ཨ་རིའི་བོད་དོན་དམིགས་བསལ་འབྲེལ་མཐུད་པ་སོགས་ཀྱིས་སྲིད་སྐྱོང་མཆོག་ལ་འཚམས་འདྲི་ཞུས།

ཐའེ་ཝན་གྱི་ཕྱི་འབྲེལ་བློན་ཆེན་དང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ། ཨོ་གླིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ། ཨ་རིའི་བོད་དོན་དམིགས་བསལ་འབྲེལ་མཐུད་པ་སོགས་ཀྱིས་སྲིད་སྐྱོང་སྤེན་པ་ཚེ་རིང་མཆོག་ལ་འཚམས་འདྲི་ཞུས་འདུག

དེ་འབྲེལ་་སྐུ་ཞབས་རི་ལེ་བྷར་ནེ་སི་ལགས་ཀྱིས་སྒེར་གྱི་ཨེག་སི་སྤྱི་ཚོགས་བརྒྱུད་ལམ་སྟེང་དུ། སྤེན་པ་ཚེ་རིང་ལགས་བསྐྱར་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་འདེམས་ཐོན་བྱུང་བར་བོད་མིའི་སྒྲིག་འཛུགས་དང་བོད་མིའི་ཚོགས་སྡེ་ཡོངས་ལ་འཚམས་འདྲི་ཞུ་རྒྱུ་ཡིན། ཨ་རིས་དམངས་གཙོའི་ལམ་ནས་འོས་འདེམས་བྱས་པའི་བོད་མིའི་མགོ་འཁྲིད་ཚོར་འབྲེལ་འདྲིས་ཀྱིས་བོད་མི་རྣམས་ལ་རྒྱབ་སྐྱོར་མུ་མཐུད་བྱ་རྒྱུ་ཡིན་ཞེས་གསུངས་འདུག

དེ་བཞིན། ཐའེ་ཝན་གྱི་ཕྱི་འབྲེལ་བློན་ཆེན་ལིན་ཆི་ཡ་ལོང་ལགས་ཀྱིས། ངས་ཐའེ་ཝན་གཞུང་གི་ཚབ་བྱས་ཏེ། ཁྱེད་རང་བསྐྱར་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་འོས་འདེམས་བྱུང་བ་དང་ལས་འཁུར་དམ་འབུལ་ཞུས་པར་འཚམས་འདྲི་ཞུ་རྒྱུ་ཡིན། དེ་ནི་ཁྱེད་ཀྱི་མགོ་འཁྲིད་ཀྱི་ནུས་པར་བོད་མི་མང་གི་ཡིད་ཆེས་དང་གདེང་འཇོག་བྱས་པ་མཚོན་གྱི་ཡོད། ཐའེ་ཝན་གྱིས་བོད་མིའི་སྙིང་སྟོབས་དང་ཆོད་སེམས་ལ་གུས་བཀུར་བྱེད་ཀྱི་ཡོད། ང་ཚོས་བོད་མི་ཚོའི་རང་དབང་དང་། འགྲོ་བ་མིའི་ཆེ་མཐོང་། བོད་ཀྱི་རིག་གཞུང་རྒྱུན་འཛིན་ཐོག་གི་འབད་བརྩོན་ལ་བསྔགས་བརྗོད་ཞུ་ཡི་ཡོད། ཐའེ་ཝན་གཞུང་ངོས་ནས་བོད་དང་ཐའེ་ཝན་བར་གྱི་མཛའ་གྲོགས་དང་། གཉིས་མོས་བསམ་ཤེས་ཟབ་ཏུ་གཏོང་རྒྱུ། མ་འོངས་མཉམ་ལས་དམ་ཟབ་སླད་གོ་སྐབས་བསྐྲུན་རྒྱུར་རེ་སྒུག་བྱེད་བཞིན་ཡོད། ཁྱེད་ཀྱི་བོད་མི་མང་གི་ཞི་བདེ་དང་སྟོབས་འབྱོར་རྒྱས་པའི་ལས་དོན་མཐའ་དག་ལམ་ལྷོངས་ཡོང་བའི་སྨོན་འདུན་ཞུ། ཞེས་གསུངས་འདུག

ཐའེ་ཝན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་ཝུ་པེ་ཡི་ (Wu Pei-yi)  ལགས་ཀྱིས། སྲིད་སྐྱོང་སྤེན་པ་ཚེ་རིང་མཆོག་གིས་ལས་ཡུན་རིང་བོད་མིའི་དམངས་གཙོའི་ལམ་ལུགས་གོང་འཕེལ་དང་། འགྲོ་བ་མིའི་ཐོབ་ཐང་སྲུང་སྐྱོབ། བོད་ཀྱི་ཆོས་དང་རིག་གཞུང་སྲུང་སྐྱོབ། དེ་བཞིན་རྒྱལ་སྤྱིའི་སྤྱི་ཚོགས་ནང་བོད་དོན་ཞུ་གཏུག་ཐོག་རྒྱུན་ཆད་མེད་པར་ཕྱག་ལས་གནང་ཡོད། ཁོང་གིས་འཛམ་གླིང་སྟེང་བོད་ནི་གནའ་སྔ་མོ་ནས་རྒྱ་ནག་གི་ཆ་ཤས་མིན་པ་བསྐྱར་ནན་དང་། བོད་ཀྱི་གནད་དོན་དེ་དྲང་བདེན་ཐོག་སེལ་དགོས་པའི་འབོད་སྐུལ་ཞུས་གནང་ཡོད། ཁོང་བསྐྱར་དུ་འོས་འདེམས་བྱུང་བ་དེས་བོད་མི་ཡོངས་ཀྱིས་ཁོང་གི་མགོ་འཁྲིད་ལ་ཡིད་ཆེས་དང་རྒྱབ་སྐྱོར་བྱེད་ཀྱི་ཡོད་པ་མཚོན་ཐུབ་པ་མ་ཟད། བཙན་བྱོལ་བོད་མིའི་དམངས་གཙོའི་འཕེལ་རྒྱས་དང་སོར་ཆུད་ཀྱི་ནུས་པ་མཚོན་གྱི་ཡོད། ཐའེ་ཝན་དང་བོད་གཉིས་ལོ་རྒྱུས་ཀྱི་རྒྱབ་ལྗོངས་མི་འདྲ་ཡང་། རང་དབང་དང་དམངས་གཙོ། འགྲོ་བ་མིའི་ཐོབ་ཐང་། རིག་གཞུང་ལ་ཆེ་མཐོང་བཅས་གཞི་རྩའི་རིན་ཐང་རྩ་ཆེར་འཛིན་པ་གཅིག་མཚུངས་ཡིན། ཐའེ་ཝན་མི་མང་གིས་བོད་མི་ཚོས་སོ་སོའི་དད་པ་དང་། སྐད་ཡིག རིག་གཞུང་། མི་རིགས་ཀྱི་ངོ་བོ་བཅས་དང་། འཛམ་གླིང་གི་སྣེ་གསུམ་པ་ཞེས་འབོད་པའི་མཐོ་སྒང་བོད་ཀྱི་ཐུན་མོང་མ་ཡིན་པའི་ཤུལ་བཞག་སྲུང་སྐྱོབ་བྱེད་པའི་འབད་བརྩོན་ལ་ཡིད་རངས་ཞུ་ཡི་ཡོད།

ང་ཚོས་བོད་མི་ཚོས་ཞི་བདེ་དང་། བྱམས་བརྩེ། དྲང་བདེན་བཅས་ལ་བཅངས་པའི་དམ་བཅའ་དེ་དེང་གི་འཛམ་གླིང་དང་། ལྷག་པར་དབང་ཤེད་རིང་ལུགས་རྒྱ་སྐྱེད་དང་། འགྲོ་བ་མིའི་ཐོབ་ཐང་ཇེ་སྡུག་ཏུ་འགྲོ་བཞིན་པའི་དུས་སྐབས་སུ་ངེས་པར་དུ་མཁོ་བའི་ཀུན་སྤྱོད་ཅིག་ཡིན་པར་ཡིད་ཆེས་བྱེད་ཀྱི་ཡོད། ཐའེ་ཝན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་ཐའེ་ཝན་དང་བོད་མིའི་སྒྲིག་འཛུགས་དབར་དམངས་གཙོ་དང་། འགྲོ་བ་མིའི་ཐོབ་ཐང་ཞུ་གཏུག ཆོས་དད་རང་དབང་། རིག་གཞུང་ཉར་ཚགས། ཤེས་ཡོན་བརྗེ་ལེན། རྒྱལ་སྤྱིའི་འབྲེལ་མཐུད་སོགས་ཀྱི་ཐོག་མཉམ་ལས་བྱ་རྒྱུར་རེ་སྒུག་བྱེད་བཞིན་ཡོད་ཅེས་གསུངས་འདུག

དེ་བཞིན་ཨོ་གླིང་རྒྱལ་ཡོངས་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་སྲིད་སྐྱོང་མཆོག་ལ། སྐུ་ཉིད་ལ་རྒྱལ་ཁ་ཐོབ་པ་དེས་བོད་མི་ཚོས་སྐུ་ཉིད་ཀྱི་དབུ་ཁྲིད་ལ་ཡིད་ཆེས་དང་བློ་གཏད་ཡོད་པ་མཚོན་ཐུབ། ང་ཚོས་སྐུ་ཉིད་ཀྱིས་བོད་མི་ཚོའི་རེ་བ་དང་མངོན་འདོད་སྒྲུབ་སླད་མུ་མཐུད་ལས་ཡུན་རིང་བྱ་བ་ལམ་ལྷོངས་ཡོང་བར་སྨོན་འདུན་ཞུ་ཡི་ཡོད། ཅེས་དང་། བོད་མིའི་རང་དབང་དང་། ཆེ་མཐོང་། གཞི་རྩའི་འགྲོ་བ་མིའི་ཐོབ་ཐང་བཅས་ལ་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད་ཅིང་བོད་རྒྱའི་དཀའ་རྙོག་གྲོས་མོལ་བརྒྱུད་ནས་སེལ་ཐབས་བྱ་རྒྱུར་རྒྱབ་སྐྱོར་མུ་མཐུད་གནང་རྒྱུ་ཡིན། ༸གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ནི་ཆོས་དད་རང་དབང་གི་གནད་དོན་དང་། ཆོས་ཕྱོགས་ཀྱི་ལམ་སྲོལ་ཞིག་ཡིན་པས་དེར་རྒྱ་ནག་གཞུང་གིས་ཐེ་བྱུས་གང་ཡང་བྱས་མི་ཆོག་ཅེས་གསུངས་འདུག

ཟླ་འདིའི་ཕྱི་ཚེས་ ༢༧ ཉིན་སྲིད་སྐྱོང་མཆོག་གིས་སྐབས་གཉིས་པའི་ལས་འཁུར་དམ་འབུལ་སྐབས། ཨ་རི་དང་ལྷོ་ཨ་མི་རི་ཁའི་རྒྱལ་ཁབ་ཨིལ་སལ་ཝ་ཌོ་ (El Salvador) དང་ཆིས་ལི་ (Chile)། དབྱིན་ཡུལ་དང་སི་ཁོ་ཊི་ལན་ཌི། རྒྱ་གར་བཅས་ཀྱི་བློན་ཆེན་ཟུར་བ་དང་གྲོས་ཚོགས་འཐུས་མི་ཚོས་ཡུལ་དངོས་ནས་སྲིད་སྐྱོང་མཆོག་ལ་འཚམས་འདྲི་གནང་ཡོད། ཕྱི་ལོ་ ༢༠༢༡ ལོར་སྐབས་དང་པོའི་སྲིད་སྐྱོང་གི་དམ་འབུལ་རྗེས། འཇར་མན་དང་ཧྥ་རན་སི། སྦེལ་ཇམ། ཅེཀ་སྤྱི་མཐུན་རྒྱལ་ཁབ། ཨ་རི་སོགས་ཀྱི་གནད་ཡོད་མི་སྣ་མང་པོས་སྲིད་སྐྱོང་ལ་འཚམས་འདྲི་ཞུས་མྱོང་།

གསར་འགོད་པ། སྐལ་བཟང་སྦྱིན་པ།