འདི་ལས་ལྷག་པའི་ཆག་འཇིག་ཉམ་ང་ཞིག་ཡོང་རྒྱུ་མེད།

ཉིན་འདི་འགར་བོད་ནང་གི་སློབ་ཕྲུག་ཚོས་སྐད་ཡིག་སྲུང་སྐྱོབ་ཐད་ལས་འགུལ་བསྟུད་མར་སྤེལ་གྱིན་ཡོད་པའི་གོ་སྐབས་དང་བསྟུན་ཏེ། འདི་གའི་གསར་འགོད་པས་ས་རཱ་མཐོ་སློབ་ཀྱི་སློབ་དཔོན་བསོད་ནམས་རྒྱལ་མཚན་ལགས་སུ་བཅར་འདྲི་ཞུས་ཡོད།  

དྲི་བ། ཟླ་འདིའི་ཕྱི་ཚེས་ ༡༩ ཉིན་ནས་མདོ་སྨད་རེབ་གོང་ནས་མགོ་བརྩམས་ཏེ་མཚོ་སྔོན་ཞིང་ཆེན་གྱི་ས་ཁུལ་མང་ཆེ་བའི་སློབ་མ་རྣམས་ཀྱིས་ཞི་བའི་ངོ་རྒོལ་བྱས་པ་དང་། ཞིང་ཆེན་གཞན་དང་ས་ཁུལ་གཞན་གྱི་མཐོ་རིམ་སློབ་མས་ཀྱང་རྒྱབ་སྐྱོར་གྱི་ཆེད་དུ་ཞི་བའི་ངོ་རྒོལ་བྱས་ཡོད། ཐེངས་འདིའི་སློབ་མའི་ལས་འགུལ་འདིར་ཕྱོགས་ཡོངས་ནས་གཟིགས་སྟངས་གང་འདྲ་ཡོད་དམ།

ལན། དེའི་ཐད་ཐོག་མར་མཚོ་སྔོན་ཞིང་ཆེན་སློབ་གསོ་ཐིན་གྱིས་ ༢༠༡༠ ནས་ ༢༠༢༠ བར་གྱི་སློབ་གསོའི་འཆར་གཞི་དང་། དེའི་བར་གྱི་སློབ་གསོའི་རྩ་དོན་ཟེར་བའི་ཡིག་ཆ་གཉིས་མར་བསྒྲགས་ཏེ། གཞི་རིམ་གྱི་སྐད་ཡིག་དེ་རྒྱའི་སྐད་ཡིག་ཏུ་བསྒྱུར་དགོས་པའི་སྲིད་ཇུས་བཏིང་སྟབས། སློབ་མ་མང་བོའི་སེམས་ཁམས་ལ་ཕོག་ཐུག་དང་ཤེས་ཡོན་པ་མང་བོའི་སེམས་ཁམས་ལ་ཕོག་ཐུག་བཅས་ཕྱིན་ཏེ། ཐེངས་འདིའི་བོད་ནང་གི་སློབ་མའི་ངོ་རྒོལ་འདི་བྱུང་བ་རེད།

རྒྱ་ནག་གི་འཆར་གཞི་འདི་སྡུག་ཅག་ཅིག་ཡིན་པ་གསལ་བོ་རེད་ལ། སྤྱིར་བཤད་ན་རྒྱ་ནག་དམར་ཤོག་གི་རྩ་དོན་དངོས་ཀྱི་གནད་དོན་ཞིག་ཀྱང་རེད། མི་རིགས་མང་བོ་མཉམ་དུ་ཡོད་པའི་རྒྱལ་ཁབ་ཅིག་ཡིན་ན་མི་རིགས་གཞན་ལ་དབང་བསྒྱུར་བྱེད་ཐུབ་ཆེད། མི་རིགས་གཞན་པའི་སྐད་ཡིག་དེ་རྩ་མེད་དུ་གཏོང་དགོས་པའི་སྲིད་ཇུས་ཤིག་ཡོད། དཔེར་ན། སི་ཏ་ལེན་གྱིས་མི་རིགས་ཤིག་ལ་དབང་བསྒྱུར་བྱེད་དགོས་ན་སྔོན་ལ་མི་རིགས་དེའི་སྐད་ཡིག་མེད་པར་བཟོ་དགོས་ཞེས་པ་ལྟར། དམར་ཤོག་པར་ལངས་ཕྱོགས་དེ་ལྟ་བུ་ཞིག་ཡོད་སྟབས། དེ་ལྟ་བུའི་ལངས་ཕྱོགས་ཤིག་རྒྱབ་ལྗོངས་བྱས་ཏེ་ད་ལྟའི་འཆར་གཞི་འདི་བཏོན་པ་རེད། མཚོ་སྔོན་ཞིང་ཆེན་སློབ་གསོ་ཐིན་གྱི་མགོ་གཙོ་ཝིང་ཡེ་པུའུ་ཡི་གཏམ་བཤད་ནང་། སྐད་ཡིག་སློབ་ཁྲིད་ལ་བསྒྱུར་བ་གཏོང་རྒྱུ་དེ་དོན་དག་ཤུགས་ཆེན་པོ་ཞིག་གི་སྒང་ནས་གླེང་གི་ཡོད་པར་མ་ཟད། ཁོའི་སྐད་ཆའི་ནང་གི་ཤེས་དགོས་པའི་དོན་དག་གལ་ཆེ་ཤོས་ཤིག་ཡོད་པ་ནི། འདི་ཀྲུང་དབྱང་གི་དགོངས་དོན་དང་མཐུན་གི་ཡོད། རྒྱལ་ཁབ་སློབ་གསོ་ཨུ་ཡོན་ལྷན་ཁང་གི་སྲིད་ཇུས་དང་མཐུན་གི་ཡོད། རྩ་ཁྲིམས་དང་མཐུན་གི་ཡོད་ཅེས་བསྒྲུབ་བྱེད་བཏང་ཡོང་དུས། འདིའི་རྒྱབ་ཕྱོགས་སུ་མཚོ་སྔོན་ཞིང་ཆེན་གཅིག་པུའི་སྲིད་ཇུས་ཤིག་མིན་པར། རྒྱལ་ཁབ་སློབ་གསོ་ཨུ་ཡོན་ལྷན་ཁང་གི་འཆར་འགོད་ཡོད་པ་དེ་གསལ་བོ་རེད། དེ་བཞིན་བོད་གཅིག་པུའང་མིན་པར། རྒྱལ་ཡོངས་ཀྱི་གྲངས་ཉུང་མི་རིགས་ཡོད་ཚད་ཀྱི་སྟེང་དུ་ལག་བསྟར་བྱ་རྒྱུའི་སྲིད་ཇུས་ཤིག་ཡིན་པ་གསལ་བོ་རེད། དེར་བརྟེན། རེབ་གོང་ནས་མགོ་བཙུགས་ཏེ་མཚོ་སྔོན་ཞིང་ཆེན་གྱི་ས་ཁུལ་མང་བོ་ཞིག་ནས་སློབ་མའི་ལས་འགུལ་འདི་སྤེལ་བ་རེད། པེ་ཅིན་མི་རིགས་སློབ་ཆེན་གྱི་སློབ་མས་རྒྱབ་སྐྱོར་གྱི་ཚུལ་དུ་ངོ་རྒོལ་བྱས་པ་དེ་གལ་ཆེན་པོ་རེད་ལ། ལས་འགུལ་འདིར་དོ་སྣང་བྱ་དགོས་ཀྱི་འདུག བཙན་བྱོལ་སྤྱི་ཚོགས་དང་ཤེས་ཡོན་ཅན་རྣམས་ཀྱིས་དོ་སྣང་བྱ་དགོས་ཀྱི་འདུག

ང་ཚོས་རྒྱ་ནག་ལ་བདེན་དོན་རྩོད་པ་དེ་ཆོས་དང་རིག་གཞུང་གི་ཆེད་དུ་ཡིན་ཟེར་གི་ཡོད། ལོ་མང་བོའི་སྔོན་དུ་ང་ཚོས་བཤད་བསྡད་པའི་ཆོས་དང་རིག་གཞུང་བསྣུབ་གི་འདུག་ཟེར་བ་དེ། ད་ལྟ་དངོས་སུ་ང་ཚོའི་མི་རིགས་ཀྱི་རིག་གཞུང་གི་རྩ་བ་སྐད་ཡིག་ལ་དོ་ཕོག་བཏང་ཡོང་དུས། འདི་འཛམ་གླིང་གི་འགྲོ་བ་མིའི་ཐོབ་ཐང་གི་ཁྲིམས་ལུགས་དང་རྒྱ་ནག་གི་བཅའ་ཁྲིམས་དོན་ཚན་བཞི་པའི་ནང་གསེས་དག རྒྱལ་ཁབ་མི་རིགས་ལས་དོན་ཨུ་ཡོན་ལྷན་ཁང་གིས་གཏན་འབེབས་བྱས་པའི་སྒྲིག་གཞི་དག་དང་འགལ་འགྲོ་གི་འདུག མིའི་རིགས་ས་ཁོངས་རང་སྐྱོང་གི་བཅའ་ཁྲིམས་དོན་ཚན་བཅུ་པ་བཅས་ལ་འགལ་འགྲོ་གི་འདུག དེར་བརྟེན་བོད་ནང་གི་ཤེས་ཡོན་པ་དང་བོད་ཕྱིའི་ཤེས་ཡོན་པ་གང་ཡིན་རུང་། འདིའི་སྐོར་ལ་རྩོད་གླེང་བྱས་པ་དེ་ཁྲིམས་འགལ་ཆགས་མེད། ཁྲིམས་འགལ་ཆགས་མཁན་དེ་རྒྱ་ནག་དབུས་སློབ་གསོ་ཨུ་ཡོན་ལྷན་ཁང་གི་སློབ་གསོའི་ལམ་སྟོན་སྲིད་ཇུས་དང་མཚོ་སྔོན་ཞིང་ཆེན་སློབ་གསོ་ཐིན་གྱི་བྱེད་ཕྱོགས་ཡིག་ཆ་གཉིས་ཁྲིམས་དང་འགལ་བ་གསལ་བོ་རེད།

དྲི་བ།  སྲིད་ཇུས་གསར་བ་འདི་ནི་རིག་གནས་གསར་བརྗེ་མཇུག་སྒྲིལ་རྗེས་ཀྱི་བོད་སྐད་ཡིག་གི་ཚེ་སྲོག་ལ་ཐད་ཀར་རྒོལ་བ་ཚབས་ཆེ་ཤོས་དེ་རེད་སྙམ། དེར་བརྟེན་འདི་ཉེན་ཁ་ཆེན་པོ་ཞིག་ལ་གཟིགས་ཀྱི་ཡོད་དམ།

ལན། འདི་རྦད་དེ་ཉེན་ཁ་ཆེན་པོ་རེད།  ༡༩༥༩ ལོར་སྤྱི་ཚོགས་རིང་ལུགས་ཀྱི་ལམ་ཕྱོགས་སློབ་གསོ་ཟེར་བའི་ལས་འགུལ་ཞིག་བསླངས་པ་རེད། དུས་ཡུན་དེ་ལོ་བཞིའི་རིང་བསྡད་པ་དང་དུས་ཡུན་དེའི་ནང་ཆས་གོས་སྙོམས་སྒྲིག་གི་ལས་འགུལ་ཏེ། དཔེར་ན། སྐབས་དེར་མདོ་དབུས་ཁམས་གསུམ་གྱི་སྐྱེས་པ་ཚང་མའི་མགོའི་སྐྲ་རིང་པོ་བཞར་བ་དང་། བུད་མེད་ཀྱི་སྐྲ་གཏུབ་པ་སོགས་ཆས་གོས་དང་རྒྱན་ཆར་བསྒྱུར་བ་གཏོང་རྒྱུའི་ལས་འགུལ་ཞིག་སྤེལ་ཡོད། དེའི་རྗེས་དྲུག་ཅུ་རེ་དྲུག་ནས་དངོས་སུ་རིག་གཞུང་གཏོར་ཕམ་གཏོང་རྒྱུ་དང་རྙིང་བཞི་རྩ་གཏོར་གྱི་ལས་འགུལ་སྤེལ་བ་རེད། ལས་འགུལ་དེ་ ༡༩༧༦ ལོར་མོ་ཙཱེ་ཏུང་གྲོངས་པ་དང་མཉམ་དུ་མཇུག་བསྒྲིལ་བ་དང་། དེའི་རྗེས་སྤྱི་ཚོགས་རིང་ལུགས་ལམ་ཕྱོགས་གསར་མའི་སློབ་གསོ་ཟེར་བའི་ལས་འགུལ་ཞིག་གི་མགོ་བརྩམས་ཏེ། དེའི་ནང་དུ་འཐིམ་བསྡད་པ་རེད། དེའི་རྗེས་ནས་ཐེངས་བཅུ་གཅིག་པའི་ཚང་འཛོམས་གྲོས་ཚོགས་གཉིས་པ་ཚོགས་ཏེ། དམར་ཤོག་ཚོགས་པ་རང་གིས་མི་རིགས་ཀྱི་སྐད་ཡིག་དང་ཆོས་དང་རིག་གཞུང་། ཡུལ་སྲོལ་གོམས་གཤིས་འདི་དག་དེའི་སྔོན་དུ་ལེན་པའོ་དང་མི་བཞི་ཤོག་ཁག་གིས་གཏོར་བརླག་བཏང་བ་རེད། འདི་དག་བྱེད་མཁན་དག་ནི་དུས་ཚོད་དེ་དག་ནང་ཡང་དག་པའི་སྲིད་ཇུས་ཀྱི་དགོངས་དོན་མ་གཏོགས་པར་བྱས་ཐལ་ཤོར་ཉེས་བྱུང་སྟབས། དེ་དག་བཅོས་དང་ཡང་བསྐྱར་མིའི་རིགས་ཀྱི་སྐད་ཡིག་སོགས་བསྐྱར་གསོ་དང་། ལྷག་པར་དུ་སྐབས་དེར་ཞིང་གཤེགས་༸ཀུན་གཟིགས་པན་ཆེན་རིན་པོ་ཆེ་མཆོག་གིས་བོད་ཁུལ་དུ་ཧ་ཅང་སྐུ་ངལ་བསྐྱོན་པ་སོགས། བོད་སྐད་ཡིག་གི་སྒྲོམ་གཞི་མ་ལག་ཅིག་ཚུར་གསོ་ཐུབ་པ་བྱུང་བ་རེད། དེ་བདུན་ཅུའི་མཇུག་དེར་མགོ་བཙུགས། བརྒྱད་ཅུའི་ནང་གཞུང་གྲུབ། དགུ་བཅུའི་ནང་འབྲས་བུ་སྨིན་ཡོང་བའི་བརྒྱུད་རིམ་ཞིག་རེད། དེ་ལྟར་འབྲས་བུ་སྨིན་ཡོང་དུས་རྒྱ་ནག་ལ་དེའི་སྟེང་དུ་ལྟ་སྟངས་ཤིག་ཡོད་པ་གསལ་བོ་རེད། ལྷག་པར་དུ་མཚོ་སྔོན་ཞིང་ཆེན་ལ་མཚོན་ན་ལྗོངས་དང་ཞིང་ཆེན་བཞིའི་ནང་ནས་བོད་སྐད་ཡིག་གི་གཞི་རྐང་འཛིན་ས་ལྟ་བུ་ཆགས་ཡོད་སྟབས། ལག་པ་འཆང་སྟངས་ཀྱང་ས་ཁུལ་དེ་ག་རང་གི་ནང་དུ་ལག་པ་འཆང་བ་དེ་དམིགས་འདུན་མི་ལེགས་པ་ཞིག་རེད།

རིག་གནས་གསར་བརྗེ་ཆེན་མོའི་སྐབས་དངོས་སུ་བསླབ་མི་ཆོག་པ་བཟོས་པ་རེད། རྦད་དེ་ནག་སུབ་ཀྱི་བཟོ་ལྟ་ཡང་བཟོས་པ་རེད། ངས་བསམ་བློ་བཏང་ན་འདི་ལས་ཚབས་ཆེ་བ་ཞིག་ཡོང་རྒྱུ་མི་འདུག དངོས་སུ་རིག་གཞུང་གི་རྩ་བ་སྐད་ལ་ལག་པ་འཆང་སྟེ་རྩ་མེད་བཟོ་བཞིན་ཡོད། ཡིན་ནའང་། ད་ཐེངས་བཤད་སྟངས་སྙན་མོ་ཞིག་བཤད་ཀྱི་ཡོད། དཔེར་ན། ཞིང་ཆེན་སློབ་གསོ་ཐིན་གྱི་མགོ་གཙོ་རང་གིས་རྒྱལ་ཁབ་ལ་ཁ་ཕྱོགས་ན་རྒྱའི་སྐད་ཡིག་སྦྱོང་དགོས་ཟེར་བ་དེ་རེད། གཅིག་ནས་རྒྱའི་སྐད་ཡིག་མ་སྦྱངས་ན་རྒྱའི་ཞེན་ཁོག་བསླེབ་ཀྱི་མི་འདུག་ཟེར་བ་དེ་རེད། གཉིས་ནས་ཉིས་སྟོང་བརྒྱད་དང་དགུ་བཅུ་གོ་གྲངས་ཀྱི་དོན་རྐྱེན་དང་ཡང་འབྲེལ་བ་འདུག དོན་རྐྱེན་དེ་དག་མི་རིགས་ཀྱི་སེམས་ཁམས་དང་རིག་གཞུང་གི་སེམས་ཁམས་ནས་ཚུར་སྨིན་གྱི་ཡོད་སྟབས། དངོས་སུ་མི་རིགས་ཀྱི་སེམས་ཁམས་དེ་དག་བཅོས་དང་གཤག་བཅོས་བྱ་རྒྱུའི་ལམ་ཁ་ཞིག་ཏུ་གོམ་པ་སྤོ་མགོ་བརྩམས་པ་དང་། དེ་བཞིན་ཁོའི་སྐད་ཆའི་ནང་དུ་རྒྱལ་ཁབ་ལ་ཁ་ཕྱོགས་དགོས་ཀྱི་ཡོད་ན། རྒྱའི་སྐད་ཡིག་ཤེས་དགོས་པ་རེད་ཅེས་དང་ང་ཚོས་རྒྱལ་ཁབ་ལ་འགན་ཁུར་ཏེ་རྒྱལ་ཁབ་ཀྱི་ཁེ་ཕན་ཨང་དང་པོར་བཟུང་ནས་རྒྱའི་སྐད་ཡིག་སྦྱོང་དགོས་ཞེས་སྐད་ཤུགས་ཆེན་པོའི་སྟེང་ནས་བཤད་པ་རེད། འདིའི་སྟེང་ནས་རྒྱ་ནག་གིས་འཛམ་གླིང་ལ་བལྟས་ཏེ་སྲིད་ཇུས་གསར་བ་ཞིག་མགོ་བརྩམས་པ་རེད་ལ། འཛམ་གླིང་སྐད་ཡིག་གི་རྒྱ་ཁྱོན་ལ་འགྲན་རྩོད་བྱ་རྒྱུར་ཡང་དམིགས་འདུག གང་ལྟར་ང་ཚོ་བོད་ལ་མཚོན་ན་འདི་ལས་བྱེད་ཐབས་གདུག་རྩུབ་ཅན་བཀོལ་རྒྱུ་མེད་པ་དང་འདི་ལས་ལྷག་པའི་ཆག་འཇིག་ཉམ་ང་ཡོང་རྒྱུ་མེད་པ་ལྟ་བུ་རེད་ལ། མི་རིགས་ཤིག་ལ་མཚོན་ན་མི་རིགས་དེ་ནག་སུབ་གཏོང་རྒྱུའི་སྲིད་ཇུས་སྡུག་ཤོས་དེ་རེད།

དྲི་བ། ད་ལྟའི་བྱེད་ཕྱོགས་ལ་བལྟས་ན་ཐེངས་འདིའི་སློབ་མའི་ངོ་རྒོལ་རེ་འབོད་ལ་དང་ལེན་མི་བྱེད་པའི་ཐོག ཕྱི་ཚེས་ ༢༢ ཉིན་མཚོ་སྔོན་ཞིང་ཆེན་གྱི་སློབ་གསོ་ཐིན་གྱིས་གསལ་བསྒྲགས་སྤེལ་བར་བལྟས་ན་སྲིད་ཇུས་ཇེ་མཁྲེགས་ཇེ་སྡུག་ཏུ་གཏོང་རྒྱུའི་ལངས་ཕྱོགས་བརྟན་པོ་འདུག དེར་བརྟེན་འདིའི་ཐད་དུ་ང་ཚོས་བྱེད་ཐུབ་པ་དང་བྱ་དགོས་པ་གང་འདུག

ལན། རྒྱ་ནག་རང་གིས་གཏན་འབེབས་དང་ཕྱིར་བསྒྲགས་བྱས་པའི་གནད་དོན་གང་ཡིན་རུང་། དེ་མཁྲེགས་འཛིན་བྱ་རྒྱུ་ནི་ཁོང་ཚོའི་གོམས་གཤིས་རེད། དེར་བརྟེན་མུ་མཐུད་མཁྲེགས་འཛིན་བྱེད་ཀྱི་རེད། ཁོང་ཚོ་ལའང་མཁྲེགས་འཛིན་བྱས་ཏེ་མཐར་བསྐྱལ་རྒྱུའི་ལམ་ཁ་དེ་མ་གཏོགས་མེད།  དམར་ཤོག་གི་རྩ་བའི་སྒྲོམ་གཞི་དང་ཆབ་སྲིད་ཀྱི་སྒྲོམ་གཞི་གྲུབ་སྟངས་ཏེ་ཁོང་ཚོས་ཐག་གཅོད་བྱས་པའི་བྱ་བ་གང་ཡིན་རུང་མཐར་འཁྱོལ་མ་བྱས་པར། ལམ་ཁ་གཞན་པ་བརྒྱུད་དེ་འགྱུར་བ་གཏོང་རྒྱུའི་སྲིད་ཇུས་མ་ལག་གི་སྒྲོམ་གཞི་ཞིག་ཁོང་ཚོར་གྲུབ་མེད་སྟབས། དང་ཐོག་ཞི་བའི་སྒང་ནས་མཐར་སྐྱེལ་བྱེད་གི་རེད། གལ་སྲིད་ཞི་བའི་སྒང་ནས་མ་ཡོང་ན་ཐབས་གཞན་ཞིག་ཡོད་པ་ནི་དྲག་པོ་བྱ་རྒྱུ་དང་བཙན་གནོན་བྱ་རྒྱུ། ཞི་དྲག་གི་སློབ་གསོ་སྤྲད་དེ་བཙོན་འཇུག་བྱ་རྒྱུ་སོགས་བྱེད་ཐབས་འདྲ་མིན་སྣ་ཚོགས་བེད་སྤྱད་དེ། ད་ལྟའི་སྲིད་ཇུས་འདི་རྒྱུན་མ་ཆོད་བར་དུ་དམ་འཛིན་བྱ་རྒྱུ་ཡིན་པ་དེ་གཏན་འཁེལ་རེད། དེར་བརྟེན་ལས་འགུལ་འདི་བསླངས་ཟིན་པའི་རྗེས་སུ་རླུང་འཕྲིན་དང་བརྙན་འཕྲིན། དེ་བཞིན་ཞིང་ཆེན་གྱི་ཁྱབ་ཁོངས་ཡོངས་སུ་ཡིག་ཆ་འགྲེམ་སྤེལ་བྱས་པ་སོགས་ལ་ལྟ་ཉན་བྱས་ན་ཤེས་རྟོགས་ཐུབ་ཀྱི་འདུག

ཡིན་ནའང་། ང་རང་ཉིད་ཀྱི་བསམ་བློ་གཏོང་སྟངས་ལྟར་བྱས་ན། སྲིད་ཇུས་འདི་མཐར་འཁྱོལ་གི་མ་རེད། ངས་དེ་ལྟར་ཟེར་དོན། སྲིད་ཇུས་འདི་བོད་ཙམ་མ་ཡིན་པར་གྲངས་ཉུང་མི་རིགས་གཞན་དག་གི་སེམས་ཁམས་སུའང་ཕོག་ཐུག་འགྲོ་བ་རེད། དེ་བཞིན་དོན་དག་འདི་འཛམ་གླིང་ལ་སྐད་གྲགས་ཆོད་ཀྱི་ཡོད་ལ། འགྲོ་བ་མིའི་ཐོབ་ཐང་དང་འགལ་ཡོད་སྟབས། རྒྱལ་སྤྱིའི་ཚོགས་སྡེ་ཁག་གིས་གནོན་ཤུགས་བསླེབ་ཚེ། རྒྱ་ནག་ནང་ཁུལ་དུའང་དྲང་བདེན་སྐྱོང་མཁན་དང་བློ་གཟུ་བོར་གནས་མཁན་གྱི་ཤེས་ཡོན་ཅན་ཡང་མང་བོ་ཡོད་པས། དེ་དག་ཡོངས་ཀྱི་སེམས་ཁམས་སུ་ཕོག་ཐུག་འགྲོ་བཞིན་ཡོད་སྟབས། སྲིད་ཇུས་འདི་དུས་ཡུན་གང་འཚམ་ཞིག་ལས་ཚེ་རིང་བོ་གནས་མི་ཐུབ་པར་འགྱུར་བ་གཏོང་དགོས་འཁེལ་གྱི་རེད་སྙམ།

དྲི་བ། སྲིད་ཇུས་གསར་བ་འདི་ཀྲུང་དབྱང་གི་རེ་བ་དང་མཐུན་ཞིང་རྒྱལ་ཁྱབ་ཀྱི་ཁྲིམས་ལུགས་དང་མཐུན་པ། མི་དམངས་མང་ཚོགས་ཀྱི་རྩ་བའི་ཁེ་ཕན་དང་རེ་འདུན་ལ་མཐུན་སྐོར་བཤད་ཀྱི་ཡོད། དེ་ལྟར་ཡིན་ན་གྲངས་ཉུང་མི་རིགས་ཁག་གི་ས་གནས་སུ་འདི་ལྟ་བུའི་ཁྲིམས་ལུགས་གསར་བ་ཞིག་ལག་བསྟར་བྱེད་པར། རྒྱ་ནག་གི་ཁྲིམས་ནང་དུ་སྔོན་ནས་གཏན་འབེབས་བྱས་ཡོད་དམ། ཡང་ན་ཁྲིམས་ལུགས་གསར་བ་ཞིག་བཟོ་རྒྱུར་ལྷག་ཡོད།

ལན། ཉེ་བའི་ཆར་སྲིད་ཇུས་གསར་བ་འདི་བསླེབས་ནའང་རྒྱ་ནག་གི་རྩ་ཁྲིམས་ཀྱི་དོན་ཚན་ལ་འགྱུར་བ་ཐེབས་མེད། སྔོན་མ་ཡོད་པའི་རྩ་ཁྲིམས་ལ་འགྱུར་བ་ཐེབས་མེད་སྟབས་ཁྲིམས་འགལ་ཆགས་ཡོད། མི་རིགས་ས་ཁོངས་ནས་མི་རིགས་རང་གི་རང་སྐྱོང་སྲོལ་ཡིག་འཛུགས་རྒྱུ་དང་རང་གི་སྐད་ཡིག་གི་སྟེང་ནས་རྒྱལ་ཁབ་ཀྱི་ལས་ཀ་གཉེར་རྒྱུ་བཅས་ནི་རྩ་ཁྲིམས་ཀྱི་སྟེང་ནས་ཐག་ཆོད་ཡོད། དེ་མ་གཏོགས་རྒྱལ་སྲིད་སྤྱི་ཁྱབ་ཁང་གིས་གཏན་འབེབས་བྱས་པའི་མི་རིགས་ས་གནས་རང་སྐྱོང་གི་སྲོལ་ཡིག་དང་ཡང་འགལ་ཡོད། ཡིན་ནའང། རང་ཞིང་གི་རྩ་བའི་ཁེ་ཕན་དང་མཐུན་གི་ཟེར་བ་དེར་གསལ་བཤད་ངོ་མ་ཞིག་ཡོད། གང་ཡིན་ཟེར་ན། སྐད་གཉིས་སྨྲ་བ་ཟེར་དུས་རྒྱ་ཡིག་དང་བོད་ཡིག་གཉིས་ཀ་ཤེས་མཁན་གྱི་སྤུས་ཀ་ཅུང་ཞན་པོ་རེད། དེའི་ནང་ནས་ཀྱང་རྒྱ་ཡིག་གི་ཆུ་ཚད་ཀྱིས་འདང་གི་མི་འདུག དེ་དང་མཐུན་གི་འདུག་ཅེས་བསྒྲུབ་བྱེད་བཀོལ་གྱིན་ཡོད། དེར་བརྟེན་མཚོ་སྔོན་ཞིང་ཆེན་གྱི་མི་རིགས་ས་ཁོངས་ཁུལ་གྱི་མི་རིགས་ཀྱི་དགོས་མཁོ་དང་མཐུན་གི་འདུག་ཅེས་མ་སྐད་རྒྱའི་སྐད་ཡིག་བཞག་སྟེ། འཛིན་གྲྭ་གསུམ་པ་བཞི་བ་ནས་བོད་སྐད་ཡིག་སློབ་ཁྲིད་བྱས་ན་མཐུན་གི་འདུག་ཟེར་གི་ཡོད། དེ་མི་མངོན་པའི་བསྒྲུབ་བྱེད་དེ་རེད།

འོན་ཀྱང་། དེའི་ཐད་ནས་མང་བོ་ཞིག་ལ་དག་བཅོས་བྱ་དགོས། ང་ཚོ་རྒྱ་གར་ནང་བཙན་བྱོལ་དུ་ཡོང་མཁན་ཚོར་མཚོན་ན་དང་པོ་ནས་དབྱིན་ཇི་བསླབས་ཏེ་མཉམ་དུ་བོད་ཡིག་ཀྱང་བསླབས་ནའང་། མཐའ་མར་བོད་ཡིག་གི་ཤེས་ཚད་དེ་དབྱིན་ཡིག་ལས་སྐྱོ་བ་ཆགས་འགྲོ་བ་དེ་གསལ་བོ་ཡིན་སྟབས། འཛིན་གྲྭ་དང་པོ་ནས་རྒྱ་ཡིག་བསླབ་སྟེ་འཛིན་གྲྭ་གསུམ་པ་བཞི་བར་བསླེབ་རྗེས་བོད་ཡིག་བསླབ་ཚེ། དེ་གཉིས་དོ་ཉམས་ཡོང་གི་མེད་པ་རྒྱ་ནག་གིས་གསལ་བོར་ཤེས་ཀྱི་ཡོད་མོད། རྒྱ་ཡིག་གི་རྨང་གཞི་ཚུགས་ཏེ་བོད་ཡིག་རིམ་གྱིས་འདོར་རྒྱུར་ལམ་འགྲོ་ཕྱིན་ཚེ། ཁོང་ཚོའི་རེ་བ་ནི་བོད་ཡིག་གི་ཕན་ཐོགས་ཀྱི་མི་འདུག བོད་ཡིག་ནུས་མེད་རེད་ཅེས་བོད་ཡིག་རང་བཞིན་གྱིས་མཐར་འཕུད་རྒྱུ་དེ་རེད། གཉིས་ནས། འདི་ལྟ་བུའི་བསྒྱུར་བཅོས་ཤིག་གཏོང་ཐུབ་ཚེ། ད་ལྟ་སློབ་གྲྭ་ཁག་ཏུ་ཡོད་པའི་དགེ་རྒན་ཆ་ཚང་གཅིག་ནས་ཕོགས་སྤྲད་དེ་ལས་ཡོལ་བྱེད་པའམ། ལས་ཀ་གཞན་ལ་ངོ་བོ་བསྒྱུར་བ། གང་ལྟར་སློབ་གྲྭ་ནས་གནས་ཐུབ་ཀྱི་མེད་པ་གསལ་བོ་རེད། དེའི་ཚབ་ཏུ་དེང་སྐབས་རྒྱ་ནག་ལ་ལས་མེད་མང་བོ་ཞིག་ལྷག་ཡོད། སྲིད་ཇུས་འདི་རྒྱ་མི་རིགས་ལ་ལས་ཀའི་དགོས་མཁོ་སྐོང་བྱེད་ཀྱི་སྲིད་ཇུས་ཤིག་ཡིན་པའང་ཟུར་བལྟས་ལེབ་མཐོང་རེད།

དེར་བརྟེན། ང་ཚོ་བོད་ཀྱི་ཁེ་ཕན་དང་རྩ་བ་ནས་མཐུན་གི་མི་འདུག ཡིན་ནའང་། ཁོང་ཚོས་ཁེ་ཕན་དང་མཐུན་གི་འདུག་ཟེར་བའི་གནས་ཚུལ་གཞན་ཞིག་བཤད་ཡོད། ད་ལྟ་ཐོན་བསྡད་མཁན་དག་གི་རྒྱ་ཡིག་གི་ཤེས་ཚད་དམའ་བ་ཡོད་སྟབས། སྲིད་འཛིན་ལས་ཁུངས་ཁག་ཏུ་ལས་བགོ་བྱ་ཐུབ་ཀྱི་མེད་ལ། སྲིད་ཇུས་གསར་བར་བསྐྱོད་ཚེ་རྗེས་མ་སློབ་གྲྭ་ཐོན་མཁན་ལ་ལས་བགོ་རྒྱག་ཐུབ་ཀྱི་རེད་ཅེས་ཟེར་གྱི་ཡོད། དེ་ལྟ་བུའི་ལྟ་ཚུལ་དེ་མི་རིགས་ལ་མཐོང་ཆུང་དང་མི་རིགས་དབྱེ་འབྱེད་བྱས་པ་ཞིག་རེད། མི་རིགས་ས་ཁོངས་ནས་མི་རིགས་ཀྱི་སྐད་ཡིག་དང་མི་རིགས་དེའི་ཡུལ་སྲོལ་གོམས་གཤིས་དང་མཐུན་པའི་སྒང་ནས་མི་རིགས་ཀྱི་སྐད་ཡིག་རིག་གཞུང་ལ་སྲུང་སྐྱོབ་བྱས་ཏེ། མི་རིགས་ལ་སྲུང་སྐྱོད་བྱ་དགོས། དེའི་སྟེང་དུ་དོན་དག་གཞན་ཞིག་བཤད་པ་ནི། སློབ་ཞུགས་ཀྱི་སློབ་མའི་གྲངས་ཚད་དེ་ཉུང་ཉུང་རེད་ལབ་ཀྱིན་ཡོད། སློབ་ཞུགས་ཀྱི་སློབ་མའི་གྲངས་ཚད་ཐད་ནས། ང་ལོ་བཅོ་བརྒྱད་བཅུ་དགུའི་སྔོན་དུ་བོད་ནས་ཚུར་ཡོང་བ་རེད་ལ། ངའི་ཕ་ཡུལ་ལ་མཚོན་ན་བོད་རྒྱ་ཡིག་རིགས་གང་བསླབ་ཀྱང་སློབ་གྲྭར་འགྲོ་གི་འདུག་མ་གཏོགས། ང་ཚོའི་ས་ཆ་ནས་སྤྱི་ལེ་ལྔ་བཅུ་དྲུག་ཅུའི་མཚམས་སུ་ཡར་སོང་ན། སློབ་གྲྭར་སོང་ཚེ་བོད་ཡིག་སློབ་གི་མ་རེད་ལ། རྒྱ་ཡིག་ཤེས་གིའང་མ་རེད། ཕན་ཐོགས་གི་མ་རེད་ཅེས་སློབ་གྲྭར་གཏོང་གི་མེད། དེ་ལས་བོད་ཡིག་ཅིག་བསླབ་བཞག་ན་རྒྱལ་ཁབ་ཀྱི་ལས་བྱེད་མ་ཉན་རུང་རང་གི་ས་ཁུལ་ནས་རང་མགོ་ཐོན་འགྲོ་གི་རེད་ཟེར་བའི་བསམ་ཚུལ་ཞིག་ཡོད། དེར་བརྟེན་སློབ་ཞུགས་ཀྱི་གྲངས་ཚད་ད་དུང་ཡང་མར་ཆགས་ཏེ་ཇེ་ཉུང་དུ་འགྲོ་བ་ཉག་གཅིག་རེད།

ཡང་ཡིག་ཐོག་ན་མི་འདུག་ཀྱང་། ཝིང་ཡེ་པུའུ་ཡི་སྐད་ཆར་ཉན་ན། མི་རིགས་ཀྱི་སློབ་གྲྭ་ཁག་གི་མཐུན་རྐྱེན་སྐྱོ་བོ་རེད་ལབ་སོང་། མཐུན་རྐྱེན་སྐྱོ་བོ་ཡིན་པའི་རྒྱུ་མཚན་གང་ལ་ཐུག་པ་རེད། མི་རིགས་ཀྱི་སློབ་གྲྭ་ཁག་ཞིང་ཆེན་སློབ་གསོ་ཐིན་གྱིས་བདག་པོ་རྒྱག་དགོས་ཀྱི་མེད་དམ། དེ་སེམས་ནང་གི་དྲི་བ་གལ་ཆེ་ཤོས་ཤིག་རེད། དེ་བཞིན་ཚིག་ཤུགས་དེ་ནས་རྒྱ་ཡིག་གི་སློབ་གྲྭ་ཁག་གི་མཐུན་རྐྱེན་ཡག་པོ་ཡོད་པ་དང་མི་རིགས་སློབ་གྲྭ་ཁག་གི་མཐུན་རྐྱེན་སྐྱོ་བ་ཡོད་པ་དེ་གསལ་བོ་རེད། མཐུན་རྐྱེན་ཡག་ཏུ་གཏོང་དགོས་ཀྱི་འདུག་ཟེར་དུས་རྒྱའི་སྐད་ཡིག་རྨང་གཞིར་མ་བཞག་གཏོང་མི་ཐུབ་པ་དང་། རྨང་གཞིའི་སྐད་དེ་བོད་ཡིག་བཞག་ན་མཐུན་རྐྱེན་དེ་སྤྲོད་མ་ཐུབ་པའི་རྒྱུ་མཚན་གང་ལ་ཐུག་པ་རེད། སྐད་ཡིག་དང་མཐུན་རྐྱེན་གཉིས་བར་གྱི་རྒྱུ་རྐྱེན་གང་ལ་ཐུག་འདུག

ཡང་ཁོས་དོན་དག་གཞན་ཞིག་བཤད་ཡོད། ཁྲོམ་རའི་ལམ་ལུགས་ཀྱི་ནང་དུ་ཕར་ཞུགས་ཐུབ་པར་ཕན་ཐོགས་གི་རེད་ཟེར། ཁྲོམ་རའི་ལམ་ལུགས་ཀྱི་ནང་དུ་ཞུགས་རྒྱུར་རྒྱའི་སྐད་ཡིག་གིས་ཀྱང་གླགས་འཁེལ་གྱི་མ་རེད། རྒྱ་ནག་ནང་ཁུལ་དུ་བསྡད་ན་ཆོག་ཀྱང་། རྒྱ་ནག་གི་ས་མཚམས་དང་བརྒལ་རྗེས་རྒྱའི་སྐད་ཡིག་གིས་གླགས་འཁེལ་གྱི་མ་རེད། དཔེར་ན། ཉེ་ཆར་ང་ཞིང་ཀཱང་བརྒྱུད་སོག་པོར་ཐེངས་ཤིག་ཕྱིན་པ་ཡིན་ལ། ཞང་ཀཱང་ལ་མཚོན་ན་རྒྱའི་སྐད་ཡིག་དང་དབྱིན་ཇིའི་སྐད་ཡིག་ལས་དབྱིན་ཇིའི་སྐད་ཡིག་བདེ་བ་དང་བཀོལ་སྤྱོད་ཆེ་བ་འདུག་པས། རྒྱའི་ཁྲོམ་ར་དང་ཁ་བྲལ་ཏེ་འཛམ་གླིང་གི་ཁྲོམ་རར་ཞུགས་ན་རྒྱའི་སྐད་ཡིག་ཤེས་པའི་ཁེ་ཕན་གང་ཡང་མཐོང་གི་མི་འདུག དེ་ལྟར་བལྟས་ན། རྒྱུ་མཚན་གང་འདྲ་ཞིག་བཤད་ཀྱང་ཁ་གཡར་ས་དང་ཁག་འཇོག་ས་ཙམ་ལས་དོན་དག་ངོ་མ་མ་རེད།

དྲི་བ། གལ་སྲིད་བོད་ནང་དུ་རྒྱ་ནག་གི་མཁྲེགས་བཟུང་འོག་ཤེས་ཡོན་སྲིད་ཇུས་གསར་བ་འདི་ལག་བསྟར་བྱས་ཚེ། བཙན་བྱོལ་སྤྱི་ཚོགས་ནང་སྔོན་མ་ལས་བོད་སྐད་ཡིག་རང་གི་སྟེང་ལ་ཤུགས་རྒྱག་པ་དང་། དཔེ་སྟོན་སློབ་གྲྭ་ལྟ་བུ་མང་དུ་འཛུགས་པ། ཤེས་ཡོན་སྲིད་ཇུས་གསར་བའི་ནང་དུ་སྣོན་འཕྲི་སོགས་བྱས་ཏེ་གང་མགྱོགས་ལག་ལེན་ཏུ་བསྟར་བ་སོགས། བོད་ཕྱི་ཕྱོགས་ནས་ཤུགས་རྒྱག་དགོས་པ་འདྲ་མཐོང་གི་འདུག་གམ།

ལན། སྤྱིར་བཙན་བྱོལ་ནང་དེ་སྔོན་ནས་ལག་ལེན་ཏུ་བསྟར་བཞིན་པའི་ཤེས་ཡོན་སྲིད་ཇུས་དེས་ལས་ཀ་ཡག་པོ་བྱེད་ཀྱི་མེད་པ་གསལ་བོ་རེད་ལ། བོད་སྐད་ཡིག་ཙམ་མིན་པར་དབྱིན་ཡིག་དང་སློབ་ཚན་གང་གི་སྟེང་དུའང་གཞན་གྱི་རྗེས་ཆོད་ཀྱི་མེད། དེ་མགོ་མཇུག་བར་གསུམ་གང་ནས་འཐུས་ཤོར་དུ་ཕྱིན་པའམ། མ་ཤེས་པར་འཐུས་ཤོར་དུ་ཕྱིན་པ་སོགས་གང་ཡིན་རུང་། འཐུས་ཤོར་དུ་ཕྱིན་པ་དེ་ང་ཚོ་རང་གིས་གསང་བ་དང་སྤས་རྒྱུ་གང་ཡང་མེད། དེར་བརྟེན་དེ་བཅོས་སྒྲིག་བྱེད་པར་ཤེས་ཡོན་སྲིད་ཇུས་གསར་བའི་སྒྲོམ་གཞི་མ་ལག་ཅིག་བསྐྲུན་ཏེ། དཔེ་སྟོན་སློབ་གྲྭ་བཙུགས་ཡོད་ལ། སམ་བྷོ་ཊའི་ཁྱབ་ཁོངས་ཡོངས་དེ་ལ་བསྒྱུར་རྒྱུའི་བསམ་བློ་ཡང་གཏོང་གི་ཡོད། དེའི་ཐོག་བོད་ནང་བོད་སྐད་ཡིག་གི་གནས་བབ་ལ་འགྱུར་བ་ཕྱིན་སྐབས། བཙན་བྱོལ་ནས་དེའི་སྟེང་དུ་གོམ་པ་བརྒྱབ་སྟེ་རང་གི་སྐད་ཡིག་ལ་སྲུང་སྐྱོབ་དང་ཤུགས་སྣོན་རྒྱག་གི་རེད་ལ་རྒྱག་ཀྱང་དགོས་པ་རེད། དེ་འགན་ཁུར་ཆགས་ཡོད། ཡིན་ནའང་། དེས་ཕར་ཕྱོགས་ཀྱི་གྱོང་གུད་གཏན་ནས་གསབ་ཐུབ་པ་མ་རེད། 

བོད་ནང་ལོགས་རྩ་བ་རེད་ལ་བཙན་བྱོལ་སྤྱི་ཚོགས་ཡལ་ཀ་ལྟ་བུ་རེད། རྩ་བ་གཏོར་བརླག་ཏུ་བཏང་ཚེ་ཕྱི་ལོགས་ནས་མི་འབུམ་གཅིག་དང་ཁྲི་ལྔ་དྲུག་ཅིག་གིས་གང་ཡང་ཡོང་གི་མ་རེད་ལ། དེ་ཡང་རྒྱ་བལ་འབྲུག་གསུམ་གཙོས་ས་ཁུལ་མང་བོ་ཞིག་ཏུ་འཐོར་ཡོད་ཐོག འཚོ་བ་དང་དགོས་མཁོ། ཁོར་ཡུག་གི་གནས་བབ་སོགས་ཕྱོགས་མང་བོ་ཞིག་ནས་བསམ་བློ་བཏང་ན། ཕར་ཕྱོགས་ཀྱི་གྱོང་གུད་གསབ་པ་དང་མ་འོངས་པར་མི་རིགས་ཀྱི་ཚེ་སྲོག་གི་རྒྱུན་བསྲིང་ཐུབ་པའི་ཕུགས་རྒྱང་རིང་བོའི་ནུས་པ་ཞིག་ཐོན་གི་མ་རེད། ཡིན་ནའང་། འདི་ནས་ཁ་གཏད་བཅག་སྟེ་ནུས་པ་ཞིག་སྐྱེད་སྲིང་བྱ་རྒྱུ་གལ་ཆེན་པོ་རེད། ངས་དེ་དག་ལས་ཀྱང་གལ་ཆེ་བ་ཞིག་མཐོང་བ་ནི། གཞུང་དང་མང་ཚོགས། མི་རེ་ངོ་རེ་ནས་ད་ལྟའི་རྒྱ་ནག་གི་ནོར་འཁྲུལ་ཅན་གྱི་བྱེད་ཕྱོགས་སྲིད་ཇུས་དེར་སྐྱོན་བརྗོད་བྱ་དགོས་ཀྱི་འདུག འདི་འགྲོ་བ་མིའི་ཐོབ་ཐང་དང་མཉམ་འབྲེལ་རྒྱལ་ཚོགས་ཀྱི་སྲོལ་ཡིག མང་གཙོ་ཅན་གྱི་རྒྱལ་ཁབ་དང་དམར་ཤོག་ཅན་གྱི་རྒྱལ་ཁབ་གང་ཡིན་རུང་། དེ་དག་ཡོངས་རྫོགས་ཀྱི་ལམ་ལུགས་དང་འགལ་ཡོད་སྟབས། དངོས་ཤུགས་བརྒྱུད་གསུམ་ནས་རྒྱ་ནག་གཞུང་ལ་གནོན་ཤུགས་སྤྲད་དེ། ཕར་ཕྱོགས་ཀྱི་ཁོར་ཡུག་གི་ཁ་ཕྱོགས་བསྒྱུར་ཏེ་མྱུར་སྐྱོབ་བྱེད་པ་མ་གཏོགས། འདི་ནས་ཅིག་བསྐྲུན་ཏེ་ཕར་ནུས་པ་ཐོན་པ་ཞིག་ཡོང་གི་མ་རེད།

དྲི་བ། དེང་སྐབས་ས་རཱ་དང་ཝར་ཎ། ནོར་གླིང་སོགས་བོད་ཡིག་ཆེད་སྦྱོང་གི་མཐོ་སློབ་ཁག་ཅིག་ཡོད་ལ། སློབ་མ་མང་བོ་ཞིག་ལོ་རེ་བཞིན་ཆེད་སྦྱོང་འཛིན་གྲྭ་ནས་མཐར་ཕྱིན་གི་ཡོད། ཡིན་ནའང་། ན་ཚོད་ལ་དཔག་པའི་བསམ་བློའི་སྟོབས་ཤུགས་ཤིག་དང་ངར་ཤུགས་ཤིག་མི་འདུག དེ་གང་ལ་ཐུག་པ་རེད།

ལན། ཁྱོད་ཀྱི་ཚོར་བ་དེ་ང་ལའང་དེ་ག་རང་ཡོད། ཞིབ་འཇུག་ཀྱང་མང་བོ་བྱས་མྱོང་། མི་གཞན་པར་ཡང་བསམ་ཚུལ་དེ་འདུག དེ་བོད་ཡིག་སྦྱོང་མཁན་དང་དབྱིན་ཇིའི་སྐད་ཡིག་སྦྱོང་མཁན་གང་ཡིན་རུང་གཅིག་མཚུངས་སུ་ཡོད་པའི་སྐྱོན་ཞིག་རེད། བོད་མི་ཚོར་བུམ་པ་གང་བྱོའི་ཚུལ་དུ་ཟེར་བའི་དཔེ་ཡོད་པ་ལྟར་དགེ་རྒན་གྱིས་གང་ཤེས་པ་དེ་སློབ་མ་ཚོར་བསླབ། སློབ་མ་ཚོས་ཀྱང་དེ་མི་གཉིས་ཞིག་ལ་བརྒྱུད་རྒྱུ་དེ་ང་ཚོའི་ཤེས་ཡོན་གྱི་སྒྲོམ་གཞི་ཞིག་རེད། དེ་ལྟ་བུའི་ཁོར་ཡུག་ཅིག་གི་བཀག་རྒྱ་ཐེབས་ཏེ། དགེ་རྒན་གྱི་བསླབ་པ་དང་དེབ་སྟེང་དུ་ཡོད་པ་དེ་དཔེ་མཚོན་ཡིན་པ་ངོ་མ་འཕྲོད་པར། རང་གིས་དེ་ཚོ་དཔེ་མཚོན་དུ་བསྟེན་ཏེ་ལམ་ཁ་གསར་བ་ཞིག་འཚོལ་སྒྲུབ་བྱེད་དགོས་པ་མ་ཤེས། དགེ་རྒན་དང་སྤྱི་ཚོགས་གཉིས་ལ་དབྱེ་འབྱེད་ཀྱང་བྱེད་མ་ཐུབ་པར་ཡོངས་རྫོགས་གྲུ་བཞི་ཡིན་ན། གྲུ་བཞི་དང་ཀོར་ཀོར་ཡིན་ན་ཀོར་ཀོར་རྐྱང་རྐྱང་ལ་བསམ་བློ་འཁོར་བའི་སྟེང་ནས་ང་ཚོར་དཀའ་ངལ་འདི་འཕྲད་ཀྱིན་ཡོད།

སློབ་གྲྭ་ཁག་ཏུ་དཔེ་བླངས་ན་གསལ་བོ་ཤེས་ཀྱི་འདུག དཔེར་ན། དགེ་རྒན་ཞིག་གིས་གཏོང་ཡིག་འབྲི་སྟངས་ཤིག་མར་བསླབ་ཚེ། ཁོའི་འཛིན་གྲྭའི་ནང་སློབ་མ་བཞི་བཅུ་ཡོད་ན་གཏོང་ཡིག་དེའི་ཁ་བྱང་གཅིག་པ་ལས་སློབ་མ་རང་རང་གི་བསམ་བློ་བཏང་སྟེ་མགོ་བརྗོད་གཉིས་པ་ཞིག་གི་སྟེང་དུ་གོམ་པ་སྤོ་རྒྱུའི་གོམས་གཤིས་འཇགས་མེད། དེར་བརྟེན་རང་བཞིན་གྱིས་སྲོལ་རྒྱུན་གྱི་གོམས་གཤིས་འདྲ་བོ་ཞིག་ཆགས་བསྡད་ན་ངར་ཤུགས་བསླེབ་ཐུབ་ཀྱི་མ་རེད། ངར་ཤུགས་ཟེར་བ་དེ་མིའི་རིགས་སྟོབས་ཤིག་ཡིན་སྟབས་ཁ་ཕྱོགས་གསར་བ་ཞིག་འཚོལ་རྒྱུར། མིའི་བསམ་བློ་དེ་དཔྱད་བསྡུར་མང་བོ་བྱ་དགོས་ཀྱི་ཡོད། དེ་བཞིན་དགེ་རྒན་གྱི་མ་བསླབ་ན་རང་གིས་འཚོལ་སྒྲུབ་བྱེད་རྒྱུ་མེད་པའི་བསམ་བློ་ཞིག་འདུག དེ་ལྟ་བུའི་ཁོར་ཡུག་གི་གནས་སྟངས་དེ་དྲ་རྒྱའམ་རྒྱ་ཐག་གི་བཟོ་ལྟར་དམ་པོ་ཞིག་ཏུ་གྲུབ་འདུག་ལ། དེ་མ་གཏོར་བར་དུ་རང་འཇགས་འདུག་གི་མ་རེད་མ་གཏོགས་འདི་ལས་དུས་ནམ་ཡང་ཐར་གི་མ་རེད།

གསར་འགོད་པ། ཨ་རིག་འགྱུར་མེད།