དེ་རིང་སྔ་དྲོ་བོད་མི་མང་སྤྱི་འཐུས་ཚོགས་དྲུང་གིས་ཉེ་ཆར་བོད་གཞུང་དམངས་རྒྱལ་ཡོངས་ཚོགས་ཆེན་སྟེང་གི་བསམ་འཆར་ཕྱོགས་བསྡོམས་སྙན་ཐོའི་དོན་ཚན་ཁག་ལག་བསྟར་གནང་ཕྱོགས་ཐད། གསར་འགོད་གསལ་བསྒྲགས་ཤིག་འགྲེམས་སྤེལ་བྱས་པའི་ནང་། གྲོས་ཚོགས་ནང་གྲོས་ཆོད་བཞག་པ་ལྟར། སྤྱི་འཐུས་རྒྱུན་ལས་ལྷན་ཚོགས་ནས་དོན་ཚན་སོ་སོ་དབྱེ་གསེས་ཀྱིས་བཀའ་ཤག་ཁྱབ་ཁྱོངས་ལས་ཁུངས་ཁག་དང་བཅས་པར་འབྲེལ་ཆགས་ཆབ་སྲིད་དང་འབྲེལ་བའི་སྐོར་དོན་ཚན་ ༡༢ དང༌། མང་གཙོ་འཕེལ་རྒྱས་སྐོར་དོན་ཚན་ ༣ ཆོས་དང་རིག་གཞུང་སྐོར་དོན་ཚན་ ༩ ། གཞིས་ཆགས་སྲ་བརྟན་སྐོར་དོན་ཚན་ ༢༥ ། དཔལ་འབྱོར་སྐོར་དོན་ཚན་ ༡༢ ། ཤེས་ཡོན་སྐོར་དོན་ཚན་ ༢༥ ། བོད་དོན་དྲིལ་བསྒྲགས་སྐོར་དོན་ཚན་ ༡༡ ། རྒྱ་བལ་འབྲུག་གསུམ་ཕུད་པའི་ཁ་འཐོར་བོད་མིའི་སྐོར་དོན་ཚན་ ༥ ། འཕྲོད་བསྟེན་སྐོར་དོན་ཚན་ ༡༣ བཅས་ད་ལམ་ཟླ་ ༡༠ ཚེས་ ༡ ཉིན་བཀའ་དྲུང་ཡིག་ཚང་དུ་ཕུལ་ཟིན་པ་དང༌། དེ་བཞིན་འོས་བསྡུ་ལས་ཁང་དང་འབྲེལ་ཆགས་དོན་ཚན་བཞི་གོང་ཚེས་ཉིན་འོས་བསྡུ་ལས་ཁང་ལ་འབུལ་ལམ་ཞུས་ཟིན།
སྤྱི་འཐུས་ལྷན་ཚོགས་དང་འབྲེལ་ཆགས་ཆབ་སྲིད་སྐོར་དོན་ཚན་གཉིས་དང༌མང་གཙོའི་སྐོར་དོན་ཚན་ ༢༠ ། བཀའ་སྤྱི་ཐུན་མོང་ལ་འབྲེལ་བ་ཆགས་པའི་དོན་ཚན་ ༥༣ བཅས་ཡོད་པ་རྣམས་ཁུངས་སོ་སོར་ཟུར་འདོན་འབུལ་ལམ་ཞུས་ཡོད་ཅིང༌། གོང་གསལ་གནད་དོན་ཁག་གི་སྐོར་ཁུངས་སོ་སོ་ནས་ཐག་གཅོད་ལག་བསྟར་ཅི་བྱས་ཁ་གསལ་བྱུང་མཚམས་གསལ་བསྒྲགས་གནང་རྒྱུ་དང་། ཚོགས་ཆེན་གྱི་མཚན་ཐོག་ནས་ཐད་ཀར་གནང་དགོས་རིགས་ཕྱག་བསྟར་ཟིན་པ་ཁག་ནི། ཆབ་སྲིད་དང་འབྲེལ་བའི་དོན་ཚན་དང་པོ། ྋགོང་ས་མཆོག་གིས་ཕྱེད་བགྲེས་ཡོལ་ཡིན་པའི་སྐོར་བཀའ་སློབ་གནང་བ་དེས་གཞིས་བྱེས་བོད་མི་ཡོངས་ལ་ཟས་བཅུད་གཉིད་བྲལ་གྱི་བློ་འཚབ་ཧ་ཅང་ཆེན་པོ་ཡོང་བཞིན་པར་བརྟེན། དེ་འདྲའི་དགོངས་བཞེས་ནམ་ཡང་མི་མཛད་པའི་སྙན་ཞུ་ཚོགས་ཆེན་འདི་བརྒྱུད་འབུལ་རྒྱུར་སྤྱི་མོས་བྱུང་སྐོར་མཇུག་བསྡོམས་མཛད་སྒོར་ ྋགོང་ས་མཆོག་ལ་སྙན་སྒྲོན་ཞུས་སྐབས། ྋགོང་ས་མཆོག་གིས་ཟབ་གསལ་བཀའ་སློབ་ལམ་སྟོན་སྤྱི་སྩོལ་མཛད་ཟིན་པ་བརྒྱུད་ལམ་ཁག་ནང་ཐོན་པ་ཡོངས་གྲགས་ལ་བརྟེན། ཟུར་དུ་གསོལ་འདེབས་ྋསྙན་ཞུ་འབུལ་ལམ་ཞུ་མ་དགོས་པ་གནང་ཡོད།
མང་གཙོ་འཕེལ་རྒྱས་སྐོར་གྱི་དོན་ཚན་དང་པོའི་འབྲུ་དོན་བཞིན། སྤྱི་འཐུས་ལྷན་ཚོགས་ནས་ྋགོང་ས་མཆོག་ལ་བཀའ་དྲིན་རྗེས་དྲན་དང༌། མ་འོངས་པར་ཡང་མང་གཙོ་འཕེལ་རྒྱས་གཏོང་རྒྱུའི་ཐོག་མུ་མཐུད་བཀའ་སློབ་དུས་ནས་དུས་སུ་སྩོལ་གནང་ཡོང་བའི་གསོལ་འདེབས་ཀྱི་མཚན་འཁོད་ྋསྙན་ཞུ་ཞིག་ཀྱང་འབུལ་ལམ་ཞུས་ཡོད། ཆབ་སྲིད་དང་འབྲེལ་བའི་དོན་ཚན་ ༡༩ པ་དང༌། བོད་དོན་དྲིལ་བསྒྲགས་དང་འབྲེལ་བའི་དོན་ཚན་ ༤ པ་ལྟ་བུ་མང་ཚོགས་དང་གཞུང་འབྲེལ་མིན་པའི་ཚོགས་པ་ཁག་ལ་ཐུགས་སྣང་གཞེན་སྐུལ་གྱི་དོན་ཚན་རྣམས་འབྲེལ་ཆགས་སོ་སོས་ཐུགས་སྣང་དང་ཉམས་ལེན་གནང་རྒྱུར་འདི་ནས་བསྐྱར་དུ་སྐུལ་མ་ཞུ་བཞིན་ཡོད། ཞེས་བཀོད་འདུག
བསྡུ་སྒྲིག་བྱེད་མཁན། དོན་འགྲུབ་བཀྲ་ཤིས།
