙམ་གལ་ཆེན་མིན་པའི་ལྟ་ཚུལ་དང་། སྤྱི་འཐུས་ཀྱི་ལས་ཡུན་ལ་དུས་ཚོད་རྒྱས་བཅད་མེད་སྟབས་བཟང་ངན་ལ་མ་ལྟོས་པར་ཡང་ནས་བསྐྱར་དུ་འདེམས་ཆོག་པའི་ལང་ཤོར་བཅས་ལ་བརྟེན་ཏེ་སྐྱོན་གནས་འདི་ལྷག་པ་རེད།
སྤྱི་ཡོངས་ནས་བཀའ་བློན་ཁྲི་པ་གོ་གནས་མཐོ་བ་དང་ཤུགས་རྐྱེན་ཆེ་བ་ལྟ་བུར་སྣང་ཡང་། བྱེ་བྲག་གིས་བོད་མི་མང་སྤྱི་འཐུས་ཀྱི་ལས་འགན་ལྕི་ཞིང་དབང་ཚད་ཆེ་བ་ཡོད། དེ་ནི་བོད་པའི་རྩ་དོན་འཐབ་རྩོད་ཀྱི་སྲིད་བྱུས་ཀྱིས་མཚོན་པའི་བཙན་བྱོལ་བོད་གཞུང་གི་ལས་དོན་ཡོངས་རྫོགས་གཏན་འབེབས་བྱེད་མཁན་བོད་མི་དམངས་སྤྱི་འཐུས་ཡིན་ལ། བོད་གཞུང་ལྷན་ཁང་མ་ལག་དང་བཅས་པའི་བྱུང་སོང་དངུལ་གྱི་རྩིས་ཁྲར་སྟངས་འཛིན་བྱེད་མཁན་ཡང་བོད་མི་མང་སྤྱི་འཐུས་ཡིན། དམངས་ཀྱི་བདེ་སྡུག་གཞུང་ལ་སྐྱེལ་མཁན་དང་གཞུང་གི་སྲིད་བྱུས་དམངས་ལ་སྒྲོག་མཁན། ལས་ཁུངས་དག་གི་ལས་བྱེད་དང་ལས་དོན་སོགས་ལ་ལྟ་རྟོགས་ཀྱི་དབང་ཚད་ཡོད་མཁན། བཙན་བྱོལ་བོད་མིའི་བཅའ་ཁྲིམས་ཀྱིས་མཚོན་པའི་ལྷན་ཁང་མ་ལག་དང་བཅས་པའི་ཁྲིམས་དང་སྒྲིག་གཞི་གཏན་འབེབས་བྱེད་མཁན་བོད་མི་མང་སྤྱི་འཐུས་ཁོ་ན་ཡིན།
མང་ཚོགས་ཀྱིས་དོ་སྣང་བྱེད་ཡུལ་གཞན་ཞིག་ཡོད་པ་ནི། ཕྱི་ལོ་ ༢༠༡༡ ལོའི་བཀའ་སྤྱིའི་འོས་བསྡུའི་ལས་རིམ་ཆེན་མོ་འདི་བརྒྱུད་དེ། སྐབས་གཞན་དང་གཞན་དུ་འཕེན་པ་བཏང་སྟེ་བྱུང་ན་བཀའ་ཁྲི་དང་། མ་བྱུང་ན་སྤྱི་འཐུས་ཀྱི་རྐུབ་སྟེགས་ལ་སེམས་ཁྲལ་བྱེད་མཁན་སྐོར་ཞིག་བྱུང་དང་འབྱུང་མུས་ཡིན་པ་དེ་ཚོ་རེད། སེམས་ཁྲལ་ཅན་འདི་དག་གི་འཁྲབ་སྟོན་སྟེགས་བུ་གསུམ་དང་བཞི་རུ་འདུ་ཞིང་། དང་པོ། རང་ཉིད་དངོས་སུ་བཀའ་བློན་ཁྲི་པ་དང་བོད་མི་མང་སྤྱི་འཐུས་ཀྱི་འོས་གཞིར་བཞེངས་པ་དང་། གཉིས་པ། བཀའ་བློན་ཁྲི་པའི་བགྲོ་གླེང་དང་གཏམ་བཤད་རིགས་ཀྱི་སྡིངས་ཆ་བསྐྲུན་པ། གསུམ་པ། བགྲོ་གླེང་དངོས་གཞིའི་སྐབས་དྲི་བ་དྲིས་ཀྱི་ཆ་ཤས་ལེན་པ། བཞི་བ། བཀའ་སྤྱིའི་ལས་དོན་ཐོག་བསམ་ཚུལ་བརྗོད་པ་དང་རྩོམ་ཡིག་སྤེལ་བ་སོགས་རེད། སེམས་ཁྲལ་ཅན་དེ་དག་ཁྲོད། བོད་མི་དམངས་ལ་ཞབས་འདེགས་ཞུ་རྒྱུའི་ལྷག་བསམ་དང་སེམས་ཤུགས་ལྷད་མེད་ཡོད་མཁན་ཡོང་ཆོག་མོད། ཆེས་ཉེན་ཁ་ཆེ་བ་ནི་ལྟ་གྲུབ་དང་ལངས་ཕྱོགས། ཚོགས་པ་བྱེ་བྲག་པའི་ལས་དོན་བསྒྲུབ་པའི་ཆེད་དུ་འཚང་ཁ་རྒྱག་མཁན་སྐོར་ཞིག་དང་། “བག་ལེབ་ཧྲིལ་བོར་འཐམ་ན། ཉུང་མཐར་ཕྱེད་ཀ་རེག་ངེས” ཟེར་བའི་དཔེ་ལྟར། སོ་སོ་མི་སྒེར་གཅིག་པུའི་ལོ་རྒྱུས་དང་སྙན་གྲགས། ཐ་ན་ལྟོ་རྒྱབ་ཁོ་ན་ཙམ་དམིགས་ཡུལ་དུ་བྱེད་མཁན་ཡང་ཡོང་ཉེན་འདུག
འདོད་ལྷའི་རིགས་ལ་འདོད་པའི་གཏམ་ལས་མེད༎
འདོད་པ་ཅན་གྱིས་དུས་རབས་མང་པོའི་རིང་༎
འདོད་པའི་ལག་པ་རང་གི་ཨམ་ཕྲག་ཏུ༎
འདོད་འདུན་ཟབ་མོས་བཅུགས་ཏེ་བོད་འབངས་ཕམ༎
སྤྱིར་བཏང་རྩོམ་སྒྲིག་པའི་གཏམ་བདེན་པ་རང་རེད། ཡིན་ནའང་ལོ་ངོ་མང་པོའི་རིང་ནས་རང་གི་ཁྱིམ་ཚང་དང་རང་གི་ནང་མིར་བལྟ་སྐྱོང་དགོས་མིན་གྱི་ཐོག་ལ་ཤུགས་རྒྱགས་རྒྱུ་མང་དྲགས་པའི་རྐྱེན་གྱིས་ད་སྐབས་ང་ཚོའི་མགོ་ཐོག་ལ་འདྲའི་སྡུག་བསྔལ་གྱིས་སེར་བ་བབས་པ་རེད།
ཡིན་ནའང་ད་དུང་དེ་དག་གི་གནད་དོན་ཧ་གོ་གི་གོ་གིས་ད་དུང་སྒེར་གཅོད་རང་ལུགས་པའི་ལྟ་བ་དེ་སྤྱི་ཚོགས་ནང་ལ་ཤུགས་ཆེན་པོས་འཁྱེར་འོང་གི་འདུག ཆེས་ཉེན་ཁ་ན་ཡོད་པའི་བོད་པའི་གནས་སྟངས་འདི་ཡི་སྐབས་སུ་རྡོག་རྩ་ཆིག་སྒྲིལ་གྱིས་དཔུང་པ་མཉམ་གཤིབ་བྱེད་དགོས་པ་ལས། ནང་དམེ་དང་ཕྲག་དོག་གིས་ལམ་ལ་བུད་དེ་གཞུང་དོན་ཁ་ལ་ཁྱེར་ནས་སྒེར་དོན་ལྐོགས་ནས་སྒྲུབ་པ་ཡིན་ན། མཇུག་འབྲས་ཅི་ཞིག་ཡོང་རྒྱུ་ཡིན་པ་ངས་མ་བཤད་ཀྱང་གསལ་བོར་རེད་འདུག
དེ་འདྲ་སོང་ཙང་། རྩོམ་སྒྲིག་པས་དེ་ལྟ་བུའི་མན་ངག་རིན་ཆེན་རིལ་བུ་རེ་ང་ཚོའི་མི་དམངས་ལ་ལྡུག་ཐུབ་ན་དགའ་བསུའི་ལག་པ་ཐལ་མོ་བརྡབ་ངེས་སོ༎
དུས་རབས་གསར་པའི་ནང་རྩོད་དགོས་པ་དེ་མི་རྩོད་པར་རྩོད་མི་དགོས་དེ་བརྩད་ནས་མི་རིགས་ནང་ཁུལ་གྱི་དཀའ་ངལ་སེལ་མ་ཐུབ་པར་ད་ལྟའི་བར་དུ་ལྷག་པ་རེད།
ད་ནི་བསམ་བློ་ཞིབ་མོར་གཏོང་པའི་དུས་ལ་སླེབས་འདུག་པ་ཁ་གསལ་གཏིང་གསལ་རེད། གང་འཇོན་འཇོན་གཟུརགནས་ཀྱི་ཕྱོགས་ལ་བསྐྱོད་པར་གནང་རྒྱུ་ནི་གལ་ཆེན་ནང་གི་དོན་ཆེན་རེད་བསམ་རྒྱུ་འདུག
རྩོམ་སྒྲིག་པ་ལགས། ཇི་ལྟར་བྱས་ན་ད་གཟོད་༼ ཕྱི་ལྟར་དུ་སུ་ཞིག་འཁྲབ་སྟོན་ལ་མཁས་པ་དང་། ནང་ལྟར་དུ་སུ་ཞིག་ལག་ལེན་ལ་འཇོན་པ་སོགས་༽དཔྱོད་ཐུབ་བམ། མི་རབས་གསར་པ་ཞིག་ལ་དེ་བས་ཀྱང་ཅི་ལྟར་དཔྱད་དགོས་སམ།
རྩོམ་ཡིག་འདིའི་དུམ་ཚན་གོང་མ་དག་ལས་ཞོལ་མ་དག་ཁ་གསལ་བོ་རེད་ལ། ཉེན་ཁ་ངོ་མ་ཞིག་བཤད་ཀྱིན་འདུག དཔེར་ན། བོད་རྒྱལ་ཡོངས་དམངས་གཙོ་ཚོགས་པར་ལྟོས་དང་། མཆི་མེད་གཡུང་དྲུང་ཚོགས་གཙོ་རེད། བོད་རྒྱལ་ཡོངས་དམངས་གཙོ་ཚོགས་པས་བཏོན་པའི་བོད་མི་མང་སྤྱི་འཐུས་ཀྱི་འོས་གཞི་ནང་ཁོ་རང་ཡོད་པ་རེད། དེ་བཞིན། བཀའ་བློན་ཁྲི་པའི་བགྲོ་གླེང་རིགས་ཀྱི་སྡིངས་ཆའི་སྟེང་ནས་ཁོ་རང་གསལ་བསྒྲགས་བྱ་ཅི་ཐུབ་བྱེད་ཀྱིན་འདུག གཞན་འོས་བསྡུ་ཆེན་མོ་སླེབས་ལ་ཉེ་བའི་སྐབས་འདིར་བཀའ་ཤག་གི་ལས་དོན་དང་། བོད་མི་མང་སྤྱི་འཐུས་ཀྱི་འོས་འགན་སྐོར་ལ་རྩོམ་ཡིག་སྤེལ་མཁན་ཡང་ཇེ་མང་རེད།
རྩོམ་སྒྲིག་པ་ལགས་ཉིད་ཀྱིས་བཤད་པ་བདེན་བདེན་དུ་སྣང་། དེང་སྐབས་བཀའ་སྤྱིའི་འོས་བསྡུ་ཆེན་མོ་སླེབས་ལ་ཉེ་སྐབས་སྤྱི་དོན་ཁ་ལ་འཁྱེར་ནས་སྒེར་དོན་རྩོད་མཁན་མི་ཉུང་བ་ཞིག་ཡོད་པ་ངོ་མ་རེད།