ང་ཚོའི་མི་མང་པོ་ཞིག་དཔལ་འབྱོར་ཁོ་ནའི་ཕྱོགས་སུ་བརྒྱུགས་ཏེ་ལས་ཀ་བྱེད་ཀྱིན་ཡོད་པ་རེད། རྒྱལ་ཁབ་མེད་ཚེ་དཔལ་འབྱོར་ཇི་འདྲ་ཡོད་ཀྱང་ཧ་ལས་དགོས་པ་གང་ཡང་ཡོད་པ་མ་རེད། ད་ལྟ་ང་ཚོ་བཙན་བྱོལ་མིའི་ལུང་པར་བསྡད་ཡོད། ས་འདི་ནས་ང་ཚོ་ཡུན་རིང་འདུག་ཐབས་ཡོད་པ་མ་རེད། མི་གཞན་གྱིས་ང་ཚོའི་རྩ་དོན་འཐབ་རྩོད་བྱས་ཏེ་རྒྱལ་ཁབ་ང་ཚོར་སྤྲོད་སྲིད་ཀྱི་མ་རེད་ཟེར།
འཛམ་གླིང་རྒྱལ་ཁབ་ ༢༢ ནང་སྦག་སྦག་བཞོན་ཏེ་བོད་དོན་དྲིལ་བསྒྲགས་སྐོར་སྐྱོད་པ་བོད་རིགས་ན་གཞོན་ལྷག་པ་ཚེ་རིང་ལག ཁ་སང་ཕྱི་ཚེས་ ༢༨ ཉིན་བཞུགས་སྒར་ཁུལ་གྱི་མི་མང་སྟོང་ཕྲག་མང་པོའི་དགའ་འབོད་དང་ཕེབས་བསུའི་ཁྲོད་བཞུགས་སྒར་ངྷ་རམ་ས་ལར་འབྱོར་ཡོད། ཁ་སང་ཉིན་རྒྱབ་ཆུ་ཚོད་ ༢ ཙམ་ལ་ཀཱང་ར་རྫོང་དུ་སླེབས་སྐབས་བོད་ཀྱི་གཞོན་ནུ་ལྷན་ཚོགས་ཀྱི་དབུས་ས་གཉིས་དང་བཞུགས་སྒར་ཁུལ་གྱི་གཞོན་སྐྱེས་མང་པོ་ཞིག་སྔོན་བསུར་ཕྱིན་ཏེ་ཁ་བཏགས་སྒྲོན་འབུལ་ཞུས་ཡོད་ཅིང་། དེ་ནས་ས་རཱ་མཐོ་སློབ་དང་ངྷ་སྟེང་བོད་ཁྱིམ་སློབ་གྲྭ་བཅས་བརྒྱུད་དེ། ཕྱི་དྲོའི་ཆུ་ཚོད་ ༥ དང་ཕྱེད་ཀ་ཙམ་ལ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་གཞུང་འབྲེལ་མིན་པའི་ཚོགས་པ་ཁག་གི་ཕེབས་བསུའི་མཛད་སྒོ་ཐོག་འབྱོར་ཡོད།
སྐབས་དེར་ལྷག་པ་ཚེ་རིང་ལགས་ཀྱིས་རང་ཉིད་ངོ་སྤྲོད་དང་སྦྲགས་འཛམ་གླིང་སྐོར་སྐྱོད་ཀྱི་ལས་འགུལ་དེའི་དམིགས་ཡུལ་སྐོར་བརྗོད་དོན། ང་རང་ཆུང་དུས་ནས་བུ་གསོ་ཁང་གིས་གསོ་སྐྱོང་འོག་ཤེས་ཡོན་སློབ་སྦྱོང་གི་གོ་སྐབས་ཐོབ་མྱོང་མཁན་ཞིག་ཡིན་ལ། ད་ལྟ་རང་ཉིད་ཀྱི་རྐང་པའི་སྒང་ལངས་ཐུབ་པ་དེ་ཡང་བུ་གསོ་ཁང་གི་བཀའ་དྲིན་ཡིན། ཆུང་དུས་བུ་གསོ་ཁང་དུ་འགྲོ་སྐབས་ངྷ་ས་ནས་ཕྱི་གླིང་བ་སྦག་སྦག་སྐོར་མཁན་མང་པོ་མཐོང་བྱུང་ལ། སྐབས་དེར་མ་འོངས་པར་ང་ཡང་སྤྲོད་འཆམ་ཙམ་མིན་པར་བོད་དོན་དྲིལ་བསྒྲགས་ཀྱི་ཆེད་དུ་འཛམ་གླིང་གང་སར་འགྲོ་ཐུབ་ན་བསམ་པའི་འཆར་སྣང་སྐྱེས་མྱོང་། ཕྱིས་སུ་སློབ་གྲྭ་ཐོན་པ་དང་བལ་ཡུལ་ནང་ལོ་ཁ་ཤས་བསྡད་རྗེས་ཨ་རིའི་གྲོང་ཁྱེར་ནེའུ་ཡོག་ཏུ་ཕྱིན་ཏེ། ༡༩༩༦ ལོར་ཆེས་ཐོག་མར་སྐུའི་གཅེན་པོ་སྟག་འཚེར་རིན་པོ་ཆེ་མཆོག་གིས་གོ་སྒྲིག་གནང་བའི་ཞི་བའི་གོམ་བགྲོད་ཐེངས་དང་པོའི་ནང་མཉམ་ཞུགས་བྱས་ཏེ། ཟླ་གསུམ་རིང་ཨ་རིའི་ཝ་ཤིན་ཊོན་ཌེ་སེ་ནས་ནེའུ་ཡོག་ཏུ་ཡོད་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་བར་ཞི་བའི་གོམ་བགྲོད་དང་། ༡༩༩༨ ལོར་གོམ་བགྲོད་ཐེངས་གཉིས་པའི་ནང་མཉམ་ཞུགས་གནང་སྟེ་ཨ་རིའི་ཕོར་ལན་ཌི་ཨོར་གྷན་ནས་ཁེ་ན་ཌའི་གྲོང་ཁྱེར་ཝན་ཁེལ་ཝོར་བར་ཕྱིན་པ་ཡིན། སྐབས་དེར་ཨ་རི་དང་ཁེ་ན་ཌའི་མང་ཚོགས་ཀྱིས་བོད་དོན་སྐོར་ཤེས་རྟོགས་ཐུབ་ཀྱི་མི་འདུག ང་ཚོས་བོད་རང་བཙན་ཞེས་པའི་དབྱིན་ཡིག་གི་འཕྲེད་དར་འཕྱར་འགྲོ་དུས་ཅ་ལག་སྤྲོད་མཁན་ཡིན་པར་བསམ་ཏེ་ལེན་དུ་ཡོང་མཁན་དེ་འདྲ་ཡང་བྱུང་སོང་། གོམ་བགྲོད་དེ་དག་ལས་ང་ལ་ཉམས་མྱོང་མི་དམན་པ་ཞིག་ཐོབ་སོང་། ཞེས་ངོ་སྤྲོད་གནང་བྱུང་།
ལྷག་པ་ལགས་ཀྱིས་ཐེངས་འདིའི་ལས་འགུལ་གྱི་ཐོག་མའི་མགོ་འཛུགས་སྐོར་བརྗོད་དོན། བོད་ནང་གི་བོད་མི་ཚོར་རྒྱ་ནག་གིས་སྡུག་སྦྱོང་མནར་གཅོད་འོག་དཀའ་ངལ་འཕྲད་ཀྱིན་ཡོད་པ་དང་། ཁོང་ཚོས་ང་ཚོ་རྒྱ་གར་དང་ཕྱི་རྒྱལ་དུ་ཡོད་པའི་བོད་པ་ཚོར་རེ་བ་བཅངས་ཡོད་སྟབས། ༢༠༠༡ ལོར་ངས་བཟའ་ཟླ་དང་ལྷན་དུ་ང་རང་གིས་འཛམ་གླིང་ནང་སྦག་སྦག་སྐོར་བསྐྱོད་ཀྱི་ལས་འགུལ་ཞིག་སྤེལ་རྒྱུའི་སྐོར་ལ་གྲོས་བསྡུར་ཙམ་བྱས་པ་ཡིན། ༢༠༠༨ ལོའི་བོད་ནང་གི་བོད་མི་ཚོས་རྒྱ་ནག་གཞུང་གི་སྲིད་བྱུས་ལ་མི་འདོད་པའི་རྣམ་འགྱུར་བསྟན་ཏེ་ངོ་རྒོལ་སྐད་འབོད་བྱས་པ་རེད། སྐབས་དེར་ང་ནེའུ་ཡོག་ཏུ་ཡོད་ལ། ནེའུ་ཡོག་གི་གནམ་གཤིས་སོགས་ཧ་ཅང་སྐྱིད་པོ་འདུག གནམ་གཤིས་གྲང་དུས་ཚ་གློག་ཚ་དུས་གྲང་རླུང་གཏོང་རྒྱུ་སོགས་རང་ཉིད་ལ་དགོས་ཞིང་མཁོ་བའི་མཐུན་རྐྱེན་ཡང་ཧ་ཅང་འཛོམས་པོ་ཡོད་ཀྱང་། བོད་ནང་གི་བོད་མི་ཚོའི་གནས་སྟངས་དྲན་ཡོང་སྐབས་སེམས་པ་སྐྱིད་པོ་མི་འདུག རང་དང་ཤ་ཁྲག་གཅིག་པའི་སྤུན་ཟླ་དག་རང་ཡུལ་ན་གཞན་གྱིས་དམར་གསོད་གཏོང་གིན་ཡོད་ཀྱང་། རང་གིས་གཞན་ཡུལ་ནས་སྐྱིད་པོ་བཏང་བསྡད་ན་འགྲིག་གི་མི་འདུག་སྙམ་སྟེ། ད་ལོའི་ཕྱི་ཟླ་ ༣ པའི་ཚེས་ ༡༠ ཉིན་མགོ་འཛུགས་ཀྱིས་འཛམ་གླིང་རྒྱལ་ཁབ་ ༢༢ ནང་སྦག་སྦག་སྐོར་སྐྱོད་ཀྱིས་བོད་དོན་དྲིལ་བསྒྲགས་ཀྱི་ལས་འགུལ་འདི་སྤེལ་བ་ཡིན། འདི་ལོའི་ཕྱི་ཟླ་ ༣ པའི་ཚེས་མགོ་ནས་ཨ་རི་དང་ཁེ་ན་ཌའི་མངའ་སྡེ་ཡོངས་ལ་ཟླ་གཉིས་རིང་སྐོར་བསྐྱོད་བྱས་པ་ཡིན་ལ། ཕྱིས་སུ་ཡུ་རོབ་ཀྱི་རྒྱལ་ཁབ་ཡོངས་དང་ཨོ་སི་ཁྲོ་རི་ཡ་བཅས་སུ་སྐོར་བསྐྱོད་དང་འབྲེལ་རྒྱལ་ཁབ་དེ་དག་གི་ཚགས་པ་དང་རླུང་འཕྲིན། དེ་བཞིན་ཚོགས་པ་ཁག་དང་མི་སྒེར་སོགས་ལ་ང་རང་གི་ངོས་ནས་གང་ཐུབ་ཀྱིས་བོད་ནང་གི་གནས་སྟངས་དང་བོད་དོན་དྲིལ་བསྒྲགས་བྱས་པ་ཡིན། དེ་རིང་ང་བཞུགས་སྒར་ངྷ་རམ་ས་ལར་འབྱོར་ཏེ་ཐེངས་འདིའི་ངའི་སྦག་སྦག་སྐོར་སྐྱོད་ཀྱི་ལས་འགུལ་མཇུག་སྒྲིལ་བ་ཡིན། ཞེས་ལས་འགུལ་གྱི་བརྒྱུད་རིམ་དང་དམིགས་ཡུལ་ངོ་སྤྲོད་གནང་བྱུང་།
ཡང་ཁོང་གིས། བོད་ནང་གི་བོད་མི་ཚོ་དང་བསྡུར་ན་ང་ཚོ་རང་དབང་ལུང་པའི་བོད་མི་ཚོར་ཕྱོགས་ཡོངས་ནས་རང་དབང་ཡོད། བོད་ནང་གི་བོད་མི་ཚོས་རྒྱ་གར་དང་ཕྱི་རྒྱལ་ཡུལ་གྲུ་ཁག་ནང་ཡོད་པའི་བོད་མི་ཚོར་རེ་བ་བཅིངས་ཡོད། ཁོང་ཚོར་སེམས་ཤུགས་དང་སྤོབས་པ་ཆེན་པོ་ཡོད་སྐབས། ང་ཚོ་སེམས་ཤུགས་ཆགས་ཏེ་སྡོད་པ་དང་། ལས་འགུལ་གྱི་ནུས་པ་ཆུང་དུ་ཕྱིན་པ་ཡིན་ན་ང་ཚོར་བཅིངས་བའི་ཡིད་ཆེས་དང་རེ་བ་བརླག་པའི་ཉེན་ཁ་འདུག ང་ཚོའི་མི་མང་པོ་ཞིག་དཔལ་འབྱོར་ཁོ་ནའི་ཕྱོགས་སུ་བརྒྱུགས་ཏེ་ལས་ཀ་བྱེད་ཀྱིན་ཡོད་པ་རེད། རྒྱལ་ཁབ་མེད་ཚེ་དཔལ་འབྱོར་ཇི་འདྲ་ཡོད་ཀྱང་ཧ་ལས་དགོས་པ་གང་ཡང་ཡོད་པ་མ་རེད། ད་ལྟ་ང་ཚོ་བཙན་བྱོལ་མིའི་ལུང་པར་བསྡད་ཡོད། ས་འདི་ནས་ང་ཚོ་ཡུན་རིང་འདུག་ཐབས་ཡོད་པ་མ་རེད། མི་གཞན་གྱིས་ང་ཚོའི་རྩ་དོན་འཐབ་རྩོད་བྱས་ཏེ་རྒྱལ་ཁབ་ང་ཚོར་སྤྲོད་སྲིད་ཀྱི་མ་རེད། དེར་བརྟེན། མ་འོངས་པར་ང་ཚོ་བོད་པ་རྣམས་རྡོག་རྩ་གཅིག་སྒྲིལ་གྱིས་རྒན་རབས་པས་གཞོན་པ་རྣམས་ལ་འདས་པའི་ལོ་རྒྱུས་ངོ་སྤྲོད་དང་། གཞོན་པ་རྣམས་ཀྱིས་རང་ངོས་འགན་བླངས་ཏེ། བོད་དོན་དང་འབྲེལ་བའི་ལས་འགུལ་གཞི་རྒྱ་ཆེ་རུ་གཏོང་དགོས་པ་རེད། ཅེས་རེ་བ་བཏོན་བྱུང་།
མཇུག་མཐར། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དོན་འགྲུབ་ལྷ་དར་ལགས་ཀྱིས། དོ་ནུབ་ང་ཚོ་འདིར་འཛོམས་དོན་ལྷག་པ་ཚེ་རིང་སྒེར་ལ་ཐུག་འཕྲད་དང་རྒྱབ་སྐྱོར་གནང་རྒྱུའི་ཆེད་དུ་མིན་པར། ཁོང་གི་བོད་རྒྱལ་ཁབ་དང་མི་རིགས་ཀྱི་རྩ་དོན་ཆེད་དཀའ་ལས་རྒྱག་རྒྱུའི་སྙིང་སྟོབས་དང་ཆོད་སེམས་ལ་གུས་བཀུར་དང་ཡི་རངས་ཞུ་ཆེད་འཛོམས་པ་རེད། བོད་རྒྱལ་ཁབ་འདི་ཉིད་ ༡༩༤༩ ལོར་འཛམ་གླིང་ཐོག་མི་འབོར་མང་ཤོས་ཡིན་པའི་བཙན་རྒྱལ་རིང་ལུགས་ཀྱི་རྒྱལ་ཁབ་ཅིག་གི་འོག་ཏུ་བཅུག་ཡོད་ཀྱང་། ང་ཚོར་མི་འབོར་ས་ཡ་ ༦ ཙམ་ལས་མེད་ཀྱང་བོད་པ་མི་ངོ་རེ་ནས་འཐབ་རྩོད་ལ་འགན་བླངས་སྟབས། ད་བར་མི་ལོ་ ༦༡ ཕྱིན་ཀྱང་བོད་ཀྱི་འཐབ་རྩོད་གསོན་པོར་གནས་ཡོད་ལ། འཐབ་རྩོད་དེ་གསོན་པར་གནས་པ་ཙམ་དུ་མ་ཟད། ལྷག་པ་ཚེ་རིང་ལགས་ཀྱི་མི་གཅིག་གི་སྙིང་སྟོབས་དེས་རྒྱ་གཞུང་ལ་བོད་ཀྱི་འཐབ་རྩོད་ཤི་མེད་པ་དང་། གཞོན་སྐྱེས་ཚོས་མི་རྒྱུ་གཉིས་ཐོག་ནས་རང་གི་ཡོད་ཚད་བློས་གཏོང་བྱ་ཐུབ་པའི་བརྡ་ལན་སྤྲད་ཡོད། ཅེས་བརྗོད་བྱུང་།
དོན་འགྲུབ་ལྷ་དར་གྱིས་མུ་མཐུད་དུ་བརྗོད་དོན། བཙན་བྱོལ་བོད་མི་མང་པོ་ཞིག་གིས་ཨ་རིའི་དངུལ་ལོའི་ཆེད་དུ་དུས་ཚོད་སྐར་མ་རེ་རེ་རྩིས་རྒྱག་གི་ཡོད་ཀྱང་། ལྷག་པ་ཚེ་རིང་གིས་དུས་ཚོད་དང་ཁོར་ཡུག རང་གི་ཁྱིམ་ཚང་བཅས་བློས་བཏང་སྟེ། ཟླ་དང་ཟླ་བསྟུད་དེ་དཀའ་ལས་བརྒྱབ་པ་རེད། རྒྱལ་ཁབ་མེད་པའི་ཆབ་སྲིད་སྐྱབས་བཅོལ་བ་ཞིག་དང་ཕ་མ་མེད་པའི་དྭ་ཕྲུག་ཅིག་ཡིན་པའི་ཚོར་བའི་ཐོག་ནས། རྒྱ་ནག་གིས་ང་ཚོའི་ལུང་པ་བཙན་བཟུང་བྱས་པའི་སེམས་ཚོར་འོག ཁོང་གིས་རླབས་ཆེ་བའི་ལས་འགུལ་འདི་འདྲ་ཞིག་མགོ་བརྩམས་པ་རེད། བཙན་བྱོལ་སྤྱི་ཚོགས་ཀྱི་གཞོན་སྐྱེས་ཞིག་གི་བརྡ་ལན་གྱི་སྙིང་སྟོབས་དེ་ནི། གཞིས་ལུས་མི་དམངས་ཚོའི་ཡར་ལངས་ཀྱི་སྙིང་སྟོབས་ལས་བྱུང་བ་ཞིག་རེད། གོང་དུ་ལྷག་པ་ཚེ་རིང་ལགས་ཀྱིས་ཁོང་གི་ཁྱིམ་དུ་ལོ་ ༤ ཅན་གྱི་བྱིས་པ་ཆུང་ཆུང་ཞིག་གིས་པ་ལགས་ཕྱིར་ལོག་རྒྱུར་སྒུག་བསྡད་ཡོད་ཅེས་གསུངས་སོང་། ཁོང་གི་སྐད་ཆ་འདི་འདྲ་འདྲ་བར། བོད་ནང་དུ་ཕ་མ་མང་པོ་ཞིག་རྒྱའི་བཙོན་དུ་ལྷག་པ་དང་། བོད་གཞིས་དང་བྱེས་སུ་གྱར་བ་སོགས་ཀྱིས་ཕ་མ་དང་བཟའ་ཚང་མང་པོ་ཡ་བྲལ་དུ་སོང་ཡོད། འདི་ལ་བཙན་བྱོལ་སྤྱི་ཚོགས་ཀྱི་གཞོན་སྐྱེས་ཚོར་ཚོར་བ་རྣོན་པོ་ཞིག་དགོས་ཀྱི་འདུག ཅེས་བརྗོད་བྱུང་།
གསར་འགོད་པ། དོན་གོ་དང་དཔལ་ལྡན།
སྐུ་ཞབས་ལྷག་པ་ཚེ་རིང་ལགས་ཀྱི་སྙིང་སྟོབས་ལ་བསྔགས་བརྗོད་དང་རྫེས་སུ་ཡི་རངས་ཞུ་ཐུགས་རྗེ་ཆེ།
སྐུ་ཞབས་ལྷག་པ་ཚེ་རིང་སྐུ་ཉིད་ལ་བཅོས་མིན་ཐུགས་རྗེ་ཆེ་ཞུ་རྒྱུ་ཡིན། ཁྱེད་ཀྱི་སྙིང་སྟོབས་དང༌། རླབས་ཆེན་གྱི་དགོངས་གཞི། མི་རིགས་ཀྱི་ལ་ཞེན། ད་དུང་ལྷག་བསམ་དང་ཆོད་སེམས་བཅས་གང་ས་ཅི་ཐད་ནས་ནང་དགའ་དགོས་པ་དང༌། དགྲ་སྡུག་དགོས་པའི་ལས་འགུལ་གཟི་བརྗིད་ལྡན་པ་འདི་འདྲ་སྤེལ་གནང་བར་ངོ་མ་ངོ་མཚར་ཆེ།
འཛམ་གླིང་འདི་དང་ལྷག་པར་བོད་ཀྱི་ལོ་རྒྱུས་ཟིན་ཐོའི་ནང་རྒྱལ་ཁབ་༢༢ ཙམ་ལ་རྐང་གཉིས་སྣུམ་འཁོར་བཞོན་ནས་བོད་དོན་དྲིལ་བསྒྲགས་ཆེད་སྐོར་བསྐྱོད་བྱས་པ་ཐེངས་དང་པོ་ཡིན་པ་དང༌། ཟིན་ཐོའི་ནང་སྔར་མེད་ལོ་རྒྱུས་ཀྱི་ལེའུ་གསར་པ་ཞིག་བསྐྲུན་ཡོད།
འདི་ནི་བོད་མི་རིགས་ཀྱི་གཟི་བརྗིད་རེད་ལ། ལྷག་པ་ཚེ་རིང་སྒེར་ངོ་ནས་ཕྱི་འབྱུང་བུ་རབས་ཚོར་ཆེད་བཞག་བྱས་པའི་བཤུལ་ལམ་གསར་པ་ཞིག་ཀྱང་རེད།
བོད་དོན་ཆེད་འཛམ་གླིང་སྐོར་བསྐྱོད་བྱས་པ་འདིའི་ཐོག་ནས་བོད་དོན་དྲིལ་བསྒྲགས་ཀྱི་ཁྱབ་ཚད་མཐོན་པོར་གསོན་ཡོད་པ་སྨོས་མེད་ཐོག ྋགོང་ས་སྐྱབས་མགོན་ཆེན་པོས་དུས་རྟག་ཏུ་བོད་མི་མི་རེ་ངོ་རེས་འགན་འཁུར་ལེན་དགོས་པའི་བཀའ་སློབ་དག་ལ་ཉམས་ལེན་བྱེད་བཞིན་པ་དང༌། བྱེད་དགོས་པའི་བརྡ་ཞིག་སྤྲད་པ་རེད་སྙམ། ད་དུང་ཁོང་གི་སྐོར་བསྐྱོད་ལས་འགུལ་དེའི་ཐོག་ནས་དགྲ་བོ་རྒྱ་དམར་ལ་ང་ཚོ་མི་རབས་གསར་པ་རྣམས་ཀྱིས་བོད་དོན་བརྗེད་མེད་པར་སྔར་ལས་བོད་དོན་ལས་འགུལ་ཚ་ཚ་འུར་འུར་བྱེད་བཞིན་པ་དང༌། བྱ་རྒྱུ་ཡིན་པའི་བརྡ་ལེན་གསལ་པོ་རེད་པ་རེད།
ལྷག་པ་ཚེ་རིང་ལགས། ཐུགས་རྗེ་ཆེ། ཁྱེད་ནས་བོད་རིགས་གཞོན་སྐྱེས་ཚོར་མིག་དཔེ་ཡག་པོ་བསྐྲུན་སོང་།
ད་རེད་ཙམ་མ་ཡིན་པར་རྗེས་སུ་མུ་འཐུད་འདི་འདྲ་བའི་ལས་འགུལ་སྤེལ་ཐུབ་པའི་རེ་བ་ཞུ། བཀྲིས་བདེ་ལེགས།
སྦག་སྦག་བཞོན་ནས་བཞོན་དགོས་ཆོད་པ་ཟེར་ན། འདི་འདྲ་ལ་ཟེར། ཁམས་བཟང་། བཀྲ་ཤིས་བདེ་ལེགས་ལྷག་ཚེ་ལགས། ཐུགས་རྗེ་ཆེ།
ཧ་ཅང་ཡག་པོ་འདུག་ག
བོད་གཞུང་གིས་གསོ་བ་ལ་དོན་མཐུན་འདུག་ག
གཞན་འགའ་ཞིག་གིས་རང་ཉིད་གིས་ལྟོ་གོས་ཡང་རག་མི་ཐུབ་འདུག་ག
སྙིང་སྟོབས་དང་ལྡན་ཞིང་མི་རིག་གི་ལ་རྒྱ་དང་ལྡན་པའི་སྐུ་ཞབས་ལྷག་པ་ལགས་ལ་བཀྲ་ཤིས་བདེ་ལེགས་ཁྱེད་ཀྱི་ལྷག་བསམ་དཀར་པོ་དེ་ཕྱིར་མངོན་གྲུབ་པ་རེད།
ལྷག་བསམ་མཚུངས་པ་མེད་པའི་རྒྱལ་གཅེས་པ་འདི་ལ་བསྔགས་རྗོད་དང་མཆོག་ཏུ་བསྟོད།བོད་རྒྱལ་ལོ།